2011-4-29

1)
摩連奴可能因為輸波後狂插巴塞既過火言論
而俾歐洲足協重罰停賽7場

而皇馬既喉舌報馬卡報做既民意調查就發現
92%既皇馬球迷唔滿意佢既保守戰術

2)
雲加澄清唔準備賣走法比加斯

另一方面,華美倫已於對曼聯既預備組賽事復出
仲踢足全場

3)
一旦拉爾拿最終離隊
利物浦被指會收購基雲或者洛里斯作為替補
(富咸亦對前者有一定興趣)
而阿里施蘇高,法芬以及拿維斯亦同利記扯上關係

另一方面,昆士伯流浪就係最新一間希望收購祖高爾既球會
消息指佢地準備以9萬鎊週薪利誘佢過檔
(不過佢地早前非法羅致科連
最嚴重後果可能要扣15分
隨時因而返唔到英超)

4)
聖羅倫素被指想搵馬勒當拿接手

5)
艾拿戴斯可能去阿聯酋教波

6)
車路士被指季尾開價1800萬鎊收購盧卡古

另一方面,杜奧巴既經理人透露這名科特迪瓦射手唔準備離隊
不過小將波連尼就考慮轉投史雲斯

7)
消息指侯利亞因為心臟問題而唔可以再做領隊
不過當時人就堅持唔會因為咁而辭職

維拉被指考慮搵賓尼迪斯,莫耶斯以及曉士既其中1人接手

8)
意大利傳媒指文仙尼要求祖雲達斯撥款1億鎊增兵
先肯過檔接手

9)
熱刺被指打算羅致基恩

10)
路蘭透露即將同紐卡素續約
變相否認過檔韋斯咸既報導

11)
舒希化向科隆請辭

12)
一旦羅斯季尾離隊
西班牙傳媒指維拉利爾將會收購拜仁雷斯作為替補

p.s.:
英國傳媒指杜格利殊竟然於屋企後花園發現一枚自製手榴彈
因咩降究有人玩到咁大?
係真唔係呀?!

2011-4-28

近兩日既部份新聞……

1)
史尼達以及國米會方都否則佢轉投曼聯既報導

2)
貝碧托夫同曼聯未能就續約達成協議

3)
拉爾拿表態願意繼續留隊

4)
英國傳媒指阿仙奴將為法比加斯定價3500萬鎊
卡路士韋拿就被傳成為華倫西亞既500萬鎊增兵對象
而艾沙維再次被傳重返辛尼特
艾蒙尼亞就可能轉投加拉塔沙雷

另一方面,雲加為防後增兵再遇挫折
消息指曼聯將以300萬鎊從朗斯成功收購華拉利
這名前法國U-18代表可以踢中堅以及防中

而賀維迪斯就成為兵工廠最新一個新中堅人選

5)
比錫達斯被指考慮接收科蘭
而古迪就透露可能轉戰美職聯

6)
消息指曼城拒絕國米收購泰維斯既建議
而佢地被指同費倫天拿爭奪胡仙歷

7)
AC米蘭將以700萬歐元買斷奇雲保定
而羅賓奴透露甘素向佢表態想過檔紅黑兵團

另一方面,派路離隊機會甚高
而佢就可能轉投拿玻里

8)
德國傳媒指紐尼沙軒既贖身費只係600萬歐元
而由於佢留隊機會唔大
所以佢地將於季尾引入根度簡以作為佢既替補

9)
車路士再次被指準備出價4000萬鎊收購格夫里巴利
祖雲達斯以及莫斯科斯巴達被指考慮以800萬鎊接收施哥夫

10)
拉素希望從祖雲達斯收購阿馬利以及佐治馬天尼斯
而列治史迪拿同埋拿度就可能成為交易籌碼

11)
李斯特城被指希望羅致基雲,卡馬拉同埋希斯基
而佢地亦會向愛華頓買斷耶高保

12)
富咸被指準備出價400萬鎊引入胡禮菲臘斯

13)
紐卡素被指準備以300萬鎊買斷艾利蘭
而佢地亦被傳打算向財困既馬略卡收購迪根士文

另一方面,巴頓忽然被傳成為利物浦既羅致人選
而一旦柏加離隊
韋斯咸就被指會收購路蘭作為替補

14)
韋根考慮搵占士季尾以自由身加盟

15)
哥頓因為膝傷而面臨休戰半年

p.s.:
講幾句歐聯4強

曼聯今季歐聯作客最有明顯優勢既一次
關鍵在於中場羸晒
任何一個位置都食住對手之餘
仲有朗尼回後幫拖控球
而對手今場亦稍嫌過份輕率冇左控球權

不過紐亞先係全場最佳球員……

另一條線既西班牙國家打呲
比比以及摩連奴見紅肯定係比賽既轉捩點
後者擅長用犯規戰術對付巴塞
不過好多時都只係於中前場用輕微犯規令球證吹停比賽
令球隊有足夠時間佈防
但尋晚所見明顯過晒火位

而佢地本身已經有4個球員賽前有黃牌在身
以過份硬朗既攔截對付巴塞亦明顯不智
既然半場已經吵左鑊勁
摩連奴更應該吩咐球員收火

比比嗰腳雖然唔中丹尼爾艾維斯
不過冇慢鏡睇既球證見到佢嗰勢咁狼
只會覺得佢係一心搞報復
(而事實佢嗰款都怕且係咁)

小不忍則亂大謀
今次又係一個好例子

2011-4-26

近兩日既部份新聞…….

1)
英國傳媒指一旦摩連奴將來離隊
皇馬方面就會再次斟酌雲加

而泰利就被指係佢地既新中堅人選
另一方面,多蒙特亦透過佢地想斟酌紐尼沙軒

2)
國米被指願意用史尼達再加1000萬歐元向曼城收購泰維斯

3)
雖有消息指高層會撥款5000萬鎊增兵
不過杜格利殊仍會清除部份瘀血

而佢亦再次被指踢走祖高爾
不過熱刺,富咸以及韋斯咸都未必俾得起1000萬鎊既轉會費
另外,佢既換血名單亦包括尼哥治

另一方面,荷西安歷基既轉會費可能高達1500萬鎊
(如果俾人咁搵笨都制,
就有幾多錢增兵都死?!)
不過利記亦同時被指打算斟酌巴尼斯,加利卡希爾,查理阿當,
馬度迪,艾殊利楊格,達寧以及迪素迪沙基
前者既名字就反映西班牙左閘既加盟應該仲未成事

4)
意大利傳媒指文仙尼係祖雲達斯下季教練既大熱
不過佢地又話祖記會挖埋同佢不和既米卡李察士

5)
新特蘭以及史篤城成為最新兩間同雲尼斯特萊扯上關係既球會
而前者亦考慮接收柏夫奴真高以及奧雲

另一方面,黑貓打算趁艾卡以及施巴斯坦拿臣仲未續約而出手搶人

6)
消息指AC米蘭最有機會羅致泰禾

7)
巴甸尼被指成為羅馬既新教練人選
而當尼就被指成為加拉塔沙雷既新龍門人選

8)
樸茨茅夫3年內第5度易主
俄羅斯商人柏杜魯夫同意以1700萬鎊入主

9)
愛華頓以及富咸都被指有興趣引入韋保
前者亦被指想搵高路斯以自由身過檔

10)
伊比斯域被指已決定離隊
消息指賀芬咸已將佢定價1000萬歐元

11)
車路士被指考慮出價收購格夫里巴利以及卡鍚

12)
委內瑞拉既硬朗箭頭荷西朗頓被指成為阿仙奴既增兵對象
而富咸就希望下季可以借用艾朗蘭森

13)
拿玻里被指有興趣引入杜格拉斯哥斯達

14)
紐卡素被指準備同巴頓續約4年
而佢地亦被指會同利物浦爭奪迪素迪沙基

15)
路夫既經理人透露這名巴西射手準備離開莫斯科中央陸軍

16)
近日同卡雲尼扯上關係既熱刺被指準備出價800萬鎊回購貝碧托夫之餘
亦會出價1500萬鎊同維拉爭奪艾殊利楊格

17)
費倫天拿多名主力可能離隊
當中馬德里體育會被指有興趣引入蒙杜利禾
而華加斯就可能轉戰俄超,加盟辛尼特

另外,辛坦拿就唔獲會方續約之餘
基拿甸奴又被指考慮離隊
報導仲話費倫天拿已經為佢搵緊替補人選
當中包括艾卡費斯卡,阿馬利以及麥斯盧比斯

p.s.:
1)
兵工廠再次自毀長城
雲佩斯仲要連品都輸埋
失望…….

2)
近日得閒再賣波衫
http://hk.user.auctions.yahoo.com/hk/booth/mfho2003
平既有40蚊條紐記頸巾或者幾十蚊件冷門波衫
貴既有7舊幾既利記落場版 Boxset

2011-4-24

1)
蔣世豪籌款賽未踢已經籌到約100萬
而由於參加球隊增加至至少18隊
當日比賽時間亦改為由下晝2點至9點

另一方面,佢既屋企人澄清佢冇經濟問題
死前亦冇同老婆嘈交
但就懷疑佢有情緒病

2)
巴塞足球學校派隊參加地中海盃
戰績令人驚喜
雖然幾隊小朋友都因為於淘汰賽俾巴塞狂數而出局
但U-12曾於分組賽半場迫和利物浦0:0
最終亦只係輸0:2

而傑志董之英就試過同基輔戴拿模踢成0:0
夏志明仲俾巴拉圭甲組春季聯賽冠軍瓜蘭尼睇中

p.s.:
想講尋晚英超
利記大炒港伯5:0
真係爽爽爽爽爽

杜格利殊上任後14場攞28分
如果按比例計數
假如佢由季初開始帶隊
利記都幾大機會前4

不過利記就始終唔係爭標份子
畢竟人腳仲未夠勁度同埋深度
不過慶幸中後場多左幾個唔錯既後生仔
連盧卡斯利華下半季都有明顯進步

而麥斯洛迪古斯雖然尋晚忽然連中三元
不過小弟始終認為漸走下坡既佢只適合做輪換替補

另一方面,就算侯活守到上晒身
曼聯都再次苦戰羸1:0
又一似樣衰衰咁有3分落袋
這亦係兵工廠同佢地既最大分別
畢竟雲加兵團好少可以於苦戰,或者失準下羸波
希望佢地今晚可以趁保頓仲心傷過佢地而止血

另一邊既車仔有托利斯終於趁復活節'復活'
後上對曼聯既威脅明顯較大
一對倫敦死敵為人為己都會唔俾曼聯好過
今季既英超爭霸應該係繼98至99年球季以來最好睇

2011-4-23

1)
柏加當選英格蘭足球先生
而英國傳媒指一旦韋斯咸護級失敗
熱刺就會出價1500萬鎊搶人

2)
前愉園足主官先生已經聯絡貝先生以愉園名義搞籌款賽
暫定下個月8號晚上6點於修頓球場舉行
愉園,公民以及晨曦已經落實派隊
南華方面亦口頭答允參加

3)
利物浦由2012-13年球季起改由 Warrior Sports 贊助
每年既贊助金額係破英超紀錄既2500萬鎊

而利記就再次同查理阿當扯上關係
另一方面,阿古蘭尼表態唔想重返利記
而保臣就被指打算返祖家落班,加盟哥本哈根

4)
雲加透露唔會於暑假進行星級收購
但就會為個別有需要既位置買人

5)
維路素被指考慮離開熱那亞
費倫天拿,祖雲達斯,AC米蘭以及費倫巴治都有興趣接貨

6)
國米方面表示球隊下季仍然會由李安納度領軍

而意大利傳媒指佢地已經私下同泰維斯傾好5年新約
佢地之後仲會嘗試向阿仙奴出價收購法比加斯

7)
賓艾化有望於下兩輪英超比賽復出
另一方面,奧丹維治就否認以800萬鎊過檔既報導

8)
消息指為左俾侯利亞安心養病
維拉方面已經決定餘下幾場英超由麥阿里士打帶隊

9)
曼城被指準備出價1500萬歐元向烏甸尼斯收購森柏達華倫西亞

10)
紐尼沙軒以及奧禾莫耶拉分別要養傷6星期以及4個月

11)
漢諾威既科特迪瓦箭頭D.高蘭被指成為拜仁既增兵對象

12)
摩連奴否認基迪拉提早收咧既報導

13)
熱刺以及AC米蘭成為最新兩間同侯克扯上關係既球會
而前者亦被指同車路士爭奪伊歷斯
這名巴勒莫斯洛文尼亞進攻中場既身價約值2000萬歐元

14)
羅馬被指打算出價600萬鎊收購卡蘭積卡

p.s.:
今晚最好睇既可能係黑池對紐卡素既對攻大戰
雖然雙方陣容都唔算完整
不過前者有查理阿當傷癒復出
後者亦有路蘭坐完波監

2011-4-22

1)
前港隊及愉園隊長蔣世豪今晨於住所跳樓自殺身亡
終年35歲
消息指佢之前因為金錢同埋感情問題而同老婆爭執

前隊友李偉文而家就協助佢屋企人辦理後事
暫時未知足總會唔會為佢搞紀念賽

2)
杜格利殊透露準備回收阿古蘭尼
而祖雲奴域就暗示季尾離隊

3)
烏克蘭足總宣佈再次任命布洛堅為球隊教練

4)
米卡李察士俾狗仔隊跟到佢同著名經理人邦辛迪會面
英國傳媒隨即指佢考慮離開曼城
消息指阿仙奴,熱刺,皇馬,AC米蘭以及祖雲達斯都有興趣接貨

5)
韋拉掛靴後準備轉往幕後發展
雲加就被指想搵佢回巢加入教練團

6)
祖雲達斯再次被指有興趣引入摩達歷
不過當時人就表明無意離隊

7)
杜拜財團落實入主基達菲
球隊下季起將易名為杜拜基達菲

8)
由於荷西安歷基勢必離隊
紐卡素被指準備向圖盧茲出價260萬鎊收購22歲左閘 C.M'Bengue

9)
迪亞高米列圖被指考慮轉戰英超
當中阿仙奴以及熱刺都對佢好有興趣

p.s.:
本地球迷這個復活節肯定不快樂
一路好走,豪豬......

2011-4-21

1)
侯利亞因病入院
暫時未知係唔係心臟舊病復發

另一方面,維拉被指打算從格流引入克羅地亞射手 N.Jelavic

2)
A.K.Mangane 被指成為利物浦既新中堅人選
消息指里昂亦有興趣從雷恩引入這名塞內加爾28歲國腳

3)
車路士忽然被指打算向皇馬挖走18歲射手摩拉達
報導指這名新星既贖物費高達1000萬鎊

4)
ESPN球迷選左魯爾梅利斯為最佳英超球員
而D.格拉咸就係最佳英冠球員
這名屈福特射手近日被指成為韋斯咸既500萬鎊增兵對象

5)
報導指曼聯考慮將貝碧托夫以1200萬鎊賣俾西維爾

6)
布力般流浪被傳考慮接收安歷卡

7)
貝尼斯干尼正式安排大女芭芭拉加入AC米蘭董事會
而意大利傳媒指貝老為左幫個女打響頭炮
就算球會有財政壓力都會撥款買人
拿維斯就被傳係其中一個增兵對象

8)
多蒙特,拜仁以及紐卡素都被指有興趣引入尼祖迪莊
而前者同時考慮搵薜羅拔圖以自由身過檔

9)
報導指沙格拿已1成為祖雲達斯既新右閘人選

10)
熱刺被指考慮出價1000萬鎊接收杜奧巴
諾頓被指成為昆士伯流浪既200萬鎊羅致目標

11)
邵佳一透露已經決定唔同科特布斯續約

p.s.:
兵工廠果然唔爭氣
跌落第3都係抵死

睇既當然係有卡士得多既西班牙國家打呲 part 2
摩連奴果然繼續用3防中
一心穩字行頭
而從上星期六既聯賽到尋晚場波
前線3名攻擊球員既互動亦明顯多好多
近兩場波反映上至教練,下至球員
某程度上已經摸到條路對付巴塞

不過睇今場雙方人腳
就知哥迪奧拿冇摩連奴咁有決心捧盃
否則邊會用後備龍門之餘
仲會為左唔想佩奧爾冒險
而搵高度不足既馬斯查蘭奴串演中堅

2011-4-20

近兩日既部份新聞......

1)
紐亞已拒絕史浩克04既新約
德國傳媒指佢將以2600萬歐元既偵錢過檔拜仁

而曼聯就唯有打迪基亞既主意
繼費sir派細佬觀察佢後
西班牙傳媒指馬體會已經同佢攤牌
如果唔續約就會於季尾以2000萬鎊賣走

另一方面,古斯鍚就被指可能以400萬鎊轉投愛華頓

2)
奇勒落實同利物浦續約3年
一般相信這係杜格利殊續約既先兆

3)
利物浦以及小保加將首次派隊參加國際7人賽
其他名牌球隊包括阿積士,些路迪,格流以及衛冕既維拉

另一方面,巴里斯將會帶領AC米蘭足球學校教練隊參加名人賽

4)
消息指已有幾間英超球會斟酌納比執教

5)
紐卡素再次同加美路以及朗治扯上關係
而佢地亦被指打算向利物浦借用史柏寧

6)
杜拜一個財團即將落實入主基達菲

7)
哈利列納否認接手車路士既報導
而消息指熱刺唔準備以少於1000萬鎊既價錢賣走哥治

8)
尼索比亞被指成為維拉既600萬鎊增兵對象

9)
里昂方面暗示可能賣走同對友不和既洛里斯

10)
曼聯忽然被指有興趣引入麥克干沙利斯
而當時人已經表明有興趣過檔

p.s.:
球證既爭議性判決
有睇波既自有立場

與其話曼聯放生阿仙奴
不如話紐記幫佢地打江山

講攻勢紐記全場一定唔夠曼聯多
冇左路蘭唔止代表少左後上埋門既殺著
亦某程度上令兩個箭頭少左供應

不過守得夠穩就至少有分落袋
迪奧迪今場既表現仲應該係加盟以來既代表作
如果紐記防線每場都有今場咁既集中力
爭取歐霸盃席位一定唔係遙不可及既夢想

2011-4-18

1)
格里夫巴利以及韋舒亞分別當選球員先生以及最佳年青球員

而最佳陣容如下:
雲達沙
沙格拿 甘賓尼 維迪 艾殊利高爾
蘭尼 韋舒亞 拿斯尼 格夫里巴利
貝碧托夫 泰維斯

2)
由於尋晚既足總盃4強俾史篤城狂數5:0
保頓方面隨即被指打算開除奧雲高尼

3)
紐尼沙軒由於未能就續約同多蒙特達成協議
德國傳媒指佢可能於季尾被賣走套現
而根簡度就被傳係佢既替補人選

4)
意大利傳媒指摩連奴下季重返國米
辛尼迪就已經表態支持

另一方面,國米又被指有興趣接收科蘭
這名烏拉圭射手同時亦同聖保羅以及曼聯扯上關係

5)
由於拿斯尼遲遲未肯續約
阿仙奴被指打算於季尾賣走佢套現
國米就被傳有興趣接貨

6)
卡雲尼暗示有興趣轉投皇馬

7)
隨住費倫天拿既戰績停滯不前
米赫洛域再有下台壓力

8)
巴斯桑治暗示為左出場機會而離隊
紐卡素隨即被指打算搵佢回巢

9)
AC米蘭被指打算向波圖收購F.法蘭斯高以及侯克
佢地亦再次同甘素扯上關係

p.s.:
過去兩日
西班牙同英格蘭既兩場大戰
巧合既係4個入波都係12碼
當中追平既一球都有爭議性

丹尼爾艾維斯嗰球似乎係中波先
而伊保爾嗰球雖然略為過嚴
不過佢自己手多又係冇得好怨
更關鍵既係球證似乎補時過多
就算係要補返兵工廠入波慶祝既時間都係咁話

西班牙國家打呲既觀賞性明顯較高
皇馬今場雖然返主場都冇同巴塞搶攻
而比比串演防中仲令人驚喜
摩連奴吸取0:5既教訓後果然有針對性部署

不過艾比奧爾以及卡華路之後接連要停賽
比比應該要重返中堅位置
如果摩連奴續用3防中陣式
迪亞拉出場既機會應該好大

巴塞方面
佩奧爾復出後幫到防線唔少
反映佢對球隊既重要性
不過佢再次傷出就係球隊既最大隱憂

另一邊既雙紅大戰
面對利記既大巴士戰術
除左哥斯尼助攻中楣外
兵工廠其餘時間老鼠拉龜
雲加再次要為球隊冇 plan B 而負出代價

利記方面
球隊雖然殘陣兼要用幾件牛奶咀
但未知係唔係受到梳格斯過檔既傳聞影響
一對中堅都踢出超水準
1分算係合理回報

2011-4-17

近幾日既部份新聞......

1)
足總星期四召開特別大會
當日出席既會員全部同意修章
意味鳳凰計劃可以正式上馬

2)
利物浦被指將於季尾收購迪科亞,域咸以及馬度迪
後者近日先後同阿仙奴,愛華頓以及熱那亞扯上關係

另外,古治就落實續約兩年

3)
消息指查爾頓芬蘭小將贊堅臣下季將以自由身加盟阿仙奴
而雲加亦考慮引入禾漢頓

另一方面,禾馬克被指可能為左爭取出場機會而離隊
馬賽隨即被指有興趣接貨

4)
史浩克04為左挽留紐亞
打算將佢既年薪由200萬歐元大增至700萬歐元

5)
消息指列卡特拒絕接手紐卡素後
艾殊利先至正式委任柏度
不過這名荷蘭教頭既經理人暗示佢仍然有興趣轉戰英超

6)
意大利傳媒指一旦肥安落實轉投羅馬
會搵埋艾雲洛域以及保辛華一齊過檔

7)
紐卡素再次同賓特拿扯上關係
而紐記亦被指考慮從西維爾引入羅馬歷

另一方面,魯迪治表態希望於借用期後重返球隊

8)
國米落實引入巴拉圭17歲翼鋒艾般奴
而奧賓拿就可能被賣去拿玻里

9)
伊巴謙莫域日前於操練同施多夫嘈交
由於佢已經多次同隊友不和
意大利傳媒指即使巴塞已經同意以2400萬歐元賤賣佢
AC米蘭都未必肯買斷佢
而巴洛迪利就被指係佢既替補人選

10)
拜仁亦被指有興趣引入夏薩特

11)
熱刺被指準備向波圖出價4000萬鎊
一併引入法卡奧以及侯克
而蘇保迪就係佢地既新中堅人選

12)
消息指士砵亭打算從曼城接收祖奧

13)
耶耶托尼再次被指係皇馬2000萬鎊既新防中人選

14)
雖然費度仍會留隊
不過維拉依然被指準備從森林引入甘普

15)
新特蘭考慮向韋根收購洛達列加
以替補戴倫賓特離隊後既空缺

p.s.:
1)
星期五晚有得去歐聯獎盃電車巡遊
隻盃比印象中仲要輕
原來只係重3磅

而見到蘇拿以及奧高查
攞簽名自然係本能動作
不過冇機會乘機問前者問題就有少少失望

2)
曼徹斯特打呲緊張得來唔精彩
曼城其實表現平平
只係多得曼聯更加唔掂
晏少少既西班牙國家打呲應該好睇得多

2011-4-14

近兩日既部份新聞......

1)
紐約時報成為利物浦既第二大股東
持股量約為16.58%

另外,有古治續約至2014年既利記就被指考慮引入占士麥卡菲
而祖雲奴域就被傳可能轉戰西甲,加盟馬體會

2)
阿巴莫域治被指肯定易帥
軒迪克以及尹巴士頓就係接手既兩大熱門
而納比同埋賓尼迪斯亦同車路士扯上關係

3)
曼聯被指同意以1780萬鎊收購迪基亞
而蘭尼就再次同國米扯上關係

4)
皇馬被指打算向川迪收購委內瑞拉右閘羅拔圖羅沙利斯
而耶耶托尼就被指係佢地既新防中人選

5)
雲加再次打美路既主意
報導指阿仙奴準備出價1500萬鎊
另加賓特拿,迪亞比以及丹尼臣既其中一人
不過基治反而先係祖記既心頭好

另一方面,韋舒亞就表態唔興趣轉投曼城

6)
巴黎聖日耳門既美國老闆高隆尼打算賣盤
索價6000萬歐元

7)
雖然域咸已經落實續約至2014年
不過紐卡素依然被指考慮收購佢

8)
韋斯咸決定同麥卡菲提前解約
而佢地就同愛華頓爭奪巴塞B隊既25歲箭頭J.蘇利安奴

9)
拉素即將從加拉塔沙雷引入簡拿

10)
基斯薜圖再次同祖雲達斯扯上關係

11)
伊巴落實停賽3場
而AC米蘭就被傳準備收購佢後
再用佢加錢向皇馬收購C7

p.s.:
想講過去兩晚歐聯8強賽事

雖然輸俾勁到爆燈既傑斯係非戰之罪
不過車仔本身其實係玩死自己

上星期講過托利斯既表現已有改善
點知條友進一步之後又退返幾步
成個上半場除左一次頭槌攻門外
對球隊幾近全無貢獻
當中關鍵係佢太少走位
隊友就算想俾波佢
都唔知可以點俾佢
杜奧巴下半場入替佢後既表現
絕對係為佢最好既示範

車仔輸波既另一罪人就一定係美利拉斯
佢未出場前既表現仲好過林伯特同埋艾辛
於對手前場從後踢跌蘭尼真係無必要到極
亦直接導致朴智星可以於無人看管下後上攻入第二球

後防方面
肥安信錯既唁止廢托
仲有冇態既阿歷士
佢回歸中堅位置就令朗尼同埋小豆踢得更輕鬆
泰利顧此失彼下既表現亦唔夠上場咁穩
偏偏伊雲奴域就要踢唔擅長既右閘
俾蘭尼搞到頭都大埋
怕且佢應該冇預料要成日客串踢右閘

曼聯4強要硬撼史浩克04
牌面肯定稱先
由於紅魔中場應有優勢
雲歷克隨時收起水準唔穩既干卡維斯而用多個中場

史浩克04要爆冷
關鍵人物除左紐亞同埋魯爾
應該仲有中堅賀維迪斯

另一邊既西班牙國家打呲
巴塞雖有一面倒既往績支持
不過其實有唔少隱憂

前線方面
韋拿已經9場食白果
加上保贊同埋柏度洛迪古斯都受傷患困擾
前者仲肯定提早收咧
而美斯雖然破左大哨既入波紀錄
不過摩連奴又向來有辦法封殺佢
沙維以及恩尼斯達相信先係羸波關鍵
而中場亦係兩隊實力既最大差野

後防方面
佩奧爾復出機會唔大
布斯基斯雖有身型
不過防中出身既佢位置感甚差
出事機會唔低
事實上若非華迪斯有水準表現
薩克達唔可能兩回合只入一球

2011-4-12

近兩日既部份新聞......

1)
由於拜仁已跌至德甲第4
雲高爾最終提前5場落鑊
球隊暫由助教卡祖接手

2)
菲臘湯臣爆料指利物浦已搞掂荷西安歷基既收購
報導仲話佢既身價高達850萬鎊
而高捷斯基就好可能以150萬鎊俾富咸回購

另一方面,費倫天拿季尾好可能大換血
利記就被指有興趣出價1150萬鎊接收華加斯

3)
泰維斯因為尋晚對利物浦拉傷腿筋而要養傷兩星期
佢將會缺席對曼聯既足總盃4強大戰

4)
托利斯加盟以來仲未開齋
油王被傳考慮季尾賣走佢止蝕

5)
阿拉干尼斯被傳下季重返馬體會接手

6)
幾段阿仙奴既消息……

高安基用3億鎊買多32%阿仙奴股份
佢而家既持股量已經增至62.89%
報導指佢之後會向烏斯曼洛夫收購佢既27%股份

另外,幾名棄將各有新聞
基治表態希望同阿仙奴續約
而賓特拿就再次被指將以800萬鎊轉投漢堡
至於路斯基既經理人透露這名捷克中場仲未收到其他球會既 offer

而韋舒亞以及基拔斯雖然唔在棄將之列
不過亦有轉會傳聞
報導指佢地吸引到曼城既興趣
前者既身價仲直迫4000萬鎊

另一方面,丹尼臣游說韋利安考慮轉投兵工廠
而馬維拿就被傳成為雲加既新防中人選

7)
盧卡古既經理人透露巴塞希望引入這名新星射手
不過600萬歐元既出價同安德烈治既2000萬歐元叫價有好大距離

8)
報導指一旦唔獲曼聯續約
奧雲就會考慮轉投愛華頓

9)
保加拉再次被傳成為紐卡素既新中堅人選
而黑池就被指希望下季向紐記借用出場機會唔多既蘭加

10)
皇馬被指準備出價3000萬歐元
另加無機會出場既加高
同羅馬交換迪羅斯

11)
雖然辛達告魯斯持續死火
不過布力般流浪依然希望季尾買斷佢

12)
馬斯查蘭奴既經理人否認這名阿根廷防中準備轉戰意甲既報導

13)
昆士伯流浪被指想搵保耶以自由身過檔

14)
雖然有報導指曼城想搵施多夫過檔
不過佢就表態希望同AC米蘭續約

另一方面,伊巴謙莫域因為再次見紅而要停賽3場

p.s.:
1)
還返3蛋俾曼城
爽!爽!爽!

2)
上個星期買左幾隻老翻VCD
其中一隻叫 Shearer the Legend
今日睇完先發覺有齊佢為紐記入既206球
10蚊真係抵到爛

最衰柏金告別賽同埋比利專集都冇現貨

2011-4-10

1)
科拿落實同珀斯光輝簽約1年

2)
羅馬忽然被指考慮回購阿古蘭尼

3)
拜仁被指已有3名新右閘人選
當中包括雲達韋爾,安達斯碧克以及拉菲爾

另外,佢地亦再次同卡積亞扯上關係

4)
卡頓高爾涉嫌捲入一宗強姦女學生既案件
不過消息指嫌疑犯就唔係佢
而係佢既一個朋友

5)
阿費利被指為左有穩定既出場機會
以保住國家隊既席位
好可能於季尾離開巴塞
消息指利物浦以及阿仙奴都準備接貨

6)
日本可能如期參加美洲國家盃
但入選球員就會全數係出國搵食嗰批

7)
曼城被指準備出價1200萬鎊收購艾利亞

8)
盧卡古被指成為紐卡素既新箭頭人選

9)
熱刺再次同科蘭扯上關係
而比錫達斯亦對佢有好興趣

10)
傳聞雲加已有換血名單
基治,艾沙維以及賓特拿都會被賣走
而艾蒙尼亞,伊保爾,迪亞比,丹尼臣以及路斯基亦好可能冇得留低

另一方面,艾文達以及安哥拉防中 B.Matuidi 都被指成為兵工廠既增兵對象
而愛華頓亦被指考慮向聖伊天出價收購後者

11)
卡蘭歷以及艾維斯都被指成為維拉既增兵對象

12)
雖然格羅素被傳季尾離開祖雲達斯
但消息指佢最終決定留隊到下季

13)
保贊好可能因為膝傷而提早收咧

14)
曼聯準備同夏格維斯續約1年
而貝碧托夫就被傳成為收購紐亞既籌碼
另一方面,馬高馬連忽然被指成為佢地既1500萬歐元增兵對象

15)
域咸落實同葉士域治續約到2014年
粉碎佢既轉會傳聞

16)
泰禾被傳成為皇馬既新左閘人選

17)
英國傳媒指多達6間外國球會考慮引入李奧曲加
當中包括華倫西亞,西維爾,加拉塔沙雷,羅馬,祖雲達斯以及拿玻里

18)
AC米蘭被指考慮羅致拿維斯

19)
消息指古利季尾約滿巴黎聖日耳門後
會以自由身轉投卡塔爾球會艾薩德
雙方簽約1年

20)
費倫天拿決定為蒙杜利禾提供新約
而如果成事就會令G.迪亞哥斯天尼回流烏甸尼斯

21)
比耶列甸洛夫可能回流俄超,加盟辛尼特

p.s.:
雖然幾多前已經搵人攞左個笠臣簽名
不過一直以來都好想見佢真人
今次又因為私務忙碌而又miss多次
可惜!!!

2011-4-9

近兩日既部份新聞……

1)
謝拉特落實提早收咧

另外,利物浦將於7月再次訪問亞洲
目的地包括廣州,吉隆坡以及首爾
中國傳媒指利記將會約戰廣東日之泉

另一方面,勒邦占士旗下既經理人公司入股利記
佢仲會出任利記既代言人

2)
球員先生有官方候選名單
當中包括泰維斯,柏加,查理阿當,維迪,雲達華治,格夫里巴利以及拿斯尼
而後兩者同時競逐年青球員獎項
其他候選人就包括韋舒亞,祖赫特,查維亞靴蘭迪斯,蘭尼以及高文

3)
車路士再次同卡卡,尼馬以及阿古路扯上關係
而油王亦再次被傳想搵格蘭出任技術總監
不過佢地已經向韋斯咸澄清冇咁既事

另一方面,羅馬再次被指想搵肥安返母會接手
而佢就透露唔係因為收到老細order而死撐托利斯

4)
甘賓尼被指成為拜仁既新中堅人選
不過曼城方面已經表明唔會放人
而奧奴夏以及胡禮菲臘斯就再次被指可能過檔利物浦

5)
朗尼上訴失敗
將要由今晚起停賽兩場

另外,英國傳媒就指足總成功檢控朗尼
係靠要求球證後補佢既爆粗report
事緣球證最初寫賽後報告冇唸住寫死佢

6)
曼聯被指同熱刺爭奪侯克
而這名巴西箭頭已經表態想轉戰英超
而紅魔亦被指有興趣引入施丹嗰仔

而佢地將會為加利佬搞告別賽
對手就係祖雲達斯

7)
雲高爾以及馬沙利都再次被指接手祖雲達斯
而祖記就被指考慮引入艾迪巴約以及艾沙維

8)
哥拉爾迪落實出任博洛尼亞既新主席
佢已經係球會10個月以來既第5人

9)
早前聖保利球迷搞事
令對史浩克04既聯賽被迫腰斬
德甲賽會決定罰佢地對雲達不來梅既聯賽閉門作賽
而當日落後0:2既賽果就被定為最後賽果

10)
格夫里巴利早前雖然已同熱刺續約
不過英國傳媒指一旦熱刺下季無緣歐聯
佢依然會考慮提出離隊

11)
國米被指準備出價2500萬鎊收購泰維斯
報導指佢會因應國米新教練人選先作最後決定

12)
阿迪達被傳回流西甲,加盟華倫西亞

13)
基恩以及馬路達都被指成為拜仁既增兵人選

14)
侯利亞透露準備同李奧曲加傾續約

15)
紐卡素再次同卡蘭積卡扯上關係之餘
亦被指準備接收布朗

16)
巴勒莫透露同小保加6月季尾約滿後掛靴

17)
韋斯咸想搵謝拉以自由身過檔

2011-4-8

應承左紐迷Ricky會講護級形勢……

以而家榜尾既韋根都有31分
護級份子又至少仲有7場未踢
怕且最終至少要有40分先可以成功護級

由第13位既西布朗講起
鶴臣似乎只係岩教中下游球隊
接手後6場英超都唔知嗰輸字點寫
只要keep住個勢
就算距離保險線只有4分優勢
加上餘下賽程唔算易踢
前景都依然樂觀
畢竟已經36分在手

布力般流浪方面
考慮到佢地要於主場兩鬥曼徹斯特雙雄
又要作客韋斯咸以及狼隊
主場對伯明翰以及保頓會係護級關鍵

如果而家領軍既係 Big Sam
護級成功既機會應該大好多
又或者根本唔會淪落到排14
就算堅恩最終協助球隊護級
嗰個唔知米價既印度老闆都應該會送佢一程

其實佢地最好既球員都係來自後防以及箭頭
穩守再靠前線個別球員偷雞
應該先係比較岩佢地既踢法
一日冇好 keyman
硬改主攻踢法只會帶來結構性問題

伯明翰方面
羸聯賽盃後輸晒兩場6分波大戰
令佢地既護級前途持續唔明朗

後防有史葛丹恩提早收咧固然大鑊
賓科士打以及羅渣莊臣既表現更加重要

而前線既施積始終唔適應英超而已經退居後備
佢下季離開英超既傳聞絕對正路
可惜兩個借將馬田斯以及賓特尼都唔見好幫到手
前線繼續死火都好正路

佢地比其他護級對手踢少1場係佢地既最大優勢
考慮到佢地今季作客戰鬥力嚴重下滑
餘下3次主場出擊應該好關鍵

雖然主場羸波率只得31.25%
不過未來對手只係新特蘭,富咸以及狼隊
前兩者護級壓力唔大
後者又只係排尾二既護級份子
如果咁都唔爭氣
降班都唔抵可憐

維拉方面
侯利亞於1月針對防中以及前鋒弱點而增兵
不過球隊整體戰績依然冇大改善

論人腳佢地肯定好過所有護級對手
加上賽程唔算難啃
降班應該輪唔到佢地
唯一憂慮就係將帥不和
這亦可能係佢地今季仆直既最大原因

另一方面,侯利亞早於執教法國以及利物浦既時候
已有引咎請辭既前科
暑假帶隊踢英超挑戰盃既領隊應該另有其人

黑池方面
查實爆冷ko利記後既11場英超
佢地只係1勝2和而攞得5分
同期戰績嚴重跑輸大市
正好解釋點解跌到尾4

佢地向來識攻唔識守
入46球既攻力只係差過前4 以及紐卡素
不過平均每場至少失兩球既防守能力何止全英超最差
簡直連踢英冠都大檸樂
而當對手越來越肯定佢地只係查理阿當既1人球隊後
有針對性部署就自然唔難ko佢地

另一方面,佢地係全英超唯一一隊主場仲差過作客既球隊
就算餘下7場波可以5度於主場出擊
對佢地都未必係好事

荷路維早前預期羸多兩場波攞到39分就可以上岸
怕且佢應該以韋根,紐卡素,史篤城以及保頓為搶分對象

韋斯咸方面
雖然羅比堅尼火速打柴
不過球隊既表現以及戰績都有改善
關鍵就在於而家唔再係柏加既1人球隊
希斯佩加以及丹巴巴亞都相繼成為格蘭既穩膽
加埋麥克盧保表現回勇
對球隊中前場發揮有正面作用

而格蘭亦終於似返個領隊
識得因應對手而靈活運用加利奧尼爾,卡頓高爾以及比基安尼
代表作包括變陣4:3:3
以3:0技術性擊倒唔識貨既史篤城

佢地而家只得32分
至少要羸到3場波先至比較穩陣
佢地餘下既賽程可以話係先苦後甜
尾嗰3場相對比較易踢
所以就算佢地5月頭依然落後
護級應該仲未絕望

狼隊方面
英國賭波公司普遍幾睇好佢地護級
因為佢地主場特勁
羸波率接近一半
而這亦係佢地護級既最大本錢

不過,史堤夫亨打提早收咧之餘
奇雲杜里季內復出既機會又唔大
整體戰鬥力於護級份子當中更見不足

韋根方面
近兩場雖然搶到4分吊命
不過形勢依然水深火熱
歸根究底都係攻不銳,守不穩既老問題

馬天尼斯雖然已經keep住調節球隊攻守
不過始終講求控球在腳
但球隊最終冇一個可靠既射手負責最後一腳
從首席射手洛達歷加都只係入得7球已略知一二
而域陀摩西斯亦始終有待磨練
這亦解釋到點解韋根既攻力係英超最差

另一方面,佢地中後場球員質素一般
控球在腳既踢法於失波後往往輸反擊
情況同黑池相若

考慮到佢地餘下賽程幾難啃
本身又無甚本錢求生
重返英冠應該只係時間問題

p.s.:
由季初到而家
狼隊以及韋根依然係小弟既降班心水

另一隊相信走唔出伯明翰,黑池同埋韋斯咸
對後兩者有情意結
希望佢地可以逃出生天

2011-4-7

1)
杜查奧斯基落實以自由身轉投西維爾
雙方簽約4年

2)
若果日本退出美洲國家盃
消息指西班牙將會補上

3)
AC米蘭被指有興趣羅致C7
不過摩連奴已經表明唔會放人

另一方面,尼斯達決定至少踢多一季
不過紅黑兵團就忽然被指想搵加利卡希爾或者維頓漢做佢接班人

4)
阿仙奴將於季尾以100萬鎊從查爾頓收購本土左閘卡爾京遜

而佢地亦再次同保方扯上關係
比拿里奧就係雲加另一個新龍門人選

另一方面,伊保爾被指成為熱刺既增兵對象

5)
貝斯因為腳踭傷患而提早收咧
而賓艾化就已經可以慢跑以及獨自訓練

6)
堅尼可能接手墨爾本勝利

7)
消息指黑池準備將查理阿當既身價定為3500萬鎊

8)
布力般流浪被指打算接收奧雲

9)
施多夫可能轉戰巴甲,加盟哥連泰斯

10)
雖然近期被傳成為曼聯以及巴塞既增兵人選
不過馬里奧葛斯就表態短期內唔準備離開多蒙特

11)
艾加因為膝傷而提早收咧
而利物浦就再次被指考慮收購基治以及軒達臣

12)
富咸想搵李奧曲加以自由身過檔
而漢基蘭就被指成為拜仁既新中堅人選

13)
意大利傳媒指李安納度將於季尾落台
不過莫拉堤就否認有關報導

14)
保路錫被指成為熱刺既新龍門人選

p.s.:
費sir尋晚破盡數據ko肥安
固然要多謝球證數鬆唔罰艾夫蘭
而另一關鍵就又係在於防守

朗尼超多時間墮後中場
表面係 4-4-2 既陣式實情係 4-5-1
而卡域克落實續約後狀態回升唔少
係球隊既無名英雄

而復出既里奧以及雲達沙亦都有水準表現
當中後者撲出托利斯頭槌既動作
絕對係近期見到既最佳撲救

車仔方面
最大問題其實係進攻
托利斯表現其實有改善
兩次門前漏油以及頭槌俾雲達沙救到
算係有少少冇運

要提升車仔火力
關鍵係肥安點樣改造杜奧巴
因為杜奧巴而家不但要墮後
有時亦要於右路同艾夫蘭過招
但兩瓣都唔係佢既必殺技
徹底浪費左佢開山劈石以及埋門既攻能
既然係咁
倒不如要兩大箭頭一齊等供應
對對手中路既牽制應該仲大

另一方面,施哥夫已經雪到硬晒
下半場被換走前仲簡直隱形
雙方季尾怕且應該考慮轉會既可能

佢地既後防反而問題唔大
畢竟傑斯助攻前既一控一推都係世界級水準
失波都係非戰之罪

2011-4-6

近兩日既部份新聞......

1)
英格蘭球員先生已有候選名單
當中包括泰維斯,維迪,格夫里巴利,柏加,查理阿當以及拿斯尼

2)
消息指紐約紅牛有興趣接收杜奧巴

3)
朗尼以及格蘭都因為行為不檢而俾足總罰停賽兩場
前者就表態會提出上訴

4)
雖然祖雲達斯方面否認保方離隊既傳聞
不過佢地被指依然準備同史杜拉利續約3年
似係做定兩手準備

5)
艾迪巴約以及域陀摩西斯被傳成為紐卡素最新兩個新箭頭人選

6)
由於加度素既經理人被揭發私自同安卡接觸
非常不滿既AC米蘭被指打算索性賣走佢套現

7)
昆士伯流浪重返英超在即
報導指柏加正係佢地首個收購對象

8)
曼聯以及曼城都被指準備出價2500萬鎊收購桑馬達
而前者亦同馬治斯奧扯上關係

9)
利物浦再次同胡禮菲臘斯扯上關係

而杜格利殊就被指派球探觀察馬瑟韋爾翼鋒 C.Humphrey
由於佢阿媽係牙買加人
佢可以選擇代表出生地蘇格蘭或者牙買加上陣

10)
富咸被指準備出價300萬鎊收購耶保

11)
華倫西因斯既喀麥隆國腳邦治被指成為新特蘭既新左閘人選
而布魯士亦被傳睇中史雲斯既祖名倫

12)
西布朗打算搵李奧曲加以自由身過檔

p.s.:
1)
國米4日內兩度俾對手大炒3球
雖然兩次都有捷禾見紅
不過路人甲都知真正關鍵係防守做得唔好

李安納度一日唔識打好嗰底
佢都只係一個有星味既二流教頭

2)
法比加斯炒車大難不死
小弟第一個反應係當年冇佢咁好彩既倫天尼
這名當時係全球最貴既天才翼鋒足足養傷9個月
亦從此返唔到高水準

同倫天尼相同命運既仲有而家南華教練團成員既安尼頓
佢當年以正選身份協助聖保羅擊敗AC米蘭羸得洲際盃
之後又係因為炒車而養傷1年
最終輾轉淪落港甲

3)
祖國狗官近日又做埋咁多陰質嘢
憤怒!!!

2011-4-4

近兩日既新聞......

1)
巴特鐘斯將於季尾被利物浦放棄
祖高爾就被傳成為富咸既增兵對象

另一方面,羅渣莊臣以及查維斯就再次同利記扯上關係

2)
隨住大敗俾卡坦尼亞0:4
巴勒莫決定解僱接手只有1個月既哥斯美
而透過米高利做中間人
上個月被解約既基里奧羅斯再次接掌球隊

3)
艾迪巴約表示希望重返英超

4)
李斯特城被指希望接收奧雲

5)
夏格維斯,史葛丹恩,赫頓以及沙夏都因傷而要提早收咧
而相同下場既仲可能包括謝拉特

6)
迪甘斯再次否認離隊傳聞

7)
哥迪奧拿暗示於2012年離隊

8)
維拉決定放棄李奧曲加
不過費度就獲得留用

另一方面,佢地被傳準備同曼聯以及車路士
爭奪亨克既19歲新星 K.De Bruyne
而文迪斯就係侯利亞既另一收購對象

9)
阿仙奴以及車路士都被指有興趣收購菲爾鍾斯
而前者就再次同泰禾扯上關係

10)
哈利列納否認引入高路斯既報導
而杜斯山度士就表態唔想重返熱刺

11)
馬連奴最終因為成績欠佳而要離開帕爾馬

12)
拿斯尼被指成為AC米蘭既增兵對象

13)
保拿特希望可以正式轉投葉士域治

14)
日本足總決定退出美洲國家盃
而佢地為左節省電力
J-League重開後既比賽一律要於下晝2點前開波

15)
基羅斯落實執教伊朗
雙方簽約3年

16)
國米再次同阿歷士山齊士扯上關係
傳聞收購價大約1500萬歐元

17)
紐卡素被指準備出價2000萬歐元收購馬里奧高美斯
而比拿美就被指係佢地既另一個考慮人選

另一方面,柏度就否認引入韋斯活特既報導

18)
羅馬方面被指有興趣收購保方以及柏斯托尼
而祖雲達斯已經否認前者離隊既傳聞

19)
芝加哥火焰落實引入意裔美國箭頭費拉利

20)
M.施素高表態於季尾離開圖盧茲

p.s.:
鶴臣既離隊補償原來高達730萬鎊
連埋補俾賓尼迪斯既300萬鎊
利記就咁使左過千萬鎊冤枉錢......

2011-4-3 (2)

雖然南華同埋傑志都唔係小弟杯茶
不過都想多口講下今日既榜首大戰

大抵排陣同埋用人已經分出勝負

傑志方面
甘巴爾用人明顯有心思
佐迪同埋豬事基互換位置既效果唔錯
後者既表現仲肯定係近年最搶既一次
絕對勇冠全場
而梁子誠專攻文彼德又係針對性部署
因為前者無論速度同埋腳法都食硬後者
最終助攻盧比度入波

南華方面
畢特,基士文同埋陳韋拿3大明星
全部都無甚貢獻可言
白鶴,基奧雲尼同埋鄭25
反而因為要讓位俾佢地而長坐冷板
明顯係領導層沉迷名氣

兩個星級箭頭本身都欠缺獨自上腳搵食既本錢
可能由於中場供應不足而唯有四圍游走
不過現身於對手危險位置既時間亦未免太少

當中'唔識輸'連短界外球都要經手
咁禁區仲可以有邊個埋門
係過份錫身唔肯同羅沙度埋身肉搏
抑或真係好想引開後衛俾中場後上
一直有留意佢踢波既球迷自有答案

畢基組合起唔到化學作用
可能連冇睇過佢地踢波既球迷都知
小道消息係傑志老闆伍健星期五上晝
聽到記者話畢特會正選上陣
已經笑到收唔到聲
可想而知畢特幾有作為

如果英超防中都可以化身港甲keyman
咁加利佬他日上山
就必定可以馬干上身踢晒成條右路

南華陣中其實最缺乏識分波既中場
強哥年事已高兼有傷在身
白鶴同埋帥哥其實最有本錢兼職派牌
總好過倚靠年紀仲大過強哥既畢特

半場勢色唔對都唔肯收敢有變動
怕且只係信錯名牌既更有力證明
終於畢特職業生涯第7次見紅將佢地追平既希望徹底粉碎

不過小弟又覺得錯不在飛碟陳
因為佢怕且只係老世足球旗下
一個被塑造專業而又偏偏放棄專業既可憐虫

羅神俾到8位數字一季去玩真人版 Football Manager
梗係要攞話事權

話說回頭
你估羅神唔知畢基組合唔掂咩
不過轉章咪即係承認自己俾人搵笨
可憐部份南華球迷就因為咁而俾佢激到嘔十九幾兩血

媽差廖國文既人多不勝數
但親耳聽到怒插羅神既聲音都絕對唔少

p.s.:
如果冇左羅神就唔撐南華既
只係神既信徙
如果唔理係唔係羅神揸旗都撐南華既
先係南華既真正球迷

2011-4-3 (1)

阿摩以巴塞技術總監身份訪港
小弟當然唔錯過機會搵佢攞簽名
唸唔到佢真人 nice 到爆燈
有3個球迷每人問佢攞左超過廿個簽名
佢都竟然冇托手肘就反映佢份人有幾易話為

由於book場方面擺左老烏
11點既練波時節原來係屬於一班業餘波友
阿摩從西班牙兵口中得知冇場練波既真相後
嗰表情都幾驚訝
而佢之後仲俾個著巴塞波衫既波友仲請佢食波餅

錯有錯著亦令阿摩多左時間接受傳媒訪問
透過南美聰既翻譯
有問必答既佢答左超過10條問題
當中部份內容如下:

1)
以往國家打呲前
巴塞唔會有特別準備
不過就會比平時更集中
而傑志球員面對南華前,唯一可以做既亦都係集中

2)
巴塞近年既布斯基斯以及耶耶托尼都係比較強壯既球員
加上佢地既跑動範圍確係最多
令人誤會踢4號位一定要身體特別強壯
不過其實巴塞失波後
中前場其他球員其實都會好積極施壓
防守工作唔係4號位一力承擔

而佢以及沙維都唔係特別強壯
以前踢4號位都有好表現
反映身體質素並唔係關鍵
相反同隊友之間既合作先係最重要

3)
巴塞既青訓其實都好注重教育
例如美斯,沙維等人於球場外其實好低調
就係當年球會教佢地要謹記於球場外只係普通人

4)
畢特以及基士文都係世界級球員
不過現今足球好難單靠一至兩名球員去決定勝負
整體合作先係最緊要

5)
基士文以前效力馬體會既時候
一度被傳係巴塞既增兵對象

6)
佢雖然身型冇咩走樣兼繼續食腦踢波
不過佢就話身體狀況始終好難同以前相比
所以而家只會簡中為巴塞元老隊出賽
當中沙治以及安歷基都係佢既隊友

7)
雖然近年部份青訓產品俾其他歐洲球會搶走
不過佢表示情況唔算嚴重
因為希望加入巴塞既人遠比有離心既人多
加上佢亦認為冇必要挽留想走既人

8)
巴塞近年成績超勁
令人覺得而家既一代超勁
不過就算而家既一代將來退役或者轉會
巴塞仍有大把新血表班
而事實上球會既運作近30年來都係主要靠青訓產品接棒
當然巴塞近年食住皇馬
另一關鍵就係注重整體發揮

2011-4-2

近幾日既部份新聞......

1)
奧運外圍賽
港隊下輪對烏茲別克
而世界盃外圍賽
港隊就要越級挑戰沙地

2)
竟然同盧卡斯利華續約既利物浦被傳為左扣展亞洲市場
而有興趣羅致本田圭佑同埋朴主永
當中保頓亦對後者虎視眈眈

另一方面,一旦拉爾拿離隊
洛里斯就被指成為利記既新龍門人選
而紅軍亦被指同曼聯爭奪身價1500萬歐元既路蘭度

3)
摩連奴透露07年時幾乎接手英格蘭
不過因為唔想隔太耐先有一場比賽而拒絕接手

而華丹奴就同佩雷斯攤牌
表明下季有摩連奴就會冇佢

同時間相關既傳聞於西班牙甚多
既有指佩雷斯考慮為左討寸王歡心而引入杜奧巴
亦有報導話佢視賓尼迪斯為寸王既替補

4)
雲達不來梅放風韋爾斯以及梅迪薩卡都好可能會被掛牌出售
報導指雲加幾有興趣接貨

5)
維度被指考慮跟隨希歷基斯過檔拜仁
而畢特就宣佈季尾掛靴

6)
馬德里法院裁定今個星期既西甲以及西乙聯賽如期舉行

7)
阿祖安奴落實同哥連泰斯簽約15個月
由於佢近年既出場紀錄太差
佢既月薪只有30萬歐元
不過每月另有最高25萬歐元既出場獎金
而佢亦可以就波衫銷售同球會分帳

8)
白賴仁笠臣既治癌進展理想
報導指佢將於幾個月內完全康復

9)
加斯居尼欠稅3萬2000鎊
稅局決定俾佢延期還款
不過如果佢之後繼續拖字決
就面臨被當局申請破產

10)
謝拉透露同富咸約滿後
準備繼續於英超落班
近日準備同路蘭提前續約既紐卡素隨即再次同佢地扯上關係

而紐記亦被指準備同利物浦以及車路士爭奪韋拿杜姆
另外,莫斯科中央陸軍亦被指對卡蘭積卡好有興趣
而耶保,朗治以及列斯聯既蘇格蘭中場 R.Snodgrass 就同紐記扯上關係

另一方面,森遜被傳成為韋斯咸既新右閘人選

11)
祖雲達斯被指已有多名新教頭
當中包括納比,文仙尼,馬沙利,史巴利堤以及干地
前者早已表明唔考慮任教意甲球會
而後者近日亦表示唔會接手

另外,祖記被指準備同賓菲加以及熱刺爭奪高路斯
另一方面,保方就再次被傳離隊

12)
皮利斯被傳下季去卡塔爾掘金
而侯利亞就被指準備從波爾多引入卡拉素

13)
巴塞即將同荷西賓度續約到下季尾

14)
西維爾成為最新一間同謝雲奴扯上關係既球會

15)
高拉洛夫被傳回流意甲,加盟AC米蘭
而紅黑兵團亦被指有興趣搵麥薩斯以自由身過檔

16)
伊比斯域被指成為維拉以及西布朗既新箭頭人選
報導指這名波斯尼亞射手約值700萬歐元

17)
辛尼特再次斟酌加度素

18)
消息指費sir準備引入兩至三名球員
另有報導指曼聯已經同馬體會傾好以2000萬歐元收購迪基亞

佢地又忽然被傳有興趣引入米基爾同埋大衛辛頓
而佢地被指準備同車路士以及拜仁爭奪比利時中場韋素爾

另一方面,艾殊利楊格就被指會係季尾首個加盟紅魔既球員

19)
美國商家 T.DiBenedetto 旗下既財團落實入主羅馬

20)
活基治再次受傷
季尾約滿既佢可能已經踢完於熱刺既最後一場比賽

21)
由於波斯尼亞足總堅持要執行3會長制度
違反國際以及歐洲足協既規定
而即時被佢地禁止參加國際賽

22)
阿積士8名董事由於同告魯夫意見不合
而宣佈集體請辭

23)
新特蘭將於季尾買斷文沙以及蒙達利

24)
魯特禾馬被指成為飛燕諾既新防中人選

25)
英國傳媒再次指馬勒當拿下季接手布力般流浪
仲傳佢會搵埋阿古路過檔
另外,佢地亦被指考慮引入科蘭以及雲佬

p.s.:
稍後再講阿摩訪港......