2009-3-31

好好好好好多場太公波想講……

巴西仔作客向來著藍衫
不過如果唔係佢地個樣熟口熟面
齋睇表現隨時以為著黃衫既厄瓜多爾先係足球王國

佢地作客贏唔到波唔意外
因為佢地近年作客頂多得6成戰鬥力
冇卡卡靠細哨就仲死多幾錢重

而如果唔係雙方龍門質素有別
森巴兵隨時連1分都保唔住

賽前花邊新聞話阿祖安奴搵埋羅賓奴等蒲精開個P都12個鐘
就睇得出佢地有幾認真同埋集中
佢地歸隊後加埋踢波既時間都唔夠開個P咁多
球會領隊同埋老闆成日話太公波搞到班球員謝晒
去蒲去滾所消耗既精力唔多過一來一回既兩程飛機?
小弟就唔多信

同樣令人失望既有葡萄牙,法國同埋德國
葡萄牙方面
C7有幾名大於實
只要唔係死硬派撐曼聯既應該都會好清楚
大波通常冇料到
冇左曼聯群星拱照又係老馮冇料到
原地插花,浪射同埋插水已經佢既成名3寶
佢領軍既功能
可能連費高當年一半都冇

而班隊友唔係走緊下坡就係未接到棒
再加埋個庸帥昆洛斯
成隊葡萄牙幾個月內就咁淪落為世界二線球隊

法國方面
見到杜明尼治
就即刻令小弟聯想到AIG既高層
一樣咁廢兼面皮夠厚
賓施馬未上到位
亨利睇落又有少少厭戰
中前場講到尾只係靠晒列貝利
而中後場數得出有名氣既全部都今非昔比
法,葡兩國就算入到決賽週
最終都唔慌有運行

德國方面
主場只羸列支敦士登4:0就明顯交唔夠數
而陣中唔夠新仔用亦係大問題
不過路維起碼夠膽盡量俾機會新人

安基同埋馬里奧高美斯俾人狂插
小弟都撐路維繼續用佢地
因為蜀中無大將
而家唔趁對弱隊幫佢地打起信心
唔通到南非要搏命先要佢地頂硬上呀?

不過德國中路始終冇夠料既新人上到位
就始終係球隊一大隱憂

反而阿根廷同埋意大利俾到小弟驚喜
阿根廷於後列基美時代既第一擊清風送爽
新10號美斯,泰維斯同埋阿古路一齊出擊就好有小型球 feel

不過如果對手踢9-0-1
或者中場有兩個或以上勁既防中阻住晒
佢地仲可唔可以踢得咁爽
小弟就真係好懷疑
而球隊冇一個高大箭頭破密集亦係弱點

意大利既整體發揮就一般
不過初步搵到件好野柏仙尼就值得慶賀
至少唔使咩都靠晒東尼

不過後防冇新血代替到簡拿華路就隨時成為死穴
只得基亞連尼一個可以擋得幾多次
但話說回頭
就算有新仔
納比敢唔敢用又係另一個問題
而大簡會唔會因為冇班落而暑假索性掛靴亦係疑問

另外想講多幾隊波……
英格蘭方面
朗尼係好搶
不過得佢一個咁搶又反映左英格蘭其實冇咩殺手
希斯基係唔自私兼可以為隊友開路
不過唔識入波既前鋒講真好極有個譜
而奧雲仲有冇機重返國家隊依然係一個謎

球隊最終既前途可能繫於謝拉特身上
4-4-1-1陣式可能係佢地既最終出路

今場波佢地既表現
都唔夠件復古波衫令小弟印象更咁深刻
件白色polo簡直係近年傑作
修腰兼略為貼身既設計仲 fit 晒小弟

西班牙就近兩場多左長傳同埋側擊
雖然成效一般
但至少係正面嘗試

不過後防就始終俾唔到小弟信心
碧基同埋艾比奧爾始終唔穩陣
唔使失波只因對手係殘陣既土耳其
同埋卡斯拿斯繼續有料到

亞洲區方面
日本近幾年略走下坡
中村俊輔不復當年勇
陣中又冇可靠既射手
用幾多個前鋒都係冇用
球隊唯一保持到既只係體能,速度同埋效率
佢地同埋南韓暫時應該未係澳洲既對手

北韓仔出線在望
超勁體能,發揮正常同埋西亞球隊勁跌watt都係主因
但佢地近乎冇機會對亞洲以外既球隊
陣中亦冇咩外流球員
而技術亦只係一般
往後既路會越來越難行

西亞球隊又係令人失望
踢法唔夠整體兼體能不足係佢地既死穴
不過話雖如此都要為戴伊講返句好話

領先1球既伊朗最後11分鐘連失兩球
不過之前球證其實漏吹左球12碼
門框亦救左沙地一次
否則伊朗一早羸緊3:0
而表現講真亦算有交待

戴伊臨危上馬而家開始有起色偏偏俾人踢走
伊朗足總近年換教練既速度拍得住一眾富有鄰國
其實長遠對提升球隊水平毫無幫助

2009-3-30

近幾日既新聞……

1)
賓尼迪斯否認以2000萬鎊價錢引入大衛施華既傳聞
佢只表示已經同佢既教練班底搞掂續約

另一方面,’可能係世界上最好既啤酒’就想以1500萬鎊既條件
同'可能係世界上最好既球隊'續約4年

2)
雖然堅尼亞最遲可以於5月復出領軍
不過傳聞紐卡素可能將佢老人家調職為球會總監
即係升上神枱!

3)
紐卡素再次被傳想買侯度史東
佢地亦被傳想向些路迪以及侯城
分別開價400萬鎊同埋500萬鎊收購保路錫同埋端納
而紐記新龍門既可能人選哥頓就表示有意離開新特蘭

4)
由於走馬上任既列仙奴未能改善馬體會戰績之餘
仲同阿古路不和
蘇斯達因而被指可能接手馬體會

5)
軒迪克可能改以顧問身份效力車路士
負責處理球員買賣
而俄羅斯足總亦大開綠燈

而雲達華治表態有興趣轉投車仔
不過先決條件係軒迪克繼續執教
另一方面,艾殊利楊格亦被指成為車仔既考慮人選

6)
AC米蘭被指想引入簡奴迪
不過西維爾已經表明唔會出售這名馬里射手

7)
皇馬再被指打算出價1億鎊收購C7

8)
消息指曼聯上個暑假曾斟酌文仙尼出任費 sir 既副手
不過這名前國米教頭只有興趣搵間球會坐正

9)
傳聞列文復出國家隊
不過龍門教練哥普基已經否認有關傳聞

另一方面,列文既宿敵簡尼都唔見得比佢好
加盟史浩克04做經理0個單野最終爛尾收場

10)
保拉路斯希望離開史特加以爭取更多出場機會
漢諾威就被傳係佢最可能既落腳地

11)
班尼加成為拿玻里1000萬鎊既羅致對象
這名20歲中場亦承認佢既經理人已經做緊野

12)
富咸,伯明翰同埋史篤城都被指想向利物浦借用法國年青射手尼哥治
而前者亦想向曼聯收購吉遜
不過這名21歲北愛防中已經作出否認

13)
華倫西亞被指睇中利華古遜既22歲智利翼衛維迪
而祖亞昆就被指成為祖雲達斯既增兵對象

14)
簡拿華路被指成為AC米蘭,熱刺同埋曼城既增兵對象
不過這名意大利隊長已經否認同前者有接觸

15)
傳聞指法比加斯捧左歐國盃後開始於阿仙奴隊中扮大佬
仲有隊友睇死佢會於季尾轉投巴塞隆拿
而賓特拿亦再次被指成為國米既增兵人選

另一方面,繼耶保後
兵工廠被指睇中拖肥糖另一後衛尼史葛
傳聞轉會開價高達1000萬鎊

而漢基蘭亦係雲加既另一心水
不過就有財大氣粗既曼城阻頭阻勢

16)
莫斯科火車頭,多蒙特,漢堡同埋辛尼特都被指睇中加拉塔沙雷既巴西進攻中場連干

17)
奧尼爾被指將奇雲戴維斯同埋瑞士防中費蘭迪斯列入收購名單

18)
傳聞熱刺開價1000萬鎊收購迪亞高米列圖
不過熱那亞已經表明出價太低
另一方面,莫達就被傳成為國米,西維爾,貝迪斯同埋馬略卡既羅致人選

P.S.:
1)
落後地區經常搞唔好球場保安問題
近年頻頻爆鑊
科突迪瓦又因為咁而最少損失左19條人命
而132名傷者當中好多都係重傷

類似既慘劇似乎沒完沒了……
今次事件
好多冇飛既球迷唔肯自律固然係事件起因
國際足協之前先話這個球場通過左安全檢測亦好諷刺
而差佬太遲先識放催淚彈驅散人群都好抵插
3個原因加埋就解釋左今次同埋之前類似既慘劇

2)
聽日先講太公波賽後感

2009-3-27

1)
加利安尼表示安察洛堤將會留任
不過就警告細哨如果再唔改善表現
佢將於季尾被賣走

2)
由於同艾加續約唔多順利
消息指利物浦打算向華倫西亞出價1000萬歐元收購艾比奧爾
另外,沙比艾朗素就表示冇收過皇馬既斟酌

另一方面,利記肯賣斷禾路連俾哈化柏林
不過就企硬要收400萬鎊

3)
曼城再次被指準備嘗試羅致列貝利同埋亨利

4)
一般估計艾蒙尼亞下年1月就會獲發英國護照
令佢有機會入選英格蘭大軍參加南非世界盃

5)
幾段有關紐卡素既消息……

韋根被指有興趣向紐卡素出價200萬鎊收購巴頓
而奧雲被指向曼城自薦

有出有入......
佢地就被睇睇中根特前鋒盧斯
這名23歲哥斯達黎加射手先後同多支球隊扯上關係
當中包括:安德烈治,標準烈治,布魯日,海倫芬,奧林比亞高斯,拿玻里,格流同埋些路迪,

而卡達活被發現星期二晚去左睇史雲頓對諾咸頓既比賽
消息指佢既目標係0個晚為前者連中三元既確斯
隨即有傳聞指佢地將於暑假收購這名即將22歲既本土前鋒

另一方面,杜夫因為肌肉拉傷而要休息至少1個星期
佢已經離開愛爾蘭集訓營向紐卡素報到

另外,小路亞路亞就被外借到唐卡士打1個月

6)
士砵亭既16歲葡萄牙射手 A.Taira 被指成為幾間英超球會既羅致對象

7)
維拉被指打算以1200萬鎊既價錢引入比利時中場迪科爾

8)
繼球隊經理慕拿後
史浩克04亦決定同教練魯頓解約
而為左跟隨佢而由川迪加盟既安格拿就被傳可能轉投燕豪芬

9)
阿仙奴被指有興趣搵艾利亞迪里回巢
佢地亦被指想同車路士爭奪耶保
莫耶斯為左留住這名尼日利亞中堅
準備以200萬歐元既條件同佢續約3年

10)
辛尼特被指有興趣從格流引入巴利費格遜

11)
瑞士射手費爾被指成為拿玻里,熱刺同埋巴黎聖日耳門既增兵人選

12)
蘇亞素雖然被指將被國米放棄
不過唔愁出路既佢就被指成為馬體會既新前鋒人選

13)
拉素被指準備放棄阿根廷龍門卡路素

14)
卡利亞里22歲左閘比仙尼被傳成為韋斯咸既增兵對象

15)
愛斯賓奴既23歲中場佐迪高美斯被指成為些路迪既200萬鎊羅致人選

16)
卡斯歷被指準備重返德甲

17)
查爾頓被指可能改變主意同鄭智續約
(不過人地肯唔肯先得架?)

18)
車路士被指有興趣羅致3名失意軍人羅賓奴,雲達華治同埋柏夫奴真高

p.s.:
戴倫費格遜爆料話費 sir 決定下季收山
係真唔係呀?

2009-3-26

近兩日既新聞……

1)
吉列被指搵銀行幫佢出售利物浦既股份

2)
麥薩斯,卡利亞里26歲龍門馬捷迪,東尼,
同埋彭美拉斯21歲新星傑利臣都被指成為AC米蘭最新既增兵人選

另一方面,舒夫真高就被指可能重返基輔
而波里路就可能被賣到拿玻里
而尼斯達同埋艾瑪臣就被指可能決定退休

3)
堅韋尼鍾斯被指成為利物浦800萬鎊既羅致對象

4)
曉頓聲稱依然得到球員既支持同埋信任
另一方面,史堤芬泰萊同埋巴斯桑治既傷勢冇預期咁嚴重
應該可趕及落場鬥車路士

5)
原來16歲巴西射手Nascimento 跟埋球會隊友 L.Korijkov 一齊於紐卡素試腳
另一方面,早前因為護照問題而未能於1月加盟紐記既Caio Ferreira
就被指可能改為加盟一間希臘球會

6)
拉素被指有興趣引入自由身既告魯斯

7)
馬基里尼否認季尾掛靴既傳聞

8)
拜仁方面否認有興趣羅致麥基迪既傳聞
亦表示唔會於暑假引入新箭頭

9)
韋斯咸被指有興趣向曼聯收購奧沙

10)
科蘭否認加盟熱刺或者新特蘭既傳聞

11)
摩連奴表示想贏歐聯就要大幅清除瘀血
同埋提攜新星兼 upgrade 訓練設備
另一方面,佢被指想帶3名舊部屬杜奧巴,卡華路同埋艾辛到國米

12)
祖雲達斯被指用現金加埋阿米朗向森多利亞收購卡斯辛奴
而老婦人亦被指想從漢堡羅致杜查奧斯基

13)
艾利亞迪里被指成為幾間歐洲球會既羅致對象
當中包括羅馬,費倫天拿,川迪同埋維拉利爾

14)
由於博洛尼亞高層同米赫洛域不和
消息指佢地想於季尾搵前任教練阿拉干尼回巢

2009-3-24

近兩日既新聞……

1)
伊巴謙莫域表示將於季尾考慮前途
莫拉堤雖然表示唔敢國米冇左伊巴會變成點
不過就表示如果這名瑞典球星決心要走
而國米又收到合理價錢都唔會阻佢離開
傳聞巴塞隆拿同埋皇馬都有興趣接貨

另一方面,國米就被指打算搵泰維斯加盟

2)
消息指紐卡素部份球員已經對曉頓同埋卡達活失去信心
艾殊利準備搵雲拿保斯做替工

3)
史堤芬泰萊同埋巴斯桑治都因為傷患唔可以於車仔既聯賽候命
前者已經退出英格蘭 U-21 而冇機會鬥挪威同埋法國

另一方面, MFK Kosice 既16歲斯洛伐克中堅 L.Korijkov 去左紐記試腳
而紐記亦睇中這間斯洛伐克球會既16歲巴西射手D.Nascimento
不過就要同馬體會以及羅馬爭過

4)
利物浦向謝拉特開出週薪14萬鎊既4年新約

5)
樸茅已經通知簡奴唔會同佢續約
傳聞艾阿拉比打算以5萬鎊週薪吸引佢以自由身加盟

6)
哈利列納被發現去左睇熱那亞對烏甸尼斯既比賽
隨即有傳聞指熱刺打算季尾收購迪亞高米列圖
而戴倫賓特同埋柏夫奴真高就將被掛牌出售

7)
奧查落實下季以自由身加盟燕豪芬

8)
曼城被指將於季尾向熱刺收購賓尼

9)
維拉被指將於暑假嘗試引入布朗以及米卡李察士
而希亞活就被外借到狼隊

10)
雲加表態希望終身執教兵工廠

11)
梅菲被傳成為韋斯咸既增兵對象

12
富咸被指想搵南非防守球員莫高拿以自由身加盟
佢地亦被指想以500萬鎊既價錢引入侯度史東

13)
列卡特被指將於季尾上車
而馬基里尼就會回巢出任助教兼球會大使

另一方面,消息指杜奧巴得到特赦
成為唔使被掛牌兼有得續約既老嘢

14)
查伯東尼爆料拜仁想從些路迪羅致麥基迪

15)
查爾頓方面承認鄭智好可能於季尾以自由身離隊

16)
伊雲洛域表態想轉投費倫天拿

p.s.:
早幾日先有報導指利記今個夏天得3200萬鎊增兵資金
而家又有傳聞指賓尼迪斯得到撥款1億英鎊
去買齊韋拿,大衛施華同埋巴利
講到賓帥成個’集郵’領隊咁

咁既時勢如果有1億鎊都留返還債或者起新球場啦
報紙佬唔好好似山草藥舖老闆咁 up 得就 up
作故仔呃飯食都唔該佢地花多少少心思

2009-3-23

上星期英超3頭馬車於聯賽既表現
一直成為小弟腦海既 hot topics

超有信心利記獅子撲兔羸硬維拉
如果羸完曼聯之後又即刻失分
咁19年(甚至190年)羸唔到聯賽都唔抵可憐

而某程度既客觀理據加上冇限主觀願望
就令小弟覺得富咸同埋熱刺有條件幫下手迫和曼聯同埋車仔

結果兩晚既賽果唔止令小弟喜出望外
直情有過左3關既感覺……

富咸可以於主場45年來第一次羸曼聯
關鍵明顯係史高斯既蓄意手球
輸球12碼事少
踢少個先大檸樂

不過費 sir 都有抵鬧既地方
一心唸住富咸易食
居然搵傑斯串演前鋒
佢既輪換近期已經越來越過左火位
今場波又係一個例證

車仔方面
輸波主因一定係衰埋門把握差
而阿歷斯頭槌冇運彈地再中楣
就整定連1分都冇得落袋

而維拉雖然個勢勁插水
但利記最終咁好客請夠佢地食5隻蛋
就真係唸都唸唔到

維拉而家個陣殘晒之餘
球隊轉數又跌晒 watt
成隊波只得一個卡維有好狀態
而利記可以早入波,整體又有好表現,
同埋拉爾拿上半場兩度將卡維既攻門拒緒門外
咁多個 point 加埋就應該可以解釋到個賽果

傷人罪獲撤銷既謝拉特固然人逢喜事精神爽
用3個死球入波去同自己慶祝

利亞拿既好表現
就令人覺得佢有潛質成為四哥同埋費托以外既另一個可靠攻擊點

拉爾拿今場冇甩手甩腳兼左飛右撲之餘
仲林源三上身
佢一腳生波助攻利亞拿入波
令小弟即刻唸起林源三既前衝傳球

有好表現既利記從來唔使驚任何對手
最大既敵人或者只係佢地自己

曼聯上兩季羸聯賽亦一度獲利回肚
最終費 sir 都可以撥亂反正
所以利記得8場波要追4分始終好有難度
(利記得失球已經反超前曼聯兩球)

利記因為餘下賽程仲要對4隊護級球隊
仲要鬥多次兵工廠
稍為不慎就已經將爭標美夢斷送
所以唯一可以做既只有以平常心做好本份再望天打掛

2009-3-22

又想講下東北部護級雙虫......

先講米堡
佢地真係廢到令小弟失望
英超班底但英冠水準
佢地作客輸俾英超其中一隊主場王史篤城真係唔令小弟意外

講機會米堡於比賽頭2/3既時間真係比史篤城多
不過唔好見佢地入唔到波就無知到話佢地唔夠運
佢地近兩季既埋門把握絕對唔似英超球隊
上季煞科戰如果唔係有絕大部份時間人多打人少而炒左殘陣既曼城7:0
佢地平均每場連一球都入唔到
點知今季依然冇改善

而後面又係冇防守
幾年件高佬中堅打籃球嫌佢地矮
踢波又嫌佢地轉身慢,冇腦兼冇腳法
季尾轉行打摔角可能反而有運行
皆因唔使點用腦
傳聞利記想趁米堡降班而引入韋達
賓帥真係要三思而後行

而冇埋舒華沙仲令防線雪上加霜
代替保定踢防中既迪加迪又打埋柴
連個防守屏障都冇埋
成條防線結論又係英冠水準
有時失波後即刻散晒就仲令人扯火

成隊波比較似樣既只有3個中前場技術型球員
不過唐寧踢一場好波又沉返幾場
莊遜有波底又夠膽上腳
不過就衰唔夠件頭而有時怯於硬朗攔截
最好既始終得一個端基
這名好鬥志既土耳其球員絕對係近年最好波既米堡球員
踢輔鋒同埋進攻中場都有一手
可惜合拍無人

不過班波點廢極都唔夠修夫基咁廢
睇佢既眼神已經知佢等緊季尾切腹謝罪
暑假之後如果佢失業後無所事事
不妨睇下洛奇第3集'Eye of the tiger'
見到隊波唔掂都依然粒聲唔出既人通常可以分兩類
第一類係從納比同埋軒迪克既眼中睇到既淡定有錢剩
第二類就係修夫基眼中既無奈
見端基仲肉緊過佢
唔知既話隨時以為佢係領隊兼球員

之前分析護級形勢
印象中唔止一個人話唔想米堡降班
睇完尋晚場波既人
應該會明點解小弟將米堡列為第2號降班熱門

米堡死不足惜冇所謂
不過死都累街坊就抵俾人狂小
佢地好輸唔輸
6分波大戰輸俾另一降班熱門史篤城
就令到尋晚踢左至少半場好波既紐記仲大鑊

紐記尋晚雖然輸波
不過表現絕對係近期最好既一場
而兵工廠上半場中場大塞車
左右兩邊既艾沙維同埋拿斯尼過多時間移入中路
解釋左紐記上半場既入波機會點解仲多過兵工廠

不過馬田斯12碼宴客
亦同埋盧雲卡蘭斯先後失機
埋下輸波伏線

史堤芬泰萊上半場既超水準先後救左紐記兩次
夏柏亦有少少運擋住雲佩斯既單刀波
但紐記從來都唔擅長防守
要夏柏對住兵工廠先有 clean sheet 真係強人所難
下半場防線打回原形既紐記最終走甩左對手既高大箭頭賓特拿
而史堤芬泰萊既傷出亦簡接導致球隊連失兩球

輸到1:3後既紐記又一如以往咁散晒
如果唔係夏柏 keep 住有水準演出
加上全場門框幫紐記擋左兩次煞
佢地隨時繼12月尾後又一次於主場兵敗如山倒

講開佢地條防線
其實而家隨住比耶復出
曉頓同埋卡達活(甚至堅尼亞)可以考慮將史堤芬泰萊重新移入中路
以取代表現同身價不符既高路仙尼
阿根廷人絕對係繼保桑之後另一個高薪低能既紐記中堅

紐記而家仲有8場波搶分
對車仔同埋利記無錯係特別難踢
不過對熱刺,富咸同埋維拉
都可能因為對方到時冇咁好鬥心而偷到雞
而仲有3場鬥史篤城,樸茅同埋米堡都係6分波大戰
當中對後兩者都係主場出擊
命運總算在自己手中

如果佢地既中前場keep到尋晚失波前既水準
以佢地中前場有咁多高質素炮手
加上巴頓同埋格夫里等人將陸續候命
小弟對佢地既護級前途依然審慎樂觀

執筆之時
踢少個既新特蘭作客曼城
12碼都輸唔去亦唔似可以全身而退
勢必被拖埋落水
如果唔係西布朗已經 book 左一個降班席位
東北部3隊一齊降班既話都幾經典

p.s.:
曼聯pk同埋車仔拋錨既賽後感
等埋利記撲殺落水狗維拉(小弟今日既願望)後先講
今晚利記捉到鹿記得要脫腳

2009-3-21

1)
史浩克04落實由簡尼出任球會經理
另一方面,佢地同韋斯達交續約到2014年

2)
奧尼爾暗示如果維拉下季繼續冇份踢歐聯
就會俾下季約滿既巴利於今個暑假離隊

3)
列迪斯馬被指可能加盟費倫天拿

4)
格羅素被指成為拿玻里既增兵對象

5)
基治同埋泰禾被傳成為AC米蘭既新左閘人選

6)
禾確特因為膝傷而要休息
不過雲加透露今次受傷未致令這名年青球員提早收咧

7)
利物浦既年青中堅賀比斯被指成為李斯特城既40萬鎊羅致對象

8)
般奴艾維斯被傳成為皇馬既新中堅人選

9)
安貞桓'淪落'中超
這名過氣南韓射手接受大連實德既3個月試用合約

p.s.:
Big Sam 上季俾艾殊利炒左
懷恨在心絕對係人之常情
佢老人家繼帶領布力般流浪炒左紐記3球後
又再搵到機會一洩心頭之恨

佢眼見紐記而家水深火熱之際再落井下石
同傳媒表示紐記高層冇搵個有經驗既領隊
去做堅尼亞替工絕對係錯誤決定

雖然隊波依然有堅尼亞既遙遠控制
不過曉頓同埋卡達活始終係兩個好無奈頂硬上既替工
而家俾大森暗示冇料到
原本小弟都覺得佢地幾可憐
不過當小弟睇過今晚紐記對兵工廠既陣容
就覺得大傻哥都串得有道理

奧雲唔夠狀態冇得出係好公道
索性改踢 4-5-1 搶中場亦冇可厚非
識得用盧雲卡蘭斯踢右翼仲直情係小進步
不過辣椒仔依然有得同畢特以及路蘭一齊踢中場中
就令人擔心兼扯火
如果今晚辣椒仔又冇料到而紐記又輸波
都真係唔抵可憐

2009-3-20

1)
歐聯抽籤結果如下:
(前者先主場)
維拉利爾對阿仙奴
曼聯對波圖
利物浦對車路士
巴塞隆拿對拜仁

2)
英國傳媒指兩位美國老闆答應撥款2000萬鎊俾賓尼迪斯買人
加上賣走羅比堅尼套現既1200萬鎊
意味利記今個暑假總共有3200萬鎊去增兵
佢地隨即再被指打算收購巴利

不過賓帥就表示首要任務係同陣中主力以及教練續約
消息指謝拉特昸週薪將加至10萬鎊
而費托亦將會有9萬鎊週薪

另一方面,盧卡斯利華就否認離隊傳聞

3)
謝拉特同埋佢6個朋友都獲撒銷襲擊他人既罪名
不過佢地就仲要面對於公眾地方鬧事既罪名

4)
軒迪克表示如果俄羅斯未能晉身世界盃決賽週
佢就可以長教車路士

5)
唐寧表示而家只會集中注意力協助米堡護級
佢會於暑假先考慮去向問題

6)
奧查被指為左爭取出場機會而將於季尾離隊
消息指佢多數返早家落班

7)
巴頓可以趕及復出為紐卡素踢最後5場聯賽

8)
迪亞高表示要有得踢歐洲賽先肯留隊
令佢暑假離隊既傳聞熱上加熱

9)
阿仙奴再次被指有興趣於暑假向紐卡素出價800萬鎊羅致巴斯桑治
而當時人就向傳媒表示於紐記既生活非常開心

10)
堅尼亞目標4月18號復出帶隊鬥熱刺
而佢現時每日靠通電話俾指示曉頓

11)
巴塞隆拿(居然?!)準備同域陀華迪斯續約

12)
森林可能向維拉借用希亞活

13)
艾朗連儂同熱刺續約兩年

14)
早前被奧地利足總解約既布克拿宣佈退休

15)
雲邦美最終同意續約拜仁1年
同時續約既仲有迪米捷利斯

16)
國米被指睇中賓菲加既法國中場耶巴達

17)
祖雲達斯想游說尼維特再踢多一季

p.s.:
想講下歐聯形勢......

讀者'舒利亞'講過曼聯好大機會入決賽
小弟唔多認同
佢地係好命抽到對8蛋中最雞既波圖

不過如果4強鬥兵工廠
曼聯一定會好辛苦

因為就算阿仙奴冇得用艾沙維
隨住中前場既傷兵陸續復出
火力依然有保證

加上伊布爾表現回勇
佢加上丹尼爾同埋迪亞比
搶截唔見得好輸蝕

而更重要既係阿仙奴於聯賽而家只係要住後上既維拉
相對於壓力幾大既曼聯要頂住利記同埋車仔
兵工廠就算冇咁多腳都唔見得辛苦

所以結論係曼聯只可以略為睇高半線
甚至只係五五波

而另一條線
雖然利記要第5度於歐聯同車仔對壘
不過真正既大戰永遠唔會令人睇到厭
何況大家都係當頭起
肯定打甩脾
可以話係4個組合當中既真正五五波

軒迪克領軍咁耐都唔知個輸字點寫
如果利記首回合於主場羸唔到波
隨時繼上季再次放虎歸山

另外,兩支攻擊型球隊相遇
未必代表一定多波入
當年奇連士文帶德國踢世界盃
一入淘汰賽就穩陣起來
而家仲要帶隊先作客魯營
肯定踢穩守突擊
不過小弟都同意巴塞隆拿可以睇高半線
畢竟球員既平均質素較高

2009-3-19

由於技術問題
尋日又冇出 post
而家講返近三日既新聞......

1)
賓尼迪斯落實以8萬5000鎊週薪既條件同利物浦續約5年
另一方面,利記被指睇中文切尼,韋達以及唐寧等年輕球員

2)
紐卡素又被指搵緊新龍門
今次既版本係新特蘭既哥頓同埋高雲地利既韋斯活
後者曾經入選愛爾蘭代表隊
不過就從未上陣
愛華頓,熱刺同埋伯明翰都對這名身價400萬鎊既龍門好有興趣

3)
柏夫奴真高由於冇料到
早前俾哈利列納踢落預備組
令佢季尾離隊既機會大增

4)
傳聞一旦佩雷斯重掌皇馬
佢地就會向洛杉磯銀河開價1000萬鎊收購碧咸

5)
意大利傳媒指摩連奴已有一份開刀名單
當中包括貝迪素,馬達拉斯,李華士,韋拉,費高,哥利斯馬,
文仙尼,蘇亞素,域陀奧賓拿同埋基斯普
後者隨即被指可能轉投哈化柏林

而卡華路,卡積亞,莫達,咸錫,迪亞比,G.迪亞哥斯天尼同埋迪亞高米列圖
就被傳成為佢地既換血人選

6)
由於羅賓奴表現雷聲大,雨點小
兼有紀律問題
傳聞曼城考慮季尾放棄這名巴西國腳

7)
高路斯最終證實要抖8個星期

8)
有艾比亞迪提早收咧既AC米蘭
被指希望引入阿馬利以及麥士維

9)
羅馬準備同托迪續約5年

10)
西布朗被指打算季尾引入自由身既鄭智

11)
查斯古特同雲尼亞里炒大鑊
消息指老婦人想搵圖盧茲既基格納
或者巴黎聖日耳門既賀拉奧去取代佢

佢兩個都係今季法甲既出色射手
前者而家仲於射手榜領先
不過就仲未於國際賽證明實力

另一方面,佢地再次被指準備收購摩達歷以替補尼維特退休後既空缺

12)
韋斯咸同埋錫菲聯正式就泰維斯事件達成賠償協議
消息指前者答應賠償2500萬鎊

不過禾洛克同埋最少20名現役及前度鍚菲聯球員
就打算以私人名義控告槌仔幫
因為鍚菲聯降落英冠後令佢地炒或者減人工

13)
傳聞柏天尼唸緊搞個新既歐聯
不過歐洲足協已經作出否認

14)
車路士被指想向巴塞隆拿收購丹尼爾
但這名巴西翼衛已經作出否認

另一方面,馬路達就被指成為祖雲達斯1100萬鎊既增兵對象

15)
傳聞一旦史篤城護級失敗
比亞堤將以350萬鎊既價錢轉投新特蘭

2009-3-17

今日想講下東北護級雙'虫'

1) 米堡對樸茅
米堡迷ck意見如下......

兩隊波都好多攻勢, 上半場頭15分米堡搶錢咁搶,但不中龍
然而一次快開罰波,比賓納傳到中再彈番比高治窩理利
好唔集中,鍾斯又被阻視線........唔敢嗌的後果
之後老樸勁多chance in 1st half

下半場到米堡搶住踢,但去到有人紅牌至識醒
端基的全場奔走,助攻助守,原來佢先至係playmaker
最後馬龍京治的努力令佢於臨尾執到雞.........
最後十分鐘米堡其實不設防,除侯夫外,邊個返去守就係果個守
差點更憑艾方素單刀反勝,可惜占士實在太勁..........

比斯---落地係不智,插水都係不智,但真係可以令佢跌的動作都要食黃牌?
(小弟意見:雖然動作真係可以趺,不過比斯真係借勢趺,球證罰佢插水都唔見得有錯)

端基,唐寧,莊遜,馬龍京治--全場奔走,尤其端基......如果球隊全隊都係咁,真係唔駛護級
(小弟意見:一啖砂糖十幾啖屎先係米堡)

臨尾十五分鐘,要端基少班隊友至識醒.........
就係可能佢走番老遠,搶埋球波,之後比波無人到,先至激發到全隊...........
有時隊友真係要小的,太靜(指領隊)真係冇用
(小弟意見:何止靜,直情廢)
球隊前景真係好睇端基同埋鍾斯..........

2) 侯城對紐卡素

紐迷Ricky,舒利亞同埋sammysir已經講左唔少場波既意見
小弟只想講下紐記陣中幾條友

第一個係巴斯桑治
條友頂輸俾基奧雲尼真係幾離譜
巴西仔又唔係高,亦唔擅頂
法國仔擺明發夢

而佢之前對曼聯已經盧斯奧上身
對侯城夠膽咁玩野有咩咁奇
傳聞兵工廠有興趣斟佢
佢想玩野 show off 唔難理解
不過如果雲加睇見佢咁既腳法都簽得落手先至奇

第二個係奧雲
佢抖左咁耐根本冇態
先任後備似乎比較合理

第三個係古迪利斯
sammysir 提到佢好似唔識傳波同埋入波
小弟就可以為這名阿根廷國腳解話
佢唔係唔識傳波
只係搵唔到人俾
不過佢就真係唔多識入波
小弟幾個月前介紹佢既時候已經講過佢入球能力平平
95場入5球算普通啦掛?

第四個係阿倫史勿夫
辣椒仔踢中場冇攔截,冇後上助天,冇駁腳
sammysir 冇講錯
紐記真係好似踢少件
睇佢踢有時令小弟唸起而家於車仔既波歷克

第五個要講既係曉頓
奧雲同埋辣椒仔有得踢正選既失敗安排都關佢事
小弟認為由狀態唔錯既盧雲卡蘭斯代替奧雲踢正選
對兩者以及成隊波都比較公平

而辣椒仔踢得咁屎都可以於球場現形75分鐘就仲過份
曉頓應該一早用R泰萊踢正選
因為紐記就算現時冇人識中間派牌
球隊都總算做到簡單直接既兩翼側擊

2009-3-16

近日既新聞......

1)
賓尼迪斯透露將於下個星期同兩個美國老闆傾續約
仲會於兩個星期內決定前途

另一方面,西班牙傳媒指賓帥同時成為皇馬以及馬體會既羅致對象

2)
軒迪克重申季尾走人

另一方面,英國傳媒指油王為左將球隊陣容年輕化
將於季尾賣走年過30既球員

3)
皇馬被指打算出價1億英鎊收購戲拉特同埋沙比艾朗素
當中前者既身價估值8000萬鎊
而C7,卡卡,費托,韋拿同埋大衛施華都係佢既羅致目標

4)
韋斯咸決定分5年賠1000萬鎊俾錫菲聯
作為前者前季違規派泰維斯出場而間接踢左後者降班既賠償
後者亦會撤銷所有對前者既訴訟

5)
巴利同埋列斯19歲中場迪夫都被指成為曼城暑假既增兵對象

6)
高路斯同埋迪高好可能因為傷患而提早收咧

7)
賓施馬表態下季會留於里昂
另一方面,里昂主席歐拉斯暗示或於季尾引入查斯古特

8)
國米被指打算用哥利斯馬交換卡華路
而伊度奧亦成為佢地既增兵人選

9)
杜斯山度士被外借到葉士域治至季尾

10)
AC米蘭被指有興趣引入米基爾

11)
由於保贊同埋希比都曾經埋怨冇出場機會
巴塞隆拿被指打算索性賣走佢兩個套現
再收購同新教練列仙奴不和既阿古路

12)
阿仙奴同埋科仁都被指睇中尼利斯
彭拿典奈高斯為左阻礙佢離隊
將佢既身價定為1200萬鎊

13)
紐卡素被指睇中夏德斯菲爾德既19歲龍門史密斯
佢先後為英格蘭19歲以下各個年齡組別代表隊出賽
卡達活早前亦有親身觀察佢既表現
而韋根同埋熱刺亦先後派球探睇辦

14)
史浩克04同慕拿解約後
希望搵簡尼出任新經理

15)
曼聯被指睇中基奧雲高

16)
消息指高路托尼唔肯落實季尾留隊

17)
賓菲加被指想搵堅尼執教

18)
3個關於紐卡素領隊職位既傳聞版本......

一係紐記同埋昆士伯流浪同時睇中馬拉加既神奇教練泰比亞
這名59歲西班牙教頭仲未同球會達成續約協議
而佢亦透露曾於1月拒絕英格蘭球會既斟酌

二係佢地想再次搵雲拿保斯救亡

三係雖然堅尼亞健康情況唔理想
紐記都依然準備為佢同埋佢既教練團提供一份直至2011年既新約

19)
傳聞古斯錫下季將被外借

20)
愛華頓被指希望從米堡引入唐寧

p.s.:
遲少少再講紐記同埋米堡

2009-3-15

紅軍剷平奧脫福......

一齊要由幾日前既歐聯講起
以戰養戰既利記踢出超水準
連巴布同埋杜辛拿都忽然好波
加上球證接連犯錯
大炒皇馬4:0打起晒成班波既信心
而由於早段已經將皇馬收皮
成場波唔使出好多力

另一邊既曼聯
週中用左傑斯同埋史高斯兩位老人家
罕有地廢左自己中場既截擊力
如非對方冇運兼有防守失誤
佢地5冠王既美夢已經斷左攬

幾日後做客既可以抖多一日
兼且氣勢同埋信心都爆燈咁出征奧脫福
而主人家就仲好似沉醉於幾日前既幸運勝仗
或者因為近年佔盡優勢既對賽成績而沾沾自喜

費格遜似乎仲未從幾日前既苦戰吸取教訓
佢識得收超返兩件老野
但用組織力輳強既安達臣去取代效率奇高既費查
搞到得返朴智星同埋冇咩速度既卡域克去搶波
就削弱左本身中場既攔截本錢

而利記方面
雖然沙比艾朗素因傷缺陣
又有艾比路亞熱身受傷
要靠希比亞臨危受命
不過陣容尚算完整
而一個介乎 4-4-1-1 同埋 4-3-3 之間既陣式
因為有費托同埋謝拉特同時出場而好有殺傷力

利記可以出人意表咁大炒對手4:1
主因有兩個
一係曼聯比利記既出錯多好多
拉爾拿出錯原本令利記陷入劣勢
不過曼聯實在超好客
居然起勢咁送禮

發夢都估維迪唔到佢突然發波瘟發成咁
利記由落後到追平關佢事
費蛇一次過換3個唸住同利記搏命
點知又爆鑊既維迪3分鐘後就斷送左隊波追平既希望
佢原本係本土足球先生同埋球員先生既大熱
今場波至少冇左3成得票率

而艾夫蘭失位以致輸12碼同埋奧沙俾杜辛拿偷到雞
就令人發覺原來係強項既兩閘助攻
亦可以係輸波缺口

今季曼聯主場踢聯賽只失兩球
雲達沙之前又好似練左金鍾睪咁
不過破門一現
下場都只係失波

而利記既緊迫戰術亦係羸波原因
費托於前線已經係第一度防線
幾個中場加上回防助守既古治以及利亞拿
唔係下下都搶羸曼聯中場線
只要令佢地老鼠拉龜有波都冇位傳就已經好足夠

而C7(特別係佢),朗尼同埋泰維斯等主力有波在腳
利記好多時都唔止一個人去夾擊
令曼聯前線既火力蕩然無存

攻不銳,守不穩絕對係曼聯今場波既死因
難為費蛇居然厚顏撐自己隊波踢得比較好
而利記幾日內連續兩場代表作
而家全世界仲有邊個敢睇小佢地

而家踢多1場既利記追到4分
數字上雖然依然劣勢
不過總算似返個後上既挑戰者
而壓力落晒曼聯身上
加上佢地條防線原來唔係滴水不漏
利記既爭標夢忽然重燃
不過如果佢地好似之前咁劫富濟貧
咁羸幾多次曼聯都只係徒然

p.s.:
紐記同埋米堡兩場波既賽後感聽日再講

2009-3-13

近兩日既新聞......

1)
華倫西亞方面承認曼城斟酌大衛韋拿
而曼城方面就表示雙方曾經於12月傾過
不過因為認為價錢太高而放棄
消息指華倫西亞叫價6000萬歐元

另一方面,曼城再次被指將於暑假收購高路托尼以加強後防實力
而鄧尼就會被賣到新特蘭

2)
巴塞隆拿被指想搵施治取代域陀華迪斯
但這名捷克龍門既經理人已經代佢否認

3)
奧雲再次被傳離隊
曼城同埋維拉都係佢既可能目的地
而這名英格蘭射手可趕及於聽晚既6分波大戰復出

4)
安迪卡路爾同紐卡素續約3年半

另一方面,甘文斯,奧奴夏同埋侯度史東都被指成為紐記既增兵對象
前者早前一腳世界波射死曼聯而成名
後兩者就於1月已經同紐記扯上關係

5)
國米被指想以1000萬鎊既價錢從燕豪芬引入阿費利

6)
車路士被指打算於暑假向莫斯科中央陸軍出價1500萬鎊收購施哥夫
薛高表明唔會阻止這名俄羅斯國腳離隊

7)
麥基迪被指成為熱刺700萬鎊既增兵對象
而哈利列納被指想從樸茅引入舊部屬
當中包括占士,哥治同埋格蘭莊臣

8)
賓菲加被指有興趣向米堡以800萬鎊既價錢收購阿方素艾維斯
佢地亦被指有興趣引入自由身中堅蘇甘寶

9)
英國落實組織聯隊參加倫敦奧運足球項目

10)
來自獨立隊既蒙坦尼高成為阿根廷新一代10號仔

11)
拜仁被指想引入自由身龍門卡文尼以取代雲昇

12)
趙源熙以自由身加盟韋根
雙方簽約兩年半

13)
如果雷丁成功重返英超
索尼被指可能離開維拉重返這間倫敦球會

p.s.:
摩連奴不愧為傳媒既寵兒
國米出左局佢都依然成為傳媒既焦點
由撐國米踢得好
到曼聯既5冠王言論
再到伊巴經理人狂插佢
以至佢涉嫌打曼聯球迷
(警方已經證實佢無辜)
佢既新聞真係多過費 sir 幾倍
邊個話羸家先可以成為焦點

2009-3-12

想講下歐聯16強……

利記主場狂數皇馬4:0
卡斯拿斯仲輸到忍唔住喊
絕對令人意外

當中有3個關鍵
一係利記大打進攻足球
殺對手一個措手不及
二係利記本身踢出超水準
三係頭兩個入波真係有誤判成份

而車路士原本可以輕鬆0的過關
偏偏球證同埋旁證一齊發雞盲判錯杜奧巴既靚罰球
而比列堤見對手踢少個
又發波瘟送球12碼俾人
否則有尼維特傷出既祖記既反勝美夢唔可以維持83分鐘

而曼聯尋晚羸國米
對手後防唔齊腳兼略嫌冇運咁 miss 左幾次餐士
就解釋點解費 sir 可以少有地羸到串王

英超既 Big 4 最終連續兩年都入晒8強
當中只有阿仙奴靠12碼晉級最唔夠說服力
加上西班牙,意大利,德國,法甲同埋葡超既對手普遍好唔爭氣
英超絕對係手執歐洲各地聯賽既牛耳

西班牙既皇馬連續4季16強出局
如果唔計名氣而只講實力
佢地明顯已經唔係歐洲一等一球隊
維拉利爾踢得唔好都入到8強
只因抽到上上籤對彭拿典奈高斯
馬體會有條咁脆弱既防線
根本只配成為歐聯既過客

全西甲只有一隊巴塞隆拿有條件挑戰歐聯
但防線有隱憂加上哥迪奧拿隨時俾一班老狐狸前輩算死
球隊未必可以去到終站

意甲就仲衰
踢到16強就已經全部收皮
如果少睇波既隨時以為意甲球隊俾人禁止參賽
而歐協就直情只有一隊烏甸尼斯入到16強
雖然佢地向來唔重視盃仔
但某程度都可以反映到意大利球隊於歐洲賽場缺乏爭標能力

全意甲只有兩支米蘭市球隊同埋祖記算係歐洲一線尾
老婦人仲未從假波案事件中 fully recover
AC老人院就死氣沉沉
球隊冇錢買人就只好順從老闆意思重頭輕尾
國米表面近年稱霸意甲
實際上亦只係池中無魚蝦自大

而拜仁同埋里昂亦似乎係德甲同埋法甲比較似樣既代表
拜仁於歐聯既表現比聯賽出色
先作客羸士砵亭5:0
同埋總比數羸夠12:1仲盡破歐聯紀錄
連碧根鮑華都話覺得隊波有利記影子
不過其實對手實力平平
難以單憑一圈賽事就認定拜仁擅踢歐聯
加下佢地同巴塞隆拿有相同弱點
就係後防脆弱同埋教頭唔夠經驗
佢地隨時比巴塞隆拿更早落車

而里昂近年明顯走緊下坡
越來越唔似歐聯黑馬
佢地同國米一樣於國內冇咩磨練機會
本身唔夠料既佢地一出大場面自然唔慌行得遠

至於葡超方面
水準明顯更低
當中球會財困要賣人瘦身係當中主因
就算最勁既波圖其實只係歐洲二線球隊
佢地於本土都已經只係欺善怕惡既蛋散
而家入到8強只因對手馬體會比佢地更不濟

而家未抽籤
好難講8強份子既前程同埋邊隊係最終羸家
如果只計實力
就應該以英超 Big 3 同埋巴塞隆拿比較佔優

而家眼見英超盛世
不過任何野唔好只睇表面既風光
佢地一旦搞唔好財政問題
幾年後隨時被其他聯賽爬頭

99-00年球季
歐聯4強係皇馬,巴塞隆拿,華倫同埋拜仁
當時西甲有幾年俾人捧到上天
但大家都有眼睇佢地而家咩環境

2009-3-11

1)
列基美早前先透露為左入選世界盃大軍而拒絕轉戰英超
但尋日佢竟然出人意表地宣佈再次退出國家隊
由於佢唔受馬勒當拿重用
覺得同球王於足球理念上有分歧而有咁既決定
(小弟一定搵日開 post 講下單野……)

2)
由於球隊自季中起表現勁插水
拿玻里決定搵鄧納東尼取代列查領軍
另一方面,馬治奧因為膝傷而提早收咧

3)
原來紐卡素於1月曾向熱刺借用侯度史東
不過被哈利列納拒絕後紐記就改買路蘭

另一方面,巴斯桑治透露阿仙奴打算斟酌佢
單野有一定可信性
因為兵工廠防線好有增兵需要
但亦唔排除係這名法國小將提高新約價錢既手段

4)
史浩克04同經理達成解約協議
(覺得炒經理而唔係炒教練好怪?
有機會再講……)

5)
希比表態有興趣轉投拜仁

6)
身為史篤城破紀錄最貴收購(550萬鎊)既傑臣由於徹底死火
最終以借用身份重返雷丁
如果這間倫敦球會如願下季重返英超
仲會於暑假買斷佢

p.s.:
面對種種不利因素
摩連奴一於少理
既搵人代佢否認講過話會教曼聯
仲秘密搵菲臘仔飲野攞料
(唔通斟佢去國米咩?!)
菲臘仔究竟係出賣費 sir 同埋當年一班好兄弟?
定係大放流料俾摩佬?
今晚奧脫福搵答案!

2009-3-10

近兩日既新聞......

1)
利物浦同科威特財團繼續傾入股
後者拒絕透露收購股份既數量

2)
列基美透露於1月拒絕一間英超球會既邀請
原因係認為留於小保加發展對佢入選南非世界盃有幫助

傳聞當時紐記打算先借用佢半季
再於暑假買斷佢
亦有版本指曼城或者熱刺先係真正買家

另一方面,雖然馬田斯第 n 次被指成為阿仙奴既增兵人選
不過佢表示如果紐記護級成功
佢會好樂意同紐記續長約

3)
消息指堅尼亞將復出領軍既日期延後1星期
即係18/4對熱刺既比賽

4)
拜仁同埋巴塞隆拿同時否認
列貝利已同後者簽左加盟協議書

5)
利華古遜透露巴尼達成為幾間英超球會既羅致對象
傳聞阿仙奴好想羅致這名身價1500萬歐元既瑞士中場

6)
托利斯即將以9萬鎊週薪既條件同利物浦續約4年
佢岩岩可以跟足球隊練波
有望列入對皇馬既大軍名單
不過班拿約同埋尼亞拿就肯定因傷同埋停賽而缺陣

7)
利物浦將於暑假再為列圖申請工作證

8)
施素高因傷提早收咧

9)
哈化柏林被指想向費倫天拿收購秘魯後衛華加斯

10)
雲加否認季尾轉投曼城既傳聞
而曼城亦被指打算以1000萬歐元既價錢收購亨利

11)
28歲瑞典射手派加落實由新特蘭轉投洛辛堡

12)
國米被指想向曼聯出價3000萬鎊收購維迪同埋伊雲斯
(擺明玩野!)

13)
傳聞昆士伯流浪想向熱刺借用根達
而列斯就想向曼聯借用李馬田

14)
維拉再次被指將於季尾收購賓尼

2009-3-8 (2)

紐迷Ricky早幾日留言話對英超護級形勢有興趣
今日終於有時間簡單講下

睇左英國波超過廿年
以今季既護級形勢最緊湊
尾二既米堡同排第8既曼城只係相差9分
即係只係羸3場波既分數
所以除左表現超唔掂既西布朗之外
冇一隊中下游球隊已經被判死刑(不過亦未肯定上岸)

假設護級既最低要求係40分
曼城主場攞分有保證
熱刺就勝在炮手多
而所有盃仔出局後可以集中精神護級
加上兩隊既人腳又係中下游球隊當中最好
降班唔輪到佢地

韋根雖然驚星散同埋布魯士跳槽
而富咸雖然主場威力近期蕩然無存
不過由於雙雙於早期已經搶左好多分
所以又係唔憂降班

至於保頓同埋新特蘭兩支護級常客
前者改善左作客成績
後者炒左堅尼之後隊波又生猛晒
亦唔似會降班

餘下由14至19既球隊
就係真正仲未上岸既6隊
當中有兩隊就要陪西布朗返落英冠

當中紐卡素人腳比較好
後備兵員亦比較充足
整體表現其實又唔差得過其餘隊手
而侯頓臨危受命都唔見做得好差
只要作客侯城同埋史篤城兩場6分波大戰都生性
降班機會唔大

布力般搵到 Big Sam 接手
佢既功力絕對在其他護級行家之上
加上前線炮手多
就算而家排尾3(不過踢少場)都唔使太擔心

餘下侯城,史篤城,樸茅同埋米堡就幾危......

侯城雖然上場成功止血
不過後防唔掂
前線又冇士哥手
文路祖唔知最終有幾多貨交
絕對係前面冇殺手,後面冇防守既例子

而基奧雲尼已經冇貨交兼入埋冷宮
保拿特500萬鎊高價轉會後只踢左30分鐘就要長抖
陣中冇一個擔大旗既大哥就令球隊冇左隊型同埋重心
即管睇下布朗搞成點

史篤城打正旗號靠拚勁
不過只係識靠主場搶分
佢地作客14場只得4分既差劣表現
從來唔可以於成功護級既球隊身上搵到

而樸茅炒左阿當斯之後
球隊既表現明顯好左
不過老闆想賣盤難免亂左軍心
加上蘇金寶等老鬼有時明顯力不從心
不過小弟都唔排除佢地既經驗於關鍵時刻發揮作用

而米堡就最衰海鮮波
佢地又'百冇'
冇防守,冇殺手,領隊冇料兼冇火

4隊當中
小弟比較睇淡(兼主觀希望)米堡
因為睇佢地好多時都睇到發火
兼且開季至今既整體表現唔值得護級成功

至於第3個降班名額
關鍵係樸茅可唔可以持續回勇
因為如果佢地上返力
侯城同埋史篤城唔似係佢地0個皮
但而家都仲要觀察下

2009-3-8 (1)

近3日既新聞......

1)
曼城被指想出1億鎊既天價收購美斯
但當時人已經表明想踢巴塞隆拿踢到收山

2)
AC米蘭已經同洛杉磯銀河達成協議
碧咸願意減薪繼續以借用形式效力紅黑兵團到季尾
而萬人迷將於7月18號重返銀河
為佢地踢埋美職聯餘下既比賽

另一方面,當路雲將於下星期重返洛杉磯銀河

3)
特拉布宗攻擊球員耶達拉被指成為皇馬既增兵對象
這名28歲畿內亞球員可踢右翼同埋進攻中場
羅馬,車路士,馬賽,加拉塔沙雷都希望羅致這名綽號’畿內亞朗拿甸奴’既球員

4)
傳聞奇連士文將會離開拜仁
漢尼斯率先表態撐佢
而當時人亦否認下季加盟曼城既傳聞

5)
維度卡再受腿筋以及鼠蹊既傷患困擾

6)
華倫負債高達4億5000萬歐元
可能要於暑假賣走主力還債

7)
皇馬引入19歲厄瓜多爾中場蒙迪路

8)
英國傳媒指熱刺將向波爾多提出以500萬鎊既價錢引入查馬克

9)
維拉被指將於季尾從曼城引入赫特

10)
保羅費拉拿因為膝部韌帶撕裂而提早收咧

11)
紐卡素收購 C.Ferriera 一事最終因為護照問題而擱置
不過消息指紐記希望於暑假落實引入這名18歲巴西射手

12)
賓菲特既23歲阿根廷中場 N.Bertolo 被指成為祖雲達斯,拉素同埋曼聯既增兵對象

13)
高漢同埋施拿都被指成為拜仁新翼衛既人選

14)
英國傳媒指祖雲達斯想以600萬鎊既價錢引入迪高

2009-3-5

1)
利物浦好可能再於暑假訪問亞洲
消息指佢地將於7月17至26號訪問泰國,新加坡同埋香港
佢地已經同香港足總接觸
如果成事,香港足總將會派香港代表隊迎戰

2)
科威特財團透露由於兩個美國老闆叫價5億鎊實在太高
所以收購成事既機會好低

3)
加利安尼公開表示如果AC米蘭入唔到前3
安察洛堤就要落台
而意大利傳媒估計列卡特最有可能取代肥安

另一方面,查迪亦被指成為紅黑兵團既新中堅人選

4)
艾殊利高爾因為酗酒同埋妨害治安而被捕
稍後已經獲釋既佢被罰款80鎊

5)
熱刺被指可能以500萬鎊既價錢將侯度史東賣到富咸
而佢地亦可能將威爾斯二閘球員根達借到普雷斯頓

6)
繼耶高保同埋艾迪達之後
安尼捷比成為最新一個提早收咧既愛華頓球員

而拖肥糖就同年青中場 J.Baxter 續約兩年半
這名17歲球員早前打破球會最年輕出場紀錄

另一方面,佢地被指打算向西布朗出價500萬鎊收購格寧

p.s.:
1)
紐記對曼聯既表現不過不失
雲達沙既不失球紀錄都俾佢地終止埋
最終輸波都攞返唔少面子

不過兩個泰萊陀衰家
史堤芬都可以話勤力但冇運
不過同C7幾乎搞出事
有冇於球員通道嘈過交亦係冇人知

不過點衰都唔夠賴恩咁衰
居然夠膽死隔咁遠用心口玩回傳
當年卡路士都試過咁樣中招
小弟睇見佢咁送禮真係嬲到嘔血咁滯

森巴足球上身既仲有巴斯桑治
條友兩次學人引球殺出重圍都幾乎出事
堅尼亞睇住電視隨時俾佢激到又入廠

2)
尋晚幾場波都不乏冷門賽果
英超主場戰績排第2既富咸主場對連續18場冇波贏既(紙)老虎
居然可以臨天光賴尿
不過千祈唔好睇小佢地
今場留少少力可能下場對曼聯既足總盃賽事就來料

另一方面,米堡就好快打回原形
作客白鹿徑竟然成為熱刺冇左聯賽盃既出氣袋
吞足4隻光蛋
好難想像佢地幾日前可以打瓜利記

米堡海鮮波到得人驚
防守有時連英冠水準都冇
名氣射手又全部冇貨賣
領隊又冇料兼冇火
佢地如果最終降班都死不足惜

2009-3-4

1)
傳聞巴塞隆拿將於季尾用希比再加現金
向拜仁收購列貝利
德國傳媒更指這名法國球員已經同巴塞隆拿簽左協議書
答應以800萬歐元既價錢簽約4年

2)
AC米蘭希望先借用碧咸到季尾
然後再正式買斷佢

3)
華倫西亞方面透露賓尼迪斯想搵舊部屬艾比奧爾合作
西班牙傳媒指這名24歲球員約值1300萬鎊

4)
雲加堅持加拿斯唔會離開阿仙奴

另一方面,兵工廠被指想以200萬鎊既價錢向喜伯年收購 S. Bamba
這名24歲科突迪瓦後防球員可以踢中堅,右閘同埋防中3個位置

5)
京治表示可能因為傷患而提早掛靴

6)
熱刺再次被指將於暑假收購唐寧
而賓特尼就被指成為維拉1200萬鎊既增兵對象

7)
AC米蘭希望先借用碧咸至季尾
之後放佢同洛杉磯銀河踢埋球季餘下既比賽
再於出年1月正式收購佢

8)
奧地利足總決定開除布克拿

9)
國米被指將於季尾從卡利亞里回收艾基費斯卡
而消息指辛達告魯斯可能以自由身轉投博洛尼亞

10)
保頓決定同加利麥臣續約

11)
沙利荷域因為左膝韌帶受傷而要抖4個星期
而卡拉迪斯更加因為同類傷患而要提早收咧

12)
加拿斯同埋漢基蘭都被指成為曼城既新中堅人選

p.s.:
紐記,今晚拜託晒!

2009-3-3

利記與皇馬……

利記同皇馬返到本身聯賽即刻’轉運’
利記作客近況差到貼地既米堡偏偏食煎雙蛋
皇馬作客岩岩打破巴塞隆拿主場不敗既愛滋賓佬
就幾經辛苦羸兩粒

利記輸波既原因有幾個
一係本身踢得唔好
特別埋門把握超唔掂
近兩場唔見5分
某程度上(特別係今場)同冇左個射手有關
艾沙亞有潛質,冇經驗
連翩失機都唔怪得佢太多
要怪反而應該怪賓帥於冇補貨既情況下就賣走羅比堅尼
難為佢仲好意思賴托利斯只係踢過11次正選係球隊爭唔到聯賽既關鍵

利記今場多左謝拉特
組織攻勢既能力係強左
不過對住表現有改善既米堡
始終好難踢到水銀瀉地
加上米堡今場有少少運
雖然講表現利記都值得有1分落袋
不過輸波都唔係咩野奇事

二係體力問題
利記ko皇馬羸在體能同埋速度
但來回英國同埋西班牙兩地後
仲要作客東北部球隊
體能即刻打個5折

三係賓帥既排陣有問題
史基泰爾踢右閘放生左唐寧
左路既奧拿里奧助攻力強
不過上左去好多時都返唔切
而巴布又近乎唔會回防
令艾里亞迪里有機會於加路快放助攻

另一方面,老狐狸拉莫斯上任後
令皇馬先做好防守再搵機會入波
面對速度同埋體能都只係一般既西甲對手
就算佢地整體上既表現仍然有幾大既進步空間
都可以靠個人質素慢慢搵機會解決對手

而近兩場既腳下敗將貝迪斯同埋愛滋賓佬
早前先令巴塞隆拿吃盡苦頭兼跌左5分
某程度反映左皇馬既近況比巴塞隆拿好得多

巴塞隆拿近期於西甲仆直
明顯因為防線出左問題
防中出身既哥迪奧拿絕對有能力改善球隊既防守
不過此刻同樣重要既係要令隊波唔好陷入信心危機
對於經驗不足既佢而言
絕對係一大考驗

想後來居上
先要做好自已再寄望領頭羊失分
皇馬而家就做緊示範
但而家既利記似乎唔可以效法皇馬
一來曼聯既走勢仲未放緩
(此終會放緩,不過真係唔知幾時……)
二來利記以最近既表現
往後比賽失分機會其實比曼聯更高
有軒迪克執教既車仔似乎比佢地更似一個後上既爭標者

p.s.:
有兩場波有少少野想講
一係保頓對紐卡素
後者近日幾傳想引入列基美同埋拿臣
從今場波紐記大打亂章來睇
紐記似乎比較需要一個派到牌既球員
多於一個有二傳能力既前鋒
當然列基美岩唔岩踢英超好成疑問
既然傳聞熱刺考慮出售摩迪歷套現
堅尼亞同埋林比亞斯不妨考慮下這名克羅地亞國腳
(韋斯應該冇份唸因為暑假期間佢應該走左……)

二係曼聯對熱刺
正如哈利列納所講
(雖然對方今場用科士打,而唔係雲達沙)
一射12碼已經知冇好下場
因為畢竟熱刺冇擅射12碼既球員
老列納就話同曼聯球員大賽經驗多有關
小弟同意佢所講
不過熱刺對住曼聯既然都係搏偷雞
冇理由唔操定12碼掛

曼聯牌面比較高
龍門教練都識得用 i-POD 儲定熱刺球員射12碼既片段

熱刺已經唔夠人好
又唔齊腳
準備得又冇對手咁細心
點羸呀?

2009-3-2

1)
皇馬想搵施丹下季回巢出任搞青訓

2)
加利安尼表示會由時間監督球隊操練
意味肥安已經得唔到佢既信任

3)
消息指哈利列納將於季尾換血
名單包括摩迪歷,杜斯山度士,贊拿斯,賓尼,巴里,侯度史東同埋戴倫賓特
其中摩迪歷一直被指成為國米同埋祖雲達斯既增兵對象
而杜斯山度士就表態想重設巴塞隆拿

4)
蘇金寶被傳將於季尾以自由身轉投摩納哥

5)
紐卡素被指想搵自由身既拿臣即時加盟
而加利卡希爾同埋鄧尼就被指成為紐記既新中堅人選

另一方面,傳聞布力般流浪將出價400萬鎊收購辣椒仔

6)
有報導指基瑾願意唔要紐記賠償佢900萬鎊
但條件係於韋斯離開後
kk可以重新執教紐記
亦又報導指韋斯無論任何情況都會於季尾離開紐記

7)
希比被指將於季尾離隊以尋求更多既出場機會

8)
古治希望於賓帥落實留隊後
先繼續同利記傾續約

9)
基斯普表明會於季尾離開國米

10)
曼城再次被指將出價收購高路托尼

11)
列卡特再次被指將於季尾上車
而馬路達就威脅會為爭取更多出場機會而離隊

p.s.:
好累!
賽後感聽日先講......

2009-3-1

1)
阿古路被傳將於季尾被馬體會高價賣走

2)
傳聞球員未得到奇連士文同意就決定加強防守
令佢好冇癮而想轉投曼城
不過曼城已經否認有關傳聞

而曼城被指想用羅賓奴同車路士交換泰利
再從拜仁收購列貝利以取代前者

另一方面,佢地被指將同車仔爭俄羅斯左閘施哥夫

3)
雲邦美好可能於季尾以自由身重返燕豪芬

4)
軒迪克拒絕回應長期執教車路士既傳聞
另一方面,傳聞油王打算安排艾禾卡特接手俄羅斯
以方便軒迪克長期教車

5)
曼聯被指打算向C7開出20萬鎊週薪既新合約

6)
巴塞隆拿被指將於季尾收購賓施馬

7)
傳聞AC米蘭想搵史巴利堤取代安察洛堤

8)
華倫西亞被指想向利物浦收購禾朗連

9)
竟然有傳聞指紐卡素想斟酌列基美
不過這名阿根廷中場已經表明只想於未來幾年留於小保加

10)
祖雲達斯,曼聯同埋巴塞隆拿都被指有興趣從國際隊引入20歲射手禾達

11)
拉素被指將會以380萬鎊既價錢從學生隊收購後衛安加利尼

p.s.:
1)
佩利雖然會於季尾離隊
但原來唔代表賓尼迪斯個位好穩
英國傳媒爆料兩位美國老闆想搵摩連奴取代賓帥

適逢作客米堡都竟然可以輸兩球
已經比曼聯失多10分
聯賽榜跌落第3位
亦只比維拉失少1分
如果歐聯有咩閃失
賓尼迪斯俾兩個美國老闆踢走埋都唔係奇事

2)
賽後感聽日再講