1)
蘇拿帥位雖然仲保得住
不過消息指韋斯咸兩個班主準備搵舊部屬麥利殊過檔取代佢
而尋日英國傳媒指副手奇勒因為唔滿意老世足球
早前曾經將蘇利雲遂出訓練場
好有機會要陪葬
佢兩個既年薪加埋高達310萬鎊
兩個孤寒老闆唔捨得賠錢
似乎係佢兩個仲未走人既真正原因
2)
報導指賓尼迪斯早前同打算收購利物浦4成股份既財團會面
仲得到知會暑假有2500萬鎊資金
而賓帥之後同CEO柏斯路一齊游說有離心既球員留隊
消息指當中包括而家表態留隊既托利斯
暫時未知報導既可信程度
不過如果屬實就至少反映新財團唔準備炒賓帥
3)
艾殊利高爾再次被指考慮退出國家隊
不過未知會唔會踢埋決賽週
p.s.:
兩頭馬車各自收起當家射手兼比賽早段各有壓力
最終都可以大炒對手
車仔固然多得林伯特,馬路達同埋施哥夫各有功課交
曼聯亦有貝碧托夫忽然勤力
不過兩條防線其實各有隱憂
特別以車仔為甚
下場作客奧脫福一定要有大幅度改善
而阿仙奴方面
由於受制伯明翰既密集防守以及硬朗攔截
球証韋比又向來有少少偏幫曼聯之嫌
加上法比加斯負傷死頂
兵工廠成場波只係形勢略為佔優
攻不銳守不穩就一樣冇用
加上佢地中路根本唔穩
菲臘斯補時既顏面入波係好有運
不過史葛丹恩又何嘗唔係冇運
補時失波表面睇係兵工廠跌左兩分
但睇晒成場又有少少似係執返1分
雲加賽後記者會爆粗怨對手粗野
倒不如檢討自己增兵點解咁頭重尾輕
而家先傳佢肯俾1000萬鎊收購謝路美保定實在太遲
4 comments:
其實小弟真係覺得蘇拿ok喎
不過老細足球不嬲都黑人憎
車仔大炒維拉七個一皮
真係O哂咀
無睇直播既小弟唔知形勢係咪一面倒
不過無杜奧巴都可以大開殺戒
抵讚
阿仙奴失分
有網友又講笑話後備入替既沙皇仲頹過踢左七十分鐘既正選
成隊宜家好似得法比加斯可靠
唔怪得就算落後唔多分都俾人睇死...
舒利亞:
唔好話俾人睇死啦
連沙皇日前都開口話阿仙奴攞唔到冠軍
佢話俱樂部唔多買幾個球星根本唔掂
不過佢自己都冇貨交又真係抵鬧
十分鐘內像坐跳樓機
無仇報時段入球 真的眼光光望天光
朋友叫我希望嬴歐聯
唉 我都想 他安慰我
因為他唔睇波
巴塞 再會亨利
To: 舒利亞, wtssoccer & 路斯基
1)
蘇拿既190萬鎊年薪
對中型班既韋斯咸而言係偏高
偏偏槌仔幫遇弱越弱
加上前面冇殺手後面冇防守
只係踢得幾好睇連球迷都未必太滿意
何況出名縮骨既兩個 David
2)
林伯特,馬路達同埋施哥夫真係順到爆
維拉上半場都俾到車仔一定麻煩
不過臨完上半場前輸個12碼打窒佢地度氣
加上下半場車仔實在順到得人驚
另外,維拉近年下半季都有俾人大炒既紀錄
上季就試過俾利記大炒5:0
3)
同意法比加斯係兵工廠最信得過既球員
拿斯尼可能因為對手攔截冇咁緊
而於歐聯有料到
不過於英超始終少有佳作
4)
08年歐洲國家盃決賽週
摩連奴已經睇死艾沙維唔岩踢英超
佢既論點係沙皇體能唔好
踢一場好波
下場隨時無以為繼
但另一問題係雲加今季傾向用4-3-3陣式
無論係左邊鋒或者正中鋒
佢既發揮都只係一般
或多或少同冇人夾佢有關
廢到爆既賓特拿冇本事同佢開路
而球隊重心又多數係法比仔
令佢好少有機會做大佬盡情發揮
佢於俄羅斯國家隊有個高大中鋒開路
兼有施哥夫於左路掩護佢
令佢好氣好力既時候想點就點
當然佢依然有體能不足既老問題
5)
兵工廠既人腳始終唔夠深度
最明顯就係中堅同埋防中
希望雲加搵到至少3個好中堅既願望
等左幾年都未實現
而迪亞比以及桑治既進步又冇預期咁快
好想雲加搵返個勁防中
即食之餘又可帶住兩個小朋友
6)
兵工廠歐聯對巴塞
小弟覺得至少主場有得打
心儀巴塞既艾沙維同埋負傷既法比加斯
都各有動力 show off
不過後防就始終有隱憂
Post a Comment