又想講下東北部護級雙虫......
先講米堡
佢地真係廢到令小弟失望
英超班底但英冠水準
佢地作客輸俾英超其中一隊主場王史篤城真係唔令小弟意外
講機會米堡於比賽頭2/3既時間真係比史篤城多
不過唔好見佢地入唔到波就無知到話佢地唔夠運
佢地近兩季既埋門把握絕對唔似英超球隊
上季煞科戰如果唔係有絕大部份時間人多打人少而炒左殘陣既曼城7:0
佢地平均每場連一球都入唔到
點知今季依然冇改善
而後面又係冇防守
幾年件高佬中堅打籃球嫌佢地矮
踢波又嫌佢地轉身慢,冇腦兼冇腳法
季尾轉行打摔角可能反而有運行
皆因唔使點用腦
傳聞利記想趁米堡降班而引入韋達
賓帥真係要三思而後行
而冇埋舒華沙仲令防線雪上加霜
代替保定踢防中既迪加迪又打埋柴
連個防守屏障都冇埋
成條防線結論又係英冠水準
有時失波後即刻散晒就仲令人扯火
成隊波比較似樣既只有3個中前場技術型球員
不過唐寧踢一場好波又沉返幾場
莊遜有波底又夠膽上腳
不過就衰唔夠件頭而有時怯於硬朗攔截
最好既始終得一個端基
這名好鬥志既土耳其球員絕對係近年最好波既米堡球員
踢輔鋒同埋進攻中場都有一手
可惜合拍無人
不過班波點廢極都唔夠修夫基咁廢
睇佢既眼神已經知佢等緊季尾切腹謝罪
暑假之後如果佢失業後無所事事
不妨睇下洛奇第3集'Eye of the tiger'
見到隊波唔掂都依然粒聲唔出既人通常可以分兩類
第一類係從納比同埋軒迪克既眼中睇到既淡定有錢剩
第二類就係修夫基眼中既無奈
見端基仲肉緊過佢
唔知既話隨時以為佢係領隊兼球員
之前分析護級形勢
印象中唔止一個人話唔想米堡降班
睇完尋晚場波既人
應該會明點解小弟將米堡列為第2號降班熱門
米堡死不足惜冇所謂
不過死都累街坊就抵俾人狂小
佢地好輸唔輸
6分波大戰輸俾另一降班熱門史篤城
就令到尋晚踢左至少半場好波既紐記仲大鑊
紐記尋晚雖然輸波
不過表現絕對係近期最好既一場
而兵工廠上半場中場大塞車
左右兩邊既艾沙維同埋拿斯尼過多時間移入中路
解釋左紐記上半場既入波機會點解仲多過兵工廠
不過馬田斯12碼宴客
亦同埋盧雲卡蘭斯先後失機
埋下輸波伏線
史堤芬泰萊上半場既超水準先後救左紐記兩次
夏柏亦有少少運擋住雲佩斯既單刀波
但紐記從來都唔擅長防守
要夏柏對住兵工廠先有 clean sheet 真係強人所難
下半場防線打回原形既紐記最終走甩左對手既高大箭頭賓特拿
而史堤芬泰萊既傷出亦簡接導致球隊連失兩球
輸到1:3後既紐記又一如以往咁散晒
如果唔係夏柏 keep 住有水準演出
加上全場門框幫紐記擋左兩次煞
佢地隨時繼12月尾後又一次於主場兵敗如山倒
講開佢地條防線
其實而家隨住比耶復出
曉頓同埋卡達活(甚至堅尼亞)可以考慮將史堤芬泰萊重新移入中路
以取代表現同身價不符既高路仙尼
阿根廷人絕對係繼保桑之後另一個高薪低能既紐記中堅
紐記而家仲有8場波搶分
對車仔同埋利記無錯係特別難踢
不過對熱刺,富咸同埋維拉
都可能因為對方到時冇咁好鬥心而偷到雞
而仲有3場鬥史篤城,樸茅同埋米堡都係6分波大戰
當中對後兩者都係主場出擊
命運總算在自己手中
如果佢地既中前場keep到尋晚失波前既水準
以佢地中前場有咁多高質素炮手
加上巴頓同埋格夫里等人將陸續候命
小弟對佢地既護級前途依然審慎樂觀
執筆之時
踢少個既新特蘭作客曼城
12碼都輸唔去亦唔似可以全身而退
勢必被拖埋落水
如果唔係西布朗已經 book 左一個降班席位
東北部3隊一齊降班既話都幾經典
p.s.:
曼聯pk同埋車仔拋錨既賽後感
等埋利記撲殺落水狗維拉(小弟今日既願望)後先講
今晚利記捉到鹿記得要脫腳
2 comments:
馬田斯十二碼雖然宴客，但全埸表現咁生，隊波上半埸咁多攻勢都係佢既功勞，加上快腳射入既一球，總算將功補過。
夏柏交足功課，史堤芬泰萊救左兩球必入球，加上巴桑未傷出前穩住條防線，令對面無咩機會，都值得一讚。
畢特同路蘭一守一攻，畢特清左唔少波，路蘭復出雖然唔算表現好好，但都叫做平穩。
安歷基頻頻助攻，表現一埸比一埸好。
其餘果d普普通通，唔計高洛仙尼條友仔。
條友點衰，都唔洗多講。
反而想講講侯頓，對親強隊都有好表現。對曼聯係咁，對阿記又係。棄用無態既奧雲打正選，雖然代替既路雲卡蘭斯唔係打得好出色，但同馬田斯拍得幾好，值得一讚。
不過唔用古迪利斯，就有少少令小弟意外。雖然佢出波係唔多掂，但今埸代替佢既杜夫或者係賴恩泰萊，係今埸傳中都唔見出色。反而復出既比耶落埸後第一腳傳中仲有威脅。
點都好，情況係危險，但都要支持架啦~
p.s.恭喜網主，利記又發威，英超真係未到最後都唔好咬定邊隊係冠軍。
To: 舒利亞
1)
小弟始終覺得紐記有本錢護級成功
2)
多謝晒
近個幾星期
係小弟近幾年睇利記最快樂既時光
3)
不論冠軍同埋護級
似乎真係好有可能鬥到最後一輪聯賽
Post a Comment