摩連奴首度倒戈車仔
兼且同唔係朋友既肥安再次過招
已經係超強戲碼
國米羸波
不過過程冇咩說服力
3分鐘就開紀錄
大抵係因為泰利近期再次出錯
唔知仲以為厄遜或者加歷查上左車
開波前怕且冇人唸到
串演左閘既馬路達全場受既壓力竟然仲少過佢
而之後國米大條道理踢穩守突擊
不過最終失晒個勢
佢地有主場之利亦冇咩霸氣可言
季初俾巴塞搓住踢都可以賴人地好波
尋晚幾乎頂唔住架車
怕且係因為速度,身型,效率都輸蝕少少
如果艾辛冇傷可以代替缺口米基爾
雙方差距應該更大
杜奧巴上半場兩次攻門都好有威脅
當中衝力罰球(又)中楣真係唔好彩
而佢衝散國米防線亦造就卡奴多左活動空間
不過最絕都係近期既誤判浪潮
尋晚既干沙利斯兩次都唔罰12碼
真係吹佢唔脹
下半場續戰依然由車仔主導比賽
分別只係雙方幾分鐘因為神來之筆而各入一粒
國米下半場中段開始
前場索性靠巴洛迪利一條友搵食
車仔就算有施治傷出都唔使太驚再失波
真正令肥安擔心既怕且係佢要抖幾耐
而國米最終可以守到完場
怕且要多得盧斯奧踢出近年既代表作
以及死過返生既祖里奧施薩硬食左林伯特既勁射
但問題係聖西路出擊都咁狼狽
俾人攞埋作客入球既國米去到史丹福橋都唔知點算
車仔下場只要唔心急兼後防唔好再爆鑊
出線機會依然審慎樂觀
肥安賽後指出輸波原因既同時
亦強調依然有信心晉級
相反摩連奴就話數據反映唔到其實國米主導比賽
怕且只係淡定有錢剩同埋死剩把口既分別
2 comments:
車仔可以佔優並唔意外
因為大家都講過好多次
國米係意甲玩哂
只係成個意甲水準都跌緊
出到去根本係等於大鄉里出城
不過車仔又未必可以咁輕鬆
畢竟佢地首回合落後
次回合就算可以壓住國米攻
但係可唔可以攻破世界級門將祖里奧施薩
其實好睇到時腳風
To: 舒利亞
同意車仔唔輕鬆
不過難搞既唔止祖里奧施薩
仲有驚盧斯奧可能再整多場代表作
不過更難搞既可能係串咀既摩連奴
條友其實有段時間唸過要拋離車仔到3:1
不過中場略為失勢
彭迪夫入場冇足夠空間發揮
搞到巴洛迪利孤掌難鳴
而摩連奴既殺著唔止突擊
仲可能用死球屈機
或者專攻泰利,甚至奧拿里奧既死穴
Post a Comment