2008-12-31

近兩日既新聞......

1)
利物浦被指即將以900萬鎊既價錢收購格連莊臣
意味傷癒既艾比路亞可能會再踢左閘
杜辛拿回留意甲既機會似乎越來越高

另一方面,拉科既右翼拿芬達亦被指成為利記既增兵人選
消息指350萬鎊可能已經足夠說服拉科放人

2)
基雲被指成為曼城既新龍門人選
而佢地亦被指想向財困既韋斯咸同埋樸茅
收購柏加,比拿美同埋迪科爾

3)
保臣,泰禾,厄遜同埋賓希姆都被指成為紐卡素既增兵人選
不過前二人既身價唔低
兼且未必肯降格踢紐記
所以成事機會只係一般

另一方面,紐記亦被指睇中幾個來自英冠既年青球員
包括雷丁射手奇雲杜里,狼隊翼鋒米高凱利同埋卡迪夫城中場列特利

4)
里昂被指打算向費倫天拿出價2500萬鎊羅致基拿甸奴

5)
迪亞高被指成為國米2000萬鎊既增兵對象

6)
維拉被指打算從熱刺引入戴倫賓特
另一方面,熱刺雖然已經加碼至1200萬鎊
但仍然唔足以打動蘇拿割愛比拿美

7)
勒芒既科特迪瓦奧運隊隊長謝雲奴
同埋國米阿根廷射手告魯斯都被指成為巴塞隆拿既增兵對象
另一方面,佢地既防中基達就被指成為馬賽既羅致人選

8)
歐洲足協方面表示皇馬只可為亨特拉爾同埋狄亞拉既其中一人註冊踢歐聯

9)
祖雲達斯成為最新一間同達哥斯達扯上關係既球會

10)
艾蘭奴被指可能以600萬鎊既價錢轉投拉素

11)
普度斯基,柏仙尼同埋普格恩耶克都被指成為愛華頓既借用目標

12)
薩拉耶達被指可能轉戰西甲,加盟愛斯賓奴

13)
侯城被指打算向格流出價200萬鎊收購盧禾

14)
國米準備同37歲龍門托度續約至2011年

15)
皇馬同埋車路士成為最新一間同奧巴丹扯上關係既球會
這名19歲攻擊球員早前已經被指成為曼聯既羅致對象

p.s.:
1)
尼斯達既背傷問題嚴重
如果之後既手術失敗
佢將要提早掛靴

小弟認為佢係繼巴里斯同埋馬甸尼之後最後既後衛
講級數佢其實比泰利同埋里奧費甸南更高
近幾年只有 top fit 既簡拿華路可以同佢平起平坐
但偏偏俾傷患玩殘
真係好可惜

2)
'外國人'新年快樂!

2008-12-30

謝拉特於星期日賽後同5個 fd 蒲吧消遣
懷疑同1名34歲男人發生爭執,仲繼而動武
個男人塊面被打傷
謝拉特同佢既5個 fd 事後就被捕
同埋被拘留以及接受調查
而家佢同其中兩人已被落案起訴

案發地點星期一停業
以方便警方調查
消息指隔住玻璃都睇到打鬥後地面仍有血跡同埋玻璃碎

事件有好多版本
有話受傷男人係駐場DJ
雙方因為選播音樂既問題而起爭執
亦有版本指身為曼聯 fans 既受害人先撩者賤

利物浦方面最初拒絕回應
而家就話全隊會給予佢 'all the support he needs'
坦白講小弟唔坦心佢會因為今次事件而要坐監
畢竟法律面前有錢人好似真係比較有利
睇當年活基治同埋保耶幾乎打死個亞裔青年都可以唔使坐監就知
但一旦罪成既話
案底就似乎走唔甩

小弟上心既只有兩方面......
一係佢既表現會唔會受今次事件影響
佢唔會因為今次事件而要停賽
但賓尼迪斯可能要求佢休息
而佢自己亦可能會要求放假處理官司
佢有事既話利記都唔會有運行
20年來首個聯賽錦標隨時擦身而過

而更重要既係睇利記已成小弟生活上其中一個重要部份
見謝拉特如見子侄
實際上見佢仲多過見屋企人同埋老死
佢係小弟睇波以來最喜愛既球星
於小弟心目中既地位絕對係一個自己人
知佢犯事既第一個反應絕對係痛心

於小弟心目中只有自衛先可以動武
其他情況一概冇得傾
小弟唔知案發情況
唔可能妄下結論

小弟同意聖人都有錯
不過如果佢真係有咁做
小弟都唔可能盲目話認同佢既行為

上年張春暉犯左傷人罪
本地無數擁南球迷起勢撐佢
何況而家出事既係謝拉特
而家網上應該有無數聲援佢既留言
但撐人都要識得分是非黑白

卡比路寧願繼續用泰利做隊長
都唔肯俾機會佢
小弟曾幾何時唸過係因為佢既老婆有搞事紀錄
而家搞單咁既野
段估佢都仲會繼續入選
但做隊長既機會應該從此唔再出現

(不過小報話賓尼迪斯可能唔再俾佢做隊長既傳聞
小弟就打死都唔信!)

而佢於球場外既健康形象一舖清袋
錢段估會賺少左
文化推廣大使亦應該唔會再有佢份

一時衝動,後果嚴重
大家最好引以為鑒

2008-12-29

近幾日既新聞......

1)
艾殊利宣佈唔賣盤

2)
恩拿同埋保拿特再次被指成為紐卡素既增兵對象
同一時間尼索比亞亦再次被指可能轉投阿仙奴,熱刺或者維拉
而兵工廠就同時被指睇中基雲同埋史堤芬泰萊
而曼城就被指有興趣出價400萬鎊收購奧雲

3)
AC米蘭方面否認打算羅致簡拿華路
另一方面,佢地被傳引入自由身既艾比亞
同埋向羅馬出價1600萬鎊收購麥薩斯

4)
莫斯科中央陸軍被指打算搵鄧納東尼領軍

5)
年幾前同曼聯扯上關係既智利攻擊球員A.山齊士
日前居然向球會烏甸尼斯既官網表示有興趣踢英超兼效力曼聯
自然被意大利同埋英國兩地傳媒連日炒作

6)
施巴基亞正式接掌新特蘭
佢同黑貓簽約年半

7)
利物浦被指有興趣俾3000萬鎊引入格連莊臣,巴利同埋希斯基

8)
雖然再有傳聞指阿古蘭尼成為祖雲達斯1500萬鎊既增兵人選
但羅馬方面透露佢即將續約

9)
拿玻里被指有興趣羅致戴迪約克同埋施哥夫

10)
辛達告魯斯,迪科爾,希斯基同埋艾殊頓都被指成為維拉既新前鋒人選
而前者同時被指成為皇馬既增兵對象

11)
侯城同埋西布朗都被指有興趣引入達葛治

12)
森林同卡特活解約
消息指佢地想搵堅尼接手

13)
熱刺再次被指打算引入史堤芬亨打,達寧,迪斯甸同埋賓科士打
但佢地就否認會收購迪科爾

14)
韋根正式引入哥倫比亞射手利達列加
而佢地亦被指從薩克達收購波蘭防中 M.Lewandowski
這名29歲球員無論耐力同埋制空權都被高度評價

15)
辛拿放風想於1月轉投曼城

16)
富咸再次為南非中場 K.Dikgacoi 申請工作證
另一方面,佢地既長人中堅漢基蘭就被指成為利物浦既新中堅人選

16)
韋健士暗示大菲將會有一個新射手
另一方面,有傳聞指車仔打算賣馬路達俾拜仁套現

17)
奧丹維治被指成為愛華頓既600萬鎊新射人選

18)
士砵亭既21歲巴西射手列迪臣被指成為樸茅既迪科爾替補人選

19)
米堡被指即將以100萬鎊既價錢從水晶宮引入賓屈臣以作為奧尼爾既替補

20)
森多利亞被指有興趣借用巴洛迪利

21)
歐洲足協反對皇馬為迪亞拉同埋亨特拉爾註冊踢歐聯

22)
辛尼特被指有興趣出價1000萬鎊收購伊亞昆達

23)
法拔被指可能回流法甲
加盟巴黎聖日耳門或者里昂

24)
樸茅被指打算向皇馬借用德倫特

25)
艾邦丹斯里好可能於下個月由基達菲轉投小保加

26)
祖維爾向打吡郡請辭

27)
神户勝利船願意將大久保嘉人既叫價
由900萬鎊減至400萬鎊
不過禾夫斯堡仍然想壓價至200萬鎊

而日本另一國腳中澤佑二就被指成為慕遜加柏既羅致對象

28)
曼聯雖然仲未搵朴智星傾續約
不過阿仙奴出價350萬鎊收購佢既新聞仍似係流料居多

p.s.:
1)
米赫洛域為左改善博洛尼亞既防守能力
被指打算向舊老闆國米求救
以迪華奧交換李華士同埋達葛治
不過佢當日同國米不歡而散
最近又同莫連奴搏火
犘連奴唔似肯做順水人情呀?

2)
小弟仲未得閒介紹伊比斯域
自問係上等人既小弟有拖冇欠......

2008-12-28

今晚講既一定係紐卡素對利物浦

利記頭35分鐘既表現簡直係今季既代表作
如果唔係基雲守到上左身
利記羸半打都嫌得少

紐記雙防中加上4個紙板後衛根本冇做好本份去保護個好龍門
佢地頂唔住超水準既利記攻勢冇人會埋怨太多
但連防守死球既時候都發夢就好令人扯火
好似俾釘鑿左0係地下咁郁都唔郁
希比亞助攻都可以有3次機會攻門
問你死未?

如果小弟係堅尼亞
見到上半場不設防既情景
一定跟菲爾布朗學野唔俾班廢柴守衛半場返更衣室

不過利記防線相對下亦只係五十步笑百步
球隊完半場前稍為收油
佢地防守死球唔集中就要輸返一球
失波小弟一定唔會怨拉爾拿
畢竟好似基雲咁上晒身既表現從來只係 bonus
以加歷查為首既防守球員明顯先應該為失波負責
這個失球令小弟忍唔住要為球隊上半場既評分由95減到70

下半場初段紐記係有一段好短暫既虛火
不過利記一個具爭議性既入球就打窒晒紐記
不過話說回頭
雖然就算盧卡斯利華被吹罰手球
小弟都唔會有異議
不過佢既右手全程向下垂
球證唔吹手球你都吹佢唔脤
最終輸波只好怨紐記守衛唔夠集中

而其後入替畢特既謝列美有腳靚罰球中楣
就整定佢地今日冇運行

而對上3段講既野
就令小弟感到今場大勝得來都有瑕疵
因為紐記如果下半場初段順風順水
利記應該要好辛苦先可以袋到3分

不過以紐記防線下半場冇咁恐怖,但仲算中門大開既表現
又或者利記今場整體上瑕不掩瑜既高水準
利記羸波依然具一定說服力
謝拉特之後既單刀波
同埋尼哥搏到既12碼
最終令利記徹底技術性擊倒紐記
如果唔係基雲持續有高水準表現
利記應該可以羸夠半打

p.s.:
1)
幾年前德國有個半紅不黑既龍門贊斯
一場失左3球都令小弟覺得佢勇冠全場
小弟邊睇就邊覺得眼前既基雲比當年既贊斯更勁
基雲好可能前無古人
成為第一個失夠5球都依然當選最佳球員既龍門

但一個咁好既龍門
係唔係值得有班更可靠既隊友呢?
小弟以前睇過一篇評論形容龍門或多或少都有做救世主既心態
不過萬一冇好後衛幫手
就算四師兄上身都只有等死

所以如果基雲有得選擇
佢既心態可能寧願似個冇火但唔使捉賊既老差骨
因為至少天下太平......

2)
車仔失分......yeah!

2008-12-27

3場波想講......

1) 利物浦對保頓

羸三粒兼有74%既控球時間好似好醒
實情係上半場靠死球入波
下半場因為對手冇再龜縮先可以再入多兩球
整體表現頂多值70分
令小弟高興既只有羅比堅尼起孖
因為冇咩比入波可以更幫到一個射手減壓

2) 維拉對阿仙奴

維拉上半場羸晒形勢但輸俾門框3次
之後輸兩球以為輸左9成之際
自己既門框終於爭氣阻住兵工廠羸到第3球
之後大軍壓境,但踢得唔係好既情況下追返兩球
雙方各有幸有不幸
和波依然不失為合理賽果

3) 韋根對紐卡素

41日前紐記主場對韋根
當時小弟認為球證誤判保斯第二面黃牌係場波既轉捩點外
仲有兩個主要 comment
分別係 R.泰萊絕對係紐記尅星
同埋柏拉斯奧斯以及卡達莫技術性擊倒紐記雙防中
這兩個 pt 依然係小弟對尋晚場波既意見
有睇既應該會明小弟講咩

畢特踢防中踢到隱形真係好難想像
相比下柏拉斯奧斯既表現再次證明佢係英超其中一個最好既防中
而佢加上卡達莫既組合體能上又有保證
古費利對住佢地自然好難好似上場對樸茅咁踢得輕鬆
由於佢兩個冇料到
古迪利斯就算踢得幾落力都係冇用
而奧雲,維度卡(安歟魯卡路爾)同埋杜夫冇供應亦自然冇貨交
紐記未失波前先後有3個入波機會
已經係佢地成場踢得最好既時間

另外有幾個紐記球員都好抵插
一係尼索比亞
條友踢中場就係黑洞
踢後防就係陷阱
華倫西亞面對佢基本上想點就點
如果只睇佢兩個既身型同埋表現
隨時以為大人同細路仔踢波
小弟覺得紐記可能真係有需要俾760萬鎊買 M.Sahko

二係巴斯桑治
佢今場波既表現係近幾場最差
上半場補時階段包抄漏油已經俾佢嚇親
下半場輸12碼兼被罰離場其實係佢搵自己笨
因為佢拉衫拉左廿幾碼
旁證亦係一直示意犯規
不過問題係食晒身位既希斯基一直都比佢更有利去保持控球權
球證唔吹都有佢既道理
而入到禁區佢都仲死要拉住希斯基
就只有俾前輩乘機搵著數
(小弟以 3rd party 角度講波,不喜勿插!)

三係史堤芬泰萊
佢雖然後備落場踢佢唔擅長既右閘
不過佢可以俾冇速度既 R.泰萊 幾乎入多兩球就有點兒那過
小弟尋晚覆 comment 話紐記應該撥款買 M.Sakho 同埋一個中場中
但見到紐記冇個似樣既後備右閘
相對於中場中
佢地似乎更值得去搵個可以踢晒右路既球員
去作為比耶同埋古迪利斯既替補

p.s.:
紐記球迷一定狂插卡達莫踢傷比耶
小弟都同意球證就算趕佢出場都不為過
卡達莫其實係小弟近年幾留意既球員
(小弟連打機都有收購佢)
因為佢有幾分謝拉特初出道既影子
不過近兩年越睇越失望
佢同當年既謝拉特同樣有攔截過火既問題
踢波勇而不茅先係好球員
布魯士如果唔能夠好好教導佢
他日只會繼修夫基後
將這名有鬥心,但場內場外都冇紀律既球員放棄

2008-12-26

1)
利物浦被指將於1月以400萬鎊既價錢從韋根收購希斯基

另一方面,韋根而家成為賓納特最有可能既落腳地
不過利物浦 prefer 賤賣佢
而韋根就只想借用佢半季
到季尾再搵佢以自由身加盟

2)
意大利傳媒指車路士打算向國米借用阿祖安奴

3)
堅尼亞向傳媒表示紐卡素出價買既4名球員全數被拒絕
關鍵在於紐記既出價同賣家有一段明顯距離

4)
富林明斯既15歲巴西天才射手威靈頓由於試腳出色
好可能得到雲加提供一份學徒合約

而沙比艾朗素同埋基奧雲高再次被指成為兵工廠既增兵對象
另一方面,雲加被指可能將韋舒亞同埋積森遜借到西布朗

5)
莫斯科中央陸軍既塞爾維亞中場卡拉錫被指成為皇馬最新增兵對象

6)
前利物浦球員拿泰歷,波爾多22歲球員 J.Quercia
同埋朗斯29歲球員 T.Maoulida 都被指成為馬賽既新前鋒人選

7)
雲達不來梅成為最新一支同普度斯基扯上關係既球隊

8)
早前講過紐卡素想斟酌巴黎聖日耳門既18歲後衛 M.Sakho
原來這間法國球會將佢既身價定為760萬鎊
比紐記既600萬鎊出價更高
而消息指佢地要成功引入加拿斯先肯放人

9)
樸茅被指打算從些路迪羅致史葛布朗

10)
法拔向傳媒表示對於被蘇拿冷落而感到失望
佢仲暗示可能會考慮離隊

11)
熱刺再次被指有興趣向波爾多羅致卡雲拿基

p.s.:
板凳球員對於隊際運動有幾重要?
睇下今朝波士頓塞爾特人點輸俾洛杉磯湖人就可略知一二
籃球都係咁
又何況個場更大,更多球員參與其中既足球?

聖誕新年快車檔期雖然今年既場數由4場減到兩場
(其實係 cut 左新年檔期)
但當中有8成球隊要3日內踢兩場波
冇好既替補又點掂?

2008-12-25

1)
消息指皇馬為左成功收購艾殊利楊格
不惜提出一個價值3200萬歐元既 package
以雲達華治加上現金去利誘維拉

2)
費格遜表示曼聯1月唔會買人
但就考慮重召幾件借將
不過波爾多既18歲攻擊球員奧巴坦就依然被指成為佢地既收購對象

3)
賓菲加以800萬歐元既價錢從馬體會買斷雷耶斯

4)
國米被指有興趣向阿仙奴出價2500萬鎊收購艾迪巴約

另一方面,提出以巴洛迪利,貝迪素,域陀奧賓拿同埋大衛迪辛頓當中既3人
去同熱那亞交換迪亞高米列圖
不過交易形式只係借用,而唔係轉會

5)
法比加斯唔使開刀
不過就要抖到4月

而阿仙奴就再次被指有興趣從狼隊收購軒尼斯

另一方面,前車仔意大利中場迪拉保拿由於於拿玻里冇咩出場機會而想離隊
意大利傳媒指佢可能以借用形式加盟兵工廠到季尾
雲加再於季尾決定係唔係買斷佢
而盧保同埋辛拿就係兵工廠既其他中場人選

6)
前阿根廷教練巴斯利向傳媒表示佢收到曼城既 offer

7)
犘達歷再次被指成為祖雲達斯既增兵對象

8)
卡爾瑪既20歲瑞典中場 R.Elm 因為想繼續兼顧學業
而拒絕於1月轉投富咸

9)
意大利傳媒爆料簡拿華路可能會於1月轉投AC米蘭

10)
雖然被指成為熱刺同埋彭拿典奈高斯既增兵對象
不過艾蘭高已經表態唔想離開馬略卡

11)
蘇拿表示1月唔會賣走主力
消息指佢地已經拒絕熱刺對比拿美600萬鎊既出價

12)
辛尼特宣佈只要有球會肯俾2100萬歐元就可以帶走艾沙維

13)
聖伊天既法國射手馬度迪被指成為樸茨茅夫既800萬鎊增兵對象
樸茅明顯想貴價放走迪科爾後搵件平貨補充實力

另一方面,阿當斯被指想搵前隊友伊度取代迪亞拉
消息指這名而家踢緊華倫西亞既巴西中場同時間亦係幾間球會既羅致目標

14)
史當頓決定跟隨麥阿里士打離開列斯

15)
Big Sam 打算搵賓希姆合作
轉會費約300萬鎊
而佢就決定棄用科拿

16)
韋根正式買斷洪都拉斯左閘費古羅亞

17)
堅尼亞表示夏柏,艾美奧比同埋畢特將於拆禮物日前決定係唔係續約
而佢亦表示已斟酌緊4名球員
費費天拿既左閘迪哥斯達被傳係其中一個目標
這名前葡萄牙 U-21 代表同時亦被指係馬賽,曼城同埋米堡既增兵人選

18)
維路素既經理人爆料指仲同費倫天拿方面傾緊轉會
幾日內會有定案

19)
薩爾斯堡紅牛射手M.贊加被傳成為4間英超球會既羅致人選
消息指米堡,韋根,布力般流浪同埋熱刺都想引入這名奧地利25歲射手

20)
些路迪方面表示保路錫唔會於1月離隊

21)
鄧加表示如果阿馬利唔要求必然正選
佢願意召佢入巴西國家隊
而佢亦暗示想搵費倫天拿中場美路入隊

2008-12-24 (2)

近幾日既新聞......

1)
傳聞皇馬下季想搵雲加接手
而佢地已落實以2000萬歐元既價錢引入迪亞拉
另一方面,佢地亦被指打算從韋根收購華倫西亞

不過講到震撼都唔夠賓納特既轉會消息
佢出人意表咁被指成為皇馬350萬鎊既增兵對象
但皇馬既3萬鎊週薪出價只係佢要求既一半
令轉會最終唔成事

2)
法比加斯要養傷3至4個月

3)
消息指新特蘭想俾助教施巴基亞坐正
另一方面,竟然有報導指黑貓想從紐卡素手上搶走堅尼亞
不過當時人就對傳聞一笑置之

4)
路爾斯加西亞被指成為韋斯咸既借用目標

5)
消息指加拿斯向雲加表明想於1月離隊

而艾沙維,恩拿,芬倫同埋泰維斯都被指係兵工廠既增兵對象

6)
禾朗連表態希望由利物浦正式轉投柏林哈化

7)
樸茅被指打算於1月向熱刺出價1000萬鎊收購索高拿
而安格拿就係佢地既另一防中人選

8)
紐卡素被指睇中巴黎聖日耳門既18歲後衛 M.Sakho
可踢中堅或者左閘既佢先後代表法國 U-17 同埋 U-18
不過佢600萬鎊既身價就成為轉會既障礙

而祖安列圖由於同貝迪斯仲未傾掂續約
所以就再次被指成為紐記既增兵對象
不過佢既經理人已經作出否認

另一方面,奧雲表示會於季尾先決定去向
而阿倫史勿夫就再次被指可能被借到愛華頓

9)
傳聞拜仁想於1月搵卡文尼取代蘭昇

10)
路菲斯,麥比亞同埋杜辛拿都被指成為AC米蘭既羅致對象

11)
山齊士取代阿高拿達塊教艾美利亞

12)
尼維特被指想同祖雲達斯續約多一季
而佢地否認於1月從烏甸尼斯羅致迪亞哥斯天尼同埋森伯達
不過佢地依然被指想同國米以及利物浦爭奪利華古遜既新星連拿度奧古士圖

13)
決定同麥阿里士打解約既列斯最終從黑池搵左加利臣接手

14)
慕遜加柏引入熱刺棄將史度迪利,加拉錫同埋23歲比利時奧運隊龍門庇利

15)
李察臣同埋保拿特被指成為保頓既羅致對象

16)
熱刺再次被指有興趣引入達寧同埋艾蘭奴

17)
恩斯表示想執教查爾頓

18)
迪科爾被指成為維拉1500萬鎊既收購對象

19)
多蒙特被指有興趣引入普度斯基
而賓特拿就被指成為拜仁500萬鎊既新前鋒人選

20)
曼城被指有新一批既增兵人選
當中包括高路托尼,比拿美,辛達告魯斯,布歷治,辛拿同埋迪亞高洛迪古斯

21)
米堡被指未能同 MFK Kosice 就斯洛伐克中場 J.Hovancik 既轉會達成協議

22)
雲尼亞里早前透露將來有興趣重返英超
佢隨即被傳有可能於季尾接手紐卡素
但似乎只係吹水新聞居多

p.s.:
Merry X'mas

2008-12-24 (1)

(拖得太耐......)
3場波想講......

1) 曼聯對利加大學

曼聯如願捧盃
錢作怪絕對係主因
令高層同埋費 sir 忽然認真
而球員就算上機前繼續爛蒲爛滾
過到日本都依然交足功課

至於另一個原因就似乎係對手太弱
相對於05年因為球證判左利記3次詐糊而捧盃既聖保羅
或者上年既小保加
利加大學無疑係比較弱
更加係近年最弱既南美代表

睇佢地全場只得一次趁初段深入曼聯防線埋門外
比賽既餘下時間既兩腳有威脅攻門都只係中距離遠射
當中有差唔多半場時間踢多件都創造唔到機會就更加抵死

2) 紐卡素對熱刺

如果只以目標為本
紐記尋晚絕對完成任務
但如果對佢地有要求既話
就應該好難收貨

紐記入既第一球要多謝伊確圖解圍搞到拖泥帶水
奠定勝局既入波雖然有杜夫同埋維度卡既美妙配合
不過前題都係熱刺既防守離晒譜

至於紐記失既一球
艾美奧比控球失誤固然衰
不過成條防線佈越位失敗就仲抵鬧
而佢地完場前幾乎因為發夢而俾熱刺迫和
否則場波就會變成對韋根比賽既翩版

尼索比亞被選為最佳球員
小弟就覺得只因佢有波入
講表現佢唔算好突出
反而維度卡就令小弟有少少驚喜
助攻既靚好踭更加係神來之筆

3) 阿仙奴對利物浦

賽前估和波係因為唔認為雙方有能力置對方於死地
而家中賽果
不過過程就估都估唔到
法比加斯傷韌帶認真無陰公
艾迪巴約既第二張黃牌亦係過嚴

雲加話羸唔到波只因踢少個
小弟就唔多同意
因為佢地有法比加斯既時候都冇本事搞掂利記
何來好意思話最終值得羸波

不過小弟都同意佢地踢少個既時候踢得唔錯
而利記冇趁踢多個而羸波就明顯係捉到鹿唔識脫角
除左兩次攻門貼柱出界
同埋艾蒙尼亞全場都有好表現之外
冇賓帥督軍既佢地唔識得拉邊去踢似乎亦係最終只能和波既原因

而家利記只俾曼聯失少1分
形勢絕對唔樂觀
如果再繼續送分俾弱隊
最終隨時只得一席英超季軍

2008-12-21

由於尋日係舊同學小白大婚之喜(恭喜晒!)
小弟去左飲喜酒而冇交功課
而家總結近兩日既新聞......

1)
迪亞拉承認由樸茅轉會到皇馬一事仲未落實
而佢暗示曼城可能出高價搶佢

2)
國米被指打算向賀芬咸收購波斯尼亞射手伊比斯域

3)
大菲表示如果收到1500萬鎊或以上既出價
車仔會願意放走阿歷斯
而佢表示這名巴西中堅已改變主意決定留隊

4)
尼索比亞被指成為維拉既增兵對象

5)
羅倫好可能於1月轉投AEK雅典

6)
由於保拿特仲未肯同富咸續約而可能於1月被賣走
阿仙奴被傳有興趣以500萬鎊既價錢接貨

7)
由於巴布同史特加只簽約到季尾
加上佢冇教練牌
所以有傳蘇斯達會於下季接手

8)
曼城被指有興趣以900萬鎊既價錢引入厄遜

9)
費特要求同里昂解約

10)
韋根被指打算向墨西哥球會 Necaxa 出價400萬鎊收購洛達列加
這名23歲哥倫比亞射手係U-20世界盃決賽週歷來既最佳射手
於9場波驚人地入左11球

11)
韋斯咸被指想於1月從莫斯科斯巴達引入奧地利後衛史蘭斯

12)
比歷被指成為新特蘭既新領隊人選

p.s.:
英國傳媒爆料一個已婚既英超頂級球星俾人偷拍
拍到佢同一個金髮女郎搞野
而俾勒索10萬鎊
小弟會試下 check 下佢係邊個

2008-12-19

1)
歐聯16強抽籤結果:
國米對曼聯
車路士對祖雲達斯
皇馬對利物浦
阿仙奴對羅馬
里昂對巴塞隆拿
士砵亭對拜仁
馬體會對波圖
維拉利爾對彭拿典奈高斯

2)
利物浦被指打算以700萬鎊另加賓納特從熱刺收購艾朗連儂
而史篤城同埋布力般流浪就被指有興趣羅致賓納特

另一方面,侯城既中堅端納亦被指成為利記既增兵對象

3)
Big Sam 雖然表明唔想賣走主力
不過消息指佢會將辛達告魯斯賣俾曼城換取2000萬鎊資金
加上會方撥款既1000萬鎊
意味佢將有3000萬鎊擴軍

4)
於曼聯苦無出場機會既文路祖同埋韋比克
分別被指成為 Le Havre 同埋西布朗既借用目標

5)
摩連奴否認羅致杜奧巴

6)
洛辛堡既加納中場安南被指成為熱刺既400萬鎊羅致對象

7)
由於泰亞高施華暫時未能為AC米蘭出場
所以阿歷士被指成為佢地既800萬鎊新中堅人選
而消息指油王親自出馬遊說這名巴西中堅留隊

8)
格羅素否認轉投里昂

9)
紐卡素再次被傳打算從屈福特羅致愛爾蘭中場 J.J.O’Toole
而狼隊翼鋒米高傑利亦被指係佢地既增兵對象

10)
麥薩斯被指成為阿仙奴2000萬鎊既新中堅人選

11)
錫週三既英格蘭 U-19 中堅比華士被指成為保頓300萬鎊既增兵人選

12)
西班牙傳媒爆料皇馬一個董事局向佢地透露
暗示C7已同佢地達成秘密協議於下季加盟
不過曼聯方面已發聲明怒插傳聞無聊

另一方面,皇馬決定向昆士伯流浪收回中場柏利祖

13)
就狄亞拉既轉會
阿仙奴可以分到450萬鎊

2008-12-18

1)
Big Sam 落實接手布力般流浪

2)
消息指奧雲拒捕同紐卡素續約
而利物浦,曼城同埋愛華頓都被指有興趣於季尾羅致自由身既佢

另一方面,維度卡,大衛艾加同埋卡卡巴被指將會被紐記放棄

3)
更正:迪亞拉既轉會費大約1800萬鎊
阿當斯表示相信佢可以用收返來既錢去買其他球員

4)
熱刺被指打算向韋根出價700萬鎊收購華倫西亞
而卡雲拿基就被指係佢地既羅致對象

5)
巴布被指成為祖雲達斯1000萬鎊既增兵人選

6)
阿祖安奴被指可能於1月轉投法林明高

7)
保頓被指有興趣向新特蘭羅致李察臣

8)
圖盧茲21歲法國防守球員 S.Mouyokolo 被指成為紐卡素既增兵人選
不過當時人表示震驚之餘
亦表態未準備好轉戰英超

2008-12-17

近兩日既新聞......

1)
恩斯終於被炒
Big Sam 雖然表態無意思接手布力般流浪
但消息指佢同布力般流浪高層見面後改變初衷
而古比士利同埋桑拿士都被傳係新領隊人選
另外,土耳其防中杜基亦被傳會轉任助教

2)
朗尼蓄意踩人心口同埋C7故意抽水
都竟然冇俾人抽後算帳

3)
消息指迪亞拉即將轉投皇馬
估計皇馬最少要俾900萬鎊

4)
哥連泰斯希望引入華朗

5)
傳聞艾蘭奴成為愛斯賓奴1800萬鎊既增兵對象
而祖奧就好可能被借走

6)
格連繼厄遜之後被指成為韋斯咸既套現人選
蘇拿就以劈炮去威脅會方唔好賣人

7)
麥基迪因為紀律問題而俾史特根罰佢兩星期人工兼冇得跟操
但消息指佢準備向些路迪抗議

另一方面,杜錫由未能就個人條件同曼聯達成合作協議
有傳聞指曼聯改為打麥基迪主意
仲願意出價600萬鎊買人

8)
些路迪即將引入捷克 U-21 守衛 M.Misun

9)
伊保爾又話唔打算因為俾球迷狂插而離開阿仙奴

10)
傳聞邵佳一將被科特布斯放棄而轉戰英冠
(雖然有傳科特布斯改變主意......)
狼隊同埋伯明翰都係佢既可能落腳地
不過佢就可能冇機會同鄭智交手
因為史篤城同埋西布朗都打算於1月向查爾頓收購佢

11)
傳聞兵工廠考慮搵奧雲同埋雲邦美以自由身加盟
不過亦有消息指後者即將同拜仁續約

12)
伊度亞度達施華於尋日既預備組賽事踢左頭45分鐘

13)
阿仙奴為加雲賀迪提供一份長約

14)
賓特拿被指成為國米500萬鎊既新前鋒人選
另一方面,標準烈治中場迪科爾再次被指成為兵工廠既增兵人選

14)
熱刺被指有興趣以各300萬鎊既價錢引入迪斯甸同埋卡文尼

15)
曼城方面表示1月一定可以於轉會市場搵到'驚喜'
而基亞連尼就成為佢地1500萬鎊既羅致對象

16)
狼隊既前曼聯射手比歷克被指成為愛華頓既增兵人選

17)
利達被指成為雷丁既新新前鋒人選

p.s.:
繼大菲後
估唔到賓尼迪斯成為最新一個生賢石既英超領隊
好彩賓帥已經做埋手術
星期日仲可以帶隊作客兵工廠

2008-12-16

遲幾日有套卡通片'荒失失奇兵2'上畫賀聖誕
小弟一見到片名就唸住選一個荒失失陣容
早兩日留力留到吞7隻蛋既晨曦(普高)原本 fit 晒
不過由於小弟相信咩冇讀者對佢地有興趣
所有都係從早兩日既4大聯賽搵合適既人選

龍門有拉科魯尼亞既艾蘭蘇比亞
這名28歲西龍門俾人離門50碼笠死
佢比應付傳中波不力既拉爾拿更值得入選

左閘有杜辛拿
自從有左佢
加利仔已經唔再係全英超最慢既閘
而佢多次俾人傳中同埋防守死球發夢
就簡接令利記主場對侯城都要早段失兩球

中堅有加歷查
佢上星期既老烏其實係杜辛拿同埋拉爾拿靠害佢
不過原來佢已經第7次於職業生涯射入自己龍門
咁都唔選佢
隨時令人懷疑小弟寫波唔夠中肯

另一個中堅就有卡拉迪斯
AC米蘭俾祖記兩度用高波偷襲得手
佢同埋贊古奴夫斯基責無旁貸
不過相對於踢慣左閘而臨危客串既後者
卡拉迪斯就抵插得多

右閘有沙加度
拉莫斯旨意年老力衰既佢同亨利鬥快
其實擺明靠害
佢既右路全場俾對手多次針對性進襲都唔怪得佢

左中場有戴倫特
雖然要一個唔夠經驗既防守球員於魯營球場單刀入波係有少少強人所難
但如果佢當時淡定少少或者右腳識踢波既話
場波既戰局已經唔同晒

中場中有波歷克
車仔中場今季冇左艾辛就即刻冇左5成功力
中場廢佢唔使負全責
但最大既責任就依然走唔甩
佢連神來之筆都唔多
今場又一次冇貨交
都唔明點解簡安仲肯同佢續約

右中場係祖高爾
條友仔係好波
不過佢有時於窄位埋門射得好草率
今場上半場既失機係又一個例子

前線3個射手就包括迪科爾,貝特拿同埋馬斯卡拉
如果唔係迪科爾咁敗家
防線依然有漏洞既紐記點可能作客羸樸茅3球

而貝特拿既入選基本上係代表晒全隊
西布朗上至領隊,下至球員都係失失荒
不過貝特拿下半場以救星身份入場搏殺
入唔到波之餘仲犯天條輸12碼
就點都令小弟特別失望

而馬斯卡拉口臭扮勁但作客即刻死火
好心這名卡坦尼亞29歲射手收下把口啦

2008-12-15 (2)

1)
紐卡素向奧雲,艾美奧比,畢特同埋夏柏提供新合約
消息指紐記向奧雲開價8萬5000鎊週薪
比估計奧雲所要求既10萬鎊為低

堅尼亞就表示會盡全力要求會方說服奧雲留隊
消息指一旦雙方談判破裂
熱刺就會乘機出價400萬鎊買人

堅尼亞最有把握留得住既應該只有艾美奧比
因為畢特同埋夏柏都成為其他球隊既零機價增兵人選
保頓同埋韋根就睇中前者
米堡就被指睇中後者去取代水準一般既端布爾

另一方面,紐記被指打算於1月向韋斯咸出價800萬鎊收購厄遜

2)
犘連奴暗示劈酒又劈出禍既阿祖安奴可以於1月離隊
這名巴西滾友仲被揭發同鄉隊友馬爾干去滾

另一方面,白蘭加雖然被發現上個月同杜奧巴飯局
但佢依然表示國米冇必要引入這名科突迪瓦射手
不過佢就暗示基斯普可以於1月離隊

3)
Big Sam 透露冇收到布力般流浪既斟酌
而佢亦表示雖然新特蘭方面冇搵過佢見工
但佢好有興趣接掌這支東北部球隊

另一方面,蘇斯達竟然被指成為黑貓新領隊既可能人選

4)
迪馬利亞被指將於今個星期內加盟皇馬
傳聞拉莫斯亦欽點柏夫奴真高

5)
奇雲戴維斯,堅韋尼鍾斯同埋希斯基都成為車路士既增兵對象

6)
傳聞西維爾已拒絕曼城對法比安奴既2800萬歐元出價

7)
華倫西亞同希古拿解約

8)
迪斯甸爆料話阿仙奴最近搵球探觀察佢既表現

9)
舒韋恩史迪加終於同拜仁續約3年

10)
艾殊利楊格被傳成為皇馬2000萬鎊既增兵對象

11)
熱刺被指有興趣以1200萬鎊既價錢引入祖高爾

另一方面,有傳聞指祖雲達斯打算以伊亞昆達另加1000萬鎊向佢地收購摩達歷

12)
奧歷既經理人否認這名漢堡射手已經同拜仁簽約
現時拜仁同埋利物浦都被指有興趣引入這名克羅地亞球員

13)
由於有消息指加利仔唔會得到曼聯提供新合約
有傳聞指佢會以自由身轉投愛華頓

14)
卡場尼亞同森本貴幸續約兩年

15)
消息指卡富可能於1月加盟蘇古迪斯執教既英格蘭地方球隊加福斯

16)
米禾爾中堅韋赫比被指成為布力般流浪100萬鎊既增兵對象
這名24歲美國球員係利物浦既青訓產品

17)
雲邦美同拜仁既合將於季尾完結
有消息指燕豪芬打算引入這名荷蘭中場

p.s.:
因為對戴臣抽水而好可能俾英格蘭足總抽後算帳既C7 終於做返件好事
佢為一個18歲年青龍門俾4000鎊手術費
仲介紹國家隊既物理治療師為0個小朋友負責復康療程

2008-12-15 (1)

紐卡素踢到12月中終於第一次作客羸波
一羸仲叻仔到炒人3球
佢地於聖占士都未試過咁叻

不過與其話佢地特別醒
不如話樸茅本身冇料到
哈利列納過檔熱刺,蒙達利轉投國米同埋球隊分心歐協盃
就簡單解釋左點解佢地今季跌晒 watt

紐記上半場既射門次數唔夠樸茅多
但其實更加到肉
馬田斯既猛虎射球中柱仲幾可惜
而下半場紐記把握對手兩度交失波而突擊入波
加上格夫里錦上添花
羸波講真算合理

不過紐記防線依然有問題
比耶同埋高路仙尼都試過於後防傳失波
而巴斯桑治幾次俾迪科爾搵到埋門機會
最終冇失波只因基雲守得夠集中
同埋迪科爾冇帶射門鞋
堅尼亞同埋紐記球迷唔可以忽視今場防線仍有既漏洞
唔怪得賽後又傳紐記想出價800萬鎊收購厄遜

3個箭頭,古迪利斯同埋古費利都好抵讚
後者面對既桑恩戴維斯同埋李察曉士只係兩個唔夠班既工兵
大把機會搏堅尼亞既好感
只嫌佢某段時間踢到冇左影

不過小弟覺得最抵讚既係荷西安歷基
這名西班牙左閘一直俾人狂插
今場因為對手麥維巴冇料到而頻頻出擊
上半場既勁射同埋下半場既助攻都為佢爭取到唔少分數
突然間睇到佢原來都有進步既曙光
相對於近兩年退晒步兼成日嗌轉會既足球黑洞尼索比亞
小弟寧願堅尼亞1月賣後者返法國

2008-12-14

想講下尋晚既西班牙國家打呲......

小弟之前寫 preview 撐皇馬攞1分既論點大都正確
意外既係巴塞隆拿全場有65%控球時間
半場仲誇張到72%

而令小弟興奮既係卡斯拿斯上左身既表現
佢用行動向外界抗議佢於各頂足球先生選舉都唔受重視
黃色戰衣加上接連左飛右撲
唔知仲以為眼前既係少林足球既四師兄
皇馬如果唔係有佢
一早輸左幾球

小弟講過好驚拉莫斯打亂章打出禍
條友雖然冇好似賽前傳到咁離譜
但佢既排陣都令小弟睇得好唔順眼
用就快退休既沙加度踢右閘同亨利鬥快擺明搵自己笨
而與其話將看管美斯既責任交俾串演左閘既沙治奧拉莫斯
就不如話美斯係俾犯規戰術所牽制
其實拉莫斯簡簡單單用德倫特踢左閘咪唔使打亂章

皇馬班友其實已經踢左近期既代表作
但正如舒利亞所講防線唔穩始終係皇馬既死症
亦解釋左佢地點解唔可以全身而退
生波同埋12碼都唔使輸
偏偏衰在一球死球

巴塞隆拿而家已經拋開皇馬12分
其他球隊又未夠班威脅佢地
今季西甲其實已分勝負
而巴塞隆拿可唔可以羸埋歐聯
關鍵在於美斯既健康,防線水準,中場截擊
同埋哥迪奧拿識唔識 balance 球員既出場時間

而皇馬方面
爭聯賽第二同埋歐聯應該係佢地既目標
不過拉莫斯同埋米積杜域之間既協調會係成敗關鍵
而家傳緊幾日內會有新翼鋒加盟
又有傳拉莫斯欽點柏夫奴真高
但皇馬其實最 urgent 搵既係好後衛
特別係中堅同埋左閘

而米積杜域買既人又未必岩拉莫斯心水
講真拉莫斯自己連用 4-4-2 定係 4-3-3 都未攞定主意
又點可以唸人腳

就算當佢定左陣式
柏蘭卡同埋查維加西亞等新仔有上位機會既同時
佢敢唔敢順勢棄用魯爾同埋古迪亦係 unknown
而沙維奧拿,軒斯,比比等球員仲有冇機會繼續呃飯食都未有定案

不過以拉莫斯於西甲既往績
同埋皇馬整體實力
有條件相信皇馬下半季可以撥亂反正
至於拉莫斯季後既前途暫時就係後話

2008-12-13

1)
國際足協公布世界足球先生最後5強
包括C7,沙維,托利斯,卡卡同埋美斯
小弟既心水卡斯拿斯繼歐洲足球先生選舉後再一次被忽視......

2)
有個叫 Afzal Kahn 既實業家被指有興趣入主紐卡素
但佢有冇足夠財力就好成疑問

3)
利物浦,保頓同埋紐卡素都被指睇中圖盧茲法國U-21中場 M.施素高
消息指圖盧茲已拒絕紐記對這名19歲球員既問價

4)
AC米蘭方面透露球隊唔可能從富明尼斯引入泰亞高施華
因為這名24歲巴西中堅持有既係巴西護照
偏偏球隊就冇位容納其他非歐盟球員

5)
燕豪芬曾向車路士提出借用阿歷斯,但被拒絕

6)
前利物浦隊長列納出任車路士既兼職預備組教練

7)
米堡既21歲技術型中場莊臣被指成為皇馬既羅致對象

8)
富咸同埋紐卡素都被指睇中赫斯隊長比拿
這名23歲中堅因為制空力強而於今年起被選入蘇格蘭代表隊
身體質素同埋領導能力亦係佢既賣點

9)
尹巴士頓表示考慮借走4名球員
令球員人數減至24人
另一方面,佢地被指打算向巴塞隆拿借用保贊

10)
英格蘭足總宣布將1月既轉會限期延長到2月2號

11)
伊保爾由於被球迷狂插而有離隊念頭

12)
歐洲足協宣布將會睇帶去 follow up 朗尼踩人單野
唔排除抽後算帳要佢停賽3場

13)
傳聞曼城願意開價25萬鎊週薪以吸引保方加盟

14)
薩拉戈薩巴西射手奧利華拉拒絕甘美奧對佢既斟酌

15)
愛華頓方面證實球隊唔打算於1月引入拿臣

16)
李榮杓宣布同多蒙特續約1年

17)
卡文尼由於仲未同愛斯賓奴達成續約協議
有消息指佢將於1月被賣走

18)
舒希化同禾夫斯堡續約到2012年
粉碎佢轉投紐卡素既傳聞

19)
薩克達既20歲巴西中場波吉斯被指成為西維爾既增兵人選

20)
侯城成為最新一支同迪丹尼扯上關係既球隊

21)
利華古遜已通知希臘射手基卡斯可於1月離隊

22)
傳聞賓特拿將被外借到西布朗

23)
祖雲達斯被指打算向華倫西亞出價1500萬歐元收購馬達
這名20歲小將可踢左翼同埋前鋒

24)
法林明高方面證實想從國米引入阿祖安奴
加上國米被踢爆派左球探去睇車仔聽日對韋斯咸既比賽
以觀察杜奧巴既表現
隨即再有傳言指國米打算搵佢去取代阿祖安奴

p.s.:
記得聽朝5點起身睇西班牙打呲
好多人認為巴塞隆拿羸硬
小弟都同意皇馬係下風波
但有幾點亦令小弟信佢地依然有本錢攞1分

1)炒蘇斯達令球員士氣大振
2)拉莫斯以前教西維爾對住巴塞隆拿不落下風
3)皇馬萬一輸波就會落後12分,冇路可再退
4)如果哥迪奧拿今晚唔用足兩個正統防中,隨時搶唔羸加高同埋古迪
5)巴塞隆拿兩閘向來都係死位,拉莫斯仲要睇穿丹尼爾既弱點

唯一令小弟為皇馬擔心既始終係佢地既防線
向來不穩之餘
仲驚拉莫斯打亂章打出禍
梅斯達同沙治奧拉莫斯換位已經令人唔放心
要靠沙加度客串左閘睇實美斯就簡直係 mission impossible

2008-12-12

1)
車路士被指想於1月以600萬鎊既價錢引入薩基
不過韋根方面已經否認有關傳聞

2)
雲達沙同曼聯再續多1年約
粉碎佢季尾退休既傳聞

3)
華倫西亞成功撲水4000萬歐元
舒緩破產壓力

4)
法比加斯表示打算於同阿仙奴完成合約後重返巴塞隆拿

5)
AC米蘭,西維爾,奧林比亞高斯同埋彭拿典奈高斯
都被指成為阿歷斯1000萬鎊既落腳地

6)
羅比堅尼否認重返熱刺既報導

7)
鶴臣被指成為挪威足總既新教練人選

8)
肯雅足總同教練 F.Kimanzi 延長合約1年

9)
由於加度素提早收咧
桑馬干被指成為AC米蘭1500萬鎊既新防中人選

10)
祖安列圖由於仍未同貝迪斯達成續約合作
這名32歲西班牙中堅被指成為紐卡素既新中堅人選

11)
索高拿否認轉投皇馬既傳聞

12)
利物浦同埋曼聯都被指有興趣向熱刺出價800萬鎊收購巴里
而熱刺就被指打算搵禾洛克作為500萬鎊既替補

13)
厄遜同埋比拿美都成為曼城增兵既最新對象

傳聞週薪高達7萬鎊既尼爾
居然乘住就快自由身而要求韋斯咸加佢人工
令佢於1月離隊既機會高唱入雲

睇來槌仔幫既既球員變動應該會幾多
下半季是福是禍都冇人知

p.s.:
賓尼迪斯表示利物浦相對於其餘3強只係一間細會
如果利記想羸聯賽
一定要借助其餘3強唔爭氣
佢老人家扮豬食老虎之餘
仲重要既仲係變相可以幫隊波減壓

以前華倫西亞捧盃既球季
佢都發表過類似既言論
莫非佢都覺得今季機不可失......

2008-12-11

1)
消息指賓尼迪斯即將同利物浦續約3年
年薪400萬鎊

2)
索高拿被指成為皇馬600萬鎊既新防中人選

3)
阿歷士向大菲攤牌要求離隊
以爭取更多既出場機會

4)
格羅素被指成為曼城700歐元既增兵對象

5)
消息指森臣可能被阿仙奴借去查爾頓半季

6)
艾禾卡特同意俾艾沙維離隊

7)
西布朗被指打算向雷丁出價300萬鎊收購利達

8)
意大利傳媒指國米打算於季尾向燕豪芬收購艾費利

9)
由於紐卡素既傷兵問題嚴重
小路亞路亞可能有機會於短期內上到一隊

10)
阿仙奴成為最新一間同漢基蘭扯上關係既球會

11)
韋托特同埋路夫都成為馬賽既羅致對象

12)
丹尼臣承認同彭美拉斯續約既機會唔大
(小弟都認為佢唔值得有張新約......)
佢而家等緊山度士俾 offer 佢
特拉布宗而家俾張人工唔錯既約佢
佢又話如果再去歐洲搵食
佢傾向加盟德甲球會

13)
傳聞侯城打算向曼聯出價800萬鎊收購費沙甘寶

14)
消息指紐根特反對被外借去愛華頓

p.s.:
勇而不矛先係好球員
唔明既話睇尋晚既朗尼就會明
小弟都同意受害人 K.Risgard 所講
如果場波唔係於奧脫福舉行
朗尼唔俾人趕出場先至奇

雖然球證睇唔到
match report 都應該唔會提及
但歐洲足協(或者柏天尼)唔該抽後算帳
因為天地係要有正氣......

2008-12-10

1)
拉莫斯取代蘇斯達接手皇馬
雙方簽約6個月

而小弟要更正迪亞拉既傷勢
原來佢要抖6至9個月
而唔係尋日講既兩個月

另一方面,消息指皇馬希望於今個星期內
落實以1400萬鎊既價錢引入艾沙維
不過皇馬以1500萬鎊收購賓特尼既傳聞
就點睇都流到出面掛

2)
有消息指巴布想以借用身份返阿積士
不過賓尼迪斯決定唔會放人

3)
利物浦被指打算出價600萬鎊收購奧歷

4)
安達臣被指成為國米1800萬鎊既增兵對象

5)
沙比艾朗素成為阿仙奴1200萬鎊既增兵對象

6)
希迪布蘭落實加盟賀芬咸

7)
布力般流浪被指希望以500萬鎊既價錢收購比拿美

8)
加度素因為拉傷膝部十字韌帶
好可能缺席本季餘下賽事

9)
大哨同意加盟哥連泰斯
雙方簽約1年

10)
殷鐵生獲委任國足臨時教練

11)
沙洛將會再接受手術
一旦失敗佢就會選擇即時掛靴

12)
早前以種族歧視字眼攻擊美度既紐卡素球迷
被罰款450鎊,兼付25鎊堂費
不過法庭就冇下令唔俾佢再入球場
令米堡同埋英格蘭足總好失望

13)
紐卡素,愛華頓同埋維拉都被指睇中蘇亞素
不過當時人既老豆兼經理人就表示這名洪都拉斯射手
現時只想專心以借用身份為賓菲加比賽

14)
畢特被指可能於季尾以自由身轉投韋根或者保頓

15)
厄遜成為熱刺600萬鎊既新中堅人選

16)
端基竟然被指成為車路士800萬鎊既增兵對象

17)
伊高斯被指成為西布朗既羅致人選
不過當時人已經表明而家冇意思離開般尼

p.s.:
有時做錯野真係抵死
遠在德國既有半力兼表現散亂既國米
正如摩連奴所講
佢地16強要硬食曼聯或者巴塞隆拿都唔抵可憐

近在香港就有足總主席既梁先生
條友請英國代理搵外隊
而家聯絡既竟然係陝西中新
到時丁財都唔旺都唔好怨

2008-12-9

近兩日既新聞......

1)
賓尼迪斯拒絕美國老闆既兩年1200萬鎊合約
因為佢要求同其他頂級領隊既人工睇齊
不過佢已經否認有關傳聞

2)
消息指有33人應徵新特蘭新教頭一職
昆尼就表示會先挑選3人
再作最後決定
佢亦會撥款3000萬鎊俾新領隊買人

現時侯利亞成為頂頭大熱
而曾執教黑貓既泰國國家隊教練列特就否認有意接手既傳聞
另一方面.堅尼就發表聲明表示他日會再教波

3)
哈利列納被指打算想將羅比堅尼帶返熱刺
不過消息指利物浦高層表明唔可以蝕讓
而賓尼迪斯亦已表明會好有耐性咁俾機會這名愛爾蘭射手

4)
雖然AC米蘭方面表示1月唔會買人
但由於艾加同利物浦未能就新約人工達成協議
有傳聞指AC米蘭可能乘勢出價800萬鎊買人

5)
堅尼亞承認由於奧雲唔肯續約
所以紐記極可能於1月賤賣佢
車路士就成為佢最有可能既落腳地
不過亦有消息指佢打算於季尾以自由身離隊
所以吸引到利物浦兩位美國老闆既興趣

另一方面,阿倫史勿夫再次被傳將被紐記放棄
佢既下一站可能係鬧前鋒荒既愛華頓

而紐記就被指睇中獨立隊左閘 L.Mareque
這名25歲既阿根廷球員由於身高6呎2吋
所以亦有一定制空權
但佢07年加盟波圖既時候只曾出賽4次就決定返阿根廷發展
佢既適應能力可能令佢既表現好有影響

6)
加拿斯被指成為祖雲達斯500萬鎊既增兵對象
而西布朗亦打算向佢地借用卡路士維拿

7)
曉士表示希望可於1月搵5個新球員
而韋拿就被指成為佢地5200萬鎊既目標

8)
樸茅好可能成為南非財團既5000萬鎊獵物
而格蘭就會取代阿當斯執教

9)
消息指AC米蘭打算邀請大哨1月回巢

10)
路斯基因為康復進度緩慢
要延遲至3月先可以復出

11)
史篤城成為最新一間同希亞活扯上關係既球會

12)
韋根方面即將要求希斯基就續約問題表態
而車路士就被指有興趣出價400萬鎊收購佢
不過消息指韋根唔願意以低於800萬鎊既價錢收人

13)
漢基蘭被傳成為利物浦1000萬鎊既新中堅人選

14)
國米既尼日利亞小將域陀奧賓拿成為愛華頓既借用人選

15)
前曼聯防中迪贊巴被指成為韋斯咸既羅致對象

16)
英格蘭足總再次以行為不檢既罪名控告堅尼亞

17)
拖連奴決定同迪拜亞斯解約
佢地搵左前教練路維連奴回巢接手

18)
巴利成為曼城最新一個增兵目標
而艾利蘭就被指將以1000萬鎊既價錢轉投拉素

19)
意大利傳媒指祖雲達斯同埋羅馬都有興趣以1500萬鎊既價錢羅致羅斯

20)
艾蒙度宣佈掛靴

21)
由於挪威國家隊於08年只得4和4負既劣績
A. Hareide 決定向足總請辭

22)
迪亞拉只缺陣對兩個月
對皇馬而言絕對係好消息

23)
雖然里昂方面早前曾否認有意接收占邦達
不過法國傳媒指佢地一定會於1月出價買佢去取代養傷既雷維利尼

p.s.:
傷患同埋信心危機向來都係運動員既大敵
不過有決心就一定可以克服
尋晚既京治同埋高美斯就係好例子

小弟寫完 blog 都要去 gym room 郁下
目標1月重新投入訓練

2008-12-8

幾場波想講......
(由於今日太多野講,所以聽日先講新聞)

1) 拜仁對賀芬咸

賀芬咸真係輸波羸口碑
佢地冇好似早前作客對利華古遜同埋雲達不來梅咁不智同人鬥攻
反而踢穩守突擊等機會

杜巴斯韋斯多次回防支援碧克夾擊死牛一邊頸只於左路搵食既列貝利
而伊巴斯貝加亦冇俾空位舒韋恩史迪加快放
令拜仁拉唔開賀芬咸兩邊防線
加上古斯達禾為首既中場經常於前場以犯規阻止拜仁組織攻勢
而佢既活力亦將薜羅拔圖同埋雲邦美比下去
東尼同埋高路斯一對冇態兼冇合作既箭頭就更加難以搵食

而搶攻不成既拜仁仲暴露後防空位俾賀芬咸多次突擊
伊比斯域終於下半場初段於有犯規嫌疑下入到第18球
拜仁失手後多左於中路硬闖
不過反敗為勝既兩球都有一定既幸運成份
羸得毫無說服力可言

2) 紐卡素對史篤城

紐記由羸變和
轉捩點一定係格夫里半場傷出
堅尼亞將古迪利斯移入中路同埋將比耶推前
以及搵史泰芬泰萊踢右閘
一個簡單調動就犯左3個錯誤

因為古迪利斯冇得進攻之餘,仲令球隊失勢
而比耶係要有人開條路俾佢後上
要佢自己去硬闖又點可能搵到食
而史堤芬泰萊又向來都唔係踢右閘既人才

'紐迷'留 comment 話將高路仙尼推前客串防中
無錯係比堅尼亞既調動理想
不過小弟就覺得索性搵卡卡柏客串防中仲實際

佢雖然慢,但勝在閱讀球賽能力高
同埋只係搵佢頂半場唔驚佢唔夠體力
堅尼亞唔肯咁做
怕且係因為佢於對富咸場波既差劣表現俾堅尼亞扣晒分

堅尼亞既調動直接令紐記失勢
原本都未死得
不過佢之後見到人地放埋跑狗富拿落場都冇任何應變
就令紐記即刻收皮

而高路仙尼擺明唔夠路數同埋體力
富拿只得一招死推落底都可以 ko 佢
再加埋這名阿根廷守衛完場前睇住菲爾入波
對腳竟然可以好似俾釘釘住咁
忽然覺得佢可能成為另一件西甲水貨

p.s.:
睇左堅尼亞差唔多兩個月
發覺條友最叻既原來只係激勵士氣同埋鬧記者以及球證
希望佢可以於1月增兵成功
否則下半季冇埋奧雲既紐記可能會有一定程度既護級壓力

3) 曼聯對新特蘭

通常睇一隊波換左領隊之後既表現
就或多或少知道被炒既人有幾受'歡迎'......
而拉莫斯之後原來有堅尼

新特蘭部份球員無錯係爛泥
但連高層都曾經勸堅尼唔好迫得班波咁緊
就知佢好可能過左火位

而部份球員知佢辭職之後就即刻去開P
再睇埋黑貓今場唔似病貓既表現
堅尼睇來都幾令班波討厭

p.s.:
堅尼同舊隊友'恩豬'無論性格同埋踢波風格都幾似
相同既下場絕對合乎劇情發展......

4) 巴塞隆拿對華倫西亞

表面睇係代替伊度奧既亨利食大三元兼歸位
實際係有美斯既巴塞隆拿而家好難羸唔到波
前線只要有佢在陣
無論邊個踢其餘兩個位都一定有貨交
威力同05-06年球季絕對有得比

5) 皇馬對西維爾

與其賴冇運同埋洛賓有牌在身都衰多口
倒不如狂插條豆腐防線
有條全西甲尾4既防線又點可能有運行

p.s.:
蘇斯達唔知係想用激將法 tackle 班大帝
定係長他人志氣
竟然未開波先投降話下場作客巴塞隆拿輸硬

如果唔係而家搵唔到人接手
佢一定冇份去魯營球場接受行刑
不過佢應該都係另一個過唔到十五既例子

2008-12-6

(小弟按:由於技術問題
尋晚寫好晒既野最終要星期日上晝先出到 post......請見諒......)

1)
消息指堅尼亞已經要求艾殊利撥款1200萬鎊
去收購兩名身價約值600萬鎊既球員
但又有傳聞指堅尼亞最終可能會改買3至4名比較平既球員

另一方面,慕遜加柏既27歲科突迪瓦中堅高賀利
同埋赫斯既24歲烏干達球員 D.Ubua 都被指成為紐記既增兵人選

前者兩年前已經同紐記,韋根以及格流扯上關係
現時就成為幾間西甲球隊既羅致對象
但身價約值350萬鎊既佢表明比較希望踢英式足球

速度幾高既後者唔算好波
不過就因為可踢左閘,左翼,中堅同埋防中而對球隊調動有幫助

2)
消息指加拿斯想於1月轉投AC米蘭
另一方面,維路素再次被指成為兵工廠既羅致目標

3)
有傳聞指羅比堅尼會被賓尼迪斯賣走

4)
大菲放風要求高層撥款俾佢買前鋒
隨即有傳聞指路夫成為佢既羅致對象
形式好可能係先借後買
(而中央陸軍被指已經唸定借用祖奧作為替補)

另一方面,大菲亦表明唔會俾艾辛於傷癒後轉投國米
而彭拿典奈高斯就被指打算向佢地借用阿歷士
消息指佢地仲想於借用期後以600萬鎊既價錢買斷這名巴西中堅

5)
中村俊輔改變主意決定繼續留隊到季尾

6)
韋斯咸被指打算於1月出售厄遜撲水

7)
由於熱刺唔夠右閘用
哈利列納被指會引入格連莊臣
另一方面,自由身既艾比亞就係佢既新防中人選

8)
大衛施華同埋迪馬利亞都被指成為皇馬既羅致對象

9)
法林明高同埋哥連泰斯成為大哨最有可能既落腳地

10)
奧歷否認轉投祖雲達斯既傳聞

11)
基斯普被指將於1月以借用身份轉投羅馬

12)
芬倫可能於1月以借用身份加盟布力般流浪

13)
柏路達被指成為里昂既增兵對象

14)
古比士利同埋史特根都被指成為新特蘭新領隊既其他人選

15)
希亞活成為愛華頓300萬鎊既新前鋒人選

16)
消息指曉士將有7000萬鎊掃貨
(不過有幾多人肯過檔又係後話......)

17)
拉素同 Sony 達成合作協議

18)
上季作客史丹福橋鬧事既艾夫蘭被罰停賽4場
再加埋佢今季已經儲夠5張黃牌又要停1場
即係前後要坐足5場波監

p.s.:
今日行本地電腦展見證賤物鬥窮人
而金融海潚既威力對轉會市場又有冇大影響
只要睇今日(唔計曼城)既轉會新聞其實已經心裡有數

2008-12-５

1)
堅尼向新特蘭請辭
傳聞菲臘布朗成為黑貓新領隊既人選
不過佢已經表明冇意思離開侯城
而 Big Sam　已經表態有意接手

2)
托利斯既腿筋傷勢比預期嚴重
利記方面預計佢於1月頭先可以復出

3)
紐卡素球迷會表示會俾多一次機會艾殊利

4)
基瑾已準備同紐卡素就離職賠償打官司

5)
華倫西亞宣佈同希迪布蘭解約

６)
消息指C7要求20萬歐元既天價合約
但已被曼聯方面拒絕
另一方面,Nike 同埋倍耐力都支持國米向曼聯收購這名應屆歐洲足球先生

７)
艾沙維同埋列貝利都被指成為皇馬下一個增兵對象

８)
維拉方面承認希望於1月引入希斯基

另一方面,巴利表態如果維拉攞到歐聯資格
佢將會決定留隊

９)
車路士被指打算於１月收購大衛韋拿

１０)
卻奧斯可能為左更多既出場機會而於１月離開拜仁

１１)
英甲爆出性醜聞
4球員涉嫌於更衣室性侵犯一個17歲隊友
受害人去醫院求醫既時候先透露事發經過
再由院方代為報警

１２)
保加利亞足總決定同馬高夫解約

１３)
北愛爾蘭同埋威爾斯計劃合力申辦2016年歐國盃決賽週

１４)
韋斯咸同亞洲網上博彩公司 SBONET　達成贊助協議

p.s.:
１）
因為時間關係
（好多既）轉會傳聞留返聽日先講．．．．．．

２）
雖然今晚好凍
但小弟都鼓勵大家今晚起身睇拜仁對賀芬咸既大戰
畢竟高質素既進攻足球係值得大家支持

2008-12-4

寫新聞同埋賽後感寫到好悶
今次再來講下足球廣告
但重點係個人系列

打頭炮既係傑斯
睇完4個廣告就會明白佢代表威爾斯係幾咁無癮

(02年 打電話搵 fd)
http://hk.youtube.com/watch?v=xrUwuM3u018&feature=related

(02年 留0係屋企無野做)
http://hk.youtube.com/watch?v=XP6MK6xJaUU&feature=related

(02年等返工)
http://hk.youtube.com/watch?v=9vCE-Orm9cM&feature=related

(06年 後花園 version)
http://hk.youtube.com/watch?v=KNQKE0x-JfA

傑斯既舊隊友舒米高亦有代表作
(實情係小弟上次介紹百事廣告既滄海遺珠)
又一個抵死既廣告
http://hk.youtube.com/watch?v=htzyHTfCDok

謝拉特同埋幾個利記隊友當然曾經為嘉士伯打過廣告
廣告中拉爾拿仲單挑佢
http://hk.youtube.com/watch?v=yMboivyvfS4&feature=related

保方都為 Puma 拍過廣告
不過內容好九唔搭八,但就幾得意
http://hk.youtube.com/watch?v=M6b-sMFA7HU&feature=related

金嗓子喉寶除左搵過大哨,亦搵過卡卡
http://hk.youtube.com/watch?v=jMpaaH8eTJE&feature=related

至於恩沙基可能因為算幾靚仔
於本土原來拍過好多好多廣告
例如為吹波糖
http://hk.youtube.com/watch?v=PX2Dflbf0UU&feature=related

佢仲曾經做返自己
同成班美女唱k hard sell 音響器材
http://hk.youtube.com/watch?v=XBIyZYMJi2k&NR=1

舒利亞就近乎冇佳作
佢曾為 Umbro 搞既5人足球賽宣傳
一看無妨
http://hk.youtube.com/watch?v=k32dnbAPwjM

近來列貝利既波 boot 廣告亦令小弟好有印象
廣告仲有卡通版同埋真人版
先來卡通版:
http://hk.youtube.com/watch?v=9EtW3YALNTo
再來真人版:
http://hk.youtube.com/watch?v=aAndv79JoJM

而班球星仔都有廣告拍
兩大球王又邊會冇?

先來馬勒當拿既兩個飲品廣告
先係 Coca Cola:
http://hk.youtube.com/watch?v=KHva_8jlMk8&feature=related

再來一個超抵死既啤酒廣告(記得唔好學佢飲咁多)
http://hk.youtube.com/watch?v=5Qdt0iiys2s&feature=related

至於比利
先有汽車廣告
http://hk.youtube.com/watch?v=cJ3MLXBh-1E&feature=related

再來為百事拍既廣告
(兩代球王拍可樂廣告都要大打對台!)
http://hk.youtube.com/watch?v=OS3dihyxr70&feature=related

p.s.:
Umbro既球星廣告其實無一個值得推介
不過只 sell concept 既話
佢地曾經都有個保證笑爆咀既廣告
個廣告兒童不宜
睇左如果覺得反感
唔好投訴小弟
http://hk.youtube.com/watch?v=_Gf4EJ2dHPo

2008-12-3

1)
白禮達表示會企硬推行'6+5'既限制外援政策

2)
皇馬同阿積士就亨特拉爾既轉會達成協議
轉會費高達2700萬歐元
不過當中有700萬歐元係 variable

3)
卡普,卡奴,耶耶托尼同埋費倫天拿25歲巴西中場美路
都成為兵工廠增兵既可能人選

另一方面,現時以借用身份效力樸茅既 A.查奧爾
就被指成為米堡500萬鎊既羅致對象

4)
利物浦被指打算於1月出價500萬鎊羅致軒斯

5)
中村俊輔幾乎肯定會離隊重投橫濱水手
不過如果日產冇本事於1月前撥款300萬鎊
佢就會於季尾以自由身離隊

6)
愛斯賓奴宣佈搵艾辛奴接手

7)
由於愛華頓冇錢買人
佢地被指打算借用紐根特

8)
有新馬斯查蘭奴之稱既蘇古連尼
被指成為祖雲達斯既700萬鎊新防中人選

9)
拿維斯表態冇打算離開球隊
但仍有傳聞指國米打算出價2000萬鎊利誘拿玻里放人

10)
夏尼交被指成為熱刺既新龍門人選

11)
財困既韋斯咸被指打算出價400萬鎊收購希斯基
另一方面,葉士域治被指打算向佢地借用戴亞

12)
錫菲聯20歲右閘納頓被指成為紐卡素既增兵人選
這名新晉英格蘭 U-21 代表因為速度高同埋踢法夠侵略性而可以客串翼鋒

13)
漢堡亦未同奧歷達成續約協議
消息指史浩克04打算乘機截劫佢

14)
費 sir 表示除杜錫外
曼聯於1月唔會再引入其他新球員

15)
卡爾宣佈掛靴

p.s.:
1)
申花球員毛劍卿同埋劉寅濤因為出手打人而最終要被拘留7日
中超又有一單醜聞......

2)
南華宣佈搵金判坤出任領隊
佢將會負責球隊既技術訓練,策略部署同埋體能訓練

小弟希望佢用一般南韓仔1/3既訓練量去操南華班廢柴
(1/3其實都驚有幾件蛋散會捱唔住......)
等班一直大擺球星架子既井底之蛙知道自己有幾廢......

2008-12-2 (2)

表面睇利記尋晚攞1分上榜首
實際又唔見兩分
全世界既賭波公司見利記上榜首
反而將佢地羸聯賽既賠率下調
就知又唔見兩分有幾濕滯

前晚 soccernet 見阿仙奴作客拆車
就即刻話兵工廠重返爭標行列
但小弟依然唔將佢地當係爭標份子
因為佢地同利記就算於 Big 4 小型聯賽都係兩戰全勝
但起勢咁送分俾弱隊
又邊有資格去爭英超冠軍

點知而家既利記越來越有兵工廠既影子
主場對史篤城,富咸同埋韋斯咸都係0:0
3次捉到鹿都唔識脫角
加埋失左6分就變相輸左兩場波

眼見車仔雖有艾辛重傷
但畢竟有好球員又有老狐狸大菲
只要搞掂 internal 既野就絕對有料到

而出名後勁凌厲既曼聯現時只係比利記失多3分
1 round 聯賽就隨時可以後上
而佢地次循環鬥其餘3強都有主場之利
C7睇來又至少唔會於季尾前再玩野
講個勢其實而家仲堅過車仔

小弟15度都爬起身睇波
考慮到咁既形勢個心真係寒上加寒

兵工廠冇防中,又唔夠好後衛
今季好難有運行

但利記既人腳比較平均
只要傷兵潮過後
仍有力同車路士以及曼聯鬥過
不過大前題始終係改善穩定性

劫富濟貧同埋鋤強扶弱於武俠世界絕對受萬人敬仰
但現實踢英超都係咁就死左都冇人可憐

2008-12-2 (1)

近兩日既新聞......

1)
傳聞奧雲成為利物浦既200萬鎊羅致對象
但賓尼迪斯已經作出否認

另一方面,俾狗仔隊跟到佢去倫敦瘟女開房既巴布
就被指因為唔滿意踢前針既機會唔多而要求轉會

2)
馬田斯雖然已就對米堡場波被換出發脾氣一事而道歉
但仍依然再次被指有意離開紐卡素
傳聞熱刺同埋阿仙奴都有意思出價1300萬鎊接貨

3)
阿積士方面證實已同皇馬就亨特拉爾既轉會展開會談

4)
甘士比想搵科拿出任教練兼球員

5)
由於耶高保提早收咧
拿臣同埋馬華路禾尼被指成為愛華順既救兵人選

6)
堅尼亞表示佢唔使靠賣球員去籌錢買人
巴尼斯,艾曼紐臣,迪卡恩同埋馬些尼斯都被指成為紐記既增兵對象
前3人都係踢左閘
而馬些尼斯就擅長踢中堅,亦可客串兩閘

7)
C7當選本年既歐洲足球先生

8)
標準烈治方面透露已經拒絕一個對中場韋素爾既2000萬鎊出價
有傳聞指出手既正係曼聯

9)
有紐卡素既球迷於對米堡既比賽揶揄美度係攞住炸彈既恐怖分子
紐記表明唔會容忍
米堡領隊修夫基就為紐記求情
而消息指英格蘭足總會放過紐記

10)
鄧尼,加拿斯同埋艾蘭奴被指成為熱刺既增兵人選

11)
奧尼爾表示唔會於1月賣走巴利

12)
車路士方面堅持杜奧巴唔會於1月離隊

13)
泰摩斯卓克被指即將以1500萬歐元既價錢轉投拜仁

另一方面,漢尼斯表示唔會強留舒韋恩史迪加
令佢於1月轉投皇馬既機會更高

14)
愛斯賓奴同教練馬古斯解約

15)
艾雲洛夫成為拉素既700萬鎊新中堅人選

16)
雖然希斯基表示想季尾先離開韋根
但韋根由於唔想到時人財兩失
好可能會於1月將佢賣走
利物浦,曼城,熱刺同埋紐卡素都被指對佢好有興趣

17)
卡普被指成為曼城最新既羅致對象

2008-12-1

幾場波想講......

1) 米堡對紐卡素

(by 小弟......)

大家好!......我係泰利呀!
不過唔係踢車仔0個個喎
0個個泰利而家應該去左賭幾手發泄
咁我係邊個?......我係泰利.雲拿保斯呀

米堡同埋紐記上年首循環踢得咁激就吸引左我入場睇波
不過唸都唸唔到最終睇左場悶波

00-01年球季季中我去米堡幫過笠臣一把
而之前我又推左紐記0個份臨時工
同兩隊總算有少少緣份
悶波賽後感俾我講都應該冇人會反對

修夫基就好似當年既笠臣一樣咁冇火
搞到隊波死氣沉沉

佢好似唔記得自己以前踢波都係靠食腦
睇見韋達同埋普加迪斯一對大水牛既組合
而兩閘同埋龍門都係未滿師
唔知既仲以為係條英冠防線
對住紐記都幾乎要失波就證明佢地信唔過

中場冇左奧尼爾係好事
但用發左福既艾卡亦唔見得好
一條冇創造力既中場就只有靠兩翼頻頻出擊
但冇料到既傳中就傳幾多都冇用

右翼艾利亞迪里只係一隻唔識傳中既跑狗
唔怪得賓納特都被指係佢地既450萬鎊增兵人選

而左中場唐寧習慣幾場先有一場好波
上星期見佢代表英格蘭踢出代表作
我已經睇死佢好可能要等到聖誕節先肯派禮物俾球迷

前線既艾維斯今場已經有過一腳勁射幾乎入波
不過咁既表現都依然似係水貨
佢加埋美度就簡直係一對荷甲水貨組合
我都話修夫基似笠臣架啦
唔止冇火,連眼光都冇呀
不過修夫基都好少少
衰極都試過零機價執到件端基

至於艾殊利俾到10萬鎊一場我都唔肯教
你地就估到紐記惡搞啦

佢地近期冇失波
但前面又唔識入波
醫到個頭又醫唔到隻腳......

前場既古迪利斯以前踢西甲出名扭波醒
一心唸住入場有機會睇到佢有幾勁
點知見面不如聞名
等到91分鐘先睇到佢成功落底
唯一解釋就係佢去左紐記之後要前後兼顧

而佢中前場既其他隊友又係唔爭氣
斷纜仲多過米堡
特別係尼索比亞
佢就好似一個足球黑洞
咁既球員紐記死都要留住
就知佢地冇咩好球員啦

(by sammysir......)(謝!)

整場波戰情都只係緊張而不精彩,
又冇反守為攻既突擊,傳波又斷纜,
基本上都係悶戰一場,
我都被紐記既差劣攻擊力攪到發哂火,

幸好米堡進攻只得兩邊傳中一招,踢法單調,所以紐記能夠守得到

成場波只得後防5人防守時踢得好,但兩閘既助攻又係好低質素,
蜘蛛人全場又係只顧防守,只得一次落底線,
對尼索比亞既評價都只係果句:算吧啦佢!

其實堅尼亞可以換入維度卡及謝列美代替尼索比亞及蜘蛛人,打4-3-3去攻下人,我估會好d
不過堅尼亞又好似只想保住一分就算
佢後來睇見對波踢成咁都有d忟忟地

不過連續兩場作客都能夠保持清白,
算是有進步的表現

而家紐記既目標好似只係作客要一分,主場就要三分
看來好似目標清晰,但這樣咁落去,我覺得真係靠唔住的...

2) 曼城對曼聯

雙方各踢半場好波
就絕對反映出夏文應該搵其他聯賽養老

3) 車路士對阿仙奴

兵工廠羸得唔光彩
亦唔見太有說服力
不過小弟都好感激佢地幫左利記

兵工廠今場既壓迫功夫其實冇上次對曼聯時做得咁好
不過冇左艾辛既車仔中場出左名遇強即屈就冇所謂啦
而杜奧巴冇份出場就更加令畏高既兵工廠防線踢得比較輕鬆

場波既轉捩點絕對係旁證
佢上半場最少兩次屈車仔球員越位
到下半場卻突然發雞盲
雲佩斯越左兩個身位都睇唔到
有冇搞錯?

p.s.:
但點錯都唔夠本地球證
尋日本地波有球證未入既波判入
見到有人單刀俾人整跌唔罰12碼仲屈人插水