英超 PREVIEW (PART 1)
1) 車路士
其實以佢地既人腳只要解決傷兵問題
任何時候都會係頂頭大熱
正選位置中只有右閘比較令人坦心
無論保羅費拉拿或者格蘭莊臣
都令人好冇信心
泰利要傷出一個月
如果車仔可以捱得過季初這段困難既時期
同埋季中非洲國家盃冇左咁多件主力既日子
佢地既前景依然係20隊當中最好既
因為車仔今季既最大優勢
就係佢地會復用擅長既4-3-3既陣式
小弟雖然唔認為佢地可以入波多過曼聯
但肯定係全英超攻守最平均既一隊
馬路達既加盟
小弟相信可解放艾殊利高爾既助攻力
而小弟亦對其餘既新兵
包括阿歷斯,賓希姆,比沙路同埋薜維爾
幾有信心
2) 曼聯
攻力肯定全英超最強
而家仲多埋泰維斯,拿尼同埋安達臣
超班既攻擊力係佢地最大既爭標本錢
計牌面真係比佢地嚇親
而全隊都冇非洲球員
令佢地於季中有一段時間肯定於兵源上比車仔佔優
但佢地既防線始終唔係太穩
小弟覺得除左維迪之外
其餘幾個其實都係被外界過譽
而軒斯又離隊在即
小弟相信佢地既失球數字會有所上升
中場簽左夏格維斯
但佢其實幾玻璃腳
加上年事已老兼成日傷既史高斯
同埋費查,奧沙,卡域克等人
中場既截擊能力其實唔算太強
而如果費格遜
想爭埋歐聯既話
佢地隨時兩頭唔到岸
因為曼聯上季入到4強
某程度係因為抽籤理想
入4強前最強既對手只係冇咩歐洲賽經驗既羅馬
3) 利物浦
4000萬鎊既增兵行動
睇落個勢好勁
但其實增兵根本唔係聯賽錦標既保證
利記要既其實係近17年來一直欠缺既穩定性
而上季利記差勁既客場成績
更加解釋左點解佢地自10月起已冇機會羸聯賽
今夏來投既攻擊球員
某程度反應左賓尼迪斯
可能唔會指令球隊於客場踢得太保守
而加強兩邊側擊既想法亦非常明顯
上季利記於客場踢得咁差既其中一個原因
就係面對對手體力化既'擦鞋仔波'
有時顯得無從入手
而班拿約係小弟寄予厚望既球員
佢既控球能力同埋創造力
可以幫助球隊組織攻勢
巴布,禾路連同埋原來既古治
既踢法都係勤力肯走動
有利拉開對方既防線
托利斯既速度可於打突擊既時候大派用場
而佢咁大名氣
亦可令拍擋踢得比較舒服
而哥治就一於繼續屈機
利記已經有好多好既射手
要改善攻擊力既關鍵應該在於輸送
中路既輸送有謝拉特
同埋有時移入中路搵食既班拿約
已經足夠
問題係在於兩側
基維爾高峰期已過
賓納特既傳中落點唔夠準
拉圖唔夠經驗
兩閘既後上助攻亦有限
賓尼迪斯可能會繼續
搵前鋒去客串側擊
當中以巴布既機會最大
講完前面,再講後防
小弟認為主要既問題有兩個
首先人腳既深度不足
艾比路亞,希比亞同埋柏路達等人既水準
唔多令人放心
所以小弟真係好希望
軒斯最終可以成功加盟
而另一問題就係佢地佈越位既默契
有時真係幾令小弟擔心
自賓尼迪斯帶隊後
利記已經證明佢地踢歐洲賽既能力
今季佢地依然會係爭標既要角
至於聯賽
解決唔到以上講過既弱點
雖然相信利記唔會再被冠軍拋開廿幾分
但相信佢地只會依舊係第3名
3 comments:
分析得很好,特別係對利物浦既分析極其獨到和透徹,果然係利記超級fans
我覺得如果曼聯既前鋒能夠全部出番哂
就會係攻力最強,
現在只係得朗尼同迪維斯可用
不過中場進攻力真係全英超最強
進攻組織真係好多元化
我估曼聯打4-5-1同4-4-2都係咁勁
網主好野@_@果然打出一篇咁高水準既英超前瞻，希望來緊果17隊一樣咁有水準@_@
講番呢三隊，要講既野已經唔太多，一隊講少少~
如同你所講，車仔兵源始終係最充足，應付傷兵既能力比其他球隊高，而且後備水準亦都唔差得過正選好多。所以我預計今年英超仍然係車路士同Man U之爭。
Man U今年加入左四位重量級人馬，不過小弟認為泰維斯同埋夏格維斯會係四位入面比較重要既兩位。始終另外兩位都只聞其名，而未見其實。況且位置上都係前兩位比較大機會打正選。
利物浦今年既增兵行動令我覺得佢地今年應該唔會再係陪跑分子。班拿約同賴恩巴布都係幾好既收購，加上費蘭度托利斯強勢加盟，攻擊力增加唔少。如果賓帥戰術得宜，即使利物浦奪標機會唔大，但係亦都有能力攪亂大局。歐聯方面，如果抽籤好既話，唔係無機會攞冠軍。
HI..版主既愛隊利記同我地既愛隊紐記都旗開得勝....
Post a Comment