想講尋晚既第三輪分組賽......
A組方面
思前想後都係覺得硬撼阿根廷隨時歸西
所以打死都唔信'圭''西'雙方會 hea 踢搏和
結果戰情亦算激烈
烏拉圭有小小運而3戰都冇失波
絕對始料不及
如果防線繼續保持水準
對南韓可以睇高半線
而南非對法國一戰
主隊就算出局都想羸波謝幕既心態已經值得睇高一線
對手兵變換左半隊人就仲易食
見到大後備迪亞華都有得做隊長
就知杜明尼治同好多大哥面左左
睇住對手後防同埋哥古夫果然排住隊爆鑊
如果麥菲拿下半場初段唔係省中柱角
南非隨時羸夠4球入16強
法國方面
杜明尼治擺款冇料就預左俾球員頂撞
教6年都未試過俾人打就直情執返身彩
安歷卡又唔係第一個串佢既球員
關鍵時刻整走佢似係想搵定人孭黑鑊
而放風搞大件事既體能教練就咩事都冇
實令其他球員反感
不過搞到全體罷操,甚至有人罷踢
就絕對係球員唔專業既表現
今場輸波象徵杜明尼治黑暗管治既終結
不過話說回頭
佢可以教6年咁耐
法國足總都好有問題
好彩終於識搵個有名望既白蘭斯接手
佢一定識用哥古夫重建球隊
2012歐國盃既法國應該至少有力做到黑馬角色
B組方面
由於阿根廷半力已經勁過希臘夫添
無論列哈格排 4-5-1
或者半場微調至 5-4-1
實際都只係 9-0-1
而柏柏斯達夫普路斯亦跟唔掂美斯
所以希臘基本上捱打
見佢地上半場只得22%控球時間兼搵次射門都冇
仲以為睇緊國米作客巴塞
當另一邊既南韓由落後至保住不敗
列哈格可以做既嘢都唔多
單靠森馬拉斯加上後備入替既連尼斯去偷襲阿根廷
根本只係盡人事
因為此'斯'唔同彼'斯'
美斯真係踢得好 free
阿根廷亦羸得輕鬆
不過小弟都係想睇定少少先再下定論
佢地一直踢緊順境波
小心之後要踢逆境波就變返條虫
而尼日利亞出局
最可惜係睇唔到安耶馬
佢尋晚冇前兩場咁 sharp
不過都依然有6個 save
埋單計數平均每場7個 save 之餘
加埋仲已經撲左十隻手指數唔晒既必入波
相對於佢
前線幾個射手加埋先貢獻到1個12碼就真係抵插
上場既奧保基同埋今場既耶高保仲錯失左唔入仲難過入既機會
如果入左其中一球
最終出線既應該係尼日利亞
尼日利亞向來主力出口箭頭
不過近年實在太多水貨
早前莫耶斯居然將耶高保定價1000萬鎊
難怪槌仔幫兩個算死草老闆而家改打基恩既主意
3 comments:
對法國真係極失望
又分組賽出局
宜家既法國就令小弟諗起
以前中國某幾個既朝代
無啦啦俾一個昏君攪臭哂
有無力再起番身
除左要睇新一位領隊
隊中球員亦極重要
哥古夫係核心人物
鋒線上小弟對基格納都抱有信心
阿根廷同樣係領隊無咩料
但係班球員勝在團結
而馬納當拿望多兩眼就比星座小王子好得多
加上成班球員當佢神咁拜
同法國一個天一個地真係唔奇
非洲隊無一倖免??
今屆好多歐洲球隊一離開左歐洲大陸,
就即係變左二三流既國家隊,
意大利,法國,英格蘭已經如是,
莫非真係打破唔到佢地離開左歐洲就唔能夠取得世界盃既宿命....
To: 舒利亞 & sammysir
1)
杜明尼治比麥卡倫更廢
絕對係近年強隊最廢故練
2)
有報導指原來馬勒當拿有搵摩連奴教路
3)
唔知查斯古特同埋安歷卡之後肯唔肯復出
亦唔知亨利會唔會退出
以現有人腳
基格納應該係踢正箭頭既最佳人選
4)
多得塞爾維亞捉到鹿都唔識脫角
總算有隊加納入到16強
5)
小弟覺得法國同埋意大利
都係管理同埋人腳都有問題
就算俾佢地返歐洲踢都唔會有好下場
6)
英格蘭都係水準以下
不過對德國佬可能靠鬥志搭夠
唔好睇小佢地
Post a Comment