2007-4-30

1)
先講荷甲消息
尋晚既最後一輪聯賽
賽前AZ,阿積士同燕豪芬三隊同分
以得失球領先而排榜首既AZ
因有門將禾達文於開賽初段禁區內犯天條被逐兼輸12碼
最終作客不敵精英隊2:3
阿積士就作客羸威廉二世2:0
而燕豪芬主場大炒維迪斯5:1
最終燕豪芬以1球得失球既優勢羸得今季聯賽冠軍
直接晉身來季歐聯分組賽
而阿積士,AZ,川迪同埋海倫芬就要打附加賽爭歐聯既參賽資格
而洛達,飛燕諾,格羅寧根同埋烏德勒支就要打附加賽爭歐協既參賽資格

2)
韋根同埋鍚菲聯炮轟英超聯賽會
因為佢地只罰非法簽署泰維斯同埋馬斯真蘭奴既韋斯咸550萬鎊
而竟然冇罰到分

3)
艾拿戴斯同保頓請辭
傳聞佢會加盟曼城
因為準備收購曼城既蘭森係Big Sam既好友

4)
國米宣佈放棄收購保方

5)
列斯好大機會要88年來首次降到英甲
因為佢地之前主場被葉士域治逼和1:1
落後尾四既侯城3分,得失球仲要輸9球
最後一場聯賽要作客大炒第3既打呲
又要寄望侯城比人狂數
難矣......

6)
伯明翰同埋新特蘭來季會上返英超

7)
P.祖連奴同埋古柏可能選擇留隊
同里昂續約到2010年

2007-4-27 (2)

南華岩岩昨客聯華贏左3:1
肯定成為今季香港甲組聯賽冠軍!

2007-4-27 (1)

1)
英格蘭足總青年盃尋晚舉行第二回合
利物浦青年隊作客以1:0羸左曼聯青年隊
再於互射12碼贏4:2,宣佈成功衛冕
尋晚利記既小朋友0係新老闆吉列面前表現甚佳
Robbie Threlfall 於55分鐘為客隊射入全場唯一既入球
而佢地其實於比賽先後兩度射中柱
最終要以12碼同對手分勝負
客隊4射全中,但客隊卻有兩人宴客

2)西班牙既傳媒報導
沙維奧拿既經理人同皇馬會長卡達朗已達成口頭協議
沙維奧拿季尾會自由身加盟

3)
比拿美被傳會重返布力般
但0個傳聞有兩個版本
第一個版本係佢既傳會費高達800萬鎊
另一版本就係利記會用佢去換柏達臣

4)
據報哈化柏林打列文既主意
因為佢地既門將費達拿演出長期不穩
但列文多數會選擇接受阿仙奴既1年約

5)
巴勒莫同紐卡素都先後發表聲明
否認佢地同岩岩拒絕加盟富咸既艾歷臣有接觸

6)
尋晚歐洲足協盃既4強首回合賽事
奧沙辛拿主場羸西維爾1:0
前者全場都佔優
最終只入1球實在太少
而愛斯賓奴主場就令人意外地贏雲達不來梅3:0
後者輸既頭兩球都係輸死球
佢地既防守球員一如以往咁大意
及後門將韋爾沙仲因衝出禁區犯規而被逐
而人少打人多既結果就係再輸多球

7)
米卡李察士因做手術而缺席最後3場聯賽
以根治小腿(小弟記得佢脛骨係長期有傷既)同埋足踝既傷患

8)
馬甸尼0係對曼聯既比賽令人意外地只係踢左半場
原來係因為膝傷復發
仲可能要做手術
好有可能於季尾掛靴既佢將被迫提前收山

9)
祖記玩野咁將保方既身價定為5000萬鎊
以阻AC米蘭同國米提出收購

10)
普度斯基因膝傷要長抖半年

11)
法蘭克福既隊長鍾斯已落實於季尾以自由身加盟史浩克04

12)
西班牙傳媒報導
皇馬準備開價1000萬鎊收購加拿斯

2007-4-26 (2)

1)
科素因為想有更多既出場機會
佢可能於季尾加盟漢洛威

2)
鄭智同查爾頓表明
如果球隊護級失敗
佢會選擇0係借用合約結束後離隊
原因係英冠既打法太體力化

3)
奧沙辛拿同埋基達菲都想簽西班牙年青射手基柏
佢而家以借用身份效力韋斯咸

4)
曼城唔肯將原定星期六踢既曼城打呲延期一日

5)
奧雲將於下一場對雷丁既聯賽復出

6)
阿祖安奴因插水而被罰停賽兩場
國米不服上訴,但被駁回

7)
車仔睇中左梅西亞既新星柏祖里安

8)
里昂下季既陣容可能出現好多變動
因為包括古柏,泰亞高,卡卡巴,P.祖連奴,基斯,艾比度等球星都先後被傳離隊

9)
華亞得到格拉斯哥流浪續約1年

10)
米杜士堡開記招交代活基治既加盟詳情

11)
韋斯咸既班主對外表示
烏普頓公園球場唔岩球隊長遠發展
如果球隊要成為英超前六名既份子
一個更大既球場係必要
(小弟覺得佢地而家排二,護級成功先再講其他野啦)

12)
富咸又想搵新領隊
原本佢地唸住護級成功
就以70萬鎊年薪同而家既看守領隊山齊士簽長約
但而家又話覺得佢既能力一般
衰在基瑾同艾歷臣都唔肯加盟
而家佢地就打雲尼亞里既主意
(又係老問題......護到級先再唸啦)

13)
些路迪隊長連儂決定季尾離隊

14)
迪亞高同皇馬扯上關係
之前已經傳佢會加盟巴塞隆拿以代替迪高

15)
德國同奧地利既小報爆料
簡尼又有新歡
今次係現年20歲既03年奧地利小姐亞軍Jasmin
據稱佢係個硬照model

2007-4-26 (1)

1)
先講歐聯
尋晚車仔主場以1:0擊敗利記

先講出場陣容
車仔方面,卡華路趕及復出
但波歷克同埋艾辛就因為傷患同停賽而避戰
而利記方面,芬倫因頸傷缺陣
而辛頓就令人意外地踢正選,冇表現既佢仲打足90分鐘

上半場車仔既攻勢比較多同埋到肉
29分鐘,卡華路後上帶波打反擊
再送直線斜傳比杜奧巴
佢0係右路力壓艾加地波傳中
加歷查失位包唔到
後上既祖高爾擺脫艾比路亞輕鬆建功
其實0黎球可以唔輸
因為利記今場踢3個防中,中前場總共6個人
都可以比到卡華路咁多空位同時間去鬆容上腳十幾碼
跟住後防睇人又睇唔緊......都幾令小弟失望

而到左下半場利記以哥治入替上半場踢右中既比拿美
但作用唔大
因為利記既側擊實在太弱
如果我係馬克干沙利斯
睇到辛頓冇表現都可以踢足90分鐘
我真係會好傷心
而賓尼迪斯亦太遲先換入賓納特
後者於83分鐘先入替艾朗素
其實換走左艾朗素,都仲有馬斯查蘭奴同謝拉特去搶波
賓尼迪斯既應變真係值得商榷

而只計下半場既表現
利記對住領先後冇壓得咁前既車仔,其實不落下風
下半場既頭10分鐘更加壓住車仔去踢
但謝拉特既勁射又比施治撲出
到左下半場後段
車仔再壓上前,但未能再入波
林伯特繼上半場後再一次勁射
但都係比拉爾拿撲出
而杜奧巴於完場前亦繼上半場後再次頭搥攻門
但都係未能命中目標
結果車仔以一球小勝演出在水準以下既利記
利記雖然未能取得作客入球
但拉爾拿先後兩度擋出林伯特既勁射
令不致多失既利記對晉級唔仗使太悲觀

2)
阿倫波爾因心臟病病逝,終年61歲
佢係66年冠軍隊陣容當中最年輕既球員
佢係繼卜比摩亞後,第2個逝世既66年冠軍隊成員
佢既踢法唔自私,運動量又驚人
於中場駁腳,助攻助守
可以講係任何強隊都一定要有既人才
1971年,阿仙奴為左簽佢,不惜付予愛華頓當時破紀錄既22萬鎊轉會費
佢亦曾任國家隊隊長,代表作有羸西德1:0同埋大炒蘇格蘭5:1
佢於2000年獲MBE
佢曾於80年代初來港搵食,而上年亦曾訪港,任7人賽既嘉賓

2007-4-25

1)
杜迪同太陽報聲稱佢會季尾離隊
佢仲再一次數臭賓尼迪斯
而禾夫斯堡已經打佢主意
(但禾夫斯堡已經有個鋼門贊斯
佢當打,只係即將31歲
又高大,成6呎5吋
仲穩健兼擅撲12碼
如果杜迪下季真係過檔既話
佢同贊斯是但一個坐冷板
都唔係小弟願意見到既)

2)
尋晚曼聯主場以3:2擊敗左AC米蘭
上半場5分鐘
趕及傷癒復出既迪達趕住犯錯
佢再一次0係接高波既時候出事
面對傑斯既角球,佢出下又唔出
雖然擋到下C7既頭搥
但回身想再撲既時候
就比軒斯阻住,情急下拍左個波入龍門
先輸波既客隊
之後靠卡卡連入兩球
半場反客為主領先2:1
而兩個失波曼聯既防守球員都要負責
失第一球,係因為卡域克追唔掂卡卡,而前者仲追追下收步
失第二球,包抄入中路既艾夫蘭越幫越忙,竟然將軒斯撞跌
最終益晒以一敵四既卡卡
下半場曼聯將防線壓上,演出亦大有改善
而AC米蘭就令人意外地先後收起馬甸尼及加度素
主隊終於0係59分鐘追平
史高斯趁後備入替既邦利拿太輕出
腳面CHIP個過頭波比朗尼
尼斯達想包都包唔到
朗尼心口一控,再輕鬆入波
講波佬既意見係:如果馬甸尼在陣,0黎球未必會輸
小弟既意見係:有腦既後衛都唔會好似邦利拿咁唔理身邊既朗尼而死衝出去
之後曼聯繼續壓住AC米蘭0黎搶
而後者及後連基拿甸奴都收起埋
改踢零箭頭陣式
而到補時階段.....90分23秒
朗尼按應C7傳送,趁尼斯達趕唔到出腳攔阻而快射近柱入網
講波佬既意見係:朗尼射得好,既勁又有少少曲墜
小弟既意見係:迪達移位慢,封唔晒近柱兼落地稍慢
及後,球證補左2分16秒(雖然第四旁證提議補3分鐘)
(小弟覺得如果曼聯冇0係補時入波
補大約2分鐘係合理既
因為下半場停頓同換人都少
但計埋曼聯既慶祝時間
就唔多岩數啦)

3)
今次已經係AC米蘭近年來第N次反勝為敗
講原因
我覺得上至領隊,下至球員既心態都有問題
(我唸左成個半場都唔明點解安察洛堤要咁快換走馬甸尼同加度素
佢兩個真係傷得咁勁?(特別係前者))
(而班友係唸住羸梗,定係太保守?)
另外,佢地體能不足,所以後勁不繼亦係意料中事
再加上迪達始終係球隊既計時炸彈
......

4)
曾效力過曼城既後衛蘭森有意以九千萬英鎊收購球會
佢之前曾出價收購維拉
佢既出價除左收購球會股份
仲會協助球會償還二千四百多萬既債務
亦會提供二千萬鎊比球隊於來季擴軍

2007-4-24

1)
國米同文仙尼續約到2011年

2)
荷甲方面
燕豪芬又失分
只能以1:1賽和烏德列支
榜首即刻被以3:1擊敗海倫芬既AZ搶去
連同大勝鹿特丹5:2既阿積士
3隊均同得72分
AZ計得失球比阿積士多6球,比燕豪芬就多7球
荷甲冠軍可以直入歐聯32強
而2至5名就打附加賽
勝方就要打歐聯第3圈既外圍賽,以爭入歐聯32強

3)
畢特前晚協助紐卡素以0:0同車仔打和
變相幫左失分於米堡既曼聯
所以費格遜同埋傑斯等上上下下都 SEND MSN 去多謝畢特
(可能佢地之後仲要靠菲臘仔同科東尼等前曼聯球員幫手......)

4)
高爾下季可能轉戰澳超
加盟昆士蘭流浪

5)
巴勒莫炒左教練古度連
因為球隊對上12場聯賽只得1勝
季初佢地氣勢好勁
原本唸住下季可以踢歐聯
但而家佢地已經跌到聯賽第6

6)
魯爾加西亞比奧沙辛拿掛牌後
已經同利物浦扯上關係
(又係利記!......)

7)
莫拉堤出售自己石油公司既股票
吐現左8億歐元
用來為國米興建新球場

8)
車仔睇晚要主場對利記
打歐聯四強既首回合
但艾辛要停賽
卡華路同波歷克就可能因傷避戰

9)
傳聞前泰國總理他信準備開價9200萬鎊收購曼城

2007-4-23 (2)

1)
哥連杜爾尋晚完場前撲左 McIndoe 既12碼
除左令後者唔可以完成帽子戲法之外
亦令伯明翰作客羸狼隊3:2
而現年21歲,身高6呎5既佢係阿仙奴新門將既其一人選

2)
小舒米高決定下季續留楅爾柯克繼續吸取經驗
(小弟覺得佢身形好
手法又正宗
但佢同佢老豆最大既分別係佢唔夠惡
既唔會喝醒其他發緊夢既防守球員
衝出去封位又唔夠狠)

3)
有傳聞曼聯有意開價1000萬鎊,再另加沙夏
以收購貝碧托夫

4)
基卡斯季後加盟利華古遜
以取代禾路連

5)
祖安則一如所料季後由利華古遜加盟羅馬

6)
利記既買人傳聞近乎每日都有
最新既就係韋斯咸既班拿約同埋 AC米蘭既卡度素
後者講左好耐要去踢英超搵新挑戰
但之前佢既轉會傳聞只同曼聯扯上關係

7)
占士尋晚為樸茨茅夫力保不失
終以142場打破左施文既英超不失球場次紀錄

8)
魯爾加西亞被奧沙辛拿掛牌出售
價錢係700萬鎊

9)
英國小報爆料
現年46歲既連尼加力追一個年齡細佢一半既 model

10)
季尾將以自由身加盟利記既禾路連
個多星期前以一球近乎零角度,中楣再中柱既勁射收死簡尼
去片......
http://www.youtube.com/watch?v=Zzvva7hm2uI

2007-4-23 (1)

1)
摩佬發炮轟球証
事緣曼聯上星期六於主場對米堡
臨完場前奧沙明顯0係禁區內侵犯李東國
但球証竟然冇表示
令曼聯唔使主場輸波
而尋晚車仔作客紐卡素
泰利助攻既時候
明顯比施比斯基雙手抱到失平衡
但球証又係唔判12碼
令尋晚踢得死氣沉沉既車仔最終羸唔到波
球証既兩次誤判
令車仔錯失追至同曼聯同分既機會
(小弟都覺得摩佬今次嘈得有道理)

2)
C7 成為近30年來第1個連奪英格蘭球員先生同埋最佳年青球員獎項既球員
對上一次已經係77年既安迪格雷
球員先生方面
杜奧巴第2
而史高斯第3
最佳年青球員方面
法比加斯第2
而艾朗連儂第3
而費格遜就得到特別獎(類似老人獎或者終身成就獎既野)

3)
而本屆英超最佳11人
曼聯竟有8名球員入選
(曼聯今季有冇咁好呀?)
包括:雲達沙,加利仔,維迪,里奧費迪南,艾夫蘭,C7,謝拉特,史高斯,傑斯,杜奧巴同埋貝碧托夫

4)
以下係小弟心目中既本季英超最佳11人
包括:施治,芬倫,泰利,維迪,尼史葛,C7,艾辛,艾迪達,馬菲泰萊,杜奧巴同埋朗尼

5)
國米因為羅馬尋晚輸比阿特蘭大而提早封王
近18年來第1次正式封王

6)
中村俊輔成為首名當選蘇格蘭球員先生既日本球員

7)
英國有個19歲既後衛格拉漢0係超過半場既距離外
用頭槌解圍
但個波竟以拋物線越過對方既球員
再0係禁區邊彈地起笠死龍門
佢效力既地方聯賽球隊最終亦因而追成2比2
健力士世界紀錄既發言人表示
對佢既入球有興趣
研究緊會唔會列入世界紀錄大全
但問題係當時雖然有37個証人
但就冇人用錄影機拍低

2007-4-20 (2)

1)
原來香港既新一代當中都有腳法精湛既
睇完段片你就會信
(不過前題係:佢將來會唔會選擇代表香港出賽先)
http://youtube.com/watch?v=lIL46QtJakI

2)
香港足總搵左英超其中一個著名球証萊利於5月來港
佢會於足總盃決賽同埋飛利浦7人賽執法
亦會主持一節工作坊同本地球証進行交流
(小弟愚見:
佢雖然出名,但執法水準真係好一般
當年阿仙奴既不敗紀錄比曼聯終止
而賽後既球員衝突,同埋'廢'爵爺比法比加斯淋湯同掟pizza
佢既兩個誤判絕對係關鍵......
里奧當日從後拉跌單刀既龍格堡竟然唔使收紅牌
但朗尼插水佢就罰阿仙奴12碼)

3)
而7月舉行既英超亞洲挑戰盃
將有部份場次由英超球証執法

2007-4-20 (1)

1)
阿祖安奴因為前日主場對羅馬既時候插水搏12碼
比足總抽後算帳
罰佢停賽兩場
('天地有正氣,佢個PK衰到秘'......抵死!因為小弟好憎人插水)
(英足總都應該對以C7為首既插水王抽後算帳)
(但小弟就提議以追加一張黃牌作最低刑罰,而唔係直接罰停賽)

2)
普度斯基勸高路斯加盟拜仁

3)
奧雲可能要再延期復出
(小弟覺得其實都唔急在一時啦)

4)
蘇斯克查宣佈踢埋下季就收山

5)
以下係部份本地轉會消息:
#南華以大約30-40萬港元既價錢,收購左陳偉豪
打破左92年依波路從愉園收購譚亞福既14萬轉會費紀錄
(不過小弟記得當年報章係話20萬......)
同埋東方以3萬美元（約24萬港元）從哥斯達尼加球會「買斷」鄭兆聰既轉會紀錄
#晨曦就搵左兩個巴西新援
但范斯高「甩底」
只有基奧雲尼自聖保羅來投
令原遭棄用既秘魯前鋒迪華拉得以留隊
而賴啟卓亦從新歸隊
#而愉園就搵左3個巴西外援
(小弟希望今次既援兵比較對辦)
#傑志就繼之前搵到既好波之人安達臣後
再問港會借用年青射手麥基
(0個小朋友幾有潛質,值得大家留意)

6)
美斯金球片段
大家同肥馬當年0個球對比下啦
http://www.youtube.com/watch?v=pZkWSO01MDo

7)
香港奧運隊作客羸馬來西亞奧運隊1:0既片段
但睇唔到有冇越位
http://www.youtube.com/watch?v=bHdKJd3WKJg
其賽馬來西亞既報刊'Star'都冇提及球波有冇越位
只有引述馬來西亞奧運隊教練既意見

2007-4-19 (2)

1)
傳聞AC米蘭準備於季尾以780萬鎊收購燕豪芬既阿歷斯
(但我唔認為以車仔同燕豪芬既特殊關係
AC米蘭根本冇機會如願)

2)
皇馬睇中左墨西哥既一個16歲天才球員卡比路
(個譯名同領隊一樣!)
仲已經搵佢去試腳

3)
馬體會準備出售哥斯甸夏同埋文尼治
國米同費倫天拿都有興趣提出收購

4)
香港奧運隊尋晚作客羸左馬來西亞奧運隊1:0
終止左3連敗
但據後者既教練所講
0個入波好明顯係越位
(我仲未搵到片睇,我都想睇下)

5)
阿仙奴內部地震
副主席甸恩因為同董事局既意向出現分歧
手持阿仙奴14%股份既佢宣佈即時離開
佢同雲加既關係十分密切
令人唸到雲加會否因而他投

6)
傳聞利物浦睇中森保沙
(利物浦係全英超牽涉最多轉會傳聞既球隊,究竟會傳到幾時架?)

7)
阿仙奴睇中左紐卡素既柏加

8)
里昂否認於季尾收購拿斯利
(其實上年已經傳過阿仙奴想簽佢
如果佢唔出國發展既話
我批死佢過梗里昂)

9)
雲達不來梅面臨星散危機
高路斯離隊已成定局
岩岩又傳梅迪薩卡會過皇馬
而之前否認會過檔祖記既芬寧斯
就比人跟到佢已經到左都靈同祖記傾合約

2007-4-19 (1)

1)
美斯尋晚入左一球超級金球
佢從中場開始一個過五個
令人聯想起馬勒當拿86年世界盃對英格蘭既個人表演

2)
羅馬尋晚作客以3:1打敗左國米
除左令後者未能提前封王
亦令國米全季不敗既好夢破滅
而國米現時只得81分
就算餘下6場比賽全勝
都只會得到99分
其得分過百既目標亦未能實現

3)
拉科中堅桑馬迪加度將於季尾成為自由身
佢可能會加盟伯明翰

4)
波蘭同埋烏克蘭將聯手合辦2012既歐洲國家盃
如果到時舒夫真高仲未退休既話
球迷們應該可以再次見到佢出席國家隊既決賽週賽事
但杜迪克就算到時仲未退休
都應該冇機

5)
意大利於國際足協最新公佈既世界掛名上左第1
香港就趺左一級
排109

6)
飛利浦7人賽將於下個月25-27號舉行
參加主賽既出名球隊有阿仙奴,熱刺,維拉,浦和紅礸,些路迪,燕豪芬,卡薩酋長......
而將會出席名人賽既有法蘭斯哥利,阿武羅斯,居里斯,邊恩,比斯福特,羅拔李爾,拿鐵斯,賀斯禾夫,比士利......

7)
傳聞皇馬提出以迪亞拉,羅賓奴同埋簡拿華路3個'瘀血'球員
同AC米蘭交換卡卡
另外,為左增強防線既實力,佢地仲想簽埋而家養緊傷既梅迪斯卡

2007-4-18 (2)

1)
短片推介:
Nike 搵馬達拉斯拍廣告
借斯丹頭槌大開玩笑
http://www.youtube.com/watch?v=f0Pms_rY7Ls

2)
哥治日前同加歷查拍 Puma 既廣告
席間前者同記者表示
雖然傳聞熱刺同紐卡素都打佢主意
但佢冇意思離隊
但另一方面,傳聞利記已經搵緊佢既代替品
新既目標就係烏甸尼斯既伊亞昆達

3)
迪達因為肩膊既傷患
可能會缺席作客對 AC米蘭既比賽

4)
富咸準備向蔚山現代虎借用李天秀一季
借用費為10萬英鎊
之後富咸仲可以考慮用200萬鎊買斷佢

5)
悉尼FC 打科拿既主意

2007-4-18 (1)

1)
賓仔表示佢已經婉拒左皇馬既邀請

2)
阿仙奴尋晚主場以3:1羸左曼城
上場對保頓有波入既路斯基同埋法比加斯
今場繼續各入一粒
而巴迪斯達亦有進帳
結束多場既入球荒
曼城就由比士利破蛋
而賽前皮雅斯表示比士利既合約只餘少少細節未搞掂
並會於未來兩個星期搞埋佢
阿仙奴羸波要付出代價
迪亞比頭部受傷
傷勢未明

3)
曼聯就主場羸錫菲聯2:0
客軍門將巴迪堅尼演出神勇
令球隊不致多失
而東治既世界波又中楣彈出
未能為客軍破蛋
曼聯羸波要付出代價
艾夫蘭比卡廉李察士從後踢傷
由李察臣入替
(但卡廉李察士竟然連黃牌都唔使收,真係有點兒那過.......)

4)
史特加既波卡比德國足總抽後算帳罰停賽5場
因為佢上星期六對漢洛威被逐後襲擊對方球員
由於聯賽只餘下5場波
即係佢係聯賽已經收工
不過史特加入左德國盃4強
仲會於今日對禾夫斯堡
所以佢都仲有機會落場

5)
費高向國米推薦迪高

6)
韋利有可能於今晚作客安玻里既比賽
踢佢今季既第一場波

7)
本地球會香雪晨曦同射術不俗既秘魯球員迪華拉解約
原因係佢唔係球隊想搵既中鋒人選

8)
保路斯基因傷提早抖暑

9)
紐倫堡尋晚羸左法蘭克福4:0
25年來首次打入德國盃決賽

2007-4-17 (2)

1)
里奧可以趕及今晚上陣對鍚菲聯

2)
安祖可望季尾加盟紐約紅牛
並簽約兩年

3)
泰利表示續約談判冇進展
但講明想留隊

4)
皮雅斯表示餘下既5場聯賽
會比機會比士利搏張長約
佢今季以借用身份效力曼城
其實皮雅斯自己都要搏命
因為佢自己都認球隊今季既表現唔合格
而盛傳佢會於季尾比球隊開除

2007-4-17 (1)

1)
南華會組團上東莞打氣
名額120個(先到先得)
只限會員
收費100元正
包車費,午餐同埋波飛
周三起可到BMA唱片公司報名

2)
曼聯今晚既防線可以話係天殘地缺
包括費查,布朗,軒斯同埋艾夫蘭

3)
高文之所以比富咸炒
有傳因為佢唔肯炒佢班教練團而同高層反面
最終0個班無能兼唔肯洗錢既高層
連高文都炒埋
但諷刺既係
看守領隊山齊士上任後
決定留用守門員教練比辛
令比辛份工0係半粒鐘內失而復得

4)
英格蘭職業足球員聯會公佈左今季足球先生既候選名單
包括C7,法比加斯,史高斯,傑斯,杜奧巴同埋謝拉特
(我就唔明點解艾辛冇份入選)
而前兩者仲有份競逐最佳年青球員
而最佳年青球員既其餘候選人就有:
米卡李察士,連儂,杜里同埋前兩年既得獎者朗尼

5)
李榮杓同埋杜夫都因傷提早抖暑

6)
維拉準備同年輕中場加特拿續約

7)
英格蘭足總青年盃方面
利物浦0係首回合於主場反勝為敗
以1:2輸比曼聯

8)
曼城同紐卡素都睇中左貝迪斯29歲中堅桑尼圖

9)
紐卡素亦睇中左南鍚既塞內加爾新星迪亞加迪
佢係南錫既青訓產品
佢今年22歲,可以踢左閘,防中同埋中堅

2007-4-16

1)
車仔憑住波歷克既一傳一射
協助球隊以2:1擊敗布力般
打入足總盃決賽
車仔決賽既對手就係曼聯

2)
而布力般尋日雖然輸波
但演出幾好
自下半場初段舒夫真高高難度'右腳射左腳'既門前失機後
佢地既表現絕對將放虎歸山既車仔比下去
但施治既連番撲救
令球隊不致於90內反勝為敗

3)
國米尋晚據住費高既兩記助攻
主場以2:2迫和半場羸緊2:0既巴勒莫
繼續保持不敗

4)
傳聞曼聯打算以1200萬鎊收購奧雲
奧雲既合約有特別條款
佢可以球隊成績唔好為理由而要求轉會

5)
皇蘇勢要降班
佢地陣中將有11名球員被放棄
不過未知米高艾朗素(即係沙比艾朗素既哥哥)有冇份

6)
費度0係對車仔前同布力般續約兩年

7)
傳聞皇馬又有新目標
今次想打加拿斯既主意
雲加就講明如果價錢吸引
佢唔會阻人發達
(其實阿仙奴都可能發達!)

8)
華斯高既領隊加奧高
因為批評羅馬里奧既1000球目標影響球隊既演出
遭球隊解僱
華斯高今次簽羅馬里奧
擺明係為搵錢
門票,電視轉播既收入已經唔野少
早兩個星期推出既紀念T恤仲賣斷市
加奧高咁樣講野
實比球會開除啦

9)
曼城今季聯賽主場至今只入10球
大有可能打破19場主場只入11球既不名譽紀錄
紀錄保持者係1912-1913既阿仙奴同埋02-03既新特蘭

10)
旺角場尋日有8426人入場
紅旗終再高掛
對上一次係旺角球場高掛紅旗
已要追溯至1996年11月5日
快譯通以2﹕0擊敗南華既高級組銀牌賽4強戰

11)
南華既兩個巴西借將原來係來自聖十字

2007-4-13 (3)

1)
C7 岩岩同曼聯續左5年約

2)
艾利蘭同曼城續左3年約

3)
好耐之前西班牙傳媒已經話魯爾會季尾離隊
而家既新版本就話佢可以自由轉會

4)
麥卡菲為布力般主場羸利物浦既比賽一球定江山
而家傳媒煲水話佢會繼哥治之後
成為另一個因射死利物浦而比賓仔出價收購既射手

2007-4-13 (2)

1)
南華岩岩搵到兩個新援
一個係中場既基頓
另一個就係前鋒既法比斯
其中後者仲係哥連泰斯既正選前鋒
之前亦踢過葡超

2)
曼聯同修咸頓既年青射手貝利扯上關係
而夏格維斯亦勢於季尾過檔
因為拜仁高層於球隊輸比AC 米蘭後
同傳媒表示只要傾好轉會費既話
會放走夏格維斯

2007-4-13 (1)

1)
熱刺尋晚返到主場
因為唔多夠後衛
又想收復失地
祖爾罕有地排左個3-5-2陣式
但佢地今場好唔好運
開波後3分鐘
馬白蘭基0係防守死球既時候擺老烏
企0係右邊門柱既佢解圍大撻
左腳腳指尾拉西拉左個波入自己龍門
到8分鐘既時候
應該有越位既簡路迪射成2:0
而之後貝碧托夫既勁射又中遠柱
到左65分鐘
祖爾索性用迪科爾入替索高拿
改用3-4-3搏殺
迪科爾一入場唔夠1分鐘就入波
兩分鐘後,連儂就返平2:2
但佢地之後再入到波
結果兩回合以3:4出局
但真係雖敗猶榮

2)
而尹高爾就要為佢冇搵人凍結迪亞高而付上代價
迪亞高全場表演活躍
帶領雲達以4:1大炒AZ
雲達亦以同樣比數入四強
高路斯今場入左兩球
結束長達兩個月既入球荒

3)
稍為冇運既賓菲加主場以0:0同愛斯賓奴打成平手
兩回合合計以2:3出局

4)
上場作客贏利華古遜3:0既奧沙辛拿
返到主場再羸1:0
兩回合合計羸4:0入四強

5)
由於慕尼黑所在既巴伐利亞州法例講明
禁止海外賭博公司於境內賣廣告
AC米蘭作客拜仁卻未有理會
繼續幫bwin賣廣告
結果被罰款105萬港元
不過意大利傳媒指bwin將為此額外獎賞AC米蘭1億港元
有報道指連同賽事獎金
AC米蘭單憑作客羸拜仁已有2億港元落袋

2007-4-12

1)
紐卡素同蘇甲球隊格雷納打閉門練習賽
其中奧雲踢左70分鐘
開賽10分鐘,佢於離門20碼0係窄角度勁射得手
及後佢仲助攻比艾美奧比

2)
京治會0係熱刺今晚主場對西維爾既賽事復出

3)
泰維斯最近既狀態回勇
領隊講明想佢留隊
但利物浦同祖雲達斯都想打佢主意

4)
岩岩好返既施仙奴可能會成為皇馬收購丹尼爾既籌碼
而阿仙奴同利物浦都好想簽丹尼爾
但丹尼爾比較屬意加盟阿仙奴

5)
費文尼可能加盟國米

6)
尹高爾同AZ續約到2010年

7)
利物浦尋晚收起謝拉特同加拉查
主場以1:0擊敗最終得10人應戰兼殘陣出擊既PSV
不過紅軍尋晚亦付出代價
比拿美早段傷出,傷勢未明

8)
AC 米蘭尋晚破釜沈舟作客以2:0贏左拜仁
四強會對曼聯

2007-4-11 (2)

1)
英超球隊富咸解僱左領隊高文
由北愛爾蘭領隊山齊士暫任領隊至季尾

2)
利物浦官方既今季最佳球員選舉
現時加歷查排第1
芬倫就排第2

2007-4-11 (1)

1)
先講歐聯既比賽
因為太令人意外
曼聯主場竟以7:1狂數羅馬
兩回合合計就以8:3淘汰對手
0係四強將對拜仁同埋AC 米蘭既勝方
羅馬尋晚既防守
絕對可以用不知所謂去形容
輸第一球,比左太多空位卡域克,而門將東尼既企位亦好有問題
要注意既係,時間只係11分鐘
但輸0:1就即刻搞到首回合放虎歸山既羅馬進退失據
輸第二球,捷禾解圍踢空氣,令到阿倫史勿夫輕鬆射入
當時係17分鐘
輸第三球,企0係朗尼身旁既卡斯鍚迪只顧舉手示意有人越位
最終比朗尼搶位射成3:0
要注意既係,時間係19分鐘
其實羅馬全場都有一定既攻勢
而時間亦容許佢地去反撲
但曼聯後防既演出大有改善
令羅馬只能徒勞無功
而羅馬既防守實在太差
到44分鐘,C7右路拖入中路射近柱
東尼竟然封唔晒近柱
而4:0既比數亦正式判左羅馬既死刑
到49分鐘,C7把握羅馬後防阻唔到曼聯既左路傳中,輕鬆射成5:0
但要注意既係參與進攻既阿倫史勿夫其實係越位在先
到60分鐘,羅馬球員再比卡域克輕鬆起腳
佢既世界波令比數成為6:0
之後到69分鐘,迪羅斯為羅馬破蛋
到左81分鐘,後備出場既艾夫蘭助攻拖入中路射近射
但東尼竟然再次封唔晒近柱
東尼今場既演出解釋左點解佢從來未入選過巴西國家隊
亦令人明白點解鄧加寧願選甘美奧既20歲後備龍門卡斯奧,而都唔選佢

2)
車仔就再次於落後下發揮小宇宙
佢地先比華倫既摩連迪斯打開紀錄
之後發力狂攻
以2:1後上擊敗對手
舒夫真高為車仔追成平手
致勝入球就由養傷多時既艾辛0係補時右路窄位入波
華倫門將簡尼沙利斯要為失球負責

3)
太陽報報導薜維將會加盟紐卡素
佢既朋友0係上星期同份報紙爆料

2007-4-10

1)
迪比亞路要求續5年約
但祖記只肯同佢續2年約

2)
奧林比亞高斯既左閘布盧治可能季尾以自由身加盟紐卡素
佢上星期去左紐卡素試腳

3)
堅尼教既新特蘭岩岩上左英冠榜首
佢已經為下季組軍作準備
由於昆尼講明大把錢比佢用
以避免球隊又做升降機
佢既目標就包括布朗,畢特同埋杜夫

4)
阿仙奴下季又會多一個小朋友
今次0係來自華倫既葡萄牙19歲中堅耶高費蘭迪斯

5)
傳聞曼聯繼續搵射手
今次就睇中意大利新晉國腳加利亞雷拉
佢而家由森多利亞同烏甸尼斯共同擁有

6)
韋根主席費倫表示
如果球隊最終護級成功
佢保證下季既季票會全英超最平

7)
屈福特領隊保夫萊特表示
佢會盡力留住今季抖多過踢既牙買加射手馬華龍京治

8)
羅馬今晚將會作客曼聯
賽前傳出佢地既隊長托迪會因腿筋傷患而避戰
(都唔知係咪?)

9)
切爾達終於炒左教練華斯基斯

更正& 唔好意思

之前提過曼聯青年隊0係足總青年盃兩回合合計以2:0淘汰阿仙奴青年隊
而家更正.....其實係4:3先岩....

2007-4-4

1)
董方卓首次被納入大軍名單
而沙夏同費查亦令人意外咁可以隨隊去羅馬

2)
費文尼表示為左離隊爭取更多既出場機會
已效力阿仙奴3年既佢會買斷最後1年既合約

3)
哥連泰斯終於炒左教練里奧
以成績計,里奧係近年來巴西國家隊最差既教練
佢被國家隊解僱後
多年來0係不同球會都冇好下場

4)
澳洲超聯球會柏斯光榮準備斟酌蘇拿同埋舒靈咸

5)
般尼主場4:0羸左普利茅夫
終止左19場不勝既劣績

6)
艾邦拉賀同球會續約4年至2011年

2007-4-3

1)
以下係一陣來自英國太陽報既報導(流料):
查斯古特因為仲未肯續約
祖記急於放佢走
而賓仔為左簽佢
肯用現金再加上岩岩先話有人工加既施素高作交易
而懷斯,比拿美同埋馬克.干沙利斯亦可供祖記選擇
但祖記就傾向於施素高再加艾朗素作為交易條件

2)
雲昇同球會表明
佢唔希望下季再做拜仁既副手
佢不惜轉會尋求出場機會
佢今晚將會代替坐波監既簡尼
佢歷年來代表拜仁出賽17場
當中拜仁只輸1場

3)
辛頓季尾可能以自由身加盟荷甲球會
當中最大機會去 PSV

4)
PSV 既阿費利因為上星期六整傷大腿筋
趕唔到今晚主場對利記既比賽

5)
英國有一個關於已掛靴球星既選舉
睇下邊個球星最多人想佢復出
有36%既球迷選伯金
而簡東拿就得到33%既選票
蘇拿同埋麥阿里士打等亦係候選之列

6)
阿仙奴既球迷選出佢地最懷念既已離隊球星
當中皮里斯得票43%排得1
韋拉就26%排第2
伯金就21%排第3

7)
奧雲上星期五已0係練習賽踢左20分鐘
下星期將會0係對哈特普爾既閉門練習賽嘗試踢足90分鐘
如果一切正常既話
佢將會0係22.4對車仔既時候復出

8)
曼聯既青年隊兩回合合計以2:0擊敗左阿仙奴既青年隊
打入左足總青年盃既決賽
對手係利物浦青年隊

9)
另一單傳媒既炒作報導.....
adidas 可能出手幫忙
令施丹可能出山同碧咸0係洛杉磯銀河做對友

10)
路達上星期同傳媒表示佢將會換血
英國傳媒已經好快去跟進
版本有兩個
一係施維斯達再加布朗
另一就係賓菲加既雷沙奧同埋尼路臣

2007-4-2

1)
華拿朗已接受其第3次膝部手術
預計養傷1年
如果仲好唔返既話
佢將會選擇掛靴

2)
法國傳媒報導
阿仙奴已經同馬賽既列貝利達成協議

3)
繼車仔後, AC 亦同 YOUTUBE 達成合作協議

4)
利記睇中左 SCUNTHORPE UNITED 既首席射手 BILLY SHARP
0個小朋友今年 21歲
高1.75米,重70公斤
踢法幾似科拿

5)
賓仔暗示哥治雖然對阿仙奴既時候入左3球
但聽晚作客 PSV 依然要先任後備

6)
傳聞國米想用1000萬鎊收購路斯基
同埋用阿祖安奴去換東尼
但文仙尼已經否認

7)
傳聞雷丁中場薜維將以自由身加盟車仔

8)
繼艾比利亞後
傳聞利物浦將會再0係財困既拉科魯尼亞執平貨
今次既目標就係佢地既首席射手艾里斯文迪

9)
據西甲傳媒報導
西哨同佢做經理人既哥哥同技術總監碧格列斯坦講數後
保證最少留隊3年

10)
AC 睇中國際隊既小將柏圖

11)
保頓睇中左基達菲既古爾沙
佢地既領隊 BIG SAM 幾鐘意西班牙兵
而另一方面,佢將會簽喜百年既中場布朗