2010-3-30

近幾日既新聞......

1)
幾段利物浦既新聞......

中國富商黃健華被傳有興趣入主利記
佢之前已經入股NBA既克里夫蘭騎士

利記亦同魯爾,莫耶高治以及李青龍扯上關係

美職盟同埋中東亦有球會想簽王子
不過如果賓尼迪斯同佢打人情牌
利記既機會應該比較大

而阿仙奴以及車路士都對這名侯城23歲法國中堅有興趣
佢既身價已升至500萬鎊

南韓仔既經理人公司就隨即發聲明表示當時人冇唸過離開保頓

2)
艾歷臣落實接手科特迪瓦
佢20/5先正式上任
不過之前會抽時間觀察部份於歐洲搵食既球員既表現

3)
蘇拿放自己同埋球隊3日假回氣
佢索性趁機會返意大利考慮前途
槌仔幫之後於官網發表聲明證實蘇拿決定留隊

另一方面,老闆高特已經同杜拜財團傾注資

4)
紐卡素被指準備同熱刺以及富咸爭奪史雲頓射手查理艾斯甸
而後者就被指有興趣羅致史堤芬泰萊

5)
阿仙奴被傳睇中森本貴幸以及卡頓高爾
而法比加斯既老豆透露當時人可以復出鬥母會巴塞

另一方面,奧雲高尼暗示希望續借高舒亞多一季

6)
亨利再次被指暑假加盟紐約紅牛
報導指佢之後可以仿傚碧咸
以借用形式加盟歐洲球會

7)
李安納度向高層提出幾個續約要求
當中包括增兵資金,排陣既自主權,球隊年輕化,
改變訓練模式同埋搵多啲好軍醫

但亦有報導指佢因為頂唔順老世足球而劈炮
索性接替鄧加教巴西

另一方面,早前講過卡拉迪斯季尾可能轉投拿玻里
而家又有報導指佢考慮轉去土耳其或者希臘搵食

8)
幾段國米既新聞......

雖然有傳聞指利物浦秘密斟酌摩連奴
不過串王就澄清冇計劃返英超

而托度由於唔滿意下季淪為第3龍門而準備季尾離隊

另外,皇馬被傳打算出價1800萬歐元同佢地爭奪高拉洛夫

9)
樸茅打算挽留心灰已冷既格蘭
而靴達臣同埋韋伯都因傷而要缺陣6個月

10)
廣州恆大被指向鄭智招手

11)
蘇格蘭首富麥哥爾表態冇興趣入主格流

12)
熱刺考慮續借古莊臣1年之餘
亦被指想簽麥佳哥同高美斯作良性競爭

而新特蘭被指準備以賤價1000萬鎊一併接收賓特尼同埋奧哈拉

13)
幾段曼聯既消息......

費sir表態有興趣羅致列貝利
而消息指佢現時既身價回落至4000萬鎊
而費sir亦被指再次派出龍門教練去觀察紐亞
而費爾就再次否認成為曼聯既新龍門人選

傑斯表示只要威爾斯有需要
佢願意復出踢2012歐洲國家盃外圍賽

保頓,伯明翰同埋普雷斯頓都有意引入英格蘭U-21球員基華利

另一方面,維迪可能因上場波批肘而被罰停賽4場

14)
奧奴夏表態想代表尼日利亞踢世界盃

15)
雖然曼城同埋維拉都同希比扯上關係
不過佢既經理人已經排除佢言英超搵食既可能性

16)
伯明翰18/7同香港隊踢友賽

17)
加斯居尼被落案起訴醉酒兼無牌駕駛

18)
巴塞決定同荷西賓度續約1年

p.s.:
1)
斯里蘭卡總統聲稱有神醫介紹俾碧咸
仲聲稱3日包搞掂
有冇咁多神醫呀?

2)
紐卡素返主場復仇羸森林2:0
真係恭喜晒
太累冇睇所以冇嘢可以講
不過戰果絕對正路
畢竟森林自從足總盃作容輸俾伯明翰後
英冠作客忽然輸開有條路

3)
東主有喜而小休幾日
最快5/4再交功課
復活節快樂!

2010-3-29

最近明報每日都介紹一個世界盃名將既威水史同埋退休生活
令小弟都想搵下部份英超球星近況:

1)史必
而家佢仲係錫菲聯既教練兼球員
不過佢自己都承認再出場既機會唔大
反而佢爭取時間苦練長跑
參加今年既倫敦馬拉松為波比sir旗下既慈善基金籌款

2)真路拿
近年好似冇再行天橋
可能同少少中年發福有關
不過佢簡中仲有去拍戲
更勁既係佢前年參加釀酒比賽竟然有獎攞

3)比士利
上年返左紐卡素做青訓教練

4)達比薩斯
這個當年俾柏金技術性擊倒既希臘中堅雖然已經36歲
不過仲未退休
而家係祖家球會拿利沙既隊長

5)高爾
每星期有兩日去夏德斯菲爾德做兩日兼職教練
教人埋門一腳
不過諷刺既係佢當年踢曼聯出名超敗家

6)阿倫史勿夫
唔係而家踢緊紐記既辣椒仔
而係前兵工廠當家射手
佢而家做緊球評家
不過唔知係寫波定係講波

7)迪臣
退休後去左搞生意
亦有為幾份報紙雜誌寫波經

8)史賓沙
這名曾經來過香港踢麗新既矮腳虎
現時於侯斯頓戴拿模出任助教

9)白賴仁勞特立
加盟祖家電視台講歐聯
合作拍檔仲有舒米高以及另一名宿拿臣(唔係岩岩退休嗰個)
而佢就同鶴治合作搞青少年足球訓練營

10)祖迪告魯夫
36歲既佢原來又係未退休
佢上年暑假同馬爾他球會 Valletta 簽約3年
出任球員兼助理領隊
得閒亦搵埋大佬踢元老賽

11)哥利摩亞
退休後電台同埋電視雙線發展
不過大家最有印象既始終係佢客串拍本能2
同莎朗史東搞完嘢之後被殺

12)尼高
繼續執教新英倫革命

13)艾德烈治
同人夾份搞一間名為 Aldo’s 既酒吧
據聞係愛爾蘭利迷既睇波熱點
而佢亦有復出踢地區聯賽
加盟利記球迷搞既 AFC Liverpool

p.s.:
好想搵埋柏金既近況
唔知佢仲係唔係跟尼斯堅斯教荷蘭B隊
因為好似冇咩聽過荷蘭B隊有比賽
亦唔多肯定佢仲有冇返阿積士幫手教波
知既唔該單聲小弟

2010-3-28

1)
蘇拿帥位雖然仲保得住
不過消息指韋斯咸兩個班主準備搵舊部屬麥利殊過檔取代佢

而尋日英國傳媒指副手奇勒因為唔滿意老世足球
早前曾經將蘇利雲遂出訓練場
好有機會要陪葬

佢兩個既年薪加埋高達310萬鎊
兩個孤寒老闆唔捨得賠錢
似乎係佢兩個仲未走人既真正原因

2)
報導指賓尼迪斯早前同打算收購利物浦4成股份既財團會面
仲得到知會暑假有2500萬鎊資金
而賓帥之後同CEO柏斯路一齊游說有離心既球員留隊
消息指當中包括而家表態留隊既托利斯

暫時未知報導既可信程度
不過如果屬實就至少反映新財團唔準備炒賓帥

3)
艾殊利高爾再次被指考慮退出國家隊
不過未知會唔會踢埋決賽週

p.s.:
兩頭馬車各自收起當家射手兼比賽早段各有壓力
最終都可以大炒對手
車仔固然多得林伯特,馬路達同埋施哥夫各有功課交
曼聯亦有貝碧托夫忽然勤力

不過兩條防線其實各有隱憂
特別以車仔為甚
下場作客奧脫福一定要有大幅度改善

而阿仙奴方面
由於受制伯明翰既密集防守以及硬朗攔截
球証韋比又向來有少少偏幫曼聯之嫌
加上法比加斯負傷死頂

兵工廠成場波只係形勢略為佔優
攻不銳守不穩就一樣冇用

加上佢地中路根本唔穩
菲臘斯補時既顏面入波係好有運
不過史葛丹恩又何嘗唔係冇運
補時失波表面睇係兵工廠跌左兩分
但睇晒成場又有少少似係執返1分

雲加賽後記者會爆粗怨對手粗野
倒不如檢討自己增兵點解咁頭重尾輕
而家先傳佢肯俾1000萬鎊收購謝路美保定實在太遲

2010-3-27

因為公私兩(超)忙兼要睇 Eason
幾日都抽唔到時間交功課
請見諒!

近幾日既新聞......

1)
路明尼加表示拜仁仲未同史浩克04就紐亞達成任何協議
而佢地同埋利物浦都同艾利亞扯上關係

2)
再來幾段利記既新聞......

消息指莫斯科中央陸軍準備出價600萬鎊收購該尼亞拿
而莫斯科斯巴達就只係打算借用佢
對於老婆係俄羅斯人既佢都係理想既落腳地

而賓尼迪斯就決定將史比寧於球季餘下時間外借到李斯特城

另一方面,意大利傳媒指一旦賓帥落實接手祖雲達斯
將會打埋托利斯同埋馬斯查蘭奴離隊

3)
傳聞查斯古特可能以自由身轉投維拉利爾
祖雲達斯被指打算羅致基格納以取代佢

而傳聞柏蘭迪尼如果接手祖記
(祖記實在太多傳聞新教頭!)
蒙杜利禾,基拿甸奴同埋祖維迪都可能跟佢跳槽

4)
史堤芬泰萊俾卡路爾打爆下巴後已出院
不過佢肯定要提早收咧
而有報導指佢考慮季尾離開紐卡素

而又衰一鑊既卡路爾雖然下個月仲有單官司要應付
不過紐記似乎唔會如傳聞所講將佢賣去史篤城或者布力般流浪

另一方面,紐記被指有興趣出價600萬鎊收購當蘭斯

5)
樸茅同英超賽會達成協議去賣球員籌旗
而如果交易涉及外國球會
就要另外得到國際足協既批准
而現時賣走既球員於球季結束前只可以以借用形式繼續效力樸茅
消息指羅馬打算以200萬鎊跳樓價收購比赫積

6)
由於烏克蘭同埋波蘭兩地既場地施工進度落後5個月
令2012年既歐洲國家盃可能要被迫延期

7)
些路迪因為戰績差勁而同莫比利解約
球隊俾弱旅聖美倫大炒4:0後
踢多格流兩場都仲落後10分

佢離隊除左令鄭智更大可能季尾走人
亦幾乎令烏達卡既加盟傳聞晝上句號

8)
幾段車路士既新聞......

車仔被指將於世界盃前落實以1000萬鎊接收雲達華治

卡維奴養傷1個月
不過艾辛比佢更大鑊
佢透露擔心現時既傷勢會影響佢踢決賽週

另一方面,肥安宣佈羸英超就戒煙

9)
幾段阿仙奴既新聞......

足總駁回佢地為華美倫既上訴
不過就因為只係職業犯規而只要停賽1場

消息指摩連奴同埋巴洛迪利已經陷入兩個只能活一個既地步
傳聞指國米已同阿仙奴達成協議
前者將用麻煩友再加4000萬歐元收購法比加斯
奇怪既係同時間AC米蘭以及利物浦亦同佢扯上關係

另一方面,雲加被指睇中夏薩特

10)
西維爾決定解僱占美利斯

11)
AC米蘭即將從戈亞斯引入19歲小將拉菲爾杜萊
亦落實引入耶比斯
卡拉迪斯就宣佈將於季尾離隊
傳聞佢可能轉投拿玻里

12)
葉士域治被指想搵古比士利取代堅尼

13)
蘇拿既下台壓力越來越大
更有傳聞指佢之後既排陣可能會俾老闆干預

而聲稱撐佢既隊長厄遜居然私底下向球迷透露覺得蘇拿排錯陣
令球隊主場1:3輸俾狼隊

14)
早幾日文仙尼輸波輸品同莫耶斯衝突
事後英足總決定告佢行為不檢

而文仙尼被指考慮引入麥薩斯以及卡雲尼
不過巴勒莫已經急不及待同後者續約
仲將佢既贖身費定為2500萬歐元

15)
熱刺準備同曼城以及史篤城爭奪柏度李安
佢地亦有興趣從皇馬接收迪亞拉
而同拉素季尾約滿既希斯佩加又再次被指將會轉投佢地

16)
基斯保特表態考慮下季轉戰英超

17)
史特根透露暑假要增兵

18)
加利卡希爾透露可能今晚復出對曼聯
而朗尼就證實冇膝傷而可以對保頓

19)
曼聯再次被指準備收購迪基亞
報導指費sir之後會准佢下季以借用形式效力馬體會

20)
富咸被指想搵舒亞拿以自由身加盟

21)
奧哈拉被指成為史篤城400萬鎊增兵對象

22)
伯明翰同埋布力般流浪都被指有興趣羅致卡斯伯舒米高
前者既赫特好可能俾曼城回收

23)
堅韋尼鍾斯再次被指將於季尾離開新特蘭
而布魯士被指考慮引入奇雲杜里作為替補

24)
保積洛夫,索尼同埋史堤芬列特都表態
想帕爾馬,富咸以及西布朗買斷佢地

25)
摩頓柏達臣同布力般流浪仲未達成續約協議
意大利傳媒指巴勒莫想搵佢以自由身加盟

p.s.:
1)
準備同艾殊利高爾離婚既索女雪莉收到強姦恐嚇
蝦女人既正懦夫!

2)
布歷治溝到新女
同是天涯淪落人既女主角同樣有過性醜聞
曾經俾人將佢偷食既搞嘢片段擺上網
而佢既妹夫就係NBA球星奧當

3)
比利同埋表態想連任歐洲足協既柏夫尼又貼波
兩個都睇好巴西同埋英格蘭
不過前者有殺錯冇放過亦拖埋阿根廷以及西班牙落水
至於後者就可能出於愛國情操而力撐法國

2010-3-23

近幾日既新聞......

1)
幾個名牌教頭都成為傳聞人物
先有再同賓尼迪斯扯上關係既祖雲達斯被傳斟酌文仙尼
佢雖然否認有關傳聞
不過都唔代表曼城份工好穩陣
事關曼城被指為摩連奴準備左一張冇填銀碼既支票

而消息指串王其實有心接手利物浦
不過雖然有傳聞指利記暑假有5000萬鎊增兵資金
但係兩個空心老倌唔肯賣盤就意味球隊其實唔慌有錢增兵
令佢打消接手既主意

2)
幾段韋斯咸既消息......

消息指蘇拿得返兩場波證明教波能力
而迪肯尼奧就表示希望將來執教韋斯咸

格連就再次被指成為熱刺750萬鎊既新龍門人選
報導指佢地已經視彼德堡既李維士為替補人選

另一方面,老闆高特雖然聲稱想羅致碧咸
不過當地傳媒普遍認為佢只係抽水兼吹水

3)
侯利亞被傳下季接手禾夫斯堡
事件似乎幾困擾球隊同埋教頭高斯特拿
佢地隨即主場1:5輸俾哈化柏林

4)
AC米蘭被指打算出價1000萬歐元引入梅迪薩卡
而佢地被指想用亨特拉爾同祖雲達斯交換阿馬利

另一方面,佢地第n次同迪施高扯上關係
而今次既報導仲包括埋米斯莫域

5)
利物浦同埋愛華頓被傳爭奪艾利蘭
而巴塞忽然被指有興趣引入拉爾拿
不過當時人已經表明只想留隊

6)
迪羅斯再次成為曼城既3000萬鎊增兵對象

7)
國家體育總局副局長崔大林尋日澄清冇參加假波
而外國月光都唔係一定圓
意甲同埋瑞士超聯近日亦懷疑有假波

8)
阿仙奴被傳準備收購羅美路以及漢基蘭以強化防線深度
而巴黎聖日耳門雖然被傳準備暑假收購阿曼特查奧爾
不過當時人已經表明唔想離隊

9)
英超賽會以樸茅違反一系列規則而罰佢地100萬鎊
(問乞依攞飯食?!)
而佢地為左唔羅致甸丹尼而決定唔再用佢

10)
鶴臣再次被傳係英格蘭下任教練既人選

11)
薜羅拔圖被傳成為紐約紅牛既增兵對象

12)
幾段車路士既新聞......

消息指艾殊利高爾的既腳部骨折傷勢康復進展幾好
不過伊雲奴域就要養傷1個月

而車仔被傳有興趣收購阿辛祖
佢地亦因為曼城可能失去尼爾馬既優先收購權
而增加左羅致這名巴西射手既機會

另一方面,林伯特就忽然同祖雲達斯扯上關係

13)
布力般流浪被傳打算以200萬鎊接收比亞堤

14)
曼聯羅致16歲愛爾蘭門將祖高爾

15)
布魯士透露有興趣季尾正式收購侯頓
而新特蘭準備同伯明翰爭奪贊拿斯以及馬菲泰萊

16)
費蘭迪斯落實執教以色列

17)
由於唔滿意老闆足球
列查隨時劈炮唔教拉素

18)
曼聯忽然同占士米拿扯上關係
而維拉就希望同佢提早續約至2014年

另外,杜蘭斯再次被指係維拉既增兵對象

19)
羅馬被指睇中聖羅倫素既阿根廷射手保賀斯恩

20)
川迪想搵雲尼古回巢

21)
韋碧克宣佈決賽週後同澳洲足總分手

p.s.:
巴洛迪利居然著AC米蘭波衫上電視插摩連奴
佢係有一定天份兼係本土近年最好體能既箭頭
不過對住串王都仲咁臭串就簡直係廁所點燈

而納比先後將更好波既巴治奧同埋卡斯辛奴棄之門外
唔選佢去南非應該都好正路

2010-3-22

想講英超最新形勢......

先講雙紅會
利記全場只係踢左5分鐘好波
最扯火仲係佢地輸返轉頭之後谷唔起既表現
簡直似一個放棄求生既絕症病人

小弟邊睇邊唸原因
7日內踢3場一定有關
不過賓尼迪斯奇差既排陣同埋調動先係關鍵

見到正選再有盧卡斯利華已經唔開心
條友亦一如所料踢到隱形
佢加埋馬斯查蘭奴夾手夾腳包辦兩個失波既責任
加埋球証韋比老早已經有偏幫曼聯既前科
成場波都似係10個鬥12個

而賓帥落後下既調動亦令人莫名奇妙
謝拉特轉去右路搵食
要知道佢既盤扭能力只係一般
任佢四圍走先可以發揮佢最大威力
結果佢多次面對艾夫蘭都唔多搵到食

而佢換入阿古蘭尼同埋巴布都冇問題
不過應該最早換班拿約落場
佢熱身完之後竟然忽然被收起
要等到82分鐘先有機會入替巴西廢柴
如果一早搵佢落場踢右邊
效果應該好好多

結果益晒曼聯乘住車仔意外失分而上頂
車仔週中輸俾國米後
油王已經狂鬧班友兩個鐘
今場佢地上半場睇落都踢得似樣
不過下半場就應該因為體力問題而走晒樣
加上後防繼續發瘟
埋下輸波伏線

肥安過檔帶埋體能訓練專定迪米捷利斯
不過眼見車仔既疲態
小弟忽然覺得AC米蘭成間老人院都掂
最大原因應該係意甲既節奏太慢
但英超快好多既節奏
車仔又始終多老嘢
空手道高手既金漆招牌都好可能保唔住

車仔而家雖然失多1分
不過佢地唔使兼顧歐聯
只要出訪奧脫福唔輸
都依然有力反先

阿仙奴就終於俾小弟既烏鴉口講中
隨住華美倫坐波監
(希望只係罰1場)
加上加拿斯養傷
佢地最終要靠耆英組合踢英超

蘇甘保拍豬達真係連英冠都未必頂得住
用柒治客串又驚佢唔慣
中路防守勢必成為兵工廠偷雞英超既最大隱憂

而隨住熱刺同埋曼城羸波
分別比佢地失多7至8分既利記要趕過佢地真係越來越難
就第7既維拉亦其實失少利記4分
小弟點都要有少少心理準備利記前4不保

最後要講榜尾
英超賽會威脅樸茅唔可以留力
擺明又係見佢地係小球會先蝦佢地
好彩佢地殘陣都羸波先唔使俾賽會抽後算帳
而佢地死都要攬住般尼同埋侯城
就令護級形勢開始明朗

大抵般尼之前3場主場搶分大戰只得1分
已經半隻腳返左英冠
而侯城高層遲左3個月先炒菲臘布朗兼搵履歷奇差既杜維接手
後防又繼續積弱
大抵又係死都唔抵可憐

最大得益者怕且都係麥卡菲既狼隊
佢地繼續冇章法兼冇實際
唔使收皮只係因為人地包底
下季段估再冇咁好彩

2010-3-20

近兩日既新聞......

1)
歐聯8強抽籤結果:
里昂對波爾多
拜仁對曼聯
阿仙奴對巴塞
國米對莫斯科中央陸軍
(前者先主場)

2)
歐霸盃8強抽籤結果:
華倫西亞對馬體會
賓菲加對利物浦
漢堡對標準烈治
富咸對禾夫斯堡
(前者先主場)

3)
尼亞拿繼炮轟賓尼迪斯後
又同預備組球員發生衝突

賓尼迪斯決定扣佢兩星期人工之餘
仲如佢所願將佢掛牌
消息指莫斯科斯巴達同埋莫斯科中央陸軍都有興趣接收佢

4)
德國傳媒指拜仁一旦賣走列貝利
就可能向阿仙奴收購尹佩斯作為替補

5)
由於山度士未能負擔羅賓奴既人工
令佢可能提早結束借用返曼城報到

6)
馬體會方面暗示同皇馬扯上關係既阿古路既身價唔止6000萬歐元
而皇馬被傳考慮賣走要求大幅加人工既希古恩

7)
費sir公開批評英超賽會大細超
放過近期接連犯事既謝拉特

8)
夏格維斯於預備組賽事復出

9)
維度卡表示考慮後出
但前題係佢既身體狀況仲岩唔岩踢職業足球
準備加入澳職盟既 Melbourne Heart 被指有興趣搵佢出山
而佢亦透露因為家庭理由而推左富咸搵佢參加季前操練既邀請

10)
格蘭考慮放棄聯賽

11)
簡尼透露拜仁亦對艾達有興趣

12)
錫菲聯從史篤城借用西蒙遜1個月

13)
菲臘布朗同侯城仲未達成解約協約

14)
泰利老豆前日因為賣可卡因而被捕

15)
美國 Rapping 歌手 DIDDY 有興趣入主水晶宮

16)
愛華頓成為最新一間同拜仁雷斯扯上關係既球會

2010-3-18 (2)

近幾日既新聞......

1)
幾後利物浦既新聞......

利記被指有來自紐約既財團提出以1億鎊收購4成股份
而現有兩個美國老闆將於3星期內作出決定
報導仲話新老闆一定會踢走賓尼迪斯

英國傳媒亦再次指賓帥仍然在位
係因為合約講明炒佢要賠足餘下1600萬鎊人工

謝拉特對樸茅出踭打米高布朗
就再次死好命冇事
而佢就再次同皇馬扯上關係

另一方面,利記被指有興趣向曼聯挖走17歲加納前鋒哥費
兩年前曼聯於最後一刻截劫這名前般尼球員

2)
尼斯達將於1個月後復出

3)
侯城落實搵杜維接手
仲開出100萬鎊護級獎金
而曉士同埋雲拿保斯之前一度同佢地扯上關係

4)
法比加斯,路斯基同埋桑治已經傷癒

而皇馬雖然再次同雲加扯上關係
不過教授再次叫佩雷斯死左條心

5)
再有幾間中超球會涉嫌賄賂球證
令今屆中超隨時暫停
而韋迪表示可能安排國奧隊插班踢中甲

6)
保方否認加盟曼城
不過意大利傳媒指一旦佢暑假離隊
將會向卡利亞里出價500萬歐元收購馬捷迪作為替補

7)
拜仁落實同奧地利小將艾拉巴簽職業球員合約
而國米被傳想用伊度奧同佢地交換馬里奧高美斯

8)
曼聯同魯迪維爾,高士寧,杜度以及域文4名年青球員扯上關係
當中踢箭頭既後者現時效力葉士域治
令人相信堅尼可能賣人情放人

另一方面,費sir暗示將來仍然有機會搵C7回巢

9)
熱刺落實季尾以650萬鎊從國際體育會引入巴西中場辛度

10)
有消息指艾殊利高爾既傷患比預期嚴重
令人懷疑卡比路會唔會選佢入隊
不過車路士已經作出否認

而佢雖然仲養緊傷
仍然被指成為皇馬2000萬鎊既新左閘人選

11)
曼城班主公開表示英超應該設立薪金上限
而佢地被指有興趣向卡坦尼亞收購佐治馬天尼斯

12)
樸茅被正式扣9分
意味佢地降梗班
而韋斯咸被指準備接收比基安尼以及甸丹尼

13)
早前被槍傷既卡賓拿斯表示基本上復元
不過仲要一段時間先可以復出球場

14)
AC米蘭落實季尾引入耶比斯
這名34歲哥倫比亞中堅將以自由身加盟

15)
洛達列加同埋羅比緊尼都被指成為維拉既新箭頭對象
而後者老婆忽然同傳媒講想老公轉戰美職盟

p.s.:
聽到'真的假不了,假的真不了'
即刻聯想起自己幾乎日日都講
上至領隊,下至球員既轉會傳聞

2010-3-18 (1)

想講摩連奴回歸史丹福橋
手信就係佢近年最精彩既針對性部署

佢大抵吸收左首回合
甚至上季俾曼聯淘汰既教訓
國米今場既效率明顯有改善
令表現失準既車路士難以組織攻勢

正所謂'無堅不破,唯快不破'
要知道意甲球隊近年俾英超球會食住
就係輸在跟唔到對手急速既比賽節奏
高效率踢法亦令中後場任何時間都夠腳防守

而兩個做唔成朋友既領隊
點樣調兵遣將亦係勝負關鍵

先講摩連奴
佢先兵不厭詐放風史尼達因傷倦勤
最終見到既當然係佢成為頂級 playmaker 既表現
而車仔今季既進攻重點係側擊
特別係兩閘後上助攻
串王就安排彭迪夫同埋伊度奧踢邊鋒去牽制對手側擊
加上辛尼迪同埋馬干又刻意減少助攻
令車仔今場側擊幾近癱瘓

咁有心思既部署
小弟同埋首回合插過佢既部份英國傳媒
睇完場波絕對要承認一時低估左串王

不過肥安今場既用人就令人失望
上場用奇兵卡奴搵到食
加上對手既盧斯奧幾日前再次俾老鼠仔玩死
肥安偏偏今場要等到74分鐘先肯變招
如果用佢取代安歷卡踢正選
或者半場用佢取代波歷克
效果肯定好好多

而杜奧巴於邊線因為冇供應而廢左一半武功
加上盧斯奧同埋森美爾兩條大隻茅柴
上回合已經證明靠陰濕招已經搞掂佢

當然國米去到史丹福橋都可以力保不失
都要多得史達克兩次都唔吹12碼
加上森美爾於聖西路更離譜既犯規都冇手尾跟
國米兩回合都受惠於球証爭議性判決亦影響戰局發展

p.s.:
如果國米8強或以後既比賽
摩連奴都有咁精彩既針對性部署
而隊波又維持到今場咁既水準
絕對唔可以睇低佢地爭標既機會
因為其他幾隊名牌而家都各有隱憂

而車仔出局最唔開心既人
除左阿巴之外都應該係費sir
只要車仔冇因為今場輸波而失晒信心
佢地可以專攻聯賽絕對係爭標既好有利因素

2010-3-16

幾場波想講:

1) 卡坦尼亞對國米

盧斯奧同埋馬達拉斯雖然盡輸靈活同埋速度
不過都唔夠蒙達利85秒連波都未踢過就出場咁樣衰

當年摩連奴落 order 要艾辛
白蘭加最終唯有搵件咁既A貨頂當
加盟以來例牌冇料到兼同串王有超多牙齒印
姑物論下季邊個教國米
佢都似乎要搭定路返英超踢中型班

2) 湘南比馬對橫濱水手

日本電視台煞有介事於畫面右上角顯示中村回歸第一場波既字眼
小弟亦係因為佢而少有睇 J.League 直播

佢狀態肯定唔係 top fit
不過幾次處理死球同埋俾直線都見到功架
亦有同師弟山瀨功治互換位置
有份捧場既岡田武史應該最高興

3) 米堡對紐卡素

紐記既表現絕對係水準以下
佢地雖然佔得比較多控球時間
不過由於經常於後半場失去控球權
反而俾到陣容略為完整既米堡有較多機會

賀爾一如印象四肢發達,頭腦簡單
半場傷出既高洛仙尼亦繼續患得患失
如果唔係夏柏繼續有水準表現
紐記應該冇機會執返1分

路蘭今場波既表現唔似係英冠最佳球員
古費里亦只係一般
可能同冇左辣椒仔有關
不過就點都好過彭卡迪
條友咁既表現下季應該冇份隨隊返英超

前線兩個發揮機會唔多
不過每人整返粒都冇咩好挑剔
當然卡路爾有波入
都要慶幸之前古迪利斯抽水都唔使見紅

米堡方面
巴利笠臣同埋奧尼爾都幾搶鏡
不過前線既史葛麥當奴同埋基倫就只係勤力有餘
質素講真只係一般
如果想盡最後努力搏第6
史特根或者要考慮再俾機會列達去取代後者

4) 侯城對阿仙奴

兵工廠有幸有不幸咁羸波
不過因為歐聯後遺症
就算有半場踢多個都羸得超艱辛

由於英超比其他聯賽更重體能兼速度更高
印象中英超球會比較易有歐聯後遺症
最驚有時仲要作客打仔球隊
而由於兵工廠既體能又比其餘3強略差
所以影響更大

艾沙維除左上半場小志強上身開紀錄之外冇腳好波
而拿斯尼亦只得半場體力
佢兩個係陣中跌 watt 最明顯既球員
搞到球隊連一隻垂死既紙老虎都幾乎搞唔到
最終有波羸就只係靠雲加所講既鬥志

另外,侯城高層賽後終於手起刀落
不過佢地其實已經遲左3個月
因為如果12月中有個新領隊
條友就仲有時間觀察球隊兼1月入貨
絕對唔會出現菲膿布朗冇為豆腐防線增兵既情況

另一方面,英國傳媒已經為佢地坦心
驚佢地降班收場後會成為另一隊樸茅

5) 巴塞對華倫西亞

入3球既美斯一定係主角
不過沙維,亨利同埋域陀華迪斯都有一定功勞
陣中最唔掂既一定係雪到硬晒既保贊
不過更唔掂既應該係忽然要用奇兵兼坐波監既哥迪奧拿

6) 利物浦對樸茅

賓尼迪斯用心良苦
主場鬥冇心再踢聯賽兼莫財既樸茅先再敢起用阿古蘭尼擔正
條友受壓唔大即刻踢到曉飛
連帶中前場幾個隊友受惠唔少
好耐冇見既漂亮組織亦接連再現
如果唔係冇運兼埋門一腳唔掂
入半打都真係嫌入得少

今場止血兼大勝只係因為對手唔掂
唔可以就咁對佢地過份樂觀
而如果幾日後對里爾同埋曼聯又打回原形
今場羸得幾爽都冇意義

p.s.:
1)
般尼連續3場主場撻Q而最終只係搶得1分
考慮佢地之後搶分機會已經唔太多
前功盡廢做升降機既機會已經幾大

2)
近幾個比賽日既最大焦點一定係碧咸
眼見爭取4度踢世界盃在望
偏偏忽然拉斷阿基里斯腱

武俠小說講話廢左人隻腳就係挑斷0個度
可以想像碧咸有幾傷

世界盃冇左佢都幾色唔少
英格蘭亦少左招傍身

2010-3-14

1)
韋迪指特區政府已經同意本地足總下年可以派隊參加中國聯賽
(點解波腫既嘢要經跛腳鴨政府同意?)
但就冇講明踢邊個組別
亦強調要得到亞洲足協以及國際足協既同意
而參賽球隊係咩貨色亦係問題

佢亦澄清只係話如果中國主辦世界盃
會考慮搵香港作為協辦城市
並冇講過中國申辦2026年世界盃
(即係大炮德又吹水!)

另一方面,佢亦考慮為國奧隊增加比賽機會
以增加球員經驗同埋提升水準

2)
利物浦繼續被指準備搵麥利殊或者奧尼爾接手

而托利斯表示如果利記暑假唔增兵
就算下季可以踢歐聯
亦會繼續因為傷兵問題而令戰績停滯不前
而佢暗示如果利記季尾冇積極增兵
就會考慮離隊

3)
軒迪克由於打算5月尾隨隊睇土耳其既3場熱身賽
所以已經拒絕接手科特迪瓦

4)
巴塞隆拿忽然被指有興趣從熱刺收購泰拉拔
這名20歲中場現時被外借去昆士柏流浪

5)
美職盟因為罷工而開咧無期
令當路雲可能再逗留愛華頓多一段短時間

6)
菲臘布朗離隊既賠率急降至1.4倍

7)
雖然前主席 P.Gadsby 提出收購
但係打呲郡方面表明唔會放盤

8)
夏格維斯下星期將可以再次練波
不過被外借既韋碧克就因為膝傷而好可能提早收咧

2010-3-13

近幾日既新聞......

1)
英格蘭足總決定唔會就謝拉特對球証出示反 V 手勢而作出處分

2)
幾段皇馬既消息......

佢地被指打算出價7000萬歐元收購朗尼
而C7透露同費sir仲有電話聯絡
隨即俾英國傳媒指佢想重返曼聯

另外,柏歷連尼表明唔會請辭
不過西班牙傳媒估計賓尼迪斯,摩連奴或者肥安將於下季取代佢
當中以前者最大機會
事緣佢同佢既經理人都同皇馬高層熟絡

另一方面,佢地計劃於內地開辦多間足球學校
而第一間將位於北京

3)
尼斯達因為右膝肌腱斷裂而提早收咧

4)
有消息指科特迪瓦足總會搵杜斯亞領軍
不過荷蘭傳媒就爆料軒迪克依然係接手既大熱門
如果當時人可以說服俄羅斯足總同佢提早解約
佢將會同科特迪瓦足總簽兩個月短期合約

5)
卡比路透露目標至少入4強

6)
傳聞施丹季尾離開皇馬唔做顧問
而接手執教阿爾及利亞國家隊

7)
拜仁方面證實有興趣收購紐亞
而佢地就否認雲高爾將來接手德國隊既傳聞

8)
羅馬被傳睇中加拿斯,迪亞比同埋沙格拿3名阿仙奴球員

9)
幾段車路士既新聞......

杜奧巴再次當選非洲足球先生

佢地只願意同波歷克續約1年
而人工更要減半至6萬鎊
不過如果佢上陣次數有20場
人工可以追加至8萬鎊

而車仔被指打算出價1000鎊收購當路雲

另一方面,車仔被懷疑於05年收購胡禮菲臘斯既轉會
搵咗個無牌經理人幫手
如果屬實既最高刑罰係聯賽扣分

另外,佢地現時只有3號龍門端布爾冇受傷患困擾
下星期鬥國米都好可能要靠佢

10)
伯明翰打算從阿爾克馬爾收購比利時射手迪比利

11)
幾段樸茅既消息......

有史杜利正式請辭既佢地冇於1/3既限期前交核數報告俾有關當局續牌
意味就算羸左足總盃
下季都冇得踢歐洲賽
而佢地決定現階段唔唸賣球員套現
避免影響球員備戰足總盃4強

而格蘭表示球會高層冇跟承諾俾錢增兵之餘
仲問都唔問就要賣人
佢表示唔排除為左咁而季尾離隊

另外,佢地已經裁走85個職員減輕財政負擔
而占士同埋靴達臣發起籌款要求每個球員捐1500鎊
以請返其中8人

12)
反格拉沙組織被指打算搵前球星加入
當中人選包括簡東拿,舒米高同埋碧咸

13)
柏蘭迪尼被傳下季跳槽祖雲達斯

14)
富明尼斯已接納阿仙奴對威靈頓既350萬鎊出價
不過雲加可能會先將佢外借

15)
曼城同當地市政府達成協議
將會擴建球場同埋增加配套設施
總投資高達10億英鎊

另外,佢地再次同保方扯上關係

16)
AC米蘭再次同艾迪巴約扯上關係
而馬體會被指有興趣向佢地收購亨特拉爾

17)
馬加夫承認想將舊部屬米斯莫域帶到史浩克04
而阿仙奴亦再次同佢扯上關係
不過佢表明唔相信球會會賣走佢

18)
比連奴因為右膝韌帶撕裂而要至少休息5個月

19)
賓納特被指成為史篤城150萬鎊既增兵對象

20)
因為球隊於亞冠盃俾對手大炒5球
坦卡特決定向阿聯酋球會阿爾阿里請辭

21)
祖雲達斯忽然同普度斯基扯上關係
不過佢已經透過經理人表明冇意思離隊

22)
辛迪卡蘇拿接受小腸氣手術後既康復進度唔理想
可能成為最新一個因傷缺陣世界盃既球星

23)
摩連奴被發現於坐波監期間
公然於看台向助教教路
意大利足總可能因而對佢加監

而佢公開踢爆巴洛迪利上星期詐病
巧合地國米官網公布佢因為膝傷而缺席尋晚作客卡利亞里既聯賽

24)
班比同埋保拿特於公眾地方講手
當時附近有婦女組織進行示威
事後菲臘布朗公開向婦女組織道歉
亦決定對兩名搞屎棍扣兩星期人工

25)
標準烈治被傳有興趣從愛華頓引入小將高士寧

26)
消息指G.迪亞哥斯天尼準備季尾離隊

27)
中國足總澄清只透露黃俊傑被警方拘查
意味女球証沈黃穎現階段冇同假波案扯上關係

28)
賓尼迪斯同意將小將達比外借到史雲斯

29)
熱刺落實引入16歲贊比亞左閘 E.Mbola
而哈利列納承認活基治提早收咧

30)
白禮頓落實續借小路亞路亞到季尾

31)
韋斯咸被指打算向伯明翰挖角
人選包括施巴斯坦拿臣,賓尼迪斯以及列治維
但亦有傳聞指萬一佢地季尾降班
球隊可能踢走半隊球員

32)
消息指比亞堤將於季尾離開史篤城

33)
李斯特城借用禾漢1個月

34)
昆尼公開表示雖然新特蘭近期戰績奇差
到季尾都唔會開除布魯士

35)
普利茅夫為左改善防守護級
以借用形式引入尼加拉以及津巴布韋左閘 O.Bhasera

p.s.:
收到段片關於一個伊朗球員 Amin Motavassel Zadeh 既好人好事
咁先係體育精神
http://buzzmytime.com/amin-motavassel-zadeh-fairplay

2010-3-12

想講下近兩隊擁有卡卡既球隊......

皇馬大可以埋怨上半場羸盡形勢都只係羸1:0
而埋下輸波伏線
再死撐下半場適應唔到對手變陣就而飲恨

但實情係銀河艦隊已經連續6季16強出局
年年都似鐵達尼號咁得個華麗外殼

而講得更白既係佢地衰在防中好屎
02年係佢地最後一次羸歐聯
03年暑假貪1600萬鎊而賣走馬基里尼後
球隊中前場人腳無論幾咁華麗
都冇本事再挑戰歐聯

今場佢地話對手變陣後太勁而招架唔住
其實如果防中夠堅可以做好掃蕩兼回防既操重嘢
對手點變陣都唔使驚

偏偏今場停賽既沙比只係擅長控制節奏,長傳同埋死球
兩個迪亞拉只係比前輩馬基里尼高頭大馬
講功力就連一半都冇

段佑買卡卡既錢足以買晒馬斯查蘭奴同埋艾辛
可惜高層個心只係掛住搵錢
更唔認清明星隊從來只適合踢表演賽
各自為戰都天下無敵怕且只係打機既情景

另一邊既奧脫福就有萬人迷回歸
(精華: http://www.dailymotion.com/video/xcj4hf_manuvsacfh_sport)
不過場波未踢已經分左勝負
因為而家唔係踢沙灘足球
慢手慢腳就幾好波都係下風波

加上紅黑兵團聖西路出擊都頂唔住朗尼
作客仲冇埋尼斯達兼下半場要搵岩布仙尼去客串中堅
唔通碧咸回歸
費sir會打個折頭唔羸得咁盡咩

賽後加利安尼條擦鞋仔仲要死撐後防唔夠腳先會輸
實情係唔多肯買人
邊可能成季都齊腳

貝老冇咁多錢3線都增兵
結果頭重尾輕到離譜
近兩年既新防守球員當中只得兩個比較有名
亦只不過係零機價既費文尼
以及要尼斯達傍住先識踢波既泰亞高施華
最終唔夠腳就濫竽充數借幾件二打六

p.s.:
高層絕對有能力搞到隊波屎晒
近年捧皇馬同埋A米都幾唔開心

不過更沮喪既應該係香港球迷
跛腳鴨政府同埋無能波腫廢到街知巷聞
前者仲笨實到俾130萬搵人寫左份專題報告
顧問公司交既功課居然同網上討論區搵到既網民意見冇咩分別
仲要抵死到目標他日打入世界排名前80
都唔知點解要俾咁多錢去養班不食人間煙火既天才

左派河蟹收到份抄返來既功課
又只係官腔講幾句
聽到佢咁講真係把幾火

2010-3-11

想講阿仙奴大炒波圖......

主隊冇晒近兩任隊長
艾蒙尼亞又明顯只係替工
賽前小弟曾經唸過
冇一個大佬輩領軍既影響其實仲大過首回合輸1:2

加上 match preview 提及兵工廠踢歐洲賽
原來已經有32年未試過靠次回合反勝
點睇都唔算係好有韌力既球隊

不過波圖後防兩度送禮就或多或少抵銷左這兩方個負面因素
佢地雖然冇因為後防兩度送禮而亂晒陣腳
仲一度為復任正選既艾蒙尼亞帶來麻煩
不過總比數由領先變落後始終係鐵一般既事實
而佢地追唔返1:2亦埋下越輸越多既伏線

賽後英國傳媒自然將職業生涯首次連中三元既賓特拿捧到上天
英國太陽報仲話要為一直勁插大舊衰而向佢道歉
不過佢幾年先有一場代表作
唔足以令小弟將佢既負面評級上調

最令小弟最有好印象既其實係拿斯尼
佢先護空門令球隊唔使俾波圖追成1:2
否則冇經驗既小兵肯定進退失據
之後以一敵三既金球仲正式解決左波圖

而艾沙維同埋伊保爾亦都有料到
5個入波有3個都關前者事
不過美中不足冇波入
唔能夠趁機重建信心入波

而後者只係踢左半個鐘
就先後扭過龍門入波同埋搏到12碼俾賓特拿埋齋
查實佢前後咁多位都踢得
雲加千祈唔好為左慳錢而益左巴塞

p.s.:
1)
場波既精華:
http://sports.i-cable.com/uefa/ucl/videoPlay.php?video_id=879

2)
拜仁入到8強
除左多謝奧維保既黑哨再現
仲要多謝洛賓既神來之筆
條友如果唔係超級玻璃腳
戰鬥力同埋身價都應該唔會低過列貝利

2010-3-9

近兩日既新聞......

1)
蘇拿被傳有下台壓力

2)
拜仁雖然願意為列貝利而擴軍
不過佢俾人挖角既機會依然好大
既有版本指巴塞肯用保贊作為交易條件
又有傳聞指肯俾大額現金既車路士會係最終羸家

3)
阿古蘭尼雖然冇正選兼有意甲球隊搵佢回流
不過佢依然透過經理人否認離隊傳聞

4)
列文證實唔會同史特加續約
意味佢按計劃季尾掛靴

5)
丹尼爾同巴塞仲未達成續約協議
消息指車路士打算出價2500萬鎊收購佢
再將保辛華賣去拜仁同這間德甲球會打好關係

另外,車仔令人意外地同艾迪巴約扯上關係

6)
保方透露如果祖雲達斯下季冇份踢歐聯
佢會考慮離隊

7)
幾段阿仙奴既新聞......

消息指雲加只準備同加拿斯續約1年
而週薪仲要減半至4萬鎊
就算到時約滿後再續約會有50萬鎊獎金
都唔似可以打動佢下季繼續留隊

早前羅馬方面表明唔會引入加拿斯
不過雲尼亞里偏偏唱反調話想同佢再次合作

另外,兵工廠被傳打算向巴勒莫出價900萬鎊收購艾保靴南迪斯
19歲既佢係烏拉圭U-20箭頭

另一方面,雖然消息指法比加斯肯定缺陣(煙幕?)
不過蘇甘保就趕及復出
至少唔使靠豬達

8)
樸茅既部份球迷準備另外成立一支名為FC樸茅既新球隊踢地區聯賽
佢地準備籌旗100萬鎊作為營運開支
而球員班底就來自樸茅現時既青訓產品以及地區球迷

而財困既樸茅被迫放棄D.杜錫之餘
仲可能有耶比達因為膝傷而提早掛靴

9)
彭拿典奈高斯被傳可能接收希比

10)
新特蘭以及富咸都有興趣接收比耶
不過佢既週薪就成為轉會障礙

11)
當奴雲透露仍然有機會以借用形式繼續效力愛華頓

12)
英國傳媒指國米打算季尾出價800萬鎊收購贊拿斯

13)
法林明高方面否認法比安奴吸毒醜聞
不過就承認佢最近再次經常劈酒
而佢上星期先於公眾場合同未婚妻大打出手

14)
些路迪表示準備同保路鍚傾續約
剩返年半合約既佢多次同拜仁扯上關係

15)
贊古奴夫斯基宣佈季尾離隊返祖家落班

16)
迪斯高既經理人透露AC米蘭可以用亨特拉爾
作為收購這名波斯尼亞射手既交易條件

17)
幾段曼聯既新聞......

早前有報導指有人出價10億鎊收購曼聯
英國傳聞發現開價既竟然係球員經紀沙哈維
不過佢地現階段仲未查到邊個先係佢背後既大老闆

而左腳蹠骨骨裂既布朗成為最新一個因傷缺席世界盃既球員

另一方面,古斯錫放風冇出場機會就會考慮離隊

18)
4名中國球証涉嫌做假波而被捕

19)
柏蘭迪利再次被傳世界盃後接手意大利

p.s.:
加歷查表示利物浦要搵7個新兵先有力爭英超
有睇過尋晚場屎波既都可能會同意

歷史性輸俾韋根已經羞家
仲要俾對手兼死火射手洛達歷加反底
韋根射成2:0既機會仲大過佢地追成平手既機會

禍不單行既係謝拉特做出反V既粗口手勢去串球証
好可能要停賽兼俾卡比路褫奪隊長臂章

2010-3-8

幾場波想講:

1) 狼隊對曼聯

睇表現同埋戰局發展
好難想像兩隊分別來自護級組以及爭標組
如果唔係狼隊繼續唔識入波
曼聯肯定失分而回

而冇左朗尼既曼聯近乎死火
貝碧托夫根本唔係正箭頭既好人選
好彩朗尼落實復出鬥AC米蘭
否則單靠hea碧同埋馬美迪奧夫都幾大鑊

2) 艾美利亞對巴塞

之前以為米列圖先係最大隱憂
點知兩度出錯既竟然係佩奧爾
好彩有美斯入返兩球補鑊

不過講到廢其實首推伊巴
條友踢波隱形兼無定向扯火
而家要停賽加上亨利又雪到硬晒
哥迪奧拿好可能要轉用矮仔陣

不過有危就有機
因為將恩尼斯達定位前線
中場就好可能用多個工兵
只要耶耶托尼回勇
佢應該可以幫到後防好多

3) 皇馬對西維爾

連卡斯拿斯都爆鑊
防中,中堅同埋二閘都各有問題既皇馬只係失兩球根本算少

不過好彩前線有料到
如果唔係柏立守到上晒身
兼且主場門框唔幫手
入半打怕且先係最低消費

踢得最好既首推C7
條友自由人既踢法令對手好難凍結
而幾分鐘內追返1:2既入波亦係球隊既還魂丹

柏歷堅尼既調動亦好關鍵
相對於早前輸俾里昂
今次好快就下定決心豁出去
先係換走可有可無既迪亞拉同埋冇咩助攻力既艾比路亞
而後備入替既古迪同埋雲達華治都交到貨
唔花巧而高效率既踢法令球隊多左唔止一條輸血管
就算對手後段踢多個防中都頂佢地唔住
而佢及後用魯爾入替卡卡
亦反映唔再拘泥單箭頭踢法

希古恩亦都踢得唔錯
不過就真正係冇運
相對於雲加評論賓特拿踢得好但射極都唔中框
佢應該考慮季尾羅致這個真正踢得好既阿根廷射手

不過卡卡既表現就比較沉
根據柏歷堅尼既排陣習慣
中路唔會有進攻中場
卡卡雖然勤力返中路搵波踢
偏偏有時又要面對塞車既問題

以前有路人甲話卡卡可以copy施丹既踢法同C7合作
不過實情係C7既活動範圍比當年既費高更廣闊
自由度更大到係其他人去遷就佢
柏歷堅奴怕且現階段都仲未為卡卡成功定位
要做銀河艦隊既星級成員
其中一個可能難度絕對係要改變踢法

p.s.:
紐卡素大炒班士利六個一皮
一字記之曰勁
最衰冇直播睇唔到古迪利斯扮蜘蛛俠

2010-3-7

近幾日既新聞......

1)
幾段曼聯既消息......

奧雲幾日前對維拉拉傷大腿
醫生經檢查後發覺情況嚴重
佢將於聽日接受手術
提早收咧亦意味佢一定冇份去南非
而費sir就表示仍然準備季尾同佢續約

不過費sir就要面對前鋒荒既問題
由於朗尼可能缺席對AC米蘭既歐聯賽事
陣中射手只有貝碧托夫同埋馬美迪奧夫

而佢地落實以22萬歐元從標準列治購入比利時U21左閘維美積
雙方簽約3年

另一方面,英國傳媒指格拉沙雖然將曼聯估值15億鎊
不過估計12億鎊亦足以令佢地割愛

而以K.夏里士為首既紅武士堅持佢地有足夠資源
佢亦透露陣營已經有60個有實力既投資者

2)
英超行政總裁史高達摩亞表示
由於季後賽方案唔能夠得到多數球會既支持而要擱置

3)
俄羅斯足總被傳開出630萬鎊年薪兼免稅既天價合約
利誘卡比路於世界盃後跳槽

4)
由於加歷查要有保證下季仲係正選先肯續約
令賓尼迪斯決定延期同畬傾續約
當時人亦暗示可能約滿後轉戰澳職或者美職

而賓帥再次被傳下季接手祖雲達斯
而報導指利記會從伯明翰搵麥利殊過檔

另一方面,艾達杜蘭透露利物浦係佢轉會既首選

5)
國際足協再度決定唔引入科技幫助執法

6)
國家體育總局副局長崔大林表示可能繼續反腐倡廉
直至見到一定成效

7)
幾段阿仙奴既消息......

雲加表示艾朗藍斯既傷勢唔會影響佢既職業生涯
而佢希望球隊為艾朗藍斯而戰

而雲格透露有興趣羅致美路後
隨即有傳聞指祖雲達斯要求尹佩斯,基治或者沙格拿作為交易條件
不過當時人已經表明現階段唔考慮離開祖記

另一方面,加拿斯仲未落實續約
傳聞佢可能以自由身加盟羅馬
不過這間首都球會已經否認有關報導

8)
車仔唔肯加人工俾祖高爾
傳聞熱刺,曼城,曼聯同埋韋斯咸都想搵佢以自由身加盟

另外,保辛華既傷患比預期嚴重
佢將要再次開刀而提早收咧
而艾辛亦可能步佢後塵

9)
皇馬將簡拿利斯既贖身費定為1億2000萬鎊

10)
文仙尼透露屋企人將於暑假搬去英格蘭定居
傳媒隨即估計佢至少下季繼續執教曼城

11)
賀頓因為右腿輕微骨裂而要養傷6星期

12)
再有傳聞指科特迪瓦足總想搵艾歷臣接手

13)
幾後祖雲達斯既消息......

佢地被傳睇中柏度基洛美以及芬尼斯摩利
前者係效力科隆既巴西中堅
後者係被形容為新基斯普既河床18歲中鋒

而干地被傳下季回歸教波

另一方面,基亞連尼因大腿傷患而要休息1個月

14)
樸茅方面透露有12個財團有興趣收購佢地
另一方面,格蘭早前因為批評球証而被罰1000鎊

15)
愛華頓希望續借當奴雲
不過洛杉磯銀河已經表明冇得傾

16)
維拉利爾好可能於季尾賣走羅斯套現
AC米蘭,祖雲達斯同埋拿球里都被指有興趣收購佢
佢既身價亦已經去到2000萬歐元

17)
燕豪芬落實同雲達美迪簽短期合約到季尾
如果佢表現理想
將可再得到兩年新約

p.s.:
1)
西班牙傳媒爆料
由於成龍旗下既基金會承辦皇馬既東亞之旅
令皇馬可能將其中一站由南韓改為香港

不過雖然戲金比最初既300萬歐元版本平左70萬歐元
但要回本依然有幾大難度
除非搵到好多贊助或者有人包底
否則波飛將會係近年最貴既一次

2)
伯明翰上季後半年忽然出現1600萬鎊虧蝕
全季埋單蝕左2000萬鎊
楊先生暗示俾人搵笨

不過實情係條友見伯明翰冇負債
兼想搵當地市政府俾撻地佢地起新球場
再於原址起物業搵錢
就仆都仆唔切入主
而蘇利雲同佢幾個戰友向來俾人懷疑係英超老千
條友俾人搵笨既實情怕且係貪字得個貧

3)
阿祖安奴,泰維斯以及艾夫蘭成為最新一批俾傳媒捉到偷食既球星
類似新聞實在已經睇到厭

2010-3-5

睇週中太公波
除左睇到普遍唔靚既新波衫
仲可以睇埋佢地幾近最後階段試閘

冇得睇至愛德國同埋意大利
不過如果唔想打爛電視
應該慶幸冇得睇

兩隊前線死火固然令人憂心
後面都唔見得令人安樂
當中睇精華見艾達過早出迎搞到輸波
再唸起佢早前超樣衰'軻'蛋
日早曼鋼門既金漆招牌近兩年俾佢同埋列文敗晒

而賽後肥馬語無倫次
過份囂張怕且只因谷左太耐
不過佢似乎忘記左接手後打親真軍都冇場好波

英格蘭方面
賽後有幾樣嘢幾可肯定
祖赫特雖然英超表現好過格連
不過無奈今次去南非多數齋坐兼陪練

而除非布歷治反高潮願意同泰利做隊友
否則拜恩斯一定入選
不過出場機會就要視乎艾殊利高爾既康復進展

哥治都應該可以同希斯基夾份成為朗尼既拍檔
不過邊個先發就要睇對手

最令卡比路頭痛既一定係中場
而家肯定有正選席位應該只得巴利
右翼禾確特既表現時好時壞
偏偏其餘幾個選擇又各有問題
加上雙特問題由始至終都未解決
佢老人家如果唔下定決心收起林伯特
影響一定同信錯格連一樣咁大鑊

小弟都睇左少少西班牙場波
佢地冇出全力都羸或多或少有運
不過都睇到法國死氣沉沉

至於巴西方面
羅賓奴雖然表現好搶
不過小弟依然懷疑佢細波好型,大波隱形
始終佢仲未於一級賽事證明過佢有頂班實力

而相對於其餘列強
鬥牛勇士同埋森巴隊既人腳幾近敲定
反映佢地表現比較對辦

另一方面,
祖國作客葡萄牙輸波都依然羸盡口碑
小弟之後會完整睇返一次
佢地應該係小弟睇波以來防守最集中既中國隊

場波亦再次反映葡萄牙破密集既本錢唔多
佢地萬一要同巴西以及科特迪瓦計得失球
將會相當蝕底

p.s.:
想講下香港隊
唔得閒而冇得去睇香港軒迪克既最後一場
而家既代表隊雖然唔係脫胎換骨
但至少睇到改善既曙光
球員體能更係近年最好

金指導要專心教南華唔難理解
畢竟羅神先係佢老闆

而羅神提及費事俾外界炮轟選人同埋用人偏私
不過傳聞大熱招積咪一樣係羅神既人
他日始終都會俾人抽水

原諒小弟小人之心
金指導可能只係羅神同足總日常交涉或者合作既籌碼
隨時之後有機會再教香港
咁亦會係香港隊既福氣

2010-3-4

1)
科特迪瓦足總證實斟酌軒迪克
不過由於佢仲未同俄羅斯足總達成解約協議
所以仍未落實接手

而艾歷臣被發現去左睇佢地對南韓既友賽
一度有報導佢可能接手
不過佢已經即時否認

2)
英乙球會馬高斯菲特領隊阿歷山大前晚昏迷
送院後證實不治
終年53歲

3)
歐洲足協同意將有關財政公平競爭既推行日期押後至2015年

4)
消息指拉爾拿已同意續約到2015年
而卡積亞向傳媒透露首選轉投利物浦

5)
有分析指列貝利最終會加盟車路士
事緣巴塞已轉移目標至大衛施華
而皇馬又因為佢既健康問題而唔肯俾至少4000萬鎊轉會費

6)
法林明高否認有興趣羅致迪高既傳聞

7)
阿馬利終於收到意大利護照
納比將可以正式徵召佢

8)
伯明翰以及莫斯科火車頭仍有興趣羅致柏夫奴真高
而最近被哈利列納解凍既佢就表明季尾先會決定去向

9)
雲加透露仍有興趣羅致美路

10)
幾段曼城既新聞......

米高莊遜涉嫌疑上年 12月襲擊一名曼聯球迷
而被警方拘捕同埋落案告佢傷人罪

而韋爾斯外借到保頓後唔受重用而公開表達不滿

另一方面,比拿美再次同熱刺扯上關係
不過消息指曼城企硬要對方用迪科爾作為交易條件

另外,柏度夫被傳約滿後以自由身轉投祖雲達斯

11)
保羅赫特將會接手水晶宮
不過後衛 N.Clyne 就可能於季尾跳船去伯明翰

12)
森林成功從米堡截劫佐治保特
佢將以借用形式效力到季尾

13)
愛華頓被指打算季尾向西布朗出價600萬鎊收購杜蘭斯

14)
消息指英格蘭稍後仲會有兩場熱身賽
對手分別係墨西哥以及日本

而里奧費甸南透露卡比路仲未通知佢接任做隊長
不過佢表明自己係最佳人選

15)
樸茅因為財政問題
而波都未踢就同D.杜錫解約
佢好可能會轉投史篤城

16)
比耶透露考慮季尾離開維拉

17)
拖連奴班主決定放盤

18)
莫耶斯承認有興趣從士砵亭
引入莫天奴以及23歲射手 Y.Djalo

19)
前國米射手卡隆落實加盟中超既陝西滻灞

p.s.:
1)
傑志今晚8點於科大同主隊踢表演賽籌款
場波免費入場
賽後會有簽名會同埋即場募捐
有興趣同埋時間既可以去做下善事

2)
聽日先再講太公波

2010-3-3

1)
卡比路承認會於世界盃後同英格蘭足總傾去向問題
不過就否認下季接手祖雲達斯既報導

2)
美職聯方面否認碧咸於世界盃後重返歐洲發展既傳聞

3)
由於皇馬同希古恩遲遲未就續約達成協議
曼城被指打算趁機搶人
不過出價一定唔係合約訂明既1億5000萬鎊贖身費

4)
拜仁方面準備同雲高爾續約

5)
安察洛堤否認世界盃後接手意大利
而文仙尼就表示希望將來有機會執教藍軍

6)
阿仙奴以及熱刺再次同格連扯上關係
而韋斯咸就視彼德堡既李維士為替補人選

7)
維拉被指有興趣收購唔太受文仙尼重用既艾利蘭

8)
被恐怖份子襲擊重傷既多哥後備龍門 K.Obilale
將被送返法國繼續接受治療

而早前去酒吧被槍傷既卡賓拿斯
就被送去另一間專科醫院接受新階段既康復治療
而佢既主診醫生表示未知佢最終可唔可以復出

9)
現時負責接管樸茅既安祖尼高被指同樸茅老闆有利益關係
英國稅局表示擔心影響包括佢地在內一眾債仔既利益

另一方面,甸丹尼以及威爾遜
可能分別跳船去布力般流浪以及新特蘭

10)
巴勒莫方面表明就算有5000萬歐元
都唔會賣走近日同國米扯上關係既柏斯杜爾

11)
紐卡素被指打算暑假收購施巴斯坦拿臣

12)
施治可能於兩星期內復出

13)
曼聯被指同車路士爭奪賓菲加左閘大衛雷斯
而前者下季可能將普斯邦外借去格流

p.s.:
皇馬連續5年成為全世界收入最高既球會
生財有道同埋歐元強勢都係主因
不過用錢好似倒水始終令球隊財政狀況長期唔健康

2010-3-2

近兩日既新聞……

1)
前中國足協主席南勇以及楊一民
尋日正式因為操縱國內比賽同埋涉嫌受賄而被拘捕

而已經坐緊監既賈秀全就準備爆料
供出一批十幾年前有份打假波既球員名單
當中包括幾名國家隊主力

2)
軒迪克即將短期接手科特迪瓦

3)
迪高透露已同肥安攤牌想離隊
佢因為家庭理由而要返巴甲落班
傳聞法林明高有興趣接貨

4)
幾段曼聯既消息......

K.夏里斯已著手同財團代表會面商討集資
消息指佢地目標季尾籌旗10億鎊收購曼聯
05年以7億9000萬鎊既價錢入主紅魔既格拉沙家族
就再次發表聲明冇興趣放盤

而費sir否認季尾踢走奧雲既報導
仲話下季依然會重用承認冇機會重返英格蘭代表隊既奧雲
而加利仔透露將於季尾決定續約抑或退休

另一方面,曼聯再次同迪馬利亞扯上關係
不過傳聞3600萬鎊轉會費未免過高

5)
傳聞巴西足總想搵李安納度於世界盃後接手

6)
希比由於同教練哥羅斯炒大鑊
決定季尾借用期滿後重返巴塞
而維拉亦被傳有興趣收購佢

另一方面,佢既隊友卡卡奧就被指成為西維爾將來替補法比安奴既對象

7)
納比證實尼斯達唔會復出國家隊賽事

8)
史基泰爾證實要養傷8星期
而消息指利記提出以10萬鎊週薪既條件同馬斯查蘭奴續約

9)
禾洛克答應跳船接手昆士伯流浪

10)
艾朗藍斯最快可於半年內康復
而查馬克再次被傳已經同阿仙奴簽約

11)
熱刺同埋華倫西亞成為最新兩間同迪亞高艾維斯扯上關係既球會
而早前因為轉會費問題而未能加盟前者既辛圖
被傳成為皇馬暑假既增兵對象

p.s.:
上星期六主場硬淨既般尼居然輸俾財困樸茅
頭號罪人一定係連續兩次禁區玩波玩出禍既傻佬卡里斯利

不過條友原來球場以外聰明到震
讀書成績不但係英超球員當中既高材生
亦兩度上電視台玩遊戲玩到有獎攞
02年第一次就羸得英國最有腦足球員既美譽
最近上星期初又羸左另一個遊戲
邊唸到佢幾日之後忽然由天才變白癡

2010-3-1

幾場波想講:

1) 車路士對曼城

車仔再次因為防線失誤而輸波
真係超抵死

希拉里奧向來俾人睇穿佢應付傳中有問題
點知原來反應同埋封遠柱都唔係英超水平

比列堤俾人趕出場係過嚴
不過佢既失誤令輸到兩球既車仔要空群而出
埋下俾人5個打3個再輸到3球既伏線

而泰利近期因為場外醜聞影響
表現下滑到好似另一個人

佢地加上表現亦有下滑既卡華路,
始終上唔到一線既米基爾
同埋客串左閘,攻強於守既馬路達
整體防守水準原來可以差到令人異常擔心
油王連串既捧盃美夢仲可能因為咁而斷送

而場波賽前布歷治唔同泰利握手係焦點
賽後佢繼續成為焦點
原來胡禮菲臘斯搵埋兩隊波既部份英格蘭國腳
賽後同佢開P散心
怕且林伯特同埋兩個高爾同泰利而家 fd 極有個譜
分化問題始終係車仔以及英格蘭既隱形炸彈

另一方面,曼城有泰維斯復出後即刻生醒
反映文仙尼上星期要佢即刻由阿根廷歸隊
雖然有少少唔講人情
但亦真係有實際需要

2) 史篤城對阿仙奴

兵工廠真係慘勝
消息指艾朗藍斯最少要抖9個月
好彩佢而家只係19歲而康復能力比較強

賽後有評論指由於兩頭馬車唔爭氣
兵工廠可以因為今次意外而一鼓作氣後上爭標
不過小弟始終睇淡佢地
因為佢地中後場實在冇信得過既替補
要雙線發展始終好輸蝕

3) 特內里費對皇馬

主隊每次地頭出擊就例牌前場緊迫
對類似馬略卡既作客虫羸波唔奇
不過佢地把握力一般
加上好多時都後勁不繼
對巴塞以及皇馬等名牌都搞到輸得仲大鑊
佢地既教練岳查有必要因應球隊質素而檢討前場緊迫既可行性

4) 曼聯對維拉

維拉輸波某程度輸經驗同埋心理質素
意外領先反而進退失據
加上今季回勇既鄧尼忽然爆鑊
早已埋下輸波伏線

到曼聯有朗尼落場以及其他球員入局
維拉偷雞既本錢根本已經唔多

另一方面,小弟同意有評論指早段維迪冇俾杜特趕出場係比賽關鍵
但亦要講現階段冇清晰指引球証點樣去處理
球証都唔知可以點做
不過小弟都唔排除佢唔夠吉士於重要比賽初段趕維迪出場

p.s.:
紐卡素而家失少森林11分
越來越近升班

佢地而家繼唸定升班收購巴布爾以及沙耶迪之後
又可能於短期內接收奧哈拉
中場中路唔夠人用既問題可望得到舒緩