2009-8-31 (2)

想講4大聯賽......

先講英超
最受注目既一定係曼聯對阿仙奴
比賽既頭58分鐘
正常人都應該會發現
曼聯只係羸控球時間
講表現絕對俾兵工廠比下去
只係落後1球絕對有運
全隊有料到既只得朗尼,艾夫蘭同埋維迪3人
而老廢既排陣同埋調動亦值得商榷
小弟打死都唔信佢地咁既水準今季仲有得羸英超

而球證甸恩絕對係今季暫時屎上最強既球證
7萬主場球迷壓力絕對難以想像
根據阿叔以前串陳譚既名句
如果面對唔到壓力,不如唔好做球證

費查多次過勇攔截
就算最終被罰離場都唔過份
但最終竟然連黃牌都冇一張?
而兩次12碼既判決都錯到好離譜
難為老廢賽後稱讚'廢柴'係 man of the match
同埋稱讚球證既12碼判決做得好

不過小弟更想講既係經歷黑色5分鐘後既兵工廠
亦暴露左經驗唔夠既老問題
唔怕疲累年青球員最怕踢下風波
成隊散晒既小兵就算有波在腳都唔識踢
同曼聯前段既表現一樣咁差

偏偏兵工廠陣中冇一個信得過既龍頭大哥領軍
高路托尼出走曼城
加拿斯又其身不正
有領袖風範既華美倫亦只係新球員......
佢地落後下既表現
隨時係今季下場既縮影

另一方面,小弟始終覺得兵工廠既人腳頭重尾輕
中後場中路人腳略嫌不足
一旦加拿斯同埋華美倫受傷
兵工廠防線隨時散晒
桑治,丹尼臣同埋迪亞比既進步
亦似乎跟唔上球隊既需要

之後想講下利物浦市兩間球會
利記同埋愛華頓同樣因為對手捉到鹿唔識脫角先可以反敗為勝
保頓有桑恩戴維斯兩黃一紅出場
韋根就有高美斯射中柱而拉唔開比數
否則以利記同埋拖肥糖既水準好難袋到3分

利記今季突然畏高
而面對保頓既硬朗攔截
冇左沙比艾朗素既利記傳送方面更加唔流暢
愛華頓方面
艾迪達一日未復出
總係覺得佢地既組織力同埋死球威脅只係一般
而後防冇左尼史葛既後遺症亦應該會持續一段時期

曼城,熱刺同埋車路士繼續全勝
不過前二隊此終唔似爭標角色
相反車路士雖然因為中前場仲未夾慣夾熟
令表現依然有一定既改善空間
不過靠出色既控球能力
踢出7成水準都可以袋晒所有分數
對羸英超真係好有幫助
上季曼聯咁多場都係魚生粥羸1:0就係好例子

意甲方面
AC米蘭左路漏洞明顯
而負傷既加度素又再次犀牛上身
整定球隊大敗
如果唔係國米下半場行行企企
同埋後備龍門史杜拉利有水準演出
紅黑兵團既失球數字隨時輸到半打

國米方面
史尼達雖然同隊友冇默契
不過AC米蘭今場中場失勢
令這名荷蘭中場受既壓迫又真係少得可憐
但長遠而言佢既創造力先係球隊最缺乏
所以應該先係球隊今季最重要同埋成功既收購

國米雖然大勝
不過唔值得大家一下子將佢地既評級大幅提高
因為佢地唔可以練好埋門把握
以及改善防線輕出既陋習
佢地往後仍會繼續失分
而今季祖雲達斯初步睇來相當似樣
只要費拉拿能夠再提升球隊既防守水準
佢地羸意甲既牌面唔差得過國米幾多

西甲方面
冇得睇所以唔講太多
傳媒話卡卡踢得好搶
不過小弟始終對佢地既防守唔係太有信心

德甲方面
踢到第4輪聯賽
雲高爾就帶來第4個陣式同埋陣容
睇戰果見佢地炒禾夫斯堡3:0可能會以為佢地好勁
不過唸深一層就唔值得小弟過份樂觀

原因係攻守表現依然唔算好勁
佢地居然俾對手先後11次於禁區埋門
與其話搶左雲昇個位既畢特守得好
不如話禾堡輸在埋門把握差

進攻方面
開記錄既入波靠人地有條傻仔反應超慢包晒越位
之後下半場兩次趁人地空群而出打反擊
由兩名後備列貝利助攻俾洛賓入波

講真佢地陣地戰既威力依然有待驗證
不過有洛賓幫輕列貝利
對拜仁始終係好事

p.s.:
1)
今季睇多左英冠
森林對打呲郡幾好睇
先入3球再回贈兩球既過程固然令人唔可以提早轉台

同場加插多次言語加上肢體既衝突
久違既沙維治雖然表現漸走下坡
不過依然惹火
完場後超過廿人曬馬仲以為睇緊 laughing gor

2)
趁英冠前列齊齊失分
祝紐記今晚加油上榜首

2009-8-31 (1)

近兩日既新聞......

1)
雲格對曼聯被逐
原本面臨停賽兩場
不過佢表示當時只燧踢水樽泄憤
不過有關方面承認第四球證有處理失當既地方
亦準備向雲加致歉
意味佢應該唔使停賽

2)
皇馬再次被指斟酌列貝利
消息指開價大約6400萬歐元
亦有版本指佢地會用雲達華治作為交易既一部份

3)
泰利以16萬鎊週薪既條件同車路士續約5年

而舒夫真高重返基輔戴拿模
雙方簽約兩年

4)
希丁加即將以500萬鎊加盟愛華頓

5)
韋斯咸同埋狼隊都都指打算從華倫西亞引入施積

6)
幾段紐卡素既消息......

悉斯高被指可能重返西甲,加盟桑坦德

而高路仙尼就被指可能以300萬鎊轉投費倫巴治
而鍚菲聯既基加倫同埋保頓既奧拜恩就被指成為替補人選

另一方面,由於愛華頓打算將占士禾漢掛牌以300萬鎊出售
而保頓,史篤城同埋侯城都有興趣接收佢
令紐記好難成功借用佢

而舒利亞已向BBC辭去講波佬既工作
意味佢等艾殊利易手後重新執教紐記

7)
新特蘭被指打算以900萬鎊收購端拿
而費沙甘寶可能會成為交換條件

8)
艾利蘭被指成為曼聯既增兵人選
不過曼城已經打算同佢續長約

不過馬田柏度夫就好可能離隊
落腳地應該不出熱刺或者史篤城

另一方面,費sir以前既副手傑特就可能加入曼城既教練團
佢同曉士曾於曼聯合作

9)
阿當斯被傳可能接手班士利

10)
布力般流浪拒絕奧林比亞高斯對摩頓柏達臣既斟酌
而馬華路禾尼即將以200萬鎊轉投佢地

11)
格羅素被指即將加盟祖雲達斯
轉會費約250萬歐元

12)
英格蘭足總準備搵人執教英國奧運足球隊
以參加2012年既倫敦奧運
當中鶴臣同埋皮雅斯就成為大熱領隊人選
而前者已表態好有興趣

13)
摩達歷因為斷腳而要養傷6星期

14)
薩卡度落實重返意甲,加盟帕爾馬

15)
諾士郡被指打算重金利誘韋利以及龍格堡加盟

16)
韋根被指打算借用史葛麥當奴以加強攻力

17)
熱刺,新特蘭以及史篤城都被指打算引入占士
而前者亦被指考慮羅致卡蘭積卡

18)
樸茨茅夫被指打算向維拉羅致梳利

19)
熱那亞被指準備再次斟酌哥利斯馬

20)
古斯文奴域被指即將由費倫天拿轉投史特加
而消息指紫百合就希望從韋斯咸羅致尼斯歷高

21)
古莊臣最終選擇加盟摩納哥
雙方簽約兩年

22)
巴塞隆拿令人意外地同羅賓奴扯上關係
不過巴塞方面已經作出否認

23)
早前遇襲受重傷既迪雲樸已離開深切治療部
不過能否復出始終好成疑問

p.s.:
晏少少再講賽後感

2009-8-29

1)
歐洲足協決定控告伊度亞度達施華不君子行為
佢可能會因而被罰停賽兩場

2)
洛賓落實同拜仁簽約4年

3)
莫斯科中央陸軍將路夫外借到彭美拉斯一季

4)
韋拉透露今季係佢最後一季於歐洲比賽
佢下季可能轉戰美職盟

5)
莫耶斯表示希望收購希丁加同埋史葛布朗
佢亦透露打算借用賓特利

6)
舒夫真高被傳可能重返意甲,加盟森多利亞
而基輔戴拿模亦係佢既可能落腳地

7)
消息指巴克萊銀行只肯透支2000萬鎊俾 Barry Moat
令佢入主紐記既美夢幾近幻滅

不過美資財團既代表星期四已到倫敦商討收購
意味紐記仍然有可能易手

8)
再講幾段紐記既轉會消息......

紐記希望借用巴里
不過紐記只肯支付這名威爾斯國腳既部份人工就成為交易障礙

而由於古迪利斯,艾美奧比,安迪卡路爾同埋悉斯高都受傷患困擾
當中前兩人都要養傷4星期
所以曉頓透露增兵重點係箭頭以及中堅
當中紐記被指想向愛華頓借用占士禾漢到季尾

另一方面,佢地決定將F.科士打再外借到諾域治多1個月

9)
樸茨茅夫一次過引入4名球員以補充實力
包括奧哈拉,奇雲保定,米高布朗同埋迪丹尼
當中前者係以借用身份加盟半季

10)
迪斯甸落實加盟愛華頓,雙方簽約3年

11)
雖然漢基蘭一直同多間大球會扯上關係
不過富咸方面透從未有收過任何出價

12)
禾洛克落實以800萬鎊轉投維拉
雙重簽約4年

13)
國米決定將尼爾遜李華士外借到利禾奴1季
而韋斯咸亦落實從後者收購射手迪亞文迪

14)
卡域克被指已經已經失寵而不滿
費sir就否認曾經同佢以及安達臣吵大鑊

15)
文沙終於落實以借用身份加盟新特蘭
而布魯士被指打算出價200萬鎊引入舊部屬費古路亞

16)
熱刺被指打算向莫斯科斯巴達借用克羅地亞龍門柏迪高沙
而國米被指打算用蒙迪利再加500萬鎊打動佢地放走贊拿斯

p.s.:
1)
歐洲足協提議任何球會如果收入大過支出就冇資格參加歐洲賽
矛頭似係曼城這類忽然富貴既球會
莫拉堤,貝尼斯干尼同埋艾巴莫域治都表態支持
咁咪即係賊嗌捉賊?

2)
東亞足協秘書長岡田武夫指港隊「外判」俾南華
係唔尊重賽會既行為
所以扣起總額達20萬美元既獎金同埋參賽費用

小弟唔知點解條友要無風起浪
如果南華用幾個外援落場就話犯規啫
而家班球員個個都有香港身份證
來自幾多間球會根本就唔係問題

3)
本地電視台仲未搞掂西甲轉播權
明報教路上網睇中央台碰運氣睇西甲
有興趣不妨一試:
sports.cctv.com/football/special/xijia/index.shtml?column=C22536

不過差唔多時段有米蘭打呲
小弟就對皇馬開咧戰冇咩興趣

2009-8-28

1)
拜仁突然出價2200萬歐元羅致洛賓
佢有機會趕得切聽晚對禾夫斯堡既大戰
消息指佢將會出任右翼同列貝利雙翼齊飛

2)
史尼達最終決定同國米簽約5年
年薪約400萬歐元
亦有300萬歐元簽紙費

3)
米蘭達被指成為費倫天拿1900萬歐元既增兵對象
AC米蘭早前亦曾經打佢主意

4)
侯夫同埋端基被指一併被史篤城收購
轉會費1100萬鎊
而卡塔爾球會阿爾薩德被指出價700萬鎊引入艾方素艾維斯

5)
消息指舒夫真高唔被列入歐聯既25人名單
而肥安仲決定俾佢自由轉會
辛尼特同埋基輔戴拿模被指成為佢既可能落腳地

6)
法希姆表示會於1月撥款買人

p.s.:
歐聯分組賽抽籤結果如下:
A組有拜仁,祖雲達斯,波爾多同埋海法馬卡比
B組有曼聯,莫斯科中央陸軍,比錫達斯同埋禾夫斯堡
C組有AC米蘭,皇馬,馬賽同埋蘇黎世
D組有車路士,波圖,馬體會同埋尼科西亞
E組有利物浦,里昂,費倫天拿同埋迪勒比辛
F組有巴塞,國米,基輔戴拿模同埋魯賓卡山
G組有西維爾,格流,史特加同埋烏尼雷亞
H組有阿仙奴,阿爾克馬爾,奧林比亞高斯同埋標準列治

傳統強隊分得幾散
應該都可以出線16強

英超Big 4 都唔使同皇馬以及祖記等強隊同組
不過E組利記要同里昂同埋費倫天拿合組死亡之組
絕對唔易踢
後兩者上季分組賽亦殺得難分難解

而B組曼聯要遠征土耳其以及俄羅斯亦好辛苦
不過莫斯科中央陸軍同埋禾堡應該只係夠料爭次名出線

D組既車仔似係首名穩膽
難為波圖同埋馬體會要繼上季16強後再次爭餐死

而H組既阿仙奴係英超球隊中抽到上上籤
其餘3隊明弱好多
甚至比外圍賽對手些路迪更弱

另一方面,G組雖然冇傳統強隊
不過可能鬥得好激
因為西維爾實力只係比格流同埋史特加高唔得幾多
稍一不慎隨時要次名出線

今次抽籤既特色係好多名牌球星同埋教練會倒戈
卡卡,伊巴謙莫域,伊度奧,卡華路,迪高,保羅費拉拿,摩連奴......

2009-8-27

1)
香港大炒最終10人應戰既關島12:0
(當中仲有2次中楣,1次中柱兼1次擦柱)
加上北韓只係可以小勝台灣2:1

香港入16球兼冇失過波
爆冷憑較佳得失球差壓倒北韓
(佢地只係入11球失3球)
奪得東亞足球賽既最後一個決賽週席位
絕對係港隊近年既代表作!!!!!

2)
利物浦成為最新一間同洛賓扯上關係既球會

3)
消息指意甲球會打算自組公司由下季開始親自出售轉播權
令佢地唔使再接濟意乙球會

4)
早前紐卡素出售巴斯桑治俾熱刺
後者好可能賣返個人情而願意外借巴里一季
另一方面,路蘭被傳可能以借用形式重返保頓
不過紐記已經作出否認

5)
簡連尼可能以借用形式由卡利亞里轉投拉素一季
後者就要負責這名24歲中堅既6成人工
而里賈納既烏拉圭國腳卡路士維迪斯亦係佢地既另一人選

6)
車路士被指有興趣從飛燕諾引入中場迪甘士文

7)
伯明翰被指可能收購鄭智以及周海濱
而楊家誠就被傳有興趣收購一間中國球會

8)
禾夫斯堡被指打算出價1000萬歐元收購希丁加

9)
史篤城即將以600萬鎊引入侯夫

10)
消息指熱刺開價1600萬歐元收購巴西20歲中場辛祖
不過國際體育會已經拒絕有關出價
而佢地亦再次被傳有興趣引入雲佬

另一方面,杜斯山度士就被指可能被賣到奧林比亞高斯

而傳聞羅馬只係願意借用柏夫奴真高
不過這名俄羅斯射手表明只考慮永久轉會

11)
尼維特最終決定唔會復出加盟任何球會

12)
科隆成為最新一間同端基扯上關係既球會
佢地早前曾嘗試斟酌雲達華治
不過失敗而回

13)
波圖同埋阿積士都被指有興趣羅致賓尼麥卡菲

14)
意大利同埋西班牙兩地既傳媒估計史尼達唔肯離隊只係錢作怪
因為國米要佢既人工由400萬歐元減到350萬歐元
而意大利既稅率亦比西班牙高好多
史尼達計過國米要俾500萬歐元
先可以令佢 real income 不變
而有消息指馬體會考慮截劫這名荷蘭球星

另一方面,國米亦積極放走部份球員
域陀奧賓拿只要通過體測就可以落實外借馬拉加一季
而韋斯咸同埋熱刺被指打算接收哥利斯馬

15)
莫耶斯表示希望於轉會 deadline 前引入4名球員
而賓菲加既巴西中堅盧斯奧被指係其中一個人選

16)
東尼既經理人表示這名意大利射手唔會離隊
而佢暗示羅馬未能成功羅致東尼既原因係俾唔起400萬歐元年薪

17)
消息指曼城,AC米蘭同埋祖雲達斯都向拉芬夏招手
而史浩克04可能因為未能同這名巴西右閘成功續約而賣走佢套現

18)
昆士伯流浪被指打算向阿仙奴借用 J.森遜一季

19)
侯城被指考慮羅致射手 M.Fryatt
不過李斯特城方面表示未有收到任何 offer
而侯城再次被指打算向些路迪收購軒基

另一方面,新特蘭收購鄧尼失敗後
打算改向佢地出價600萬鎊收購端納

20)
小保加方面透露收到費倫天拿同埋馬體會對梅魯斯既出價
不過佢地仲未決定這名阿根廷19歲中堅既前途

21)
富咸考慮去薩爾斯堡紅牛借用奧地利射手贊高

p.s.:
1)
特別為路斯基搵左尋晚阿仙奴半力羸些路迪既精華
當中大家可以留意伊度亞度達施華搞出來既插水風波
http://www.youtube.com/watch?v=GEQBIHXsUa8

2)
紐卡素今季終於似返隊波
輸緊1:3都搏老命反敗為勝
早幾個月前小弟一定打死都唔信
http://www.youtube.com/watch?v=Z8xJCLZ_DhI

2009-8-26

近兩日既新聞......

1)
英國傳媒報導指一間美資公司有興趣收購紐卡素
而有消息指艾殊利將 Barry Moat 完成收購既期限定為今個星期五
(不過類似消息已經聽左幾次......真係 delay no more!)

2)
法希姆以佢公司既名義發表聲明已經成功收購樸茅

3)
曼城同自由身既施雲奴簽約1年
而鄧尼即將以600萬鎊被賣到維拉
高路托尼被指可能接任隊長

4)
馬體會被傳打算引入大衛施華
而佢地亦被傳打算出價300萬鎊接收荷西安歷基
薩拉戈薩亦向這名西班牙左閘招手
不過就只肯借用佢一季

5)
阿仙奴被指打算向奧斯爾招手
這名雲達不來梅進攻中場早前協助德國羸得U-21歐國盃

6)
愛華頓成功從莫斯科火車頭引入俄羅斯中場比耶列甸洛夫
轉會費約900萬鎊
早前佢地曾經打算羅致另一名俄羅斯球員拜斯托夫
不過這名莫斯科斯巴達翼鋒拒絕加盟

另一方面,迪斯甸已向樸茅提出離隊
愛華頓準備出價500萬鎊收購佢代替尼史葛

7)
有報導指安達臣因為社區盾連後備都冇得做而向費 sir 發脾四
費 sir 因而已通知這名巴西攻擊球員既經理人可以為佢物色新球會
佢就只向傳媒表示冇唸過離隊
不過因為出場機會不足而感到沮喪

另一方面,曼聯被指打算出價1100萬鎊接收洛賓
而英國傳媒指佢地最近派球探觀察18歲比利時進攻中場夏薩特既表現

8)
史奈達唔肯轉投國米
消息指皇馬為左逼佢轉會
不惜夾硬將佢件10號波衫派俾復出既迪亞拉
仲威脅唔同佢於西甲註冊
等佢冇得入選荷蘭國家隊踢世界盃

9)
消息指格羅素即將加盟祖雲達斯

10)
迪馬利亞被傳成為車路士既增兵對象

11)
巴塞隆拿方面透露即將從薩克達引入捷簡斯基
消息指這名烏克蘭中堅身價高達2500萬歐元

12)
些路迪被指有興趣從FC首爾羅致南韓20歲中場寄誠庸

13)
巴迪斯達既經理人透露正同國米開會商討這名巴西中場轉會既可能性

14)
愛斯賓奴落實從小保加引入21歲阿根廷後衛科連

15)
阿聯酋球會艾亞里證實尼維特即可加盟

16)
屈福特已接納樸茅對湯美史勿夫既出價

17)
彭迪夫被指成為韋斯咸既450萬鎊新箭頭人選
而佢地亦準備借用古莊臣同埋引入右閘奧度
另一方面,AC米蘭被指想向佢地借用法拔

18)
保頓被指即將引入喀麥隆中場艾文拿

19)
迪施維斯查以400萬鎊由拉素轉投費倫天拿

20)
韋根以400萬鎊從水晶宮引入18歲前鋒域陀摩西斯

21)
幾後熱刺既消息......

利爾可能為左爭取出場機會而由拜仁轉投熱刺
而熱刺亦被指打算向勒哈弗爾借用法國中場奇雲安恩

而哈利列納就否認會引入占士
不過就希望可以借用1名龍門

另一方面,柏夫奴真高對於冇出場機會而感到憤怒
暗示考慮因而離隊
不過莫斯科火車頭就透露因為負擔唔起轉會費而放棄羅致佢

而即將離隊既有占邦達
佢好可能以150萬鎊加盟布力般流浪

22)
謝拉特涉嫌傷人案既受害DJ打算向4哥同埋當晚涉案既人進行民事索償

23)
諾士郡落實同蘇甘保簽約5年

24)
侯城落實以200萬鎊引入麥沙尼
這名愛爾蘭後衛上季以借用身份效力老虎

p.s.:
繼迪雲樸遇襲同埋文殊頓因傷掛靴後
年青小將哥利臣既老豆亦於星期日出發去球場撐個仔既途中
遇到交通意外死亡

到左尋晚對米禾爾既聯賽盃比賽
又有球迷搞事而搞到大大鑊
睇波咁多年都未聽過有隊波於咁短時間內遇到咁多濕滯嘢

2009-8-25

想講下過去幾日部份比賽......

曼聯火速回勇大炒韋根5:0
無名英雄一定包括賓科士打
而韋根既冇運兼尾段輸到散晒就解釋到點解會輸到咁大鑊
睇左佢地3場波
佢地西班牙風格化既中前場傳送算係流暢
不過後防同上季比真係嚴重缺乏集中力

阿仙奴方面
踢3場靠中後場已經入到12球
真係得人驚
不過前鋒仲未有人開到齋就比較令人意外

而佢地到而家都仲未遇過強隊
所以唔可以咁快下定論佢地係唔係好咁堅
星期六佢地作客防線天殘地缺既曼聯
多數冇法比加斯既情況下
隨時和波收工

車路士方面
雖然同熱刺羸足3場
不過整體表現唔係太搶
真正搶鏡既亦只有杜奧巴
中前場未熟識新陣式絕對係當中原因

而肥安自己都要慢慢執靚隊波
佢為左唔好浪費擅長後上既林伯
改用佢踢左中場就值得一讚
證明佢唔會為左自己喜愛既陣式而埋沒球員既才華
事實上用俾波叻過後上埋門既迪高踢進攻中場應該更加適合

不過天下既教練並唔係個個都咁通情達理
好似拜仁咁搵雲高爾執教就真係仆直
小弟唔係話條友冇料
不過改造球員都要個球員肯變先得架

佢地有8件射手又偏偏好諷刺咁唔夠輸血管
列貝利受傷患困擾
雲高爾條友又唔肯打兩翼側擊
硬要小豬轉型派牌
唔擅長策劃既佢只係識斬死球根本唔岩做 keyman
佢既固執係拜仁出閘脫腳既近因

不過巧婦難為無米之炊
除左識搵教練問責同埋隨個人喜好買人之外
拜仁高層多年來冇咩大貢獻就係球隊近兩季冇料到既遠因
如果搵雲高爾係革新既一部份
部份高層引疚請辭可能仲幫到球隊

跟住想跳去意甲講國米
佢地既表現同早前於北京既表現冇大改善
冇左伊巴謙莫域後球隊冇晒創造力
只係靠球員勤力走位搵機會
不過就算有機會亦把握唔到

而防線亦繼續不穩
佢地被追平1:1既失波
回防既竟然係史坦高域
盧斯奧直情冇左影
摩連奴係要求一個識用波既中堅
而唔係一個有前冇後既表現狂

如果摩連奴未能解決問題
佢本身已經串到隊中冇朋友
而以佢同莫拉堤日漸惡化既關係
佢下季唔重返英超先奇

最後想跳返去英超講愛隊利記
利記第一次有托利斯入波都要輸波
射門次數比例羸3:1(24:8)
偏偏比賽結果輸1:3

費度絕對係 man of the match
令利記入少足足幾球
而利記亦略嫌冇運

不過利記今場其實再次輸俾自己
冇左沙比既負面影響再次浮現
少左佢既中場截擊力下滑
而球隊亦冇人控制比賽節奏
貿然同維拉鬥快既下場
就係俾人多次反擊而被迫於危險地帶以犯規阻截對手
盧卡斯利華第一球輸老烏
同埋謝拉特回防輸12碼
背後真正原因正係以上所講既嘢

另一方面,如果心水清既話就會發現
利記今季3場聯賽兩次俾對手趁死球頭槌入波
而兩次都係輸加歷查
佢近兩季既表現其實略為下滑
賓尼迪斯必須加以注意

近季既英超冠軍平均只係輸3場
利記再唔醒醒定定
隨時未過9月已經可以收皮

p.s.:
1)
根據網上即時報導
好驚喜港隊夠吉士同北韓鬥快鬥體力
如果唔係香港C7極刑中楣
驚喜隨時更大

和波後得失球輸3球而下場要對關島
而北韓就會對台灣
雖然出線好有難度
不過就算失敗而回都算係港隊近年既代表作

2)
消息指迪雲樸唔使切除左腳
不過球員生涯依然唔多樂觀
但總算有一絲希望

2009-8-24

近幾日既新聞......

1)
迪雲樸同佢阿媽於英國時間星期六清晨5點於阿媽屋企被人用刀襲擊
迪雲樸雙腳傷勢嚴重
左腳甚至有可能要切除
球員生涯幾近玩完

警方已經拘捕2名疑犯
其中1人已被落案檢控蓄意傷人,無牌駕駛同埋藏有攻擊性武器

2)
而韋斯咸亦即將失去艾殊頓
消息指腳踭傷患嚴重既射手將於短期內宣佈掛靴

所以蘇拿打算引入新射手
不過查馬克已經拒絕佢地既斟酌
而利禾奴既迪亞曼迪就成為而家最有可能加盟既人選

3)
艾殊利決定再俾多幾日時間 Barry Moat 向巴克萊銀行撲水

4)
維拉被指準備出價600萬鎊收購史堤芬泰萊

而由於中路防守球員不足
紐記被指可能從丹麥球會 Sonderjyske 引入冰島中堅 S.奧迪臣
而伯明翰以及些路迪亦被指有興趣羅致這名25歲球員

另一方面,紐記被指有興趣出價300萬鎊從森林引入安梳爾
米堡亦被指對這名威爾斯射手有一定興趣

5)
曼聯同埋曼城都被指有意接收洛賓
轉會費約2500萬歐元

另一方面,消息指史奈達決定留隊爭正選而拒絕加盟國米

6)
巴塞隆拿被指打算出價400萬歐元引入拉芬夏
不過史浩克04表明要有1000萬歐元先肯放人
而祖雲達斯同埋AC米蘭亦被傳向這名巴西右閘招手

而巴塞亦被指睇中薩克達中堅基格連斯基
這名烏克蘭球員身價高達2500萬歐元

另一方面,早前表態唔會離開紐卡素既古迪利斯忽然同巴塞扯上關係
佢即時改口承認有興趣過檔

7)
愛華頓同意將尼史葛賣俾曼城
消息指轉會費約2400萬鎊
而佢地可能投訴曼城早前非法斟酌這名英格蘭中堅

另一方面,曼城決定將尼日利亞小將奇雲艾度曉外借到卡迪夫城

8)
祖雲達斯被指考慮出價1200萬歐元收購蘇保迪
再俾佢於下季先加盟

9)
蘇甘保可能加盟諾士郡
艾歷臣答應俾佢加入教練團或者兼任形象大使
甚至有消息指佢將於兩季後接手做埋領隊
所以就算只得3萬鎊周薪都足以吸引佢加盟

10)
布力般流浪方面承認禾諾克即將加盟維拉
消息指轉會費可能高達800萬鎊

11)
尼維特被傳可能復出加盟埃及球會艾亞里

12)
洛頓被指可能以500萬歐元加盟由巴黎聖日耳門轉投愛斯賓奴
這名法國左翼早前一度同布力般流浪扯上關係
而安古路就可能以自由身加盟巴黎聖日耳門

13)
雲達不來梅被傳向麥斯盧比斯招手

14)
國米落實外借貝迪素到羅馬一季
而本田圭佑令人意外地被指成為佢地1000萬歐元既增兵對象

15)
華加斯一直被傳可能轉投費倫巴治
不過這名秘魯後衛表態打算留隊

16)
侯城被指打算出價300萬鎊從莫斯科斯巴達收購加納前鋒達文尼

17)
基巴辛坦拿即將重返巴甲
以200萬鎊由馬體會轉投國際體育會

18)
維迪於對韋根既比賽出拳襲擊對手
雖然球證睇唔到
但英格蘭足總可能引入電視片段向佢起訴

19)
薩拉戈薩被指打算出價500萬歐元向馬體會收購哥倫比亞後衛佩利亞

20)
迪丹尼被指即將由朗斯以400萬鎊轉投樸茅

21)
華倫西亞成功申請貸款7400萬歐元

22)
本地商人楊家誠以佢公司泓峰國際既名義
打算用7億3000萬港元再買多4成伯明翰股份
12.8港元既作價比伯明翰上星期四既收市價溢價55%
佢地同時宣布每5股供8股集資
交易將於1/10之前確定係唔係成事

另一方面,佢地保證麥利殊既地位不變之餘
楊先生亦會撥款400-500萬鎊俾球隊增兵
佢聲稱會考慮引入大中華球員

23)
列特被指可能回流英超
加盟史篤城出任助理領隊

24)
波比 sir 既追思會將於9月於佢既出生地 Durham 低調舉行
只有佢既親友同埋球圈中人先有份出席

25)
雲巴斯頓同荷蘭電視台sport1簽約1年
意味佢今季唔會教波

26)
熱刺準備集資1500萬鎊以興建新球場
而佢地再次被指準備出價1000萬鎊引入祖高爾

另一方面,摩達歷令人意外地成為曼聯既增兵對象
傳聞費 sir 打算用卡域克再加現金收購這名克羅地亞中場

27)
土耳其球會 Sivasspor 決定同保亞沙解約
這名前富咸球員可能轉投錫菲聯,普雷斯頓或者普利茅夫

p.s.:
等埋利記今晚場波先講賽後感

2009-8-21

1)
傳聞富咸同埋愛華頓一旦賣走漢基蘭以及尼史葛
就會收購史堤芬泰萊以替補空缺
更有消息指拖肥糖已向紐卡素出價

而有報導指莫耶斯亦有考慮森巴同埋迪斯甸
布力般浪浪就被傳將侯夫列為前者既替補人選

2)
消息指艾殊利將收購紐卡素既 deadline
定為英國時間今日下晝5點(即係香港時間今晚12點)
而紐卡素將於星期一公布艾殊利既決定

報導亦提及肥佬企硬要收1億鎊
否則寧願攬多紐記一季
不過亦有報導指這會令史堤芬泰萊同埋畢特決定離隊

3)
一個來自中港同埋德國合組既財團被指同樸茅扯上關係
傳聞仲話李兆基以及李澤楷都有份
不過佢地已經透過代言人否認

4)
皇馬接納國米對史尼達既1300萬鎊開價
另一方面,貝迪素就可能於聽日落實離隊

5)
消息指波爾多接受韋斯咸對查馬克既600萬鎊出價
這名摩洛哥射手已去倫敦進行體測
而波爾多被指將收購施積作為替補

6)
法比加斯再次被傳將於下季以3000萬鎊回歸巴塞隆拿
而阿仙奴再次同卡奴扯上關係
另一方面,雲加決定將蘭斯貝利外借到屈福特半季

7)
幾段車路士既消息......
佢地再次被傳出人4000萬鎊收購柏圖

而有報導指施哥夫將要開刀根治膝傷
這名俄羅斯國腳已經作出否認

艾殊利高爾就同意同車路士續約5年

另一方面,佢地決定將哥克外借到高雲地利半季
這名英格蘭U-21代表非常多用途
可踢中堅,防中同埋兩閘

8)
費倫天拿再次被指打算出價1050萬歐元向拉魯斯收購伊度亞度沙維奧
而佢地亦被傳向奧度同埋施仙奴招手

9)
利華古遜落實以200萬歐元從慕尼黑1860引入20歲德國中場賓達
佢上年協助德國羸左歐洲U-19錦標賽

10)
麥巴美近日先後到樸茅以及狼隊試腳
消息指佢好可能同前者簽約兩年

11)
艾加因為開刀根治背傷而要缺陣兩個月

12)
由於高美斯受傷患困擾
熱刺被指出價200萬鎊收購占士
佢地亦被指有興趣向些路迪出價500萬鎊收購麥基迪

13)
早前賀芬咸以心臟有問題為理由而單方面同泰高解約
這名加納射最近搵左4個心臟科醫生證明佢冇心臟病
佢既經理人公開呼籲賀芬咸可以俾佢歸隊

14)
保頓被指打算收購碧福特同埋A.菲爾以加強攻守能力
另一方面,佢地同埋布力般流浪都被指想出價100萬鎊
向英乙球隊 Macclesfield Town 收購朗尼既18歲細佬約翰朗尼

15)
祖雲達斯被指睇中奧沙辛拿既19歲西班牙後衛艾斯派古達
而佢地令人意外地同維迪扯上關係

16)
阿祖安奴由於近況回勇而被鄧加重召

17)
里奧費甸南既大腿傷患比預期嚴重
佢將要繼續休息3至4星期
而伊雲斯亦向傳媒表示考慮開刀根治困擾佢8個月既腳踭傷患

另一方面,雖然戰績比預期差而且傷兵問題嚴重
但費sir依然表示唔會於今個夏天再買球員

18)
尼格度落實同西維爾簽約5年

19)
史杜基斯同意由新特蘭轉投喜伯連
雙方簽約3年

20)
麥利殊決定放棄M.賓特同埋麥斯菲爾
而佢依然希望為球隊引入阿曼特查奧爾
這名阿仙奴左閘亦希望以借用形式離隊以吸收經驗

21)
比鍚達斯同埋史浩克04都被指有興趣引入柏路達
同球會只餘下1年合約既佢約值400萬歐元

22)
博洛尼亞落實借用沙拉耶達一季

23)
侯克以續約5年粉碎佢離隊既傳聞
而波圖將佢既贖身費定為1億歐元

24)
里昂高層希望引入韋拉
不過教練因為懷疑佢既狀態同埋健康狀況而提出反對

p.s.:
保特起跑尾3都可以9秒58跑100米
尋晚連起跑都最快
19秒19就破埋200米世績
條友究竟有冇弱點架?

2009-8-20

1)
賓尼迪斯被傳因為冇錢買人而劈炮
不過賓sir已經立即否認

而佢於對熱刺既比賽後批評球證
可能因而俾足總罰佢停賽
足總已經控告佢既副手森美李爾行為不檢既罪名

而AEK正式接納利物浦對基爾格高斯既出價
佢將於短期內落實同利記簽署3萬鎊週薪既3年合約
另一方面,利記再次被指有興趣接收雲達華治

2)
港商楊先生旗下既投資公司已經激付300萬鎊保證金
意味佢地即將進行約值8150萬鎊既22.3%股份收購

3)
列文宣佈季尾掛靴

4)
阿仙奴被指有興趣引入美國15歲U-17進攻中場基爾
而佢地同賓特拿續約5年

5)
幾段愛華頓既消息......

愛華頓借用班尼加可能遇到阻滯
因為佢代表阿根廷既次數不足
勞工部可能唔會批出工作證

而佢地被指打算出價1200萬鎊從熱刺一併收購賓特尼以及侯頓
亦有消息指佢地將以900萬鎊從莫斯科斯巴達引入翼鋒拜斯托夫

另一方面,同球隊反晒面既尼史葛被莫耶斯罰佢單獨操練
而莫耶斯亦表明要以到3000萬鎊既出價先會願意放人
亦有傳聞指同拖肥糖打算收購侯夫作為替補

而比錫達斯令人意外地被傳出價940萬歐元收購沙夏
不過球會同埋球員本身都表態希望繼續合作

6)
消息指 Barry Moat 對紐卡素既收購價
視乎巴克萊銀行肯借幾年俾佢

另一方面,維拉成為最新一間同史堤芬泰萊扯上關係既球會
而紐記被指將錫菲聯既基加倫列為替補人選

7)
艾美達落實回歸母會河床

8)
AC米蘭被指提出以奧度以及卡拉迪斯同拉素交換迪斯維斯迪
不過費倫天拿被指準備向卡拉迪斯招手

9)
西班牙傳媒指尼格度即將以1200萬鎊加盟西維爾
侯城雖然收購射手失敗
不過就可能成功從維拉羅致右閘楊格

10)
格靈即將落實以450萬鎊加盟富咸

11)
羅馬被指想以巴迪斯達同國米交換文仙尼一季
不過消息指國米傾向放棄蘇亞素
而貝迪斯依然有機會轉投罹馬

另一方面,羅馬繼續同柏夫奴真高扯上關係
而文尼斯就表態留隊以證明自己實力

12)
拜仁方面表明要收到1億歐元既報價先會放走列貝利

13)
施美奧利落實以400萬鎊由費倫天拿轉投森多利亞

14)
阿古路尋晚為馬體會出戰歐聯
意味佢唔會於今個夏天離隊

15)
D.Hecking 因為戰績唔理想而向漢諾威請辭

16)
有消息指國米定左聽日係收購史尼達既 deadline
而熱那亞被指打算從佢地引入域陀奧賓拿

17)
奧尼爾被指有多個收購目標
當中包括拒絕加盟史篤城既占士哥連斯,厄遜,迪斯甸,禾洛克,贊拿斯同埋端基
不過價錢就成為所有交易既障礙

18)
祖雲達斯被指打算從里昂引入克拉克
而佢地亦再次同格羅素扯上關係

另一方面,雖然謝基拉被指成為巴塞隆拿同埋多間土耳其球會既增兵對象
不過佢既經理人透露這名捷克右閘冇離隊打算

19)
巴塞隆拿被指依然希望為後防增兵
人選包括桑治,圖盧茲既 M.Cetto 同埋摩納哥既 C.Mongongu

20)
艾確圖落實同熱刺續約4年

21)
巴里被一個美元財團以2200萬鎊成功收購

22)
由於辛洛高去意已決
雲達不來梅最終決定賣佢去聖伊天

p.s.:

1)
To:路斯基
阿仙奴作客符碌擊敗些路迪既入球精華
http://www.youtube.com/watch?v=7631eWJ1lxQ&feature=related

2)
尋晚般尼爆冷羸曼聯
般尼除左球員夠勤力同埋比歷克一腳世界波外
講真整體水準好一般
小弟依然對佢地既護級前途唔太樂觀
希望主場氣氛可以繼續幫到佢地
佢地羸到曼聯講真紅魔嚴重跌watt先係主因

曼聯當中單天保至尊既朗尼
同埋艾夫蘭已經係踢得比較好
不過後者亦係失波罪人
可想而知其餘球員踢得幾屎

中場3個活力型球員對住般尼成班跑狗無甜頭
搞到無波到腳既傑斯叔好多時間只係睇人踢波
而中路去唔到波又冇本事拉邊
費sir再次用安達臣打邊就最無謂
而如果隊波俾摩連奴 in charge
奧雲踢多過半場先離奇
到肯用貝碧托夫入替奧雲
球隊又衰傳中球落點奇差

曼聯英超3連霸既關鍵從來都唔係靠環掃 Big 4
而係靠對中下游球隊好少失拖
印象中如果佢地對升班馬都收皮
季尾埋單一定冇好下場
如果費sir唔可以盡快執返靚隊波
今場波隨時係佢地今季整體表現既寫照

2009-8-19 (2)

再來英冠分析
小弟打算將24隊球隊分為4級

由於3隊英超降班馬星散問題都唔係太嚴重
所以同埋前6常客鍚菲聯
就成為小弟心目中有本錢爭取直接升班既第一梯隊

紐卡素方面
隨住幾次冇米粥
而家最重要既已經唔係有冇新老闆
而係盡快落實係唔係賣盤
艾殊利如果覺得唔岩價唔賣
又肯再注資4000萬鎊俾隊波出糧
不妨信多佢一季
因為紐記重返英超一定會幫佢賣個好價

相比難兄難弟西布朗同埋米堡
紐記既人腳有過之而無不及
只要有 heart 同埋踢返個隊型
唔理曉頓繼續教抑或之後有人接手
就算最終走左幾件主力都足以同其他英冠對手死過

米堡方面
只要一日留得住端基
就算中前場冇左幾件貴價蛋散都冇咩所謂
不過前線3隻快馬全部識跑唔識入波
一日搵唔到個識入波兼二傳既前鋒
都會浪費端基好多心機

另一方面,米堡其實同紐記陣中都有幾多年青球員等緊上位
修夫基如果肯繼續搞青訓
米堡可能繼阿當莊臣後再有意外收穫

而即將有格寧離開既西布朗雖然留唔到領隊莫比利
不過基本上保留到主力陣容
亦搵左迪馬迪奧接手
這名前意大利工兵雖然經驗唔多
不過佢應該有能力改善西布朗近年一般既防守能力
而球隊踢法可望粗中帶幼
布隆特同埋摩利臣兩邊俾波西蒙確斯既簡單直接踢法
亦絕對有能力協助球隊重返英超

錫菲聯方面
每次踢英冠都幾乎係前6穩膽
邊可能唔當佢地係第一梯隊

第一梯隊現時冇一隊明顯標青
當然亦冇咁快會有球隊成功跑出
紐記同埋米堡人腳雖然比較好
不過英冠太講速度同埋體力
亦解釋點解強隊好多時作客隨時輸俾弱隊
踏入季中佢兩隊隨時因為體能問題而略為蝕章

第二梯隊方面係指冇本事直接升班
不過有能力爭取附加賽資格既球隊
這類球隊既數目其實英冠梯隊當中最多既一層
小弟心目中就有10隊

原因係英冠實力接近
排第6同排第3一樣又只係得附加賽資格
同中游球隊分數上亦差唔遠
令好多黑馬球隊都有本錢去搏一搏

第一隊要講既係雷丁
個幾星期前從米堡迷ck得知 Sky TV 睇好這間倫敦球會羸英冠
小弟當時已經好唔同意
佢地雖然從屈福特搵到有料之人羅渣士接替退休既葛甫
不過因為慳錢兼改組而放棄幾件有英超經驗既球員
隊波即刻廢左唔止一班
而近日仲冇埋史堤夫亨打同埋比基
而家入到前6都算超額完成

而葉士域治雖然人腳幾一般
但有堅尼教波就絕對唔可以忽視
雖然而家出閘脫晒腳排尾4
不過唔好唔記得佢當年接手出閘直情仆直既新特蘭
最終黑貓到尾二個 round 已經肯定直接升班既歷史

教英超要燒銀紙兼好考眼光去勁買人
比賽既技術成份又比較高
堅尼既最佳戰場可能係體力,鬥志比星級陣容更重要既英冠
因為班波只要感染到佢7成鬥志已經唔係人咁品

而卡迪夫城近年大致 keep 到一定戰鬥力
麥哥馬克同埋列尼等主力留隊
又從新特蘭搵到查柏回巢
整體戰鬥力絕對夠入前6
佢地人腳算唔錯但財力又比較一般
繼續阻止英超球會挖角應該係佢地今季既關鍵

而近兩年挑戰升班既布里斯托城
今季冇好似上季咁出閘脫腳
考慮到佢地既人腳唔算充裕
擅於激勵士氣既加利莊臣唔似可以
繼兩季前一度帶隊長佔頭兩名
入前6應該係佢地既基本目標

打呲郡方面
因為對哥洛夫父子既情意結
小弟對佢地特別有好感
如果財力一般既佢地有本事挽留中前場幾件主力
班尼斯,甘文斯同埋侯斯等球員隨時有能力為球迷帶來驚喜

昆士伯流浪方面
人腳唔差但而家只排17唔係大問題
老闆唔好耐性似乎先係麥基頓遇到既既最大困難

普雷斯頓識攻唔識守
肯定唔係直接升班既材料
不過爭入前6既機會始終存在

諾定咸森林方面
比利戴維斯上季尾成功領軍護級成功
今季再買斷根達,保羅安達臣等5個球員之餘
又引入艾迪保拉同埋麥肯拿幾個實用球員
雖然唔夠默契開壞個頭
不過以佢地而家既人腳
只要比利戴維斯及早撥亂反正
爭前6依然唔係妄想

水昌宮雖然人腳平平無奇
不過領隊禾諾克功力搭夠已經唔可以睇小

高雲地利方面
整體人腳又係好一般
不過冰島小將A.根拿臣有活力又肯用腦踢波
有佢成隊波即刻可以踢高一皮波
最驚佢一個未救到全家之前已經俾人挖走
特別係高雲地利既財政壓力絕對唔輕

第3梯隊指4隊比上不足,比下有餘既球隊
近年唔少球隊坐直昇機咁連續升班
原本李斯特城同埋彼德堡都有可能成為最新例子
不過今季英冠係近年實力最接近既一年
佢兩隊就好難偷雞

前者由功力一般既皮雅臣領軍
球隊實力唔似會突飛猛進
球隊射手 M.Fryatt 於英冠既履歷仲令人唔多放心

後者就由費sir個仔戴倫費格遜執教
小弟唔敢講佢將來有冇費sir咁高成就
不過佢一下子將12個球員掛牌就未免換血過急
而家球隊排尾5就唯有當買個教訓

屈福特方面
麥基回歸球隊新手教波
成隊波亦俾人好有活力既印象
如果現有人腳可以維持到下季
小弟絕對會將佢地既評級提升1級
不過以佢地財力
要佢地成功保留以湯美史密夫為首既幾個主力
可能同要求佢地今季即入前6一樣強人所難

錫週三方面
雖然財政壓力大減到而家有閒錢買人
不過要佢地一下子挑戰前6始終唔多實際

第4梯隊就係指掙扎求存既6隊
史雲斯先後俾韋根搶走領隊馬天尼斯
以及兩個主力佐迪高美斯以及史葛蘭特
隨時成隊波散晒重返英甲

普利茅夫方面
隨住超班既保羅加拉查回歸布力般流浪
佢地連前線唯一亮點都冇埋
今季入球能力肯定插水
單靠隊長兼龍門既 R.Larrieu 可以捱得幾多

而班士利,斯肯索普,黑池同埋當卡士打
亦只係海軍鬥水兵既料

p.s.:
多口順便講幾句英甲
列斯同埋查爾頓出閘順利
似乎有力重返英冠

不過諾域治同埋修咸頓就好大檸樂
前者開咧唔耐已經炒領隊
更慘情既後者未開咧已經被扣10分
兼有質素既球員已經被人挖晒
前景未許樂觀

2009-8-19 (1)

1)
英國傳媒爆料賓尼迪斯只得2600萬鎊增兵
另有報導更指可能只有150萬鎊

另一方面,哈化方面承認想搵禾路連回巢
不過亦知道轉會費係成事障礙
而尼亞拿亦令人意外地被指成為巴塞以及皇馬既增兵對象

2)
Barry Moat 首次向傳媒承認出價收購紐卡素
不過消息指出價只介乎7000-8000萬鎊
同艾殊利既1億叫價有一段明顯距離

3)
雲加表示歐洲球會好可能因為增加收入來源
而最終發展歐洲超級聯賽
另一方面,阿仙奴被指準備出價1100萬鎊收購漢基蘭

4)
拉傑錫成為最新一個同國米扯上關係既進攻中場
國米上季已經被傳曾經向史浩克04問價

5)
文仙尼表態願意接手辛尼特

6)
車路士落實引入20歲塞爾維亞中場麥迪
而比沙路亦落實轉投雲達不來梅

另一方面,馬體會可能今晚派阿古路出戰歐聯外圍賽
令車仔打消羅致佢既念頭

7)
曼聯決定將年青中場基華利外借到屈福特

另一方面,原來曼聯當日將梳格爾賣到史篤城
合約訂明曼聯有優先權收購佢回巢
所以同利物浦同樣唔夠後衛用既佢地被指打算出價800萬鎊回購佢

8)
英冠賽會已經拒絕水晶宮既重賽要求

9)
布力般流浪落實同沙加度簽約兩年
成事原因係這名西班牙國腳願意減人工至6萬鎊

10)
紐卡素被指準備再次為盧雲卡蘭斯提供新合約
而曉頓早前對蘇甘保加盟一事故弄玄虛
原來這名前英格蘭中堅依然有機會加盟
不過就要減5成人工至1萬5000鎊週薪

另一方面,杜夫落實同富咸簽約3年

11)
般莫迪暗示今季內都無法復出

12)
科隆亦被指有興趣引入雲達華治

13)
聖伊天希望羅致自由身既雲尼古

14)
樸茅落實以200萬鎊從保頓一併引入薜圖以及麥肯
而保頓就成功同戴維斯以及馬菲泰萊續約至2012年

15)
曼城被指打算繼續為前線增兵
最新目標係富明尼斯既巴西射手魯杜富

16)
貝尼斯天干尼表示AC米蘭於今個夏天唔會再增兵

p.s.:
晏少少再分析英冠

2009-8-18 (2)

讀者紐迷 Ricky 講起英超同埋英冠既 preview

先講英超
其實未睇第一輪比賽
小弟已經將20隊球隊分成4組 (4+6+4+6)

前列4隊當然係 Big 4
小弟認為4隊各有隱憂
冇一隊特別有冠軍相
亦由於競爭激烈
小弟估邊隊有85分已經足以羸英超
(上季曼聯有90分,利記亦有86分)

冇左C7既曼聯陣式不變
不過重心已經改為朗尼
小弟亦睇好佢會大爆發
不過可唔可以一個救全家
小弟好有疑問
加上球隊既防守其實冇數據所反映咁穩健
賓科士打代替雲達沙亦唔似唔會爆鑊
而費sir始終唔肯搵個硬朗既防中
攻守都跌watt唔似會有好下場

車仔搵肥安就有好有唔好
好既當然係佢特別識用老人家
佢既體能訓練班底仲可能係全世界最堅
而佢地雖然收購量大減
不過佢地亦係保留主力最成功既一隊
良好默契既 invisible 優勢絕對唔可以忽略
不過小弟就覺得佢地班波唔多 fit 個鑽石陣式
能否短期內可以成功轉型隨時係聯賽成敗關鍵

阿仙奴方面
就算冇左艾迪巴約兼未買到查馬克
小弟依然認為佢地火力超勁
特別係上季37個作客入球絕對得人驚
不過小弟由始至終都擔心佢地兩樣嘢
中後場防守唔夠正貨
同埋有時踢法唔夠體力化

希望雲加真係買到漢基蘭改善球隊畏高弱點
同埋班少爺仔可以 keep 到熱身賽時所展現既良好體能

利物浦方面
成敗向來繫於表現穩定性
當大家寄望佢地可以再穩定多少少而坐正既時候
賓尼迪斯偏偏要面對沙比艾朗素離隊既難題
佢走左之後球隊中場聯繫能力差左唔止一皮
盧卡斯利華依然未上到位
阿古蘭尼玻璃腳仲抖緊之餘
又驚賓帥唔識用佢

加上謝拉特同埋托利斯兩大巨頭應該會比較遲上力
前者暑假煩官司
後者又因為踢太公波而遲左休息
要知道古治仲未正式成為可靠既第3號得分點
當兩個大哥未一齊 top fit
利記都唔可以發揮十足威力

所以結論係4隊機會均等
當然如果利記盡早上力既話
小弟主觀客觀都睇高佢地少少

第二梯隊既6隊包括:
曼城,熱刺,維拉,愛華頓,富咸同埋韋斯咸

由始至終都冇唸過曼城今季可以即入前四
因為佢地買人頭重尾輕
搞到中後場依然有弱點
鄧尼仲絕對係對方既攻擊重心
加上曉士唔多夠料
兼球隊慣性作客腳軟
點睇都未似夠力入豪門

不過佢地應該有力奪取歐霸盃資格
而這亦應該係俾富豪老闆既安慰獎

而熱刺方面
之前有傳聞指哈利列納好想大換血
不過而家唔成事反而係好事
因為唔會因為冇默契再次出閘脫腳
加上佢地同曼城一樣唔使踢歐洲賽
有咁多好球員只係望佢兩隊踢好英超唔算太過掛

愛華頓同埋維拉有少少難兄難弟 feel
同樣俾人搶主力,買人遇阻滯,要兼顧歐霸盃
加上莫耶斯同埋奧尼爾既功力同 Big 4 領隊仲有距離
(前者5季前成功偷雞或多或少因為賓帥初來英超報到)
佢地唔止再次前4無望
仲隨時連前6位置都俾曼城以及熱刺迫走埋

而富咸同埋韋斯咸當然冇本事挑戰前4
不過要佢地搏大霧爭歐霸盃資格又未至於絕望

而第3梯隊係指幾隊無所事事既球隊
當中包括保頓,新特蘭,布力般流浪同埋韋根

保頓於加利麥臣帶領下
上季整體表現略有改善
今季可望有更多好日子
唯一隱憂只有加利麥臣過急為後防換血

新特蘭同埋暴力幫人腳還算可以
加上領隊有一定功力
亦唔愁降班
當然如果 Big Sam 有錢再為後者略為增兵
形勢當然更穩陣

韋根最初冇左布魯士一度幾令小弟為佢地擔心
不過接手既馬天尼斯教史雲斯都教得唔錯
值得一信
而陣中雖然冇左華倫西亞以及卡達莫
不過亦多左幾件平貨
只要新兵有料到
以佢地既防守水準
加上射手洛達列加既表現自上季季尾已經慢慢進步中
今季就算入唔到前十都唔慌要降班
睇完對維拉場波
小弟覺得佢地既觀賞指數仲可能係中下游球隊中最高

護級組就包括:史篤城,侯城,樸茅同埋3隊升班馬

手榴彈球隊既當務之急一定係改善作客水準
因為今季任何對手作客佢地一定會先做好防務
佢地唔多可能再於主場靠體力化踢法為所欲為

侯城想護級唔一定要簽到尼格度
反而係要保留端納
佢雖然唔係一線後衛
不過就一定係佢地防線既大佬

樸茅就比較被動
因為唔係班波唔好
而係賣盤搞到唔湯唔水
而家賣左人套現都冇得買人補充

3隊升班馬方面
伯明翰人腳唔比一般中下游球隊差
加上麥利殊又唔係蛋散
最大隱憂反而係佢同高層既關係

而其餘狼隊同埋般尼
人腳唔標青之餘
又唔覺有必殺技
(特別係後者)似升降機多過英超球會

而由於護級形勢冇上年咁激
小弟估侯城攞得34分都成功護級既歷史今季唔會重現

p.s.:
寫得太多
英冠之後再講......

2009-8-18 (1)

1)
利物浦被傳計劃出價1000萬鎊
以收購畢爾包後衛阿摩列比達

2)
侯城被指同埋科隆都想出價300萬鎊向些路迪收購軒基
不過這名德國右閘已經表明冇意思離隊

而前者收購尼格度亦遇上阻滯
薩拉戈薩被傳打算出價1500萬鎊搶人

3)
國米再次被指出價收購史尼達
而貝迪素就被指可能以500萬歐元賣到巴勒莫

4)
碧格列斯坦表示巴塞隆拿今個暑假未必會再使錢買人
不過佢地依然同好多球星扯上關係
最新版本就係曼聯既維迪

5)
由於已收到通知唔會受到重用
薩卡度可能由禾夫斯堡轉投祖雲達斯

6)
沙加度表態希望加盟布力般流浪

7)
史堤芬泰萊表態唔想離隊
而蘇甘保就話有興趣加盟

另一方面,愛斯賓奴被指有興趣借用高路仙尼
而拉素就被指打算出價350萬鎊收購這名阿根廷中堅
不過價錢備低應該好難令紐記放人

8)
傳聞諾士郡打算斟酌費高,尼維特同埋韋拉等球星

9)
愛華頓被傳想向華倫西亞借用阿根廷防中班尼加

10)
AC米蘭被指希望先以300萬歐元借用戴倫特一季
再於季尾俾多700萬歐元買斷佢

而AC米蘭亦再次被指會於短期內出價收購法比加斯
報導亦指派路會以3500萬歐元賣俾車仔

11)
雲達不來梅希望盡快落實引入比沙路
而佢地表明唔準備將辛洛高賣到巴黎聖日耳門

12)
韋根即將再次從華歷簡奴挖走球員
今次既目標係塞內加爾防中 M.Diame
不過有消息指佢既心臟可能有問題
未知佢最終能否通過體測

13)
修夫基表明唔會賣走侯夫
而佢亦否認球會會向鴨巴甸出價70萬鎊收購李爾米拿

14)
費倫天拿被指有興趣從小保加收購中堅梅奴斯
而這名18歲小將亦表態有興趣加盟

15)
卡路爾被打呲郡放棄後
將轉戰丹麥聯賽,加盟奧丹斯

16)
車路士被指打算出價1400萬歐元另加上卡華路
以打動羅馬割愛麥薩斯
這名法國後衛既經理人隨即否認有關傳聞

17)
熱刺被傳有興趣向些路迪收購史葛布朗
不過哈利連納已否認有關報導

18)
史篤城方面表示將會再引入4至5名球員
而佢地被指已同意以500萬鎊收購占士哥連斯

2009-8-17

近兩日既新聞......

1)
利物浦被指有興趣向維拉羅致占士米拿
而曼聯被指打算同利物浦爭奪梳格斯
前者既傳聞800萬鎊出價比利記既出價高出300萬鎊

另一方面,利記被指可能割價以300萬鎊賣禾路連俾哈化柏林

2)
車路士被指打算出價4200萬鎊收購阿古路
另一方面,舒夫真高成為費倫巴治既借用對象

3)
摩納哥被傳有意斟酌東尼
而這名意大利射手透露羅馬向佢招手
消息指拜仁願意以500萬歐元放人

4)
幾段皇馬球員離隊消息......

消息指侯城將於聽日或之前以1200萬鎊收購尼格度
而佢既隊友古迪被指成為加拉塔沙雷既增兵對象

另一方面,史尼達態度軟化
暗示願意轉投國米
而佢既同胞雲達華治忽然同阿仙奴扯上關係
消息指兵工廠開出賤價600萬鎊收購佢

5)
只要通過體測同埋申請到工作證
新特蘭就可以落實從里昂借用加納中堅曼沙一季
更有權於季尾以700萬鎊買斷佢
現年26歲既佢可踢中堅以及左閘
佢路數同埋位置感都幾好,不過速度一般

6)
哥迪奧拿證實球會唔會於今個暑假引入法比加斯
不過佢既隊友伊保爾就被傳成為巴塞隆拿700萬鎊既增兵對象

7)
列貝利表態留隊

8)
史巴利堤可能接手辛尼特
年薪高達400萬歐元

9)
韋斯咸被指打算將厄遜賣到曼城套現
再向波爾多收購查馬克
而佢地亦有興趣接收沙加度

10)
由於馬達拉斯希望爭取更多出場機會以入選世界盃大軍
所有有消息指拉素打算乘機挖角

11)
朗斯射手迪丹尼被傳成為樸茅既增兵對象
佢亦表態願意加盟
而佢地亦被指有興趣從紐卡素接收古迪利斯

另一方面,蘇甘保被指可能轉投紐卡素

12)
祖雲達斯仍然為後防增兵
佢地被指出價800萬歐元同AC米蘭爭奪這名意大利後衛
紅黑兵團因為未能就交易人選同拉素達成協議
令老婦人有機可乘

13)
消息指一旦端納轉投利物浦
侯城將會羅致蘇甘寶作為替補

14)
只要通過體測
杜夫就可落實轉投富咸
不過這間倫敦球會就決定放棄羅致維度卡

另一方面,薩拉戈薩同埋加拉塔沙雷分別被傳
有興趣羅致荷西安歷基以及高路仙尼

15)
布力般流浪即將落實引入烏德勒支射手施貝巴華
雙方將簽約兩年

16)
一旦查馬克離隊
波爾多被指將出價500萬鎊收購艾文達作為替補

17)
維拉被指打算提出500萬鎊跳樓價接收賓特尼
不過消息指哈利列納最少要求1000萬鎊

18)
李青龍落實轉投保頓
雙方簽約3年

19)
費倫天拿以1050萬歐元從拉魯斯羅致沙維奧
這名被譽為新美斯既19歲年青球員可踢左翼以及攻擊中場
雙方簽約5年

另一方面,曼聯之前向佢地挖角15歲後衛科拿斯亞
不過意大利足協規定16歲以下既球員唔可以簽球員合約
所以佢地決定向歐洲足協投訴

20)
史篤城再次被指有興趣接收侯夫

21)
賀芬咸加納後衛禾亞沙被指成為狼隊既增兵人選

p.s.:
1)
英超球證差......英冠更差!
水晶宮球波入左再彈中龍門內柱反彈出來
球證咁都可以判唔入
肯定發雞盲或者冇睇實場波

2)
利記出閘脫腳
艾確圖兩次犯天條都唔使輸12碼係佢行運
亦係利記冇運
不過整體唔夠狀態先係死因
全隊只有拉爾拿以及格連莊臣有料到
試問2個又點鬥11個
狀態同之前亞洲之行相比亦冇咩大改善

中場俾人地單靠一個柏拉斯奧斯已經ko左
後衛又跟人跟得唔緊
唔知仲以為羅比堅尼同埋巴斯桑治有臭狐
前面除左班拿約後備上陣有少少貢獻外
其餘只係似小學生周圍跑又邊會有波入

3)
9秒58......時間勁到難以相信
不過依然唔覺佢已經出盡全力先得人驚
越來越覺得保特可能真係來自火星

2009-8-16

由意大利超級盃講到英超開咧......

國米牌面羸晒拉素
臨場亦佔較多攻勢
不過佢地整體埋門把握力強差人意
特別係迪亞高米列圖至少 miss 左4次餐士
加上梅斯利亞又守到上左身
令佢地最終飲恨鳥巢

而摩連奴大陸之行一肚火
大陸記者,拉素既穩守突擊踢法同埋鳥巢草地質素
通通都無辜俾佢批評
不過最抵死既可能係球隊輸波都掛住飲紅酒飲到半夜兩點既白蘭加

事緣伊巴謙莫域俾巴塞隆拿挖角
摩連奴全程被架空
令球隊僅有既創造力都冇埋

加上占美利斯已被放逐到韋斯咸
文仙尼同埋哥利斯馬又不受重用
比賽尾聲摩連奴背城借一踢4-2-4
佢寧願用不擅側擊既巴洛迪利同埋蘇亞素
都唔肯用佢兩個拉邊
單靠中前場球員勤力走位以及史坦高域後上攻門
始終好難撕破對手既密集死守

摩連奴希望踢走文仙尼以及哥利斯馬
更希望球隊可以有具質素既進攻中場
偏偏白蘭加都幫唔到手
加上後防新兵盧斯奧同埋捷禾既踢法都偏柔
亦無助改善球隊防守死球既集中力
難怪佢叫老闆搵哈利波特幫手羸歐聯

如果球隊運作唔流暢就冇運行既論點成立
咁串王既舊老闆應該都唔見得安落

肥安帶隊有好有唔好
佢既體能訓練班底之前羸盡口碑
令車路士有望克服平均年齡偏高既弱點
睇社區盾同埋尋晚對侯城場波
佢地既體能狀況比其他球隊更快上力

不過肥安堅持改踢鑽石型中場陣式
感覺唔多岩車仔球員
除左佢地冇一個好似派路咁擅長長傳兼引球出擊既防中
林伯特而家演繹既進攻中場亦冇之前咁多機會後上攻門
或多或少浪費佢後上攻門既能力

當然如果車仔球員可以盡快適應肥安既踢法
加上仲未出場既施哥夫論威力又絕對不下於艾沙維
車仔依然係幾隻盃既爭標要角

p.s.:
1)
尋晚不停轉台睇晒兩場尾場
兵工廠作客羸拖肥糖唔意外
不過大炒6:1既賽果真係估100次都唔會估

同小弟講過波經既廠迷都知小弟從來都話兵工廠火力強勁
有冇艾迪巴約都冇所謂
不過千祈唔好俾一場大炒就沖昏頭腦
佢地既中後場依然有唔止一個隱憂

另一方面,紐記羸雷丁唔奇
(同小弟傾過英冠既米堡迷ck可以做證小弟唔多睇好雷丁)
不過紐記炒人3蛋
仲要艾美老味入晒3球就點都估唔到
紐記雖然羸波
不過右路側擊仍有改善空間

2)
利記半場俾艾確圖射死
shit......

2009-8-15

近3日既新聞......

1)
消息指艾殊利俾多幾日時間 Barry Moat 籌旗
因為巴克萊銀行方面仲未完成5000萬鎊既借貸審批

2)
楊家誠打算再次收購22.3%伯明翰股份
英國傳媒估計楊先生最少要出價9億港元

3)
西班牙傳媒指由於死對頭羅素同法比加斯關係密切
拉樸達為左減低羅素下季競選會長既威脅
不惜落 order 要提早帶法比加斯重返巴塞隆拿
消息指巴塞出價3000萬歐元
兼送上古莊臣同埋免費借用亨利一季
不過俾阿仙奴還價4500萬鎊
但雲加已經否認有關報導

4)
簡拿華路第127次代表意大利出賽
打破馬甸尼既出場紀錄

5)
托利斯落實同利物浦延長合約至2013年
另一方面,本田圭佑透露利記有興趣羅致佢

6)
拜仁方面承認希望以1500萬鎊收購保辛華
不過強調同列貝利既去留無關
而曼聯被指打算出價500萬鎊同佢地爭奪紐亞

7)
維度卡只要通過體測就可以落實加盟富咸
而這間倫敦球會亦被指有興趣出價400萬鎊收購杜夫
另一方面,舒華沙同埋丹普西落實留隊至2011以及2013年

8)
愛華頓被指向國米出價500萬鎊收購域陀奧賓拿

9)
尼維特考慮轉戰美職盟

10)
紐卡素向曼聯借用D.森遜到出年1月
而佢地亦被指想向屈福特羅致迪美斯,M.威廉臣以及湯美史勿夫
熱刺既利維摩亞亦係佢地既考慮人選

另一方面,愛華頓被指準備開價800萬鎊收購史堤芬泰萊

11)
卡達莫落實加盟新特蘭
雙方簽約4年
轉會費800萬鎊
不過當中有200萬鎊係 variable

12)
熱刺被指加碼至1500萬鎊收購M.施素高
不過同圖盧茲要求既2500萬鎊仍然有明顯距離
而史葛布朗被指成為佢地800萬鎊既增兵對象

另一方面,贊拿斯同埋賓特尼都被指會被放棄
而後者最近因為醉酒駕駛而被捕

13)
羅馬里奧宣佈以43歲高齡復出巴西地區聯賽
佢堅稱唔係因為錢而復出
只係因為佢老豆係0個間當地球會既球迷
不過佢近年被指財政狀況欠佳
近日仲以438萬美元既價錢賣左間豪它

14)
韋斯咸被指打算各拿玻里借用連拿奧度
而尼爾可能最終選擇同韋斯咸續約
槌仔幫亦落賓買斷捷克中場R.施華
佢地亦被指有興趣羅致多一個箭頭
傳聞人選包括東尼,古莊臣同埋查馬克

後者現時去向仍然未明
佢已經先後同6間英超球會扯上關係

15)
車路士落實以500萬鎊引入塞爾維亞U-21中場 N.馬迪
而佢地亦被指有興趣以250萬鎊羅致挪威中場侯錫納普
有入自然有出
所以文切尼落實外借到狼隊一季
不過舒夫真高就賴死唔走
表明唔想重返基輔戴拿模

16)
AC米蘭最終放棄卡勒
這名澳洲龍門將加盟羅馬
而紅黑兵團就從摩納哥引入老將F.羅馬作為替補

17)
當路雲證實患上豬流感
不過佢代表美國作客墨西哥既時候仲未知道有關消息

18)
簡奴同意同樸茅簽署短期合約

19)
艾維斯好可能轉投賓菲加
而奧尼爾亦可能跳船
愛華頓以及富咸都被指可能願意接貨

20)
雷恩翼鋒杜馬特,沙加度,洛頓同埋辛頓都被指成為 Big Sam 既增兵人選
當中侯城同埋樸茅亦對自由身既後者好有興趣

21)
侯城落實從雷丁引入史堤夫亨打以及阿爾及利亞射手 K.Ghilas
佢地亦被指打算出價1800萬歐元收購尼格度

22)
伯明翰落實同前利物浦後衛域奴簽約1年

23)
博洛尼亞再次被指打算收購捷雲頓

24)
國際職業足球員協會既律師對外表示
雲達華治有可能以自由身離隊
這名荷蘭中場表示比較想轉戰英超

25)
加納射手泰高因為被驗出心臟病而俾賀芬咸解約
但佢既經理人希望球會方面改變主意

26)
樸茨茅夫落實從熱那亞借用比利時後衛雲丹波里

27)
卡斯伯舒米高落實加盟諾士郡

28)
水昌宮年青球員摩西斯被指成為阿仙奴以及狼隊既500萬鎊增兵人選

29)
韋根落實從華列簡奴收購西班牙中堅艾馬耶

2009-8-12

1)
路爾斯加西亞落實由馬體會免費轉投桑坦德

2)
傳聞曼城準備再次出價1億5000萬鎊收購美斯

3)
消息指油王親自出馬斟酌列貝利
不過傳聞出價4000萬鎊同拜仁既9400萬歐元吹價明顯差好遠

4)
消息指艾殊利定左今個星期五
為 Barry Moat 撲水收購紐卡素既 deadline
果到時仲未成事
肥佬會索性等多一季先買
仲會再次邀請奧拉利接手

5)
消息指AC米蘭唔肯用艾比迪去交換迪施維斯迪
只肯將奧度作為交易條件
而巴里就被指成為紅黑兵團左閘既另一替補人選
不過佢地只願意借用這名身價高達1300萬鎊既小將

另一方面,李安納度好可能決定放棄卡勒
這名澳洲門將多數轉投帕爾馬

6)
伊保爾既經理人否認這名科突迪瓦國腳轉投費倫天拿既傳聞
表示佢將會留隊

7)
盧雲卡蘭斯仲未搵到新球會
佢會暫時去格流跟操
直至物色到新球會為止

8)
干地拒絕接手辛尼特
文仙尼而家成為新教練既頂頭大熱

9)
巴勒莫被指有興趣收購彭迪夫

10)
消息指摩連奴要求球會引入一名有創造力既中場
當中傳聞人選包括哥古夫,史尼達或者雲達華治
當中以後者既加盟機會較大
傳聞轉會費為1300萬歐元

11)
基士文被指成為馬拉加既新箭頭人選

12)
侯夫被指成為史篤城另一中堅人選

13)
里昂既克拉克同埋史浩克04既拉芬夏都被指成為祖雲達斯既新右閘人選

14)
列根奴透露即將同新球會簽約
消息指佢最有可能加盟拉素
而費倫巴治,阿積士同埋費倫天拿都有興趣羅致佢
當中前者仲係佢既前度球會

15)
諾士郡被指準備以9萬鎊週薪吸引蘇甘保加盟
而夏文以及卡斯柏舒米高亦被傳係佢地既羅致對象

16)
鶴臣表明要收到1500萬鎊既價錢先肯放走漢基蘭

17)
侯城被指向辛頓招手

2009-8-11

終於返到香港
以下係近幾日比較重要既新聞......

1)
愛斯賓奴隊長查基因為心臟病發瘁死
享年26歲
佢跟隨球隊於意大利進行季前集訓
病發既時候正同女友講緊電話
R.I.P.......

多達5萬名球迷先後去到球會既新球場悼念佢
仲有人提議新球場改用佢既名去紀念佢

另一方面,佢既屋企人可能獲賠1300萬歐元

2)
侯城方面表示好難阻止端納轉投利物浦
不過佢地唔滿意利記既出價
傳聞利記出價600萬鎊
但係老虎還價1200萬鎊
消息指賓尼迪斯可能改為向史篤城出價500萬鎊收購梳格斯
賓帥亦表示馬斯查蘭奴已經打消轉會巴塞隆拿既主意

另一方面,利記令人意外被指打算向芬洛收購23歲新星本田圭佑

3)
領軍羸得首個重要錦標既安察洛堤否認球隊羅致柏圖
仲話唔會再有任何收購
不過羅馬方面就踢爆佢講大話
透露佢地拒絕車路士對迪羅斯既出價

4)
羅馬另外被指打算收購貝迪素以及尼格度

5)
消息指韋拉改變主意留隊

6)
舒利亞仍希望出任紐卡素領隊

另一方面,巴頓於對西布朗賽前同古迪利斯以及高路仙尼嘈交
因而再有傳聞指佢會被紐卡素放棄

7)
巴塞隆拿方面表示法比加斯仍然係佢地既收購對象
不過就表明唔會提出過高既價錢

8)
辛尼特決定提前同辛尼特分手
自從佢宣佈季尾離隊接手比利時後球隊成績就大跌
而佢亦因為球員買賣炮轟球隊高層
當中包括新上任既技術總監
教頭提早宣佈離隊通常冇好下場
今次又一例證

9)
柏歷連尼改口留用洛賓

10)
華朗願意減薪4成同學生隊續約1年
以協助球會加人工俾年青球員

11)
伯明翰被指打算羅致蘇甘保
而這名前英格蘭國腳亦收到土耳其,瑞士同埋希臘3地球會既斟酌

12)
拜仁被指有興趣出價400萬歐元收購卡拉迪斯

13)
愛華頓被指希望出價1500萬鎊收購貝寧中場貝斯隆
而佢地已經拒絕尼史葛既離隊要求
消息指曼城可能改為斟酌厄遜

14)
比基被指成為般尼250萬鎊既增兵對象

15)
謝拉特以及活基治同受鼠蹊傷患困擾
前者因而冇機會代表英格蘭同荷蘭踢友誼賽
後者就仲要開刀以根治傷患

16)
費倫天拿落實由祖雲達斯引入防中C.辛尼迪
轉會費200萬歐元

p.s.:
1)
列比達超速駕駛
竟然解釋話以為有紐記球迷跟蹤佢

2)
舒密加因傷取消復出
真係可惜

3)
之後會有國米對拉素既賽後報告
同埋苦多過甜既追星經過

2009-8-7

近兩日既新聞......

1)
沙比落實以3000萬鎊既轉會費轉投利物浦
而利記隨即同意以2000萬鎊既價錢收購阿古蘭尼作為替補
佢只要通過體測就可以落實同利記簽約5年
消息指佢既週薪高達8萬5000鎊
不過由於佢近年抖多過踢
所以消息指佢既體測會比較嚴緊
而佢既加盟亦粉碎利記考慮從祖雲達斯收購保臣既傳聞

2)
亨特拉爾即將落實以1500萬歐元既價錢加盟AC米蘭
而紅黑兵團可能用翼鋒艾比迪同拉素交換迪施維斯迪

3)
消息指紐卡素早前同時聯絡堅尼亞歸隊以及斟酌奧拉利
不過前者以健康理由拒絕而家歸隊
而後者就表示唔想收拾爛攤子

不過佢兩個唔肯接手紐記都冇咩所謂
事關當地商人 B.Moat 被指願意出價1億鎊入主紐記
而這名要撲水5000萬鎊既新老闆原來想搵舒利亞執教

4)
巴斯桑治落實由紐卡素轉投熱刺
轉會費800萬鎊
之前一度有傳聞指森巴亦係熱刺既新中堅人選

另一方面,比錫達斯被指有興趣收購杜斯山度士
而早前被放棄既列卡度洛查可能加盟利禾奴

5)
侯城已經就比耶既轉會費同紐卡素達成協議
而只要艾迪杜里成功申請工作證
就會落實以借用身份效力一季

6)
馬田卡斯利斯落實以借用身份加盟祖雲達斯
而老婦人被傳下季收購羅斯

7)
摩連奴炮轟車路士特別阻攔國米從佢地引入球員
而佢亦透露冇收過熱刺或者阿仙奴對韋拉既斟酌

另一方面,國米被傳向摩納哥收購哥倫比亞進攻中場柏保路賓路

8)
阿仙奴方面否認法比加斯離隊既傳聞
而雲加透露下季可能改踢4-3-3陣式
佢同埋桑治都會係正選中場
而中場餘下既席位就會由路斯基,高舒亞以及丹尼臣爭奪
不過前者又因為腿筋傷患而要休息6星期

而雲加表示佢地只肯出價500萬鎊收購查馬克
如果波爾多堅持1500萬鎊先肯放人
佢唔排除等多幾個月再斟酌佢以自由身加盟

9)
車路士被指打算出價3800萬鎊
再加上迪高以羅致阿古路
而佢地決定將冼佳亞外借俾韋根一季

另一方面,派路表態留隊
佢表示家庭理由係其中一個考慮因素

10)
樸茅被指好能將紐根特以400萬鎊既價錢賣到史篤城
佢地將會引入維度卡作為替補
而早前里昂已同意將30歲射手比基安尼外借俾佢地
而佢地可以考慮於季尾買斷佢

另一方面,佢地搵到上季因傷掛靴既尼美出山
雙方簽約1年就令人相信占士將會離隊

11)
迪米捷利斯因為腳踭傷患而要養傷7星期
意味佢唔可能轉會費倫己治

12)
巴布決定踢走部份外援
當中包括爾迪雷,史馬克,奧蘇里奧,波卡同埋馬利卡

13)
馬體會被指有興趣各皇馬一併收購加高以及希古恩

14)
禾夫斯堡落實同米斯莫域續約至2013年
佢加埋迪施高以及格菲迪既前線鐵三角都先後續約

15)
新特蘭落實以1000萬鎊既轉會費羅致戴倫賓特

16)
般尼落實從厄瓜多爾球會 Independiente del Valle
借用19歲翼鋒 F.古里路一季
而般尼可以於季尾買斷佢

17)
曼聯被傳想等碧咸退休後搵佢做球會大使

18)
丹尼利被指即將以350萬歐元由費倫天拿轉投森多利亞
不過前者突然要求交易暫時擱置
直至佢地搵到替補人選為止

19)
占士夏柏好可能加盟狼隊

20)
修夫基表示如果唔能夠帶領米堡重返英超
就會向主席吉遜請辭

21)
曼城可能於今日內落實羅致尼史葛

p.s.:
波比sir既葬禮已於前日秘密進行
消息指只有佢老婆太太,3個仔同埋部分親屬有份出席
而墓地確實地點亦保密
只知道位於東北部
波比sir既公眾追悼會將於稍後舉行

2009-8-5

1)
利物浦已同意皇馬對沙比艾朗素既出價
不過利記冇透露金額

2)
西維爾阿根廷中堅法斯奧被指成為阿仙奴650萬歐元既新中堅人選

3)
傳聞艾殊利如果搵唔岩合適既買家
可能索性決定做多一年班主
而佢被指願意揼水4000萬鎊以支付球隊今季既薪金開支
令球隊可以盡量保留最佳人腳爭取重返英超

4)
雖然查斯古特最近改變初衷想留隊
不過祖雲達斯依然被指想引入卡斯辛奴取代佢
不過當地傳媒指這名壞孩子最可能於世界盃之後先離隊

5)
辛尼特被指想搵文仙尼接手

6)
侯克被指成為車路士最新一個增兵對象

7)
巴塞隆拿計劃以1200萬鎊向曼聯收購中堅伊雲斯
而高柏尼亦被指係佢地另一個中堅人選

8)
雖然熱刺成為最新一間同比耶扯上關係既球會
消息指維拉依4有把握於今個星期內引入比耶
而奧尼爾亦視巴斯桑治同埋史尼達為增兵人選

9)
M.施素高成為熱刺既1400萬歐元新防中人選
不過圖盧茲已經拒絕熱刺既出價
仲表明冇3000萬歐元都唔肯放人

而熱刺羅致洛賓既希望已經幻滅
事緣這名荷蘭翼鋒表明只會加盟可以參加歐聯既球會

10)
傳聞韋斯咸向東尼招手
不過拜仁方面表示冇收過任何斟酌

11)
維拉利爾被指有興趣引入艾堅費夫

12)
薩拉戈薩被指願意接收沙加度

13)
紐根特同埋威爾遜於樸茅0:4輸俾賓菲加後向對方動粗
佢兩個都俾球會扣薪兩星期
兼即時被趕出集訓營

14)
消息指如果馬體會可以打入歐聯32強
將出價700萬鎊羅致貝迪素

15)
拉科魯尼亞被指向杜斯山度士招手

16)
國米同埋愛華頓都被指有興趣引入蘇保迪

17)
於亞女青足球賽
澳洲先郁手打中國球員而最終搞到雙方打大交
根據本地同埋大陸既傳媒報導
澳洲教練惡人先告狀投訴中國球員既詐傷行為可恥
外國媒體就冇提及澳洲球員打人在先
反而將焦點集中於中國球員既詐傷行為

18)
侯城被指即將以300萬鎊既價錢從史篤城引入尼日利亞中場奧路芬贊拿
而佢地亦邀請H.卡馬拉參加試腳
同埋被指有興趣羅致畢特

19)
安古路被指將免費轉投保頓
而加利麥臣考慮將薜圖掛牌

20)
梅度上星期向體育仲裁法庭上訴失敗
被判要賠償1450萬歐羅俾車路士
不過梅度打算透過民事法庭討回公道
佢既隊友以及球會老闆已經表示會幫手

21)
落實引入列達既米堡依然繼續搵新前鋒
佢地被指睇中馬賽兩名前鋒 E.Grandin 同埋 M.Samassa

22)
費倫天拿被指想從拜仁羅致巴西中堅比連奴

p.s.:
1)
費格遜排除利物浦爭標機會
顧掂自己先啦,老廢!
雲達沙因為手指骨斷左而要養傷8星期呀

2)
士砵亭龍門柏迪斯奧救左幾球必入波之餘
仲後上頭槌助攻入波
認真攻守兼備

2009-8-4

1)
意大利傳媒忽然指AC米蘭向法比加斯招手
消息指紅黑兵團為佢準備左一份年薪400萬歐元既5年合約

2)
再講多幾段兵工廠既消息......
雲格表示希望可以引入1至2名球員
不過一定唔會多過兩個

可能球員應該不離查馬克,韋拉,艾菲利,蘇保迪同埋卡勞
前者已經身在倫敦
相信應該係同雲加會面
不過波爾多已經表明唔會接受600萬鎊既出價
而教授之前亦已經冇排除韋拉回歸既可能性

最令人意外既一定係後者
英國傳媒忽然報導兵工廠出價600萬搶人
不過消息指車路士要成功收購派路先肯放走佢
亦會要求800萬鎊轉會費

另一方面,瑞士足總搶閘透露辛達路斯同意轉投愛華頓
而愛華頓就承認已同兵工廠展開會談

3)
再講幾段AC米蘭既消息......
查斯古特表示唔想背叛祖雲達斯而拒絕轉投AC米蘭
紅黑兵團就被指準備再次斟酌法比安奴
而佢地亦被指出價770萬歐元收購巴迪斯達

4)
利物浦承認已經同皇馬就沙比艾朗素既轉會費展開會談
而利記被指將會出價1800萬歐元收購阿古蘭尼
如果成事就會同佢簽約4年
消息指合約總值1600萬歐元

而巴塞隆拿被傳願意大幅加碼至5000萬歐元收購馬斯查蘭奴
不過賓尼迪斯已經表明唔會放人

另一方面,利記再次同韋拿扯上關係
不過華倫西亞方面表明這名西班牙射手係非賣品
而利記亦忽然被傳願意接收雲達華治

5)
費倫巴治被指開價1200萬美元收購迪米捷利斯
而佢地亦被指向亨特拉爾招手

6)
國米被指願意接收史尼達
傳聞有兩個版本
一係皇馬用史尼達再加1500萬歐元收購馬干
二係國米以400萬歐元借用佢一季
再有優先權於季尾以1800萬歐元買斷佢
不過佢既經理人已經否認有關報導

另一方面,皇馬決定放棄沙加度
佢可能轉投另一支西甲球隊
或者加盟卡塔爾球會 Al Rayyan 掘金

7)
阿奧拿度域即將落實加盟國米
消息指國米將先借用佢半季
確定佢既傷患復元先買斷佢

8)
畢特成為最新一個被指將會離隊既紐卡素球員
而巴斯桑治因為上星期拒絕隨隊參加對登地聯既友賽
而被紐記扣薪兩星期
而曼城成為最新一間同佢扯上關係既球會

9)
賀化落實由維也納迅速轉投拿玻里
這名22歲奧地利射手同意簽約5年

10)
車路士表明唔會賣走祖高爾
而佢地決定將迪辛圖外借俾布力般流浪半季
另一方面,佢地被指加碼至1400萬鎊收購派路

11)
布力般流浪亦即將從夏德引入卡連歷
轉會費為750萬歐元

12)
由於新老闆既收購有阻滯
樸茅被迫出售部份球員還債
當中紐根特,烏達卡同埋比夏積都好可能被出售
而冇錢買人既佢地就打算借用薩基

13)
三都主為左爭取出場機會而由紅鑽轉投鯨魚
雙方簽約年半

14)
維拉成功以800萬鎊既價錢引入戴夫
當中有200萬鎊係 variable
而佢地繼續同迪斯甸以及蘇甘保扯上關係

15)
雲高爾決定由雲邦美擔任隊長
令佢轉投熱刺既機會大減

16)
阿爾巴利亞財團入主博洛尼亞一事爛尾收場
意大利傳媒推斷這名財團反口壓價令交易告吹
冇新老闆唔代表冇得增兵
佢地被指打算從西維爾引入烏拉圭射手捷雲頓

17)
巴里亦可能易主
消息指干地唔排除因而重掌球隊

18)
侯城,般尼同埋富咸都被指出價600萬鎊
向維拉利爾收購艾迪杜里
而後者落實引入24歲南非中場 K.Dikgacoi

19)
熱那亞用盧賓奴同巴勘莫交換艾美利亞

20)
馬賽被指有興趣出價1100萬歐元向羅馬收購文尼斯

21)
軒歷拿臣因為膝傷而要休息8星期
傳聞佢索性掛靴

22)
費倫天拿被指即將成功由華倫西亞借用班尼加

p.s.
1)
尋日冇時間講下熱刺場波......
熱刺星期六計埋兩個龍門先有11條友練波
當中贊拿斯取代高美斯
成為對南華既正選11人
唔怪得大牌球員幾乎可以於星期六放假唔練波

佢地陣容有3個右閘但就冇一個正宗中堅
丹尼路斯同埋保斯托兩個年青攻擊球員就要包辦左路攻守
見到咁既人腳同埋排陣
加上佢地頂唔順炎熱天氣而有心無力
小弟好慶幸冇買飛入場

南華羸波但表現其實唔算好搶
不過防守好集中
龍門同一對閘都好專心
整體體能比往年同期明顯好左
當然一定要多謝射入撻Q世界波既香港C7
同埋誤判12碼既發雞盲球證

至於小弟最想睇既羅比堅尼
表現機會唔多
不過一記轉身笠射功架十足
絕對唔使拗勁係唔係撻Q兼符碌

2)
祝各位F.5小朋友好運

2009-8-3

因為技術問題而趕唔切12點前出 post
請見諒!
以下係近兩日既新聞......

1)
沙比艾朗素於球隊大敗俾愛斯賓奴0:3後冇隨隊返英國
意味佢即將離隊

有傳皇馬計劃用亨特拉爾加錢收購沙比阿朗素
但消息指利物浦鐵價4000萬歐元先肯放人
而阿古蘭尼就再次被指成為替補人選

2)
尼史葛向愛華頓提出轉會要求
消息指佢將以2200萬鎊既價錢加盟曼城
而愛華頓就視辛達路斯為600萬鎊既替補人選

3)
幾段紐卡素既消息......

舒利亞證實來季唔會執教紐卡素
佢將會重返BBC講波
佢抱怨紐記一直冇聯絡佢
佢為前途而決定履行同BBC既最後1年合約

馬田斯落實離隊後
紐記亦要著手挽留部份球員
佢地首先成功遊說小將S.費格遜續約
粉碎佢轉投格流或者些路迪既傳聞

之後又將已決定離隊既比耶既價錢定為400萬鎊
侯城只願意出價200萬鎊令交易好難成事
不過準備出價300萬鎊既維拉就應該有一定機會

而最近同阿仙奴扯上關係既卡爾亦表態留隊

4)
幾段熱刺既消息......

熱刺鬧中堅荒
傳聞紐卡素拒絕佢地對巴斯桑治1000萬鎊既出價
而佢地亦即將加碼
不過哈利列納就否認熱刺曾經開價

而佢透露斟酌韋拉失敗
將改向拜仁收購雲邦美
消息指轉會費不少於500萬鎊

另外,除住哥治既加盟
羅比堅尼將可能會有較多時間出任中場
戴倫賓特更已經身在新特蘭進行體測
佢即將以1200萬鎊既價錢轉投黑貓

另一方面,陣中只得1名正索左閘既佢地被傳同維拉維拉爭奪禾諾克
更有傳聞指佢地想以較多既出場機會吸引祖高爾加盟
不過唔知點解本地傳媒冇人向哈利列納求證

5)
漢基蘭被指成為高路托尼既替補人選
富咸被指要求阿仙奴不但要俾轉會費
亦要免費外借卡路士韋拿一季

另一方面,傳聞韋拉將於南非世界盃後轉向管理方面發展
而雲加既合約將於2011年期滿
因而報導指出韋拉可能會成為雲加既接班人

6)
消息指巴塞隆拿向美斯開出950萬歐元年薪既新合約
令佢取代伊巴謙莫域成為隊中最高人工既球員
而佢新合約既3億歐元贖身費
亦會取代伊巴既世界紀錄

7)
曼聯被傳將出價2500萬鎊收購大衛施華
而佢地亦再次被指有興趣以3500萬鎊既價錢引入阿古路
球王女婿即將申請到西班牙護照而變得更加搶手

另一方面,D.哥斯達因為無牌駕駛而被捕
令曼聯可能放棄收購佢

8)
維拉已同列斯就戴夫既轉會費達成協議

9)
車路士只肯出價675萬鎊收購派路
AC米蘭方面表明這個出手甚低既開價

10)
奧當高被指好可能以150萬鎊既價錢加盟西布朗

11)
雲達華治透露即將會離開皇馬
不過皇馬希望可以收回上年收購佢1350萬鎊既成本
漢堡,國米,AC米蘭同埋阿積士都被指有興趣接貨

12)
埃及球會薩馬歷克宣佈以借用美度一季
不過這間球會要先俾米堡400萬鎊
季尾就有權以100萬鎊買斷佢

13)
伯明翰希望阿仙奴可於兩日內落實阿曼特查奧爾既前途
如果兵工廠唔肯放人
佢地將要另覓人選
傳聞人選包括現時養傷既巴里

而佢地亦同加特拿以及希杭既西班牙中場 Michel 扯上關係

14)
傳聞拉素射手沙拉迪成為拜仁既增兵人選

15)
費倫天拿只肯出價600萬鎊收購伊保爾
同阿仙奴要求既900萬鎊有一定距離

另一方面,比列斯素利考慮回流意甲
佢透露費倫天拿,羅馬同埋巴勒莫都對佢有興趣
不過佢比較想加盟前者

16)
哥連泰斯再次被指有興趣引入列基美

17)
韋斯咸從草猛羅致後衛戴柏拉

18)
布力般流浪成為最新一間同卡連歷扯上關係既球會
佢地好可能靠600萬鎊offer爭羸樸茅
而暴力幫亦繼續被指向馬華路禾尼招手

另一方面,由於尼史葛即將加盟曼城
令森巴離隊既機會大減

19)
樸夫新老闆法希姆仲未正式通知英超球會已易手
有消息指球會既前途仍未落實

20)
維拉利爾落實以1100萬歐元既價錢羅致尼爾馬

21)
赫臣將於今個星期內開始接受化療

22)
狼隊同埋富咸都被指有興趣出價120萬鎊收購修咸頓21歲射手拉爾拉拿

p.s.
日前突然有過百人主動捐錢俾波比sir名下既癌症基金
金額總值約160萬鎊
似係球迷對波比sir既少少心意

2009-8-2

近兩日既新聞......

1)
消息指車路士提出以800萬歐元
另加棄將比沙路以收購派路
不過AC米蘭方面表明出價太低

2)
只要普格恩洛克通過體測
就會落實以450萬歐元既價錢加盟史特加
雙方將簽約4年

而辛尼特落實從拖連奴收購羅仙尼作為替補
不過艾禾卡特一直反對這宗收購
早以公佈將會離隊接手比利時既佢對外批評球隊
指新體育總監 I.Korneev 冇問佢意見就去買人

3)
迪施高落實同禾夫斯堡續約至2013年
而馬田斯亦已經落實加盟
雙方簽約4年

4)
消息指曼城決定加碼至1000萬鎊以及2200萬鎊
以圖令列斯同埋愛華頓割愛戴夫同埋尼史葛

5)
阿仙奴決意為中場增兵
傳聞佢地打算出價3000萬鎊收購迪羅斯
亦有報導指佢地同巴塞隆拿爭奪比利時中場維漢頓

另一方面,伯明翰希望向佢地借用阿曼得查奧爾
愛華頓亦被指視辛達路斯為尼史葛既替補

6)
利物浦被指賣走沙比艾朗素套現後
向華倫西亞出價3000萬鎊收購大衛韋拿

7)
芬倫以及莫高拿落實加盟樸茅

8)
曼聯引入16歲防中 P.Pogba
佢既母會勒阿弗爾不滿曼聯既搶人手段

9)
彭迪夫,迪斯維斯迪同埋列迪斯馬3名球員已向拉素提出轉會要求
所以唔會隨隊去北京踢超級盃
而告魯斯就以自由身加盟這間首都球會

10)
奧利華拉落實加盟阿聯酋球會 Al Jazira
而卡塔爾球隊 Al Sadd 亦被指打算羅致卡斯歷
這名前史特加射手於南特發展未如理想

p.s.:
1)
雖然羅先生指新加盟既玻利維亞國腳卡斯迪路趕及比賽
不過羅比堅尼透露今日場波可能休息
咁未買飛既有必要唸下仲去唔去

2)
小弟忽然唸起幾日前有條友口痕講錯嘢
睇羅比堅尼,不如睇周秀娜著比堅尼