2010-6-25

想講近兩晚既第三輪比賽

C組方面
英格蘭向來唔驚硬橋硬馬既東歐球隊
不過對手都唔慌會驚高波
所以希斯基有傷既唔 fit
卡比路就寧願用迪科爾而棄哥治
擺明靠速度制敵
而大抵艾朗連儂既傳中成功率低到離譜
卡比路亦下定決心用狀態回升既占士米拿
貪佢踢法實際兼有效率
結果都係靠佢兩個先有得羸波

卡比路賽後話球隊終於似返英格蘭
小弟就覺得表現雖然係3場當中最好
不過雙特問題仍有待解決
始終認為收起林伯特會係上策
中路靠謝拉特同埋巴利一攻一守
左路就靠陣中唯一有創造力既祖高爾

不過好在京治可以趕及復出
而朗尼既狀態又有少少好轉
加上英格蘭對德國實搏命
唔好因為佢地分組賽唔掂而睇淡佢地

另一方面,補時先入到波既美國表面好有運
不過以佢地既整體發揮
依然值得全取3分
上半場丹普西既詐糊又係近期旁證成日發夢既另一例子

而斯洛文尼亞搞到戲劇性出局
原因都係上場對美國唔夠國際賽經驗而放虎歸山

D組方面
德國雖然力挫加納
不過全隊除左可以四圍走兼入埋世界波既奧斯爾外
其實冇一個有好突出既表現
當中應該同路維既用人好有關係

普度斯基同埋湯馬士梅拿被定位兩側但偏偏冇速度上優勢
前者仲可能因為上場宴客而患得患失
如果路維肯俾3個進攻中場都有同樣既自由度
效果應該會好好多

而卡卡奧就因為供應不足而冇咩表現機會
不過佢勝在勤力
多次拉開對方後衛去俾空位幾個中場

後防方面
一對中堅繼續信唔過
對住朗尼都幾蝕底
不過限米煮限飯就同路維冇關

但要謝路美保定同埋拿姆各自踢冇咁 fit 既一邊
就係幾令人費解
而如果後者可以重回左路
應該幫到普度斯基好多

另一方面,小豬拉傷大腿而好可能至少抖1個星期
單靠基迪拉點睇都好唔穩陣
絕對令路維更加頭痛

塞爾維亞原本可以把握加納輸波而和波都可以出線
好衰唔衰佢地遇弱越弱之餘
同澳洲下半場仲越踢越急
人地袋鼠兵質素所限就話高Q大棍
佢地有波底都跟風就只有益晒對家
安迪賽後反而賴球證誤判就未免太小家

E組方面
終於有死球入波
仲要係日本起孖
真係估佢地唔到

查實個波咁飄
射嗰個雖然好難食得應
不過如果得左就真係玩死龍門
平時算係幾穩陣既蘇連遜都輸到失失慌

而丹麥向來唔擅長主攻
要返敗為勝就更難
場波過左半場已經係垃圾時間
不過戰情尚算精彩

另一方面,日本連續3場都算係靠突擊搵食
下場對同樣唔擅長搶攻既巴拉圭
可能係16強比較悶既一場

F組方面
上屆冠亞軍一齊分組賽畢業
都算難兄難弟
意大利出局表面係今屆最大冷門
不過過左頭兩場已經只係半冷

比較斯洛伐克近兩場既推進速度
就會發覺意大利中後場既攔截只係做樣
同巴拉圭既高效率差超遠
後面有簡拿華路仲等如每場讓一球

而前線死火問題比08歐國盃更嚴重
加上3場波只有最後十幾分鐘係比較似樣
又點可以攞夠分出線

意大利球壇被指有個教練唔好食回頭草既宿命
當年就算係卡比路教AC米蘭都宿命難違
納比再次接手已經俾人批死因為球隊青黃不接而唔會有好下場
由外圍賽試陣試到決賽週都唔岩心水已經係警號
佢好在最終仆直都至少肯攬晒上身
唔似杜明尼治擺明姿態咩都唔關佢事