雖然過氣
但都係想講下近日既歐洲賽......
1) AC米蘭對曼聯
開波前意大利傳媒睇好近況回勇既細哨可以帶俾曼聯好多麻煩
不過佢地怕且唔記得主隊既防守隱憂
費 sir 上星期去吼路睇佢地對烏甸尼斯
見佢地應付傳中,盯人同埋佈越位都錯漏百出
真係掩住半邊咀笑
結果今場真係靠側擊已經完成任務
上半場史高斯追成平手既一球雖然超級符碌
不過下半場用華倫西亞同埋費查去屈機
就好似兜巴主張增兵頭重尾輕既老貝
AC米蘭又係唔抵爭
防守唔掂之餘亦唔識入波
亨特拉爾仲簡直係足球黑洞
細哨就算勇冠全場都救唔到全家
前面冇殺手,後面冇防守
絕對係佢地輸波既寫照
2) 里昂對皇馬
主隊今季主場踢歐聯既水準唔錯
今場靠死守同埋犯規已經立於不敗之地
穩守突擊仲中正對手死穴
皇馬一對防中做唔到防線屏障之餘
有時仲因為壓得太前而同後防有幾多空位
而柏歷堅奴眼見4-2-3-1陣式搓唔入
都遲遲唔變陣用多個箭頭踢簡單足球
又真係抵佢俾老闆插
3) 拜仁對費倫天拿
奧維保似乎有個特性鍾意吹死某一隊
佢判高比出場唔緊要
但對家高路斯出埋收山腳都可以唔使走就擺門雙重標準
而最離譜都係高路斯既入波
越位既幾個身位似係睇到都當睇唔到
不過奇就奇在今次有個旁證陪佢一齊黑哨
難為客隊球員以為可以趁拜仁埋門一腳唔掂
而踢少個都唔使輸
4) 波圖對阿仙奴
重點一定係快開罰球
先唔講係唔係雲加所講蘇甘保唔覺意腳指篤到個波
亦唔講全場發波瘟既法比安斯基又有冇輕輕控左一下先用手接
就當冇罰錯簡接自由球
佢都犯左兩個腦筋上錯誤
一係球例雖然有灰色地帶俾對手快開罰球
但咁既距離仲近過射12碼
莫非佢認為法比安斯基既過錯仲衰過禁區內侵犯對手
二係佢識得俾個波波圖球員偷襲既同時
偏偏唔醒水阻住蘇甘保回防
條友上次睇唔到亨利二段手球
小弟覺得佢係衰唔集中兼可能有視力障礙
今次又再短時間內兩度犯上腦筋上錯誤
加埋黑哨黑到出面既奧維保
歐洲足協同埋國際足協怕且要考慮
仲俾唔俾佢地於歐聯以及世界盃執法
另一方面,想講下法比安斯基
條友其實一早有歐聯經驗
冇經驗段估唔係佢甩手以及俾返個波對手快開罰球既合理解釋
佢應付傳中同埋高波既表現仲有待改善
不過整體質素唔差
希望佢唔好一沉不起
4 comments:
四場波賽果
其實無一場係特別意外
只係拜仁要靠球證幫手先險勝紫百合
就有少少意外
本來以為近況大勇既拜仁應該可以
輕鬆ko呢排唔多掂既費倫天拿
照咁睇下場費倫天拿番主場
都唔係無機會贏
況且仲有球作客入球
雖然法比安斯基
甚至係艾蒙尼亞質素唔錯
不過比起其餘三強門將
仍然係有所輸蝕
希望教授考慮下搵番件新鋼門
始終暫時阿仙奴既門將
頂多只係岩中上游球隊用
To: 舒利亞
1)
費倫天拿今季踢歐聯真係特別醒
明顯重歐聯輕意甲
不過小弟唔多同意佢地咁既方針
因為佢地唔似可以於歐聯走到好遠
而聯賽而家落後前4咁多
靠歐聯出局後先追應該已經太遲
2)
小弟都同意兵工廠同英超其餘3強相比
龍門方面係輸蝕左少少
阿仙奴龍門唔夠班講咗好耐
雲加都冇D動靜
其實上一任的列文除著神神化化之外都幾好
德國門將真係唔錯
去德甲挖一件應該唔難啩
To: wtssoccer
德甲真係大把好嘢
艾達以前亦曾經同兵工廠扯上關係
紐亞,希迪布蘭同埋雲丹費拿都唔錯
不過最好既選擇安基已經過左身
Post a Comment