想講幾場英國波......
1) 曼城對阿仙奴
進攻係最佳防守
但亦要建基於穩固防守
兵工廠明顯因為防守不力而俾人炸左間廠
佢地冇左艾沙維
進攻即刻少左好多火力
路斯基只算係令人驚喜既及時雨
進攻失色原本唔使死
防守唔掂就大檸樂
後衛 marking 唔合格
加上冇好屏障依然貪勝不知輸
最終搞到佢地連續兩輪聯賽敗走曼徹斯特
輸波已經唔 happy
俾艾迪巴約咁樣搞事就真係幾晚都訓得唔安樂
佢老味踢傷法比加斯同埋雲佩斯
後者仲幾乎俾佢踢盲
入左波仲要跑咁遠串人
倒戈見得多
好似佢咁肯仆街就真係見都未見過
雖為佢仲死撐話自己唔應該被罰停賽
2) 熱刺對曼聯
熱刺輸波明顯因為輸中場
冇左莫迪歷即刻冇晒創造力
串演左中場既羅比堅尼只靠勤力根本幫唔到手
柏拉斯奧斯又因為搭飛機搭到個人散晒
結果一條中場冇晒創造力同埋機動力
偏偏對手曼聯踢出今季代表作
當中關鍵係貝碧托夫超勤力墮後幫手
如果佢場場都有咁既水準
費sir身體真係可以好好多
加上兩大元老齊齊有貨交
佢地靠控球能力已經玩殘連5成水準都冇既熱刺
就算後來史高斯兩黃一紅踢少個
熱刺亦冇餘力去緊迫對手
唔講真係唔知曼聯踢少個
估熱刺入 Big 4?
怕且只係費 sir 賽前出口術......
3) 卡迪夫城對紐卡素
紐記冇射手要改踢 4-5-1 都有波羸
明顯又係靠防守羸波
當中最終兩黃一紅既辣椒仔好搶
仲搶鏡過終於有建設既高路仙尼
當然史堤芬泰萊既涉嫌手球逃過大難
同埋對手把握力不足都係原因之一
紐記除左開咧俾西布朗入過波
之後5場都力保不失
一條英超防線於英冠明顯超班
事實上佢地亦比上季集中得多
加上佢地俾人感覺真係團結左好多
終於似返隊波
不過如果再挑剔少少
就會希望佢地可以為前線增兵
因為冇左艾美奧比同埋卡路爾開路
單靠有待浸淫既蘭格始終有所不足
傳聞侯城既卡辛成為佢地既最新目標
但曉頓透露佢地對黑池前都唔會有新球員
短期應變唯有要求辣椒仔(停賽後)同埋路蘭搵機會後上攻門
另一方面,曉頓證實佢仲未有得坐正
但只要繼續有貨交
加上包括史堤芬泰萊在內既幾個主力都開始好撐佢
小弟覺得佢值得於季內坐正
5 comments:
而家紐記鋒不足.
只能靠中後場球員既憑個人質素入波,
加埋齊心合力做好防守,
先至可以擊敗對手,
如果上屆好似今屆咁齊心就好了..
感覺上近幾場紐記都係有少少留力,
而英冠既比賽節奏同可觀性始終都唔及英超,
所以昨晚同之前對李斯特城兩場波,
嚴格來說都係悶戰..
阿仙奴同熱刺之前都係比人高估左少少,
後備兵源都係不足,
阿仙奴仍然不擅踢逆境波
艾朗連儂又係過譽..
車仔暫時都係有少少運,
雖然實力不容否定,
但感覺上同上屆季初史高拉利執教時有些相似
你比我較激
比賽前我尚喜歡他們依然感情很要好
但接連傷舊袍 有點心痛
仍然期待路斯基及達施華擔任正選
To: sammysir & 路斯基
1)
如果上季紐記有咁既水準同埋士氣
就算以而家既人腳都唔使憂降班
以佢地最近既水準
絕對有本事羸樸茅,保頓等英超隊
2)
小弟又唔覺紐記踢聯賽有留力
反而睇陣容
佢地踢聯賽盃反而有留力
明顯將升班定為首要任務
3)
有時如果用戰術角度去睇波
就唔會覺得所謂既悶戰其實唔係太悶
4)
小弟早兩次寫賽後感已經話
唔好咁快下定論兵工廠係唔係咁堅
小弟亦同意佢地唔擅踢下風波
佢地中後場向來唔夠有質素球員
最驚之後加拿斯同埋華美倫有咩事唔出得場
要靠辛達路斯同埋豬維豬達
4)
小弟季初寫 preview 已經唔睇好熱刺入前4
因為實力始終仲有少少距離
5)
艾朗連儂好多時有波在腳就向前衝
有時直情懷疑佢冇望清楚隊友既位置
只要對手唔太慢
靠好路數同埋硬朗踢法已經收佢皮
艾夫蘭就係好例子
6)
車仔打得唔太好都場場袋晒3分
對爭聯賽有好大幫助
上季曼聯同埋利記已經係好例子
車仔既中前場經過磨合之後
威力應該會仲勁
不過後防失波多左
同埋俾人罰佢地冇得增兵
就可能係佢地既隱憂
7)
艾迪巴約真係衰到爆
同巴頓一樣咁令人扯火
先講愛隊
差唔多成場波處於下風
前線無人hold到波
而無左蜘蛛俠果類個人突破亦都係甚少攻到入對方後場既原因
不過要讚既係後防
高洛仙尼助攻得手
賴恩泰萊可以傳中
亦係佢勤力搶番個波
不過完場前頂空氣
累到阿倫史密夫攞紅牌
就係唯一污點
成條後防(或者講埋回防既中前場)
防守集中
就係贏波關鍵
不過下場再次作客
又有少少暗湧
因為最搶既阿倫史密夫停賽
靠畢特又係死
唯有寄望卡路爾可以復出
又或者盧雲克蘭斯快d操番fit
而中間希望巴頓頂到阿倫史密夫既工作
艾迪巴約真係....
反骨已經夠死
仲要無品
小弟認為最少重罰十場
人地連隻眼都差少少俾佢ko
唔重罰唔得
To: 舒利亞
1)
賴恩泰萊雖然冇速度
不過佢斬波唔錯
曉頓可以考慮叫佢俾條路森遜後上
2)
古迪利斯仲要抖至少兩個星期
而盧雲卡蘭斯已經休息左超過3個月
佢兩個只係唔能救近火既遠水
靠幾個中場搵機會後上攻門反而更實際
3)
小弟都同意畢特既狀況令人唔放心
4)
消息指艾迪巴約面臨停賽6場
踢傷雲佩斯同埋挑釁兵工廠球迷各佔3場
不過小弟都同意佢踢傷雲佩斯既動作太狠
當年戴卓爾起踭撞文迪斯埋廣告牌要罰8場
艾迪巴約罰3場真係唔夠
Post a Comment