2007-9-30

1)
先講英超四強尋晚既表現

利物浦仲未擺脫拉唔開對手防線既問題
不過班拿約就做左及時雨
小弟早就話佢可以幫到球隊
不過一直都冇人信小弟

阿仙奴又羸一場
雲佩斯就踢出近期既代表作

車路士今季究竟要黑到幾時
卡奴射中柱
泰利仲傷埋
不過講返轉頭
杜奧巴被人趕出場之後
佢地唔使輸真係要多謝馬基里尼同埋施治既出色表現

曼聯又羸一場
不過同阿仙奴唔同
佢地係持續羸得冇說服力
如果唔係基祖出錯
曼聯有冇得羸都成問題

2)
維埃里否認接到昆士伯既斟酌
佢亦表示暫時冇去搵工

3)
繼希斯基之後
而家紐卡素又被傳會於1月
向皇馬出價700萬鎊買巴迪斯達

4)
意大利傳媒指國米可能於1月
向布力般流浪開價500萬鎊買森巴

5)
費倫天拿繼續將球隊年青化
最新既目標就係阿積士既希丁加
佢地願意出價400萬鎊

小弟覺得愛隊利物浦都可以考慮下佢
因為佢可以踢中堅同埋兩閘
有利球隊調配
而佢又有一定既大賽經驗
400萬鎊既話都算幾抵買

6)
費格遜考慮於1月將部份小將外借
當中包括董方卓同埋伊高斯

2007-9-28

1)
基拔圖施華同阿仙奴既合約將於來季季尾結束
一直有傳佢可能轉戰意甲或者西甲
但佢同記者表示佢希望留隊

2)
由於摩連奴同車路士有協議
於今季內唔可以執教其他英超球隊
尋日就有消息指阿聯酋國家隊想搵佢教
年薪仲高達1000萬鎊
而意大利傳媒就指AC米蘭可能會搵佢取代安察洛堤
因為佢地於聯賽又再出閘脫腳

3)
傳聞新特蘭想搵前阿仙奴同埋熱刺既領隊格拉咸出山
不過唔係搵佢去取代堅尼做領隊
而係搵佢做足球總監

4)
伯明翰其中一個班主蘇利雲
要求港商楊家誠於今年聖誕前完成佢承諾既全面收購
否則隨時會終止交易

2007-9-27

1)
格蘭雖然係正式委任既領隊
但越來越似只係過渡時期

卡比路而家爆料話車路士想搵尹巴士頓
再睇埋車路士同埋荷蘭足總咁廢既否認聲明
而仲有消息指後者仲唸埋搵就快被熱刺炒既祖爾去接手
照表面睇主張全能足球既尹巴士頓而家真係頂頭大熱

而睇埋其他可能既人選
卡比路係好有料
但佢主張既踢法係比較保守
應該係傳聞既人選當中最保守既
油王實唔會鍾意

奇連士文既進攻足球一定令油王好滿意
但傳聞佢暑假已經 reject 過油王一次
係肯加盟就唔使等到而家啦
仲有奇哥個人咁有性格
佢教德國隊既時候連碧根鮑華講野佢都當耳邊風
邊會肯去老細足球當道既車路士

而納比唔肯上車既理由同奇哥相若
佢當年教國米又係頂唔順老細足球
而佢既名氣比奇哥同埋卡比路更響
堂堂世界盃冠軍教頭冇必要用聲譽去搏

計機會同尹巴士頓有得比既
只有都係好肯踢進攻足球既軒迪克
佢有幾勁全世界都知
而佢雖然岩岩同俄羅斯足總續約
但佢份人工係油王出一半錢既
佢自己岩岩就聲稱油王於摩連奴離隊後曾問佢既意向
佢之後如果轉到車路士教波
根本就好似人地機構既內部調職咁易

2)
迪拿達利最近於意甲真係好紅
於國家隊同埋烏甸尼斯都好勁
繼國米同埋祖雲達斯之後
而家又有傳AC米蘭都想打佢既主意

3)
奧雲證實要做手術
最少要抖大約3星期

4)
傳聞米杜士堡打算於1月
向保頓開價700萬鎊買路蘭

5)
傳聞國米打算於1月開價1000萬鎊買巴迪斯達

6)
韋根否認希斯基於1月會離隊他投

7)
布朗否認會於1月離隊加盟紐卡素

8)
傳聞利物浦打算於1月
向曼城出價600萬鎊買米高莊遜
傳聞利記於暑假曾出價200萬鎊被拒
但由於這個岩岩同球會續約既小朋友今季踢得好好
令賓尼迪斯想再提出斟酌

2007-9-25

1)
迪亞高同雲達不來梅再續約一年至2011年
佢之前同皇馬以及巴塞隆拿都扯上過關係
而家佢肯續約將粉碎所有有關既傳聞

2)
艾歷臣指自己唔會過檔車路士
亦表示對有關傳聞唔知情

3)
繼杜奧巴之後
好多球員亦被傳會離隊
當中包括林伯特,布歷治,卡華路同埋保羅費拉拿
而最新一個就係薜維爾
有消息指佢可能於1月以借用身份重返雷丁

4)
以下係幾段來自意大利既傳聞:

祖雲達斯有興趣向小保加開價600萬鎊
買佢地既中場列迪斯馬

河床既貝路斯亦有傳同費倫天拿簽左份 pre-contract
將以自由身加盟

拿玻里就打算於1月向皇馬借用羅賓奴

5)
西班牙傳媒指列基美可能於1月加盟貝迪斯
轉會費為800萬鎊

6)
雖然最近西班牙傳媒指米蘭市既兩支球隊
都有興趣買愛斯賓奴既沙巴列堤
但佢就否認將會離隊

小弟覺得05年以隊長身份帶領阿根廷羸世青盃既佢
轉投大球會只係時間既問題

7)
英國傳媒指愛華頓打算於1月
向巴素利出價400萬鎊買佢地既射手 Felipe Caicedo
之前意大利傳媒指祖雲達斯同埋AC米蘭都打佢既主意

2007-9-24 (2)

1)
阿仙奴既營運總監艾度文聲稱
雲加用作買球員既儲備高達7000萬鎊!

因為阿仙奴上個財政年度既營業額比前上升約5成
金融高達2億零80萬英鎊
而營運利潤高達5120萬鎊
狂升左274%

由於新既轉播合約將帶來更大既收入
而阿仙奴明年亦有新既電視頻道
所以阿仙奴將來既財政狀況只會更好

而佢表示球會良好既財政狀況
證明球會唔一定需要外商注資

2)
尋晚整傷膝蓋既祖雲達斯後衛安達迪
估計要養傷至季尾
佢05-06年球季已因傷患而要長抖
仲因而缺席06世界盃

3)
小舒米高同曼城續約4年

4)
同李嘉誠扯上關係既國米
由於開季至今演出平平
意大利傳媒報導指佢地會於1月增兵
主要目標包括尹達華治同埋加雷
其中後者亦係宿敵AC米蘭既增兵目標

5)
Big Sam 表示如果奧雲既傷勢嚴重
佢好可能要再接受手術
有機會缺席國家隊餘下既外圍賽賽事

6)
紐卡素主席 Chris Mort 向傳媒表示
Big Sam 可於1月既時候再買球員

7)
摩連奴離隊後
杜奧巴盛傳將會係第一個因而要求離隊既球員
西班牙傳媒指皇馬可能會打佢既主意

2007-9-24 (1)

有幾場波想講:

1)
曼聯應該慶幸佢地係一個幸運兒
可以成為第一隊同'後摩連奴時代'既車路士對壘既球隊
有摩連奴既車仔
就算殘陣
小弟都有信心佢地尋晚可以捱到1分
但冇左摩佬
尋晚場波其實未踢大家都知結果

尋晚好明顯車仔既球員踢來患得患失
其中艾辛同馬基尼里都踢出近年既劣作
至於負傷上陣兼冇左好拍檔卡華路既泰利
講真又唔可以對佢太苛求
米基爾既愚蠢攔截就再次證明佢唔係馬基尼里既理想接班人
而佢被逐出場亦令隊友更無助
全隊只有施治交足功課

曼聯雖然贏波
但演出唔突出
睇到既只有趁機復仇兼打落水狗既決心
朗尼,C7同埋泰維斯於前場擦唔出火花
前二者冇態
後者雖然成功開齋,但就明顯未融入球隊
史高斯同埋卡域克亦只係行行企企幫手駁腳

主隊上半場比較似樣既就只有艾夫蘭同埋傑斯
前者出擊頻頻
上半場曾於禁區內被祖高爾侵犯
可惜球證竟然冇表示
又佢又搏到米基爾領紅牌
而傑斯於右路既腳指尾拉西助攻真係勁
不過車路士又真係要檢討下
因為當時防守佢既竟然係舒夫真高

上半場補時既入波其實已經分左勝負
因為尋晚車仔咁既情況根本冇力反撲
下半場補時階段賓希姆輸既12碼
只係提醒所有人卡華路既重要性

2)
利物浦主場對伯明翰失左兩分
海鮮波既老毛病又再出現
好多人又話係因為輪換制度既問題

小弟就覺得0個場波羸唔到
同用咩人冇大關係
反而係拉唔開對手防線既踢法問題

從賓尼迪斯今季既用人
睇得出佢想球隊踢得更進取
但今場波巴布同埋賓納特兩個負責側擊既球員
成場波都努力走動
有時仲移入中路幫手駁腳
後者更走過去左路搵食
但就偏偏好少落底線
結果成場波差唔多未試過拉得開對手既防線

唔落底線就斬中
令佈防嚴密既對手易於解圍
古積特同埋禾朗連只有徒勞無功
而佢地容易被人盯死之餘
亦令謝拉特搵唔到空位後上攻門

小弟覺得除左要多0的嘗試去拉開對手防線之外
賓尼迪斯其實可以考慮下比班拿約多0的機會
佢既傳送能力應該會係另一個改善攻力既方法

3)
巴塞隆拿對西維爾

客隊不惜收起一個箭頭
而用夠3個防中
其實踢得唔錯
加上亨利今季第3度射中柱
一度睇落真係有機守和

不過美斯0個腳窩利處理得咁淡定
西維爾真係抵輸
而向來小動作多多既保臣咁樣攬住杜斯山度士輸12碼
搞到西維爾既一絲希望都冇埋
就算主隊既奧利古亞咁廢
一出場就包越位送返球比佢地都無補於事

4)
羅馬對祖雲達斯
祖記既中路防守球員真係好唔掂
搞到防線中門大開
踢得最好既竟然係下半場中段由右路移入中路既基謝拉
唔怪得要同國米爭 B.艾雲洛夫

主隊咁多埋門機會贏唔到波
只可以讚人地既龍門保方好野
同埋怪自己既埋門一腳唔掂
如果唔係迪比亞路下半場初段12碼炒街
佢地可能連1分都冇

2007-9-21 (3)

1)
阿仙奴既營運總監艾迪文堅持
即使俄羅斯富商 Alisher Usmanov
已經成為球會既第二大股東
但唔代表董事局會有大變動

2)
有傳媒指而家全職講波既前利物浦隊長列納
可能得到車路士邀請加入教練團

3)
傳聞熱刺將於球季結束後
向阿爾克瑪爾開價700萬鎊
買佢地既比利時藉攻擊球員 Moussa Dembélé

4)
熱刺否認摩連奴將會取代祖爾成為佢地既新領隊

5)
有傳聞指烏甸尼斯將於1月
向紐卡素開價400萬鎊買安利

6)
有傳聞只要布力治成功康復
曼城將於1月向車路士開價600萬鎊買佢

2007-9-21 (2)

1)
有消息指為尼日利亞羸得世少盃既 Macauley Chrisantus
成為利物浦既收購目標
幾日前已願意向佢而家既球會 Abuja FC 開價80萬鎊
佢既經理人兼顧問向太陽報表示
有好幾間球會都對佢好有興趣

2)
就日前 Big Sam 指自己
只因球隊踢歐聯有料到先保得到份工既抨擊
賓尼迪斯就回應指佢應該專心自己球會既野
又表示利物浦其實唔止於歐聯有好表現
於其他盃賽同埋聯賽都有好成績

3)
傳聞曼聯又準備向士砵亭買人
今次既目標係尼日利亞既17歲進攻中場 Rabiu Ibrahim

4)
布加勒斯特星隊既領隊赫傑向球會辭職

5)
意大利傳媒指祖雲達斯準備於球季結束後
向烏甸尼斯出價600萬鎊買佢地哥倫比亞後衛沙柏達

6)
西班牙傳媒指西維爾可能向國米開價1000萬鎊買阿祖安奴

7)
之前同阿仙奴扯上關係既羅仙拿
因為同球會拖連奴傾唔掂續約
而家被意大利傳媒指佢可能加盟國米或者馬體會

2007-9-21 (1)

1)
車路士委任球隊總監格蘭成為新領隊
其實暑假既時候
已有消息指佢最終會取代摩連奴

格蘭於19歲既時候
已成為國內球會 Hapoel Petah Tikva 既青年軍教練

及後一直於國內執教唔同球隊
當中包括海法馬卡比
不過冇咩大成就

而佢試過因球隊成績差而收到球迷既死亡恐嚇
亦試過因用違規球員令海法馬卡比受罰

近年佢開始執教以色列國家隊
06年世界盃外圍賽已經係佢職業生涯既代表作
對住法國同埋愛爾蘭都於主客場都保持不敗

之後佢加盟樸茨茅夫做技術總監
直至今年夏天'上車'

2)
摩連奴據報可獲賠償最少2000萬鎊
更有消息指金額其實高達2500萬鎊

3)
史高拉利因拳擊達古天奴域一事
被歐洲足協罰停賽四場
以及罰款12000歐元
佢老人家表示會提出上訴

4)
沙比阿朗素同埋艾加
同因蹠骨受傷而要養傷4至6個星期
但兩個都唔使做手術
除左這兩個用'三間'波 boot 既球員
近年已先後有唔少球星受同樣傷患所困擾
如'一剔'既巴頓同埋朗尼
仲有'洛圖'既東尼
同埋'暗保'既希斯基同埋奧雲
佢地所著既波 boot 既特點就係好輕
但結果對 boot 就冇咁保護

5)
由於艾加要養傷
賓尼迪斯只可從老將希比亞
仲未令人好放心既艾比路亞
同埋新仔賀比斯3選1

佢老人家今季買人
最失敗就係冇搵到當打既好後衛
最初放左好多時間去軒斯身上
又最終失敗
結果買入既後衛全部都係小朋友

而家最慘既就一定係岩岩好返既加歷查
因為有排都唔使旨意有得抖

2007-9-20 (2)

1)
阿仙奴尋晚主場羸西維爾3:0
小弟覺得佢地羸在踢歐聯既經驗
而法比加斯既幸運入球令球隊先開紀錄令主隊更易踢
而佢於下半場再貢獻兩次助攻
協助球隊大勝而回

2)
國米既助教米赫洛域提議球會
收購莫斯科火車頭既後衛 B.艾雲洛夫
因為米赫洛域認為佢
可於兩季內成為世界上其中一個最好既後衛

3)
賓菲加可能向皇馬借用蘇達度

4)
西班牙傳媒指曼聯於暑假
曾向西維爾開價1200萬鎊買基沙哥夫
但最終失敗
而家當地傳媒指若曼聯於季尾將出價提高至2000萬鎊
西維爾將願意放人

而捷雲頓亦被傳為左爭取更多既出場機會
可能於1月以300萬鎊既價錢轉投桑坦德
但當時人已經否認

小弟覺得以基沙哥夫既質素
最終必定會係列強既獵物
但佢邊值2000萬鎊呀?
1200萬鎊都仲可能會有水魚肯制

而捷雲頓而家把口話唔走
但苦無出場機會既佢
其實最有可能於1月離隊

5)
車路士入唔到波
英國傳媒又乘機作新聞
指佢地願意出價3000萬鎊買伊巴謙莫域

6)
未搵到班落既祖里安奴
可能以自由身加盟拉素或者多蒙特

7)
河床既 Augusto Fernandez 同埋 Oscar Adrian Ahumada
分別同皇馬以及拿玻里扯上關係

8)
皇馬既巴迪斯達為左出場機會
可能於1月轉投祖雲達斯

9)
羅馬既文仙尼表示唔會加盟利物浦
佢正準備同球會續約

10)
基雲同一時間同曼城以及阿仙奴扯上關係
傳聞前者願意出價600萬鎊

2007-9-20 (1)

英國傳媒指摩連奴己經離開車路士
車仔既官網亦岩岩發表左相關既聲明

傳聞摩佬於球隊賽和洛辛堡後
同老細阿巴莫域治又炒大鑊
接住就已經有消息指佢會離隊

報道指摩佬星期三朝已經通知左
包括泰利在內既幾個重心球員
佢將會離隊
而佢將於今日出席球隊操練既時候
同所有職球員正式道別
有球員同傳媒透露佢其實係被油王炒既

佢04年帶領波圖羸歐聯而成名
之後再加盟車路士
協助球隊連續兩屆羸聯賽冠軍
亦曾為球隊捧左一次足總盃以及兩次聯賽杯

不過自06年起
佢同油王既關係轉差
自今年初亦一直盛傳佢會離隊
暑假既時候佢聲稱已經同老細搞返好0的關係
但估唔到兩個月之後就被人炒左

好多唔識波既人都話摩佬掂
最大原因係油王夠錢多
但如果只係有錢就會掂
當年雲尼亞里就唔會被油王炒啦
國米亦都唔會只有近兩年係冇說服力之下先羸聯賽啦

雖然小弟係利物浦既球迷
但一直都覺得摩佬好勁
雲加勁在眼光好
賓尼迪斯叻在識用數據
但如果只計臨場調動同埋排陣
摩佬一定係全英超最好

摩佬為車路士帶來踢法上更實際既轉變
其實對英超球隊踢法上亦帶來正面既衝擊
摩佬未登陸英超之前
近幾年好多領隊其實已經意識到歐陸球隊更注重搶中場既趨勢
但除左賓尼迪斯之外
就冇人可以為球隊注入於爭霸歐聯既足夠元素

例如費格遜於01-02年就買華朗
更一度將球隊既陣式改為 4-5-1
但球隊卻無法再羸歐聯

雲加多年前亦已經識得用韋拉加上比堤既組合
但亦一直未竟全功
於05-06年球季前直情連四強都未入過
雲加於05-06年球季帶領球隊打入歐聯決賽既 4-5-1 陣式
某程度上亦有車路士既影子

就算擅長帶領球隊踢歐洲賽既賓尼迪斯
佢同摩佬同期登陸英超
但利物浦於英超卻從未有車路士兩奪英超冠軍時既水準
某程度上在於賓尼迪斯直至今季之前
都未能掌握將歐陸球隊既元素注入球隊

從以上三個例子就可以睇到摩佬有幾堅
近兩三季英超球隊於國內同埋國外既踢法
普遍變得更實際
更有利於歐洲賽事爭取好成績
其實某程度上真係受摩佬既影響

犘佬離隊最大既損失
一定係車路士本身
小弟近年從未見過球隊於季中易帥後可以羸到重要錦標
小弟覺得油王為啖氣而冇左個人才
同埋最少今季球隊既前途
而部份重心球員同埋教練團一定因此而有離心
真係好蠢

之前覺得皇馬會長卡特朗好蠢
羸聯賽都要炒卡比路
但人地起碼識睇日子去炒人
但原來油王仲蠢
開左季個幾月,仲要鬥曼聯前先炒人

不過或者對油王最重要既只係面子
畢竟車仔只係佢多年來既一種玩意

2007-9-19 (2)

1)
德國傳媒報導
列文同德國四支球隊
包括哈化柏林,史特加,多蒙特同埋慕遜加柏扯上關係
但小弟就真係唔多相信......

2)
傳聞古迪仙尼可能於1月
加盟奧林比亞高斯
轉會費約為200萬鎊

3)
費高再次被傳加盟洛杉磯銀河

4)
於暑假期間擴軍好唔順利既AC米蘭
傳聞將於1月大出血
目標有桑坦德既阿根廷中堅加雷
烏甸尼斯既迪拿達利同埋巴塞隆拿既新星保贊
小弟覺得以前者最為佢地所需要
因為佢地防面既人腳係唔多掂

5)
之前同利物浦扯上關係既意大利中場霍治亞
而家就被西班牙傳媒指可能加盟維拉利爾
轉會費仲高達1100萬鎊

2007-9-19 (1)

尋晚歐聯分組賽
愛隊利物浦作客波圖
睇到小弟有嘔血既感覺
對上一次嘔血
已經係上季聯賽作客0:2輸比曼聯0個場
但0個場都冇尋晚咁差

上半場一開波
主隊波圖率先搶攻
利記既芬倫同埋加歷查已先後出錯
但都有驚無險
但利記最終要為後防既持續犯錯而付出代價
8分鐘,慢得令人發火兼且大意既希比亞
竟然被錫迪奧爾後發先至食左身位
跟住這個摩洛哥藉球員見拉爾拿出迎
借勢跳高再插水
為主隊搏到12碼
路爾斯干沙利斯一針見血

之後利記仲係踢得比較慌張
但到左17分鐘
利記令人意外咁追平
芬倫右路開出自由球
希比亞再二傳
古積特離門6碼頂入

但再之後上半場餘下既時間
利記繼續佢地既劣作
誤傳勁多
又跟唔到主隊既節奏
謝拉特,馬斯查蘭奴搶唔贏中場
賓納特同埋巴布好似隱左形
前場等供應既托利斯同埋稍為墮後既古積特結果都好沉

波圖雖然佔到優勢
但埋門0個腳唔掂
半場結果雙方踢成1:1平手

下半場初段
利記既表現依然唔掂
到左58分鐘
全場最差既球員賓納特愚蠢地領左第二張黃牌出場
賽後賓尼迪斯表示
佢其實已經唸住要換走賓納特
但趕唔到作出調動
賓納特就已經被逐離場
賓納特今季既表現其實已經有少少進步
但佢尋晚卻令到小弟好失望

打少個既利記
面對佔得更多控球時間既主隊先識驚
表現有所好轉
只有拉爾拿因為出迎打手槌既時間同加歷查有所誤會
而幾乎被基利斯瑪笠死
好彩帶罪立功既希比亞同佢護空門

完場前謝拉特同埋古積特幾乎突擊得手
未能為小弟帶來驚喜
雙方最終踢成1:1完場

今場比賽
利記只曾於上半場攻門兩次
真係令小弟好失望
而陣中就只有古積特同埋艾比路亞既表現比較稱職

2007-9-18

1)
岩岩聽到笑話一則
話說有個紐卡素球迷
尋日好自大咁講:
今晚紐卡素作客打呲郡
係攞分既好時機
感覺似去 ATM 提款

唉!
而家都唔知邊個提邊個款

小弟尋晚睇左半場已經知紐記唔掂
佢地尋晚既表現係開季以來最差既
中場除左一如以往冇節奏
尋晚對住如狼似虎既主隊
奧克利專心截擊令佢地中場更冇優勢可言
而佢地兩邊側擊唔 bal
前面既艾美奧比冇態
奧雲就向來要有供應先有料到
所以佢幾好狀態,幾有 heart 都冇用

而佢地初段都有一定機會
不過把握唔到
就只有等死
結果人地既射手米拿一腳35碼既世界波
就收死左表示曾經考慮離隊以爭取更多出場機會既夏柏
幫主隊全取3分
佢出人意表咁起腳
講波佬大哥瑜同埋招積0個陣都唔知發生緊咩事

今朝睇返 match report
如果唔係主隊既另一前鋒,同富咸扯上關係既侯活唔爭氣
主隊絕對唔止羸1:0咁驚險

另外,奧雲於55分鐘因傷退下火線
不過之後就證實冇大礙

2)
FC首爾否認佢地既年青中場寄誠庸
將被安排去曼聯試腳

3)
前挪威國家隊奧臣同伊拉克足總簽約3年

4)
有傳利物浦既副領隊 Pako Ayesteran
同曼聯以及車路士扯上關係
但賓尼迪斯就表示因為合約已經講得好清楚
Pako 一定唔可能會咁做

5)
保頓老將艾雲甘保
最快下星期就會離隊到卡塔爾掘金

6)
馬賽既中場新星拿斯利
成為國米既新目標
傳聞指佢地願意出價1000萬鎊

7)
西班牙小報報導
皇馬如果買唔到波歷克
將會改向雲達不來梅出價1000萬鎊買迪亞高

8)
查比斯好可能以自由身加盟拉素

9)
西維爾既17歲後衛 Daniel Sanchez Ayala
決定加盟利物浦
下星期將會簽約3年
利記要為此賠償西維爾
但金額不詳

2007-9-17 (2)

其餘幾場想講既波:

1)
AC米蘭作客對住錫耶納
又係同上季一樣要踢得好辛苦
留埋力就固然更慘啦

AC米蘭成個暑假只係掛住買細哨
最終只係買到個要08年先用得既柏圖
又一個三字頭既艾瑪臣
同埋到香港落班都未必掂既巴亞

佢地近乎冇為防線注入新血
迪達又繼續發波瘟
不過佢地陣中冇其他似樣既龍門
佢就算再差都唔使驚冇得踢

青年軍當中比較好既後衛基美
又竟然被外借
0個晚卡拉迪斯踩定個波比馬卡朗尼執死雞
當選上季歐洲最佳教練既安察洛堤
仲好意思話人地越位在先
真係唔知醜

雖然佢地失分係因為要留力歐聯
但條防線既人腳真係唔多掂
認真爭唔落

而傳聞佢地最想買既人亦只係攻擊中場波歷克
究竟佢地班高層係咪有病架
小弟就打死都唔信咁既防線可以成功衛冕歐聯

2)
車仔而家既運勢可以話係同曼聯逆轉
其實兩隊開季到而家都冇場好波
前者最初入到波
但最近就唔識入波
後者就岩岩相反

前者既領隊摩連奴就話旁證誤判令佢地冇左兩分
講真0個球波小弟就唔敢肯定
小弟夠膽講既就只有佢地踢得好唔流暢

冇左林伯特同埋波歷克
佢兩個同場隊波就一定會收皮
但同時 no show 又死
因為薜維爾明顯低佢地唔止一班波
所以佢地最好都係留住波歷克
以備不時之需
雖然點樣去安撫波歷克又係另一個問題

而冇左杜奧巴既車仔
就好似冇左希斯基既英格蘭
舒夫真高最令人印象深刻既一腳
就係踢傷左森巴0個腳
佢似乎仲要時間去適應車仔既踢法同埋英超既節奏

3)
曼聯方面
連續3場冇說服力咁羸1:0
佢地中前場冇一個有態
好彩仲有一個星期比佢地上力去'拆車'

而後防睇落好似好硬淨
其實只係一般
對熱刺唔失波應該多謝球證
之後返更衣室拜神
對新特蘭同埋愛華頓唔失波係應該既
冇野值得讚
佢地應該慶幸杜奧巴到時仲要抖
如果唔係佢地都幾頭痕

另外,施維斯達要長抖
奧沙亦要抖多陣
曼聯陣中只餘下艾夫蘭一個正宗左閘
係佢地而家既另一隱憂

4)
最後想講拜仁對史浩克04
小弟總覺得暫時而言
相對於4-4-2 陣式
4-2-3-1 陣式係拜仁發揮得比較好既陣式

但小弟相信軒斯菲特依然會 keep 住用 4-4-2 陣式
因為如果用 4-2-3-1 陣式
列貝利,創韋恩史迪加同埋艾天托普就會唔夠機會休息
而東尼,高路斯,普度基斯同埋史奈達夫等人又會唔夠機會出場
而另外, 4-4-2 陣式比較岩用於聯賽
簡簡單單靠東尼同埋高路斯已經可以屈機
4-2-3-1 陣式就相信會多用於歐洲賽

而家 4-4-2 陣式未算太大
好大程度係因為東尼同埋高路斯都仲未合拍
到佢兩個培養到默契
佢兩個可以自己搵食
又可以為拍檔做二傳
這對雙箭頭既威力可能只有巴塞隆拿可以相比

軒斯菲特而家要唸既可能係
龍門同中堅下季仲使唔使再買人

2007-9-17 (1)

想講下利物浦作客樸茨茅夫0個場波
最多人講既就梗係上半場0個球12碼
同埋賓尼迪斯既輪換制度

先講0個球12碼
以而家球賽既激烈程度
0個球梗係冇可能吹罰啦
好彩拉爾拿交到貨
而下半場簡奴另一次於禁區內被'侵犯'
球證今次冇吹罰就岩啦

球證萊利於英超好出名
出名在佢有時令人R晒頭既吹罰尺度
最經典既當然係04年曼聯主場對阿仙奴既兩次益晒主隊既誤判啦
阿仙奴49場不敗紀錄因為佢而就此告一段落

佢幾個月前曾來港執法
當中本地足總盃決賽亦曾經有令人爭議既判決
而佢當時亦抽空同本地球證開seminar

本地波開左十幾日已經咁多爭議性判決
班本地球證曾經上過佢堂
唔知又有冇關係呢
(只係講下笑......)

不過小弟要澄清
小弟向來都相信球證都係人
只會安慰自己係人都會犯錯
小弟真係唔會唸太多陰謀論

另外想講既係賓尼迪斯既輪換制度
好多人一見到利記失分就賴佢留力
但唸返轉頭
謝拉特,托利斯同埋巴布踢完兩場國家隊既賽事
加上下星期又要作客波圖
而前兩者又未好返晒
佢3個得到休息機會係正常
禾路連冇得抖,反而古積特返國家隊坐足兩場冷板都仲有得抖
就好明顯因為賓尼迪斯星期二晚想用古積特踢正選啦

0個晚賓尼迪斯先後用托利斯同埋謝拉特
入替哥治同埋賓納特
完全唔令人意外
跟住好多人就會唸跟住出場既一定係巴布
但換走邊個呢?
大熱就實係班拿約

但小弟就唸賓尼迪斯今季進取左咁多
換走既應該係沙比艾朗素或者施素高
結果之前要踢太公波既前者就真係被巴布入替
賓尼迪斯今季真係比之前更進取
其實係好抵讚架

2007-9-15

1)
哥本哈根後衛 Brede Hangeland 同保頓扯上關係
佢係挪威國家隊既正選中堅
亦可客串防中

保頓領隊森美李爾被發現於挪威對希臘既比賽出現
英國傳媒指保頓唸住於1月買佢
於暑假時佢被指曾經係紐記既增兵目標之一

2)
侯利亞重返法國足總
再次擔任技術總監一職

3)
車路士表明波歷克唔會被出售

4)
聖保羅中場曉高因向對手吐口水而被罰停賽120日

2007-9-14 (2)

最近既一0的傳聞:

1)
利物浦既拉爾拿同埋班拿約被傳
分別被馬體會同埋曼城睇中
但佢兩個既離隊機會唔大

而利記分別同意大利新晉國腳霍治亞
同埋史堤芬泰萊扯上關係
前者今季被拉素借到卡利亞里
意國傳媒估計佢最少值800萬鎊
而後者仲未同紐卡素傾掂新約
英國傳媒估計佢約值500萬鎊

2)
阿仙奴方面
賓特拿,賀迪同埋基拔圖施華都被傳會離隊
其中以前者比較有機會
佢被傳將於1月以借用身份加盟新特蘭或者韋斯咸

另外,英國傳媒指雲加得到董事局撥款
將於1月最少有一單大買賣
傳聞目標就係亨特拉爾或者羅仙拿

3)
皇馬可能於1月開價買波歷克

4)
曼城除左睇中班拿約之外
亦同祖高爾以及保臣扯上關係

5)
英國傳媒指曼聯由於搵唔到前鋒
可能改打梅度既主意

6)
士砵亭17歲進攻中場 Kaby
分別受到拜仁,阿仙奴同埋車路士既垂青
葡萄牙傳媒估計佢既身價約為500萬鎊

7)
紐卡素被傳會為自由身既薜馬利亞提供合約
佢自從同利雲特約滿後就未搵到新球會
拉素,錫菲聯同埋米杜士堡都先後同佢扯上關係

另外,佢地亦被傳想打希斯基既主意
但一聽就知機會唔大
因為韋根唔可能放人
而紐記亦有維度卡在陣

8)
傳聞樸茨茅夫開價600萬鎊買古莊臣

9)
AC米蘭同埋祖雲達斯都睇中巴素爾既 Felipe Caicedo
佢既身價大約400萬
最快會於1月轉戰意甲

2007-9-14 (1)

(雖然遲左)
有幾場波想講:

1)
英格蘭主場羸俄羅斯3:0
表面睇好似好勁
但講真表現唔見得好好

羸得輕鬆主因係入波入得早
加上對手食左咋糊
(真係手球在先)

羸3球波都係人地防守差
以俄羅斯之前只失1球既表現
客隊今場既防守真係好明顯係水準之下

2)
法國佬似乎真係好驚太體力化既對手
佢地近幾年對愛爾蘭同埋蘇格蘭0個類球隊都係踢得唔好

有人賴今場輸在冇亨利
但其實係輸在中場做唔到波
有成7成既控球時間都冇用

3)
荷蘭自06世界盃之後真係冇咩代表作
中前場未搵到最佳既組合係主要既原因
究竟史奈達同雲達華治點樣用
施多夫會唔會持續有出場機會
球隊有冇一個信得過既防中
同埋雲佩斯以及洛賓於前場點樣用
小弟覺得尹巴士頓都仲有排唸

4)
意大利有運之下作客羸烏克蘭
但球隊依然有好多問題

成條防線只有保方信得過

中場又冇創造力
鄧納東尼最鍾意既兩邊側擊又做唔到
又唔夠新血
只有阿古蘭尼,霍治亞同埋蒙達利禾似乎有比較多機會上位

前面除左東尼之外
冇咩人信得過
講真迪拿達利同埋哥利亞雷拉等人值得比多0的機會

5)
葡萄牙講真係幾冇運
但佢地既防守真係多左失誤
小弟覺得同冇左卡華路有關
因為冇左佢成日提場
個班唔多可靠既後衛只會踢得仲亂

中前場成日拉唔開對手既防守都係問題
而近十幾年都冇一個信得過既射手始終係問題
用C7客串踢前面可能係而家比較可取既選擇

2007-9-3

有幾場波想講:

1)
第一場就梗係愛隊利物浦大炒打呲郡0個場啦
坦白講主場羸降班膽6:0唔值得好高興
自02年11月之後再上榜首亦唔見得有特別意義
真正令小弟興奮既係領隊賓尼迪斯既球隊多左進攻既元素
而羸到3球都唔想收手亦係近年少有

不過而家最緊要既係球隊之後可以表現到近17年來都冇既穩定性
同埋改善上季幾差勁既客場成績
因為利記今季既賽期可以講係先甜後苦
首循環對住車路士,曼聯,阿仙奴同埋熱刺都係主場出擊
換言之下半季佢地既賽程有好多失分既機會
再加埋歐聯既重擔
就算佢地過左聖誕既地獄賽期仍然排榜首
聯賽冠軍可見唔會見得好穩陣

2)
第二場就想講既就係紐卡素羸韋根1:0既比賽
想講既唔係奧雲仔打破入球荒
而係佢地既比賽節奏

佢地頭4場既節奏係全場都好快
小弟覺得節奏快唔係代表唔好
但快到冇節制就即係控制唔到比賽節奏

佢地4場入面比較易踢既係作客羸保頓3:1既比賽
全因保頓班老野跟唔到紐記既比賽節奏
但咁唔代表節奏快就可以羸波
因為佢地4場入面打得最差0個場就係對維拉0個場
而其中一個原因係對方有個李奧曲卡識得控制比賽

小弟相信只有等到巴頓復出
問題先會得到解決

3)
第三場想講既係阿仙奴對樸茨茅夫既比賽
後者既鬆散防線固然係輸波既主因
但法比加斯既出色表現亦唔講得笑
如果佢全季都keep到咁既表現
季尾選足球先生同埋球員先生佢一定係大熱

4)
之後想講既係曼聯對新特蘭既比賽
想講既唔係前者冇說服力既表現

而係想講下堅尼
有幾多人可以得到佢當日重返奧脫福既待遇
布魯士,曉士,甚至乎白賴仁笠臣都冇呀
現場球迷咁樣歡迎佢真係夫復何求

5)
車路士方面
作客爆左個小冷門輸比維拉0:2
主因正如摩連奴咁講係下半場一開波既失球打亂晒部署

但小弟覺得佢地其實同曼聯一樣都仲未上力
而卡華路同埋林伯特既缺陣
加上泰利要打止痛針負傷上陣
(好似話仲要等多4個月先可以徹底康復)
咁既陣容同埋狀態
失分其實一0的都唔奇
只不過冇晒3分又真係幾意外

6)
跟住想講本地甲組既傑志羸南華2:1既賽事
其實兩隊都踢得唔好
3個入球都唔多應該出現

南華入0個個罰球
唔係李海強勁
而係王振鵬水皮
人地右路罰球射左去遠柱網仔入
如果curve入去既話都叫正常
比人咁樣真射入網就真係好過份

而傑志追平0個球12瑪
盧均宜根本就唔可能控到個波
而以球證尋日既執法尺度
0個下所謂既身體接觸邊有可能會判罰架

到傑志羸波0個球
只係哥倫起腳省到安達臣彈入

尋日場波
睇到哥倫這個馬其頓國腳真係唔錯
雖然未上力
但波底唔錯
傳送亦少斷纜
同離門兩碼都炒街,但人工唔平既巴路士相比真係好好多
傑志間唔中就搵到0的咁既好野
真係抵讚

7)
巴塞隆拿尋晚羸波
最令人印象深刻既就係細哨既鬥心返晒0黎
係小弟心目中
佢既作用真係比其他幾個球星大

而皇馬作客大炒維拉利爾5:0
表面睇好得人驚
但主因其實係入波先
迫住唔擅長主攻既維拉利爾壓上去
後防暴露左太多空位
皇馬既陣容0係防守上其實有好多弱點
所以都係睇定0的先下定論

2007-9-1

除左尋晚AC米蘭羸西維爾3:1既歐洲超級盃之外
今日最引人注意既就係轉會消息
轉會市場 deadline 今年既特色
就係強隊通常都冇好下場
例如愛隊利物浦(搵唔到最想要既中堅,只得一個年青中場),曼聯,皇馬同埋熱刺......
以下係部份比較受人注意既轉會消息

1)
先講利物浦
佢地搵唔到最想要既中堅球員
向祖雲達斯買廢柴保桑失敗
只能等到季中

小弟覺得如果係保桑既話
咁就唔買好過買啦
紐卡素既桑拿士當年肯開價800萬鎊向格拉斯哥流浪買佢
真係笑話
唔怪得成日被人傳佢買人既時候手腳唔乾淨

佢地最終只係從里昂簽到一個19歲既法國中場 Damien Plessi
另外拿泰歷亦再次被外借

2)
紐卡素方面
經過多重波折
佢地終於簽到比爾同埋菲爾
成條防線既人腳幾有深度
Big Sam 果然有料到

另一方面
紐卡素放走左蘇蘭奴同埋夏廷頓
佢地分別加盟韋斯咸同埋列斯聯

3)
阿仙奴方面
佢地成功從車路士簽到迪亞拉
迪亞拉同球會只餘下一年合約
車仔為免人財兩失
最終決定放人

另外佢地將小將森臣外借到米禾爾至出年1月
個小朋友5月既時候曾來港踢7月賽
當時仲係球隊既隊長

4)
韋斯咸方面
除左有蘇蘭奴
亦成功從韋根借用卡馬拉一季

5)
樸茨茅夫放走左史堤芬奴域同埋加利奧尼爾
但就補充左格連莊臣同埋柏巴迪奧普

6)
伯明翰既目標盧辛最終決定轉會薩拉戈薩
但佢地就從切爾達借左 Borja Oubina Melendez 一季

7)
曼城簽唔到想簽既艾文達或者阿祖安奴
但森瑪拉斯就最終留隊
不過哥拉迪同埋迪哥夫就被外借

8)
富咸就除左之前講過既史堤芬奴垣
仲有梅菲,古堅同埋薛琦鉉
其中後者係用羅仙尼亞交換

9)
之前同利物浦扯上關係既查維加西亞
最終決定由皇馬轉投奧沙辛拿

10)
莫達終於加盟馬體會

11)
國米最終只放走3個年青球員
另外列高巴以借用形式加盟拖連奴
佢既離隊亦即代表左阿祖安奴會留隊