2010-2-28

1)
尼日利亞最終搵前瑞典教練拉格碧接手
雙方簽5個月既短期合約

2)
科突迪瓦足總決定同教練 V.Halihodzic 解約
而軒迪克承認收到斟酌搵佢接手
不過佢表示要解決幾件私事先可以作決定

3)
巴塞羅致南韓13歲天才朴勝浩
而佢地亦落實同碧基續約至2015年
贖身費高達2億歐元

4)
愛斯賓奴證實中村俊輔以100萬歐元既價錢回流橫濱水手

5)
白禮頓已聯絡紐卡素續借小路亞路亞

6)
卡斯迪拿斯季尾以自由身過檔國米

7)
艾殊利高爾向朋友透露
如果老婆堅持離婚
佢可能會集中唔到精神比賽而索性掛靴

8)
利物浦落實從昆士伯流浪羅致15歲前鋒史達寧
轉會費150萬鎊
另有50萬鎊係 variable

9)
朗奴迪保亞復出加入卡塔爾奧運隊教練團

p.s.:
1)
兩年前伊度亞度達施華俾泰萊踢到隻腳變左U-型
到而家都未回復當年勇

尋晚又有艾朗藍斯俾梳格斯踢到斷腳
重傷既佢隨即被送院急救
雲加透露佢將要休息一段長時間

殺人王事後例牌聲稱冇心傷人
而卡比路仍然決定選佢對埃及

2)
布歷治一如外界所料冇同泰利握手
最痛快既報復怕且都係曼城又羸車仔

2010-2-27

近幾日既新聞......

1)
由於南非財團唔能夠保證於星期五前過數
令收購談判胎死腹中

一般相信樸茅會進入申請破產程序
而佢地將會被扣9分
得返7分既佢地幾乎肯定降班
而下季英冠開咧要再扣20分

消息指唔計未能通過歐洲足協審核既樸茅以及韋斯咸
英超球會總負債高達40億歐元
係西甲球會既4倍
總負債在全歐洲球會佔56%

如果其他英超球會唔吸取教訓
怕且只會步樸茅後塵

2)
布歷治宣佈由於唔想同泰利合作而退出國家隊
消息指卡比路將會考慮用禾洛克,拜恩斯或者尼史葛踢左閘

3)
消息指荷度爆冷願意接手尼日利亞
不過佢只會簽短期合約
世界盃後將再次集中精神打理佢既青訓學校

4)
幾段利物浦既消息......

謝拉特尋晚對對尼科西亞入波
以33球取代舒利亞成為最多歐洲賽入波既英格蘭球員

不過史基迪爾賽後懷疑足踝骨折
預料要養傷一段時間

而利記被指打算羅致史雲頓16歲龍門史提芬斯

另一方面,巴布透露準備搵賓尼迪斯商討前途
佢再次同阿積士以及伯明翰扯上關係

5)
韋斯咸被指有興趣收購赫特同埋韋碧克

6)
巴塞亦未同18歲中場泰亞高達成續約協議
佢老豆兼經理人馬仙奴(巴西羸美國世界盃既成員)
透露幾間英超以及西甲球隊都想搶人

7)
聖保羅教練列卡度高美斯輕微中風

8)
馬基里尼宣佈季尾掛靴

9)
巴治奧表示考慮下季復出做教練
而佢既前隊友白蘭斯就再次被傳可能接手國米
如果成事將可能有機會同古華特合作
佢被傳短期內會加入國米出任前鋒教練

10)
車路士方面證實施治因為小腿肌肉拉傷而要缺陣3至4星期

11)
耶耶托尼否認加盟曼城或者阿仙奴既傳聞

12)
董方卓落實同華沙軍團簽約18個月

13)
曼城向胡禮菲臘斯表明要減薪先有得續約
因而有傳聞指現時週薪6萬鎊既佢可能季尾離隊

14)
比利建議決賽周每場增設兩個禁區球證
但就反對即時翻看重播協助執法
費事搞到場波頻頻暫停

15)
愛華頓從馬模羅致16歲瑞典後衛 J.Hammar

16)
安達臣可能因為膝傷而提早收咧

17)
彼德堡方面證實米堡斟酌佢地既隊長佐治保特

18)
巴勒莫要求卡積亞要於下個月前交代去向
佢既合約訂明1200萬歐元既贖身費

19)
布力般流浪成為最新一間同查理阿當扯上關係既球會

20)
羅馬里奧介紹個仔加盟佢既母會華斯高
16歲既羅馬里尼奧亦係踢箭頭

21)
梁煮食承認曾經同中國足協副主席林曉華傾過
以公開招標形式吸引班主組隊踢中乙或者中甲
再爭取機會升班去中超

22)
阿仙奴既半年財政報告透露稅前利潤高達3520萬鎊
債務亦大幅減少1億鎊

23)
皇馬被傳打算季尾向艾美利亞出價500萬歐元收購迪亞高艾維斯
以取代約滿離隊既杜迪克

24)
迪施高既經理人聲稱這名波斯尼亞球星既身價已升至4000萬歐元

p.s.:
要播有線既波
竟然要連佢地既廣告同埋宣傳片都描埋
有冇搞錯?

2010-2-25

摩連奴首度倒戈車仔
兼且同唔係朋友既肥安再次過招
已經係超強戲碼

國米羸波
不過過程冇咩說服力
3分鐘就開紀錄
大抵係因為泰利近期再次出錯
唔知仲以為厄遜或者加歷查上左車
開波前怕且冇人唸到
串演左閘既馬路達全場受既壓力竟然仲少過佢

而之後國米大條道理踢穩守突擊
不過最終失晒個勢
佢地有主場之利亦冇咩霸氣可言
季初俾巴塞搓住踢都可以賴人地好波
尋晚幾乎頂唔住架車
怕且係因為速度,身型,效率都輸蝕少少
如果艾辛冇傷可以代替缺口米基爾
雙方差距應該更大

杜奧巴上半場兩次攻門都好有威脅
當中衝力罰球(又)中楣真係唔好彩
而佢衝散國米防線亦造就卡奴多左活動空間

不過最絕都係近期既誤判浪潮
尋晚既干沙利斯兩次都唔罰12碼
真係吹佢唔脹

下半場續戰依然由車仔主導比賽
分別只係雙方幾分鐘因為神來之筆而各入一粒

國米下半場中段開始
前場索性靠巴洛迪利一條友搵食
車仔就算有施治傷出都唔使太驚再失波
真正令肥安擔心既怕且係佢要抖幾耐

而國米最終可以守到完場
怕且要多得盧斯奧踢出近年既代表作
以及死過返生既祖里奧施薩硬食左林伯特既勁射

但問題係聖西路出擊都咁狼狽
俾人攞埋作客入球既國米去到史丹福橋都唔知點算

車仔下場只要唔心急兼後防唔好再爆鑊
出線機會依然審慎樂觀

肥安賽後指出輸波原因既同時
亦強調依然有信心晉級
相反摩連奴就話數據反映唔到其實國米主導比賽
怕且只係淡定有錢剩同埋死剩把口既分別

2010-2-24

想講英冠形勢......

紐卡素分別失少西布朗以及森林6分同埋8分
而主場最勁既佢地餘下既賽程唔算太難踢
對森林同埋鍚菲聯都有主場之利
最難踢既亦只係作客米堡
直接升班應該十拿九穩
不過如果想穩穩陣陣羸埋英冠
就一定要改善作客既防守水準

西布朗方面
成功同杜蘭斯續約加上伊斯美米拿既後出
令球隊功力有增無減
而作客都入到32球令佢地有最好既客場成績
不過繼續攻強守弱亦令佢地有時撞板
而家仲有查拉因傷提早收咧
即管睇下賓屈臣幫到幾多

現時排第3既佢地餘下既賽程亦唔見好難踢
不過想後上羸英冠或者至少保住直接升班資格
就要改善球隊既穩定性
亦係佢地比紐記以及森林差既地方

森林而家排第2
早前作客忽然連輸3場令佢地錯失追趕紐記既機會
或多或少同球隊中後場唔夠疊馬有關
而考慮到佢地餘下賽程有多達5場硬仗
加上球隊既緊迫踢法對體力消耗好大
比利戴維斯既增兵係保持球隊戰鬥力既關鍵

佢地今季既表現其實比西布朗更加可取
作客防守仲係英冠最強
就算最終要踢附加賽
小弟都主觀希望佢地下季可以重返英超

而有力爭取附加賽資格
仲有由排第4既史雲斯到排第9既米堡

史雲斯方面
這隊聯合國部隊超驚喜可以上到第4
全靠同紐記一樣只失22球既防守能力
出身防中既領隊保羅蘇沙應記首功
以艾殊利威廉斯為首既防線亦踢出代表作

出色防守為佢地帶來僅次於西布朗既客場成績
全英冠亦只得紐記輸波少過佢地

而佢地拒絕森林對柏迪利既出價之餘
亦成功羅致古堅
就確保球隊繼續有戰鬥力追夢

李斯特城方面
開季到而家都咁韌
咁既人腳到而家只係輸7場根本遠超預期
不過佢地要最終保住前6就有一定隱憂
一係佢地餘下賽程唔易踢
二係 F.Fryatt 養傷兩個月既負面影響仲未徹底浮現

卡迪夫城方面
佢地應該係英冠最海鮮波既球隊
可以作客大炒布里斯托城6蛋
但又可以主場輸俾普利茅夫同埋班士利
甚至可以領先彼德堡4球都俾對手追平

加上主場羸波率連5成都冇
若果唔係作客成績算勁
佢地應該一早收左皮

接住排名7至9既黑池,錫菲聯以及米堡
同前6既分數有一定距離
要追就幾有難度

黑池方面
早前既紀律風波唔見得對球隊有好大既負面影響
而荷路維亦表明要再借人爭前6
不過考慮到佢地仲有唔少硬仗
兼且作客表現一般

就算佢地成功續借蘇格蘭新星 B.Bannan 到季尾
兼當時人將於3星期內復出
(小弟對佢好有印象
佢係08年香港7人賽既賽事最佳球員
仲俾左隻簽名波 boot 小弟)
英國傳媒既焦點始終係查理阿當轉戰英超既傳聞
因為大家普遍都唔認為佢可以單天保至尊

鍚菲聯方面
之前已經講過佢地衰防守
排名前9既球隊以佢地失43球最多
就算借左諾斯禾菲都唔幫得幾多
布歷維爾可能要為未能改善球隊防守力而付出代價

米堡方面
史特根針對弱點大量增兵後既正選陣容
牌面絕對係英冠頂級
而佢仲未停止增兵
明顯係仲未放棄爭入前6既一絲希望

不過米堡對前8球隊1勝3和8負既劣績實在太嚇人
兼且而家輸波竟然仲多過羸波
佢地要奇蹟後上前6
怕且表現方面要有好大幅度既反彈

之後既幾隊只係數字上仲有機會打入前6
實際機會真係好微
但佢地既比賽心態對前列以及榜尾形勢都好有影響
而排第10既高雲地利同尾3既水晶宮只有10分距離
就睇得出形勢有幾緊

另一方面,參考對上8季既往績
尾4球隊最少都有49分
由於現時有39分既屈福特,打呲郡以及普雷斯頓都唔似會降班
小弟索性一刀切由現時只得38分既球隊講起

斯肯索普方面
佢地護級既本錢在於主場有一定既搶分能力
餘下4場6分波護級大戰有3場都有主場之利之餘
尾二既主場戰亦只係對無欲無求既布里斯托城
佢地應該有足夠機會搶分

昆士伯流浪方面
近8場波只得4分就令球隊跌到要面對護級問題
佢地自07年有比亞托尼等富豪入主後一直以升班為目標
不過管理層混亂早已埋下失敗既伏線
隨住主席比亞托尼終於請辭
以及球隊可能搵到禾洛克取代冇料替工夏福特
佢地應該可以幸免於難

葉士域治方面
球隊人腳原本唔差
不過將帥不和既代價就係升班無望

而佢地長時間沉淪護級組就令球迷同埋管理層更加失望
搞到咁既田地與其話係因為太遲(第15場)先開齋
倒不如話佢地衰和波16場太多(亦係英冠最多)
但另一方面亦反映佢地其實好難輸
輸波少過佢地既球隊實情只得5隊
咁既球隊又邊似會降班

雷丁方面
麥達莫接手後11場攞15分只算係不過不失
不過球隊超過兩個月主場未輸過
佢地之後主場有7場波都係對中下游球隊
搶夠分數成功護級應該只係時間問題

其實如果每場聯賽都有足總盃羸利記既水準
佢地而家仲應該爭緊升班

錫週三方面
A.Irvine 接手後頭一個星期羸足3場袋9分
總括9場亦袋左15分
不過近況已見回落
再輸埋6分波俾葉士域治
加上餘下賽程偏向難踢
A.Irvine 最終會唔會虎頭蛇尾
隨時要睇埋煞科日主場鬥水晶宮既關鍵大戰

水晶宮方面
因為被接管而俾賽會扣10分已經夠大鑊
萬一降埋班就真係仆直
而關鍵可能係禾洛克既去留
萬一佢真係跳船去昆士伯流浪
近期3連敗既佢地可能死得仲快

至於普利茅夫以及彼德堡已經係降班膽
後者搞到咁管理層要負上好大責任
先係暑假俾費sir個仔過份換血換到出閘脫腳
到季中易帥又換個履歷更差既麥克葛甫
搞到隊波仲屎兼仲唔好睇
到水浸眼睸先搵到個似乎比較正常既加儂已經太遲

2010-2-23

近兩日既新聞......

1)
來自南非既財團可能於短期內落實入主樸茅
另有消息指現任香港老闆打算用家族基金
以及計埋之後既電視收入
為球會注資1000萬鎊
消息亦指球會已經做定兩手準備搵間信譽好既公司搞接管

而來自阿聯酋既舊班主法希姆就正式辭去非執行主席既職務
仲將手上餘下既1成股份轉讓俾球迷信託基金

2)
廣州醫藥同埋成都謝菲聯被降至中甲
中甲既青島海利豐就被取消註冊兼被罰20萬人仔

而另一中甲球隊南京有有就衰拖欠外援波糧而被罰款5萬人仔
兼且今季被減少1個外援名額

3)
英國稅局決定追查肖像權收入
消息指一眾英超球星每年逃稅金額可能高達1億鎊

4)
有消息指科特迪瓦足總打算搵名牌教練取代 V.Halilhodzic
消息指佢地想搵軒迪克客串幾個月
亦有傳聞指佢地考慮吉列斯
不過這名前馬賽教練聲稱已經拒絕科特迪瓦足總既斟酌

5)
彭路基因為家庭問題而決定掛靴

6)
大哨決定踢埋下季收山

7)
車路士落實羅致瑞典16歲中場阿芬尼
佢將於暑假正式報到
而有消息指車仔多數唔能夠安歷卡達成續約協議
所以準備再次嘗試收購韋拿

8)
卡拉斯域表明如果離開莫斯科中央陸軍
只會考慮加盟曼聯或者AC米蘭

9)
皇馬同埋巴塞都繼續搵新左閘
艾殊利高爾被指係佢地既頭號選擇
而皇馬亦再次同基治扯上關係
不過AC米蘭亦有一定興趣

10)
消息指中村俊輔即將以唔少於200萬鎊既價錢重返橫濱水手

11)
消息指尼日利亞足總想搵艾歷臣或者荷度接手
不過後者接手機會唔高
佢近兩年已經推左15個offer以專心發展旗下既青訓學校

12)
阿歷山大費爾因為斷手骨而要養傷8至10個星期

13)
幾段曼城既消息......

因為家庭問題而返阿根廷既泰維斯
被文仙尼勒令歸隊對車路士

而曼城被傳打算出價1億4000萬鎊一併收購謝拉特以及托利斯
佢地亦成為最新一間同班尼加扯上關係既球會

另一方面,佢地被傳同曼聯爭奪尼日利亞新星阿施斯
17歲既佢早前當選世少盃最佳中場
而家效力國內一間名為 Future Pro Academy 既訓練學院

14)
消息指卡比路準備徵召赫特參加對埃及既熱身賽
而艾朗連儂因為鼠蹊傷患而可能無緣世界盃

15)
國米落實下季從博洛尼亞回收龍門維維安奴
不過當時人表明唔想返國米以爭取出場機會

另一方面,摩連奴今個月內第二次被罰
佢今次對球証又串又鬧而被罰停賽3場兼罰款4萬歐元
同時甘比亞素以及蒙達利亦因為鬧球証而被罰停賽兩場
國米已經表明會上訴

16)
布力般流浪因為鄭大世既國籍問題而放棄羅致佢

17)
同蘭尼續約4年既曼聯再次同維路素扯上關係
費sir副手費蘭亦暗示佢係曼聯既羅致對象

18)
烏甸尼斯決定搵前教練馬連奴回巢執教

19)
熱刺落實以100萬鎊引入16歲贊比亞後衛麥保拉
雖然佢已經代表國家隊超過20次而唔難申請工作証
不過哈利列納下季仍然準備將佢外借

20)
布魯士因為早前批評球証而被罰款2500鎊

21)
曉頓指紐卡素冇考慮借用高馬斯
而西布朗就反而從韋根借用賓屈臣到季尾

22)
雲達不來梅希望同亨特續約
不過這名有英國血統既箭頭表態想去英超發展

p.s.:
樸茅CEO史杜利指球會而家咁唔掂係因為球員人工貴
不過更唔掂既可能係佢睇唔掂盤數
例如當年買烏達卡連轉會費兼合約既預算竟然高達2300萬鎊
如果冇一個肯狂放水既富豪老闆根本就係等死

2010-2-22

幾場波想講......

1) 愛華頓對曼聯

主隊青訓其實搞得唔錯
無論自家出品同埋中途加工都有一定質素

高士寧同埋魯迪維爾而家響晒朵
後者加上史摩寧可能已經係英格蘭無數球迷心目中既後防新希望
而佢既身價賽前已被定為3000萬鎊
就係怕曼聯繼朗尼後再次搶人

但條友質素明顯超班
踢中堅同埋防中都掂
仲要係有後上入球能力既英格蘭本土球員
紅魔,兵工廠同埋皇馬先後同佢扯上關係
除非佢係另一個拿鐵斯
否則離隊只係時間既問題

查實拖肥糖近年既優質新血仲包括
3名箭頭禾漢,安尼捷比,巴士達以及右閘高文
前兩者其實仲早出道
不過因為傷患問題而影響發展

而巴士達係破球會紀錄最年輕上陣既A隊球員
這名年青射手既質素應該有一定保證

至於高文其實攻守兼備
論助攻力一定好過菲臘仔同埋希拔
上位亦只係時間問題

2) 森林對米堡

森林順利破球會紀錄主場9連勝
不過過程絕對唔算好輕鬆
但亦總算有幸有不幸下羸波
而甘普就證明好龍門幫到球隊由和變羸

佢地而家最重要係盡快改善作客戰績
佢地上半季出閘脫腳都追得上前列
全靠英冠最強既作客不敗戰績
點知自從踩場羸西布朗3:1既代表作後
忽然作客連輸3場0:1
搞到而家連直接升班都危危乎

其實佢地既緊迫踢法真係好有水準
小弟主觀願望佢地壓倒西布朗直接升班

米堡方面
ck兄赤口仲話有一絲希望爭第2

但坦白講佢地對前列球隊多數腳軟
計埋今場同前8球隊踢左12場
戰績竟然只係1勝3和8負
當中只係入得5粒而失夠打半
莫講話直接升班
就算連附加賽資格都衰埋都唔抵可憐

不過隊波大換血後計牌面真係強左好多
至少史特根有針對球隊弱點而重點增兵
只要夾好默契
佢地應該有力趁亂勢而趕上附加賽尾班車

3) 布力般流浪對保頓

早前已經講過保頓最大隱憂在於防線冇左加利卡希爾
默契夾過固然大鑊
後防冇左個重心就仲攞命
查實上半季保頓都係因為佢而失少左好多波
可想而知佢地有謝斯基蘭倫走緊下坡
兼冇其他人信得過既防線有幾屎

4) 曼城對利物浦

雙方都踢得好保守
大家都少有威脅攻門
一場90分鐘既悶戰基本上冇咩睇頭可言
就算費托驚喜回歸兼後備落場
亦因為冇態,冇供應兼俾高賓尼睇死而行行企企

場波最令人有印象既應該係球証禾頓
條友成場波都吹得好鬆
所以艾加大動作推開艾迪巴約唔會輸12碼
而班拿約亦可能因為咁而冇借勢跌低屈12碼
不過近距離睇住馬仔故意從後踩傷巴利都唔罰就鬆得離譜

有時執法大戰或者關鍵比賽
球証唔想經常吹停比賽而影響雙方發揮
球員同埋旁觀者絕對唔難理解

不過適當時候運用口頭警告以及紅,黃牌
除左可以控制球員情緒以至比賽
亦係判斷邊個係頂級球証既參考

2010-2-21

近幾日既新聞......

1)
消息指香港投資公司 Endeavor Plan 有興趣入主樸茅
佢地除左肯幫球會交稅同埋還債
不過就要求俾多30日時間佢地

而早前樸茅要求英超賽會,英格蘭足總同埋國際足總
俾佢地破例賣人籌旗還債
不過有關要求已被拒絕

2)
雲加透露旗下有球員俾對手收買
不過佢拒絕進一步透露內情

另一方面,伊保爾雖然接連同巴塞以及費倫天拿扯上關係
不過佢表明想同兵工廠續約

3)
AC米蘭被傳想搵納比下季執教

4)
曼聯忽然同祖高爾扯上關係
而佢地被傳即將向哥連泰斯收購左閘杜度

而雖然蘇亞雷斯同阿積士落實續約
不過又有傳聞指佢地想出價3000萬鎊搶人

另一方面,維迪聲稱會留隊至2012年

5)
高馬斯為左爭取出場機會而準備以借用形式離開韋根
消息指紐卡素同埋西布朗都對佢好有興趣

6)
韋斯咸既英格蘭U-16進攻中場被指成為荷甲以及葡超球會既增兵對象
不過槌仔幫已經表明唔盡力挽留佢

7)
尼日利亞足總想搵查柏東尼接手

8)
卡路士伊度亞度表示如果賀芬賀下季冇歐洲賽踢就會離隊

9)
哥迪奧拿成為卡塔爾申辦2022年世界盃既大使
佢亦透露希望將來執教西班牙
另一方面,佢被傳想從樸茅引入比夏積以代替表演一般既艾比度

10)
皇馬忽然被傳準備向華倫西亞收購班尼加
而佢地宣佈暫時擱置同希古恩傾續約

另一方面,佢地被傳斟酌摩連奴接手
報導更指摩帥既合約列明只要700萬歐元就足以令國米放人

11)
橫濱水手將於短期內以借用形式引入中村俊輔

12)
而韋拉就落實停賽3場
加埋泰維斯因為家事而請假
都會缺席今晚對利物浦既6分波大戰

而比拿美被傳同文仙尼炒大鑊而被禁賽3個月
不過事件已經俾曼城高層擺平

13)
前阿仙奴副主席甸恩重出江湖
被委任為英格蘭申辦2018同埋2022世界盃委員會既主席

14)
國米準備從華斯高引入17歲巴西射手葛天奴

而莫斯科中央陸軍被指有意收購巴洛迪利
另一方面,馬干被指成為曼城4000萬歐元既新右閘人選

15)
拉素希望可以於3月前同梅斯拉達成續約協議
而由於希斯貝加只係同拉素簽約到季尾
熱刺被指之後想搵佢以自由身加盟

16)
維拉利爾準備從里昂收購巴西中場艾特臣
以取代季尾約滿離隊既皮利斯

17)
馬體會被傳打算收購卡華路

18)
卡利亞里前鋒馬特尼被傳成為祖雲達斯既羅致對象

19)
艾殊利高爾因為於比賽前帶女去球隊下榻既酒店搞搞震
而俾油王罰佢兩星期週薪

而油王已經落左 order
如果再有球員同埋職員被爆性醜聞
將會因為破壞球會形象而被重罰

20)
熱刺被指將於季尾放棄奧哈拉

21)
尼索比亞表態想代表英格蘭

22)
彼德泰萊接手巴拉福特到季尾

23)
布里亞托利宣布辭去昆士伯流浪主席
位置將會由 I.Saksena 接手

24)
蘇超肯定失去2011至12年球季既1個歐聯席位
事緣比利時既歐洲賽排名系數已超越蘇格蘭升至15位

p.s.:
近日球壇3件唔公平既事

一係英超賽會就狼隊早前放水輸波而罰佢地2萬5000鎊
但實情係從來冇人可以介定最強陣容既定義
而大把大球會亦因為歐洲賽而留力

二係體育仲裁法庭駁回多哥既上訴
依舊禁止佢地出席2012以及2014非洲國家盃

三係白禮達公開力撐錯完又錯既球証漢臣

2010-2-20

今日去左睇國際足球青年邀請賽
因為趕唔到早場而睇唔到祖國U-17
好在尾場都睇到蒙通聯U-17

佢地名義上係U-17
不過由於當今次賽事係球會選U-16既其中一個考試
所以到香港既球員頂多得15歲
佢地整體質素唔算好高
不過個別球員既腳下功夫唔差
而佢地為左留隊搏晒命踢
羸緊幾球都繼續前場緊迫

而最令小弟有印象既係佢地既龍門
佢成場都有高水準表現
而因為冇後備龍門
佢俾人踢親個頭都繼續頂硬上
幾分鐘後救既笠射仲係全場最精彩既撲救
完場後見佢仲摸住個頭
小弟都走後問候佢兼讚佢守得好

相反香港U-17 A隊就睇到人扯火
正選龍門好似黃大仙上身
上半場輸既3球都唔係一個正常龍門會輸既
而下半場入替既後備龍門失3球雖然都唔關佢事
不過超細粒既佢應付高波既水準就差到得人驚
好彩英雄輝應該仲有排踢
否則靠佢兩個真係大檸樂

而其他防守球員亦係睇到人頭擰擰
一對閘俾人話爆就爆
中間兩個又清唔到波
中場又只係行行企企佈防
見佢地迫都懶得迫
唔睇分牌仲以為佢地羸緊幾球
到最後15分鐘輸到3:6先勤力返15分鐘又有咩用

佢地陣中只有一對箭頭比較似樣
既然對手既4人防線實力一般兼經常掛住助攻
佢地大可以長傳俾對箭頭搵食
好過同班泰仔鬥搓波而自暴其短

而班友既態度就仲令人失望
之前3goal已經有人提過
香港班少爺兵仲怕凍過班泰仔
今日天氣已經略為回暖都仲係咁
有晒長袖打底衫都縮下縮下
唯一既解釋就係做熱身做得唔好

相反泰仔就可能資源有限連打底衫都冇
龍門仲要用另一個牌子既龍門褲
不過人地肯跑慶晒兼做足熱身先落場
這方面好值得班少爺兵同埋教練大雞學嘢

而班友嘻皮笑臉好似冇件事既態度就仲令人扯火
俾人連炒3日既B隊留低睇波
當中居然有人仲有心情掛住打PSP
教練司徙坐後佢一行居然又俾佢咁做

完場後A隊輸咁多又係嘻嘻哈哈好似冇所謂
個隊長仲笑晒口企定定俾人影佢相
成班友咁既態度真係好似等人同佢地開年
先唔講今次選人有冇滄海遺珠
但36個精英俾多少少鬥心肯定唔使場場都輸得咁肉酸

朝早睇明報有篇稿讚尹佬
話當年講腳法,速度,射術,領導能力都唔係佢既強項
最終出人頭地全靠拚勁搭夠
對比之下真係更令小弟懷念尹佬

2010-2-19

雖然過氣
但都係想講下近日既歐洲賽......

1) AC米蘭對曼聯

開波前意大利傳媒睇好近況回勇既細哨可以帶俾曼聯好多麻煩
不過佢地怕且唔記得主隊既防守隱憂

費 sir 上星期去吼路睇佢地對烏甸尼斯
見佢地應付傳中,盯人同埋佈越位都錯漏百出
真係掩住半邊咀笑
結果今場真係靠側擊已經完成任務
上半場史高斯追成平手既一球雖然超級符碌
不過下半場用華倫西亞同埋費查去屈機
就好似兜巴主張增兵頭重尾輕既老貝

AC米蘭又係唔抵爭
防守唔掂之餘亦唔識入波
亨特拉爾仲簡直係足球黑洞
細哨就算勇冠全場都救唔到全家
前面冇殺手,後面冇防守
絕對係佢地輸波既寫照

2) 里昂對皇馬

主隊今季主場踢歐聯既水準唔錯
今場靠死守同埋犯規已經立於不敗之地
穩守突擊仲中正對手死穴

皇馬一對防中做唔到防線屏障之餘
有時仲因為壓得太前而同後防有幾多空位
而柏歷堅奴眼見4-2-3-1陣式搓唔入
都遲遲唔變陣用多個箭頭踢簡單足球
又真係抵佢俾老闆插

3) 拜仁對費倫天拿

奧維保似乎有個特性鍾意吹死某一隊
佢判高比出場唔緊要
但對家高路斯出埋收山腳都可以唔使走就擺門雙重標準

而最離譜都係高路斯既入波
越位既幾個身位似係睇到都當睇唔到
不過奇就奇在今次有個旁證陪佢一齊黑哨

難為客隊球員以為可以趁拜仁埋門一腳唔掂
而踢少個都唔使輸

4) 波圖對阿仙奴

重點一定係快開罰球
先唔講係唔係雲加所講蘇甘保唔覺意腳指篤到個波
亦唔講全場發波瘟既法比安斯基又有冇輕輕控左一下先用手接
就當冇罰錯簡接自由球
佢都犯左兩個腦筋上錯誤

一係球例雖然有灰色地帶俾對手快開罰球
但咁既距離仲近過射12碼
莫非佢認為法比安斯基既過錯仲衰過禁區內侵犯對手

二係佢識得俾個波波圖球員偷襲既同時
偏偏唔醒水阻住蘇甘保回防

條友上次睇唔到亨利二段手球
小弟覺得佢係衰唔集中兼可能有視力障礙
今次又再短時間內兩度犯上腦筋上錯誤
加埋黑哨黑到出面既奧維保
歐洲足協同埋國際足協怕且要考慮
仲俾唔俾佢地於歐聯以及世界盃執法

另一方面,想講下法比安斯基
條友其實一早有歐聯經驗
冇經驗段估唔係佢甩手以及俾返個波對手快開罰球既合理解釋

佢應付傳中同埋高波既表現仲有待改善
不過整體質素唔差
希望佢唔好一沉不起

2010-2-18

近兩日既新聞......

1)
因為睇唔到亨利二段手球而醜名遠播既漢臣
以及上季涉嫌吹死車路士既奧維保
尋晚齊齊再有爭議性判決
令作客輸波既阿仙奴同埋費倫天拿怨聲載道

2)
軒迪克將會同土耳其足總簽約4年
當中生約同埋死約各兩年
英國傳媒估計佢既年薪高達325萬鎊

3)
油王身價被指勁升22%至108億鎊
英國傳媒隨即指佢撥款7000萬鎊俾車仔解決球員老化問題
阿古路,柏圖,迪馬利亞,迪羅斯,舒韋恩史迪加,咸錫同埋蘇保迪
都再次同佢地扯上關係

4)
阿祖安奴放風有興趣下季轉投羅馬
不過對方已經表明冇興趣羅致佢

5)
樸茅已向高院呈交財務報告

6)
AC米蘭再次被指打算以亨特拉爾作為羅致維迪既交易條件
而佢地準備向艾美利亞收購巴西龍門迪亞高艾維斯

7)
韋拉因為對史篤城既時候用撩陰腳偷襲韋倫
而被足總抽後算帳

而佢既隊友布歷治就因為勾義嫂事件
而得到英超賽會破例可以於月尾既比賽唔同泰利握手

8)
贊卡宣佈季尾掛靴

9)
巴塞令人意外咁被傳有興趣羅致今季提早收咧既奧沙

10)
伯明翰準備同麥利殊續約
而佢地透露已同曼城達成協議下季續借祖赫特

11)
曼城再次同派拿扯上關係
而拜仁亦被指有興趣搶人
不過這名南非進攻中場表明準備同愛華頓續約

12)
保頓再次被指有興趣收購查理斯阿當
不過當時人已經表明樂意留隊
(但季尾似乎會係另一個故仔?!)

p.s.:
近日 'Cashy Cole' 被傳 send 裸照溝女
又搵女網友去球隊住既酒店搞三搞四
其實本地球員都有人用類似招數

話說小弟早兩年識得個當時18歲卜卜趣既細路女
有個本地球星問其他 fans 查到佢既聯絡方法
先係 send 張自拍既'性感相'俾個女仔
赤裸上身兼 hard sell 辛康納利咁既胸毛
跟手仲趁去澳門踢太公波而叫個女仔搭船過去陪佢
俾佢嚇親既細路女梗係理佢都傻
跟手再 delete 埋張核突相

最搞笑既係之後旺角場再遇
條衰公同老婆一齊
驚到眼尾都唔敢望個女仔

條衰公係邊個?
今次易估好多:
一個今日俾記者形容為專一,錫老婆,準備落地生根既鬼佬

2010-2-17

英超新一期小結......

雖然車路士冇左艾殊利高爾
不過只要佢地防線發少幾次波瘟
依然會係小弟既冠軍首選

車仔過左非洲國家盃賽期都仲可以 lead 住曼聯
雖然而家只係多1分
不過總算捱過全季最艱難既日子

佢地雖然平均年齡大過曼聯3年
不過幾近夫添既人腳就有利肥安調動

而佢地今季踢大波既水準有保證
就算賽程比曼聯難踢都唔係太大問題

而最關鍵既係車仔雖然入球分佈冇曼聯咁廣
不過中前場亦唔算特別倚重某一個球員

事緣肥安自季初已經俾幾個中場試踢唔同位置
而馬路達近日有機會踢返最擅長既進攻中場
以及祖高爾慢慢上力都係原因之一
就算杜奧巴死火
車仔仲可以靠林伯特同埋馬路達入波
不過如果連安歷卡既表現都有進步就最好

相反自傑斯開始冇貨交(而家仲跛埋隻手!)
曼聯其實超靠朗尼既表現
華倫西亞同埋蘭尼只係忽然有好表現
唔算係可靠既輸血管兼第二得分點

而曼聯中場截擊最可靠既只得一個費查
相反波歷克做多左防守同埋米基爾表現有進步
令車仔就算冇左艾辛都冇咁驚
加上紅魔鬼條防線唔算得比車仔信得過
只要朗尼同埋費查有咩冬瓜豆腐
曼聯就隨時收皮

另一點要留意既係
當年曼聯冇左簡東拿同埋碧咸之後既球季都衛冕英超失敗
或多或少反映費sir要時間調整陣容
而今季曼聯一下子冇晒C7同埋泰維斯
影響應該更大

阿仙奴方面
佢地雖然只係失多車仔6分
不過觀乎佢地次次打老虎都腳軟
以及後防冇可靠替補
佢地只係似隻俾人槍斃左既攔路虎
一席季軍應該係佢地既合理成績

而利物浦就只有死守前4
而曼城就係最強挑戰者
利記因為失多4分而形勢不妙
不過由於賓尼迪斯既功力點都稱羸文仙尼
而歐霸盃既負擔又只係重過足總盃少少
利記依然有條件後上
佢地之後作客曼城將會好關鍵

而熱刺同埋維拉就唔似可以入到前4
前者戰績多年來停滯不前
同佢地失敗既增兵政策有關
而後者既跑狗踢法雖然已比上季有所調整
但以目前既板凳深度依然唔足以應付整季英超

哈利列納同埋奧尼爾而家可能心大心細
如果全力搏前4
就算搏唔到都可能仲有第5踢歐霸
甚至可能因為曼聯羸左聯賽盃而令排第6都有得踢歐霸
但如果全力搏盃仔(維拉仲要搏兩個盃)但搏唔到
隨時因為聯賽戰績下滑而渣都冇

而伯明翰現時排第8
主因係佢地現時英超失波第3少既防守以及麥利殊有料到
不過佢地班波已有少少疲態兼攻力不足
加上麥利殊亦可能收到 order 去專攻足總盃
佢地最終可能被愛華頓,富咸,布力般流浪同埋史篤城趕過
不過暴力幫以外既幾隊同樣有盃賽負擔
就會係影響最終排名既變數

另一方面,以對上8季作為參考指標
護級成功平均至少要有38分
但由於近兩季起戰情比較激烈
護級成功既侯城同埋富咸最終只係分別有35分同埋36分
小弟估計今季隨時有36分就可以上岸

新特蘭同埋韋斯咸現時排名差過眾人預期算係各有前因
不過計整體實力同埋領隊功力始終唔太憂降班
對蘇拿而言
新老闆講金唔講心既作風應該仲煩過護級

真正既護級組應該係榜尾6隊:

狼隊方面
放走幾件都依然有人滿之患固然大鑊
不過因為冇高質收購而整體質素繼續偏低就更大鑊
麥卡菲似乎唯有繼續選擇性搶分
主場對到時踢緊風流波既布力般流浪以及史篤城一定係重點
不過4場最主要既護級6分波大戰全數作客就令佢地好不利
而現時只入21球既攻力亦令人好難放心

韋根方面
中前場係有組織能力
不過唔識入波都係冇用
後防仲可能因為冇左布魯士而嚴重走樣
馬天尼斯1月增兵結果亦以龍門,中堅同埋射手為主要目標
幾件新兵隨時決定佢地既命運

侯城方面
菲臘布朗增兵繼續有前無後
條友只係外型有摩連奴咁型
上季唔使降班怕且只係時辰未到

而要注意以上3隊餘下賽程比較惡哽
如果韋根最終逃出生天
可能羸在增兵方向正確

般尼方面
可能因為限米煮限飯
最重要既增兵亦只係續借紐根特
白賴仁羅斯接手後唯有偏向原陣靠默契搶分
這方面值得哈利列納以及其他熱刺高層借鏡

佢地易帥後兩度主場出擊都繼續有水準表現
佢地既關鍵時刻應該係由而家到3月尾
因為之後主場對樸茅,史篤城,狼隊以及布力般流浪一旦全勝
已經幾近上岸

保頓方面
奧雲高尼接手後球隊只得4分而跌到尾二
不過表現其實明顯好轉
攞唔到分只因冇運同埋近期對手太多強隊
但亦反映佢地餘下賽程比較易踢

而1月以借用形式加盟既兩個小朋友有力成為奇兵
加埋李青龍仲令保頓中前場多左好多活力
就算艾文達長期死火都依然有一定火力
可惜而家又有加利卡希爾因傷提早收咧
一條默契稍有改善既防線又要從頭夾過就成為隱憂

樸茅方面
同尾4既8分差距唔能夠完全反映佢地既真正實力
雖然佢地既攻力全英超最差
但輸17場波其實有8場只輸1球
講戰鬥力唔差得過虎同狼好多

不過而家財困問題越來越嚴重
隊波根本散晒
一旦破產之後被扣9分就更會提早玩完

2010-2-16

近幾日既新聞......

1)
國際足協修例
如果防守一方阻礙對手進攻而被罰12碼
犯規球員將會被罰黃牌而唔會俾球証直接趕出場

2)
軒迪克宣佈6月約滿後唔再執教俄羅斯
祖雲達斯,利物浦,車路士,海倫芬,
尼日利亞,科特迪瓦同埋土耳其都同佢扯上關係

而土耳其傳媒就言之鑿鑿話軒迪克將會接手土耳其

3)
英超賽會想更改賽制
4至7名將要踢附加賽爭奪最後1個歐聯席位
不過消息指由於支持既球會唔多
所以最終好難成事

4)
艾歷臣亦被傳有興趣接手利物浦
而佢既經理人透露有3隊國家隊以及一間球會都想搵佢接手

5)
有傳聞指如果利物浦下屆冇份踢歐聯
全體球員可能要減薪5%

另一方面,班拿約應可趕及下場鬥曼城
不過托利斯仍然未有明確既復出時間表

6)
車路士被指準備出價900萬鎊收購史堤芬泰萊
而阿歷士就被傳成為拜仁既新中堅人選

7)
尼斯達表示會同納比傾復出既可能性

8)
以色列足總想搵奇連士文或者蘇斯達接手

9)
樸茅既欠稅案件將於1/3再舉行聆訊
而英超賽會考慮預支轉播費去代樸茅交稅

另一方面,有消息指前老闆法希姆想撲水搞回購

10)
查馬克落實以5萬鎊週薪既條件加盟阿仙奴

11)
多哥足總正式向國際體育法庭提出上訴
希望推翻非洲足協罰禁止佢地參加未來兩屆非國盃既決定

12)
幾段曼城既消息......

佢地被指打算向文仙尼開出年薪300萬鎊既3年合約
而合約亦包括300萬鎊既解僱賠償

而泰維斯因為未婚妻臨盆出現問題而獲准無限期放假
佢應該會缺席對利記既6分波大戰

而1名曼聯球迷涉嫌襲擊比拿美
不過佢最終決定唔提出控訴

13)
幾段曼聯既消息......

Seymour Pierce 主席K.夏里斯表示只要格拉沙肯放盤
佢可以於季尾前搵到財團集資接貨

而曼聯再次同賓施馬扯上關係

至於維迪依然受到腳部神經痛症困擾
仍未有確實既復出日期

而有報導指佢由於經常於練波對年青球員有過火攔截
令佢於隊中犯眾憎
因而令佢於季尾轉投曼城或者皇馬既傳聞再現

另一方面,雲達沙準備再續約1年

14)
西班牙傳媒報導簡拿利斯既轉會費只係超筍價450萬歐元

15)
董方卓近日去左華沙軍團試腳

16)
愛華頓將魯迪維爾既身價定為3000萬鎊
以令曼聯以及阿仙奴知難而退

而莫耶斯透露有意收購賓菲加射手卡度素

17)
Cheryl 終於頂唔順艾殊利高爾成日滾而嗌離婚

p.s.:
雖然港隊創左決賽週歷來最差戰績
不過表現真係開始有進步
對中國一場仲俾人睇到有少少組織能力

不過最大進步一定係體力
體力向來係足球(其實應該係任何運動!)既基本
技術,戰術同埋意識幾方面輸晒唯有慢慢追
至少而家可以跑得郁去盡量緊迫對手

2010-2-13

近幾日既新聞......

1)
皇馬宣佈落實從桑坦德引入簡拿利斯
6年合約將由今年7月開始生效
不過皇馬就冇透露轉會費詳情

2)
利物浦被指已從莫斯科中央陸軍以1200萬鎊引入塞爾維亞翼鋒卡拉斯域
不過當時人已經否認有關報導
仲串利記根本負擔唔起佢既轉會費
而佢亦暗示想加盟更大規模既球會

3)
法比加斯否認已同巴塞有口頭協議於暑假回巢

4)
昆士伯流浪被指想搵馬圖斯接手

5)
艾歷臣於諾士郡易主後決定劈炮唔做總監
但就會繼續做名譽主席
而佢亦被指有興趣接手尼日利亞

6)
祖雲達斯被指有興趣出價3000萬羅致希古恩

7)
同亨利再次扯上關係既紐約紅牛被指己向魯爾斟酌
亦有消息指洛杉磯銀河都想引入這名過氣金童
不過皇馬既喉舌報馬卡報就指魯爾即將落實加盟紐約紅牛

8)
祖高爾透過經理人放風表示佢唔排除轉投AC米蘭

9)
幾單球員受傷既消息......

艾沙雲,桑治同埋拿斯尼都受輕傷
當中前兩者都可能唔未能於歐聯16強首回合候命

傑斯因為右手骨折而要抖4星期

而更大鑊既有艾栗利高爾因為腳踭骨裂而要養傷3個月
不過消息指佢應該仲可以趕及踢世界盃

而同樣今季內唔可以為球會出賽既有迪拉彭拿
佢因為膝傷提早收咧

10)
文仙尼透露布歷治願意接收英格蘭徵召

11)
格蘭因為上場波賽後批評球證而俾足總控告行為失當
而樸茅落實同 D.杜鍚簽約18個月
這名塞爾維亞後衛上個月被雲達不來梅放棄

12)
紐卡素被傳重返英超後回購巴布爾
而維度卡拒絕墨爾本核心既斟酌後決定掛靴

13)
日本足總被傳想再搵中風後康復既奧禪取代岡田
而愛斯賓奴可能將中村俊輔外借返 J-League

14)
巴塞隆拿終於落實同謝法倫續約至2012年

p.s.:
1)
泰利早前被傳滾希拉里奧老婆
而家最新版本係原來佢搵埋有歷治條女
同希拉里奧兩公婆玩4P

而要提早收咧既艾殊利高爾都好頭痕
事關佢被踢爆將裸照 send 俾一個性感模特兒

2)
細哨回勇交出3個助攻
真係似向鄧加示威?!

3)
繼皇馬8/8去鳥巢踢表演賽後
巴塞亦落實同日去上海掘金
都唔知去睇邊場好?

4)
新年快樂!

2010-2-11

兩場波想講:

中國對南韓

南韓既踢法同上場炒香港冇咩分別
上場可以羸5蛋大抵係香港既低質防線再次發波瘟
查實南韓仔傾向高空轟炸同埋長傳
只要防守一方有一定質素兼夠集中
要力保不失唔難
加上中國早段已經先開紀錄
打亂晒南韓既部署

中國上場龜縮頂得住日本
南韓平均技術同埋創造力及唔上日本
要破密集就更難
結果壓晒上去仲俾中國大把空位打突擊

不過只係一次炒人3蛋就話國足已經克服恐韓症
未免太過樂觀

高洪波接手後試圖為國足增加技術成份
不過效果一直未如理想
而家就算連續兩場靠擦鞋仔波偷雞
都唔可以就此幻想大國掘起

更加要留意既係今次賽事雖然雙方幾乎冇晒外流球員
不過南韓既外流球員實力明顯比較高
亦即係話今場波唔可以反映雙方真正實力既分野

前國腳'雪山飛狐'高峰講得好
中國至少要做到多年食得住南韓
先可以話超越南韓

下場波中國只要羸到香港就有望捧盃
不過下場中國要主攻
冇幾多空位俾佢地發揮速度
假設香港冇放水
國足只有身體質素方面有明顯優勢
就算最終有得羸都未必羸得精彩
反而可能成為香港輸波但羸得最多掌聲既一場

2) 阿仙奴對利物浦

賓尼迪斯同埋謝拉特賽前已經講明會抄橋爆廠
不過都要有本錢抄先會有運行

麥斯洛迪古斯同埋古積特兩邊鬥沉
前者要踢唔熟識既左路
結果好多時入中路搵波踢
後者冇速度冇腳法
放生左兵工廠左路既一大缺口
加上謝拉特輪流受制於迪亞比以及桑治
發揮亦只係一般
結果質素平平既尼哥治於前線得個走字
就算有個好機會又係俾加拿斯補到鑊

而雲加同班球員蠢左兩次
冇之前俾咁多空位利記之餘
仲用多左犯規阻止對手
不過佢地今場幾個攻擊主力既發揮只係一般
結果下半場中段前既戰局都算沉悶

利記今場有史基泰爾復出
其實後防整體表現唔錯
最終輸波都只係衰後備入替既菲膿迪根
條友有意識移入中路但冇意識睇人
難怪賓尼迪斯之前寧願用加歷查打閘都唔用佢

不過話說回頭
迪亞比入波前其實係攻擊起點
中場冇人回防睇佢又係抵鬧

場波輸左或多或少因為冇運
因為就算唔計巴布勁射中楣
而4個爭議12碼利記佔3個但都係攞唔到著數

多得車仔同埋曼聯失分
雲加賽後意氣風發話爭標未絕望
不過睇佢地近期既表現始終似攔路虎多過爭標份子
聯賽始終似係兩頭馬車格局

p.s.:
祝香港好運

2010-2-10

1)
英國稅局決定俾多7日樸茅撲水收拾殘局

2)
傳聞沙地阿拉伯同埋美國都有買家想入股利物浦
不過用1億鎊收購40％股份既出價唔似會成事

另一方面,賓尼迪斯承認好難引入查馬克
佢被指最快後日以5萬鎊週薪既條件同阿仙奴簽約
不過佢就澄清仲未落實轉會

不過米蘭祖雲奴域落實下季以自由身加盟利記
雙方簽約3年
算係執唔到橙都執返個桔

3)
AC米蘭被傳打算用施多夫同埋亨特拉爾
再加現金去收購羅賓奴

4)
巴塞同埋西維爾都被指有興趣羅致保基拉
而有消息指前者已經同法比加斯達成加盟既口頭協議

5)
馬勒當拿表明唔會重召列基美返國家隊

6)
施仙奴落實以借用形式重返母會聖保羅到季尾

7)
拉素決定解僱教練巴拿甸尼
由前拿玻里教練列查接手

8)
尼日利亞亦被指想搵薩克達接手

9)
泰摩斯卓克早前被指因為冇出場機會而希望離隊
不過佢而家因為家庭理由而表態唔會走

10)
蘇拿炮轟老闆冇同佢地溝通就公佈全體減薪

p.s.:
1)
尋日只係講加斯居尼衰左醉酒駕駛
點知原來佢之後再因為醉酒搞事而連續兩日俾人拉上差館
病死同埋入冊唔知邊樣會發生0係佢身上先

2)
終於克服持續32年既恐韓症......

2010-2-9

近兩日既新聞......

1)
報導指兩名印度富商 M.Ambani 以及 Subrata Roy 都有興趣入主利物浦
當今全球第7大富豪既前者隨即發聲明否認
而後者就拒絕作出任何評論

2)
2012歐國外分組抽籤結果:
第1組:
德國,土耳其,奧地利,比利時,哈薩克以及阿塞拜疆
第2組:
俄羅斯,斯洛伐克,愛爾蘭,馬其頓,阿美尼亞以及安道爾
第3組
意大利,塞爾維亞,北愛爾蘭,愛沙尼亞,斯洛文尼亞同埋法羅群島
第4組
法國,羅馬尼亞,波斯尼亞,白俄羅斯,阿爾巴尼亞以及盧森堡
第5組
荷蘭,匈牙利,瑞典,芬蘭,摩爾多瓦同埋聖馬力諾
第6組
克羅地亞,希臘,以色列,拉脫維亞,格魯吉亞以及馬耳他
第7組
英格蘭,瑞士,保加利亞,威爾斯以及黑山
第8組
葡萄牙,丹麥,挪威,塞浦路斯同埋冰島
第9組
西班牙,捷克,蘇格蘭,立陶宛以及列支敦士登

唔計主辦國波蘭以及烏克蘭
9隊小組首名以及1隊最佳次名直接晉身決賽周
其餘8支次名球隊踢主客兩回合附加賽
勝方亦可趕上尾班車踢決賽周

3)
內地中央電視台臨時取消轉播東亞足球錦標賽
連相關新聞亦冇報導
更有傳聞指央視將會全面封鎖中國足球
包括放棄轉播中超以及亞冠盃

而有傳聞指亦可能同假波案有關
更話之後會有更多人被捕

另一方面,于洪臣接任足球管理中心副主任
主力管理中超

4)
鄧加再次唔選細哨入國家隊
仲暗示佢既腹稿唔包括佢

5)
卡比路被傳計劃同時徵召泰利以及布歷治參加對埃及既友賽

6)
皇馬被傳想用卡卡
向祖雲達斯交換基亞連尼同埋迪亞高
不過後者已經表明唔會離隊

7)
樸茅方面已經派左律師同稅局方面聯絡
要求更多時間搵新老闆去還750萬鎊欠稅
佢地希望可以先俾180萬鎊以令稅局押後做嘢

而有兩至三個財團有興趣接手成為球會今季第5個老闆
當中以一個愛爾蘭同埋美國合資既財團最大機會

8)
尼日利亞足總聲稱軒迪克有興趣接手

9)
英國傳媒指摩連奴準備於暑假以550萬鎊為自己贖身
以重返英超教波
報導指利物浦以及曼城都有興趣搵佢接手

而後者同時被指依然同軒迪克保持聯絡
亦可能於季尾搵佢接手

10)
加利卡希爾日前被驗出手臂腫脹出現血凝塊
要立即接受治理而好可能提早收咧
佢亦好可能因而緣盡世界盃決賽週

11)
加斯居尼因為醉酒駕駛被捕
經查問後獲准保釋

12)
而佢既後輩卡路爾就因為早前於夜總會打人
而被正式落案告佢襲擊罪

另一方面,史篤城既富拿亦因類似情況而被警方拘捕

13)
曼聯被指有興趣羅致魯迪維爾以及伊度比兩名年青球員

前者已經唔止一次同曼聯扯上關係
這名可踢防中以及中堅既18歲英格蘭球員同時係阿仙奴既增兵對象

而後者現時效力巴拉圭甲組球會波坦奴
16歲既佢可踢進攻中場同埋前鋒
皇馬,羅馬,拉素以及熱刺都對佢好有興趣

14)
一名30歲布力般流浪球迷於睇波期間
被發現頭部受傷昏迷
送院搶救後延至尋日凌晨不治
英國警方拘留一名25歲男子協助調查
由於事發地點唔係史篤城既球迷專區
一般相信同主隊無關

15)
查馬克表明心跡想加盟阿仙奴多過加盟利物浦
而雲佩斯鐵定4月復出

16)
里奧費甸南拒絕為加監上訴
以確保可以於聯賽盃決賽上陣

17)
消息指山東魯能向拖連奴既前意大利國腳艾莫戴安拿展開斟酌

18)
貝寧教練杜素耶成為第3個於非洲國家盃後下台既教練
佢既技術團隊亦同時被提早解約
不過特別既係貝寧足總決定解散埋成隊國家隊

19)
阿聯酋航空將贊助AC米蘭4季
合約總值5000萬歐元

20)
紐卡素將小路亞路亞外借到白禮頓1個月

21)
拿玻里再次同阿祖安奴扯上關係
而21歲中堅W.蘇沙亦可能同時加盟

22)
韋斯咸要求職球員於季尾開始集體減薪以慳返6000萬鎊
而再有傳聞指佢地可能會出售厄遜俾利物浦套現

23)
頭骨受創既捷禾奇跡咁只係用左34日就恢復訓練

p.s.:
接連主場對冇份踢決賽週既委內瑞拉同埋中國都冇波入
再有下台壓力既岡田武史已經改口風話會當香港係老虎咁打

上年10月日本主場炒香港6蛋
小弟聽過一個由林嘉瑋透露既版本
話說主隊因為上半場只羸兩球而疑似半場俾高層狂小
結果下半場一開波就發癲咁迫到香港球員連波都控唔掂

由此推斷可能有陳七連續兩場缺陣既香港後日會超難捱

2010-2-8 (2)

講返幾日前 sammysir 問既轉播費合約......

先講英超
上年已經落實由下季起連續3季既本土轉播權
價值接近18億鎊
而最近亦落實價值10億鎊既3年海外轉播權合約
成交價增幅高達5成半
兩張厚約就令一席英超至少值5000萬鎊

而英冠既本土轉播權合約由今季開始
3季只係共值2億6400萬鎊
可想而知英冠球會有幾窮
而海外轉播權應該另計
不過小弟就搵唔到詳細資料

西甲方面
每間球會獨立出售轉播權俾當地兩大財團
不過小弟就 check 唔到兩大財團最終將整個西甲轉播權加埋賣到幾錢

皇馬每年大約分到有1億5000萬歐元
巴塞亦有唔少於1億1600萬歐元
不過其餘18間西甲球會加埋都分唔到6000萬歐元
難怪當年西維爾曾經有段時間寧願唔賣轉播權

值得一提既係由於兩大豪門既人氣越來越勁
皇馬同埋6冠王巴塞之後再續約既叫價亦只會係天價

意甲同西甲既情況類似
現時每年轉播權估計總值5億鎊
不過兩間米蘭市球會同埋祖雲達斯都各佔超過1成半
加上費倫天拿以及羅馬都有一定叫座力
大約都估到其餘球隊分得幾少
基爾禾上季就只係收到400萬鎊
而06-07年球季泰列維素既轉播收入仲竟然同祖記相差6600萬歐元

不過意甲可能變天
事緣好多小球會聯合超立搞革命
最終意甲球會聯合起來打算效法英超成立意超
由賽會統一代理電視轉播權
從而提升議價能力
雖然大牌球會仍然會因為轉播場數比較多而收入較多
但中小型球會既收入至少可以得到保障
意甲亦可以唔使再接濟零電視轉播收入既意乙

法甲方面
雖然本地唔多球迷注意
不過原來法甲每季既轉播費都值6億6800萬歐元
早幾年仲有段時間貴過英超
真係估佢唔到

德甲方面
而家就係連埋德乙一齊賣轉播權
不過加埋只係賣到每年4億1200萬歐元
可想而知德國球會點解冇錢買人
而合約有一特點係網上直播收入係 variable

值得一提既係德國球會近年於財務管理方面有改善
所以就算收入唔高
不過財務狀況都比好多英超球會好
值得歐洲各地球會借鏡

2010-2-8 (1)

過去兩日既英超大戰同埋東亞足球錦標賽
正正係如有雷同,實屬巧合既好例子

有時要羸波
鬥志同埋體能比技術更加重要
利物浦面對回勇既愛華頓展長時間踢少個
都可以踢得好過對手
關鍵一定係鬥志搭夠而唔係羸整體質素

又睇下中國賽前俾當地傳媒,甚至崗田武史睇小
落場果然輸晒技術同埋戰術
想表現重返亞洲一線既時間表
應該同香港有普選一樣只有'聰明人'先睇得到
最終都可以靠身體質素以及鬥志證明唔係東亞病夫

另一方面,羸波建基於防守
一定唔止係羸NBA既關鍵

睇下香港輸晒默契,戰術,體能同埋速度
對住人蔘國仲要發埋波瘟
俾對手靠簡單高波以及長傳已經足以叫糊
聞屎忽同埋李雙中仲簡直係屎上最強

又睇下兵工廠上場輸得咁樣衰
今場對住魔獸都可以再次犯上初中生防守失誤

就知香港軒迪克所講既一勝二和目標
以及雲加既英超美夢
原來真係一場夢

2010-2-7

1)
消息指卡比路唔俾泰利做隊長有兩大原因
一係要保護佢唔好因為繼續做隊長而俾傳媒插得仲勁
二係對英格蘭代表隊既影響
而有分析指如果卡比路發現泰利入選對球隊有負面影響
仲會索性唔選佢入國家隊

另一方面,有分析指泰利將於未來幾年冇左2000萬鎊贊助
而勾義嫂醜聞女主角最終決定唔爆料
有報導指係因為泰利俾左40萬鎊掩口費

2)
傳聞馬甸尼已經同紐約紅牛達成合作協議
下季將會復出轉戰美職聯
而同時加盟既可能仲有亨利

3)
利物浦以及維拉都被指睇中紐維爾舊生隊既阿根廷射手保賀斯恩
消息指佢既身價約值500萬歐元

而AC米蘭,祖雲達斯以及華倫西亞再次被指同利記爭奪祖雲奴域

另一方面,川迪正式從利記買斷 N.米哈路域

4)
消息指油王準備於季尾撥款2億鎊去羅致阿古路以及列貝利
當中轉會費以及人工各佔5成
而奧歷暗示列貝利將會離隊

而車仔亦再次被傳同曼城爭奪蘇保迪
一般相信佢將於暑假以超過2000萬鎊既轉會費離隊

5)
睇唔到亨利二段手球既 M.漢臣
居然入選南非世界盃既30人球証名單

6)
艾沙維於對車仔既生死戰前公開批評雲加
既話唔應該派佢踢正箭頭
又話教授1月唔搵高質素及時雨幫補前線火力

7)
國米被指想出價1800萬歐元向巴勒莫收購阿根廷進攻中場柏斯杜爾

8)
尼日利亞足總決定同教練 S.Amodu 解約

9)
維迪既經理人澄清從未同AC米蘭有任何接觸

10)
文仙尼承認對巴洛迪利好有興趣

11)
沙夏落實同愛華頓續約兩年
粉碎佢離隊他投既傳聞

12)
祖雲達斯被指將於暑假引入多一名左閘
人選包括戴倫特,高拉洛夫,巴里以及費倫巴治既A.山度士

13)
現時以借用形式效力米堡既奧斯邦尼
之後可能會被維拉再外借到昆士伯流浪

而前阿仙奴以及富咸右閘禾斯正於昆士柏流浪跟操
消息指雙方即將落實簽約到季尾

14)
基士文近日同辛尼特提前終止借用合約後
返回巴黎聖日耳門報到後表示希望留隊
不過有傳聞指佢考慮同球會解約後以自由身轉戰英超或者意甲

2010-2-6

1)
最新亦應該係最後既版本係:
卡比路向泰利表明想換隊長
一般相信里奧費甸南將會接任
而謝拉特就會升為副隊長

而佢被指滾左現役隊友希拉里奧既老婆
以及同另一名模有路

另外,艾殊利高爾亦同勾義嫂醜聞女主角扯上關係

2)
繼續係泰利既衰嘢
佢再次被指以權謀私
佢以4000鎊賤價分租名下12個包廂睇波好位
仲加送親筆簽名波衫
包廂係佢做隊長既福利
但條例早已列明唔俾分租

3)
列貝利將於3月尾前交代去留

4)
曼城被傳將於暑假向奧林比亞高斯出價收購杜路斯迪斯
這名身價700萬歐元既希臘右閘亦可以客串防中
利身畈4,新特蘭同埋布力般流浪早前都佢扯上關係

另一方面,曼城仲未同馬田柏度夫達成續約協議
傳聞熱刺想乘機搶人

5)
拉爾拿再次表明唔會離開利物浦

6)
安德魯莊臣因膝傷提早收咧

p.s.:
尋晚紐記主場搞新兵巡禮
出晒5件新兵踢正選
羸波羸運既情況下大炒卡迪夫城五個一皮
真係恭喜賀喜
最可惜既係偏偏電視冇得播

2010-2-5

1)
泰利被傳滾左另一名英超球星既老婆

而佢將於今日同卡比路會面
不過分析指卡比路唔會於星期日前公佈決定
因為佢可能會等埋醜聞女主角仲有冇料爆
甚至等埋傳媒幫手挖多啲料

而有消息指佢仲想遊說布歷治同泰利一齊於國家隊合作

另一方面,醜聞女主角否認曾經同梅度有路
不過佢就同杜奧巴同埋迪西里扯上關係
但兩個當時人隨即發表聲明否認

有報導指車路士為左擺平朗斯
不惜為羅致古卡達而俾佢地260萬鎊賠償

2)
報導指希斯可能賣走旗下冰球隊套現

由於利物浦必須於7月前還債1億鎊
若果兩個美國老闆撲唔到水
將要被迫出售利記

3)
幾段曼聯既新聞......

有報導指一旦祖雲達斯攞唔到歐聯資格
保方將會要求離隊
而奧脫福正係佢既出路

而紅魔鬼被指同巴塞隆拿以及阿仙奴爭奪毛罕納德施丹

另外,安達臣已被費sir貶到預備組跟操以及出賽

另一方面,AC米蘭被指用亨特拉爾作為收購維迪既交易條件

4)
文仙尼表示加高係球隊暑假既增兵對象

5)
占士表態願意減人工同樸茅續約

6)
李偉峰透露為左報答車範根
而拒絕沙地一間球會4倍人工既斟酌

p.s.:
英超於當地最新海外轉播權合約價值高達10億鎊
每間英超將會獲分5000萬鎊
不過如果佢地繼續於球員買賣以及薪酬方面不惜工本
有幾多收入都有收皮既一日

只得伯明翰以及狼隊兩間球會冇欠債紀錄
反映英超可能會有泡沫下場

2010-2-4

(因為技術問題而遲左交功課,請見諒!)

近兩日既新聞......

1)
先講泰利
消息指卡比路會問佢肯唔肯主動交出隊長臂章
如果佢唔肯就要考慮佢既心理狀況先再作最終決定
不過有報導指佢決定唔做隊長

而泰利可能避戰足總盃賽事
以飛去杜拜搵老婆補鑊
不過佢老婆已經表明會原諒條賤精

另一方面,泰利近日俾傳媒將佢歷年來偷食既女主角全部起底
而勾義嫂醜聞女主角被起底
先後同其他3至4名現役或前度車仔球星有性關係

當中包括梅度同埋古莊臣
不過佢兩個都唔算勾義嫂
事關日期分別係03以及04年

而傳聞林伯特,杜夫以及柏加都可能係最後一名襟兄弟

2)
幾段樸茅既新聞......

香港既印度裔商人 B.Chainrai 於季初以旗下公司 Portpin 既名義
借左1700萬鎊俾樸茅
佢而家決定接受法拉積以球隊9成股份抵債
以保障公司有嘢揸手
佢亦因而表明會將樸茅繼續交俾史杜利打理
兼繼續為球隊搵今季第5名班主

另外,朗斯因為仲未收到迪丹尼既轉會費
而可能將佢強制回收兼賣去其他英超球會
伯明翰,狼隊以及布力般流浪都被傳有興趣接貨

而前熱刺中堅列卡度洛查以自由身簽約到季尾

另一方面,由於有法院拒絕泰利申請禁制令既案例
傳聞亦可以開名報導上個月既英超領隊嫖妓醜聞
而消息指當時人正係格蘭

3)
蘇格蘭皇家銀行要求利物浦於7月前先還1億鎊
先肯俾佢地延長總數2億3700萬鎊貸款既還款期

而利記被指同米蘭祖雲奴域簽左協議書下季以自由身加盟
不過佢既經理人已經否認有關報導
而佢地亦被指之後會向查馬克埋手

4)
就非法斟酌卡古達一案
車路士獲瑞士體育仲裁法庭判決上訴得值

另一方面,迪高透露將於世界盃後退出葡萄牙國家隊

5)
白蘭斯否認於世界盃後取代杜明尼治既報導

6)
幾段阿仙奴既新聞......

佢地將同黑山U-21中堅沙域簽協議書
佢將於5月正式加盟

雲加亦決定將英格蘭U-19前鋒山齊士華特外借到修安聯

另一方面,法比加斯再次被指成為巴塞既增兵對象
而佢地亦想搵伊保爾於下季以自由身加盟

7)
中國足協新任副主席韋迪表示唔會搵二三流外藉教練
佢透露軒迪克係理想人選

8)
鮑世賢因為銀牌決賽吹漏左張春暉侵犯盧均宜
而面臨紀律處分

9)
簡拿利斯否認已經同皇馬簽左協議書下季加盟
曼聯就被指仲未放棄羅致佢
而有傳皇馬將於季尾收購韋拿以及阿古路

10)
再來幾段曼聯既新聞......

里奧費甸南再次上訴尋求減刑
不過有分析指佢可能再次因減得加

而夏格維斯就再次因傷提早收咧

另外,挪威球會史達比克準備搵蘇斯克查接手

另一方面,佢地既債券已經跌破帳面價

11)
艾耶拉以自由身加盟競賽

12)
活基治唔排除因為鼠蹊傷患而提早掛靴

而同樣抖多過踢既前隊友戴亞
雖然俾新老闆開到聲叫佢提早退休
不過依然未唸過提早掛靴

13)
英超賽會確認馬華路禾尼以借用形式加盟新特蘭

14)
貝尼斯干尼公然批評AC米蘭引入文仙尼
而細哨被踢爆於米蘭打呲前依然連續蒲左3晚而被處分

15)
祖雲達斯被傳暑假有5000萬歐元資金買人
而後防將係增兵重點

16)
智利射手賓利拿被傳成為熱拿亞,巴勒莫以及烏甸尼斯既增兵目標
意乙哥錫圖已經將佢既身價定為400萬歐元

17)
西布朗落實同班尼斯簽約

p.s.:
由同行投票既最佳教練獎
艾歷基居然可以羸摩連奴一個 double 既得票率
大抵反映串王有幾令同行討厭

2010-2-3

轉會市場關閉後少左新聞
想趁機會講下等左個幾星期都未得閒講既八掛嘢

十幾日前本地傳媒都報導快活谷欠薪
事後港甲貝老推莊話贊助商未科水所以冇錢出糧
大家應該都仲有印象

人多自然有是非
傳媒收到風再作報導都唔係咩嘢奇事
不過如果有心人乘機揭人家醜搵著數
就好令人討厭

上星期三科化明曾經於專欄補飛
話因為放風球員細個唔識世界
亂講嘢都唔會怪佢
不過就好隱悔咁話對推波作浪既'球圈前輩'好失望
但冇特別交代詳情

其實有消息人士個幾星期前已經同小弟講
'球圈前輩'隊波睇中快活谷某些年青球員
不過偏偏唔想俾轉會費
就pk到借人地既欠薪事件玩嘢
打算之後可以做晒好人咁去接收垂青左好耐既年青球員

小弟先後問左至少10個fd都冇人估到邊個係'球圈前輩'
科化明算係身受其害都冇開名
小弟又邊好意思咁做
姑且俾幾個貼士
不過大家估到都唔使講返俾小弟知

貼士1:
佢活躍球壇超過廿年
(如果冇記錯!......)
佢應該於91年俾一個二打六外援打過一鑊
不過原因未明

貼士2:
佢多年都係搞青訓

貼士3:
天光隊既人同佢有牙齒印

2010-2-2

轉會市場關閉只可以形容為冇咩驚喜
先講英超同埋英冠既主要轉會:

1)
曼城最終落實引入阿當莊臣
雙方簽約4年半
消息指轉會費高達700萬鎊

不過工作証問題就令馬列加既轉會爛尾
佢亦最終決定加盟國米

另一方面,佢地將維度外借到打呲郡

而一般相信文仙尼同意將馬華路禾尼外借去新特蘭
不過落筆既時候仲未有進一步消息

2)
些路迪先後成功借用羅比堅尼,巴夫希得以及卡馬拉
另外又羅致前蘇格蘭U-17中場 P.Slane

3)
韋斯咸以220萬鎊羅致麥卡菲
而佢地亦以借用形式引入美度同埋巴西射手伊蘭
當中前者為左證明本身能力
不惜同槌仔幫以1000鎊既超低薪簽約

4)
又拖糧既樸茅就以325萬鎊賣走貝高域去史篤城之餘
亦將紐根特繼續外借到般尼
成個1月只係續借奧哈拉以及搵到奧拜胡

5)
而般尼亦成功向車路士借用中後場球員曲克到季尾
以及早前從史篤城引入 L.確特
總算幫補到後防少少

不過J.洛迪古斯就被外借去班士利

6)
韋根以250萬鎊引入摩西斯
亦從薩克達借用22歲玻利維亞射手摩連奴

不過迪基爾拒絕佢地同埋曼聯既斟酌

7)
將卡馬拉外借既富咸就從羅馬引入年青射手卡卡奧作為替補
佢地亦向維拉借用索尼到季尾
另一方面,佢地從利物浦羅致前德國U-17左閘碧治文

8)
新特蘭借用侯頓到季尾
而布魯士聲稱只係等緊賽會確認馬華路禾尼既借用

另一方面,有報導指布魯士曾向樸茅探盤羅致占士
而佢地亦最終未能引入馬高莫達以及埃及左閘 A.毛罕默德

另一方面,佢地將D.梅菲諾以及斯禾菲分別外借到葉士域治同埋錫菲聯

9)
由於接連羅致摩西斯以及禾漢都失手
紐卡素改為向高雲地利羅致貝斯
雙方簽約3年半

而兜兜轉轉後謝列美亦最終改投土耳其球會安卡拉高古

10)
昆士借流浪從伯明翰以及葉士域治
借用賓特同埋 T.Priskin 兩名箭頭

11)
熱刺羅致朗治失敗
意味哈利列納唔能夠為高美斯搵多個副手

12)
侯城再次拒絕狼隊對史堤夫亨打既出價
而卡辛就最終被外借到希甲拿利沙

13)
賣走阿當莊臣既米堡就成功從熱刺借用諾頓
亦先後引入兩名射手史葛麥當奴以及李爾米拿

14)
西布朗同自由身既荷蘭右翼 A.Slory 簽將到季尾
佢地亦將 S.Martis 外借去唐卡士打

15)
打呲郡向史篤城借用當治

而歐洲其餘各地既交投就更淡靜......

16)
迪賀奴落實以借用形式加盟華拉度列

17)
艾美臣由彭美拉斯重返西甲
同薩拉戈薩簽約到季尾

18)
成功引入馬列加既國米將文仙尼借用俾死敵AC米蘭
而占美利斯就落實加盟帕爾馬

19)
費倫天拿借用卡斯辛奴爛尾
改向巴塞借用現時於賓菲加無甚表現既基利臣
之後仲有權以1200萬鎊買斷佢

20)
拉素落實以80萬鎊從史特加羅致希斯佩加

21)
巴勒莫就將貨不對辦既羅馬尼亞翼衛 C.Melinte
而球隊就先後引入3人
當中只有意大利 U-20 後衛卡達路尼有少少名氣

22)
烏甸尼斯就從桑坦德引入射手 A.Geijo

23)
雲達不來梅從杜伊斯堡引入杜土射手辛度華拿

24)
西維爾將科特迪瓦射手干尼外借到漢諾威

25)
拜仁始終冇買新龍門
不過傳聞佢地將於暑假向烏甸尼斯出價700萬歐元收購漢丹洛域

26)
韋托特以自由身同梅斯簽約半年

27)
丹尼臣加盟希甲卡華拉
雙方簽約年半

2010-2-1

1) 南華對傑志

唔計羅神講既體力分配
以及鮑世賢又衰一鑊
小弟覺得南華反勝仲有兩個主因

一係佢地有始至終都從兩邊進攻
少左中路踢波既可免得自暴其短
而傑志冇閘之餘
應付傳中既能力亦有不足
例如羅沙度轉身慢以及個別球員跟得唔夠貼
結果俾到南華唔少機會偷襲

另外,經驗亦好關鍵
事實上盧均宜等邊緣港腳已經係陣中比較有經驗既球員
而幾個西班牙兵亦只係踢過當地低組別
加埋陣中又冇個壓得住場既大佬

結果傑志俾人追返一球就亂晒陣腳
連向來表現穩陣既奧利都出迎失準即刻再輸多粒
之後後防亦多次解圍唔湯唔水
中前場搓波甩腳都多左
明顯輸到失失慌

2) 阿仙奴對曼聯

蘭尼繼兩季前足總盃後再次爆廠
曼聯上半場靠佢一個已經足以ko阿仙奴
當然兵工廠咁多防守球員夾手夾腳出錯又幫佢唔少
就算佢下半場表現轉沉
都有基治再次開埋條路俾星仔長驅直進
踢波踢到好似兵工廠咁好客真係少見

兵工廠少有咁屎
唔算突出既法比加斯已經係全隊最好
丹尼遜,基治同埋賓特拿簡直係屎上最強
小弟向來睇佢3條友唔順眼
感覺同睇大婆台見到鄧健泓冇咩分別

而艾沙維又係令人超失望
佢本身靠質素對住布朗簡直係屈機
最終都入唔到波
就只好怨自己埋門一腳奇差兼幾次犯左腦筋上錯誤
見到雲加冇殺手可用
就算雲佩斯可以提早復出都嫌佢遲

尋日怕且係曼迷今季最開心既一日
既有曼聯CEO基爾透露球會其實只係負債3.6億鎊
而唔係傳媒指既7億鎊
更有消息指曼聯支持者信託
會搵投資銀行 Seymour Pierce 既主席K.夏里士幫手

3) 非洲國家盃

埃及靠整體足球歷史性3連霸既同時
更令人為佢地近年多次缺席世界盃而可惜

講個人質素
科特迪瓦,喀麥隆以及尼日利亞都唔輸蝕俾佢地
亦首先唔好唸丁偉傑早兩日所提出心理上留力既理據係唔係成立
3隊唔擅長整體戰以及防守漏洞多多既負面影響
唔止係今次賽事功敗垂成
仲遠及佢地決賽週可以行到幾遠
幾個教練一定有排頭痕

而阿爾及利亞質素再差一班要靠穩守突擊搵食
偏偏防守比3隊名牌更差
丘仔睇佢地一場好波就捧到佢地咁高未免跟紅頂白

加納反而俾到小弟驚喜
半力都捱到個亞軍
靠既就應該係由第二場波開始改善既效率
至少唔再龜縮於後場30碼範圍俾人慢慢搓