2007-8-31 (2)

1)
簡拿高普路斯拒絕加盟錫菲聯

2)
傳聞樸茨茅夫亦想出手簽梧連莊臣
佢之前分別同維拉以及紐卡素扯上關係

3)
碧咸證實要抖大約4個星期

4)
曼城落實簽泰國後衛 Suree Sukha

5)
韋根落實借用查爾頓既M.賓特

6)
戴維斯同維拉簽約4年
佢既轉會費高達850萬鎊
但之後再視乎情況最高加至1000萬鎊

唉!利物浦未買到中堅
維拉就一日買兩個......
:-(

7)
傳聞如果米杜士堡簽唔到森瑪拉斯
就會改為向紐卡素出價買艾美奧比

2007-8-31 (1)

1)
歐聯分組抽籤既結果如下:

A 組: 利物浦、波圖、馬賽、比錫達斯
B 組: 車路士、華倫西亞、史浩克 04、洛辛堡
C 組: 皇家馬德里、雲達不來梅、拉素、奧林比亞高斯
D 組: AC 米蘭、賓菲加、些路迪、薩克達
E 組: 巴塞隆拿、里昂、史特加、格拉斯哥流浪
F 組: 曼聯、羅馬、士砵亭、基輔戴拿模
G 組: 國際米蘭、燕豪芬、莫斯科中央陸軍、費倫巴治
H 組: 阿仙奴、西維爾\AEK 雅典、布加勒斯特星隊、布拉格斯拉維亞

2)
曼城既米斯以借用身份重返查爾頓

3)
安歷卡同保頓續約4年至2011年
佢今次續約對幾支搵緊射手既球隊都有影響

對曼聯而言
安歷卡同貝碧托夫選擇留隊
佢地既目標就只剩下馬田斯
唔通真係被小弟估中佢地最終簽到既係迪科爾

對樸茨茅夫而言
簽唔到安歷卡
就梗係唔放走紐根特啦

對曼城而言
簽唔到安歷卡同埋哥治
森莫拉斯同華素爾又有機會分別過檔米杜士堡同埋韋根
所以應該會買多個前鋒

而家同曼城仲扯上關係既就只有
阿祖安奴同埋艾交達
不過前者唔多似肯屈就
所以小弟就覺得後者既機會都幾高
因為圖盧茲已經於歐聯分組賽出局
搵少好多錢
而家搵個好價錢賣左佢
對球員同埋兩間球會都有利

4)
加維臣以借用身份重返愛華頓

5)
古華特以自由身加盟里爾

6)
前阿仙奴副主席甸恩出售14.58%既球會股份
比一間英,俄合資,叫做 Red and White 既公司

而阿仙奴既營運總監就對外表示
球會既財政狀況OK
唔需要外來既資金
暗示唔使接受外國財團既收購

7)
雷丁通知左韋斯咸
如果佢地想簽索尼
就要付出700萬鎊

8)
伊度奧於對國米既友賽大腿受重創
要缺陣兩個月

9)
賓尼迪斯表示
由於搵唔到適當既人選
同埋唔想付出過高既價錢
於轉會期限前
球會多數買唔到人

之前傳過利記開價800萬鎊既戴維斯
而家已經同維拉傾緊個人條件
因為維拉既900萬鎊開價
已經被西布朗接受

而原來利記曾對烏化奴斯作出斟酌
但當事人同屋企人商量後
決定留於意大利生活
同埋就算走
亦只願意搬去西班牙
佢已經透過經理人拒絕左利記

但小弟覺得
賓尼迪斯應該仲未放棄
因為佢自己都知球隊唔夠中堅用
咁講似乎係為萬一搵唔到人
而比所有人一個心理準備

10)
傳聞車路士開價800萬鎊
再加埋保羅費拉拿
向波圖買哥利斯馬

但小弟覺得機會唔大
因為如果車仔真係咁做
車路士未必夠右後衛用
因為格連莊臣既離隊機會幾大

2007-8-30

1)
利物浦既奧地利小將Idrizaj
以借用身份加盟水晶宮至季尾

2)
碧咸可能因膝傷而要抖6個星期

3)
米杜士堡繼續增兵
目標有查路錫同埋森莫拉斯

4)
赫斯想搵前鋒
目標有利物浦小將拿泰歷
同埋前紐卡素,好廢但又好貴既射手確特

5)
耶高堡落實加盟愛華頓

6)
比爾極有機會加盟紐卡素
轉會費為200萬鎊
成事既話佢會簽3年約

7)
西班牙傳媒報導
列基美即將加盟馬體會

8)
新特蘭一口氣簽得三位球員加盟
包括希堅保咸,夏迪同埋鍾斯
為左簽到後者
堅尼不惜出價600萬鎊再加上約翰作交易既一部份

9)
西維爾通知歐洲足協
歐聯超級杯賽事可以如期進行

2007-8-29

1)
於上對基達菲時心臟病發既西維爾後衛佩亞達
搶救3日後終告不治
終年22歲
佢當時突然病發暈倒
雖然醒返自行返回更衣室
但之後又再休克
送院急救延至尋日不治

西維爾尋晚既歐聯外圍賽因佢既離世
而改期至下星期一
AC米蘭亦同意將週五既歐洲超級杯延期
而佢地下場對奧沙辛拿既聯賽亦相信會延期

2)
新特蘭既韋赫特同埋韋斯咸既戴亞都因傷而要長抖

3)
樸茨茅夫既領隊哈利列納改左口風
表示如果球隊可以買到安歷卡既話
唔排除會出售紐根特以套現

4)
傳聞莫達會由巴塞隆拿轉投馬體會
轉會費約為350萬鎊

5)
施蒙尼恩沙基以借用身份加盟阿特蘭大

6)
甘保可能加盟錫菲聯
之前就有傳聞指錫菲聯亦睇中佢既隊友簡拿高普路斯

7)
路蘭同愛華頓以及米杜士堡都扯上關係
當中以加盟前者既機會比較大

8)
再有其他球隊同阿祖安奴扯上關係
當中包括韋斯咸,米杜士堡同埋拉素
但前者已經被阿祖安奴拒絕

9)
傳聞熱刺向布力般流浪開價1000萬鎊買柏達臣

10)
格連莊臣繼同維拉扯上關係之後
又被傳成為 Big Sam 既目標
因為 Big Sam 想簽佢去代替要抖個幾月既卡爾

11)
利物浦尋晚於主場輕取圖盧茲4:0
兩回合合計羸5:0晉級分組賽
古積特,哥治同埋列圖等球員都有好表現

賽前有儀式紀念日前被槍殺既愛華頓11歲小球迷 Rhys Jones
而Rhys Jones 既屋企人都有出席儀式

賓尼迪斯表示佢除左為這件事之外
亦為西維爾後衛佩亞達既離世感到哀傷

12)
賓尼迪斯拒絕賣哥治去曼城

另外西班牙傳媒指巴迪斯達可能加盟利記
轉會費仲高達1350萬鎊

但小弟覺得報導既可信性好低
因為賓尼迪斯既然冇賣走哥治
根本唔使買個前鋒返來
而賓尼迪斯而家集中搵既一定係後衛先
仲有既係就算係買巴迪斯達
都唔使咁貴
因為800萬鎊已經係一個足以令皇馬放人既價錢

13)
曼聯肯定會買前鋒
仲先後同安歷卡,馬田斯,貝碧托夫同埋阿祖安奴扯上關係
當中以前者既機會最大

但小弟覺得其實最終成魔既可能係
岩岩同維拉扯上關係既迪科爾
佢成日被人傳會離隊
又唔係冇質素
費格遜最終打佢主意絕對唔會令小弟意外

2007-8-28 (2)

1)
利物浦積極搵新中堅
傳聞最有機加盟既係居迪戴維斯
據報利記願意出價800萬鎊
佢同埋米卡李察士
被評為英格蘭本土最有上位希望既中堅

佢高昂既轉會費一直都係佢轉唔到會既最大阻礙
上年阿仙奴曾出價500萬鎊
但西布朗還價1500萬鎊令交易告吹
之後有好幾間球會依然想簽佢
包括有死心不息既阿仙奴同埋曼城

近來就有維拉同埋熱刺
不過前者兩度出價600萬鎊同埋800萬鎊都被拒
最終改以400萬鎊買富咸既禮特
後者據報既出價由最初既700萬鎊
加到岩岩既1000萬鎊
佢而家係利記既最大競爭者

2)
維拉除左買左禮特
亦準備再買多個右後衛
當中以車路士既格連莊臣最有機會加盟

3)
蘇斯克查宣佈退休

4)
阿祖安奴同曼聯,曼城,阿仙奴,華倫西亞同埋帕爾瑪都扯上關係
但佢表明唔接受以借用身份加盟
而國米又嫌華倫西亞既1000萬鎊出價太低

5)
雷丁拒絕左韋斯咸對索尼500萬鎊既出價

6)
韋根依然嫌前線火力唔夠
所以想簽同曼城扯上關係既紐奴高美斯
佢因為得到賓菲加准佢自由轉會
所以對冇咩錢用既韋根而言係好吸引

7)
傳聞皇家蘇斯達想向利物浦出價200萬鎊
買同球會只餘下一年合約既基維爾

但小弟覺得之前維拉打佢主意佢都唔肯走
而家邊有理由會願意加盟皇蘇呀
唔通想幫人爭返上西甲咩

2007-8-28 (1)

1)
肋骨骨折既加歷查
賽後仲證賽氣胸同埋肺部都有損傷
賓尼迪斯之前表示佢既傷勢有好轉

英國有傳媒稱
當事人既情況唔算太嚴重
仲話佢因為下週英超會因國際賽而暫停
所以希望只在對圖盧茲同埋打呲既比賽休息
之後趕及於15/9作客樸茨茅夫既比賽復出

但官網直到目前為止都冇講過究竟佢要抖幾耐

2)
巴塞隆拿否認細哨會以4000萬鎊既價錢加盟車路士

3)
樸茨茅夫既領隊哈利列納證實
岩岩加盟既射手紐根特成為打呲耶既增兵目標
打呲郡既領隊比利戴維斯
同佢之前曾經於普雷斯頓合作
但哈利列納表明佢冇意思賣走佢
仲話希望佢耐心等待機會

另一方面
莫斯科中央陸軍既杜杜
據報就幾有機會加盟

2007-8-27 (4)

1)
賓尼迪斯表示謝拉特同埋加歷查都會缺陣
聽晚利物浦主場對圖盧茲既比賽

前者將會keep住訓練
睇下可唔可以於對打呲既比賽復出

而後者既傷勢有進展
對小弟而言係兩日以來既最大喜訊
:-)
賓尼迪斯表示要同醫生了解多0的
先知佢要抖幾耐

由於希比亞既鼻骨傷患係於偏右既位置
所以佢可以侯命
而賓尼迪斯表示佢亦可以將艾比路亞移入中路
佢兩個既其中一個將會拍住艾加

2)
由於卡爾同埋藍瑪治既受傷
Big Sam 表示佢可能會再買人

3)
摩連奴表示車路士唔會買人
但就暗示可能會有後衛會離隊
英國傳媒指最有機會既應該係格連莊臣

4)
捷克後衛柏拉斯由摩納哥
轉會到奧沙辛拿

2007-8-27 (3)

尋晚有線原本話會直播巴塞隆拿作客桑坦德既賽事
點知臨場就話因為轉播權未傾掂
場波冇得播
改播上季巴塞隆拿主場對皇馬既賽事

有線究竟搞咩架
類似既事件由15/8到尋晚已經試過3次

之前圖盧茲對利物浦同埋星期六晚既馬德里打呲
就話衛星有問題
搞到唔比錢上網非法睇既反而有得睇

佢地而家已經被Now搶左好多客
就唔該0的服務好0的啦
衛星出左事小弟都覺得佢地冇野可以做
(如果屬實既話......)
但尋晚場波
佢地唔會臨開波先知轉播權傾唔掂呀
好彩場波唔係好夜播
如果3點幾4點突登起身
先發覺冇得睇
唔嬲至奇......

比咁貴睇有線
但冇左英超,意甲又冇左好多好睇既比賽......
班講波佬既整體水準又唔多掂
而家仲臨場隨時冇得睇
真係冇隱

唸返轉頭
有時免費睇TVB
只係要聽鐘志光講波
其實已經唔係好慘
因為最多唔開聲睇波......

2007-8-27 (2)

1)
上星期五朝講盧基可能會去貝迪斯
點知星期五晚佢落實去阿積士
小弟由於冇電腦用
冇得update
真係唔好意思

(不過尋晚終於買左部腦
類似既情況應該唔會再出現
HeHe......)

2)
傳聞國米會買個中場指揮官
波歷克同埋迪高而家既呼聲最高

3)
艾歷臣表示由於對小舒米高有信心
所以唔會搵新龍門
佢地而家集中搵多個射手
紐奴高美斯同埋巴迪斯達都係熱門人選

4)
盧辛可能由馬體會加盟伯明翰
而前者之前已經將哥斯天拿賣去阿特蘭大

佢地而家陣中只餘下兩個比較好既防中
分別係魯爾加西亞同埋文尼捷
小弟覺得咁樣似乎唔多保險

5)
熱刺戰績唔掂
某程度同後防唔掂有關
所以傳聞佢地向西布朗出價1000萬鎊
買居迪斯戴維斯
以加強防守能力

6)
由於麥比迪要抖成3個月
傳聞富咸打算向摩納哥開價200萬鎊
買真高拿以維持火力

7)
史堤芬奴域可能加盟格拉斯哥流浪
哈利列納表明將會比佢自己決定

2007-8-27 (1)

過去兩日突然間多左好多波睇
因為意甲同埋西甲都開鑼

但想講既只係兩場有球員出事既比賽
第一場係愛隊利物浦作客新特蘭
另一場就係西維爾對基達菲

1)
利記一場波就冇左兩個中堅
認真慘情
加歷查被拉爾拿誤傷肋骨
希比亞就被戴利梅菲搞到鼻骨碎裂

後者最初感到左眼視象模糊
不過及後證實冇事
爆左鼻都可以練到波
星期二仲可以落場對圖盧茲

不過加歷查就冇咁好彩
球會發言人就咁講:
"Jamie underwent a series of investigations on Sunday morning
which confirmed he has a broken rib
and has also developed a pneumothorax (氣胸).
He will continue to be monitored on Sunday
but at this stage no further treatment will be required."

小弟之前完全未見過好似 'pneumothorax' 咁深既字
上網睇下就見到更多更深既字眼同埋部份相關情況
睇完心都寒埋

不過小弟又唔多相信會咁大鑊
同埋球會發言人都講冇咩進一步既 treatment 係而家急需去做
所以在此唔準備多講
總之希望佢早日康復啦

小弟唸起首有關佢既歌......
A team of Carraghers

(Melodi: Yellow Submarine)

We all dream of a team of Carraghers
A team of Carraghers
A team of Carraghers

We all dream of a team of Carraghers
A team of Carraghers
A team of Carraghers

Number one is Carragher
Number two is Carragher
Number three is Carragher
Number four is Carragher......

We all dream of a team of Carraghers
A team of Carraghers
A team of Carraghers

We all dream of a team of Carraghers
A team of Carraghers
A team of Carraghers

Number five is Carragher
Number six is Carragher
Number seven is Carragher
Number eight is Carragher......

We all dream of a team of Carraghers
A team of Carraghers
A team of Carraghers

We all dream of a team of Carraghers
A team of Carraghers
A team of Carraghers

Number nine is Carragher
Number ten is Carragher
Number eleven is Carragher
Number twelve is Carragher......

We all dream of a team of Carraghers
A team of Carraghers
A team of Carraghers

We all dream of a team of Carraghers
A team of Carraghers
A team of Carraghers

Number thirteen is Carragher
Number fourteen is Carragher
Number fifteen is Carragher
Number twenty-three is Carragher......

We all dream of a team of Carraghers
A team of Carraghers
A team of Carraghers

We all dream of a team of Carraghers
A team of Carraghers
A team of Carraghers

仲有條片......
http://www.youtube.com/watch.php?v=4tG2QRL1Bpc
(不過條片只得唔夠廿秒)

講返轉頭
佢當日受傷
隊醫同佢檢查之後
(不過原來肋骨傷左係好難就咁 check 到
係要靠 X-ray)
佢最初都有入返場
跟住賓尼迪斯準備叫懷斯出場
不過最初竟然係唸住換走巴布
而唔係換走負傷既佢
就搞到佢好嬲
好彩賓尼迪斯之後睇到佢有事先換走佢
但佢被換出既時候個樣勁惡
從未見過佢咁惡
可想而知佢當時有幾辛苦......

佢同希比亞既受傷
加上柏路達離隊
賓尼迪斯而家表示會買中堅
希望佢搵到件好野啦

2)
西維爾對基達菲
前者既中場佩亞達懷疑因心臟問題
於上半場突然暈左
身體抽搐
仲雙眼反白
雖然稍後轉醒
但佢步出球場後又暈過
需要接受心肺復蘇
仲要送去深切治療部
而家情極為嚴重

小弟覺得踢波搵食
搞到咁真係好冇陰功

03年既洲際國家盃既準決賽
喀0麥隆中場科爾於比賽中瘁死
賽會事後表示雖然所有人都勁失落
但佢地對法國既決賽唔會取消

雲加對此表示唔同意
因為生命畢竟比踢波來得重要得多

2007-8-24

1)
利物浦搵左個新中堅
不過只係用來長線投資
這個值40萬歐元既小朋友叫做辛荷西杜明基斯
18歲,來自畢爾包
佢岩岩先代表西班牙出席世青盃

這宗交易原本於5月就完成
但因為傾唔掂轉會費
而之後球員又要出席世青盃
最終拖到而家

2)
列文因為觸傷跟腱既舊患
最少要缺陣兩星期

小弟覺得佢可以趁機醫埋心病啦
開季至今佢衰過幾次
話信心冇受影響小弟就唔多信
希望佢趁機調節0下心理狀態啦

3)
施仙奴最終如願加盟羅馬
因為皇馬要賣佢套現

佢地季前買左太多人
而佢地始終對丹尼爾未放棄
岩岩開價2130萬鎊都被嫌出手低
所以唯有賣埋施仙奴以減輕負擔

4)
基輔戴拿模既會長向傳媒表示
佢地想借用創夫真高

5)
基拿以自由身加盟富咸
佢被富咸視為代替尼美既人選
因為山齊士對華拿同埋巴迪斯達都冇咩信心
其實佢季前既已經積極搵新龍門去取代年事已高既尼美
不過最終都搵唔到
而家連尼美都傷埋
唯有搵基拿頂住

而另一方面
山齊士亦想於 deadline 前買到加維臣

6)
雲加表示冇意思而家任命新既總監
但小弟覺得佢唔任命
好明顯就係未搵岩人
但咁樣只會令佢老人家繼續辛苦

7)
馬達拉斯於對匈牙利0個場波
被撞到不醒人事
之後仲嘔到阿媽都唔認得
而家軍醫仲話佢因為右邊大腿既血管爆裂
而要最多缺陣4個月

小弟覺得佢既缺陣令鄧納東尼同埋文仙尼頭都大埋
因為前者冇左尼斯達,簡拿華路近期又好唔掂
而後者陣中既其他中堅又唔擅長應付高波

8)
意大利傳媒指AC米蘭會於 deadline 前簽亨特拉爾
小弟就覺得機會好低
因為佢今季已經踢過歐洲賽
AC米蘭今季簽到佢都冇用

9)
巴列堤同車路士簽約3年
佢既加盟令格蘭莊臣既出場機會更少
所以有傳佢會以600萬鎊加盟維拉

而維拉亦有其他目標
包括向哥本哈根出價400萬鎊買
曾經同韋斯咸扯上關係既 Brede Hangeland

10)
傳媒盧基會以300萬鎊既價錢
由紐卡素加盟貝迪斯

11)
文迪達否認會加盟美職聯既球隊

但丹尼臣被指於短期內加盟達拉斯

12)
軒斯既經理人表示
曾經唸過安排軒斯先轉會去水晶宮
之後再叫利物浦向水晶宮出價
等後者可以從中賺返少少
而軒斯又可以如願加盟利記

13)
高爾只要過埋體測
就可以落實加盟新特蘭

14)
卡比路否認佢會取代祖爾
成為熱刺既新領隊

2007-8-23 (3)

1)
軒斯最終加盟皇馬
轉會費高達800萬鎊

自從佢既官司敗訴
佢離隊便只可以考慮英格蘭以外既球會
後防勁多傷兵既里昂原本最有機會以680萬鎊簽到佢

但皇馬由於防線唔穩陣
最終決定打軒斯既主意
貪佢夠死纏爛打
最終肯頂爛市,出到800萬鎊
爭羸財政狀況唔算太好既里昂

另外,皇馬亦同車路士
達成有關洛賓轉會費既協議
西班牙傳媒指高達2100萬鎊

不過皇馬搵前鋒就依然未掂
伊巴謙莫域即將同國米續約至2012年
令皇馬既選擇估計只餘下迪亞高米列圖

2)
車路士斟酌丹尼爾失敗
將目標移至巴塞隆拿既巴列堤
西班牙傳媒指轉會費約為360萬鎊
佢將會於今日進行體測

3)
沙拉耶達為左爭取更多既出場機會
決定由祖雲達斯轉會到拿玻里

4)
愛華頓對耶高保既1125萬鎊出價
已經被米杜士堡接受

另一方面佢地同德國門將韋斯治簽約1年

5)
班拿約表示對上陣時間太少感到不滿
佢經理人表示
如果情況持續
佢會寧願改投中型班以爭取更多既出場機會

小弟覺得佢應該耐心等待機會
因為佢既控球能力同埋創造力
應該可以為佢帶來一定既出場機會
而佢既踢法都幾岩踢歐洲賽
至少小弟覺得佢既能力唔會被賓納特差

6)
意大利傳媒指曼城可能打迪拿達利既主意
但英國傳媒就指艾歷臣既目標
其實係安歷卡或者列達
但前者據報亦係曼聯既心頭好

另一方面傳媒指曼城仍未對索尼死心
仲有傳曼城願意向雷丁出價1500萬鎊
一次過買佢同埋列達

2007-8-23 (2)

其他想講既比賽:

1)
挪威主場贏阿根廷2:1
懷斯同埋卡維合力KO左客隊

11分鐘
懷斯於禁區搏到馬斯查蘭奴犯規
卡維主射12碼入網

58分鐘
懷斯開出自由球
卡維接應射入

阿根廷近年其實幾唔重視友誼賽
(其實仲有意大利......佢地尋晚都作客1:3輸左比匈牙利)
對住有0的名氣既球隊通常都冇好下場
結果今場都唔例外

2)
荷蘭作客1:2輸比瑞士
客隊由利記既巴布助攻比古積特入波
小弟覺得
如果前者於利記有更多既出場機會
佢於左路可以既貢獻
可以令利記既攻勢更平衡

3)
有艾加踢足全場既丹麥
於主場竟然以0:4輸比愛爾蘭
係最令小弟感到意外既比賽
有機會既話小弟都想睇下丹麥究竟搞緊咩

4)
葡萄牙作客世界排名只係79既阿美尼亞
竟然只能靠C7既入球
同主隊踢成1:1

聲稱因於英超停賽3場而得到足夠時間休息既C7
成場波好多時都入左中路搵食
但對方球員成場都咁多人回防
真係唔覺佢有好多機會
而其他球員就好明顯未上力
結果破關乏力

但好彩佢地既勁敵塞爾維亞
作客比利時以2:3落敗
令佢地既出線形勢唔算太差
因為而家排分組第二既芬蘭
質素始終只係一般
最終應該出唔到線
而家波蘭既形勢最好
葡萄牙都仲可以同塞爾維亞爭次名出線

2007-8-23 (1)

過去兩日,總共有好多場友誼賽同埋外圍賽
小弟對部份比賽有少少 comment

第一場想講既就梗係英格蘭對德國啦
但唸都唸唔到場波既焦點竟然係兩個門將既蝦碌野

賽前講錯野,好坦白咁指出英格蘭只係二流水準既列文
一如英國傳媒,同好多球迷既期望一樣......出錯!
9分鐘
林伯特接應米卡李察士既傳送
於窄位狂抽
但列文竟然好似個岩岩學守龍門既小學生咁唔識封近柱
真係比佢激死

其實唔計佢近期於阿仙奴既低級失誤
只講國家隊既表現
自從冇左死對頭簡尼同佢爭位
教練路維又公開表明佢繼續會係正選
佢老哥真係好似冇晒危機感
表現有所回落

睇來雲加同埋路維為左各自既球隊著想
應該考慮下雪一雪列文啦
小弟其實覺得列文係一個勁既門將
短期雪藏佢應該可以喚醒佢既鬥心既
因為佢當年都試過被艾蒙尼亞短期取代啦
之後做返正選即刻醒晒

講完列文
就梗係到今場只係踢左上半場既羅賓遜啦
26分鐘
索尼解圍被史路達截左再傳中
羅賓遜因為估計史路達一定會傳中而走出兩三步
但後者唔夠腰力傳中
球波結果好貼門
但咁就搞到羅賓遜失晒位而只能回身將個波勉強擋出
結果就益晒伏兵門前既古蘭爾射空門

而之後40分鐘彭達為德國返超前既世界波
就當然唔會入佢數啦

而另一樣想講既係碧咸
佢第97次為國家隊出賽
結果有輕傷都要捱足全場
其他大會既球員
踢得最耐既球員都只係70分鐘既祖高爾
對比之下好明顯唔多公平

最後想講既就係幾個小弟覺得大家可以留意下既球員:
第一個就係卡斯迪路
佢今場雖然只於比賽尾段入場
但其實擅長踢閘立既佢潛質唔錯
可以客串防中
遠射同埋後上助攻都唔錯
不過德國太多出色既左後衛
佢要上位有一定難度

第二個想講既係彭達
佢今場既世界波技驚四座
其實佢既踢法似卡斯迪路
又係一個有可塑性既新人
佢之前同皇馬曾經扯上過關係
佢最終出國搵食都真係唔奇

第三個想講既係杜查奧斯基
佢出身於拜仁
但為左出場機會而轉投漢堡
佢身材矮小
但腳下功夫唔錯
亦有一定創造力
小弟覺得佢有少少希士拿既影子
中間或者左面都岩佢踢

2007-8-22

1)
皇馬教練蘇斯達最終決定
唔賣施仙奴去羅馬
以確保後防有足夠人腳
但唔受重用既艾瑪臣就落實加盟AC米蘭
轉會費為330萬鎊

而佢要求球會於 deadline 前簽到洛賓
同埋最好再搵多個射手
西班牙傳媒指亨達拉爾,伊巴謙莫域,仲有迪亞高米列圖都係可能既人選
小弟就覺得後者既機會最高
因為亨達拉爾已經為阿積士踢過歐聯既比賽
國米亦唔多可能會開季前放前線最好既球員比皇馬

小弟覺得其實皇馬前線有足夠人腳
只需要時間去培養默契

相反佢地應該唸掂中場既組合
只倚靠迪亞拉一個人專責去做攔截並唔化算
而留用古迪亦好緊要
小弟認為佢係陣中比較適合4-3-3陣式既球員
但可惜佢唔多受重用
而家隨時離隊他投
岩岩就有傳曼城開價200萬鎊買佢

而後防組合亦好難唸
比小弟既感覺係用咩人都死
佢地依然同車路士爭緊捷克新星Suchy
這個19歲既後衛而家效力緊布拉格斯拉維亞

2)
軒斯同曼聯打既官司敗訴
小弟好失望
因為睇個勢
佢加盟里昂既機會幾高
而愛隊利物浦仲可唔可以於 deadline 前搵到其他好後衛
頓成疑問

3)
列基美既經理人證實
熱刺已向維拉利爾開價1000萬鎊買人

小弟向來認為
如果有一個好勁既防中同列基美配合
佢真係可以0係西甲踢到識飛
但問題係如果佢去左比賽節奏快好多既英超
佢跟唔跟到比賽節奏都幾成疑問
而就算得
怕且都要一段時間去適應

小弟覺得如果熱刺用索高拿去 back up 佢
這對組合都幾有睇頭
但似乎真係遠水不能救近火

4)
曼城因為人滿之患
先將年青球員M.米斯外借到當卡士打半年
而老將哥拉迪就可能以100萬鎊既價錢
加盟拿玻里

另一方面,意大利傳媒報導
巴勒莫亦有興趣同曼城爭艾美利亞
仲準備開價600萬鎊
巴勒莫既出手對艾美利亞而言都幾吸引
因為如果佢留低踢意甲
一定比加盟英超
有助佢 keep 住入國家隊

5)
再有消息指列高巴
將以借用身份加盟拖連奴

6)
新特蘭為左強化佢地唔多掂既防線
開價250萬鎊買希堅保咸

另一方面
之前傳過佢地想買修咸頓既射手鐘斯
仲開價500萬鎊
但到而家都未有新進展

2007-8-21

1)
先講幾段關於愛隊利物浦既消息:

a)
佢地否認奧雲會重返球隊
講真小弟都唔想佢返來
因為先唔講之前既恩怨
球隊本身都冇位置安置佢

b)
新加盟既門將伊坦積
表示佢明白自己只會係2號門將
但亦知道佢會於本土盃賽有一定既出場機會

c)
法國球會Grenoble 既17歲中場 Sofiane Feghouli
係賓尼迪斯最近既其一目標

而MTK Budapest 既17歲匈牙利門將 Peter Gulacsi
就以借用身份加盟1季

d)
利記依然未搞掂軒斯0個單野
小弟都好心急
因為利記陣中除左加歷查同埋艾加之外
其實再冇信得過既中堅
希比亞年事已高
柏路達就未入流
而佢兩個亦分別同富咸以及小保加扯上關係
如果利記最終唔能夠搵到好中堅
加歷查同埋艾加今季既擔子將會好重

2)
以下係幾段紐卡素既消息:

a)
蘇蘭奴仲未知走唔走得成

b)
菲爾好有可能以200萬鎊既價錢
由保頓加盟

c)
盧基唔會加盟利雲特
小弟其實覺得佢應該快0的走
因為佢咁好波
真係唔好再浪費光陰於紐記啦
如果佢最終成功加盟飛燕諾都唔錯

d)
Big Sam 繼續搵好後衛
傳聞最新既目標就係菲臘仔同埋耶比斯

e)
柏巴迪奧普獲准轉會
佢最有可能以300萬鎊既價錢加盟紐記
佢係小弟幾鍾意既球員
講真佢好有韋拉當年既影子
除左傳送能力唔算好突出
其餘一個好防中既條件佢都有齊

3)
傳聞維拉開價300萬鎊買阿仙奴既賀迪

4)
國米再次被傳會開價買阿仙奴既小將賓特拿
其實自從上季佢已經同好多間大會扯上關係
不過雲加根本唔會割愛

5)
傳聞曼聯開價1200萬鎊買安歷卡
但亦有傳聞指費sir既目標其實係馬田斯

6)
有傳拉莫斯,哈利列納,納比同埋奇連士文
都係熱刺高層物色新領隊既目標

7)
之前於利物浦對車路士一仗
執法水準奇差既球証史泰奧斯
被暫停執法一星期

8)
英國傳媒指如果愛華頓買唔到耶高保
將會改打迪奧夫既主意
但有消息指米堡出價600萬鎊買佢

9)
施仙奴好可能以530萬鎊既價錢
由皇馬加盟羅馬

10)
以下係幾段有關曼城既消息:

a)
傳聞佢地知道唔可能買到侯活
所以改向利禾奴開價700萬鎊買艾美利亞

b)
傳聞華素爾以150萬鎊既價錢加盟打呲郡
但賓積洛夫要養傷5-6個月
未知艾歷臣會唔會因為咁而改變主意

c)
傳聞佢地同費倫巴治爭 Mark De Man
這個24歲既比利時國腳
而家效力緊安特衛普
可以踢中堅,右後衛同埋防中3個位置

2007-8-20

之前已經好多日冇寫轉會消息
之後會搵機會講返小弟對部份消息既 comment
今日想先講返過去兩日既幾場大戰

1)
第一場想講既就梗係小弟既愛隊利物浦啦
托利斯對住賓希姆
用速度加技術屈機固然令小弟興奮

而賓尼迪斯今季一洗之前幾季略為保守既作風
先至最令小弟興奮
打正旗號用兩邊側擊
古積特有時又墮後幫波
球隊以一個介乎4-4-1-1同埋4-4-2既陣式應戰

成個陣容只有右中場同埋左後衛兩個位置比較令小弟擔心
賓納特既傳中質素唔掂
班拿約既創造力同埋個人技術令小弟幾有信心
但身裁同埋體能就唔多掂
懷斯同埋巴布係小弟左中場既理想人選
但小弟又想前者繼續踢左後衛
因為歐拿里奧仲未可以復出
而艾比路亞又唔可以長期倚靠
佢一場好,跟住兩三場唔好,都幾得人驚

車仔追返個球12碼
好明顯係馬路達插水啦
佢條友既特性就係鍾意高速衝向後衛身邊
之後再突然跳起搏大霧
上年世界盃決賽
馬達拉斯都比佢玩死啦
只不過馬達拉斯當時真係同佢有好少好少既身體接觸
衰左都冇野講
但尋晚芬倫就好無辜啦
如果只講插水
睇來C7今次真係遇到對手

2)
曼聯羸形勢
但作客輸比曼城0:1
係小弟第2場想講既比賽

曼城係羸得比較有運
入0個球好明顯係符碌啦

而維迪輸左球半烏龍
下半場就助攻頂中楣
都真係幾黑仔

而泰維斯下半場既兩個黃金機會都把握唔到
又真係冇得好怨
而佢地全場又拉唔散對方既防線
亦都係自己攞0黎衰

不過講返轉頭
曼城算守得唔錯
起碼後防人又多
又冇咩防守失誤

而佢地頭兩場波只係對韋斯咸同埋打呲郡
令佢班新球員有時間融合
之後先至對曼聯
某程度上佢地真係要多謝賽期既安排

3)
皇馬主場竟以3:5輸比西維爾
真係幾過份
佢地既防線向來都唔多掂
但未至於咁差掛
究竟係後衛既問題
抑或係中場截擊差呀
佢地學人踢4-3-3
有冇唸過中場0個3個球員既防守能力先

而佢地入3球都靠後衛
班攻擊球員又搞咩呀?

4)
最後想講既就係雲達不來梅對拜仁
拜仁而家中前場既火力超強
無論踢4-4-2或者4-2-3-1都做到野
連高路斯等勁人都可以隨時唔使有得踢
就知佢地幾人強馬壯啦

佢地如果可以於下季增強防中同埋中堅兩個位置
以軒斯菲特既功力
拜仁一定係下季歐聯既幾隊熱門之一
今季歐聯冇左佢地真係好失色

而雲達不來梅冇左高路斯
加上芬寧斯同埋普路斯基傷左
阿爾拔圖又未入局
迪亞高幾勁都死
不過其實就算佢地夫添
都唔多似有力威脅到拜仁

因為佢地,同埋出閘脫腳既史特高
再加上成世二奶命既史浩克04
基本上只係有條件爭聯賽第2

5)
國米尋晚於超級盃
以0:1輸比羅馬
講真國米打熱身賽既表現好差
就算對住上星期比祖雲達斯炒5:2既羅馬
佢地都發唔到圍
如果古利既射術比較好
國米幾球都有得輸

P.S.:
托迪尋晚搏到12碼都唔射
將個重任交比迪羅斯
對羅馬球迷而言
都應該係喜訊
因為王子上季 miss 左7個12碼
真係幾過份

2007-8-17

英超 Preview (Part 7)

今日一定要埋尾
因為已經寫到好悶

18) 新特蘭

佢地今季既最大本錢一定係領隊堅尼
小弟覺得堅尼既感染力
足以令佢班球員踢高一皮波
所以3隊升班馬
以新特蘭既前景比較令人樂觀

講過N次有錢唔代表有前途
但新特蘭既資金比較充裕
可以幫助佢地買下人
拉近下同其他球隊既差距
又係不爭既事實

但堅尼既掃貨行動可惜並唔順利
明顯同球隊既名氣同埋位於東北部有關
令堅尼買左好多貴貨
小弟並唔係話哥頓,李察臣,查伯同埋基亞連尼等人冇料
但買4件有0的名氣既年青人就用左2950萬鎊
真係貴得幾唔合理
令小弟突然覺得愛隊利物浦用1150萬鎊買巴布都唔算太貴

由於今季好多隊都大搞
令新特蘭好難好似當年既紐卡素或者葉士域治咁
第一季就排到好前
但要佢地護級成功
甚至乎做得比上季既雷丁更好
就似乎係好多人,包括小弟既基本期望

19) 伯明翰

佢地升班後既最大既新聞
就係佢地被來自香港既楊先生收購
但小弟覺得這次被收購
為佢地爭取護級增添左變數

因為楊先生出名鍾意干預球隊內政
雖然佢之前誓言唔會咁做
但小弟就唔多信啦
因為佢冇幾耐就話要引入中國同埋香港球員
(咁都唔算干預?)
唔知幾有性格既布魯士可以頂得佢幾耐

本身人腳唔算好
資金又唔係特別多
到搵到兩個比較好既球員
美度同埋加利
又先後因唔同理由而交易告吹

到而家為止買得比較好既只得卡普
佢之前衰在唔自量過左祖記
雖然之後得到外借
但真係行左唔少冤枉路
佢可以踢中前場多個位置
體能同速度都唔差
佢加上科素可能係球隊能否成功護級既另一個關鍵
因為印象中既伯明翰防守都可以靠一人走多步而頂得幾野
但攻力就幾唔掂
上季踢英冠有好多場都只係僅勝
小弟都幾擔心佢地全季可以入到幾多球

20) 打呲郡

佢地被小弟既第一個印象就係好似屈福特
但佢地可能比上季既屈福特更加魚腩

球會老細覺得佢地可以留到級
仲話要於2008年前進軍歐洲
但佢屬意留返0的錢擴建球場
令球隊冇咩錢買人

因為盧普利離隊
只靠安梳爾同埋史堤芬侯活兩個冇咩料既射手
有供應比佢兩個都未必入到波
何況中場比前場更加廢
有冇波比到佢兩個都成問題

佢地上季於英冠既表現已經冇咩說服力
成日都係僅僅羸
上到英超仲邊有可能成日僅僅羸呀

上季小弟未開季就睇死屈福特,錫菲聯同埋查爾頓
結果全中
今季小弟就估打呲郡同埋韋根
唔知點解感覺上佢兩隊好似更加易估
小弟亦覺得佢兩隊都應該係好多人既心水

2007-8-16 (2)

英超 Preview (Part 6)

15) 布力般流浪

佢地今季既火力相當不俗
前鋒就已經最少有5個有一定質素既射手
包括辛達告魯斯,列達斯,達比舒爾,麥卡菲同埋羅拔斯
配合賓特利同埋柏特臣既傳中
講攻力已屬中上

但奈何中後場既人腳好多都幾平庸
同埋一班老人家又大左一歲
比小弟一個頭重尾輕既感覺

而陣中又冇具進攻能力既中場
令佢地只能倚重側擊
小弟認為曉士可以考慮用辛達告魯斯踢進攻中場
既可以增加進攻方法
又可以舒緩0個班射手既爭位情況

相信佢地雖然唔使擔心降班
但又唔似上到前6
如果唔專攻盃賽
今季隨時無所事事咁過

16) 富咸

人腳變動唔少
山齊士買左幾多同鄉
一度令人擔憂佢會用過多同鄉
而令球隊分化
但山齊士抵讚在明顯以態用人

佢地今季既成績應該同布力般相若
如果想做得好少少
山齊士就一定要改善球隊既作客成績啦
因為上季1勝8和10負
實在差勁

小弟相信山齊士已經執好左幾多既位置
今季應該會重點搵個好龍門
因為早兩個月佢買唔到卡臣
之後就好似冇左下文再買龍門

17) 韋根

講人腳佢地整體係差
但又不乏個別有質素既球員
但佢地既領隊夏瓊士張 resume 比森美李爾更差
而後防有巴布爾這個廢物
佢兩個就成為左球隊最大既隱憂

另外,佢地上季於主場只羸過5場
作客又唔見得特別醒
如果佢地今季再唔於主場搶多0的分
就都幾大機會要降班
因為今季除左打呲郡之外
小弟真係再搵唔到另一隊既牌面比佢地差

2007-8-16 (1)

10萬個唔好意思......

尋日0個段關於利記出場陣容既垃圾
小弟其實係比幾個英國網站一齊老點架

尋晚我一知道哥治拍住禾路連踢正選
小弟已經知道實會被人插架啦

跟住仲有馬斯查蘭奴踢正選
小弟直情眼都突埋

印象中被人點得最勁都係今次
之後小弟會小心0的架啦
總之如有不便之處
敬請原諒

2007-8-15 (2)

講英超 Preview 講到好悶
最後0個6隊之後先講

先講幾句今晚利物浦作客圖盧茲

因為利記今個星期日要主場鬥車路士
佢地上季聯賽作客車路士前
亦有一場歐聯賽事要作客燕豪芬
當時賓尼迪斯決定半力出擊
謝拉特亦只係後備上陣約20分鐘

英國傳媒報導
基維爾,哥治,賓納特,馬斯真蘭奴以及班拿約等
冇隨隊前往法國
前者就話有傷
後4個就擺明留力星期日

雖有傳哥治被賓尼迪斯冷落
(仲話佢會提出離隊......)
但只要細心唸下
車路士星期日既防線好可能會冇左泰利
(雖亦有傳佢可以趕及復出)
佢地而家既防線根本冇人阻到哥治
同埋利記對上兩次羸車仔既比賽
哥治都係有好表現既
所以有理由相信賓尼迪斯隨時準備用哥治再屈機

而馬斯查蘭奴於4月歐聯4強次回合0個場
都踢得幾好
睇來佢於星期日都應該有機會出場

而利記今晚既陣容
相信比較忙既會係施素高同埋加歷查
前者上星期只係後備落場踢左幾分鐘
今晚應該會踢正選
對住圖盧茲幾高效率既中場
佢應該會好唔得閒

而對方既高質射手艾文達狀態唔差
相信賓尼迪斯唔敢用希比亞或者柏路達踢正選
所以加歷查應該會幾辛苦

2007-8-15 (1)

英超 Preview (Part 5)

今次想講幾支想打入前6
但小弟唔認為佢地做得到既球隊

11) 樸茨茅夫

佢地有大水喉射住
又有個唔錯既領隊
人腳亦唔算差
仲唔報名玩圖圖盃以留力聯賽
睇落有機前6
但偏偏衰幾樣野

首先佢地作客幾差
兼好似會突然間唔識入波

而佢地咁多非洲球員
雖然部份已經退出左國家隊
但佢地同埋車路士
應該係最受非洲國家盃影響既球隊

同埋哈利列納一日未識用卡蘭積卡
球隊既攻力都唔可能發揮得晒
初步睇卡蘭積卡應該會被放於偏左既位置
但咁樣只會令佢成日返中路搵波踢
而佢左路既拍檔就只餘下馬菲泰萊或者查奧爾
令左路最終只會死左一半火
對比起右路既加利奧利爾拍上羅倫既組合
只會令人有兩邊唔均衡既感覺

而佢地今季有幾多新球員
培養默契又需時

12) 雷丁

小弟覺得佢地既路數已被睇通
係最大既問題

而後防靠杜比利
結果只會係等死

中場冇左薜維爾
新加盟既菲爾要需時適應英超節奏
小弟覺得中場差左
整體成績又邊會有進步?

13) 米杜士堡

主席講明話要入前6
但佢地咁既人腳點得呀?

另一方面,冇左維度卡
前面只有有離心既耶高保比較似樣
新加盟既端基雖有質素
但佢需時適應英超節奏
而艾利亞迪里又唔似會突然有大改進
上季入球能力一般既佢地
今季只會更加大鑊

中場只有達寧同埋新仔莊臣比較似樣
其他人就各有問題

後防方面
如果活基治唔傷既話
佢同埋舒華沙所帶領既防線
應該可以頂得幾野

講完球員就想講下佢地既領隊修夫基
講到第13隊英超球隊
小弟只曾質疑過保頓既森美李爾既能力
但都只係'質疑'
而唔係'否定'
但一講到修夫基
小弟 so far 既印象就係唔多掂
從威望,到買人既眼光,排陣以及臨場調動
佢都只係一般
唯一比較可取既係佢都仲算肯用新仔
佢及唔上之前所講既絕大部份領隊
真係會係球隊既一個幾嚴重既弱點

14) 韋斯咸

都係0個句
只有一個肯洗錢既老細
真係唔係咩野好成績既保證
類似既說話小弟已幾講左幾次
已經好厭
只想講多句.....何況肯洗錢既老細週圍都有......

有柏加,龍格堡,法拔,同埋比拿美等球星加盟
本來幾值得期待
但要到前6講真又仲有段距離
因為就算唔計默契
佢地都仲有幾個不利因素

中前場既重心法拔新加盟就要養傷半年
佢地又買唔到戴亞
柏加係領軍既好人才
但創造力又只係一般
中前場成班球星最終有冇化學作用都未知

而後防線人腳唔差
偏偏表現又唔多可靠
而中場又冇一個勁既防中去做掃蕩既工作
令防線更多時間受壓

之後就要講下佢地既領隊古比士利
小弟要表明立場
古比士利係小弟幾喜愛既領隊
事實上冇咩人會質疑佢既能力

但佢真係有個弱點
就係唔能夠令到隊波成季 keep 到 overall 幾穩定下既表現
小弟都明踢聯賽38場有時踢得差在所難免
但小弟所講既唔穩定
係指幾令人意外既水準下滑
仲要係持續一段時間

十年八年前既例子唔講
只講前兩季
05-06球季
查爾頓上半季踢得唔錯
但聖誕過後
正當所有人等住佢地以前6既身份進軍歐洲
佢地下半季就大走樣
如果唔係佢地上半季踢得好
佢地隨時要護級

06-07球季
古比士利執教既第一場就羸曼聯1:0
但之後既11場波
佢地只得3和8負既劣績
當中仲有場作客以0:6大敗比雷丁

費格遜曾經講過
踢聯賽既關鍵
係要將低潮期盡量縮短
小弟覺得古比士利如果唔0係這方面做好0的
韋斯咸真係冇可能去到前6
而佢自己都可以執定包袱

2007-8-14

英超 Preview (Part 4)

今次講既係另外3支有力爭前6既球隊......

8) 愛華頓

愛華頓季前於轉會市場唔多活躍
只買入左謝基卡同埋向多蒙特借用派拿
但咁並唔代表佢地易應付
因為佢地成功留住中前場
包括卡希爾,艾迪達同埋安德魯莊臣3個主力

而之後買入拜恩斯
令尼史葛可以踢返佢最擅長既中堅位置
連同其他實而不華既防守球員
佢地可望特別0係作客既賽事
繼續憑穩守戰術去搶分
佢地上季作客9場和波
對比於熱刺,紐卡素同埋保頓
這方面佢地明顯優勝

小弟覺得愛華頓今季既成績
好可能取決於莫耶斯如何取捨歐洲賽
因為佢地既兵源及唔上熱刺
唔可能兩邊都做得好
如果夾硬要雙線發展
隨時再次兩頭唔到岸

而佢地既踢法已經被其他球隊睇通晒
亦唔見得擅長搶攻
莫耶斯亦係時候為這方面花點心思

9) 曼城

如果唔係皮雅斯被人炒左
又如果唔係他信成功入主
小弟相信應該可以唔使點樣寫曼城

最少用左4000萬鎊
同50-60個球員扯上關係
但又係0個句
買得人多唔代表會掂

新加盟既球員來自五湖四海
佢地可唔可以即刻適應到英超既比賽節奏
頗成疑問
而佢地既新人比紐卡素多
偏偏季初既賽程卻比較難踢
如何'極速'融合球員
係艾歷臣今季既最大難題

而伊沙臣季初養傷
雖然為小舒米高帶來上位既機會
但就為球隊原本已經冇咩默契既防線
帶來更大既隱憂

但係曼城亦有佢地爭前6既本錢
首先,艾歷臣帶左英格蘭幾年
雖然外界評價一般
但其實佢教球會既紀錄都算唔差
而佢對英格蘭球壇既熟識程度有助佢教曼城

另外,狂人巴頓離隊
對球隊利多於弊

仲有既就係佢地冇歐洲賽負擔
再加上後備兵源
相對於紐卡素同埋愛華頓
算係比較充足

他信講明佢會先投資3年時間
唔計今季,艾歷臣其實都仲有兩季時間
但佢要做既野
卻應該係要打入前4
熱刺,紐卡素,愛華頓同埋維拉
其實都應該有相同既'最終'目標
但小弟相信可以最多錢用既艾歷臣
得到既時間應該會係最少既

10) 維拉

奧尼爾經過一季去執靚隊波
令到維拉於今季應該會成為爭前6既一份子

先講佢地既優點
佢地最大既優勢在於出色既青訓
而奧尼爾又肯用新人
近年曾到港參加7人賽既青年軍
有部份已經被提昇上一隊
小弟就覺得維拉同埋阿仙奴以及熱刺
係英超現時最有朝氣既球隊

而中前場既人腳唔差
要速度有艾邦拉賀同埋摩亞
要高度有卡維
要技術有柏度夫同埋艾殊利楊格
加埋越踢越好既巴利
有利奧尼爾作出唔同既調動
同埋解決上季唔擅長搶攻既弱點
上季佢地和左17場
當中有好多場其實都係失分比弱隊

冇歐洲賽負擔既佢地
其實幾有當年列斯既影子
今季佢地如果成功跑出
小弟絕對唔會覺得意外

小弟覺得奧尼爾今季既另一重點
可能就係重整防線
因為美爾保好有可能於季尾以自由身轉戰美職聯
而蘇連遜明顯唔係奧尼爾0個杯茶
究竟奧尼爾既收購目標最終係借將卡臣
抑或係於季尾約滿保頓既謝斯高連倫
小弟就估多數係後者啦

另外奧尼爾點樣培訓奧斯邦尼同埋卡希爾
亦值得我地去留意
其中前者既潛質不下於施素高,戴亞比同埋迪亞拉
可能佢先至係新韋拉

講長遠發展
維拉同埋紐卡素其實
都好可能比曼城來得樂觀
因為佢地既老細除左有錢
亦有更重要既耐性

2007-8-13 (2)

英超 Preview (Part 3)

6) 保頓

佢地今季既最大問題
唔係歐洲賽既負擔
亦都唔係冇錢擴軍
而係冇左 Big Sam
上季查爾頓既例子已經話比我地知
一個好領隊既重要性
今季佢地既董事局將希望寄託予森美李爾身上
但問題係佢老哥及得上 Big Sam 幾多呢

Big Sam 唔會盲目只踢長傳急攻
迪奧夫同埋安歷卡所以有一定既發揮空間
而 Big Sam既調動亦算幾靈活
佢又主張引入新科技及概念
以幫助球員維持狀態
加上在球壇有一定既聲望
森美李爾又做到當中既幾多呢

講完領隊,就要講陣容
佢地既後防冇左賓希姆
替補既施迪明顯唔多夠班
而佢來自法甲
亦需要時間去適應比賽節奏
而謝斯高連倫同球會傾唔掂續約
亦係隱憂

中場方面
Braaten 同埋韋希姆臣既加盟
符合森美李爾繼續倚靠側擊既戰術
但問題係史必,甘普同埋簡拿高普路斯又大一歲
其餘比較似樣既新加盟球員
就只有防中麥肯同埋米高艾朗素
小弟始終覺得以路蘭做重心既中場力量只係一般

而前鋒既迪奧夫同埋安歷卡雖有質素
但佢兩條友出名麻煩
森美李爾有冇本事搞掂佢兩個已經係問題
同埋佢兩個一直都同轉會傳聞扯上關係
佢兩個一旦離隊
球隊就只可以倚靠戴維斯同埋希古臣

再講佢地既弱點
佢地可能因為平均年齡偏高
都幾驚高速既球隊
上季主場0:4輸比曼聯
個場波好明顯就係輸在速度

而佢地既後勁又只係一般
佢地上季試過11次於半場落後
當中最終8次輸波收場
好多仲越輸越大鑊

咁多不安既因素
趺出前10似乎係幾正路既預測
短暫既降班危機亦都唔會令小弟意外

P.S.:
保頓今季到目前為止
最叻仔既都怕且係留得住佢地幾有料既醫療隊
and then nothing else

7) 紐卡素

佢地今季最大既驚喜
唔係咩野去舊迎新既球員
而係未試過帶領大球會既 Big Sam
佢老人家有幾勁
真係唔使再多講

想講既係佢地今季爭入前6既本錢
(前4對佢地而家來講實在係太遠)

後防引入既新血雖未至於好勁
但一定比之前既好
但問題係季初可能會因太多新人
而有默契不足既問題

中場方面係比較大問題
麻煩友巴頓已經係唯一既新血
不過原本做梗重心既佢因傷要缺席季初既比賽
安利,戴亞,蘇蘭奴同埋杜夫又成日受到傷患既困擾
其中前三者仲好有離心
可以倚靠既就只有占士米拿,尼索比亞同埋畢特等人
中場力量明顯不足

前線方面
如果馬田斯同埋奧雲真係唔走既話
加上阿倫史勿夫,艾美奧比同埋維度卡
只要佢地健健康康
等埋重心巴頓復出
火力都總算見得下人

一下子用班新兵去爭前6既關鍵
在於有冇出閘脫腳
可幸佢地季初硬仗唔多
新兵有時間融合

而Big Sam 可唔可以改善球隊作客腳軟既弱點
亦好重要
畢竟作客輸12場真係幾過份

而對比起熱刺同埋愛華頓
冇歐洲賽既負擔
其實真係爭前6既優勢

始終 Big Sam 帶住保頓
限米煮限飯之下
球隊既成績都見得下人
佢帶住紐卡素總令人有一定寄望
但真正既收成期其實可能係下季
甚至係幾季之後
好彩艾殊利已經取代左薜伯特於紐卡素話事
前者既耐性應該會比 Big Sam 有足夠既時間去做野

2007-8-13 (1)

由於好忙,個頭勁痛,同埋之後電腦壞左
小弟已經一個星期冇交功課
連已經準備左既英超 PREVIEW 都冇左件事
請見諒

英超 PREVIEW (PART 2)

4) 阿仙奴

成個暑假
所有人只會講亨利離隊他投
可能有少少人仲會掛住龍格堡既
巴迪斯達同盧普利印象中直情係冇人提過
小弟始終覺得季尾如果冇左雲加就真係大鑊啦
而董事局既內亂既影響亦更深遠

正所謂有危先有機
long-term來講
小弟覺得冇左亨利其實係阿仙奴既重生機會

試唸下亨利仲可以踢幾耐先得架
佢既離開
可以間接令雲佩斯,禾確特同埋法比加斯正式上位
計落真係有賺

而只要再唸下其他既攻擊球員
例如經過一季適應期既路斯基
因為沙格拿來投而可以改踢中場既伊布爾
可能同雲佩斯因為一剛一柔而起到化學作用既艾迪巴約
仲有擅頂既賓特拿
阿仙奴既攻力其實有增無減

而達施華雖然係有質素既球員
但始終要比一段適應期佢
頭半季,甚至全季都不宜寄予厚望

後防方面
小弟希望列文為左佢自己於國家隊既前途
可以生性少少
打返佢05-06球季既高水準

而沙格拿頭槌唔錯
相信可以幫輕下托尼

講左咁多
又要數下佢地既弱點
始終佢地唔係踢緊西甲
如果唔硬朗0的就只有繼續失分比弱隊

而佢地既埋門一腳可以講係前列球隊中最差既
有時聽到0的死硬派兵工廠球迷
唔肯面對現實
每次只係哭喪咁話埋門機會比人地多
佢地只係輸在唔夠運
小弟就會扯火
一次半次就可以賴唔夠運
成季都係咁就唔該檢討下啦

而好多人已經話佢地第4名將會不保
小弟就唔多覺
雖然佢地唔似可以挑戰聯賽錦標
但仍然有左右大局既能力

而熱刺,紐卡素同埋愛華頓等球隊
又有本身既弱點
要佢地挑戰阿仙奴既4哥地位
依然唔見得好有機會

5) 熱刺

都係0個句
買人買得多,唔代表一定掂
弱點一日唔改
都唔使旨意會有大進步

佢地今季又再起勢咁買人
當中有咁多包括貝碧托夫在內既好射手又點
冇一個好 keyman 始終都係死路一條
祖爾夠唔夠膽用新加盟既保定派牌先
而佢地又未買到里昂既卡斯唐
莫非最終又要羅比堅尼墮後去分波

而後防既京治一傷再傷
新加盟既法國U21隊長卡佩奧
雖有潛質,但小弟睇波咁多年
都未見過有法國後衛第一季踢英超就踢得特別好
中路只得一個戴臣又可以捱得幾耐
好彩巴里既加盟解決左祖爾搵個好左閘既煩惱

而佢地差勁既作客成績
同埋歐洲賽既負擔
亦係佢地成為阿4既障礙

2007-8-6 (2)

英超 PREVIEW (PART 1)

1) 車路士

其實以佢地既人腳只要解決傷兵問題
任何時候都會係頂頭大熱
正選位置中只有右閘比較令人坦心
無論保羅費拉拿或者格蘭莊臣
都令人好冇信心

泰利要傷出一個月
如果車仔可以捱得過季初這段困難既時期
同埋季中非洲國家盃冇左咁多件主力既日子
佢地既前景依然係20隊當中最好既
因為車仔今季既最大優勢
就係佢地會復用擅長既4-3-3既陣式
小弟雖然唔認為佢地可以入波多過曼聯
但肯定係全英超攻守最平均既一隊

馬路達既加盟
小弟相信可解放艾殊利高爾既助攻力
而小弟亦對其餘既新兵
包括阿歷斯,賓希姆,比沙路同埋薜維爾
幾有信心

2) 曼聯

攻力肯定全英超最強
而家仲多埋泰維斯,拿尼同埋安達臣
超班既攻擊力係佢地最大既爭標本錢
計牌面真係比佢地嚇親

而全隊都冇非洲球員
令佢地於季中有一段時間肯定於兵源上比車仔佔優

但佢地既防線始終唔係太穩
小弟覺得除左維迪之外
其餘幾個其實都係被外界過譽
而軒斯又離隊在即
小弟相信佢地既失球數字會有所上升

中場簽左夏格維斯
但佢其實幾玻璃腳
加上年事已老兼成日傷既史高斯
同埋費查,奧沙,卡域克等人
中場既截擊能力其實唔算太強

而如果費格遜
想爭埋歐聯既話
佢地隨時兩頭唔到岸
因為曼聯上季入到4強
某程度係因為抽籤理想
入4強前最強既對手只係冇咩歐洲賽經驗既羅馬

3) 利物浦

4000萬鎊既增兵行動
睇落個勢好勁
但其實增兵根本唔係聯賽錦標既保證

利記要既其實係近17年來一直欠缺既穩定性
而上季利記差勁既客場成績
更加解釋左點解佢地自10月起已冇機會羸聯賽

今夏來投既攻擊球員
某程度反應左賓尼迪斯
可能唔會指令球隊於客場踢得太保守
而加強兩邊側擊既想法亦非常明顯

上季利記於客場踢得咁差既其中一個原因
就係面對對手體力化既'擦鞋仔波'
有時顯得無從入手
而班拿約係小弟寄予厚望既球員
佢既控球能力同埋創造力
可以幫助球隊組織攻勢

巴布,禾路連同埋原來既古治
既踢法都係勤力肯走動
有利拉開對方既防線

托利斯既速度可於打突擊既時候大派用場
而佢咁大名氣
亦可令拍擋踢得比較舒服
而哥治就一於繼續屈機

利記已經有好多好既射手
要改善攻擊力既關鍵應該在於輸送
中路既輸送有謝拉特
同埋有時移入中路搵食既班拿約
已經足夠

問題係在於兩側
基維爾高峰期已過
賓納特既傳中落點唔夠準
拉圖唔夠經驗
兩閘既後上助攻亦有限
賓尼迪斯可能會繼續
搵前鋒去客串側擊
當中以巴布既機會最大

講完前面,再講後防
小弟認為主要既問題有兩個
首先人腳既深度不足
艾比路亞,希比亞同埋柏路達等人既水準
唔多令人放心
所以小弟真係好希望
軒斯最終可以成功加盟

而另一問題就係佢地佈越位既默契
有時真係幾令小弟擔心

自賓尼迪斯帶隊後
利記已經證明佢地踢歐洲賽既能力
今季佢地依然會係爭標既要角

至於聯賽
解決唔到以上講過既弱點
雖然相信利記唔會再被冠軍拋開廿幾分
但相信佢地只會依舊係第3名

2007-8-6 (1)

1)
有消息指卡卡將同AC米蘭續約至2012年

2)
曼聯憑互射12碼羸得社區盾
法定時間雙方踢成1:1
在互射十二碼階段
雲達沙連撲
包括比沙路,林柏特同埋胡禮菲臘斯既12碼
相反曼聯既里奧費迪南,卡域克同埋朗尼就全中

3)
新特蘭好有機會成為高爾既下一站
咁樣佢就可以再同好拍擋約基合作

4)
伯明翰領隊布魯士表示
加利因為唔開心新隊友既水準
同埋對球隊訓練有意見
令布魯士最終決定終止轉會

小弟最初覺得加利既鬥心好好
都幾留意佢

但佢本身既級數其實唔係高
球場內外既操守都唔係好
而家又整單咁既野
佢下季於熱刺長坐冷板都唔抵可憐

5)
又來兩單曼城既轉會消息
由於伊沙臣既傷出
艾歷臣決定要搵多個龍門
傳聞佢地向車路士出價200萬鎊買古迪仙尼

另外,有消息指施維斯達亦係佢地既目標
以增加防線既人手

2007-8-5

1)
愛華頓希望能於幾日內
買到韋根既拜恩斯

2)
西班牙傳媒報導
西維爾會接受紐卡素
對德古天奴域250萬鎊既出價

而球員本身聲稱對紐記提供既3年合約
同埋幾吸引既人工感到滿意

佢既加盟令紐記既後防兵源大有幫助
佢打中堅唔錯
亦可客串閘位

3)
泰利同埋伊沙臣
分別因膝頭同埋姆指既傷患
而要抖一個月

而奧雲同埋艾迪巴約
就分別因大腿同埋鼠蹊既傷患
而要缺陣下星期既第一輪聯賽

4)
維拉利爾成為最新一支
同馬基里尼扯上關係既球隊

5)
阿仙奴最終決定將墨西哥小將維拉
外借到奧沙辛拿一季

6)
高高好可能以自由身加盟聖伊天

2007-8-4

1)
再有傳聞指洛杉磯銀河打費高既主意
消息指佢地會搵費高於季尾以自由身加盟

2)
泰維斯回復自由身後
曼聯會借用佢兩年
借用費高達1000萬鎊
之後曼聯可以再以2000萬鎊買斷佢

3)
皇馬主席卡達朗透露
佢地有望於幾日內羅致兩至三名新球員
西班牙傳媒認為佢所講既應該不出
洛賓,波歷克,德倫特,同埋雲達華治

4)
傳聞愛華頓向波圖開價1000萬鎊
買路爾斯干沙利斯

5)
傳媒曼城既新目標
就係比斯安奴
轉會費為460萬鎊

6)
戴亞既轉會要hold坐
因為韋斯咸同埋紐卡素未能就轉會費達成協議

7)
紐卡素簽左卡卡巴
簽左兩年

8)
維拉利爾宣佈
佢地既左閘安歷基她快會加入紐卡素
佢簽豹5年
轉會費大約400萬鎊

2007-8-3 (2)

1)
歐聯第3圈外圍賽
利物浦將要面對圖盧茲
而阿仙奴就要對布拉格斯巴達

2)
維拉同迪贊巴達成解約協議

3)
柏圖落實加盟AC米蘭
轉會費高達1000萬鎊
佢將於3.9.07起參加訓練同埋友誼賽
但佢必須要於3.1.08起
先可以參加正式比賽

4)
侯城睇中左紐卡素既年青射手安迪卡奴爾
如果紐記唔肯賣
侯城就會改為提出借用

5)
再有傳聞指阿仙奴出價1000萬鎊買簡奴迪

6)
有消息指馬基里尼得到車路士放人
佢既下一站可能係祖雲達斯或者巴黎聖日耳門

7)
基祖好有可能加盟伯明翰
但英國傳媒指新特蘭亦打算出手

2007-8-3 (1)

1)
巴頓因為襲擊前隊友達保
正式被曼徹斯特警方落案起訴
現在獲准保釋

2)
曼城在一日之內簽左三名球員
包括皇家蘇斯達既加列度
薩格勒布戴拿模既哥路卡
同埋薩克達既伊蘭奴

22歲既加列度係前西班牙U21代表
可以踢左閘或者左中場

21歲既哥路卡已經係克羅地亞既大國腳
可踢中堅或者左閘
克羅地亞傳媒指轉會費高達900萬鎊
但英國傳媒就估計只係600萬鎊

26歲既伊蘭奴踢法實而不華
係鄧加既愛將
佢既轉會費高達800萬鎊

曼城既掃貨行動仲未完
最新既一單就係開價1000萬鎊買戴臣

3)
阿歷斯終於申請到工作證

4)
戴亞落實加盟韋斯咸
轉會費高達600萬鎊
而佢亦獲加人工
週薪加到8萬鎊

5)
阿倫史勿夫好快會加盟紐記
轉會費為600萬鎊

6)
內地傳媒指朱廣滬已正式辭職
而前日本國家隊教練杜斯亞
就成為繼任人既大熱

7)
伯明翰同美度未能就個人條件達成協議
而家佢接受新特蘭4萬鎊週薪既條件
只要通過體測就可以落實加盟

8)
芬倫同利物浦續約兩年

9)
傳媒紐卡素分別向富咸同埋利物浦
開價300萬鎊同埋200萬鎊
買柏巴迪奧普同埋希比亞

10)
曼聯簽左1個9歲既天才小朋友
個小朋友叫戴維斯
佢已經同爸爸搬返英國住

11)
BBC指曼聯同韋斯咸
已就泰維斯既轉會
達成200萬鎊既賠償協議

12)
保頓簽左匈牙利既U21門將保丹
佢被視為謝斯高連倫既代替品

13)
利物浦同柏拉辛迪扯上關係
因為佢唔想跟Celta降班
而英國傳媒指如果利記買唔到軒斯
可能會考慮買佢

2007-8-2 (2)

1)
烏拉圭既新星Diego Godin
好可能由國民隊轉會到祖雲達斯
佢21歲,踢中堅

2)
Emerse Fae 好有可能由南特加盟雷丁
轉會費大約300萬鎊
佢prefer踢英超,多於加盟基輔戴拿模

3)
尼斯達宣佈退出國家隊

4)
柏圖最快要到明年1月先可以加盟AC米蘭

5)
愛華頓斟酌史米失敗

6)
米高布朗落實加盟韋根
轉會費為150萬鎊

7)
索察向利物浦開價270萬鎊買拿泰歷
先前傳聞伯明翰已開價200萬鎊

8)
戴亞已經獲準同韋斯咸傾合約

9)
英國傳媒指富咸向士砵亭開價300萬鎊
買秘魯後衛A.洛迪古斯

10)
雲達沙表示唔急於同曼聯傾新約
起碼會於明年1月後先展開談判

11)
利物浦既19歲奧地利射手Idrizaj
好可能被賓尼迪斯外借到英冠球會吸取經驗
但邊間會就仲未落實

12)
以下係幾則曼城既轉會消息:

賓積洛夫好可能加盟
轉會費為570萬鎊

之前同利物浦扯上關係既基亞連尼
被意大利傳媒指佢會好快過檔
轉會費高達1000萬鎊
小弟信佢會過檔曼城
但就唔多信會咁貴

而英國傳媒指曼城同雲達不來梅都想簽施積
轉會費高達1800萬鎊
小弟就覺得後者唔會願意出咁高價錢

2007-8-2 (1)

先寫好多單關於紐卡素既轉會消息:
(因為實在太多........)
(謹以此article向舒利亞及Sammy Sir致意)

Big Sam 表示戴亞係因為家庭理由離隊
但韋斯咸既400萬鎊出價又真係比較低
英國傳媒合計韋斯咸最終要比500萬鎊

兩單關於右閘既消息:
馬賽既比爾再次表明唔準備離隊
但紐記都唔使太驚
因為卡爾於熱身賽既表現唔錯
而佢地又睇中左摩納哥既捷克國腳柏拉素
佢可以踢右閘同埋右中場
據報紐記帝出價250萬鎊

之後再有4單關於左閘既消息:

雖然傳聞紐記睇中德古天奴域
但原來佢地仲未出價
相反曼城已經開價
但200萬鎊既出價已被西維爾reject
原來德古天好域被傳離隊
係因為佢只餘下1年合約
但都未肯同球隊續約

之前提過既Boukary Drame
原來唔係德國人
而係塞內加爾人
但紐記球迷已經可以忘記佢
因為佢好大機會加盟索察
轉會費為80萬鎊
佢肯去索察係因為人地肯比4年約佢
令佢覺得比較有保障

傳聞紐記又睇中波圖既施治
佢係斯洛文尼亞國腳
約值200萬鎊

最後要講既係多蒙特既戴迪
據報紐記既出價已被reject
因為多蒙特企硬要675萬鎊
小弟覺地29歲,又唔係好勁既佢邊值咁貴呀
可能只係多蒙特簽唔到羅辛奴而報復

2007-8-1 (2)

1)
英國傳媒報導
鄭智好快會加盟伯明翰

2)
J.湯馬士好大機會由查爾頓
加盟打呲郡
轉會費約300萬鎊

3)
傳聞阿仙奴打算出價800萬鎊
以買到居迪戴維斯

4)
維拉既門將蘇連遜雖然仲有1年約
但英國傳媒指佢將不獲新約
而奧尼爾仲好積極搵新龍門
岩岩就同哥頓以及保路鍚扯上關係

5)
史篤城想向維拉借用奧斯邦尼
這個小朋友得到奧尼爾既極高評價
仲形容佢係新韋拉

6)
夏迪打算回流英超
其中以加盟米堡或者伯明翰既機會比較大

7)
森美李執教保頓後表明繼續靠快速側擊
佢岩岩搵到好人選
仲要只用左超值既50萬鎊
就係Daniel Braaten
佢來自洛辛堡,25歲

2007-8-1 (1)

1)
伊拉克既巴西藉教練祖雲韋拉
分別收到澳洲同埋南韓足總既邀請

2)
英國太陽報報導
迪高親口證實收到摩連奴既邀請
仲聲稱車路士願意用唔肯續約既林伯特去交換

但小弟就唔多信
因為這份報紙既吹水紀錄太多
同埋林伯特個份約有一條自動加人工既條款
人地唔心急續約係好正常既事
而以佢於車路士既地位同埋佢同摩佬既關係
正係好難想像佢會離隊他投

3)
英國傳媒報導
阿倫史勿夫會於短期內離隊
目的地應不出紐卡素,米杜士堡同埋腹華頓三隊
其中愛華頓仲為左買佢
而準備出售比亞堤以套現

4)
羅斯最終付人意外地加盟維拉利爾
簽約6年
轉會費大約670萬鎊

5)
卡斯迪路最終選擇加盟薩克達
轉會費大約1050萬鎊

但小弟真係唔多睇好佢這次轉會
因為近年來太多球員
因為適應唔到當地既寒冷天氣同埋生活
而表現走樣

6)
AC米蘭打算搵巴迪斯達幫手
佢地想向皇馬提出先借後買

7)
古莊臣可能回流英超
並加盟韋斯咸
英國傳媒指轉會費高達700萬鎊

8)
雷咸終於再斟酌南韓球員
傳聞佢地向雷丁開價100萬鎊
買薜琦鉉
其實之前已經傳過佢地想買李天秀

9)
熱刺成功以540萬鎊
由哈化柏林買左派斯保定
佢可踢右中場同埋進攻中場
若果熱刺未能買到卡斯唐
可季既攻勢好可能要靠這個德國U21國腳