2009-9-29

想講英國波......

面對持續不振既葉士域治
紐卡素只要做好本份已經坐和望羸
結果唔使水銀瀉地既攻勢
行行企企已經炒對手4蛋兼重返榜首
亦以表現向波比 sir 作致敬

之前已經講過紐記前線火力不足
路蘭有能力成為及時雨
只係估唔到佢勁到成為葉士域治同埋堅尼既黑雨
不過他日古迪利斯復出
將路蘭移入中路同辣椒仔拍檔先係上算
既可以令前者更活躍
亦唔使俾畢特將中場水準降grade

小弟更加想講係堅尼
佢賽後如常狂插後防唔掂
不過如果心水清既話
就會發覺好多嘢都同佢教新特蘭既時候似曾相識

佢本身係個好堅既球員
不過佢似乎唔多容納到屎波過佢既球員
狂鬧,處罰同埋恐嚇唔係個個都頂得順
而佢季前買人同埋每場既排陣都興之所致

隊波頂佢唔順自然踢得唔好
當然亦有可能係球員借勢迫佢走既手段
佢既離隊只係幾時同埋形式(辭職定係被炒)既問題

再來講英超
多得韋根回勇同埋球證略嚴既紅牌令車路士終於輸波
曼徹斯特雙雄同佢地一樣失咁多分
就算利記,兵工廠,維拉同埋熱刺都只係失多3分
聯賽幾乎可以講話係重頭再來

不過如果愛隊利記仲唔改善後防表現
即使成為1895年以來第一隊開咧7場入22球既球隊
聯賽錦標依然唔多樂觀

曼聯方面
傑斯叔近兩場已經有5個助攻
不過當中有4球都係對方後衛放生左佢
曼城同埋史篤城既防守球員要負上好大責任
但曼聯要靠36歲既佢撐場
難免令人擔心佢既中場既創造力
安達臣,華倫西亞同埋蘭尼短時間內似乎依然上位無期

兵工廠方面
文路尼絕對係球隊羸波既最大功臣
而佢地一隊波有3個好龍門絕對令好多領隊羨慕

另一方面,法比加斯同埋雲佩斯等人已有少少疲態
而雖然中前場傷兵陸續康復
但整體人腳始終稍嫌不足
隨住歐聯開始踢分組賽
傷兵同埋停賽既問題隨時玩死雲加
球隊要再次度過黑色11月絕對唔係奇事

2009-9-27

近兩日既新聞......

1)
列基美被指唔準備同小保加續約
佢最可能以自由身加盟哥連泰斯
而哥連泰斯被指打算出價1500萬歐元於季尾收購細哨
等佢同大哨重逢
不過細哨既阿哥兼經理人已經否認有關報導

2)
老馬決定重召奧迪加參加下星期對加納既友誼賽
由於同歐洲球會既比賽撞期
今場波既名單全數係國內球員
當中包括幾日前於國內練習賽再次一場波內3次宴客既巴勒莫

事緣老馬之後公布最後兩輪世界盃外圍賽生死戰既名單
佢首次徵召希古恩同埋恩蘇亞
亦重召艾馬同埋古迪利斯
不過列基美就依然落選

不過就有多人被棄用
當中包括辛尼迪,貝迪素,加高,達托羅,卡列素同埋之前提及既巴勒莫
俾人有亂點鴛鴦既感覺

另一方面,國內民意調查顯示有67%既球迷想佢落台

3)
英格蘭聯賽盃第4圈完成抽籤
利物浦將要作客硬撼阿仙奴

4)
薜羅拔圖放風想重返國家隊

5)
愛爾蘭足總宣布同查柏東尼續約到2012年

6)
幾間球會既高層消息......

諾士郡既新任主席查保寧以及另一高層羅素京治
因為過唔到聯賽賽會既人格測試
令聯賽賽會有有權否決諾士郡既易主

不過艾歷臣似乎未受事件影響
有報導指佢打算搵文仙尼執教

而英超聯賽會正式批准楊家誠成為伯明翰董事

另一方面,法希姆透露準備於10月向樸茅注資5000萬鎊
去投資青訓以及改善設施

不過有報導指還樸茅需要於兩至三星期內籌旗600萬鎊還債
否則可能被申請破產以及於聯賽被扣10分

7)
曉頓表示仿希望紐卡素可以引入新球員
不過亦承認現時冇其他接近完成既轉會

8)
柏圖,科蘭同埋基奧雲尼都同意同球隊續約

9)
保頓以及布力般流浪都被指有興趣於1月羅致喀麥隆中場艾文拿
不過貝迪斯730萬鎊既叫價就可能成為交易障礙

10)
雲加表示決定放棄引入查馬克

11)
麥阿里士打拒絕蘇格蘭足總既邀請
佢暗示即將有英國球會俾 offer 佢

12)
韋斯咸,葉士域治以及洛杉磯銀河都被指有興趣引入蘇甘保

13)
烏化奴斯自由身離開費倫天拿後曾協議加盟西維爾
但最終反口同馬體會簽約
被判要賠償西維爾87萬5000歐元兼俾埋堂費

14)
由於堅韋尼鍾斯既表現未如理想
布魯士暗示可能於1月賣走佢套現

另一方面,英國傳媒有時吹水真係吹得好離譜
竟然話國米,巴塞同埋拜仁都有興趣羅致卡達莫

15)
由於開咧脫腳
消息指如果拿玻里今晚羸唔到錫耶納
鄧納東尼就會被炒

16)
祖雲達斯被指打算於季尾羅致彭迪夫同埋祖維迪

而前者同埋列迪斯馬近日要求可以重返球隊
否則會要求同拉素提前解約

17)
東尼由於不受重用
可能於1月選擇轉投韋斯咸

18)
幾單球壇既負面新聞......

歐洲足協證實近年有40場歐聯以及歐協賽事涉嫌打假波
當中被調查既主要係東歐球隊

而東帝汶涉嫌派左9名超齡球員參加亞洲U-16既賽事

另一方面,球登堡龍門基斯甸臣就仲搞笑
為左令龍門縮窄竟然私自移動龍門柱既位置

p.s.:
前阿仙奴名宿卜比威爾遜每年都搵球圈中人創作油畫去公開拍賣籌款
幾年前電視都介紹過亨利點樣用踢波既方法畫油畫
今年亨利再次參加之餘
原來仲有柏金,禾確特同埋費sir
有興趣去以下網址睇下
www.willowfoundation.org.uk/artofsport

2009-9-25

1)
蘇斯達被傳可能接手馬體會

2)
馬斯查蘭奴涉嫌用上臂向碧福特抽水
英格蘭足總最終決定宣布唔會抽後算帳

3)
雖然拉樸達上星期表示唔會於1月入貨
不過仍有傳聞指哥迪奧拿要求球會於1月向阿積士收購射手蘇亞雷斯

另一方面,現時被外借到桑坦德既軒歷基表明下季唔接受繼續被外借

4)
菲臘布朗下台壓力越來越大
侯城方面就聲言會繼續支持佢領軍

5)
紐卡素終於落實借用希活

6)
意大利傳媒發現曼聯派球探觀察咸錫既表現
另一方面,雲達沙就可能再續約多1季

7)
雲達華治勢於1月離隊
愛華頓就被指有興趣接貨

8)
哈利列納話雖然好欣賞蘇甘保
不過唔打算於1月引入這名舊部屬
而阿蘇終於解話離開諾士郡
係因為球會冇履行承諾引入球星爭取升班

9)
黑池既黑人球員J.烏爾於作客對史篤城既聯賽盃賽事
被主隊1名球迷以種族歧視行為侮辱
事後史篤城向佢道歉之餘
仲準備罰而家保釋候查既搞事球迷終身不得入場睇波

10)
阿仙奴被指將於1月向西維爾收購22歲阿根廷中堅法斯奧
亦可以出任防中既佢本身有意大利護照而唔當係外援
兵工廠亦睇中標準烈治既17歲法辦後衛 E.文加拉

另一方面,波爾多表明唔會於今季內放走查馬克
佢既既會長 Jean-Louis Triaud 批評雲加既收購手段

11)
迪根士文既經理人透露這名荷蘭中場好可能於季尾以自由身加盟華倫西亞

12)
布魯士以唔多人用為理由拒絕將大衛希利以及D.梅菲外借
佢兩個分別受到高雲地利同埋葉士域治既垂青

13)
艾文達雖然一直同波爾多扯上關係兼表現平平
不過保頓方面依然表示唔準備放人

另一方面,貝迪斯25歲西班牙左閘維加被指成為佢地既增兵對象

14)
積基卡俾3個賊持刀入屋打劫

15)
雲布頓表態想同拜仁續約到收山

p.s.:
1)
馬斯查蘭奴涉嫌用上臂向碧福特抽水
英格蘭足總最終決定宣布唔會抽後算帳
咁都冇事真係算佢好彩

2)
基瑾追討約900萬鎊賠償既官司於英國時間今日宣判
消息指如果紐記敗訴
艾殊利可能決定同意紐記俾接管既安排
(如果易主就當然唔到佢話事啦)
而紐記將於聯實俾扣10分

而紐記依然欠落好多街數
加上人工支出唔輕
即使入場球迷數字高企都幫補唔晒

似乎即使Barry Moat 成功收購既呼聲又越來越高之際
紐記仍有幾多難題要面對

2009-9-24

1)
蘇甘保落實離開諾士郡
佢既離隊原因有3個版本

一係佢唔滿意球會大隻講冇大手搵球星加盟
以及冇撥款改善設施

二係諾士郡覺得佢冇料到
而以未能配合球隊長遠發展為理由同佢解約
事實上上場輸波後麥柏蘭都同傳媒講
話一見對手空襲就驚會失波

三係蘇甘保覺得自己年老力衰兼不在狀態
所以向諾士郡請辭

阿蘇既去向亦有兩個版本
一係退休
二係返英超落班或者再次降格加盟英冠既紐卡素
不過前題係由於佢於轉會限期後先解約
要等到1月轉會市場重開先可以正式加盟新球隊

2)
蒙蘇從他信手上再收購餘下10%曼城股份
已經正式全資擁有曼城

3)
消息指保羅赫特被指將被樸茅解僱
而荷度同埋奧拉利就被傳係接手人選

4)
馬體會開季成績唔理想
傳聞佢地可能搵阿拉干尼斯取代列仙奴

5)
麥基迪被傳成為多間球會既1000萬歐元增兵對象
當中包括拜仁,漢堡,波爾多,韋斯咸同埋熱刺

6)
白賴仁笠臣落實執教泰國國家隊
雙方簽約5年

7)
曼聯既龍門教練 E.Steele 暗示艾堅菲夫並唔係佢地既新龍門人選

8)
摩連拿路被傳可能為左出場機會而轉投羅馬

另外,老婦人可能會繼續森巴化
佢地搵左J.Chiavari 專責引入森巴年青球員
這名巴西球探隨即向佢地推薦山度士既17歲射手尼爾馬
以及甘美奧19歲中堅 M.費蘭迪斯

9)
西維爾被指有興趣引入迪施高

10)
拉科魯尼亞準備於1月再次向熱刺收購杜斯山度士

11)
漢堡搵左施摩拉歷克參加試腳

12)
費倫天拿獲准興建新球場

另一方面,基拿甸奴因為上場歐聯開肘打人而被罰停賽兩場

13)
巴洛迪利被指成為巴塞隆拿,阿仙奴同埋車路士既羅致對象

14)
森多利亞方面表示卡斯辛奴既贖身費約2000萬歐元
而皇馬可分到當中既500萬歐元

15)
楊先生轄下既弘鋒國際控股原先佔伯明翰30%股份
而家宣布成功買入51.7%股份
總持股量為81.7%

16)
莫斯科中央陸軍既塞爾維亞右翼 M.卡斯錫被指將於1月加盟AC米蘭
轉會費約1500萬歐元
而由於拿維斯季尾勢必離隊
紅黑兵團亦打算同國米以及祖雲達斯爭奪這名阿根廷球星

17)
馬斯查蘭奴於對列斯時向碧福特抽水
可能被抽後算帳

18)
迪奧夫接受調查交代涉嫌以種族歧視字眼鬧執波仔一事
同時透露之後有人從看台掟香蕉侮辱佢

19)
卡坦尼亞射手兼隊長既馬斯卡拉被指成為巴黎聖日耳門既新箭頭人選

20)
愛華頓被指打算從甘靈咸引入22歲射手S.積臣

21)
達葛治以自由身加盟標準烈治1年

22)
加拉塔沙雷,樸茅同埋諾士郡都被傳準備羅致自由身既米高波爾

23)
拜仁可能用雲昇加錢同史浩克04交換紐亞

24)
賓菲加引入雷沙奧既18歲細佬 A.施華

p.s.:
1)
羅馬里奧正式加入巴西左翼政黨社會黨
但就仲未落實參選
一個連贍養費同埋稅款都走數既人去參政
有幾多人肯放心選佢呀?

2)
竟然命令旗下車手炒車搵著數既比亞托利
已經被FIA無限期逐出車壇
而家更可能要被迫離開昆士伯流浪
兩個字:抵死!

3)
先形勢佔優咁同中國打和
再炒香港3蛋
小弟真係好想知東帝汶U-16咩料

2009-9-23

1)
消息指 Barry Moat 拉到美國資金 back up
有力於今個星期內完成收購紐卡素

2)
英格蘭足總決定大事化小
比拿美,加利仔同埋曼聯都唔會被起訴
比拿美被指襲擊1個衝落場既曼聯球迷
加利仔就衰挑釁曼城球迷以及侮辱對手
而有曼聯球迷就涉嫌掟銀仔誤中加拉度
足總決定發3封警告信就當做左嘢

另一方面,第4旁證同費sir有講有水既同時叫曉士收聲
曼城決定以有違球賽公平為理由作出投訴

3)
早前同AC米蘭扯上關係佩奧爾被傳亦有興趣轉戰英超

4)
雖然紐卡素同埋森林一直都有興趣借用 L.確特
不過史篤城方面已經表態唔會放人

5)
蘇格蘭足總打算搵麥阿里士打加入國家隊教練團

6)
根據西班牙球隊既規定球員可以分到15%轉會費
所以伊度奧一直要求巴塞補水300萬歐元俾佢
不過巴塞以條例只包括國內轉會為理由而拒絕
消息指伊度奧決定以法律方法解決問題

7)
楊先生透過泓鋒國際控股表示
收購伯明翰既交易將如期於6/10完成

8)
蘇甘保忽然被傳可能同諾士郡解約

9)
阿古路再次被傳於季尾離隊
報導指曼聯將係佢既下一站

10)
加利卡希爾之前已一直被指係兵工廠既收購對象
而家連祖雲達斯同埋AC米蘭都被傳有意帶佢去意甲

11)
巴斯利同高層開會後決定繼續執教小保加

12)
愛華頓再次被指有興趣從高雲地利引入韋斯特活

13)
細哨親身否認退休傳聞

14)
唐靈預計可以提前於11月復出

p.s.:
英國有傳媒同曼聯計數
指出如果曼聯於主場羸唔到波
球證補時有偏長既情況
令人感覺球證要曼聯羸波先肯吹完場雞

亦有分析指向來出名係曼聯球迷既萊利升職做左球證主管
比佢以前例牌偏幫曼聯帶來更大既影響

先講第一點
小弟始終認為曼撤斯特打呲既補時冇問題
而主隊羸唔到波既時候補時比較長
於英超亦唔係曼聯先有既唔公平問題

不過第二點就攞你命3000
當年曼聯迷萊利黑哨到離譜
04-05年曼聯終止兵工廠49場不敗
都係因為佢選擇性視而不見同埋無中生有
而家條友掛雞但紮職
小弟就覺得長遠而言曼聯會有一定著數
雖然小弟亦真係有必要再次強調曼聯於曼城打呲冇佔甜頭

2009-9-22

近兩日既新聞......

1)
波比sir既追思會於尋日舉行
葉士域治之後會為佢樹立一個新既銅像

另一方面,葉士域治對紐卡素既特別版波衫
原來唔會公開發售
而球員會於賽後將波衫拍賣
所得善款將撥捐 'The Sir Bobby Robson Foundation'

2)
紅軍打算為新球場出售20年冠名權
佢地叫價2億4000萬鎊

3)
國際足協表示將會調查15宗涉嫌違規轉會
當中部份同英超球會有關

4)
英超賽會將於11月再次開會
商討些路迪同埋格流加盟英超既可能性

5)
近日特別多球星既負面新聞......

比拿美涉嫌襲擊球迷
不過曼城表明唔會對佢處分

迪奧夫亦被指不滿執波仔拖時間而發火鬧佢
當中仲涉及種族歧視既字眼
佢已經俾差佬搵佢問話
件事而家仲處於調查階段

而比佢兩個更衰既艾迪巴約又有新聞
兵工廠官網踢爆佢於上季尾不問自取攞走晒更衣室所有波 boot

另一方面,細哨被傳可能因為心灰已冷而提早收山
不過李安納度已經否認有關報導

6)
軒迪克版傳將於世界盃後重返車路士出任總監
負責球員買賣以及青訓

7)
紐記第n次被傳賣盤
而希活就被指即將以借用形式加盟3個月

8)
經過今個暑假既揮霍
皇馬負債再創新高至3億鎊

9)
羅馬被踢爆半年冇糧出

10)
收購諾士郡既中東財團涉嫌違規被查

11)
阿特蘭大同埋波琴分別炒左加古斯以及高拿(唔係前德國中堅)
前者仲即刻搵到干地接手

12)
蘇拿否認艾殊頓將會退休

13)
雲佬再次受傷要避戰6星期
而梅斯達亦要休息5至6星期

14)
Audi準備入股拜仁

15)
伯明翰被指有興趣羅致奧雲同埋艾美奧比

16)
紐根特表應希望可以正式轉會到般尼

17)
蒙達利被指成為熱刺既增兵對象

18)
薩羅斯被指想向阿仙奴借用卡路士韋拿

19)
侯城再次被指有興趣由李斯特城引入 Matt Fryatt

20)
巴塞隆拿被指有興趣收購施素高

p.s.:
早幾日收到廣告知道有銀行推出維拉獎賞 Master Card
只要於收 card 後90日內消費滿200鎊
就可以先到先得既形式得到維拉82年歐冠盃(即係歐聯前身)復刻版波衫
件衫仲有當時隊長摩添馬既簽名

異常興奮之際先發現原來優惠只限英國居民!!!

2009-9-21

幾場英國波想講......

1) 米堡對西布朗

唔計開賽初段既虛火
前者既表現屎到唔似英冠球隊
除左第一球冇運之外
其餘全部都係輸自己
解釋佢地點解同上季輸俾車仔咁一樣吞足5隻蛋
希望修夫基肯俾機會賀迪
以及可以成功從葉士域治挖走麥歐尼

而冇左奧尼爾既中前場又係令人扯火
艾卡大住個肚都要走上走落
柔弱既阿當莊臣又要有波到腳先有得發圍
前線幾隻快馬又只係識拉邊兼唔識入波
唯有寄望新兵卡雷布科蘭可以幫到吓手

2) 阿仙奴對韋根

後者今季既踢法其實幾好睇
不過遇上更高級數既兵工廠就即刻收皮
而佢地既防線隨住布魯士離隊後嚴重走樣
隨時有護級壓力

3) 利物浦對韋斯咸

利記羸波依然令小弟好唔開心
因為防線繼續輸死球(其實係高波先岩!)
而加歷查既表現持續下滑
已經係球隊防線既頭號隱憂

另一方面,沙雲軒斯絕對係今場波既最佳球員
靈活又有膽色既佢先後玩殘馬斯查蘭奴同埋一對中堅
佢由箭頭轉踢翼鋒都掂
隨時成為另一個禾確特或者艾朗連儂

4) 曼聯對曼城

客隊一眾防守球員排住隊出錯
而主隊亦超級好客
賓科士打同埋里奧費甸南輸得仲肉酸

傑斯,費查,艾夫蘭,泰維斯同埋比拿美相比之下就 sharp 得多
當中以前者最堅
第一球趁米卡李察士掛住鬧人快手掟界外球就係羸經驗
而之後曼城兩次走空佢同埋一次死球就俾機會佢3度助攻
不過曼城連個老嘢都睇唔實又係自己抵死

場波另一關鍵係球證艾堅遜
小弟印象曼聯95分20秒入波(有錯請指正!)
艾堅遜聲稱補上補係因為曼城於89分幾鐘入波後既慶祝用左時間
曉士聲稱當時球隊用左45秒慶祝
計埋卡域克入替要補多30秒
艾堅遜到入波時間都唔吹雞可能只係巧合
曉士要怨就怨米卡李察士同埋胡禮菲臘斯走漏左奧雲

而家賽後焦點唔止艾堅遜
仲有半場時候無辜成為當災白狗既加拉度
同埋涉嫌打人既比拿美
一場充斥防守失誤同埋以暴力事件告終既打呲
即使峰迴路轉既4:3賽果都唔令小弟覺得係經典

5) 車路士對熱刺

冇左摩迪歷既熱刺
輸波原因同上場輸俾曼聯相若
不過小弟都同意佢地唔值捧蛋

印象中今場係車路士踢得最好既一場聯賽
當中關鍵係出色既側擊
兩閘攻得徹底之餘
杜奧巴亦好勤力於兩邊推進

p.s.:
曼聯同埋曼城只係比車仔失多3分
利記,熱刺同埋兵工廠亦只係失多6分
今季聯賽既關鍵應該係現時前7加上愛華頓之間既對壘

車仔同埋曼聯已經羸左熱刺
後者仲ko埋兵工廠同埋曼城
兩者其實已有一定優勢
相反利記同埋兵工廠已先後兩次輸俾前列對手
爭標路途既劣勢絕對唔只係眼前既6分

2009-9-20

近兩日既新聞......

1)
朗拿度表示仍然希望參加南非世界盃
而卡路士被傳可能會成為佢既球會隊友

2)
艾禾卡特提前接手比利時

3)
幾段AC米蘭既增兵傳聞......

李安納度向球會推薦靴蘭尼斯同埋拉菲爾兩名巴西球員
而有消息指如果亨特拉爾持續冇表現
佢地將再次向禾夫斯堡提出收購迪施高

另外,特魯瓦既17歲法國前鋒S.基達被指成為米蘭雙雄既羅致對象
同球會將於季尾約滿既佢仲未同球會達成續約協議

4)
消息指皇馬於暑假曾考慮收購科蘭

5)
奧達文迪被傳將轉戰歐洲
當中祖雲達斯係佢最有可能既落腳地

6)
辛尼特被指打算於1月引入柏夫奴真高以改善攻力

7)
桑拿士早前接受訪問表示唔會再教波
原因係佢已經再冇推動力同埋耐性同球員合作
而佢又會覺得球員對佢有太多要求同埋過高期望

8)
雖然球隊同羅賓奴以及拉菲爾扯上關係
不過拉樸達表明球會唔會於1月增兵

9)
比斯安奴同埋森伯斯奧將於季尾同巴勒莫約滿
傳聞拉素打算出年暑假一併引入佢地

10)
雖然韋拉曾經暗示今季係佢最後一季於歐洲落班
不過近日英國傳媒仍然指佢可能回歸英超
選擇加盟阿仙奴或者熱刺

另一方面,兵工廠決定將小將湯馬士外借俾黑池多1個月
亦搵左越南球會黃安嘉萊既美藉越南翼鋒李阮參加試腳
印象中這名身型比較矮小曾經隨燕豪芬訪港踢7人賽
佢速度,腳法同埋膽色兼備
係衰個格幾臭串

11)
泰尼奧表應希望正式轉會伯明翰

12)
費倫天拿被指準備同國米爭奪彭迪夫
佢地亦打算於1月再次向華倫西亞以及波圖分別收購米基爾同埋費蘭度

13)
摩納哥同埋利禾奴都有興趣引入自由身瑞士中場禾高

14)
李奧曲加同奧尼爾衝突後
隨即被傳將以300萬鎊被賣到愛華頓

p.s.:
溫馨提示:
今晚睇曼徹斯特打呲既同時
都要留意同一時段劉翔疑似托市既復出

2009-9-18

近幾日既新聞......

1)
利物浦其中一個美國老闆赫基斯
打算將25%利記股份以1億鎊既價錢賣俾一個中東財團

2)
美斯落實同巴塞隆拿續約至2016年
佢既贖身費高達2億5000萬歐元

3)
車路士證實CEO簡安將從31/10起離隊
佢既位置將由執行總監哥利接任
不過佢仍會擔任非執行董事同埋代表車仔出席歐洲足協既會議
收到200萬鎊分手費既佢冇解釋離職原因
只係表示會於休息將決定去向
英國傳媒估計佢既下一站可能係曼城

4)
艾迪巴約承認踢傷雲佩斯而被判停賽3場
而佢挑釁球迷既指控就仍處於調查階段
曉士就透露曼城將會就佢行為不檢既指控提出上訴

另一方面,兵工廠球迷當日曾經投擲硬物向艾迪巴約報復
曼城已經聯絡曼徹斯特警方要求徹查

5)
薛高落實接手奧林比亞高斯
雙方簽約兩年

6)
隨住伯明翰易主
佢地既主席蘇利雲同埋CEO Karren Brandy 宣佈離隊

7)
車路士準備從克羅地亞球會沙柏鍚引入17歲門將迪拉克
由於車路士被罰唔可以於未來兩次轉會市場重開既時候引入球員
所以這名克羅地亞史上最年青入選大國腳既球員將於2011年先會正式加盟

8)
利物浦被傳睇中巴勒莫既丹麥中堅卡積
而迪馬利亞亦同佢地扯上關係
不過這名阿根廷球星既贖身費高達4000萬歐元

9)
曼聯同埋阿仙奴都被指睇中拉素既烏拉圭龍門梅斯利亞

10)
格蘭可能接手波蘭國家隊

11)
佐治貝利雖然未能領軍出戰世界盃
但仍然得到當地足總留用

12)
菲臘仔既傷勢冇當初估計咁嚴重
預算可於聖誕賽期重返球隊
而愛華頓為左補充後防實力而同尼爾簽約1年

另一方面,佢地搵左高路高路既智利18歲小將米蘭參加試腳

13)
想講下幾隊英冠球隊既增兵情況......

米堡落實從普雷斯頓借用聖列加
而佢地之前既另一目標基辛尼舒韋利
就最終被外借到紐卡素3個月

另外,米堡原本想借用希古臣
不過佢決定重返母會屈福特
令佢地改為從侯城借用卡蘭布科蘭

打呲郡亦爭羸佢地同埋紐記成功借用年青射手禾漢3個月
而同時羅致D.卡馬拉失敗既紐記就被指準備從維拉引入希活
另一方面,卡迪夫城就成為最新一間有興趣借用禾基斯既英冠球會

錫菲聯方面就因為薛圖反對離開保頓而衰收尾

14)
拉菲爾被傳將於1月轉投拜仁或者巴塞隆拿

15)
卡比路表態將於同英格蘭約滿後退休
唔會考慮執教意大利

16)
拉素被指考慮出價1000萬歐元收購雲達華治

17)
消息指白賴仁笠臣原則上同意接手泰國國家隊
佢下星期將同泰國足總傾個人條件

18)
史當頓自薦執教洛達咸

19)
勒哈弗爾控告費倫天拿3年前非法引入年青球員勒比亞
國際足協裁定紫百合須要賠償69萬歐元
這隊法乙球會亦被指準備投訴曼聯

20)
維度卡被指成為墨爾本勝利既增兵對象
不過佢既人工就成為合作障礙
而FC悉尼仍準備搵費高出山

21)
維拉被指可能爭羸車路士同埋曼城引入迪古士文

22)
法蘭高完成所有加盟韋斯咸既手續

23)
查馬克既經理人被指身在意大利同祖雲達斯會面
隨即有傳聞指這名摩洛哥射手成為老婦人既羅致對象
而雲加就透露會考慮於1月羅致佢

24)
亨格比因傷宣佈提前掛靴

25)
荷度決定協助英格蘭申辦2018年世界盃

26)
漢基蘭透露準備同富咸傾續約

p.s.:
紐卡素同埋葉士域治為左紀念波比sir
於下星期六既英冠聯賽對壘時都會著特別版波衫
波衫上既繡上 'Ipswich Town vs Newcastle United
September 26th, 2009' 既字樣
亦會繡上 'The Sir Bobby Robson Foundation'

小弟就對這件波衫好有興趣......

2009-9-17

想講下歐聯首輪分組賽……

尋晚身在茶餐廳睇波
左右兩邊既大電視分別播映兵工廠作客標準烈治
同埋國米大戰巴塞隆拿
小弟以二八之比既注意力睇晒兩場波

好在睇波前已經食晒個常餐
否則睇完兵工廠頭5分鐘輸兩球已經冇晒胃口
好多人見紅衫羸白衫兩球仲傻下傻下以為兵工廠領先

冇左4件主力既佢地慶幸落後得早
意味有幾十分鐘俾佢地反擊
不過佢地側擊本錢不足
面對對手既死守初時其實有少少老鼠拉龜
全靠賓特拿繼續敗家之餘亦有所貢獻
可以臨完半場前窄位攞遠柱射穿大細龍門
這個入球亦係全場既轉捩點

下半場標準烈治明顯進退失據
兵工廠既控球時間比上半場更多
最終全場控球時間更高達71%
而佢地亦有幾次於中路成功硬闖
不過最終入波都只係靠兩次死球
追成平手既入波仲有越位兼手球既嫌疑
似乎死球已係佢地重要既入球板斧

唔計攻守方面既瑕疵
亦唔好計較標準烈治實力一般
今場總算係兵工廠今季首次反勝
球隊亦總算於聯賽兩連敗之後止血

至於兩伊大戰方面
戲碼好吸引但來得唔岩時候
畢竟開咧幾個星期好難將狀態提升至 top fit

摩連奴賽後稱讚球隊死守得好
不過佢似乎冇唸過迫到佢地死守既巴塞更加厲害
巴塞雖然作客但形勢明顯佔優
當中主因係中場實力明顯佔優
沙維,耶耶托尼同埋基達組成既中場線
於技術同埋效率方面都佔優
美斯經常墮後幫手控球亦應記一功

國米既3個工兵築起第一度屏障
不過蒙達利只係A貨艾辛
而莫達如果係頂班貨
當年就唔會俾巴塞放棄
另外,辛尼迪36歲高齡都仲係必然主力
反映佢保養得宜之餘
球隊亦唔夠人才
甘比亞素養傷而韋拉又不復當年勇對國米影響絕對唔細

巴塞頭10分鐘已經有3次入波機會
唔講絕對唔知佢地作客聖西路
佢地全場形勢近乎七三之比
下半場仲一度將國米迫到幾後
最終羸唔到波只好怪自己多次失機
當中以伊巴謙莫域最令人失望
而恩尼斯達狀態唔足只係後備落場
兼且亨利勤力有餘但狀態不足
再加上國米防線蟻多褸死象
亦係國米力保主場不敗既原因

巴塞方面
前線多左伊巴謙莫域令風格更加技術化
不過佢狀態未足之餘
同隊友既默契亦只係一般
最終既化學作用仍然係個迷
而中場於進攻方面固然唔使擔心
不過幾度走甩史尼達就值得哥迪奧拿注意

而有睇小弟既 blog 都會知小弟對摩連奴旗下既國米向來評價一般
史尼達一定係佢地今季最重要既收購
不過中前場其餘人腳好一般只係靠勤力走位搵機會
未必夠力撕破一線球隊既防線

加上中場仍未有當打既硬朗防中
後防多左略嫌沉迷個人表現既盧斯奧
亦唔見得可以大幅提升球隊既防守能力
佢無論同捷禾,馬達拉斯同埋森美爾拍檔亦各有隱憂
難怪摩連奴會叫莫拉堤搵哈利波特執教先好去爭歐聯

最後想略為講多幾隊名牌
英超其餘3雄都收油羸1:0
應該同今季英超戰況激烈有關
如果識收識放先係現今稱霸實際足球既法門
咁對住蘇黎世都失兩球既皇馬
單靠質素狂入波都唔見得季尾既成績表會有保證

p.s.:
1)
有線發財立品將歐聯精華上載
http://sports.i-cable.com/uefa/ucl/index.php

2)
聽日先講新聞......
請見諒!

2009-9-15

近兩日既新聞......

1)
英超聯賽會下季起將有兩項新規定
一係佢地會要求各球會交數簿
如果有球會被發現有財政危機
佢地必要時將會阻止任何球員既轉會

二係規定球會提交25人名單
當中包括8個本土青訓球員
本土青訓球員既定義係指21歲前於英倫三島既球會效力至少3年
現時所以英超球會都有足夠本土青訓球員
不過利物浦同埋車路士只係僅僅夠數

2)
朴智星落實續約到2012年

而費sir被指決定於1月增兵
傳聞人選包括紐亞,艾菲費夫,大衛施華同埋法比安奴

另一方面,雖然維迪老婆表示英國唔岩佢生活
不過這名塞爾維亞中堅依然否認轉戰西甲既傳聞

3)
列貝利表示會同拜仁續約
而這間德國球會被指準備同利物浦爭奪阿歷士

4)
羅比堅尼被指成為些路迪既增兵對象

5)
法拔爆料AC米蘭有興趣羅致佢

6)
雲加表示將於年底前向加拿斯提供新合約
另一方面,兵工廠為伊度亞度向歐洲足協上訴得值

7)
加高同埋梅斯達被指打算於季尾離隊

8)
幾段紐卡素既消息......

消息指紐記同埋米堡都同意禾基斯既借用費
而D.卡馬拉亦同時同紐記扯上關係

而基瑾已循法律渠道向紐卡素索償1000萬鎊
亦即係餘下3年合約既總值

另一方面,拿鐵斯透露早前領導財團嘗試收購修咸頓既同時
亦有物色新領隊人選
當中史特根表示想休息一下而婉拒
而舒利亞同埋基瑾都有一定興趣接手
當中修咸頓仲係前者既母會

9)
奧林比亞高斯開咧脫腳
隨即決定同基斯巴亞解約

10)
查斯古特表示會再考慮離隊決定
而祖雲達斯就被傳於季尾收購羅斯

11)
艾迪巴約面臨停賽6場
當中踢傷雲佩斯以及挑釁兵工廠球迷各罰3場

12)
菲臘仔可能因膝部韌帶撕裂而提早收咧

2009-9-14

想講幾場英國波......

1) 曼城對阿仙奴

進攻係最佳防守
但亦要建基於穩固防守
兵工廠明顯因為防守不力而俾人炸左間廠

佢地冇左艾沙維
進攻即刻少左好多火力
路斯基只算係令人驚喜既及時雨
進攻失色原本唔使死
防守唔掂就大檸樂
後衛 marking 唔合格
加上冇好屏障依然貪勝不知輸
最終搞到佢地連續兩輪聯賽敗走曼徹斯特

輸波已經唔 happy
俾艾迪巴約咁樣搞事就真係幾晚都訓得唔安樂
佢老味踢傷法比加斯同埋雲佩斯
後者仲幾乎俾佢踢盲
入左波仲要跑咁遠串人
倒戈見得多
好似佢咁肯仆街就真係見都未見過
雖為佢仲死撐話自己唔應該被罰停賽

2) 熱刺對曼聯

熱刺輸波明顯因為輸中場
冇左莫迪歷即刻冇晒創造力
串演左中場既羅比堅尼只靠勤力根本幫唔到手
柏拉斯奧斯又因為搭飛機搭到個人散晒
結果一條中場冇晒創造力同埋機動力

偏偏對手曼聯踢出今季代表作
當中關鍵係貝碧托夫超勤力墮後幫手
如果佢場場都有咁既水準
費sir身體真係可以好好多
加上兩大元老齊齊有貨交
佢地靠控球能力已經玩殘連5成水準都冇既熱刺

就算後來史高斯兩黃一紅踢少個
熱刺亦冇餘力去緊迫對手
唔講真係唔知曼聯踢少個
估熱刺入 Big 4?
怕且只係費 sir 賽前出口術......

3) 卡迪夫城對紐卡素

紐記冇射手要改踢 4-5-1 都有波羸
明顯又係靠防守羸波
當中最終兩黃一紅既辣椒仔好搶
仲搶鏡過終於有建設既高路仙尼
當然史堤芬泰萊既涉嫌手球逃過大難
同埋對手把握力不足都係原因之一

紐記除左開咧俾西布朗入過波
之後5場都力保不失
一條英超防線於英冠明顯超班
事實上佢地亦比上季集中得多
加上佢地俾人感覺真係團結左好多
終於似返隊波

不過如果再挑剔少少
就會希望佢地可以為前線增兵
因為冇左艾美奧比同埋卡路爾開路
單靠有待浸淫既蘭格始終有所不足
傳聞侯城既卡辛成為佢地既最新目標
但曉頓透露佢地對黑池前都唔會有新球員
短期應變唯有要求辣椒仔(停賽後)同埋路蘭搵機會後上攻門

另一方面,曉頓證實佢仲未有得坐正
但只要繼續有貨交
加上包括史堤芬泰萊在內既幾個主力都開始好撐佢
小弟覺得佢值得於季內坐正

2009-9-13

近幾日既新聞......

1)
消息指渣打將成為利物浦既新贊助商
而每年既贊助費將高達2000萬鎊
早前保誠保險亦度同利記扯上關係

另外,為左增加人手
賓尼迪斯被指向於車路士苦無出場機會既阿歷士招手
佢亦率先拍板從修安聯以25萬鎊引入16歲射手尼高
另一方面,消息指巴布唔會如願被外借

2)
白禮達表示車路士因為非法引入年青球員
而被禁止增兵既處罰其實唔算嚴苛
佢認為應該要於聯賽扣分
而國際足協表明唔俾車仔提前重召外借球員

3)
傳聞AC米蘭已經同碧咸達成協議

4)
幾段紐卡素既消息......

紐卡素被指打算從史篤城借用L.確特
這名30歲中堅防守勇而不茅
已經有5年幾未收過牛肉乾之餘
職業生涯更從未攞過紅牌

佢阿哥係波比sir當年700萬鎊既重點收購
不過因為傷患而表現不濟

另外,早前被指有興趣收購紐記既美國財團再次同佢地扯上關係
今次既版本係艾殊利既發言人承認佢地有興趣收購紐記
報導仲話佢地有能力滿足肥佬既1億鎊要求

另一方面,維度卡決定舉家返澳洲生活
一般估計佢會加盟當地球會

5)
兵源不足既米堡繼續增兵
L.確特,麥歐尼同埋聖列加都被指係後防增兵選擇
而禾漢以及卡雷布科蘭就係新箭頭既考慮人選

當中紐卡素同埋森林亦睇中L.確特
而禾漢早前亦同前者扯上關係
但莫耶斯考慮將佢以300萬鎊賣斷令這名小將未能於轉會期限前離隊

6)
雲尼斯達萊暗示可能為左出場機會而轉投羅馬
這間首都球會一直希望搵多個射手
不過東尼早前拒絕加盟

7)
英國傳媒指曼城羅致泰維斯既價錢其實高達4700萬鎊
當中如果佢地之後羸到歐聯
仲要再俾多350萬鎊

8)
皇馬方面計劃改建巴拿貝球場

9)
莫耶斯透露艾迪達應該要再養傷多半年
這名西班牙中場自從2月起一直缺陣

10)
韋斯咸落實同法蘭高簽約兩年

11)
舒靈咸正式復出
代表地區球會 Beckenham Town 出賽

12)
法比加斯表示仲未決定下季既去向
而伊保爾被指成為祖雲達斯既增兵對象

另一方面,佐羅既傷勢比預期嚴重
今季都應該唔可以復出

13)
雲達華治表示如果離隊
只會考慮轉戰英超或者德甲

14)
古士文落實以自由身加盟FC多倫多

15)
雲達根轉戰英冠,同史雲斯簽生約死約各1年
佢當年同史尼達,雲達華治同埋雲達美迪齊名
不過同後者一樣早熟早殘

16)
樸茅方面表示會重用保羅赫特
而奧哈拉表示考慮正式轉投樸茅

17)
由於尼爾要求4萬鎊週薪
新特蘭決定放棄引入這名澳洲後衛

18)
傳聞阿根廷足總決定唔俾馬勒當拿選兵
列基美同埋希古恩都有望重返國家隊
前者同老馬好多牙齒印
不過就同足總會長格朗當拿好 friend

p.s.:
賓特拿將早前對葡萄牙用過既波衫同埋球靴擺上 e-bay 拍賣
當中截稿前佢對招牌 pink boot 已收到64次出價
價錢已經俾人炒到3750蚊美金
限期係英國時間今日19:00
路斯基有興趣可以去以下網址競投
http://cgi.ebay.co.uk/Nicklas-Bendtner-s-orginal-pink-football-boots_W0QQitemZ120466484770QQcmdZViewItemQQptZUS_SM_Fan_Shop?hash=item1c0c5cae22&_trksid=p3286.c0.m14

2009-9-11

幾場波想講......

1) 巴拉圭對阿根廷

究竟有冇人俾意見老馬選兵同埋排陣
抑或根本冇人夠膽出聲
又或者佢既幫手全部都回晒塘或者白支人工

今場老馬既排陣又係令人摸不著頭腦
今次又有零經驗球員正選登場
仲要係龍門既羅美路

後防大執位
軒斯都唔知有幾耐冇踢過中堅
而杜明基斯冇左奧達文迪做拍檔
連於沙士菲培養既默契都冇埋
巴拉圭一對箭頭不斷走位已經玩死佢地

而中場老馬識用加高加強搶截
不過人地簡單於兩翼進攻
已可以避免於中場同阿根廷慢慢玩
而辛尼迪同埋柏柏明顯未能應付對方頻密既側擊
特別係36歲既前者

而老馬既其餘中場人選包括華朗以及達托羅
不過前者因為冇波到腳而未能發揮威力
而兩邊攻勢亦因而失去平衡
更加重一對閘位球員既壓力

前線由阿古路代替泰維斯
前者冇後者咁肯跑動
令巴拉圭可以重點對付美斯

結果阿根廷既表現比幾日前對巴西更差
半場(全場亦然)只輸1球完係係輸少當羸

老馬半場原本仲有機會撥亂反正
不過佢用拿維斯入替達托羅
而唔肯收起有黃牌在身,兼未能發揮作用既華朗
不單幫唔到球隊
更埋下華朗兩黃一紅既伏線

當連華朗都俾人趕埋出場
老馬先換入巴勒莫改踢簡單足球
尾後更派36歲新丁中堅 R.Schiavi 串演中堅
不過冇左華朗(同埋列基美)既阿根廷又冇人特別擅長死球
於是者阿根廷全場連一次具威脅既攻門都冇

老馬賽後批評傳媒令球員嚴重受壓而失準
不過其實最受壓既應該係佢本人
上場輸俾巴西後於更衣室當住球員痛哭
既係性情中人既表現
亦係EQ低既例子

而家易帥對球隊唔係好事
亦唔慌有人肯執爛攤子
小弟只係希望老馬會履行承諾
同佢班軍師檢討得失
但聽完老馬賽後又話唔介意踢附加賽
個心隨即冷左一截
瞄準太陽都仲可能射得中隻雀
只係瞄住隻雀就隨時射中地下既石頭
難怪87%既受訪者希望佢下台

2) 英格蘭對克羅地亞

計表現絕對係近年代表作
不過對手讓齊車馬炮
加上對手早段已經被判死刑而冇咩鬥心
球隊同埋傳媒都唔應該將勝利既意義無限放大

而球隊仍有隱憂
龍門冇好人選
卡比路又唔肯破格徵召艾蒙尼亞
右路既格連莊臣助攻力係好強
不過亦帶來俾人偷襲既漏洞
而艾朗連儂同埋禾確特係唔係真係出到大場面仍成疑問
碧咸既狀態亦令人唔放心

再加上各自起孖都唔足以令人相信
謝拉特同埋林伯特從此合作無間
而小弟亦對朗尼既穩定性存有疑問

好記得'我們的足球場'鹿野領隊既名言:
當覺得與'勝出無異'之時,亦等同已經失敗!

3) 沙地阿拉伯對巴林

巴林成功上位或多或少因為西亞球隊表現仆直
但當地政府同埋有心人既支持亦好重要
由80年代初期初次搵英國教練教佢地既業餘球員
到近年既職業化兼且相繼搵東歐以及德國既教練
令佢地水準提升之餘亦學到相當機動既踢法

佢地靈活運用 3-4-3 同埋 5-4-1 陣式
加上有幾件非洲歸化兵
進攻又有好波之人沙爾文同埋A.胡比爾
防守紀律性令佢地對住亞洲一線球隊都有本事保住唔輸

繼90年代既日本
巴林用左大約10年時間
就由連約旦同埋敍利亞都打唔羸既弱隊
發展到叫糊打入世界盃決賽週既亞洲一線球隊
證明肯做就有機

p.s.:
11/9事件不經不覺過左8年......

2009-9-10

1)
嘉士伯唔肯將每年720萬鎊贊助費 double
所以決定下季起唔再同利物浦合作
轉而以4年5000萬鎊既條件贊助英格蘭足總

2)
由於近期戰績插手兼同球員不和
莫斯科中央陸軍決定同薜高解約
佢地隨即搵到拉莫斯接手
同這名西班牙教頭簽一份兩個月既短期合約
佢前一日先同AC米蘭扯上關係

3)
消息指如果英格蘭成功羸取世界盃
卡比路將可獲史上最高既500萬鎊獎金

4)
歐洲球會委員會早前於周年大會上達成共識
避免大球會無限制地收購球員

5)
楊家誠收購伯明翰既計劃將會壓後到5/10
而楊先生旗下既泓鋒國際就搵左麥馬拿文出任執行董事
而伯明翰亦將於1月收購4名球員
當中包括中堅同埋中場各一以及兩個前鋒

6)
上季既3隊降班馬各有借用對象......

西布朗被指打算向富咸借用卡馬拉

米堡亦有多個傳聞借用目標
當中包括希古臣,基辛尼舒韋利,奧拜恩,馬華龍京治同埋禾基斯
紐卡素亦被指對後3者有一定興趣
而高雲地利亦被指想同紐記爭大衛希利

7)
再講幾段紐卡素幾段花邊新聞......

先講艾殊利
佢旗下既體育用品公司 Sports Direct 捲入一索詐騙案
有關當局已經接手調查

而肥佬亦被指由於同 Barry Moat 關係友好
所以前者有可能於交易完全前
接納後者管理上既意見外
更可能邀請後者臨時加入管理層

另外,A高既索爆老婆 Cheryl 既家鄉原來係紐卡素
佢被指想同財團合作收購紐記
傳聞仲話佢會出價350萬鎊年薪搵老公加盟

另一方面,R.艾利洛回歸紐卡素
不過只係以兼職形式出任體能教練

8)
由於球隊肯定無緣決賽週
波蘭足總決定開除比赫加

9)
由於兩名年青球員 L.侯頓同埋 G.Swann 被曼城搶走
列斯透過仲裁委員會要求賠償

而費倫天拿早前被曼聯搶走16歲球員科尼西亞
亦準備向歐洲足協投訴

10)
軒迪克暗示將來再執教英超球會
佢隨即被傳有意再次執教車仔

11)
侯城邀請曼城棄將格魯巴參加試腳
這名26歲巴西中堅亦可客串左閘

12)
東尼表示會為左爭取出場機會而離隊

13)
水晶宮射手摩西斯被指吸引多間英超球會既注意
當中包括阿仙奴,熱刺,韋根同埋愛華頓
當中後者更被傳準備於1月出價500萬鎊收購佢

14)
班士利落實搵到前曼聯射手羅賓斯接手

15)
梅度由於冇能力賠償車路士1460萬鎊
所以佢向國際足協提出用禁毒工作代替巨額罰款
亦保證會捐款幫助青少年戒毒機構

16)
傳聞國米有意羅致卡斯辛奴
不過森多利亞已經表明唔會放人

17)
布魯士未能於轉會限期前引入費古羅亞
傳聞佢將於1月提出以600萬鎊收購這名舊部屬
而佢亦被指對米堡新星阿當莊臣有一定興趣

18)
碧咸被指打算收購美國甲組球會蒙特利爾

19)
丹尼韋伯以自由身加盟樸茅兩年
這名前鋒之前曾經效力屈福特以及錫菲聯

20)
泰國足總唔想列特分心以兼任形式繼續執教國家隊
決定同佢提前解約
佢地打算搵白賴仁笠臣接手

21)
居迪戴維斯可能因為膊頭傷患而要養傷至1月

p.s.:
週中賽後感聽日先再講

2009-9-9

1)
西班牙傳媒報導如果戰績持續不振
AC米蘭將會搵拉莫斯接手
而佢地亦被指視迪斯基爾同埋祖維迪為增兵人選

2)
麥馬拿文可能會出任伯明翰既推廣大使

3)
祖雲達斯被指打算用泰亞高同羅馬交換馬高莫達

4)
卡路士好可能轉投英乙諾士郡

5)
馬體會打算同自由身既尼爾簽約3年
佢既年薪約220萬歐元

6)
傑特落實加盟曼城
不過唔係做曉士既副手
而係出任技術總監

7)
查馬克可能選擇同波爾多續約到2012年
不過合約就要訂明波爾多唔可以將佢既贖身費定得太高

8)
奧沙可能要養傷兩個月
令曼聯防線短期內都好難齊腳

p.s.:
1)
越來越多港甲球隊搵明星宣傳
當中晨曦向來最多明星捧場
有網民仲幫明星足球隊起個名叫晨曦B隊
但如果好似今日生果報報導
為左等班撐場拜神既明星有波踢
而搞到班球員只有20分鐘踩草練波
未免本末倒置

反而小弟覺得公民搵鄭麗莎撐場就幾有新意
佢雖然講嘢唔叻,又唔見得好索
不過玩健美既佢身型比好多球員都 fit 得多
可能至少激發到球員肯同6舊(或者8舊)腹肌團聚

2)
消息指老馬決定更換幾個位置
當中一對沙士菲中堅都應該冇份
不過取而代之既係高路仙尼
同埋36歲都係國際賽零經驗既 R.Schiavi

對玻利維亞同埋巴西好大程度都因為後防用新人而出事
唔見棺材唔流眼淚
似乎唔足以形容老馬
又或者小弟應該將棺材比喻為外圍賽出局

2009-9-8

幾日冇講過新聞......

1)
先講幾段非法羅致球員既新聞......

曼聯聲稱跟足規矩挖角以及警告勒哈弗爾唔好再唱衰佢地
不過這暗法乙球會一於少理
仲透露紅魔為左羅致普巴
以20萬歐元同埋一間屋收買球員既父母

英乙球會克魯公開指責利物浦曾經非法斟酌小將奇頓
不過佢地就未有正式向英格蘭足總作出投訴

而法國一間業餘球會 ASPTT 馬賽指控車路士為左搶走1名11歲球員
以樓同埋車收買球員既父母
不過這間業餘球會本身並冇同球員簽約
令車仔可能避過一劫
曼城亦要求車仔為搶走史杜列治而賠錢

而有消息指車仔為左收購球員應急
可能會借故將個 case 拖耐少少
等佢地可以於1月繼續買球員

曼城竟成為最新一間被牽連既球會
雷恩投訴佢地使副手搶走17歲後衛 J.Helan

另一方面,愛華頓從列斯挖角16歲後衛加畢特
獲裁定要賠償列斯60萬鎊
而之後既90萬鎊就要視乎這名英格蘭小國腳既表現
列斯方面表示希望足總考慮引入扣分制度以收阻嚇作用

2)
艾殊利被指再將收購期限延至21/9
等 Barry Moat 可以有更多時間籌旗

而英冠既借用期限由今日起至11月尾
之前既目標希活仍未克服傷患
消息指紐卡素可能改向死敵新特蘭借用大衛希利
而紐卡素既其他目標包括卡夫卡特同埋馬華龍京治

3)
約基宣佈退休
佢已經出任千里達助教

4)
AC米蘭被傳有興趣於季尾收購佩奧爾
佢既經理人亦表示這名西班牙後衛有興趣加盟

而彭美拉斯新星馬昆奴斯被指成為紅黑兵團1月既增兵對象
這名就快20歲既巴西球員可以踢前鋒同埋翼鋒

5)
西班牙傳媒爆料馬體會於暑假先後拒絕多間球會對森保沙既出價
當中包括祖雲達斯,利物浦,曼城,里昂同埋巴黎聖日耳門
前者既出價更被指高達2200萬歐元

6)
羅馬球迷要求辛斯落台

而大衛比沙路同意續約到2014年
施仙奴就表態希望轉投費倫天拿

另一方面,史巴利堤辭職後將去曼聯跟隨費 sir 學法

7)
費沙甘保早前最終未有成為新特蘭收購端納既交易條件
所以侯城打算於1月再次出價收購佢
而卡迪夫城亦被指到時會引入卡辛

8)
龍格堡被指有興趣以借用形式於1月重返阿仙奴3個月

9)
因為心臟問題而休戰接近1年既迪拉列達
可能於短期內宣佈掛靴
留隊轉任青訓助教

10)
曼聯被指已有多名收購對象
當中包括艾堅費夫,阿古路,森本貴幸
以及史雲頓既既15歲翼鋒軒素爾

11)
國米方面計劃興建可容納6萬人既新球場
預計最快可於2013年完成

12)
準備同哥迪奧拿續約既巴塞隆拿被傳打算用亨利同曼城交換羅賓奴
後者否認報導既同時
亦承認3冠王既斟酌難以拒絕
而巴塞亦同里奧費甸南扯上關係

另一方面,亨利被指炮轟杜明尼治
指球員唔知點樣去比賽同埋場上既位置
連組織方面亦有問題
不過佢已經否認有關報導

13)
雲加公開表示欣賞巴洛迪利
隨即有傳聞指阿仙奴打算向國米收購這名意大利射手

14)
祖雲達斯被指有興趣於季尾從巴勒莫引入卡積以及卡雲尼
兩人既身價分別高達1200以及2200萬歐元

15)
巴迪堅尼因為服食禁藥而俾被英格蘭足總罰停賽9個月

16)
梅度表態冇能力賠償1460萬鎊俾佢地
將於短期內聯絡油王尋求解決辦法

17)
鄭智成功申請工作證
意味佢即落實加盟些路迪

p.s.:
消息指阿積士睇中祖國4名16歲以下既球員
查實十幾億人邊可能冇人才
不過'體內'有咁多毒素
中國足運短期內都唔慌有運行

2009-9-7

馬勒當拿踢波既年代打正一代天才既選號
根本唔使憂心防守
因為其他人一早已經同佢搞掂晒
但當年連續兩次世界盃決賽對德國
佢應該知道對手只要有好戰術同埋防守既紀律性
一樣可以對佢地構成威脅,甚至羸埋佢地
佢口中既最強對手馬圖斯正係代表人物

鄧加就同馬圖斯一樣這類防守機器
以破壞對手攻勢為己任
94年當老馬衰吸毒連累球隊提早下馬
鄧加就成為巴西一搔24年之癢既無名英雄
彭利拿起用雙防中先做好防守
令球隊立於不敗之地
羅馬里奧同埋白必圖演出固然夢幻
不過私底下好應該請鄧加晚飯宵夜

雙方球員年代既踢法對佢地日後領軍影響好大
鄧加領軍之後
雖然巴西曾經有一段時間唔識入波
亦曾於京奧俾阿根廷大炒3球
不過用左幾年時間建立
而家既巴西雖然個別位置略有隱憂
但防守實力已經堪稱近十幾年來最強
以森巴兵團既天份
只要佢地做好防守真係幾得人驚

老馬又如何呢?
佢既執教經驗只得一間地區球會 Textil Mandiyú 同埋競賽會
仲要係十幾年前既事
近年足球更重整體戰術同埋體力
佢偏偏反其道過份起用天才球員
可以講佢同現今球壇嚴重脫節
幻想未來,現實殘酷應該係佢既寫照

從尋日場波睇到
就算美斯可以拉開森巴防線
人地補位咁快根本好難搵食
佢自己以前踢波既年代都有華丹奴同埋肯尼基亞等人負責做殺手
而家睇住對手踢9-0-1都唔肯用巴勒莫或者利辛度盧比斯去屈機
唔知仲以為佢打緊機

後防仲火滾
以前令老馬無後顧之憂既盧基利,布朗同埋巴迪斯達等人
全部經驗同埋實力兼備
但老馬輸過俾玻利維亞大大鑊仲唔識驚
將對巴西既大戰都當係防線既迎新大會

今場波之前
龍門安祖查同埋中堅奧達文迪分別只得兩頂同埋一頂喼帽
另一中堅杜明基斯同埋36歲後備 R.Schiavi 仲要係零經驗
後備既柏柏同埋後備龍門卡列素已算係經驗比較多既新仔
原來代表次數亦只係4次以及11次

另一方面,後防連簡單既死球同埋直線都應付唔到
水準低得令人失望
心理學家話咬手指係冇安全感既表現
所以老馬起勢咁咬都唔難理解
如果早知阿根廷條防線咁易搞
鄧加徵召迪天奴或者搵羅馬里奧復出都可能夠殺有餘

不過話說回頭
小弟一直認為以貝拉度為首既教練團可以協助老馬
但點解佢依然可以犯上咁多低等錯誤
究竟係佢唔聽人講
定係軍師唔肯過料俾佢
又係令人難以理解

當森巴足球甘願放棄華麗以換取成績
球王領軍既阿根廷偏偏既唔好睇又唔好食
就算唔係佢地既球迷都難免覺得失落

2009-9-6

應承左sammysir會講本地波......

南華(或者應該話羅先生)繼續大出風頭
消息指佢地今季班費高達3000萬
(不過小弟從來只當係數字遊戲)
佢地人腳多到可以供應一支香港隊
令人覺得佢地好似一支獨大

南華固然在資源(即係錢),本地人腳同埋體能方面有優勢
不過小弟就覺得唔會只得佢地玩晒
至少有傑志可以同佢地死過

港版皇馬搵貴價外援成日出問題
貴價玻利維亞國腳同埋高大衰中堅
已經先後以同球隊踢法唔夾為理由而離隊
射手卡卡又已經身在哥連泰斯落班
新援雷文搵埋老死卡尼祖一齊搵銀
略有名氣但實力未明
就算本地球員方面比往年更加佔優
整體實力依然難以大超班

二來羅先生近兩季重點亞協盃
上季依然有得稱霸本地波只因其他對手唔爭氣
今季巴塞化既傑志來勢洶洶
南華唔可能再咁輕鬆

傑志方面
唔好理南華係唔係因為練得太勁所以回唔到氣而輸波
佢地於慈善盾既表現令人眼前一亮
幾件西班牙兵冇名氣有實力
激活陣中既本地球員
盧均宜直情踢到識飛

最驚其他球隊睇多幾場驚左佢地
佢地陣中又冇邊個可以高波屈機
驚到時未必可以破到9-0-1

另外,4-3-3陣式連埋一對閘有8個人參與進攻固然好睇
不過回防速度就成為防守關鍵
亦有待觀察

其餘有好多隊應該唔憂降班
但因為實力有限
只配做聯賽攔路虎同埋盃賽黑馬
當中包括天水圍飛馬,晨曦,公民同埋沙田

羅先生讚返'自己友'飛馬
不過佢地因為要撥款俾私家訓練場而令班費鏥水
幾個外援同埋港版亨利都先後離隊
臨急臨忙先話搵到兩件有葡超經驗既森巴兵
不過羅先生同佢地同一條水搵外援已經先後幾次出事
佢地既新兵係龍係虫都未知
(消息指個前鋒已被退貨......)

另一方面,狄恩當年教傑志只係不過不失
季中仲會因為考試同埋入訓練營而多次短暫離隊
以佢地高層近似羅先生既作風
狄恩萬一交唔到貨隨時以'其他原因'同球隊'和平分手'
加上佢地有經驗同埋領軍能力既球員不足
令佢地點睇都唔似羅先生口中既爭標對手

晨曦方面
冇康宏既大水喉同埋基奧雲尼對球隊打算應該幾大
佢地今年搵多左年青球員
球隊比往年有活力
不過整體人腳始終只係一般

公民方面
有限班費下靠幾件價廉物美既外援同埋失意軍人
今季老闆略為加碼
之前仲好積極咁打算向傑志羅致拳王棍
能否更上一層樓
就要睇新援拉菲亞同埋回巢既路蘭交到幾多貨

沙田方面打正旗號搞地區足球
今季應該唔係交貨既時候
老闆林大輝有耐性又唔似咁冇腦
畢竟翩版愉園連法比都肯重召
人腳應該只係一般
唯有寄望前巴西U-20代表比加有料到
同埋豬仔以及豬事基兩件前港腳表現回勇

另一方面,為左下季可能上馬既港職盟
波總講明升二降三
雖然本地波出名升降制度名存實亡
但以下所講既球隊應該有份護級
當中包括和富大埔,四海流浪,愉園,大中同埋石峽尾

大埔接連有主力同埋教練陳浩然離隊
球隊實力似乎明顯差左一班
熱身賽全敗都幾令人擔心
加上仲有亞協盃負擔
資金有限既佢地如果冇好國援同埋新血
難免要打護級戰

而四海同流浪合併只係個名唔同左
依舊係車行輝搞既青春班
佢地年年都只有好多個掛名老闆
不過見老闆既負面新聞同埋緋聞仲多過流浪既新聞
難怪年年手緊

今季冇埋文嘉
單靠保羅,基藍馬,盧加路同埋兩件南華棄將撐場
平哥出山即刻要面對巧婦難為無米炊既情況
更驚既係球隊季中忽然冇糧出
同埋以'俾機會年青球員'為理由而放走主力

愉園方面
班費只得300萬兼俾人外判俾科化明
一度令人擔心這間老牌球會會玩完
不過多得贊助商每邊俾少少
最終都請得起幾件國援以及高梵
仲借到兩件塞爾維亞牛奶仔
體力化踢法可能會帶來生機
不過對某些人而言
佢地最吸引既似乎都係搵到李C雅幫手宣傳

大中方面打正旗號係傑志二隊
又有有心人夾錢支持
加埋搵到有料教練陳浩然執教
一班失意軍人只係靠熱身賽已經話俾人知佢地唔係魚腩
當中港版卡路士梅示敦最引起小弟既興趣

石峽尾方面
其實都唔知應該點稱呼佢地
連人地屯門區議會都同佢地劃清界線
點解都仲要叫屯門普高
真係同佢地上季既假波傳聞同樣令人莫名奇妙
唔係以為學人掛地區足球既名
就可以令人以為佢地同傳聞既大陸資金冇關係?

佢地今季人腳只係略為增強
業餘變全職就聲稱班費500萬
似乎又係數字遊戲
單靠卓卓細佬史堤芬可以幫到佢地幾多

之前講既4隊都仲似有少少護級本錢
今季冇人包佢地底段估難以生存
任總竟然話希望排名有進步既同時
'為尊嚴而戰'既最新金句似乎另有含意

2009-9-4

1)
利物浦表示由於全球經濟仲未復興
因此暫時擱置興建新球場

2)
國際足協指車路士上年教唆年青射手卡古達強行同朗斯解約
決定判罰佢地連續兩次轉會市場都唔可以為任何新球員註冊
而車仔要向朗斯賠償78萬歐元同埋當年朗斯訓練卡古達所用既13萬歐元
卡古達亦要全球停賽4個月

而車仔被定罪後
法乙球會利哈維好可能投訴曼聯非法收購佢地既年青球員普巴
曼聯就表示本身並無違規

3)
AC米蘭同兩名烏拉圭小將 T.Viudez 同埋 M.Cardacio 解約
兩人亦落實加盟祖家球會 Defensor Sporting
加利安尼暗示球會騰空非歐盟球員名額
係為左球會可以於1月從南美引入一名球星取代卡卡

4)
查斯古特宣佈季尾以家庭理由離隊

5)
雲尼古落實以自由身同侯城簽約兩年

而之前曾經斟酌佢既韋斯咸就考慮引入維度卡
其實槌仔幫最初並唔係考慮這兩名自由身球員
佢地最初既目標其實係馬華路禾尼
不過佢地竟然於限期當日同人地既經理人失去聯絡而錯失機會

6)
阿仙奴決定替伊度亞度上訴

7)
馬華龍京治被指成為紐卡素既增兵人選

而有消息指卡夫卡特未能於日前加盟紐記
應該同傷患有關
但只要佢下星期可以通過體測
仍舊有望以借用形式加盟

8)
雲佬表示想復出國際賽
並以出戰南非世界盃為目標

9)
占士獲加令人意外咁落實成為熱刺後備龍門既人選
這名36歲老將3個月先俾韋斯咸放棄

10)
班士利打算搵恩斯接手

11)
波歷克表示考慮世界盃後退休

12)
迪甘士文被指將於1月離開飛燕諾
早前佢先後同車路士(而家肯定冇行!),曼城同埋華倫西亞扯上關係
佢表態因為想轉戰西甲而希望加盟後者

13)
艾方素艾維斯已於日前轉投卡塔爾球會阿爾薩德

14)
班尼加透露唔想離開華倫西亞

p.s.:
消息指前日一個青島球員居然於比賽期間走去聽電話
當時入球大細既中位數由2.5改為3.5
原本領先3:0既佢地被指收到要求一定要場波開大
竟然夠膽死於最後5分鐘內3次扮回傳去射自己龍門
好彩監場見勢色唔妥而唔俾補時
令佢地輸錢收場
3個字:抵肯死!

佢地近年先後有球員俾人開除
更有兩名球員先後俾人於街頭監生打死以及買起對腳
新浪網當時有文章暗示同賭波有關
內地既有黑哨同埋打假波問題多年來都未解決
一個咁唔健康既球壇邊有可能出到好既國家隊

2009-9-3

近兩日既新聞......

1)
由於香港最近於東亞外圍賽有料到
所以國際足協最新公布既世界排名
香港由134上升6級到128

2)
國米被指打算從拉素引入彭迪夫
不過後者開價高達1900萬歐元
而彭迪夫亦因為球會冇將佢同埋列迪斯馬列入歐霸盃名單
而公開炮轟會方
佢指出球會冇誠意同佢地續約
到佢地拒絕續約就雪藏佢地
佢表示唔排除等到季尾以自由身離隊

3)
巴布透露希望可以於1月以借用形式重返阿積士

4)
鄭智同意同些路迪簽約兩年
只要等埋工作證就可以落實加盟
不過佢由於趕唔切辦理註冊手續
令佢無法於歐霸盃首階段比賽出場

另一方面,消息指寄誠庸將於今季 K-League 後先會離隊
意味佢將於1月加盟些路迪

5)
有報導指艾殊利可能索性放棄於今季內賣盤

6)
原來於轉會限期前
曾有球會出價羅致史提芬泰萊,路蘭以及卡路爾
不過都被紐卡素拒絕

另一方面,紐記被指將於下星期以借用形式引入希活以及卡夫卡特
佢地亦有可能引入自由身左閘米高波爾

7)
多位球星落實同球會續約
當中包括艾殊利高爾,拿度,丹尼臣,賓特拿以及盧恩杜拿

8)
夏格維斯被費sir納入歐聯名單
意味佢即將復出

9)
列貝利透露冇同皇馬達成任何協議
而拜仁亦未同佢傾續約

10)
雲加對伊度亞度因為插水而被罰停賽非常不滿
佢指出歐洲足協冇清楚交代提出控告既準則

11)
鄧尼最終落實加盟維拉

p.s.:
1)
外界對羅馬同雲尼亞里簽約兩年有幾冇信心
睇羅馬既股價即日下跌3%就知

2)
起飛腳踢傷對手既球霸 S.Jauregui
俾玻利維亞聯賽紀律仲裁會罰停賽1年
似乎罰得太輕
唔信可以睇片評理
http://www.youtube.com/watch?v=YRlCcn6QZQI

2009-9-1

由於31/8係英國銀行假期
所以國際足協將英國波既轉會限期特別延至當地時間今日下晝5點
(即係本地時間今晚12點)
先講其他國家既部份轉會消息

1)
基士文以借用形式加盟辛尼特

2)
皇家馬德里出售後衛米基爾托利斯到西甲球會基達菲

3)
巴塞隆拿落實羅致基格連斯基
而巴西中堅軒歷基就被外借到桑坦德
另一方面,佢地同埋拜仁最終都未能成功羅致紐亞

4)
費倫天拿用中堅M.迪哥斯達同韋斯咸交換尼斯歷高既一半擁有權
前者係葡萄牙中堅
後者係德國U-19翼鋒
兩人同樣因為未能適應生活而決定離隊

而梅魯斯雖然仍要因傷缺陣兩個月
不過紫百合依然願意落實以700萬鎊收購

另一方面,古斯文奴域最終以500萬鎊加盟史特加

5)
哈化柏林同意俾彭迪歷免費加盟阿積士

6)
格羅素重返意甲
以300萬歐元加盟祖雲達斯

7)
阿積士成功從國米借用卡朗一季
這名巴西射手既海豹盤球令佢聲名大噪

8)
哥連泰斯成功羅致阿根廷中場 M.Defederico
這名被形容為新美斯既球員一度同利物浦以及拉素扯上關係

9)
當拿迪回歸意甲,加盟巴里

至於英國球壇方面......

1)
Big 4 最終都冇增兵
巴迪斯達,紐亞,查馬克同埋列貝利既傳聞最終都係吹水
當中只有利記於前日將卡坦積外借到希臘球會 Kavala

2)
自由身既盧雲卡蘭斯落實重返紐卡素

而紐記一度被傳向曼聯借用兩名北愛球員防中吉遜同埋中堅卡夫卡特
而希活亦被指係佢地既借用對象
不過最終都未能成事

3)
維拉以500萬鎊從韋斯咸引入占士哥連斯
而鄧尼雖然仲未同曼城就餘下3年合約既賠償達成協議
不過英格蘭足總方面證實已收到曼城為佢發出既轉會紙
意味佢趕及轉會

4)
韋斯咸被傳有興趣引入東尼
而厄遜一度被指可能轉投愛華頓或者維拉
最終都冇成事

5)
熱刺落實以賤價300萬鎊引入卡蘭積卡
而馬田柏度夫同埋雲達華治亦一度被指係佢地既增兵對象
但最終都係無米粥
消息指曉士反對將前者賣俾佢地
而賓特尼由於搵唔到新球會而被迫留隊
佢一度同利物浦以及曼城扯上關係

6)
狼隊從紅星借用 S.卡斯迪路
這名厄瓜多爾中場上季亦曾經以借用形式效力愛華頓
而狼隊亦從維也納迅速引入奧地利射手 S.Maierhofer
不過佢地羅致施積失敗

7)
布魯士係近兩日就最忙碌既英超領隊
新特蘭先將麥沙尼賣到侯城
令菲臘布朗安心放走端納
(侯城其後亦再從雷丁引入塞內加爾中堅桑高)
消息指這名英格蘭中堅既身價900萬鎊
雙方簽約4年

黑貓亦被指有興趣羅致埃及翼鋒 Al-Muhammadi 同埋自由身既尼爾
不過最終都未能成事

而布魯士考慮球隊有人滿之患
一次過放走列比達,艾華士,泰尼奧同埋 D.哥連斯
當中後者以275萬鎊轉投史篤城
原本離隊既仲有安頓費甸南
不過由於佢唔肯轉投熱刺
令熱刺用侯頓交換借用佢既交易未能成事

8)
樸茅從賓菲加借用阿爾及利亞中場耶巴達
這名爛打兼擅頂既中場一度被指成為國米既增兵對象
而樸茅為增強後防實力
從屈福特同埋曼城挖走 M.威廉臣以及賓希姆
不過佢地原本可以從維拉借走索尼
不過就因為未能同佢達成個人條件而爛尾

而佢地證實冇球會出價收購一直被傳會離隊既占士

另一方面,佢地希望增強前線火力
不過扎馬萊克拒絕佢地偏低既出價
消息指樸茅只肯出價300萬鎊
或者250萬鎊另加佢下一次轉會既一半轉會費
而樸茅亦曾經提出以50萬鎊借用佢一季

9)
荷蘭中場史奴以借用形式由阿積士轉投布里斯托城

10)
希丁加最終趕及通過體測加盟愛華頓
轉會費為750萬歐元

11)
保頓成功借用卡斯歷1季

12)
般尼為左增強攻力
先從侯城以及樸茅借用卡辛同埋紐根特一季
再從利雲斯頓引入16歲射手 J.Mckee

13)
格流成功借用洛頓

14)
史篤城引入21歲烏拉圭中場 D.Arismendi
轉會費484萬鎊
不過當中有184萬鎊係 variable

15)
些路迪趕唔切同鄭智簽約兩年
不過自由身既佢唔受轉會 deadline 影響

16)
西布朗將西班牙中場華利路外借到馬略卡

17)
黑池成功引入保爾沙同埋 Al Bangura

18)
富咸落實以50萬鎊引入瑞典射手艾謙姆

19)
米堡被指出價400萬鎊收購侯斯
不過就俾打呲郡拒絕

p.s.:
1)
史巴利堤向羅馬請辭
佢被傳即將轉投辛尼特
消息指雲尼亞里將會接手
雙方將於聽日簽約兩年

2)
賓尼迪斯早前於球隊輸俾熱刺後
批評球證既執法水準
英格蘭足總決定控告佢行為不檢

3)
伊度亞度因為插水而被罰停賽兩場

4)
辛達路斯,美迪,馬華路禾尼,軒祖等人既轉會
如果之後有時間
小弟會再 follow up