幾場波想講:
1) 車路士對曼城
車仔再次因為防線失誤而輸波
真係超抵死
希拉里奧向來俾人睇穿佢應付傳中有問題
點知原來反應同埋封遠柱都唔係英超水平
比列堤俾人趕出場係過嚴
不過佢既失誤令輸到兩球既車仔要空群而出
埋下俾人5個打3個再輸到3球既伏線
而泰利近期因為場外醜聞影響
表現下滑到好似另一個人
佢地加上表現亦有下滑既卡華路,
始終上唔到一線既米基爾
同埋客串左閘,攻強於守既馬路達
整體防守水準原來可以差到令人異常擔心
油王連串既捧盃美夢仲可能因為咁而斷送
而場波賽前布歷治唔同泰利握手係焦點
賽後佢繼續成為焦點
原來胡禮菲臘斯搵埋兩隊波既部份英格蘭國腳
賽後同佢開P散心
怕且林伯特同埋兩個高爾同泰利而家 fd 極有個譜
分化問題始終係車仔以及英格蘭既隱形炸彈
另一方面,曼城有泰維斯復出後即刻生醒
反映文仙尼上星期要佢即刻由阿根廷歸隊
雖然有少少唔講人情
但亦真係有實際需要
2) 史篤城對阿仙奴
兵工廠真係慘勝
消息指艾朗藍斯最少要抖9個月
好彩佢而家只係19歲而康復能力比較強
賽後有評論指由於兩頭馬車唔爭氣
兵工廠可以因為今次意外而一鼓作氣後上爭標
不過小弟始終睇淡佢地
因為佢地中後場實在冇信得過既替補
要雙線發展始終好輸蝕
3) 特內里費對皇馬
主隊每次地頭出擊就例牌前場緊迫
對類似馬略卡既作客虫羸波唔奇
不過佢地把握力一般
加上好多時都後勁不繼
對巴塞以及皇馬等名牌都搞到輸得仲大鑊
佢地既教練岳查有必要因應球隊質素而檢討前場緊迫既可行性
4) 曼聯對維拉
維拉輸波某程度輸經驗同埋心理質素
意外領先反而進退失據
加上今季回勇既鄧尼忽然爆鑊
早已埋下輸波伏線
到曼聯有朗尼落場以及其他球員入局
維拉偷雞既本錢根本已經唔多
另一方面,小弟同意有評論指早段維迪冇俾杜特趕出場係比賽關鍵
但亦要講現階段冇清晰指引球証點樣去處理
球証都唔知可以點做
不過小弟都唔排除佢唔夠吉士於重要比賽初段趕維迪出場
p.s.:
紐卡素而家失少森林11分
越來越近升班
佢地而家繼唸定升班收購巴布爾以及沙耶迪之後
又可能於短期內接收奧哈拉
中場中路唔夠人用既問題可望得到舒緩
2 comments:
本來希望維拉爭下氣
可惜領先優勢太快無左
不過曼聯都抵贏既
奧雲傷出朗尼入替
亦令佢地贏得更輕鬆
雖然只係2:1
不過維拉已經唔似有機會追番平手
小弟睇番宜家陣容
真係想搵個識派牌既中場
奧哈拉做唔做到呢個工作呢
巴布爾就唔好啦
又唔係未衰過
宜家中堅都ok
其實成隊都算夠人用
當然買番一兩件大牌球員又唔同講法
To: 舒利亞
1)
維拉用卡維入替古拿後
一度靠高佬陣俾到曼聯麻煩
維迪仲幾乎擺老烏
不過之後當曼聯適應左
再用各種方法拖時間
維拉其實只得一次有威脅既埋門
不過鄧尼都把握唔到
2)
曉頓否認想引入識分波既高馬斯
明顯佢認為以而家既簡單踢法
都足以應付今季
而數據亦支持佢咁既唸法
3)
奧哈拉唔擅長分波
佢既踢法似古費里
不過搵食位置分別偏左同埋偏右
佢效率幾好
但相比下唔夠古費里好
因為古費里今季於英冠既表現
顯示佢原來亦有一定既入球能力
4)
紐記既重要收購
一定要等到季尾
26/3只會係繼續借人
Post a Comment