C組方面
英格蘭明顯係首名鐵膽
好多人應該只會唸佢地最終可唔可以一搔44年之癢
不過小弟就覺得佢地冇咩冠軍相
而事實佢地亦問題多多:
格連唔夠班,
里奧費甸南因傷退隊,
泰利受醜聞影響而跌 watt,
雙特問題未完全解決,
巴利又受傷患困擾,
陣中只有祖高爾有創造力,
燥狂朗尼季尾死火兼明顯有疲態......
不過最大鑊都係佢地例牌輸心理質素
射12碼既戰績仲差到得人驚
連自己都羸唔到都唔知點去羸人
卡比路雖然識執紀律
但履歷顯示未必識醫心理病
阿爾及利亞方面
佢地可能係全組最好波既球隊
不過防守唔集中兼畏高
仲成日一輸就散晒
而家連麥尼都冇埋
類似年頭打瓜科特迪瓦既冷門賽果應該唔會再發生
至於斯洛文尼亞
佢地乒圍就係靠唔錯既整體防守能力
外圍賽只失4球兼ko俄羅斯唔似係撞彩
不過攻力平平
創造力亦唔及02年有沙豪域嗰隊
而大賽經驗唔夠美國
仲好可能係佢地爭唔到次名出線既關鍵
美國次名出線應該唔令人意外
擅於穩守突擊仲應該係佢地多次食住強隊既關鍵
首場對英格蘭隨時係佢地踢得最好既一場
D組方面
德國佬應該係列強當中最唔齊腳既一隊
當中得返兩個防中都幾濕滯
路維梗係大條道理更加以攻為守
不過幾件大牌射手都冇咩態
被寄予厚望既奧斯爾做左大國腳之後亦未有代表作
至怕搶攻唔成搞到防線壓力仲大左
而自90年西德捧世界盃以來
佢地只係試過羸過葡萄牙兩次
其餘一線強隊通通都羸唔到
加上路維既領軍能力只係一般
戰鬥力隨時差過98年嗰隊
不過好在心理質素向來超班
活力亦唔比4年前差
8強依然係合理既最低要求
捱到入4強甚至決賽都唔係天方夜譚
另一方面,波歷克缺陣既影響應該唔大
事關陣中好多年青球員原來都頂佢唔順
德國佬既團結隨時係更勁既 X-factor
加納方面
冇左當今其中一個頂班防中艾辛真係超級大檸樂
不過佢地1月踢非國盃
唔靠艾辛咪一樣靠防守守到個亞軍
硬朗中場一定俾到德國同埋塞爾維亞既技術型中場好多麻煩
部份世青盃冠軍高質新血繼非國盃後繼續入選
球隊亦有其他大佬輩睇住
靠埋半個主場同埋睇通祖家既教練拉積域
再入16強有咩咁奇
塞爾維亞方面
佢地可能又係幾好波都冇用既例子
4人防線雖然成功換血
不過龍門同埋防中都有隱憂
加上教練安迪其實名大於實
'首次'參賽應該好快畢業
澳洲就同南韓一樣
冇左軒迪克後已經唔使點理
韋碧克越睇越似只係靠'軒迪克副手'既履歷去呃飯食
都唔明點解摩洛哥足總之後會旨意佢搞青訓
4 comments:
C,D組又真係無咁難估
呢隊英格蘭係近年較似樣無人質疑
不過里奧費甸南無啦啦傷左就真係打亂哂
就算泰利有番水準演出都令唔到防線穩陣
格連莊臣攻強守比較弱
龍門更加係施文之後無個似樣
無左碧咸影響亦可能唔係想像中咁細
前面靠既如果要話係朗尼
小弟更願意相信高治有力做秘密武器
小組出線應該正路係英美
另外兩隊唔似有力阻礙
D組網主愛隊又係獨大
無左波歷克既影響隨時係正面而唔係負面
次名小弟就同網主唱反調
塞爾維亞同加納
小弟較想塞爾維亞出線
四人防線穩陣
中場又夠殺食
杜錫仲隨時係秘密武器
前面施積就算勇態不再
彭迪歷亦有一定保證
To: 舒利亞
1)
里奧費甸南既表現其實都唔係好
不過其他選擇亦各有問題
先顯得佢好重要
2)
卡比路上任後唔算重用碧咸
不過冇左佢既死球
英格蘭真係少左一招
而陣中壓得住場既球員
就只係得返謝拉特同埋林伯特
3)
施文踢02年世界盃
其實表現不穩
係英格蘭其中一個計時炸彈
最終成為出局其中一個罪人
4)
如果施文叫勁
小弟睇90年世界盃既施路頓咪仲好?
(不過再老一輩應該會話以前既賓士仲堅)
不過話說回頭
你應該未睇過施路頓
施文初做一哥既時候
你都應該仲未出世
5)
計入球能力
朗尼一定好過哥治
不過前者隨時再因臭脾氣而出事
6)
塞爾維亞係好多好波之人
不過中場截擊力幾唔掂
對住加納既硬朗踢法
未必可以以柔制鋼
而幾個後衛表面好勁
不過龍門唔掂都係死
另外,佢地外圍賽失波少之係因為對手弱
頂得住法國同埋羅馬尼亞唔反映佢地好勁
7)
小弟覺得施積既威力大過彭達歷
施路頓或者係賓士
小弟當然未出世
不過總算叫聽過下
加上有片睇
施文當然係唔夠上面兩位咁強
而且02世界盃(好似)俾細哨笠死一幕仲係腦中
不過對小弟來講
總算比現時三位平庸門將好...
唔知聽邊個講
美國話第一場就要朗尼攞紅牌
其實真係唔奇
To: 舒利亞
如果美國佬真係想咁做
使鬼講出口咩
單嘢隨時係英國傳媒老吹
一來可以刺激銷量
二來同球證玩心理戰
Post a Comment