2010-6-30

想講尋晚兩場波......

1) 巴拉圭對日本

佢地都算係南美同埋亞洲既防守專家
兩者對決造就16強最悶一戰
巴拉圭將本田圭佑凍結得動彈不得
佢除左一腳柱邊出界既攻門就再冇佳作
加上盡量唔於危險位置輸罰球
結果加埋松井大輔既一腳中楣波
日本其實就再冇咩餐士入波

巴拉圭雖然實力算係高少少
不過講攻力只係五十步笑百步

前線係有幾個唔錯既射手
不過佢地同另一隻'圭'唔同
就算踢3箭頭都冇一個有能力墮後分波
搞到踢 4-3-3 都係冇咩料到
直至下半場識得專攻駒野友一既 weak side
同埋希度華迪斯後備入場交到貨
佢地先算多左攻勢

巴拉圭而家踢左390分鐘先守一球
下場對西班牙肯定繼續死守
不過維拿其實唔係一個高質素龍門
係佢地以守為攻既罩門

另一方面,岡田武史賽前俾全世界(當然包括小弟)插到仆街
連包括田中鬥莉王既部份球員都唔妥佢想作反
而家佢一招死守就光宗耀祖
國內人氣勁到拍得住本田圭佑
日本足總即刻開定個神主位等佢
唔使教波但可以升職加人工
人生大起大落莫過於此

2) 西班牙對葡萄牙

西班牙今屆第3度遇上對手主守
不過發揮得算係比較好
沙維既第一時間後踭仲可圈可點

不過講到口臭既係托利斯同埋韋拿暫時都未算係好拍檔
收起托利斯用 4-3-3 或者踢 4-4-2 用洛蘭迪開路似乎比較上算
如果再要對佢地雞蛋裡挑骨頭
就係卡斯拿斯略為失準
佢怕且好少遇到對家既龍門仲搶鏡過佢

而葡萄牙主守係正路
不過繼續任由C7舞龍咁舞就整定冇運行
當今足球已經冇空間獨行獨斷
條友4場波以來除左兩次省中門框同埋嗰個海豹入球
留俾世人就只有插水,爆粗同埋放飛劍
除非係佢既 die hard fans
否則都應該睇得出美斯勁過佢

p.s.:
冇波睇可以回氣之餘
聽日仲係回歸假期
有心又有時間既記得去遊行

2010-6-29

想講尋晚兩場波......

唔知主辦單位點樣編排賽程
荷蘭同埋巴西尋晚先踢16強
就要星期五晚踢8強
早一日踢16強既德國同埋阿根廷
反而遲一晚先踢8強
尋晚兩強都似乎因為咁而有所留力

荷蘭羸波絕對正路
畢竟斯洛伐克戰鬥力平平
有得入16強都係多得意大利屎到離譜

場波最大得著係睇到洛賓開始上力
佢有必殺射球之餘
亦比養傷既雲達華治更加幫到球隊
至少唔會成日不安本份移入中路同史尼達爭波踢

今屆既荷蘭比往年更重攻守平均
絕對有利爭標
不過佢地中路始終有隱憂
希丁加同埋馬菲臣唔夠制空力之餘
佈越位亦有問題
下場隨時走甩法比安奴

尾場巴西羸波亦係正路
畢竟佢地唔驚對手同佢地鬥攻
表現好左都應該同多左進攻空位有關

智利就又係前面冇殺手,後面冇防守既例子
中後場冇3個正選固然大鑊
比爾沙索性以攻為首都唔難理解
但前線繼續欠缺可靠既埋門一腳就當然偷唔到雞
當然蘇亞素冇波入都係冇運

p.s.:
下屆是是但但台終於肯出手?
係又唔錯

2010-6-28

林伯特既詐糊唔應該叫問題球
而係旁證明顯錯判
唔使慢鏡都睇到球波過晒白界
忽然覺得高科技輔助協法同埋真普選都係遙遙無期

小弟亦必須承認
英格蘭(其實又係林伯特)亦算好唔夠運

但問題係世紀誤判唔可以話係英格蘭出局既轉捩點
只可以話係佢地歷年來輸得最大鑊既轉捩點

英格蘭同埋德國都聲稱會踢進攻足球
唔同既係前者大軍壓境但冇位埋手
而除左占士以外既防守球員仲排住隊出錯
相反後者係縮後等機會先出擊
穩健既後防就成為進攻既基礎

路維既針對性部署係後防中路
由於朗尼靠爆炸力足以單挑梅迪薩卡同埋費特列治
德國既中後場可以話係圍捕朗尼
亦唔會俾佢有空間發揮佢既速度

而小豬最終趕及復出(煙幕?)
加上謝拉特有時要去邊線搵食而冇料到
最終俾到德國麻煩既就只得回勇既林伯特

而路維果然靠5人中場食糊
小豬同埋基迪拉主力防守
前面3個就墮後回防之餘再等機會突擊
雖然普度斯基同埋湯馬士梅拿繼續各自專攻一邊
不過英格蘭兩閘太多空位俾佢地發揮
都冇必要玩移型換影
而高路斯入波之餘
亦拉開空位俾中場後上
全套 4-2-3-1 反擊戰術簡單實際
加上英格蘭後防補位超差
造就對手羸夠四個一皮

是是但但台既新聞報導員話英格蘭下半場係輸突擊
但其實德國單係上半場已經有5次攻門中框
當中只有1次係來自反擊
反映德國就算踢陣地戰都足以羸波

今次誤判算係還返個人情俾德國之餘
又可以作為今屆英格蘭既下台階
實情有晒英國佬著數
心水清既都知以佢地咁既表現
其實最終都走唔遠

卡比路而家大條道理死撐出局唔關佢事
600萬鎊年薪既合約反正仲有兩年
國米又已經搵埋賓尼迪斯接手
佢唔肯劈炮根本係意料中事
睇來佢都係同曾蔭權同期退休

尾場墨西哥一樣曾經射中楣
亦同樣受害於無能球證既明顯誤判
似乎更加值得同情
一來冇咁冤枉輸第一球
打死都唔信奧蘇里奧會俾人波都偷埋
二來至少初段真係踢得仲好過阿根廷

2010-6-27

踢到淘汰賽
後防既穩健情度就成為晉級關鍵
尋晚兩場波都係好例子

大抵以朴智星為首既南韓中場踢得太好
烏拉圭後防好多時間都受壓
雖然梅斯利拿同埋列根奴既整理表現已經唔錯
但忙中有錯都要為失波負責
不過就遠遠唔夠南韓咁離譜
3人防線同埋龍門一齊大漏搞到落後
而佢地跟唔實活動範圍好大既蘇亞雷斯
最終只係失兩球已經算少

尾場方面
加納刻意用5人防線去打好基礎
不過效果唔係太好
最終有得過關都要多得京遜回勇

莊拿芬文沙雖然犯天條
不過拉積域靠新人做替工有時難免要付出代價
其實佢既制空力幫到另一個文沙好多

而冇左艾辛後
安南負擔到更多既截擊工作
勢必令同拉積域唔岩既蒙達利有更多時間坐冷板

美國既表現雖然繼續好韌
不過中後場幾個球員都因為輸蝕體力同埋速度而表現走樣
令佢地要提早畢業

列卡度奇勒其實係陣中第一號防中
不過初段已經有黃牌加上完全跟唔到比賽節奏
輸第一球波仲係源自佢發緊夢
就令老巴特利唔夠半場就要換入跑狗伊度

而4個後衛就先後被對手爆羸
當中迪美列對兩個失波都要負好大責任
先係因為驚俾奇雲保定推過而不段且戰且退
再頂唔住步大力雄既基恩
咁既表現難怪屈福特決定放棄佢
畢竟以前都係踢中緊既麥基睇到佢咁踢都應該眼冤

p.s.:
1)
原來尋晚後備落場既 Lee Addy 同迪西里有親戚關係

2)
今晚既戲碼遠勝尋晚
德國佬肯定冇卡卡奧
而舒韋恩史迪加同埋謝路美保定就要過到體測先知有冇得踢

2010-6-26

想講尋晚兩組最後一輪分組賽......

G組方面
巴西同埋葡萄牙和波唔意外
畢竟各取所需
場波首要任務其實係避免不必要受傷同埋攞牌
但大家上半場都收唔到火加埋攞左7張黃牌就真係意料之外

場波唔算好睇
因為大家都真係冇肯搏命
葡萄牙冇箭頭既陣式
都唔知昆羅斯想點
單靠C7既單打獨鬥明顯唔係上算
事實佢例牌上腳加上浪射既踢法越來越趕客
伊度亞度比佢更有資格當選今場最佳球員

另一方面,巴西一對中堅都先後再次犯錯
入淘汰賽隨時一次意外就玩完
而踩足3場既基拔圖施華亦有體力不繼既隱憂

H組方面
西班牙羸波但表現持續一般
咁多時間踢多個都只可係羸得一球之餘
下半場做樣搏多段之後
仲索性搓到夠鐘
睇得出佢地想留力同埋有少少驚死

瑞士就繼前兩個大賽後再衰入唔到波
尼古科同埋費爾都有明顯老態
有待浸淫既戴迪約克只係蜀中無大將既選擇

佢地最終有代表作都要出局就幾可惜
畢竟以佢地559分鐘唔失波
近兩屆世界盃7場只失1球既防守力
加埋軒斯菲特專打老虎既往績
鄧加或者昆洛斯應該慶幸佢地出局

而家16強已經落實
上線巴西同埋荷蘭多數8強相遇
勝方應該有力入到決賽

而烏拉圭,南韓,美國同埋加納
當中有一隊亦會入到4強
就多得法國同埋英格蘭兩隊名牌失準
4隊而言只有南韓仔牌面比較輸蝕
烏拉圭雖然中場實力一般
不過有前有後唔可以睇小

而美國以及加納都好韌
前者打逆境波既表現係今屆32隊最好
普遍被外界睇高半線
不過唔好唔記得後者近一年就已經靠死守
守出個世青盃冠軍同埋非國盃亞軍

下線方面
阿根廷,德國同埋英格蘭3隊名牌爭一個4強席位
前者未打過逆境波
再遇墨西哥隨時俾對手迫到抖唔到氣
不過依然有力入8強

而德國再遇死敵英格蘭
蝕底既唔止係傷兵較多
仲有經驗同埋教練級數
而日耳曼最忌以為12碼羸面大就重蹈上屆俾意大利ko既覆轍
靠效率搵食既5人中場可能係比較好既出路

另外,西班牙對葡萄牙應該有優勢
畢竟質素羸半班
但對手3個有入波能力既工兵所帶來既威脅應該遠比C7大
而好衰唔衰沙比艾朗素多數因傷缺陣仲俾佢地更多機會偷襲
係西班牙晉級既最大隱憂

而巴拉圭對日本既勝負關鍵可能係邊隊比較有耐性
而後者明顯靠本田圭佑食糊
前者易於防範就比較著數

p.s.:
近日除左忙睇波
仲有睇新聞
結果最終超失望
真正民主同埋終極普選似係反而遠左......

2010-6-25

想講近兩晚既第三輪比賽

C組方面
英格蘭向來唔驚硬橋硬馬既東歐球隊
不過對手都唔慌會驚高波
所以希斯基有傷既唔 fit
卡比路就寧願用迪科爾而棄哥治
擺明靠速度制敵
而大抵艾朗連儂既傳中成功率低到離譜
卡比路亦下定決心用狀態回升既占士米拿
貪佢踢法實際兼有效率
結果都係靠佢兩個先有得羸波

卡比路賽後話球隊終於似返英格蘭
小弟就覺得表現雖然係3場當中最好
不過雙特問題仍有待解決
始終認為收起林伯特會係上策
中路靠謝拉特同埋巴利一攻一守
左路就靠陣中唯一有創造力既祖高爾

不過好在京治可以趕及復出
而朗尼既狀態又有少少好轉
加上英格蘭對德國實搏命
唔好因為佢地分組賽唔掂而睇淡佢地

另一方面,補時先入到波既美國表面好有運
不過以佢地既整體發揮
依然值得全取3分
上半場丹普西既詐糊又係近期旁證成日發夢既另一例子

而斯洛文尼亞搞到戲劇性出局
原因都係上場對美國唔夠國際賽經驗而放虎歸山

D組方面
德國雖然力挫加納
不過全隊除左可以四圍走兼入埋世界波既奧斯爾外
其實冇一個有好突出既表現
當中應該同路維既用人好有關係

普度斯基同埋湯馬士梅拿被定位兩側但偏偏冇速度上優勢
前者仲可能因為上場宴客而患得患失
如果路維肯俾3個進攻中場都有同樣既自由度
效果應該會好好多

而卡卡奧就因為供應不足而冇咩表現機會
不過佢勝在勤力
多次拉開對方後衛去俾空位幾個中場

後防方面
一對中堅繼續信唔過
對住朗尼都幾蝕底
不過限米煮限飯就同路維冇關

但要謝路美保定同埋拿姆各自踢冇咁 fit 既一邊
就係幾令人費解
而如果後者可以重回左路
應該幫到普度斯基好多

另一方面,小豬拉傷大腿而好可能至少抖1個星期
單靠基迪拉點睇都好唔穩陣
絕對令路維更加頭痛

塞爾維亞原本可以把握加納輸波而和波都可以出線
好衰唔衰佢地遇弱越弱之餘
同澳洲下半場仲越踢越急
人地袋鼠兵質素所限就話高Q大棍
佢地有波底都跟風就只有益晒對家
安迪賽後反而賴球證誤判就未免太小家

E組方面
終於有死球入波
仲要係日本起孖
真係估佢地唔到

查實個波咁飄
射嗰個雖然好難食得應
不過如果得左就真係玩死龍門
平時算係幾穩陣既蘇連遜都輸到失失慌

而丹麥向來唔擅長主攻
要返敗為勝就更難
場波過左半場已經係垃圾時間
不過戰情尚算精彩

另一方面,日本連續3場都算係靠突擊搵食
下場對同樣唔擅長搶攻既巴拉圭
可能係16強比較悶既一場

F組方面
上屆冠亞軍一齊分組賽畢業
都算難兄難弟
意大利出局表面係今屆最大冷門
不過過左頭兩場已經只係半冷

比較斯洛伐克近兩場既推進速度
就會發覺意大利中後場既攔截只係做樣
同巴拉圭既高效率差超遠
後面有簡拿華路仲等如每場讓一球

而前線死火問題比08歐國盃更嚴重
加上3場波只有最後十幾分鐘係比較似樣
又點可以攞夠分出線

意大利球壇被指有個教練唔好食回頭草既宿命
當年就算係卡比路教AC米蘭都宿命難違
納比再次接手已經俾人批死因為球隊青黃不接而唔會有好下場
由外圍賽試陣試到決賽週都唔岩心水已經係警號
佢好在最終仆直都至少肯攬晒上身
唔似杜明尼治擺明姿態咩都唔關佢事

2010-6-23

想講尋晚既第三輪分組賽......

A組方面
思前想後都係覺得硬撼阿根廷隨時歸西
所以打死都唔信'圭''西'雙方會 hea 踢搏和
結果戰情亦算激烈

烏拉圭有小小運而3戰都冇失波
絕對始料不及
如果防線繼續保持水準
對南韓可以睇高半線

而南非對法國一戰
主隊就算出局都想羸波謝幕既心態已經值得睇高一線
對手兵變換左半隊人就仲易食
見到大後備迪亞華都有得做隊長
就知杜明尼治同好多大哥面左左

睇住對手後防同埋哥古夫果然排住隊爆鑊
如果麥菲拿下半場初段唔係省中柱角
南非隨時羸夠4球入16強

法國方面
杜明尼治擺款冇料就預左俾球員頂撞
教6年都未試過俾人打就直情執返身彩
安歷卡又唔係第一個串佢既球員
關鍵時刻整走佢似係想搵定人孭黑鑊

而放風搞大件事既體能教練就咩事都冇
實令其他球員反感
不過搞到全體罷操,甚至有人罷踢
就絕對係球員唔專業既表現

今場輸波象徵杜明尼治黑暗管治既終結
不過話說回頭
佢可以教6年咁耐
法國足總都好有問題
好彩終於識搵個有名望既白蘭斯接手
佢一定識用哥古夫重建球隊
2012歐國盃既法國應該至少有力做到黑馬角色

B組方面
由於阿根廷半力已經勁過希臘夫添
無論列哈格排 4-5-1
或者半場微調至 5-4-1
實際都只係 9-0-1
而柏柏斯達夫普路斯亦跟唔掂美斯
所以希臘基本上捱打
見佢地上半場只得22%控球時間兼搵次射門都冇
仲以為睇緊國米作客巴塞

當另一邊既南韓由落後至保住不敗
列哈格可以做既嘢都唔多
單靠森馬拉斯加上後備入替既連尼斯去偷襲阿根廷
根本只係盡人事
因為此'斯'唔同彼'斯'

美斯真係踢得好 free
阿根廷亦羸得輕鬆
不過小弟都係想睇定少少先再下定論
佢地一直踢緊順境波
小心之後要踢逆境波就變返條虫

而尼日利亞出局
最可惜係睇唔到安耶馬
佢尋晚冇前兩場咁 sharp
不過都依然有6個 save
埋單計數平均每場7個 save 之餘
加埋仲已經撲左十隻手指數唔晒既必入波

相對於佢
前線幾個射手加埋先貢獻到1個12碼就真係抵插
上場既奧保基同埋今場既耶高保仲錯失左唔入仲難過入既機會
如果入左其中一球
最終出線既應該係尼日利亞

尼日利亞向來主力出口箭頭
不過近年實在太多水貨
早前莫耶斯居然將耶高保定價1000萬鎊
難怪槌仔幫兩個算死草老闆而家改打基恩既主意

2010-6-22

想講尋晚3場波......

1) 葡萄牙對北韓

葡萄牙大抵要多謝巴西將北韓徹底起底
否則既唔知佢地韌到遠超想像之餘
亦唔會睇通佢地只有一個鄭大世

而北韓過左首場可能相信自己有力爭出線
進攻比重其實增加左
不過當佢地落後既時候就發覺已經冇退路
勇字當頭既結果就係後防空虛
到後來甚至輸到失晒方寸
戰果絕對反映唔到實力分野
上屆塞爾維亞及黑山都係因為咁而俾阿根廷炒6:0
天佑班球員返到祖家平平安安

有時好波真係唔夠好運好
如果葡萄牙第一場就要對北韓
或者第二場要對未攞夠分既巴西
相信以佢地早前既表現只會搞到焦頭爛額
偏偏而家領先科特迪瓦3分之餘
得失球仲贏到9球
下場對巴西仲應該只係真正既默契和波

2) 瑞士對智利

同意軒斯菲特話世界盃應該俾最好既球證執法
如果唔係球證過嚴而要踢少個
打死都唔信佢地會輸俾智利
幾近滴水不漏既防守絕對值得破紀錄

佢老人家如果可以再執靚前線
瑞士有潛力成為歐洲二線頭既球隊

3) 西班牙對洪都拉斯

雖然順利羸波
不過韋拿同埋托利斯踢雙箭頭唔夾既老問題
其實由08年歐國盃延續到而家
後者傷癒唔 fit 就令情況更明顯

另一方面,因為今場羸兩粒
西班牙星期六凌晨只要羸到智利就一定出到線
不過未必係首名
亦令佢地16強硬撼巴西既戲碼尚存變數
搞到想買飛睇3D都十五十六
因為海運係星期五就會賣淘汰賽既戲飛

p.s.:
1)
今晚開始踢最後一輪分組賽
揭幕前應該冇人唸過
6隊非洲隊可能悉數分組賽收皮
希望奇蹟由今晚既南非開始

2)
尋晚收到對紫色 Mercurial 做禮物
狂喜!

2010-6-21

想講過去6場波......

1) 澳洲對加納

澳洲連續兩場爭議性踢少個
最終攞得1分雖然對出線幫助唔大
不過靠高波負隅頑抗既表現至少羸到尊嚴

加納失分而回
明顯因為創造力同埋組織都欠奉
靠個別球員用速度單打獨鬥根本好難搵到食
浪射過多亦明顯係四肢發達,頭腦簡單既表現

如果塞爾維亞唔係遇弱越弱
出線機會應該最樂觀
意味加納要同德國爭另一席位
前者唔似有本事可以死守到尾

2) 荷蘭對日本

前者連續兩場上半場俾對手既死守搞到動彈不得
今場既數據仲差過對手
不過實情係佢地一定易羸過上場鬥丹麥

事緣日本球員上半場竟然平均跑多3000米
結果佢地一如上年既熱身賽
下半場落後都冇咩餘力還拖
唔使再輸0:3只係因為艾利亞埋門把握太差

3) 喀麥隆對丹麥

如果拿古恩一早肯從善如流
上場一定唔使輸俾日本
不過表現好左都仲要輸俾丹麥
就係輸在埋門把握唔掂
同埋睇唔掂羅美度以及中堅賓
當中助攻冇咩建樹既艾高圖都唔知點解可以成日失位
肯定係頭號罪人

另一方面,唔講應該冇咩人知咁巧合
丹麥今場既入波英雄
原來係球隊近兩代飛人
羅美度後生既時候10秒3就跑完100米
而中堅賓早年就係國內60米同埋100米既青年紀錄保持者

4) 巴拉圭對斯洛伐克

繼阿爾及利亞對斯洛文尼亞既另一悶波
因為俾巴拉圭既工兵中場封死
斯洛伐克連組織攻勢都有心無力
令一早領先既巴拉圭示範咩嘢係行行企企都食飯幾味

5) 意大利對新西蘭

簡拿華路果然鑊鑊高潮鑊鑊甘
不過更估唔到既係前線原來趺 watt 到咁既田地
對住新西蘭都咬唔入
明顯唔係納比所講既冇運就足以解釋

事實上佢地冇組織之餘又冇創造力
迪羅斯根本獨力難支
側擊又因為體能輸蝕而俾對手封死
左閘基斯薜圖得閒都唔多幫拖
加上陣中冇個射手信得過

屎既程度更甚英芥蘭之餘
仲拍得住法蘭西人渣
慶幸抽籤有運唔使同北韓同組
否則66年既經典一定再現
佢地就算最終過到分組賽都怕且16強畢業

6) 巴西對科特迪瓦

唔計手腳並用既法比安奴終於回勇
巴西整體表現其實冇咩改善
羅賓奴仲簡直似個足球黑洞
最終都羸得輕鬆左只因對手原來係隻大'笨'象
其中迪爾尼絕對係後防黑洞
當然對家既盧斯奧只係五十步笑百步

同場死蠢亦有兩個教頭
鄧加見到對手踢人多過踢波兼已經傷左件艾蘭奴
都唔識收起主力
場外成個細佬仔咁俾人激到紮紮跳有春用咩
反映EQ同埋IQ都應該係偏低
佢應該要為乖仔卡卡都搞到兩黃一紅而負返多少責任

而艾歷臣見到左閘咁多漏洞都好似冇唸過要止血
如果唔係低B
就應該係個心已經飛左去富咸
(千祈唔好係利記!)

不過是日最蠢一家係球證蘭萊爾
唔問旁證而走去問法比安奴有冇手球
咁即係問球員有冇打假波或者女友問男友有冇偷食
十個有九個半都話冇啦

p.s.:
1)
英格蘭傳媒係咪想祖家死快啲
居然而家傳鶴臣等住接手

2)
R.I.P.黎新祥教練

2010-6-19

想講對上6場波......

1) 阿根廷對南韓

許丁茂見後防唔掂都係等死
索性靠速度放手一搏
南韓仔最終輸質素都只係非戰之罪
計表現一定好過俾余大狀ko既狗奴才

講發揮阿根廷其實只有小進步
尼日利亞同埋南韓都冇徹底凍結既部署對付美斯
佢對住強隊仲可唔可以繼續咁 free 都好成疑問
今天最大得著怕且都係打起希古恩既信心

另外,後防炸彈迪米捷利斯就率先爆炸
好彩唔係對強隊尚算爆得合時
而森美爾之後最好平平安安
因為替工貝迪素當年接連爆鑊而俾摩連奴打入冷宮
有幾廢大家心照

2) 尼日利亞對希臘

轉捩點一定係卡爾達發癲累死全家
而奧保基下半場射空門都撻Q就係輸波另一罪人

難為安耶馬又守到上晒身
希臘全場27射11中
唔計失左兩球即係又有9個 save
兩場加埋15個兼過半多都係必入波
而失第二球甩手都唔多怪得佢
俾至少半打球員擋住視線
擋到已經算係咁

佢忽然上位後
傳聞特拉維夫夏普爾肯以200萬歐元賣佢去兵工廠
下季睇英超可能繼續見到佢

另一方面,而家B組4隊都仲有機會出線
不過南韓應該最終保得住次名
因為以超霸鷹咁既表現唔似羸到佢地之餘
阿根廷為安全計亦唔會俾希臘袋晒3分

3) 墨西哥對法國

明顯又係臨場調動決定賽果既例子
艾古爾換3個人加埋炮製兩個入波

杜明尼治就例牌出錯牌
續用高禾同埋用馬路達取代哥古夫都乎合佢既低手作風
要調校哥古夫係要叫佢增加後上次數
而唔係收起全隊最有創造力既佢

而輸緊波都遲遲唔換亨利又係吹脹
雖然用心態同樣超 hea 既亭利未必會掂
但咩都唔做就一定等死
越來越覺條友明知就快走人而同全世界鬥氣

烏鴉口講中墨西哥羸波
表面上佢地大條道理同烏拉圭踢默契波
不過如果和波就多數16強硬撼阿根廷
佢地對阿根廷成日有表現咁輸波
艾古爾未必想球隊繼06年後再次16強衰俾阿根廷

4) 德國對塞爾維亞

先講少少歷史
自從羸90年世界盃嗰屆大炒過南斯拉夫4:1
德國之後再鬥南斯拉夫系球隊都冇下場
98年世界盃苦戰逼和南斯拉夫2:2
8強都踢少個而俾克羅地亞炒3:0
08年歐國盃就俾克羅地亞技術性擊倒
尋晚就又俾塞爾維亞玩死
原因可能係近年德國佬屎波搞唔掂技術型球隊

不過巧合既係當中有3場波都係第二場分組賽
而對手首場表現都係劣評如潮
考慮埋比亞荷夫賽前要求球員繼續狂數既言論
就發覺輕敵都係可能原因

路維一對愛將孭晒鑊
雖然第一張黃牌係過嚴
不過之後竟然唔識死從後攔截而要提早返入更衣室
高路斯絕對係輸波頭號罪人

而球隊打少個兼落後都一鼓作氣搏左超過20分鐘
已經係全場踢得最好既一段
亦一度有曙光追平
但就衰埋門一腳唔掂
不過普度斯基宴客後佢地明顯泄晒氣
所以佢明顯都係罪人
一腳冇力冇角度既12碼就連前輩保住36年既金漆招牌都打碎埋

另外,塞爾維亞尋日場波其實有針對性部署
先同德國搶中場之餘
再封晒兩邊迫佢地入中路
跟手靠卡錫單挑畢斯杜巴
後者果然繼早前俾蘭尼ko後再次俾技術型球員玩死
當然如果梅迪薩卡同埋拿姆冇因為錯對防守而失位
輸波嗰球都唔會出現

5) 斯洛文尼亞對美國

算係今屆其中一場好睇既賽事
快上快落,多波入兼峰迴路轉
講過前者輸蝕國際賽經驗
今場就係因為咁而唔見兩分

由祖傑同埋漢丹奴域於更衣室出來唔集中
到比真歷被收起一心死守
都睇得出佢地上至教練,下至球員都唔夠國際賽經驗
如果唔係球證可能誤判
佢地應該連1分都唔住
更慘既係佢地由原本入左16強
搞到隨時下場輸俾英格蘭而俾美國趕過

6) 英格蘭對阿爾及利亞

明知阿爾及利亞驚高波
點解卡比路唔一早用哥治屈機?
而雙特合作又慣性出問題
就搞到謝拉特都沉埋
艾朗連儂就只係識落底而唔識出波
咁既球員要來有咩用

卡比路同埋英格蘭仲有一場機會翻身
晉級機會依然審慎
佢地90年同樣分組賽兩連和
最後都可以力挫埃及
不過英格蘭而家既問題仲包括近年最大既壓力
絕對係佢地晉級既 X-factor
而要留意如果佢地最終又衰一舖
阿爾及利亞只要羸到美國都可以入16強

2010-6-17 (2)

近日部份新聞......

1)
有報導指保方因為背傷而要缺席餘下比賽
不過意大利足總就已經作出否認
但就承認佢肯定唔能夠於對新西蘭既比賽候命

而法國既3號龍門卡拉素就肯定緣盡餘下比賽
不過國際足協就拒絕杜明尼治既補選要求

2)
賓尼迪斯提議利物浦搵杜格利殊接手
不過消息指利記就快宣佈由鶴臣領軍

另一方面,曼城被指打算用艾利蘭作為羅致謝拉特既籌碼

3)
拜仁將同東尼提前解約

4)
史高拉利落實重返彭美拉斯執教

5)
哥迪奧拿被指同新會長羅素會面後決定劈炮
不過後者已經否認有關傳聞

另一方面,耶耶托尼既經理人透露
佢將以2500萬歐元轉投曼城

6)
哥利斯馬落實以730萬歐元轉投比錫達斯
早前拜仁,波圖同埋馬體會都有興趣從國米接收佢

7)
曼聯落實以800萬鎊將杜錫賣去莫斯科中央陸軍
而佢地被傳有興趣接收波歷克以及魯爾

另一方面,保頓同埋伯明翰都想向佢地借用馬美迪奧夫

8)
車路士落實將史度治以250萬鎊賣到費倫巴治
而沙治奧拉莫斯就再次被指成為佢地2800萬歐元既增兵對象
另外,佢地被指同曼城以及阿仙奴出價2000萬歐元爭奪奧斯爾

9)
摩連奴被指落 order 要搵兩後衛兩中場同埋一個箭頭
馬干,維迪,謝拉特同埋朗尼全部再次同佢地扯上關係
當中前者既經理人仲透露這名巴西右閘即將上馬
不過雙方就轉會費仲有1000萬歐元分歧

10)
愛華頓落實引入葡萄牙20歲射手祖奧施華
而佢地亦被指想出價300萬鎊接收馬真拿

11)
沙拿體育會先後落實引入加比同埋米芝洛

12)
祖高爾,舒華沙以及積基卡繼續同阿仙奴扯上關係
而雲加決定加碼至830萬鎊
向羅連安特收購24歲中堅哥斯尼

13)
韋斯咸被指有興趣引入列基美
雙方可能簽約兩年

14)
士砵亭既24歲葡萄牙球員迪查路被指成為紐卡素既增兵對象
身價約值500萬鎊既佢可以踢箭頭或者翼鋒
佢老豆同埋細佬都先後效力車路士
分別做球探同埋預備組球員

15)
波圖被指想搵保羅費拉拿回巢
不過佢表明想留隊踢埋餘下3年合約
之後就會掛靴

16)
黑池可能接收諾斯禾菲

p.s.:
同吳偉超做隊友既謝利柏拉斯奧斯
俾洪都拉斯足總補選代替里安
成為史上第一隊有3兄弟同時效力既世界盃決賽週球隊
真係一門三傑

2010-6-17 (1)

想講過去兩日既6場波

1) 斯洛伐克對新西蘭

如果當斯洛伐克有力爭入16強
會覺得意大利同巴拉圭打和係對佢地既雙重打擊
不過睇完佢地同欖球強國海軍鬥水兵既表現
先發覺佢地原來只係局外人

2) 葡萄牙對科特迪瓦

可能因為索高拿跟得太緊
C7除左一腳中柱既遠射之外
留俾球迷既就只有幾腳唔中框既罰球,
一句 Fuck Off 同埋多次低級插水

大抵佢份人真係太 cheap
加上去茶餐廳睇波既麻甩佬都唔係基迷
所以相比下杜奧巴明顯受歡迎得多

手肘斷骨後11日就即刻復出救國
真係抵佢一入鏡就有掌聲
就算完場前衰唔夠獨食
都無損國家英雄既形象

做人如果有得選擇
寧願頂級樣衰都要做杜奧巴

3) 巴西對北韓

面對死守既前者再次老鼠拉龜
卡卡同埋法比安奴都明顯失準
兩個防中亦略嫌保守而少有開上前線截擊
踢得比較好就只有羅賓奴,艾蘭奴同埋兩閘

如果唔係靠今屆直到目前為止
最藝高人膽大既入波同埋俾得最通透既直線
最終都唔知幾時先搞得掂超水準既北韓防線

踢 5-4-1既輸家最終只係輸一球其實已經當羸
原來唔計搵錢既友誼賽
巴西向來對亞洲球隊最低消費羸3球
而家連南韓傳媒都激讚佢地
既反映體育精神凌駕政治對立
亦可以想像佢地有幾震撼世界

由於頭場互交白卷
北韓依然有機會出線
不過前題係至少要保持水準兼繼續以守為攻
畢竟其餘兩強既牌面都高過佢地
加上佢地其實攻力一般
破到蛋只係因為盧斯奧一時大意

4) 智利對洪都拉斯

可能吸取外圍賽既教訓
雖然智利繼續以攻為守
但比爾沙明顯有執過中後場既佈防
畢竟踢決賽週
一次意外就足以致命

5) 西班牙對瑞士

鬥牛國出閘脫腳肯定係現時為止既最大冷門
不過乳牛國帶來既震撼
依然及唔上北韓輸波輸命既死守

畢竟軒斯菲特當年教波多次收死技術型球隊
印象中更加唔止一次ko迪保基斯
而軒迪克同埋摩連奴亦接連有類似既示範

更甚既係西班牙上年輸俾美國後
球隊上下都冇唸過搵 Plan B

韋拿尋晚賽後都依然堅持球隊唔使轉章
以巴西防線對北韓都堅持略為保守既風格
西班牙咁踢真係合晒胃口
鄧加可能發覺原來鬥北韓仲辛苦過對西班牙

6) 南非對烏拉圭

泰巴里斯有兩個主要調動
一係將科蘭移後串演 playmaker
二係蘇亞雷斯更多時間去右路發難
針對南非左閘唔穩既弱點

佢地係踢得好過南非
不過羸到3球咁誇
就多得科蘭既幸運版衝力射球令南非早段就進退失據
兼球證執法過嚴令主隊尾段踢少個

主隊出線仲未絕望
但求神拜佛墨西哥今晚唔好羸
否則佢地隨時同烏拉圭踢默契波打和
不過佢地盡地一鬥法國之前最好唸計補返左路個窿
佢地嗰兩個左閘就算對住高禾都隨時出事

2010-6-15

想講近兩日既6場波......

阿爾及利亞對斯洛文尼亞以及塞爾維亞對加納
同係悶戰之餘
亦係兩黃一紅踢少個就跟住輸波既劇情
分別只係頭場水準較低

而德國同埋澳洲都係硬橋硬馬
前者自然靠質素羸波
普度斯基早段既入波亦撲熄澳洲既虛火
卡希爾下半場既紅牌就係雪上加霜

對路維而言
羸波另一得著係4個箭頭都開左齋

另一方面,佢地捧盃行情忽然高漲
可能只係因為更早出場既幾隊名牌都貨不對板
事實上佢地既評級唔值得一下子過份調高

荷蘭方面
打真軍自然冇踢熱身賽咁如取如攜
如果唔係艾加累死西蒙保臣
丹麥應該有排都未散

喀麥隆就係近兩日最令小弟激心既球隊
表現似隻訓左覺既獅子

睇多兩場波既都會知日本驚對手兩邊斬中
拿古恩竟然堅持控球在腳既戰術
學晒摩連奴套嘢既崗田武史當然唔會介意
而更抵死仲係矮一截既0架仔居然靠高波攞晒3分

拿古恩當年於里昂成名後轉投格流
硬要球隊跟佢控球在腳既踢法
結果唔夠一季就收左皮
喀麥隆似乎會成為佢另一個失敗既實驗品

似乎佢唔明白
其實踢波同做好多嘢一樣可以好簡單
捨易取難就更加唔會有運行

意大利方面
咬唔入巴拉圭冇咩所謂
大不了之後兩場同佢地鬥入波
反而簡拿華路又爆鑊兼似陸續有來先係大檸樂

p.s.:
1)
辦公室波神彼德認為北韓可以靠女色同埋政治壓力
令森巴兵今晚出事
係真唔係呀?

2)
溫馨提示:
灣仔 Dymock 清貨
小弟用左$85.7就買到魯殊同埋加斯居尼既自傳
而有本聲稱大爆奇雲基瑾97年劈炮內幕既書都只係賣$50

2010-6-13

話咁快就踢左5場分組賽…..

1) 南非對墨西哥

預左墨西哥前線有功勢冇實際
早前對英格蘭同埋荷蘭已經俾人睇通晒
杜斯山度士已經係唯一亮點

主隊最終捉到鹿唔識脫角
兩個好餐士都拉唔開兩球優勢
雖然佢地進攻板斧唔多
不過靠主場氣勢依然有力爭入16強

對南非本土搵食既球員認識唔多
不過對古尼舒巴拉拿就有一定印象
事關凱撒酋長係小弟最有印象同埋好感既南非球隊
佢地06同埋07年兩度派青年軍訪港踢7人賽
簽晒名既紀念錦旗同埋官方 Vuvuzela 都係小弟睇波既紀念品

2) 烏拉圭對法國

甩毛公雞近年大賽既表現一次衰過一次

杜明尼治既用人再次吹到世人啤一聲
搵馬路達同埋列貝利一左一右本來正路
佢偏要用廢柴高禾踢右邊
列貝利仲要因而轉邊搵食

而安歷卡同埋哥古夫既表現又係令人失望
前者因為後者冇後上支援而被迫更加獨食
兩個都唔應該踢多過半場

正箭頭基格納就俾條傻佬當跑狗咁用
後備入替後毫無作為都唔怪得佢

迪亞比同埋杜拿蘭已經係比較有表現既少眾
前者助攻助守仲有少少韋拉既影子
只係嫌佢俾直線既火候仲未夠

另外,亨利如果繼續佢放狗散步既步伐
就不如索性退出國家隊

烏拉圭方面
冇咩供應既科蘭單挑加拿斯已經好有威脅
不過就繼續反映冇可靠 playmaker 既老問題

3) 南韓對希臘

希臘似乎比08歐國盃更加唔掂
當中條防線差到唔認得係佢地
難怪軒迪克叫佢地開始執行李

4) 阿根廷對尼日利亞

兩隊都冇組織
個人質素超班既阿根廷自然佔優

現時既阿根廷比外圍賽略有進步
至少死球戰術好有部署
泰維斯專攻左路亦令美斯更 free

不過兩閘同埋防中仍有隱憂
而列強既死守能力亦遠高於尼日利亞
今賽羸波唔足以令小弟對阿根廷既評級大幅提昇

另一方面,安耶馬算係一戰成名
不過反應超快既佢其實超級神經刀
出迎解圍仲係佢既弱點

5) 英格蘭對美國

一早講過美國佬遇強越強同埋格連信唔過
弱雞龍門既犯錯向來好似交稅咁走都走唔甩

2010-6-11 (2)

近幾日既部份新聞......

1)
納比被傳可能接手利物浦
不過英國傳媒仍然認為鶴臣先係大熱門
而有報導指杜格利殊自薦接手
亦有版本指佢同魯殊合組雙領隊

2)
賓尼迪斯落實接手國米
不過350萬鎊年薪只係摩連奴既1/3
而包括柏歷堅奴在內既教練團會跟佢過檔
但森美李爾就繼續留守利記

另外,隨即有傳聞指馬斯查蘭奴同埋古治
會以3300萬鎊跟佢去國米

3)
杜奧巴,洛賓同埋蘇連遜趕及首場分組賽
但蘭尼就因為膊頭受傷而無緣世界盃

4)
德甲成為全球最賺錢既聯賽
08至09年度既收入高達16億港元

5)
國際足協決定放棄'6+5'政策

6)
車路士最終決定唔同祖高爾,比列堤以及波歷克續約

當中祖高爾就被指已同阿仙奴簽草約3年
不過就要於世界盃後再次驗身先可以作實

而波歷克被傳轉投皇馬跟隨摩連奴
車仔就被指想以2500萬鎊引入舒韋恩史迪加作為佢既替補

另外,沙治奧拉莫斯就被指成為2800萬歐元既新右閘人選
而卡路爾就令人意外咁同佢地扯上關係
不過曉頓已經否認有關傳聞

7)
亨特拉爾拒絕加盟熱刺

8)
耶耶托尼既經理人聲稱
這名科特迪瓦防中可以成為巴塞收購法比加斯既籌碼
消息指巴塞想用佢加1000萬鎊
或者以4200萬鎊收購法比加斯

另外,羅馬被指有興趣引入伊保爾
不過雲加堅持要至少1000萬歐元先肯放人
而辛達路斯就已經落實轉投富咸

另一方面,費爾就被指成為雲加既新龍門人選

9)
曼城被指想用羅賓奴作為收購伊巴謙莫域既交易條件
而佢地被指打算出價3000萬歐元同AC米蘭爭奪巴里奧斯
另外,馬田柏度夫,馬華路禾尼同埋施雲奴就落實被放棄

10)
馬特尼同埋柏仙尼都被指成為森多利亞既增兵對象

11)
水晶宮變賣主場史靴斯公園以避免被清盤

12)
奇勒落實離開韋斯咸
佢被指可能加盟紐卡素出任預備組教練

而蘇拿亦同槌仔幫達成賠償協議

13)
曉頓否認引入保拿特,蘇甘保同埋奧拜恩既傳聞
佢亦透露史堤芬泰萊即將續約

另外,佢地同埋保頓都被傳有興趣從韋斯咸接收巴西射手伊蘭

14)
羅馬落實同泰迪續約4年
而自由身既阿祖安奴亦已經簽約3年

p.s.:
好波 Kick-off!

2010-6-11 (1)

G組方面

雖然分組賽已經硬仗連場
不過巴西向來唔算慢熱
首名出線依然唔係問題
只怕虛耗過度而影響往後既戰鬥力

鄧加揸旗就有利有弊
好既一定係踢法實際
亦係自比利嗰代後於94年同埋02年再次捧盃既原因

而吸取06世紀盃同埋京奧既教訓
搞事又交唔到貨既通通冇得留低
球隊紀律絕對係近年最好

不過佢地爭標亦有兩大隱憂
一係雖然有法比安奴咁可靠既射手
不過球隊創造力一般
已經多次被對手死守成功
所以馬干,米高巴斯圖斯,拉美利斯同埋艾蘭奴既助攻
就變得比以前更加重要

二係基拔圖施華以及美路既水準
差過當年鄧加同埋施華至少一班
成為球隊最大弱點

葡萄牙方面
佢地只算係A貨巴西
教練昆羅斯只係岩搞青訓同埋助手
由佢坐正既球隊通常冇好下場
如果唔係匈牙利,瑞典同埋波斯尼亞全部捉到鹿都唔識脫角
佢應該已經俾人炒左

而球隊繼續唔識防守之餘
C7冇左群星拱照就只係個識浪射既普通人
除非列特臣可以坐正分擔佢既入波工作
否則佢地唔似入到16強

而講科特迪瓦就要先申報利益
早兩年從佢地既助教攞到件簽晒名既奧運版練波衫
小弟就對佢地有一定情義結

佢地前面幾勁唔使多講
耶耶托尼,羅馬歷同埋索高拿既3防中組合直情超硬淨
如果唔係後防雞雞地
佢地既實力算得上世界一線

當中杜奧巴係球隊重心
Top fit 既佢有能力擊敗當今任何一個頂級中堅
好彩佢而家可以負傷復操
就算狀態唔夠都有一定牽制力
可以好似往常咁拉空對手俾卡奴同埋謝雲奴搵食
葡萄牙同埋西班牙都肯定有排煩

怕且佢地既最大隱憂可能係教頭艾歷臣名大於實
兼對球隊認識唔多

而北韓靠跑狗踢法
加埋表面 4-5-1,實際 9-0-1 既排陣
就算最終3連敗出局
對手想羸都肯定要用超多體力

H組方面

西班牙係首名鐵膽
球隊早前傳出既派系問題似乎只係傳媒炒作
因為迪保基斯出名管理手腕圓滑
不過佢地想捧盃仍有隱憂

一係迪保斯基為左遷就8個巴塞球員而轉陣踢 4-3-3
不過巴塞都可以衰俾國米
美國上年又ko過佢地
隨時又俾對手死守成功

二係佢地08年羸歐國盃既關鍵其實係靠防線忽然生性
不過今次既雙防中沙比艾朗素同埋布斯基斯
論截擊能力都差過落選既辛拿
加上右閘沙治奧拉莫斯出名輕出
隨時俾對手偷襲得手

而與其話智利同瑞士爭出名
不如話比爾沙智鬥軒斯菲特
雖然智利最後一場先鬥西班牙而可能有甜頭
不過小弟始終睇高瑞士半線

一來數據派既前者主打 3-3-1-3 踢兩翼側擊
偏偏主力射手蘇亞素受傷患困擾
而以攻為守既踢法亦隨時偷雞唔到蝕渣米
防線畏高亦令佢地隨時俾高波炸死

二來軒斯菲特教波比較務實
以前教多蒙特同埋拜仁就多次算死技術型球隊
而球隊亦相對比較攻守平均

而洪都拉斯既人腳明顯比較輸蝕
點睇都唔似可以繼82年後再次嚇親鬥牛勇士
不過佢地絕對有條件左右智利同埋瑞士爭次名

2010-6-10

E組方面

荷蘭獨大
不過優勢當然冇英格蘭同埋西班牙咁明顯
不過橙衣兵團最終可以去到幾遠
就要睇佢地會唔會又俾內訌搞死自己
同埋雲馬維克有冇本事進一步執靚條防線

事實上佢地中後場既人腳明顯比較削
分組賽只係失兩球只係因為對手太雞
唔足以反映佢地既防線好可靠
所以以雲邦美為首既幾個防中
應該先係最重要既球員

丹麥方面
明顯就靠出色既中路防守爭次名
不過佢地攻力一般
靠幾件老嘢支援中堅賓好難令人放心
而主打兩翼側擊就令唔掂既兩閘更加受壓

同丹麥爭次名既喀麥隆就相反攻強守弱
連拿古恩咁堅都唔多搞得掂
尼高拔桑治同埋謝列美兩個老人家
可能會繼續以精神領袖既角色留隊
負責掃蕩既桑治同埋馬干先係防守核心
前場方面佢地只要踢簡單足球
靠一個伊度奧已經好大威脅

而佢最終冇俾米拿激到退隊之餘
仲肯俾錢重賞隊友
士氣既高漲係近年大賽少見
加埋半個主場優勢
以及最後一場先對應該已經篤定出線既荷蘭
足以壓倒丹麥入16強

日本方面
主場出擊都只係入到16強
岡田武史既4強宣言似乎只係用來振訓士氣
最慘係隊波近幾個月越來越唔似樣
連僅有偷雞既餐士都冇埋
絕對唔似係杜斯亞所講輸波扮蟹既另類意見

F組方面

意大利又係抽到好籤
就算表現慢熱都應該過到分組賽
不過唔似有本事成功衛冕

白頭佬接手後冇咩好選擇去換血
有料既大衛辛頓,卡斯辛奴同埋巴洛迪利又偏偏係搞屎棍
當中前者仲要長期養傷
人腳絕對係近幾次世界盃最差

而砌出來既新陣 4-2-3-1 亦冇化學作用
馬治斯奧係有潛質既防中新血
但唔係客串 playmaker 既好人選
亦隨時令迪羅斯要減少助攻去支援派路

加上陣中冇類似羅斯同埋巴治奧既救世主
佢地8強,甚至16強出局都唔會令小弟意外

巴拉圭方面
主打防守既佢地反正冇 playmaker
馬天奴經常大條道理用夠3個防中踢 4-3-1-2
不過弊端就令幾個高質素射手欠缺供應
而自卡賓拿斯被槍傷後更加冇人墮後派牌

球隊早前就試陣踢 4-4-2
不過中場就用晒4個工兵
雖然佢地擅長遠射同埋傳中
不過實戰威力依然成疑
加上佢地向來門口狗
可能繼06年後再次分組賽畢業

斯洛伐克同巴拉圭一樣守強攻弱
相比下防線同埋前線都比較輸蝕
而防中兼隊長卡漢因傷缺陣仲係雪上加霜

想偷雞壓倒巴拉圭出線就有兩個關鍵
一係咸錫,韋斯同埋史杜治幾個唔錯既攻擊中場有幾多貢獻
二係要睇第3場對手意大利到時攞夠分未

至於新西蘭
雖然佢地早前踢熱身賽羸過塞爾維亞
但只會提醒其餘3隊更加醒醒定定
搏和波,甚至入波既難度都大左

2010-6-9

C組方面

英格蘭明顯係首名鐵膽
好多人應該只會唸佢地最終可唔可以一搔44年之癢
不過小弟就覺得佢地冇咩冠軍相
而事實佢地亦問題多多:

格連唔夠班,
里奧費甸南因傷退隊,
泰利受醜聞影響而跌 watt,
雙特問題未完全解決,
巴利又受傷患困擾,
陣中只有祖高爾有創造力,
燥狂朗尼季尾死火兼明顯有疲態......

不過最大鑊都係佢地例牌輸心理質素
射12碼既戰績仲差到得人驚
連自己都羸唔到都唔知點去羸人
卡比路雖然識執紀律
但履歷顯示未必識醫心理病

阿爾及利亞方面
佢地可能係全組最好波既球隊
不過防守唔集中兼畏高
仲成日一輸就散晒
而家連麥尼都冇埋
類似年頭打瓜科特迪瓦既冷門賽果應該唔會再發生

至於斯洛文尼亞
佢地乒圍就係靠唔錯既整體防守能力
外圍賽只失4球兼ko俄羅斯唔似係撞彩
不過攻力平平
創造力亦唔及02年有沙豪域嗰隊
而大賽經驗唔夠美國
仲好可能係佢地爭唔到次名出線既關鍵

美國次名出線應該唔令人意外
擅於穩守突擊仲應該係佢地多次食住強隊既關鍵
首場對英格蘭隨時係佢地踢得最好既一場

D組方面

德國佬應該係列強當中最唔齊腳既一隊
當中得返兩個防中都幾濕滯
路維梗係大條道理更加以攻為守
不過幾件大牌射手都冇咩態
被寄予厚望既奧斯爾做左大國腳之後亦未有代表作
至怕搶攻唔成搞到防線壓力仲大左

而自90年西德捧世界盃以來
佢地只係試過羸過葡萄牙兩次
其餘一線強隊通通都羸唔到
加上路維既領軍能力只係一般
戰鬥力隨時差過98年嗰隊

不過好在心理質素向來超班
活力亦唔比4年前差
8強依然係合理既最低要求
捱到入4強甚至決賽都唔係天方夜譚

另一方面,波歷克缺陣既影響應該唔大
事關陣中好多年青球員原來都頂佢唔順
德國佬既團結隨時係更勁既 X-factor

加納方面
冇左當今其中一個頂班防中艾辛真係超級大檸樂
不過佢地1月踢非國盃
唔靠艾辛咪一樣靠防守守到個亞軍
硬朗中場一定俾到德國同埋塞爾維亞既技術型中場好多麻煩

部份世青盃冠軍高質新血繼非國盃後繼續入選
球隊亦有其他大佬輩睇住
靠埋半個主場同埋睇通祖家既教練拉積域
再入16強有咩咁奇

塞爾維亞方面
佢地可能又係幾好波都冇用既例子
4人防線雖然成功換血
不過龍門同埋防中都有隱憂
加上教練安迪其實名大於實
'首次'參賽應該好快畢業

澳洲就同南韓一樣
冇左軒迪克後已經唔使點理
韋碧克越睇越似只係靠'軒迪克副手'既履歷去呃飯食
都唔明點解摩洛哥足總之後會旨意佢搞青訓

2010-6-8

由今日起陸續講分組賽形勢......

先講A組
艾古爾連續三屆帶墨西哥踢世界盃
雖然陣中平均技術冇退步兼又有新星踴現
不過球隊無論防守集中力,機動性同埋埋門把握都差過前兩屆
再入16強應該幾有難度

烏拉圭方面
陣中雖然有科蘭,蘇亞雷斯以及卡雲尼3大射手
不過冇 playmaker
打真軍既時候入到幾多就好成疑問
加上佢地防守一般
踢法粗野又隨時俾停賽問題玩死
教頭泰巴里斯亦越來越冇料到
過到分組賽已經算係 bonus

法國方面
同泰巴里斯相比
杜明尼治就簡直係從來都冇料到
球隊今次最大問題係後防
佢地雖然有唔錯既龍門同埋兩閘

不過偏偏中路大把隱憂
加拿斯傷癒後肯定唔係 top fit
加上無論用艾比度,柏蘭奴斯或者史基拿斯都令人唔放心
如果將杜拿蘭移後
效果只係好少少之餘
仲會令截擊力進一步削弱
要知道佢地上次爆冷入到決賽
負責截擊既韋拉同埋馬基里尼絕對係無名英雄

杜明尼治而家想以攻為守而將陣式改為 4-3-3
出線都應該仲做得到
不過甩毛公雞最終可以行到幾遠
就要靠攻擊球員盡快練好默契
亦要睇亨利後備落場既作用

考慮到前三者都雞雞地
主辦國南非雖然人腳輸晒
不過有主場之利之餘
加上彭利拿既功力兼球隊有唔錯既死守能力
出線仲有曙光

B組方面
計教頭功力就首推列哈格
單係睇佢帶凱沙羅頓升班即羸德甲同埋帶希臘羸歐國盃
就已經知佢堅過石堅
不過限米煮限飯之餘
一味死守再突擊已經俾對手睇通晒
08歐國盃分組賽3連敗已經反映一齊
今次要歷史性入到16強既難度甚高

尼日利亞方面
球隊雖然有半個主場
不過人腳攻強守弱
要繼法國世界盃後再入16強
好睇拉碧克以有限時間整治佢地防守既功力
而第一步可能係改用雙防中踢 4-4-2

另一方面,米基爾雖然因傷缺陣
不過影響應該唔大
因為質素一般既佢踢太公波從來都冇好表現

南韓方面
冇左軒迪克後已經只係隻冇牙老虎
而家條後防線仲係近年最差
不過中場人腳唔差
加上整體戰既意識好過尼日利亞同埋阿根廷
只要首場羸到希臘
就算輸技術都仲會有一絲出線機會

阿根廷方面
絕對係一流材料配九流廚師既例子
馬勒當拿點兵頭重尾輕
軒斯同埋迪米捷利斯咁屎都居然踢正選
偏偏辛尼迪同埋甘比亞素就連入選都冇份

而家仲有報導指佢一心以攻為守而打算轉踢 3-4-3
寧願收起奧達文迪都要出埋泰維斯
等移地上最強既美斯移入中路後可以踢得更 free
聽落天下無敵
但隨時死得仲快
最終唔似走得好遠

2010-6-7 (2)

近兩日既新聞......

1)
哈利列納被指考慮帶埋個仔加盟利物浦
而列卡特就否認接手利記

2)
國米證實斟酌賓尼迪斯
莫拉堤仲表示佢係摩連奴既頭號接班人
消息指雙方最快聽日落實

3)
尼日利亞對北韓既友賽
由於部份入場球迷發生衝突
導致10人受傷既人踩人意外

4)
杜奧巴手術成功
而艾歷臣透露佢仲有些微希望參加世界盃

5)
洛賓,希丁加,科蘭,史基泰爾,比哈美,柏林保,柏拉斯奧斯同埋蘇亞素
成為最新一批受傷患困擾既球星
當中前者仲要留院
好大機會同世界盃絕緣

6)
消息指阿仙奴要5000萬鎊先肯放走法比加斯
而基治亦再次同巴塞扯上關係

而佢地被指最有機會羅致祖高爾
原因係當時人唔想離開倫敦
但亦有報導指佢可能轉投皇馬

另一方面,雲加被指再次去法甲搵新血
兵工廠除左同馬賽以及朗斯爭奪尼斯23歲射手列米外
亦有興趣從羅連安特收購中堅 L.Koscielny
這名可以代表法國或者波蘭既23歲球員既身價高達800萬鎊

7)
皇馬公布摩連奴會有4500萬鎊增兵
而佢再想買人就要先賣人
因而有傳聞卡卡,雲達華治同埋加高都會俾掛牌
賓施馬就被指用來交換馬干
不過後者就暗示唔會離開國米

佢地既喉舌報馬卡報又幫手玩嘢
竟然指謝拉特已向高層要求轉投皇馬

而有報導指皇馬會用德倫特加現金收購迪馬利亞

另一方面,卡蘭卡落實回巢出任摩帥既副手

8)
雲達韋爾被指成為巴塞既600萬歐元增兵對象

9)
希斯貝加以自由身轉投韋斯咸
雙方簽約3年

10)
迪利尼想帶埋柏林保去祖雲達斯

11)
曼城落實以1050萬鎊收購謝路美保定
佢地亦被指準備最後出價2500萬鎊收購占士米拿
而托利斯以及丹尼爾艾維斯亦繼續同佢地扯上關係

另一方面,馬賽被指準備接收辛達告魯斯

12)
侯城方面透露冇收過些路迪對保拿特既斟酌
而球隊亦想留佢爭升班
另有報導就指佢想收200萬鎊賠償同侯城解約

13)
希蘭特被指成為熱刺既增兵對象
哈利列納執教樸茅期間曾經引入佢
不過因為佢申請唔到工作証而將佢外借去比利時球會 Zulte Waregem

另外,贊拿斯被指成為史篤城700萬鎊既收購人選

14)
消息指伯明翰已經唔止一次出價收購米高利

15)
莫斯科斯巴達被指打算以1000萬歐元收購麥基迪

p.s.:
由於世界盃將至
轉會同埋花邊新聞由聽日起只作有限度服務
取而代之先有分組賽 preview

2010-6-7 (1)

想講薜高訪港做 show......

會場好多人圍觀
不過至少二百個少女都係為左睇一個花名叫王子既年青偶像
龍友就係為左影天氣女郎同埋性感 model
基本上佢只算係傳媒同埋少數球迷既目標

由於佢外型同個普通阿伯實在冇咩分別
所以入場既時候同球迷以及記者擦身而過都竟然冇人認得佢
見到佢既小弟又偏偏身處另一邊
結果要等到完場先搵到佢簽名

大會明明搵左個翻譯幫薜高做訪問
但唔知點解今日睇報紙
既有版本話佢撐巴西捧盃
又有版本話佢貼決賽戲碼係西班牙對阿根廷
真係唔知邊間報館既記者亂交功課

另一方面,佢老人家做兩場 show 就豬籠入水
主辦單位自然用到佢好盡
開幕禮,交換紀念品同埋切蛋糕就梗係指定動作
全程化身簽名機器同埋人肉佈景板佢都應該習以為常
不過偏偏教小朋友踢波既主打活動就連10分鐘都冇

最抵死係佢仲要同年青偶像一齊跳舞
同埋跟天氣女郎學寫毛筆字
據聞主辦單位仲有其他嘢想搵佢宣傳埋
咁樣 over-run 真係鐵人都死
何況佢仲一把年紀兼舟居勞頓

完場後佢仲要簽大約40件波衫俾大會同救世軍搞義賣
難怪工作人員都話佢罰抄左成個下晝已經好唔開心

不過話說回頭
件簽名版薜高波衫連明信片再加禮盒包裝真係好吸引
如果唔係要成1000蚊兼冇收據扣稅
小弟都應該會買返件做紀念

2010-6-5

1)
里奧費甸南同埋米基爾都因傷緣盡世界盃
而杜奧巴,派路同埋卡度素都可能步佢地後塵
但法國傳媒指前者可能於10日後奇蹟復出

2)
賓尼迪斯將於兩日內落實加盟國米
而馬斯查蘭奴被傳會以2500萬歐元跟佢過檔

3)
艾歷臣暗示有興趣接手利物浦
而有報導指利記想搵哈利列納接手

另一方面,利記球迷會唔順氣賓帥俾美國佬逼走
而當眾燒美國國旗

4)
祖雲達斯將以1000萬歐元從烏甸尼斯收購柏比
亦會以700萬歐元買埋簡達華餘下5成擁有權

5)
阿倫湯臣同紐卡素和平分手
一般相信佢想轉投些路迪
而紐記被傳可能搵前波比sir J.Carver, 史東或者馬田史葛接手

6)
科蘭被傳成為熱刺既新箭頭人選

7)
艾辛同車路士續約到2015年
而迪辛圖被指成為保頓既增兵對象

8)
些路迪被指準備放棄鄭智同埋寄誠庸
當中消息指伯明翰會接收前者

9)
阿仙奴落實引入多名年青球員
分別係17歲阿根廷龍門馬天尼斯,
高速16歲愛爾蘭射手P.羅拔斯
同埋17歲荷蘭中場 K.Ebecilio

另一方面.拉樸達放風3500萬歐元係法比加斯既合理價錢

10)
費爾被指成為維拉500萬鎊既新龍門人選

11)
狼隊被指準備接收莫高拿

p.s.:
男女國足命運迥異
長年唔爭氣既連甩毛公雞都羸埋
偏偏當年既鏗鏘玫瑰而家衰到谷底
最新消息係孫雯亦唔肯接手......

2010-6-4

近兩日既新聞......

1)
賓尼迪斯落實同利物浦和平分手
傳聞掟煲費高達600萬鎊
(另有幾個版本指300萬鎊)
而賓帥被指最有可能轉投國米

另一方面,利記營運總監佩斯路同埋杜格利殊將會負責搵新領隊
傳聞人選包括奧尼爾,麥利殊,曉士,軒迪克,鶴臣,森美李爾,
比歷,雲高爾,尹巴士頓,奇連士文,史高拉利,
甚至乎杜格利殊或者魯殊

2)
卡比路同英格蘭足總提前續約至2012年
當中取消佢可以於南非世界盃後提前離隊既條款

3)
報導指摩連奴要求引入左閘,中堅同埋中場
有報導指皇馬打算出價3000萬歐元收購謝拉特
而華加斯亦再同皇馬扯上關係
車路士,曼城,國米同埋祖雲達斯亦對佢好有興趣
而迪馬利亞就被指最有可能成為摩帥任內首個收購

另一方面,有報導指佩雷斯透露
只要出價9500萬鎊就可以打動曼聯賣走朗尼

4)
阿仙奴拒絕巴塞對法比加斯既3000萬歐元出價
後者就打算之後提出免費借用基格連斯基俾
打動雲加放人

不過會員既續會申請表冇左法比嗰樣
就令人估計佢最終會離隊

另一方面,雲加為左支持養傷既艾朗藍斯而同佢提前續約

5)
阿仙奴再次同格連扯上關係
另外,哈利列納暗示祖高爾唔會加盟熱刺後
令人估計佢既落腳地將不出兵工廠同埋曼聯

6)
北韓將射手金明遠以龍門身份註冊
不過國際足協已經表明佢唔可以以龍門以外既身份出場

7)
耶耶托尼既經理人炮轟巴塞將佢既身價定為唔合理既3600萬歐元
令佢轉會曼城既交易隨時胎死腹中

8)
費倫天拿宣佈米赫洛域同埋G.迪亞哥斯天尼加盟
後者既轉會費為750萬鎊

9)
由於27/8於摩納哥踢歐洲超級盃
所以國米反對21/8於鳥巢踢意大利超級盃

10)
柏保路伊賓路斯為左尋求出場機會
落實以自由身同西布朗簽約3年

11)
伯明翰再次同麥基迪以及卡路爾扯上關係

12)
紐卡素被指同些路迪爭奪羅倫士
這名愛爾蘭中場既身價約值150萬鎊
而報導指奧奴夏唔願意轉投紐記

13)
拿約芬山度士同巴塞續約到2012年
而杜斯山度士可能因為細佬落選世界盃名單而退隊

14)
紅武士決定暫停收購曼聯既計劃

15)
阿祖安奴被揭發同販毒份子有金錢來往
已經影響佢以自由身轉投羅馬

而羅馬就落實引入自由身既森比斯奧

16)
謝路美保定將於世界盃前同曼城簽約

而報導指文仙尼親自打電話斟伊巴謙莫域過檔
不過當時人已經否認離隊

另有消息指華倫西亞雖然已接受佢地對大衛施華既3000萬鎊出價
但當時人只打算轉投皇馬

17)
比基安尼被指將以200萬鎊轉投富咸

18)
拜仁同艾美艾天托普續約1年
佢地亦再次同紐亞扯上關係

另一方面,熱那亞方面就透露有8成把握接收東尼

19)
熱刺被指將於暑假一併引入占士以及米卡李察士

20)
史堤芬費查落實加盟狼隊
雙方簽約4年

21)
格流成為最新一間同紐根特扯上關係既球會

22)
卻克蘭被指成為新特蘭既增兵對象

23)
保拿特被傳將以借用形式轉投些路迪
而蘇甘保表示會等連儂正式上任先再定去向

p.s.:
今晚就算天氣唔好或者大把人等住約
都請大家抽空去維園
用行動向政治打壓 say no

2010-6-2 (2)

近兩日既新聞......

1)
摩連奴正式上馬
報導指冇人可以干預佢安排操練同埋排陣
而亦冇任何高層可以於半場進入更衣室

另外,佢於記者會表示想帶隊再羸歐聯
不過佢亦表示唔一定成功

另一方面,希古恩即將續約至2016年

2)
由於卡比路將留任到2012年
隨即再有傳聞指國米會搵軒迪克,賓尼迪斯或者柏歷堅尼接手
不過消息指前者已經拒絕接手

而馬勒當拿自薦故國米就俾莫拉堤拒絕

3)
華倫西亞方面承認皇馬準備收購大衛施華
而曼城就被指想用祖奧加現金搶人

4)
即將訪港既薜高落實加盟法林明高出任技術總監
而佢未來4年既人工將由球會贊助商 BMG 同埋奧林巴斯負責

5)
簡拿華路宣佈下季轉投阿聯酋球會阿爾阿赫利

6)
傳聞古烈治於世界盃後接手澳洲

7)
雲加被指打算引入哥古夫取代法比加斯
消息指波爾多將前者既贖身費定為2180萬鎊

8)
芬倫可能轉投黑池

9)
消息指利物浦寧願將班拿約賣去莫斯科斯巴達
不過當時人表態想去車路士
車仔亦由600萬鎊加碼至1000萬鎊
令佢上車幾成定局

而托利斯就被傳成為國米7000萬鎊既增兵對象

10)
羅馬將於下星期同阿祖安奴簽約
報導指合約列明麻煩友冇得飲酒
而近日巴西警方懷疑佢同黑幫有關而搵佢問話

11)
愛華頓被指打算出價500萬鎊同阿仙奴爭奪史堤芬泰萊
而耶保仲可能被用作交易籌碼

12)
韋斯咸方面有興趣引入碧咸
而賓希姆亦同佢地扯上關係
卡頓高爾就被指成為史篤城1200萬鎊既新箭頭人選

13)
馬體會再次同咸美艾天托普扯上關係
而迪亞高就被指成為車路士既增兵對象

14)
古迪被指可能轉投布力般流浪

15)
曼聯方面透露球會有9500萬鎊現金
俾費sir買人或者改善設施

而有報導指曼聯將以1200萬鎊收購保贊
可信性就一定大過2000萬鎊羅致阿迪達既傳聞

16)
朴主永被指成為富咸,維拉以及愛華頓既增兵對象

17)
雖然已經過左4000萬歐元鬆人既期限
但有消息指曼城羅致迪施高就快成事
而馬干既經理人證實曼城斟酌這名巴西右閘

另外,維拉就將占士米拿定價3000萬鎊

18)
保頓被指準備引入紐根特以及米希爾

19)
基斯保迪落實離開格流
佢透露想尋求蘇超以外既挑戰
紐卡素,伯明翰,狼隊,布力般流浪,米堡
同埋土耳其球會 Kayserispor 都有興趣引入佢

20)
卡迪夫城被傳考慮引入比拿美同埋高馬斯

21)
狼隊落實由安德烈治引入雲丹美
而維拉就被指想用希斯基加現金羅致奇雲杜里

另外,伊維路莫就轉投般尼
雙方簽約兩年

22)
比基可能跳船去富咸

23)
列斯被指想搵加利賀巴替補碧福特

p.s.:
心情天陰轉晴
上晝因為人事部既荒謬條例而燥狂
下晝收到通知抽到件 Umbro 波衫而驚喜
希望最終件衫係英格蘭而唔係曼城

2010-6-2 (1)

各隊世盃名單終告全部落實
最屬目既應該係英格蘭

柏加,侯度史東,戴臣同埋戴倫實特最終落選
反映卡比路盡量都唔用只得球會級數既球員
不過小弟始終認為前者比卡域克值得入選
怕且佢只係輸在大賽經驗

阿當莊臣就因為祖高爾回勇後而於卡師心目中變成多餘
不過23人只得一個創造型球員又未免太少

而禾確特明明入選機會好高
偏偏兩場熱身賽都交唔到貨
益晒對埃及有好表現既胡禮菲臘斯
外界意外只係因為4年前更意外

巴尼斯就又係自己唔爭氣
最終益左質素更平庸既禾洛克
不過佢地邊個入選都應該多謝布歷治同埋泰利

路維應該黑仔過卡比路
而家連韋斯達文都冇埋
佢踢走安達斯碧克既決定絕對係輕鬆得來超級無奈
全隊只得兩個正職防中就直情少見
大條道理更加以攻為守

意大利方面
轉陣 4-2-3-1 既納比踢走兩個射手絕對正路
羅斯因為今季表現不穩而落選
絕對合情合理
不過波里路爭唔羸伊亞昆達就似乎又係祖記情義結既例子

麥卡菲冇得幫主辦國踢又係抵死
紀律同埋狀態都唔掂
key point 仲係佢冇羅馬里奧咁勁
彭利拿忍到最後一刻先手起刀落已經好俾面佢

南韓仔唔選李根鎬冇咩所謂
因為佢出左亞洲唔似惡得出樣
反而後防冇埋郭泰輝就更加令人擔心