2009-5-31

近兩日既新聞......

1)
艾殊利向傳媒表示打算盡快出售球會
消息指佢希望買到1億鎊

2)
費拉拿,干地同埋白蘭斯都被指可能接手祖雲達斯
前者表示相信自己有1/3機會坐正

查斯古特被指獲準以1000萬歐元既價錢離隊
而馬素贊臣就被指成為老婦人1250萬鎊既新左閘人選

另一方面,尼維特既經理人透露這名前捷克國腳雖然鐵定離開祖記
但佢可能以自由身改投其他球會
未知傳聞100萬鎊另加bonus既新條件可唔可以令佢改變主意

3)
安察洛堤宣佈同AC米蘭提前解約
AC米蘭方面隨即委任李安納度為新教練

4)
幾後車路士既轉會傳聞......

車仔被指打算收購碧咸同埋出價1860萬鎊收購施哥夫
不過二人經已作出否認

佢地亦被指打算羅致列貝利,施斯隆同埋法斯卡
不過拜仁既嫌5000萬歐元既出價過低
利記亦有興趣向巴黎聖日耳門收購貝寧中場施斯隆
而法斯卡既父母肯唔肯放這名18歲龍門去英倫發展亦係問題

另一方面,傳聞肥安打算帶埋愛將派路同埋施多夫上車
不過消息指AC米蘭要佢地用艾辛去交換

另外,馬路達同埋卡奴被指可能被放棄

4)
皇馬被指願意出價3000萬歐元向利物浦收購沙比艾朗素

5)
傳聞愛華頓有興趣接收奧雲
不過拖肥糖只肯出價5萬鎊週薪
兼視乎佢既出場狀況而出糧
而韋根亦再次被傳有興趣羅致這名英格蘭射手

6)
史篤城同埋保頓都有興趣羅致史高斯
前者以教練兼球員身份吸引佢
後者就只同佢屋企有30分鐘車程
兼肯提出同曼聯相等既7萬鎊週薪

7)
多間球會被指有興趣引入辛達告魯斯
當中包括拉素,羅馬,費倫天拿,曼城,貝迪斯以及馬體會

8)
拉莫斯承認收到幾個offer
當中包括外國球會
而佢表示於皇馬既前途仍未明朗
另一方面,柏歷堅奴否認接手皇馬

9)
費高改變主意唔考慮次級聯賽
而佢既告別賽將於14/6舉行

10)
列卡特被指可能接手新特蘭或者些路迪
而文仙尼透露前者最近對佢展開斟酌

11)
熱刺被指打算用賓特尼同曼城交換馬田柏度夫
而佢地亦被傳想羅致史尼達

12)
消息指現時有5間球會願意出價2500萬鎊收購泰維斯
當中包括曼城,利物浦同埋皇馬

13)
曼城被指願意出價4000萬鎊收購阿古路
不過這名阿根廷射手已經表明唔肯過檔

14)
禾夫斯堡新晉德國國腳根達
被指成為阿仙奴新防中人選

15)
里昂被指打算羅致古莊臣

16)
早前被指重返巴甲既P.祖連奴
被指可能轉戰意甲,加盟國米

17)
巴塞隆拿即將同哥迪奧拿續約

18)
格連被指準備唔同韋斯咸續約
傳聞佢可能轉投熱刺或者阿仙奴

19)
貝碧托夫被指由於不滿冇正選而提出離隊

20)
查馬克證實今個暑假離開波爾多
傳聞佢可能轉投阿仙奴

21)
史特加被指即將以800萬歐元既價錢
從智利球會高魯高魯收購24歲阿根廷射手巴拿奧斯

22)
過去半季以借用身份效力保頓既派基尼亞
被指即將轉投彭拿典奈高斯

23)
哥拉迪同里賈納解約後
將於幾日內落實加盟烏甸尼斯

24)
索尼同埋厄瓜多爾射手賓尼迪斯都被指成為伯明翰既增兵對象

25)
土耳其中場艾丁即將落實以700萬歐元既價錢
由索察轉投巴黎聖日耳門

26)
艾卡費斯卡即將轉投熱那亞
不過佢下季多數會被外借到阿特蘭大

27)
一旦布魯士離隊
消息指韋根打算搵達倫費格遜(費sir嗰仔)或者馬天尼斯接手

28)
柏路達被指成為費倫天拿既羅致對象

29)
消息指拿鐵斯將率領財團收購修咸頓

30)
瑞士中場達斯馬利唔想跟拖連奴降落乙組
傳聞佢可能轉投拿玻里,森多利亞或者烏甸尼斯

31)
賀芬咸被指願意向競賽會出價500萬美元
收購19歲阿根廷中場蘇古連尼

2009-5-30

由於時間同埋篇幅問題
只講近兩日既部份新聞......

1)
紐卡素再次賣盤
而消息指120職員會被裁減
而舒利亞仲未落實執教
比耶同埋荷西安歷基都表態想留隊
仲有傳聞指舒利亞想搵前者出任新隊長

而紐記同幾名年青球員扯上關係
當中包括:列斯19歲中場戴夫,高雲地利22歲中堅D.確斯,
錫菲聯20歲後衛拿夫頓,錫週三18歲中堅M.比華士
水晶宮18歲射手史簡尼爾
前三人之前已經介紹過
後兩者有機會再講

另一方面,費倫天拿被指想搵馬田斯過檔

2)
其他競選對手全數退出
令佩雷斯重掌皇馬既樹會高唱入雲

3)
樸茅同埋新特蘭相繼轉手
當中前者被指打算搵艾歷臣執教
而現時執教新特蘭既列特亦被傳準備集資收購母會愛華頓

4)
車路士再次同施哥夫扯上關係

5)
阿仙奴被指打算出價收購巴利

6)
摩連奴被傳欽點耶耶托尼出任球隊既新防中
而迪高向傳聞透露即將加盟國米

7)
托利斯同利物浦續約到2013年
週薪約10萬鎊

8)
拜仁方面證實曼聯有興趣收購列貝利

2009-5-28

想講既一定係尋晚場波
唔敢講係唔係美斯於C7面前加冕
但一定係巴塞技術性擊倒曼聯

先講排陣
巴塞隆拿唔齊腳
後備席要用到牛奶仔比特列圖同埋梅里沙
當中後者幾日前先第一次正式出場
而基達幾日前向傳媒暗示冇信心客串左閘
結果哥迪奧拿如佢所願改用老將施雲奴
掃除小弟不少疑慮
而為左針對朗尼既側擊
佩奧爾亦重彈舊調踢右閘
不過耶耶托尼繼對車仔後再次串演中堅
加上基達疑似得罪哥迪奧拿
令陣中只得新仔布斯基斯可以出任防中

另一邊既費sir相對大把選擇
但唔識排陣就點都冇好下場
佢竟然用傑斯取代停賽既費查
中場既然唔夠高效率球員
費sir仲將星仔移前
而迪維斯又令人意外地被列作後備
絕對搵自己笨兼埋下輸波伏線

軒迪克同埋車仔早前已經向世人展示
硬朗兼高效率既攔截足以封殺巴塞中場
從而令整隊巴塞癱瘓

不過曼聯睇完都唔可能做得到
因為佢地根本陣中根本冇一個類似艾辛咁硬朗既球員
但費sir排錯陣令球隊中場效率不足
巴塞可以踢得更輕鬆
結果當佢地站穩陣腳後
中場就再冇試過失勢

事實上哥迪奧拿上任後
巴塞整體效率有明顯進步
墮後幫手既美斯,沙維
加上小弟心目中既今場MOM恩尼斯達
亦絕對令曼聯中場於技術上相形見茁
新仔布斯基斯雖然經驗不足
但有幾個帥兄帶住都踢得有板有眼

相對於埋門把握分野,球員臨場表現
同埋碧基唔使俾人趕離場
中場形勢先係今場波既關鍵
比賽初段威風八面既囂王之王於20分鐘後近乎冇料到
原因正係球隊輸中場
而唔似係佢比賽前3日依然掛住叫雞
佢賽後疑似輸唔起俾美斯而大發老脾
絕對冇品但講既又係事實

巴塞今場波雖然冇好似對車仔咁搶到7成控球時間
但每當控球在腳都可以為所欲為就已經好足夠
沙維同埋恩尼斯達想點踢就點踢
分兩邊或者俾直線都有人等住接應
前線走位靈活既3條煙固然有機會發陣
連佩奧爾同埋施雲奴都受惠唔少
當中小弟仲從未見過前者有咁多助攻機會

費sir明顯排錯陣
不過臨場冇撥亂反正就令小弟幾意外
半場佢用泰維斯入替隱形既安達臣好正路
不過唔將星仔移後始終冇用
令佢兩個都冇最佳位置
而之後費sir用貝碧托夫入替星仔
擺大個頭根本無助於扭轉形勢
用史高斯入替傑斯就係費sir全場最正路既調動
後者既跟唔足比賽節奏
亦冇咩機會分波
不過費sir偏偏換得太遲

另一方面想講下青訓
巴塞今場既18人名單
當中7個正選加上3個後備都係本身青訓產品
連埋教練哥迪奧拿都好似流緊巴塞既血
反映搞好青訓有幾重要
英超同埋意甲好多強隊已從巴塞借鏡
比之前更重視青訓
偏偏最大勁敵皇馬只係不斷作出巨額收購
債台高築之餘亦唔可能買到歸屬感

p.s.:
巴塞無錯係今季歐聯皇者
但真正歐洲最強其實係唔係軒迪克執教既車仔?

佢地歐聯分別擊敗祖記同埋利記
同埋成功示範點樣封殺巴塞
絕對係當上歐洲皇者應有既表現

而軒迪克上任後帶隊踢左13場英超就攞左34分
雖然當中只有1場Big4大戰
但數字反映佢領導下既車仔足以同曼聯以及利物浦爭聯賽

巴塞應該慶幸奧華堡幫過佢地
費sir亦應該慶幸爭聯賽既過程唔使同軒迪克過招
唔知有冇人趕得切勸導油王
軒迪克應該比肥安更加有資格當車手

2009-5-27

近幾日既新聞......

1)
舒利亞同埋杜維尋日就同艾殊利以及林比亞斯昌開會
已向球迷發出道歉聲明既肥老闆想同舒利亞簽約4年
消息指老舒最快今日簽約

另一方面,消息指紐記陣中只有3人肯定得到老舒留用
分別係夏柏,史堤芬泰萊同埋畢特
而其他高薪球員將被放棄以減輕成本

一眾搶手貨唔愁冇班落
奧雲可能轉投維拉
高路仙尼就可能重返西甲,加盟西維爾
國米想搵馬田斯回巢
韋根亦想搵辣椒仔過檔
表態想留隊既杜夫同埋自由身既盧雲卡蘭斯
就同時被傳成為布力般流浪既羅致對象

另一方面,紐記被指想向列斯收購射手碧福特

2)
消息指賓尼迪斯通知巴布既經理人
可以為這名荷蘭翼鋒搵新球會
賓帥要求大約1100萬鎊既轉會費
傳聞阿仙奴,熱刺同埋維拉都有興趣將佢羅致旗下

利記亦被傳願意出3倍人工吸引拿維斯過檔
而佢地被指同曼城爭奪格連莊臣以及端納

3)
加拉塔沙雷被指打算從皇馬收購雲尼斯特萊
消息指雲佬已同意轉會

4)
辛格宣佈離開卡坦尼亞
拉素或者博洛尼亞被傳係佢既下一站

5)
祖爾接手阿積士
雙方簽約3年

6)
AC米蘭被指打算向聖保羅羅致巴西中場靴蘭尼斯
而佢地亦令人意外地同巴利扯上關係
不過傳聞500萬歐元既轉會費未免太低

7)
些路迪聯賽屈居亞軍後
史特根宣佈離隊

莫比利,馬瑟韋爾既M.McGhee
同埋般尼既奧雲高爾都被傳係接手人選
不過後者表態將會留隊
而般尼方面亦準備同佢續約

8)
巴黎聖日耳門成為最新一間同查斯古特扯上關係既球會

9)
新特蘭唔肯買斷施斯
這名法國射手可能以600萬鎊既價錢轉投熱刺
而迪斯甸亦可能為左跟隨哈利列納而來投

10)
艾禾卡特決定於季尾(12月)離開辛尼特
消息指佢打算於2010年接手比利時國家隊

11)
基斯普改變主意唔加盟費倫天拿
消息指佢幾乎肯定轉投熱那亞

另一方面,紫百合就被指有機會引入伊雲洛域
而鍚耶納既巴拉圭中場巴列圖亦可能來投

12)
辛尼特被指想向國米收購哥利斯馬
不過這名葡萄牙似乎比較大機會加盟熱那亞

13)
麥卡倫忠告阿拿奧杜域留隊鍛鍊
唔根如傳聞轉投國米或者車路士

14)
端基同埋韋達分別被指成為布力般流浪同埋伯明翰既增兵對象
而前者同時被指打算引入16歲希望龍門N.簡拿高普路斯

15)
曼城有幾個球員被挖角
維拉想向佢地收購米卡李察士
祖赫特就被指可能改投狼隊
而史杜歷治就可能以自由身加盟車路士

16)
巴塞隆拿被指準備向波圖收購般奴艾維斯
傳聞轉會費大約1500萬歐元

17)
高美斯即將以破德甲紀錄既3000萬歐元加盟拜仁
而拿姆就爆料史尼達可能以2600萬歐元既價錢加盟
拜仁亦被指打算向史浩克04收購龍門紐亞

另一方面,比連奴要求外借一季
不過屬意德甲球會既佢最可能被借去阿爾克馬爾

18)
摩連奴同國米續約到2012年
消息指年薪高達950萬歐元
傳聞國米答應向車路士挖角迪高同埋卡華路

19)
迪亞高落實以2450萬歐元既價錢加盟祖雲達斯
雙方簽約5年

20)
莫耶斯獲領隊聯會選為本季最佳領隊
繼03及05年後再度當選既佢破紀錄第3度當選

21)
除高路仙尼外
西維爾被指亦想向小保加羅致21歲中堅科連

22)
修夫基賴死唔肯離開米堡
表示想帶隊重返英超
不過似乎主席吉遜傾向支持佢

23)
羅馬被指想向哥連泰斯收購26歲巴西左閘A.山度士

24)
愛華頓被指想從維拉引入李奧曲加

25)
富咸被指想引入巴尼斯同埋布連特

26)
森多利亞被指想向國米羅致占美利斯

27)
里昂答應俾P.祖連奴於季尾免費離隊

28)
莫高拿落實以自由身同樸茅簽約3年

29)
馬賽打算向雷恩收購右閘芬尼

30)
熱那亞被指即將從紅星羅致後衛湯姆域

31)
伊比斯域同意續約賀芬咸

p.s.:
冇雙閘既巴塞隆拿今晚0245惡鬥夫添曼聯
小弟主觀願望巴塞做3冠王

關鍵就在中場
不過哥迪奧拿似乎想將兩名防中移後為防線補鑊
隨時得不償失......
十個擔心!!!!!!!!!!

2009-5-25

幾日前東北部3弱驚死蝕底
警告費sir唔好放水
點知而家曼聯出二線兵都交到功課
偏偏佢地尋晚全部做唔到羸波既本份
完全係'律己要嚴'既反面教材

黑貓同埋病貓過得到今季
只因有人包底
佢地既水準其實亦只係英冠水準

前者如果真係搵到布魯士過檔
(其他人選仲包括祖爾同埋艾歷臣)
下季都仲算有希望
而後者如果下季繼續唔自量起勢咁搶攻
以佢地見晒底既實力
唔返英冠先奇

3隊降班馬各有死因
西布朗一早已經俾人睇死
好想搶攻但連最佳陣容都好似未砌好
有咩辦法唔死
不過佢地搏到第37週先斷氣
鬥志冇輸過就抵球迷拍幾下手掌

米堡方面
前面除左端基就再冇其他殺手
入球能力唔好得過上季既打呲郡好多
後面又好冇防守

有米堡球迷賴球證多次吹死佢地
不過國際足協一日唔肯用高科技
誤判情況都好難有大改善
球證誤判同埋省中門框都要睇下有冇運
都係老舒星期日賽後講得中肯又有風度:
佢話運氣係比賽既一部份
不過榜尾3隊搞到要降班都真係好抵死

最想講既係紐記
多得sammysir宣傳
小弟個blog既讀者最多來自紐記
不知不覺間紐記亦已經成為小弟睇英超既第二最愛
小弟睇紐記仲多過見屋企人(阿媽當然除外)同埋親朋戚友
睇波如見子侄
見到奧雲同埋巴頓咁衰仲慘過自己有個不肖子
知道基雲轉會就感覺有個老友轉新工……
越有感情睇得就越傷心

紐記比上不足,比下有餘既人腳都搞到降班
上至艾殊利
下至教練同埋球員都有責任

艾殊利有冇心搞好紐記
公道自在人心
而基瑾當日因為冇權買賣球員而劈炮
到堅尼亞心臟有問題要入院
會方既應變明顯唔夠快
如果一早搵到個身體健康既繼任人
紐記既排名應該唔會越跌越低
到水浸眼睸先搵到舒利亞接手
但扶助佢既竟然只係杜維
幾個例子都反映紐記既管理好有問題
亦係紐記降班既遠因

而球隊踢法亦好有問題
冇組織力一定踢唔出漂亮足球
但分兩邊再傳中都總叫做有兩度板斧旁身
偏偏佢地班大哥落到場就發夢
基本分工同埋走位都唔多覺
傳腳波都窒住窒住
失左控球權亦都唔見好肉緊
唔知既仲可能以為佢地lead緊幾球
眼前睇緊越踢越急既錫菲聯都好過佢地
(小弟邊寫blog邊睇英冠附加賽……)
講真富家子弟兵就算踢天才波都唔可能咁差
而真正有heart既球員可能一隻手已經數得晒
‘非不能也,實不為也’向來最令人扯火

降班既代價雖然好大
但如果一次慘痛經歷可以喚醒球隊上下振作
長遠仍然算係有意義
只要留得住舒利亞
再搵支好既盲公竹同埋整頓人腳
出年8月紐記應該可以捲土重來

小弟之後依然會follow up紐記消息
有興趣可以留意

2009-5-24

1)
禾堡大炒落水狗雲達不來梅5:1後
羸得本季德甲
而佢地宣佈下季由前史特加教頭華亞領軍

2)
雖然摩連奴表態有99%機會留隊
但仍有傳聞指一旦佢轉投皇馬
國米將會搵鋼門辛格返母會執教

而佢地被傳會向里昂出價1500萬歐元羅致桑馬干
以取代好可能離隊既韋拉
而泰維斯,美路同埋艾迪巴約既名字亦再次同佢地扯上關係

另一方面,由於佢地同熱那亞既關係非常友好
佢地被指可能以1000-1200萬歐元既價錢
將哥利斯馬既一半擁有權出售

3)
華倫西恩斯被指想搵史思富執教

4)
消息指維拉將巴利既身價定為1000萬鎊

5)
祖雲達斯成為最新一間同傑利臣扯上關係既球會
而佢地針對兩閘不穩既弱點
格羅素同埋拉素塞爾維亞國腳高拿洛夫就被指成為佢地既新左閘人選
而另一邊既人選就有鍚耶納既哥倫比亞國腳辛尼加

6)
尼史葛繼1月後再次成為曼城既新中堅人選
而史度列治仍然唔同意曼城既續約條件
佢被指可能轉投維拉或者布力般流浪

7)
費倫天拿被指打算向AC米蘭接收奧度

8)
米高勞特立被指成為皇馬新教練既最新候選人

9)
薩克達打出名堂
巴西右翼依仙奴就被指成為多間歐洲大球會既1600萬歐元增兵人選
當中包括拜仁,AC米蘭,祖雲達斯同埋拿玻里

10)
布魯士被指因為同會方就轉會政策鬧意見而可能離隊
新特蘭隨即被指想搵佢下季接手

11)
西布朗方面承認有意思羅致巴利費格遜
但就否認會向喜伯年引入中堅洛鍾斯

12)
查馬克被指成為阿仙奴新前鋒人選

13)
波圖摩洛哥翼鋒鍚克迪奧爾可能以自由身轉投馬賽

p.s.:
消息指奧雲尋日已可跟足一課操練
但又有路邊社消息話佢既鼠蹊肌肉仍然好崩緊
但相信舒利亞會預佢踢部份比賽
祝各紐迷好運

2009-5-23

巴布爾成為3料韋根最佳球員
得票來源分別係隊友,球迷同埋傳媒
度過職業生涯最佳球季既佢仲準備同球會續約

原本好眼訓既小弟睇到即刻醒晒
腦海隨即仲有幾個疑問:

1)
波比sir當年肯用600萬鎊買佢
算唔算獨具慧眼?

2)
點解當年波比sir,桑拿士同埋路達執教既時候
冇一個可以將佢訓練成才?

3)
Big Sam 會唔會覺得自己走漏眼?

4)
佢同保桑以及高路仙尼堪稱紐記近年3大貴價廢柴中堅
其餘兩個幾時可以為自己洗底?

髮型似足華達拉瑪既後者最好聽晚發圍
小弟相信紐記球迷同埋高層應該會既往不究
當然小弟唔會曾先生
意見絕對唔係代表大家

2009-5-22

1)
車路士同埋AC米蘭都被指願意出價2000萬鎊羅致艾迪巴約

2)
AC米蘭新領隊一職以尹巴士頓為大熱
因為貝老最buy佢
不過突然殺出李安納度
消息指陣中部份主力同埋副會長加利安尼偏向支持佢

消息指如果這名前巴西中場上任
傾向保留絕大部份主力
相反如果由尹巴士頓接手
佢將會將陣式定為4-3-3或者4-2-3-1
亦會要求會方收購史尼達以及想以借用身份離開皇馬既戴倫特

另一方面.卡卡再次否認季尾離開AC米蘭既報導

3)
爆料肥安過檔車仔既摩連奴否認轉投皇馬
馬干亦表態唔會加盟車路士
而國米就再次被指打算引入卡華路,米基爾,迪高同埋咸錫

另一方面,佢地同埋熱那亞合資500萬歐元
向大學隊收購阿根廷26歲右閘安祖列尼

亦有消息指佢地即將從阿爾克馬爾收購阿拿奧杜域
佢既經理人透露交易詳情將於幾日內公佈
轉會費大約800-900萬歐元
而這名奧地利小將亦唔會如傳聞咁講被借到熱那亞

4)
伊利亞就係阿爾克馬爾陣中另一個被挖角既熱門
這名22歲球員已入選荷蘭B隊
踢法全面既佢可踢正前鋒,輔鋒同埋翼鋒
當選本季最佳年青球員既佢已吸引阿積士,
阿仙奴,維拉,曼城,熱刺同埋愛華頓
不過似乎佢最有可能跟隨雲高爾加盟拜仁

5)
傳聞一旦佩雷斯重掌皇馬
沙比艾朗素就會由利物浦加盟
賓尼迪斯就再次否認會賣走佢
另一方面,格連莊臣就被指以至少1000萬鎊既價錢轉投利記

6)
巴黎聖日耳門同埋馬賽被指打算向阿仙奴收購加拿斯

另一方面,普格恩耶克即將於11月同辛尼特約滿
傳聞兵工廠打算斟酌佢於1月以自由身加盟

7)
小保加阿根廷防中巴達基亞希望再次去歐洲搵食
佢當年因為傷患同埋思鄉病而於維拉利爾發展平平
而家就最有機會加盟拉素
不過消息指阿仙奴,利物浦同埋熱刺都想引入佢

8)
費倫天拿被指希望向華拉度列收購年青龍門阿辛祖
亦係巴塞隆拿增兵對象既佢身價高達800萬歐元

另一方面,紫百合羅致柏倫布失敗
事緣這名新晉意大利中場同森多利亞續約到2013年
而佢地只到基斯普有口頭承諾
傳聞熱那亞可能遲來先上岸羅致這名老將

9)
拜仁決定唔買斷奧度
而佢地就成為最新一間同華倫西亞扯上關係既球會

10)
積基卡同埋耶保都落實續約愛華頓
粉碎後者轉投阿仙奴或者曼城既傳聞

11)
祖雲達斯雖然已成功羅致迪亞高
但佢地仍然被指希望從烏甸尼斯引入迪亞哥斯天尼

12)
帕爾馬想向國米羅致占美利斯

13)
中國傳媒指費高考慮轉戰中超

14)
比耶落實因為腿筋傷患缺席對維拉既生死戰
不過荷西安歷基就可以趕及復出

15)
艾殊頓被指將會離開韋斯咸
維拉同埋紐卡素(???)都被指係佢既可能落腳地

16)
歐洲足協決定落charge控告車路士,杜奧巴同埋保辛華

17)
早前同里昂解約既F.山度士已落實加盟富明尼斯

18)
由於證據不足
英格蘭足總決定唔會懲罰被指行為不檢既法比加斯

19)
現時執教莫斯科中央陸軍既薜高打算搵同鄉伊臣合作
這名巴西中場現時俾波圖借用到法林明高

20)
奧查表示下季將重返荷超,加盟燕豪芬

21)
巴迪就被指將以自由身轉投伯明翰
佢地被指打算向維拉斟酌禮特

22)
些路迪被指向薩爾斯堡紅牛羅致奧地利射手贊高

23)
喜伯年射手史堤芬費查被指成為熱刺既新射手人選

24)
羅馬同埋森多利亞都被指準備
向皮亞琴察收購比利時21歲中場R.Nainggolan

25)
曼城今季做左幾次水魚
其實佢地同時有收購年青球員為將來舖路
由史浩克04轉投既16歲左閘 N.Zander 就係好例子

26)
里昂成為最新一間同山度士射手尼爾馬扯上關係既球會

2009-5-21

1)
雲格同CEO加斯迪斯會面後初步決定留隊
唔會轉投皇馬
而佢地既一批球迷準備於星期日開波前遊行去主場
聲援雲格繼續執教

2)
沙比艾朗素被指將以2200萬鎊既價錢轉投皇馬
而佢地被指由於C7太貴
所以改打列貝利既主意

3)
傳聞利物浦願意出價2600萬鎊接收泰維斯
不過報導指利記仲肯俾佢16萬鎊週薪
小弟就有幾懷疑

4)
熱那亞方面透露將會賣迪亞高米列圖同埋莫達去國米
不過佢冇提及交易條件
而佢地以1100萬歐元從阿特蘭大收購費路卡利作為替補

5)
巴塞隆拿同埋賓菲加被指想從車路士挖走A高以及卡華路
當中傳聞指前者願意出價2000萬鎊

6)
米積杜域同皇馬提前解約

7)
查爾頓既24歲翼鋒森姆
被指成為紐卡素,史篤城同埋韋根既增兵人選

8)
繼續講跳船消息......
韋達,巴迪斯同埋畢特被指
可能分別加盟伯明翰,韋斯咸以及狼隊
而辣椒仔就再次同愛華頓扯上關係

9)
亨利同埋恩尼斯達都應該可以趕及歐聯決賽
而里奧費甸南亦聲稱到時可以回復狀態
費sir表示將派佢上陣對侯城以測試狀態

10)
曼城被指出價1億5000萬鎊搶美斯
但美斯面對總值4000萬歐元既4年合約不為所動
而曼城就已經否認有關報導

11)
奧尼爾否認搵美爾保回巢

12)
摩連奴透露會召哥利斯馬返國米
而國米同埋祖雲達斯就再次被傳準備引入賓斯馬

13)
熱刺被指想向維拉收購巴利

14)
保臣可能重返西維爾發展
不過馬利斯卡就可能回流意甲,加盟巴勒莫

15)
馬體會被指想從烏甸尼斯引入G.迪亞哥斯天尼
而冼拿馬就被指可能回流法甲
加盟巴黎聖日耳門

16)
傳聞拜仁早前曾打算羅致A.山齊士
不過烏甸尼斯就拒絕佢地既斟酌

17)
些路迪被指想向巴塞隆拿羅致保贊

18)
尼爾被指成為奧林比亞高斯既增兵對象

19)
帕爾馬準備從丹麥球會奧丹斯引入迪贊巴

20)
阿積士被指打算向川迪出價200萬歐元收購巴菲特
這名26歲蘇里南裔左閘今年首次入選荷蘭國家隊

21)
奧耶和被指可能轉戰英超,加盟狼隊

p.s.:
養晒車馬炮既雲達不來梅
和也韋爾沙,敗也韋爾沙

簡尼當年最睇好佢接棒守住德國龍門
佢最終咁多年都撈唔起
佢咁唔穩定既水準似乎係主因

2009-5-20

1)
唐寧斷腳要抖半年
令佢以1000萬鎊轉投利物浦或者熱刺既傳聞告吹

另一方面,佢地仲未成功羅致柏拿積
而拜仁,西維爾,貝迪斯,維拉,熱刺同埋愛華頓同樣對佢有興趣

2)
橫濱水手準備再對中村俊輔展開斟酌

3)
侯夫,辣椒仔同埋J.奧臣分別被指可能
跳船到布力般流浪,伯明翰同埋愛華頓
另一方面,馬體會亦對莊臣好有興趣

4)
熱刺成為最新一間同舒亞拿扯上關係既球會
而佢地亦被指想從些路迪引入史葛布朗
另一方面,索高拿被指成為馬賽800萬歐元既新防中人選

5)
曼城被指想羅致科蘭

6)
薩克達既烏克蘭中堅基格連斯基招手
被指成為巴塞隆拿同埋愛華頓既增兵對象

7)
奧雲既鼠蹊冇受傷
可以於對維拉既生死戰候命

8)
AC米蘭方面承認好有機會羅致艾迪巴約

9)
費倫天拿想向森多利亞羅致甘柏拿路
這名29歲阿根廷後衛可踢中堅同埋右閘

10)
辛尼特被指有興趣羅致基利斯馬

11)
拜仁方面表示只要下季有份踢歐聯
就會好肯花錢擴軍
不過佢地就否認想羅致高美斯

p.s.:
1)
舒利亞承認原來佢比賽前後都會同波比sir通電話
但係點解眼前既紐記毫無當年既影子?

2)
消息指今年既英超挑戰盃於北京舉行
參賽球隊包括熱刺(所以順便到香港鬥南華),
財困既槌仔幫同埋仲未上岸既冇牙老虎

2009-5-19

1)
利物浦被指預留10號波衫俾泰維斯
不過就要睇下曼聯可唔可以成功壓價以1500萬鎊羅致佢
而哥連泰斯亦想搵佢同大哨合作
安察洛堤亦被指落左order要求車路士引入佢

另一方面,最快下星期同謝拉特續約既利記
就準備將年青翼鋒保羅安達臣賣到史雲斯

2)
祖雲達斯終於40年來第一次炒教練
老婦人餘下兩場聯場將由費拉拿取代雲尼亞里執教
而史巴利堤,干地同埋加斯伯連尼都被指成能於季尾接手

而有報導指為左報償熱那亞既損失
祖記願意將柏拿甸奴同埋基斯薛圖作為交易
以及外借基奧雲高一季

3)
華倫西亞既經理人透露皇馬已出價收購這名厄瓜多爾翼鋒
消息指出價約2100萬鎊

4)
國米再次被指有興趣向曼聯羅致維迪

5)
熱那亞被指打算想向華倫西亞收購左,右翼馬達同埋祖亞昆

6)
柏夫奴真高因為日前被換出時大發脾氣而激嬲哈利列納
傳聞這名俄羅斯射手因而將被賣走
另一方面,賓尼被傳可能被賣到愛華頓

7)
拉素同埋森多利亞都被指想向卡坦尼亞挖角
搵前意大利鋼門辛格執教

8)
艾哈里突然被指有興趣羅致列卡特
不過成為AC米蘭下任教練熱門既佢唔似肯而家去埃及搵食

9)
卡路素於拉素唔受重用
佢可能選擇轉投拜仁或者巴黎聖日耳門

10)
馬體會,維拉利爾,拿玻里同埋幾間英超球會都睇中蘇亞素

11)
紐卡素為巴斯桑治既紅牌提出上訴
不過失敗而回

而佢地被指準備向拖連奴羅致沙連尼
這名34歲意大利門將曾經效力葉士域治兩季

12)
尋日講過AC米蘭想羅致迪施高
原來佢地既目標仲包括佢既拍檔加菲迪
而佢地亦想向薩克達收購施拿

另一方面,細哨就否認轉投曼城既報導

13)
禾夫斯堡巴西中場祖蘇爾被指成為阿仙奴新防中人選

另一方面,艾迪巴約再次被指將轉投意甲
不過落腳地就未知係邊間米蘭市球會
當中國米亦被指睇中雲佩斯

14)
費sir唔理史堤芬泰萊出口術
暗示將於對侯城既比賽留力

15)
基利斯馬拒絕加盟賓菲加

16)
舒亞拿表態想轉會以尋求更好發展

17)
兵工廠主席希活開晒聲撐雲加

18)
布隆特被指將以450萬鎊既價錢跳船到維拉

19)
恩拿被指成為西維爾既新防中人選

2009-5-18

1)
先講球會換領隊既消息......

施丹表示推薦白蘭斯教皇馬
而雲加,摩連奴,柏歷堅奴同埋安察洛堤都被指係皮里斯既其他人選

而皮里斯既對手伊度亞度就被指想搵比歷接手
不過這名克羅地亞教頭亦係新特蘭既新領隊人選

而忽然同皇馬扯上關係既肥安表示將於下星期先宣佈去向
尹巴士頓同埋列卡特都被指係大熱接班人

另一方面,阿爾克馬爾宣佈搵朗奴高文接替雲高爾
而麥卡倫就否認過檔阿積士

2)
早前講過雲佩斯仲未同阿仙奴達成續約協議
原因除左2萬鎊既週薪分歧外

雲佩斯要求新約既附加條款亦係障礙
佢要求如果有歐洲球會向兵工廠出價500萬歐元或以上
佢就可以選擇離隊
難怪而家有傳聞指雲加可能索性賣走佢套現

另一方面,基亞連尼,阿積士既華美倫同埋慕遜加柏既高賀利
都被指成為阿仙奴最新一批中堅人選

3)
韋拉被指可能轉投巴黎聖日耳門
佢就表示可能提出轉會以爭取更多出場機會

4)
韋根宣佈唔會買斷薩基
而佢地被指打算引入自由身既賓納特

5)
基斯巴亞即將加盟奧林比亞高斯

6)
羅馬被指想帶迪辛迪斯返意甲
佢現時效力加拉塔沙雷

7)
費高宣佈退休
佢透露就算復出亦只會效力歐洲以外既球會

8)
比耶可能因腿筋傷患而未能於對維拉既生死戰候命

9)
迪施高已經成為多間球會既增兵人選
當中包括AC米蘭,羅馬,里昂,西維爾,史浩克04同埋車路士

10)
希古恩被指成為曼城最新一個星級羅致對象

11)
熱刺被指有興趣羅致文切尼同埋彭迪夫

12)
智利攻擊球員維蘭路華經過於布力般流浪失望既一季後
決定由原屬球會智利球會 Audax Italiano 改投阿聯酋球會艾沙比

13)
樸茅被指將會出售陣中星級球員套現

14)
列斯聯升班失敗
戴夫隨即被指將轉投英超球會
而愛華頓就成為最新一間同佢扯上關係既球會

15)
里昂被指已有幾個新中堅人選
當中包括雲布頓,雲達不來梅既拿度,里爾既拉美,
安德烈治既祖侯斯同埋標準烈治既安耶禾

16)
燕豪芬同埋費倫天拿都被指有興趣向阿積士收購射手蘇亞雷斯

17)
漢堡被指將向祖雲達斯羅致薜比拿

2009-5-17 (2)

繼續講新聞......

1)
查維馬天尼斯再次同利物浦扯上關係
畢爾包將這名20歲西班牙中場既贖身費定為2400萬鎊
不過西班牙傳媒估計1200萬鎊已經足以說服佢地放人

2)
曉士透露下季依然可以領軍
而曼城被指有興趣向賓菲加出價1500萬鎊
收購對方攻守主力射手卡度素同埋後衛安達臣雷沙奧

3)
舒伯特被指搵分別來自中東同埋美國既財團合作
以向艾殊利收購紐卡素

4)
保頓再次被指有興趣接收巴頓
不過傳聞轉會費只係200萬鎊

5)
費倫天拿既黑山年青射手祖雲迪於意甲既發展未如理想
雲達不來梅,漢堡同埋史浩克04都有興趣乘虛而入
不過紫百合就表明唔準備放人

6)
富咸成為最新一間同舒亞拿扯上關係既球會
不過傳聞600萬鎊既轉會費似乎過高

另一方面,現時被外借到伯明翰既保爾沙就可能轉投格流

7)
薛羅拔圖透露拜仁為佢提供1年新約之餘
哥連泰斯亦對佢斟酌
不過這間巴西球會已經作出否認

8)
雲佩斯由於同阿仙奴仲未達成續約協議
傳聞佢可能會於6月被賣走

9)
端布爾再次被指成為車路士後備龍門既人選

10)
維拉被指有興趣向愛華頓羅致派拿

11)
杜基可能因為加盟昆士伯流浪而延遲退休

12)
法乙球會 Dijon FCO 被指有興趣向馬體會羅致古柏

13)
一旦未能成功從米堡引入唐寧
熱刺被指將改向艾美利亞收購西班牙翼鋒古沙特

14)
拉素希望組成薩拉迪兄弟兵
最近買斷M.薩拉迪既佢地準備買埋佢阿哥R.薩拉迪
不過厄瓜多爾球會巴塞隆拿肯唔肯放人就係後話

15)
尼斯被指希望搵拿古恩取代安東尼迪執教

16)
燕豪芬成為最新一間同S.施斯扯上關係既球會
這名科特迪瓦翼鋒離開洛達似乎只係時間既問題

2009-5-17 (1)

講住部份新聞......

1)
嘉士伯希望可以冠名贊助利物浦

2)
由於費倫巴治財政方面有問題
羅拔圖卡路士被指可能因而於季尾離隊
傳聞佢可能返祖家加盟法林明高或者富明尼斯

另一方面,消息指阿拉干尼斯至少可以教到季尾

3)
多蒙特既20歲塞爾維亞中堅蘇保迪成為多間球會既收購目標
當中包括曼聯,祖雲達斯,羅馬,費倫天拿同埋拿玻里

4)
基斯普即將落實以50萬歐元低薪加盟費倫天拿

5)
加利亞雷拉同埋伊亞昆達分別成為辛尼特同埋熱刺既羅致對象

6)
國米被指打算用麥士維同埋文仙尼
再加錢向拜仁收購列貝利
而拜仁就可能向禾夫斯堡收購米斯莫域作為替補

7)
皇馬被指準備引入般奴艾維斯以強化防線
而卡卡再次同佢地扯上關係
今次既版本係6300萬歐元同埋800萬歐元年薪

8)
拿姆被指成為祖雲達斯既新左閘人選

9)
吉列斯,華亞,史林卡同埋蘇斯達
都被指成為禾夫斯堡既新教練人選

10)
日本傳媒指大阪櫻花新星香川真司吸引幾間西甲大會既注意
當中包括皇馬,馬體會,巴塞隆拿同埋愛斯賓奴

p.s.:
睇我個blog既尋晚應該冇個開心

2009-5-16

忙到連續兩日冇出post
請見諒!
近幾日既新聞......

1)
車路士被指願意出價2500-3000萬歐元
另加杜奧巴同埋米基爾以羅致伊巴謙莫域
(同一時間亦有版本指巴塞願意出價7000萬歐元!!)
同時間前者被指成為曼城最新一個星級收購對象

2)
安察洛堤由於同老闆反面
車路士將同佢俾500萬歐元贖身費
傳聞肥安將於星期日宣佈上車

3)
傳聞身為馬主既奧雲打算季尾退休
以成為全職練馬師
不過這名同韋斯咸扯上關係既過氣射手作出否認

4)
科蘭被指成為利物浦既1500萬鎊新前鋒人選

5)
曼聯以540萬鎊既價錢從哥連泰斯羅致杜度
佢之後會設祖家玩玩下

6)
C7去皇馬既最新版本係7200萬鎊轉會費加上24萬鎊週薪
而傳聞一旦C7離隊
華倫西亞就會被成為2200萬鎊既替代品

由於泰維斯同MSI集團既合約將於31/5完結
傳聞曼聯想走法律隙免費留住佢
而費sir向傳媒表示俾左offer泰維斯
不過就俾泰維斯既代表篤爆佢講大話

7)
保方表態留隊

8)
佩雷斯宣佈角逐皇馬會長

9)
基輔戴拿模被指有興趣帶舒夫真高返祖家

10)
阿根廷U-17正選龍門馬天尼斯到阿仙奴跟操1星期
消息指如果現年16歲既佢試腳成功
兵工廠將向獨立隊出價130萬鎊收購佢

而韋達,菲爾同埋保拉路斯都被指係兵工廠既新中堅人選
而漢諾威亦對後者好有興趣

另一方面,維拉有拿臣宣佈因傷提早掛靴同埋禮特被指可能重返富咸
所以被傳可能向兵工廠收購辛達路斯作為替補

11)
巴布被指係禾夫斯堡新教練既人選

12)
雖然被指成為熱刺同埋有力般流浪既借用對象
保贊表態唔會轉戰英超

13)
施達尼迪斯同埋F.山度士
分別同馬體會同埋里昂提前解約

14)
養傷16個月既路斯基表示下季初可以復出

15)
雷丁宣佈放棄多名球員
當中包括夏利文,杜比利,梅迪同埋列達
而借用期滿既傑臣將重返史篤城

16)
巴西23歲射手阿尼被指成為禾夫斯堡同埋莫斯科斯巴達既增兵人選

17)
迪亞高米列圖被指即將加盟國米

18)
比歷連尼唔同維拉利爾續約

19)
辛尼特被指有興趣帶梅度到俄超

20)
馬達拉斯既經理人表示
這名意大利中堅可能為左爭取出場機會而轉會

21)
史堤芬費查被指成為愛華頓同埋西布朗既新箭頭人選

22)
一旦米堡降班
奧尼爾被指成為保頓既400萬鎊接貨人選

23)
維拉同埋熱刺都被指有興建羅致舒華沙

24)
哥利斯馬下季要重返國米
不過佢亦可能轉投賓菲加

25)
鄧納東尼被指想帶莫達去拿玻里

26)
紐卡素再次被指想從韋根引入舒亞拿

27)
伯明翰同卡爾簽約兩年

28)
基斯普被指可能改投費倫天拿

29)
艾禾卡特宣佈接手比利時國家隊
(點解突然間變左係佢?)

p.s.:
請注意:
小弟係網主
一直以來關於足球既言論只係自己既愚見
而唔代表'一般'讀者或者'整體'大眾

2009-5-13

近兩日既新聞......

1)
謝拉特力壓傑斯同埋朗尼當選應屆英格蘭足球先生

2)
利物浦再次被傳向華倫西亞羅致大衛施華
有消息指今次既1500萬鎊傳聞出價已經係利記既 final offer

3)
阿仙奴被傳想引入保頓後衛加利卡希爾
不過麥臣就表示唔會將佢以低過2000萬鎊既價錢出售

4)
細哨竟然被指成為法林明高同埋拜仁既羅致對象
亦有傳聞指AC米蘭想用佢同聖保羅交換中堅美蘭達
而紅黑兵團亦被傳同祖記爭奪
安德烈治既25歲中堅祖夏斯

5)
拜仁最終同阿爾克馬爾達成協議
前者將於4至5日內公佈雲高爾既加盟

6)
高路仙尼於英超踢唔出水準
傳聞馬體會準備將佢帶返西甲

另一方面,維度卡同埋盧雲卡蘭斯都透露下季想留隊

7)
舒利亞今日同巴頓以及佢既經理人開會
消息指巴頓於紐記已經冇晒前途

8)
哈利列納搵佢個仔占美列納(前利物價隊長)加入熱刺既教練團
佢將會幫手訓練青年軍

9)
布力般流浪被指想借用保贊

10)
舒哈夫被指成為禾夫斯堡既新教練人選

11)
伊巴謙莫域既經理人透露
佢先後同曼聯,車路士,皇馬以及巴塞聯絡

12)
迪亞高即將落實加盟祖雲達斯

13)
厄瓜多爾17歲箭頭被指成為拉素既羅致對象

14)
樸茅同埋韋斯咸都被指想向阿仙奴羅致卡路士韋拿

15)
由於高層仍未為巴尼加搵到買家
這名阿根廷中場下季將被迫滯留華倫西亞

16)
曉士否認曼城希望羅致魯爾既傳聞

2009-5-12

想講下尋晚既東北部打呲兼護級大戰
既然和波只會攬住一齊死
雙方索性放手一搏
亦踢出近期既代表作
場波雖然水準唔係好高
不過總算幾緊張

舒利亞同埋修夫基分別作出幾個調動
紐記改以4-4-2陣式應戰
古迪利斯,路蘭同埋奧雲都重獲正選
穩定中場同埋平衡兩邊攻勢似係老舒既部署
畢竟想入波唔係擺多個前鋒就可以

米堡方面
前線有艾寧斯初次於聯賽踢正選
佢既活力同埋略為跌watt既端基已經係中前場既僅有亮點
不過後防冇左幾件高佬
只得侯夫充撐場面
就埋下輸波伏線

比賽初段冇運既紐記輸完烏龍波
又有維度卡既猛虎射球中柱
真係落筆打三更
好彩史堤芬泰萊短時間內返平
令紐記得以於短時間內定返陣腳

往後時間紐記同米堡互有攻守
各有攻勢但都係冇咩實際

下半場中段兩位領隊各自變招
舒利亞先後換入盧雲卡蘭斯同埋馬田斯
打算用速度硬闖米堡既中路

而如果上半場用馬華龍京治入替傷出既艾維斯係無奈
咁下半場用艾利阿迪里入替沙基
以加快球隊速度同紐記繼續鬥攻
就反映修夫基今彭有幾進取

正當米堡打算進一步搏拳
偏偏失守收場
幸運女神轉駄幫左紐記
事緣助攻既路蘭其實係越左差唔多一個身位
偏偏做二傳既維度卡遮左旁證既視線

不過米堡條防線其實爭唔落
冇人知路蘭越左位之餘
最近路蘭既巴迪斯亦在兩個身位之外
反映佢地幾冇位置感

今個失球亦令修夫基要更加豁出去妏陣兼搶攻
不過靠毫無防守紀律既唐寧踢左閘
就整定俾多次機會路蘭做助攻

話說回頭
米堡今場失3球
全部直接同埋簡接因為輸高波
冇左普加迪斯以及韋達對米堡既影響充分反映出來

而馬田斯同埋盧雲卡蘭斯先後於中路突入搵到食
就反映舒利亞針對米堡中路防守弱點既調動算係好成功

而家紐記已經趕過侯城
雖然未正式上岸
但形勢算得上樂觀
只要下場乘勝追擊搞掂埋富咸就一天都光晒

米堡方面
今場既表現算係有進步
而一日唔死都仲可能有運行
不過前面依然冇殺手
後面繼續冇防守
今場有波入都係靠比耶送禮
加上作客連輸11場
要寄望佢地餘下兩場波追黑貓5分
可能仲難過利記後上羸聯賽

p.s.:
永遠懷念阿叔同埋12/5既遇難同胞......

2009-5-11

由於太忙搞到遲左出post
請見諒!

1)
賓尼迪斯有6400萬鎊資金增兵

另一方面,消息指利記即將以800萬鎊從海倫芬引入柏夏積
利記爭羸新特蘭,樸茅同埋韋斯咸先簽到佢
佢可以踢左中場或者左翼衛
佢既加盟亦令杜辛拿以及巴布更有機會被棄用

2)
杜奧巴可能被歐洲足協罰停賽半年

3)
傳聞一旦紐卡素降班
舒伯特將出價9000萬鎊收購

4)
派利斯帶領史篤城護級成功
會方隨即為佢提供3年新約兼派50萬鎊bonus

5)
些路迪被指有興趣羅致奧雲
不過週薪只係5萬鎊
兼且要出場先有人工
單靠踢歐聯未必足以吸引佢加盟

另一方面,紐記再次被指將引入戴倫賓特

6)
哥迪奧拿向傳聞表示希望同曼聯協議各自夫添上陣
另一方面,恩尼斯達因為大腿受傷而可能無緣歐聯決賽
不過佢本人就保持樂觀

7)
泰維斯表示將於今個夏天離開曼聯
而佢表示因為家庭理由而想繼續於英超發展
熱刺被指有興趣這名阿根廷球員

8)
法蘭克福準備為前線換血
佢地想向史浩克04收購H.艾天托普
而阿曼文迪斯就可能返祖家效力彭拿典奈高斯

9)
忽然有消息指舒利亞可能於8日內解凍巴頓
(但咁又有咩用?)

10)
愛華頓被指睇中尼斯既22歲射手列美
可踢翼鋒同埋前鋒既佢被形容為年輕版既亨利
身價高達1200萬歐元

11)
科特布斯以及包括加拉塔沙雷既3間土耳其球會
都被指有興趣從史特加收購爾迪雷

12)
忽然同列卡特扯上關係既曼城
被指準備出價1800萬鎊收購沙比艾朗素
佢地又同里昂以及賓菲加爭奪哈化柏林既巴西進攻中場拉菲爾

13)
消息指孫繼海將不獲鍚菲聯續約

14)
比利時足總宣佈搵F.Vercauteren接手

15)
AC米蘭被指準備同安察洛堤續約4年
新約除稅後既人工高達440萬鎊
令佢加盟車路士既機會大減

另一方面,原來蘇拿同埋奇勒只要俾300萬鎊贖身費就可以離隊
令佢地被指可能重返車仔執教

16)
熱刺再次被指準備向新特蘭收購堅韋尼鍾斯
狼隊被指準備以500萬鎊既價錢從熱刺羅致侯度史東

17)
富咸被指即將從史雲斯以250萬鎊既價錢引入射手史葛蘭特

18)
拜仁原本最快聽日宣佈雲高爾加盟
不過而家因為阿爾克馬爾唔肯放人而好可能胎死腹中

另一方面,漢尼斯承認佢地想羅致迪亞高
而一旦失敗就會改向巴塞收購希比

19)
尼斯達透露已復操

20)
里昂衛冕幾近失敗
消息指佢地將可能多達9名球員離隊
當中包括P.祖連奴,法比奧山度士,卡士唐等主力

21)
傳聞一旦艾迪巴約離隊
阿仙奴就會向辛尼特收購普基尼耶克
令艾沙維可以同佢故劍重逢

22)
京治因傷人罪而被捕
佢已經就事件公開道歉

23)
施莫拿歷克將以自由身加盟希臘球會 Aris Thessaloniki

24)
科里斯可能提前向賓菲加請辭
而轉投馬體會或者貝迪斯

25)
米基爾仲未同車路士續約
國米被指再次對佢展開斟酌

26)
艾哈理既葡萄牙教練文奴荷西決定接手安哥拉

27)
尼維特被指可能唔嫁又嫁踢多一季

28)
阿叔既紀念賽將由寫稿佬對講波佬

p.s.:
講幾件紐記對米堡既6分波大戰
大家陣容都唔算完整
米堡冇普基迪斯
多返安德魯泰萊都幫唔到幾多
而全隊除左端基之外冇個似樣
作客10連敗仲同病貓侯城有得比

不過紐記都唔見得好
主場超過5萬球迷撐場都係踢唔出氣勢
而馬田斯鼠蹊傷患復發
好可能同埋辣椒仔一齊倦勤
佢兩個既位置多數由奧雲同埋路蘭代替

好彩後面有史堤芬泰萊復出同巴斯桑治一齊陣守中路
冇高路仙尼總算少左一害
加上巴頓提早收咧唔驚無啦啦踢少個
就信多佢主場同埋老舒一次而睇高佢地半線

由於輸波既好大機會降班
今場波其實同英冠附加賽一樣咁值錢
今晚勝者得救
切忌和波兩敗俱傷而益左西布朗同埋冇牙老虎

2009-5-10

近兩日既新聞......

1)
利物浦被指打算向拿玻里出價2000萬歐元收購拿維斯
而拜仁同埋祖雲達斯亦被指對這名阿根廷球員好有興趣

2)
禾夫斯堡被指想搵雲尼亞里接手

3)
車路士被指打算賠700萬鎊同舒夫真高提前解約
而軍刀就可能去美職盟養老

而杜奧巴可能因為爆粗事件而冇得續約
AC米蘭被指可能貪佢平過艾迪巴約而改打佢主意

4)
蘇斯達同埋沙維奧拿都被指將加盟加拉塔沙雷

5)
一旦保方離隊
祖雲達斯被指將向阿爾克馬爾收購阿根廷22歲龍門羅美路
擁有意大利護照既佢既轉會費大約500萬歐元

而同雲尼亞里不和既甘莫蘭尼斯亦被指可能離隊
佢被指成為貝迪斯同埋愛斯賓奴既增兵對象

而馬賽成為最新一間同查斯古特扯上關係既球會
事緣同佢關係唔錯既迪甘斯下季接手執教

另一方面,艾比度,杜辛拿同埋格羅素都被指係老婦人既新左閘人選
不過後者好大機會加盟拜仁

6)
摩連奴被指希望可以引入一名中場工兵
人選包括耶耶托尼,G.迪亞哥斯天尼,思拿,艾沙姆同埋美路

7)
紐卡素被指想同舒利亞續約4年

8)
阿積士被指想搵列卡特接手

9)
哥連泰斯,山度士同埋法林門高
都因為韋利既健康狀況而唔願意為佢提供合約
消息指佢將會於返到意大利後宣佈掛靴

10)
亨利既膝傷比預期嚴重
肯定缺席本土餘下比賽
連歐聯決賽都未必有得踢

11)
費倫天拿希望以800萬歐元引入意大利中場柏林保
不過出價同森多利亞要求既1200萬歐元仲有一段距離

12)
雲高爾被指將轉投拜仁
而佢地被指有興趣引入哥古夫

13)
AC米蘭被指準備從熱那亞引入莫達

14)
雖然卡斯智斯公開呼籲新會長唔好對球隊大換血
不過新兵消息依舊不絕

戴倫特爆料伊巴謙莫域將轉投皇馬
而佢地亦再次被指準備引入馬干

另一方面,被指可能重返皇馬出任技術顧問既施丹
公開表示球隊應該引入列貝利

15)
羅馬成為最新一間同阿歷士施華扯上關係既球會
而佢地亦被指希望引入告魯斯
不過這名阿根廷射手比較希望轉戰西甲
多數加盟維拉利爾或者馬體會

16)
費高透露仲未想收山

17)
阿聯酋航空同埋Umbro
分別以3000萬鎊同埋1500萬鎊既價錢贊助曼城4年
而印度網絡商Bharti Airtel
就會於未來5年贊助曼聯合共1000萬鎊

18)
一旦西布朗降班
蘇華隆被指將跳船到巴黎聖日耳門

另一方面,洛頓就被指將離開這間法甲球會而改投漢諾威

19)
端布爾被指可能以自由身加盟李斯特城
佢早前同紐卡素以及車路士扯上關係

20)
墨西哥足總為左抗議國民隊同埋聖保羅唔肯派隊去當地參加比賽
決定即時退出南美自由盃同埋美洲國家盃等大型賽事

21)
里昂被指打算從安德烈治引入摩洛哥進攻中場保斯蘇化

22)
魯爾被指成為曼城最新一個星級收購對象
而維路素同埋迪亞高米列圖都同佢地扯上關係

23)
古莊臣被傳將於暑假轉投愛華頓

p.s.:
1)
尋晚愛隊利記輕勝槌仔幫3球
今晚就要拜託曼城幫手

2)
本地球壇最近真係多壤消息
繼雙氧偉自殺,阿叔過身後
幾日前又有白馬康因為末期肺癌而企圖自殺
而家黎祥亦證實患左肺癌
祝黎sir早日康復

2009-5-8

近幾日既新聞......

1)
尹巴士頓被指可能轉投AC米蘭
而麥卡倫就被傳成為阿積士新教練既人選
不過米堡同埋新特蘭都亦被指想搵佢接手

2)
AC米蘭被指有興趣羅致佩奧爾或者麥薩斯
加上迪亞高施華以重組中路防守

3)
標準烈治既28歲塞爾維亞射手M.祖雲奴域
被指成為費倫巴治既600萬歐元新箭頭人選

4)
漢堡同埋雲達不來梅都被指有興趣從波爾多引入27歲防中迪亞拉

5)
阿祖安奴落實加盟法林明高

6)
利物浦被指想向利華古遜收購德國年青射手希美斯

7)
有報導指紐記可能索性直接同巴頓解約
不過仍要同律師商量點樣可以一個仙都唔賠俾佢
而錫菲聯同埋保頓都被指有興趣接貨

8)
被剔出洲際國家盃大軍名單既麥卡菲
被指成為樸茅既增兵對象

9)
國米再次同史尼達以及摩達歷扯上關係
而西維爾既24歲巴西左路球員C.阿祖安奴就透露收到國米既斟酌

10)
查斯古特既老豆爆料
里昂,巴塞隆拿同埋幾間英超球會都想羅致佢個仔

11)
杜奧巴就爆粗鬧球證一事公開道歉

12)
賓特尼,列尼,甘明斯同埋史堤夫亨打被指成為愛華頓既羅致對象
史篤城就被指準備出價500萬鎊同拖肥糖爭列尼
韋根就希望羅致身價高達500萬鎊既甘明斯
而同馬達拉斯扯上關係既熱刺就希望羅致史堤夫亨打

13)
咸錫再次被指成為祖雲達斯既增兵人選

14)
禾確特同阿仙奴續約4年
週薪6萬鎊
另一方面,辛達路斯下季將重返兵工廠

15)
羅馬,拉素,熱那亞同埋巴勒莫都被指想引入艾卡費斯卡

16)
曼聯被指曾派人同迪亞高米列圖既經理人於倫敦會面
另一方面,佢地被指打算下季將馬捷達外借到帕爾馬
以換取收購對方22歲肯亞中場馬里加既優先權

17)
皇家蘇斯達翼衛卡斯達路透露保頓同埋些唁 迪都有興趣羅致佢

19)
布力般流浪被指打算從西布朗收購瑞典前鋒J.奧臣
而表態想長留奧林比亞高斯既達比舒亞就被指成為伯明翰既新箭頭人選

20)
基治因傷提早收咧
而艾確圖被指成為阿仙奴既羅致對象

21)
史堤芬泰萊腳踭傷患已經冇咩大礙
可能於對米堡既大戰候命

22)
佩爾否認向里昂請辭既報導

23)
費倫天拿被指打算從烏甸尼斯引入G.迪亞哥斯天尼

24)
艾比度被傳將於季尾離開巴塞隆拿
而艾曼紐臣就被指將會佢既替代品

25)
拜仁成為最新一間同波圖左閘施素浩扯上關係既球會

p.s.:
薩拉耶達原本將被拿玻里買斷
不過佢最近因為紀律問題激嬲左鄧納東尼
消息指佢將會被放棄

受樣唔識唸既仲有賓特拿
佢早前返丹麥踢太公波
已經俾狗仔隊跟到佢去夜總會玩到清晨5點
之後仲帶女出鐘
單樣揚左都冇吸取教訓

而家歐聯大敗俾曼聯之後都仲有興志出去蒲
仲要俾人影到玩到褲都甩埋

條友只係四肢發達
波已經差隊友唔止一皮
仲咁唔生性
最終暑假俾雲加賣走都唔好怨

2009-5-7 (2)

想講下尋晚既塞車大戰
車路士繼首回合後繼續有料到
以緊迫,及早犯規,越位同埋近乎滴水不漏既防守
令巴塞一眾攻擊重心冇空間發揮
而更出色既係
佢地憑簡單踢法,速度以及體力爭取多次有威脅埋門
論表現絕對係07年足總盃決賽後既代表作

車仔靠艾辛一腳球不著地既世界波取得優勢
加上對方既艾比度從後攔截成單刀之勢既安歷卡而被逐離場
形勢大好之下最終俾恩尼斯達另一腳世界波戲劇性迫和
小弟認為有4個原因

一係佢地埋門把握一般
特別係杜奧巴面對狀態回勇既域陀華迪斯接連失機
拉唔開比較亦即係留條尾俾巴塞

二係軒迪克既調動略嫌保守
車仔打多對手一個後
軒迪克反而用比列堤入替杜奧巴
亦無借勢施加更多壓力

另一方面,就算要換走一個箭頭
雖然杜奧巴對住耶耶托尼消耗左好多體力
亦可能受左輕傷
不過佢得返6成戰鬥力都好過狀態平平既安歷卡
軒迪克這個蝕章既調動結果埋下被迫和既伏線

三係車仔防線於比賽尾聲唔集中
其實上星期首回合巴塞於比賽後期幾乎靠保贊同埋希比偷雞成功
當時小弟認為係車仔防線一時唔適應
點知尋晚92分鐘先俾恩尼斯達射爆廠
(亦係巴塞全場唯一中框既射門)
小弟即時就有這個想法

艾辛解圍失誤
之後全世界只係識將注意力擺在美斯身上
禁區頂既恩尼斯達就冇人看管
可以瞄準車仔大門練波咁練

四就一定係發雞盲球證奧華堡
全場車仔至少有4次可能獲判12碼
但條友4次都say no
最離譜係距離5碼都唔吹碧基手球
難怪而家咁多陰謀論

p.s.:
球證要你滅亡
必先令你瘋狂

2009-5-7 (1)

因為工作超忙
趕唔切夜晚12點前出post
請見諒......

1)
紐卡素營運總監林比亞斯表示
餘下3場波都要停賽既巴頓
已經踢完於球會既最後一場比賽
意味巴頓將會於季尾被放棄
而佢透露有幾間英超球會都想引入這名問題球員

2)
尹巴士頓決定向阿積士請辭

3)
前祖雲達斯經理莫治(06年假波案主角)爆料
AC米蘭已經搵左熱那亞教練加斯伯連尼下季執教

4)
賀芬咸被指想搵奇連士文取代雲歷克執教

5)
史浩克04搵馬加夫下季過檔
而禾夫斯堡就被指想搵列卡特接手
不過佢亦被指可能接手AC米蘭

6)
軒斯再次被指成為利物浦既羅致對象
傳聞轉會費約700萬歐元

7)
馬體會宣佈同文尼治解約
傳聞佢好可能重返波圖

8)
伯明翰想為保耶同埋卡爾提供新合約
而佢地被指想向曼城借用祖赫特

9)
迪甘斯下季接手馬賽

10)
阿歷士施華被指因為同祖爾不和而轉投AC米蘭

11)
皇馬,曼聯同埋祖雲達斯都被指有興趣
從甘美奧引入'新細哨'杜格拉斯哥斯達

12)
薩克達被指有興趣羅致梅度

13)
端布爾被指可能以自由身轉投紐卡素或者車路士

14)
西維爾被指想搵馬略卡教練文沙奴過檔

15)
蘇甘寶,格連莊臣,桑恩戴維斯,哥治同埋簡奴
都被指將於季尾離開樸茅

16)
布力般流浪想買斷法國後衛基維
馬賽就被指索價400萬鎊
而同米卡李察士扯上關係既維拉亦被指有興趣出價搶人

17)
熱刺被指想引入禾洛克
而贊拿斯,索高拿,柏夫奴真高同埋杜斯山度士就被指
成為國米,韋根,愛華頓同埋韋斯咸既挖角對象

18)
阿特蘭大被指想羅致恩沙基
不過佢表示將會於AC米蘭踢到收山
而日期可能係下年或者後年季尾

19)
文迪斯被指準備於暑假離開燕豪芬
返祖家厄瓜多爾落班

20)
查伯被指可能以400萬鎊既價錢轉投葉士域治

21)
哥拉迪即將轉投烏甸尼斯

22)
摩連奴被指要求國米引入迪羅斯
不過這名意大利中場係羅馬死硬派球員
所以成事機會好低

23)
費倫天拿成為最新一間同米基爾扯上關係既球會

24)
同車路士續約4年既文切尼被指再次成為狼隊既借用目標

25)
打比郡將會放棄龍門卡路爾同埋阿根廷射手維拉

26)
哈化柏林被指打算從羅馬尼亞球會 Arges Pitesti 引入進攻中場達馬斯

27)
競逐皇馬會長一職既另一候選人艾度亞度加西亞
向西班牙傳媒表示一旦當選
將為球隊帶來杜奧巴,傑利臣同埋桑坦德左閘艾雲麥卡奴

28)
車路士,西維爾,祖雲達斯,熱那亞,國米同埋費倫天拿
都被指曾經派出球探去觀察阿爾克馬爾21歲比利時射手迪比利既表現

p.s.:
有個阿仙奴球迷尋晚懷疑因為眼見兵工廠俾紅魔移平
一時睇唔開就吊頸死左
仲有十幾分鐘又有大戰睇
不過睇還睇
切忌過份投入

2009-5-6

想講下尋晚令小弟失望既仙魔會
費sir尋晚一心打突擊
兵工廠全場根本搵唔到太多空間創造機會
而少用兩邊就更加難拉開姐對手防線
相反踢得比較有耐性既紅魔有更多既入球波機會
4個字:優勝劣敗

場波8分鐘就幾乎玩完
11分鐘就正式玩完
Soccernet 講得好
'If there was unlikely, four was an impossibility......'
場波之後已經係垃圾時間

艾蒙尼亞神奇不再
C7既40碼自由球係射得靚
不過咁既距離都救唔到
這名西班牙龍門責無旁貸之餘
失到第二球亦令兵工廠宣佈同決賽無緣

而輸第一球既基拔斯腳軟出醜
小弟覺得唔怪得佢
咁細個如果踢得好叫做早熟
踢得唔好又有咩咁奇
兩年前佢仲係到跑馬地港會場踢7人賽既小朋友
而家咁仗快就要佢踢歐聯4強大戰
講真係強人所難

怪就怪雲加買人頭重尾輕
肯俾500萬鎊買個未證明晒實力既艾朗蘭森
但係成條後防只係多左個賤價75萬鎊既豬達
費sir肯割愛俾雲加既都唔慌係好貨色
豬達既背景仲令人懷疑佢係當今第一號無間道後衛

足總盃同埋歐聯4強止步
其中一個主因一定係後防不濟
現今足球同打NBA季後賽一樣
冇防守就注定好睇唔好食
占士今季當選常規賽MVP全因肯俾心機打好防守
雲加一日整唔靚條防線
兵工廠將會繼續食白果

防守有幾重要?
問軒迪克就知
睇完西班牙國家打呲
即使今晚車仔主場兼對方大鬧中堅荒
段估都唔敢貿然同巴塞隆拿搶攻
費事廁所點燈--'找屎'(找死)
靠死球同埋突擊偷雞好過

p.s.:
新聞夜少少再講

2009-5-5

講極都仲有既新聞......

1)
希比亞落實季尾以自由身轉投利華古遜
雙方簽約兩年
佢透露希望將來有機會重返利記出任教練

而利記同埋維拉就被指有興趣從艾美利亞引入射手尼格路
不過這名曾於1月拒絕富咸斟酌既球員表示
雖然好想加盟利記
但係成事而否都要睇皇馬
事關皇馬有優先權於暑假以440萬鎊既價錢收購佢

另一方面,傳聞盧卡斯利華會被利物浦以700萬歐元既價錢出售

2)
伊巴謙莫域日前做手勢示意球隊收聲
佢隨即被傳將會轉投皇馬

3)
雖然C7表示皇馬夢已死
不過曼聯被指仍將列貝利視為6250萬鎊既替補人選

而佢地亦成為最新一間同M.沙豪扯上關係既球會
阿仙奴,紐卡素同埋祖雲達斯早前都被指有興趣收購這名19歲後衛

4)
山度士既24歲玻利維亞射手保蘭奴斯被指成為多間球會既羅致對象
當中包括小保加,莫斯科斯巴達,愛斯賓奴,熱那亞同埋錫耶納

5)
拿玻里準備向祖雲達斯買斷沙拉耶達
而洛基,波里路,艾卡費斯卡同埋迪華奧都被指成為佢地前線既增兵人選
另一方面,佢地亦被指同費倫天拿爭奪河床27歲右閘費拉利

6)
艾美利亞被指成為AC米蘭既新龍門人選

7)
達比舒亞表態希望可以長留奧林比亞高斯

8)
阿爾克馬爾從哥登堡引入瑞典23歲進攻中場 P.Wernbloom

9)
尼坦耶馬卡比因為財困而決定同馬圖斯解約

10)
里爾中場米高巴斯圖斯,波圖左閘施素浩,
華倫西亞右閘米基爾同埋樸茅中堅迪斯甸都被指成為熱刺既增兵人選

11)
靴達臣被傳將以自由身加盟格流

12)
巴勒莫被指希望從阿特蘭大引入28歲中堅文費甸尼

13)
迪拿列達既冠狀動脈再次出現病發跡象
佢好可能因而被迫提前掛靴

14)
拿鐵斯表示想注資拯救修咸頓

15)
傳聞指星期日魯莽攞紅牌既巴頓於賽後向舒利亞爆粗
而家佢被紐記罰佢停賽
直至另利通告為止
亦有消息指佢會被扣3星期人工

另一方面,有傳聞指一旦紐卡素降班
巴頓被指將會要求離隊
不過佢既經理人已經作出否認

16)
維拉成為最新一間同艾比奧爾扯上關係既球會

17)
吉列斯被指下季可能到沙地執教希拉爾

18)
巴黎聖日耳門宣佈同拿古恩解約

19)
史托港22歲龍門威廉士同埋錫耶納30歲中堅波坦路華
都被指成為韋斯咸既增兵人選

20)
拉科33歲右閘M.柏保路被指可能以自由身轉投狼隊

21)
卡達活被指將於季尾離開紐卡素
而舒利亞就會搵史必或者羅拔李爾回巢幫手

22)
新特蘭被指想搵麥卡倫下季接手

23)
史巴利堤暗示可能於季尾離開羅馬

24)
波爾多被指準備向AC米蘭出價1500萬歐元買斷哥古夫

p.s.:
今晚02:45撐兵工廠再戰紅魔
小弟信雲加今舖唔會再排錯陣
而只要加強側擊
小弟相信佢地有足夠火力入波
今場波既關鍵似乎係兵工廠既防守能力

豬達畢竟係計時炸彈
加上踢反擊既紅魔只要成功停襲一次
兵工廠失1球就要入返3球
小心!......

2009-5-4

近幾日既新聞......

1)
先講幾段利物浦既消息......

艾加終於落實同利物浦續約4年

而施哥夫被指成為利記1500萬鎊既新左閘人選
消息指杜辛拿將會被出售套現

而克羅地亞柏拿積亦係左閘位置既其他選擇
不過就要同貝迪斯以及西維爾爭過

而唐寧,韋達同埋艾朗連儂就再次同利記扯上關係
消息指曼聯亦有興趣同利記爭奪身價高達1500萬鎊既後者

而奧雲亦忽然被指將回巢利記
不過賓帥已經即刻否認

另一方面,賓菲加就想向利記收購巴西後備龍門迪亞高卡雲拿利

2)
幾段有關阿仙奴既消息......

雲加拒絕皇馬4000萬鎊既長約
似乎將會教兵工廠直至退休

伊度亞度達施華因為膝傷而提早收咧

佢地被指準備於暑假將艾迪巴約以3000萬鎊既價錢賣俾AC米蘭
辛達告魯斯就被視為替補人選

禾確特就被指成為祖雲達斯既增兵對象

皇馬就被傳有興趣收購基治
不過傳聞1700萬鎊既轉會費就高到令人難以自信

另一方面,美國商人高安基持有28.3%股份
已經成為兵工廠既最大單一股東

3)
賓施馬再次被指成為曼聯3000萬鎊既新前鋒人選
而泰維斯就表示轉戰西甲既機會比較大

4)
保路斯基被指成為史浩克04既增兵對象

5)
拜仁被指可能搵迪亞高接替列貝利既位置
而佢地亦被指想搵雲高爾接手
不過阿爾克馬爾已經表明唔會放人

6)
曼城被指準備出價2500萬鎊收購耶耶托尼
而洛賓同埋雲達華治亦被指係佢地既增兵對象

7)
雲尼亞里交唔出成績之餘
最近又同森莫蘭尼斯嘈交
祖雲達斯被指準備於球季完結前搵費拉利取代佢老人家
前者而家係球會青訓部門既技術總監
亦係國家隊助教

而老婦人被指準備用泰亞高同埋查斯古特
去交換迪亞高米列圖

另一方面,簡拿華路已飛返都靈進行體測
為重返老婦人作最後準備

而保方表示將會視乎球隊既增兵情況而決定前程

8)
奧華馬斯被指轉戰澳職盟
加盟珀斯光輝

9)
史高拉利被傳成為費倫巴治新教練既人選
而佢地亦準則以總值1500萬歐元年薪3年合約斟酌細哨

10)
國米被指準備用占美利斯另加1200萬歐元去收購卡斯辛奴
而佢地亦被傳準備開出500萬鎊跳樓價去接收馬田斯
馬路達就再次被指成為佢地既增兵對象

11)
C7表示皇馬夢已死

12)
P.祖連奴被指可能於季尾轉到卡塔爾掘金

13)
巴塞隆拿被指準備向拜仁開價2200萬鎊
另加希比或者古莊臣以引入列貝利

另一方面,傳聞一旦伊度奧離隊
佢地就會羅致科蘭作為替補

14)
沙柏達華倫西亞被指成為皇馬新中堅既人選

15)
阿積士雖然下季冇份參加歐聯
不過尹巴士頓依然保得住份工

16)
馬賽方面希望搵迪甘斯接替吉列斯

17)
意甲球會希望下季可以組成意超
以增加收入之餘
亦藉以唔再經濟上支援意乙

p.s.:
諾域治,修咸頓同埋查爾頓繼續向下沉
令人失望

而伯明翰尋晚作客羸雷丁2:1
將會同狼隊一齊重返英超
錫菲聯,雷丁,般尼同埋普雷斯頓就要踢附加賽
爭奪最後一個升班席位
卡迪夫城就衰臨尾香

有升就有降
紐記尋晚又輸
只有頭15分鐘有虛火
輸左球冤枉波就成隊散晒
死球例牌唔睇人
外圍好似俾人練波咁遠射
最終輸3球已經低過最低消費好多
PK仔巴頓仲發狂表演雙腳飛剷
就算真係俾人扣薪兩星期都抵肯死

佢地差
好在護級對手都一樣唔爭氣

只要今晚病貓繼續死下死下
力保歐協席位既維拉將會繼米堡同埋黑貓後
靠打殘病貓而成功止血

維拉有艾邦拉賀復出
病貓就有卡雷布科蘭停賽
今個星期5隊護級球隊齊失3分既機會真係唔低

2009-5-3

想講下尋晚既西班牙國家打呲......
戰果絕對出人意表
皇馬一心追擊巴塞
相對於作客魯營
佢地今場冇唸過死守
結果輸到PK

一路睇波就又唸起人地打功夫
未學打要先學捱打
否則未打羸對手就已經俾人打殘

皇馬後防千瘡百孔
右閘沙治奧拉莫斯識攻唔識守
雖然皇馬今場入兩個波雖然都關佢事
不過始終功不抵過
而球隊兩次入波後火速失守亦係大敗既部份原因

其餘3個守衛全部走緊下坡
佢地全部都有離心
季尾走晒其實長遠對球隊反而有好處

兩個防中又未到家
迪亞拉咁既料都要2000萬鎊
小弟覺得3成價錢已經係極限
而家全世界只有曼城可以同皇馬一樣咁水魚

而加高雖然同列當度當年一樣踢得瀟洒兼靚仔
不過水準可能連前輩一半都冇

而被推上中場既馬沙路莫講話助攻
連基本防守都唔掂

靠一班同講波佬威仔一樣發緊夢既防守球員
就算有當今世界最好既龍門幫手補鑊
都只係一條超唔夠班既防線
卡斯拿斯超無奈既表情
更甚於幾個月前大家見到既基雲

巴塞方面
面對對手毫無壓迫力既防守
佢地得以盡情發揮
一吐幾日前主場大塞車既悶氣

巴塞今季行軍效率遠勝上季
相對於強勁火力更加似係復甦關鍵

前線已經係第一度防線
而中場沙維同埋恩尼斯達亦好勤力補位
今場對手由艾辛等人換上迪亞拉同埋加高
技術同埋效率都羸自然應付有餘

下場車仔雖有主場之利
巴塞又唔夠中堅用
不過軒迪克睇完尋晚場波應該都唔敢亂來
否則搶攻只會為自己製造致命傷
而淋濕,甚至掘爛史丹福橋主場亦可能係對付夢幻隊既下(流)策

最後想講下重掌皇馬機會好高既佩雷斯
條友果然品性難移
一路以來都聽到佢會棄用荷蘭兵
同埋買C7以及卡卡既傳聞

其實皇馬最應該買既其實係幾件有質素既防守球員
不過沙比艾朗素同埋馬斯查蘭奴又只係冇米粥
比較有機既可能只係沙柏達華倫西亞
如果一個暑假都搵唔多幾件好野幫輕卡斯拿斯
佢地下季依然好難挑戰巴塞

而增兵之餘
搵新教練就更加重要
雲加寧願唔要4000萬鎊長約都唔唔肯接個燙手山芋
拉莫斯又似乎唔係佩雷斯杯茶
未落實教練就唸增兵
反映佩雷斯唔似一個有計畫既好主席

而長遠而言
佢地有必要建立一個完善既青訓系統
因為英超Big 4同埋死敵巴塞都做得好佢地好多
否則重行舊路
球隊既缺乏有潛質新血
更會加重財政壓力

p.s.:
應讀者'舒利亞'要求而preview今晚場波
球證尋晚又發雞盲
間接幫曼聯羸埋米堡
利記後上既機會又細左好多
小弟希望利記依然唔好放棄
於復出既謝拉特帶領下繼續踢好波

紐記方面
舒利亞段估唔敢再排4-3-3陣式
4-4-2或者4-5-1似乎會係佢杯茶
而奧雲似乎將被收起

中場方面
辣椒仔同埋杜夫上場踢得算唔錯
將會連同巴頓以及古迪利斯一齊得到初發機會
畢特有冇得踢就要視乎陣式

後防方面
荷西安歷基同埋史堤芬泰萊一齊因傷缺陣
大衛艾加將會客串左閘
對一心穩守再搵機會偷雞既紐記而言
難免係隱憂

2009-5-1

1)
阿爾克馬爾既24歲摩洛哥裔射手被指成為
利物浦同埋阿仙奴既增兵人選

2)
愛華頓再次被指有興趣引入奧雲
而杜夫亦被傳成為狼隊既增兵對象

另一方面,Big Sam被指有興趣同舊部屬路蘭合作
布力般流浪被指將向紐卡素出價400萬鎊收購這名前保頓隊長

3)
拜仁方面承認列卡特係其中一個新教練人選
另一方面,列貝利暗示如果拜仁下季冇得踢歐聯
佢將會考慮離隊

4)
紅星隊既26歲塞爾維亞中場米利積斯
被指成為拿玻里300萬歐元既增兵人選
而佢地同時間亦同國米以及熱那亞爭奪本土U-21射手艾卡費斯卡

另一方面,曼城被傳有興趣向佢地引入拿維斯

5)
巴勒莫被指打算向國際隊出價2000萬歐元收購前鋒利碼

6)
伊度奧表態想同巴塞隆拿續約

7)
艾蘭奴仲未同曼城成功續約
熱刺被指想乘虛而入出價800萬鎊接貨

8)
法林明高方面表示阿祖安奴已經99%係佢地既球員
不過佢既經理人就表示阿祖同母會仲未達成任何協議

9)
韋斯咸被指考慮向米堡收購巴迪斯

10)
盧普利被指成為富咸既增兵對象
這名前阿仙奴球員現時被費倫天拿外借到錫菲聯

11)
祖雲達斯被指想向熱那亞羅致右翼衛麥士圖

12)
維拉同埋雷丁都被指有興趣向財困既修咸頓收購中場新星舒文
而前者就可能將加特拿賣俾狼隊以減磅

p.s.:
賓尼迪斯澄清利記暑假既亞洲之旅只包括泰國同埋新加坡
尋日講利記願意減價訪港既消息只係流料
真係一場歡喜一場空......