應承左紐迷Ricky會講護級形勢……
以而家榜尾既韋根都有31分
護級份子又至少仲有7場未踢
怕且最終至少要有40分先可以成功護級
由第13位既西布朗講起
鶴臣似乎只係岩教中下游球隊
接手後6場英超都唔知嗰輸字點寫
只要keep住個勢
就算距離保險線只有4分優勢
加上餘下賽程唔算易踢
前景都依然樂觀
畢竟已經36分在手
布力般流浪方面
考慮到佢地要於主場兩鬥曼徹斯特雙雄
又要作客韋斯咸以及狼隊
主場對伯明翰以及保頓會係護級關鍵
如果而家領軍既係 Big Sam
護級成功既機會應該大好多
又或者根本唔會淪落到排14
就算堅恩最終協助球隊護級
嗰個唔知米價既印度老闆都應該會送佢一程
其實佢地最好既球員都係來自後防以及箭頭
穩守再靠前線個別球員偷雞
應該先係比較岩佢地既踢法
一日冇好 keyman
硬改主攻踢法只會帶來結構性問題
伯明翰方面
羸聯賽盃後輸晒兩場6分波大戰
令佢地既護級前途持續唔明朗
後防有史葛丹恩提早收咧固然大鑊
賓科士打以及羅渣莊臣既表現更加重要
而前線既施積始終唔適應英超而已經退居後備
佢下季離開英超既傳聞絕對正路
可惜兩個借將馬田斯以及賓特尼都唔見好幫到手
前線繼續死火都好正路
佢地比其他護級對手踢少1場係佢地既最大優勢
考慮到佢地今季作客戰鬥力嚴重下滑
餘下3次主場出擊應該好關鍵
雖然主場羸波率只得31.25%
不過未來對手只係新特蘭,富咸以及狼隊
前兩者護級壓力唔大
後者又只係排尾二既護級份子
如果咁都唔爭氣
降班都唔抵可憐
維拉方面
侯利亞於1月針對防中以及前鋒弱點而增兵
不過球隊整體戰績依然冇大改善
論人腳佢地肯定好過所有護級對手
加上賽程唔算難啃
降班應該輪唔到佢地
唯一憂慮就係將帥不和
這亦可能係佢地今季仆直既最大原因
另一方面,侯利亞早於執教法國以及利物浦既時候
已有引咎請辭既前科
暑假帶隊踢英超挑戰盃既領隊應該另有其人
黑池方面
查實爆冷ko利記後既11場英超
佢地只係1勝2和而攞得5分
同期戰績嚴重跑輸大市
正好解釋點解跌到尾4
佢地向來識攻唔識守
入46球既攻力只係差過前4 以及紐卡素
不過平均每場至少失兩球既防守能力何止全英超最差
簡直連踢英冠都大檸樂
而當對手越來越肯定佢地只係查理阿當既1人球隊後
有針對性部署就自然唔難ko佢地
另一方面,佢地係全英超唯一一隊主場仲差過作客既球隊
就算餘下7場波可以5度於主場出擊
對佢地都未必係好事
荷路維早前預期羸多兩場波攞到39分就可以上岸
怕且佢應該以韋根,紐卡素,史篤城以及保頓為搶分對象
韋斯咸方面
雖然羅比堅尼火速打柴
不過球隊既表現以及戰績都有改善
關鍵就在於而家唔再係柏加既1人球隊
希斯佩加以及丹巴巴亞都相繼成為格蘭既穩膽
加埋麥克盧保表現回勇
對球隊中前場發揮有正面作用
而格蘭亦終於似返個領隊
識得因應對手而靈活運用加利奧尼爾,卡頓高爾以及比基安尼
代表作包括變陣4:3:3
以3:0技術性擊倒唔識貨既史篤城
佢地而家只得32分
至少要羸到3場波先至比較穩陣
佢地餘下既賽程可以話係先苦後甜
尾嗰3場相對比較易踢
所以就算佢地5月頭依然落後
護級應該仲未絕望
狼隊方面
英國賭波公司普遍幾睇好佢地護級
因為佢地主場特勁
羸波率接近一半
而這亦係佢地護級既最大本錢
不過,史堤夫亨打提早收咧之餘
奇雲杜里季內復出既機會又唔大
整體戰鬥力於護級份子當中更見不足
韋根方面
近兩場雖然搶到4分吊命
不過形勢依然水深火熱
歸根究底都係攻不銳,守不穩既老問題
馬天尼斯雖然已經keep住調節球隊攻守
不過始終講求控球在腳
但球隊最終冇一個可靠既射手負責最後一腳
從首席射手洛達歷加都只係入得7球已略知一二
而域陀摩西斯亦始終有待磨練
這亦解釋到點解韋根既攻力係英超最差
另一方面,佢地中後場球員質素一般
控球在腳既踢法於失波後往往輸反擊
情況同黑池相若
考慮到佢地餘下賽程幾難啃
本身又無甚本錢求生
重返英冠應該只係時間問題
p.s.:
由季初到而家
狼隊以及韋根依然係小弟既降班心水
另一隊相信走唔出伯明翰,黑池同埋韋斯咸
對後兩者有情意結
希望佢地可以逃出生天
5 comments:
狼隊同韋根毫無疑問最大機會降班
另外網主認為果三隊
小弟都覺得
伯明翰降班機會較大
不過唔知佢地真係降班
馬田斯又會唔會同佢地一齊降班呢
其實呢一隊危險既
小弟覺得係布力般
To: 舒利亞
1)
小弟覺得黑池既形勢仲危過伯明翰
因為跌勢實在太恐怖
同96-97年既水晶宮
以及前年既侯城有得比
最驚黑池冇當年既侯城咁好彩
有隊紐記做替死鬼
2)
伯明翰只係借用馬田斯到季尾
如果不幸降班
一來唔似會有錢買斷佢
二來馬田斯都唔似肯屈就英冠
3)
你覺得布力般流浪危險在咩?
佢地賽程其實唔多樂觀
加上今季表現
我局外人就唔清楚
但連小弟有d fd係佢地死忠fans
都x佢地不知所謂
當然請個名不見經傳既堅恩代big sam
絕對係致命一著
所以雖然小弟好想紐記換老細
但無啦啦有財團入主
都未必係好事
當然小弟又唔會想佢地降
始終係我偶像踢過既球隊
今屆英超邊三隊降班真係好難估
因為真係冇乜魚腩球隊,
感覺上連排第八位既保頓
都仲有少少要為保級安全線而努力,
布力般作客酋長球場可以逼和阿仙奴,
已經証明佢地實力唔差
以佢地既底子咁厚
今季護級最多都係有驚冇險
網主用13位開始劃界
又真係非常正路
狼隊同韋根整季都有令人驚喜又驚嚇既表現
有時又俾佢地在強隊搶到一些分數
但又會大敗幾場,
佢地護級能否成功真的要睇下球員既搶分意志,
不過兩隊既人腳比起其他護級份子真的相對較弱,
同埋整季又只係靠個別球員去支撐
而家以狼隊既主力傷病情況好似較為嚴重,
黑池進攻好有隊型,真係幾好睇
不過真係太過依賴查理阿當佢地既人腳踢到而家仲未跌到尾三,
我覺得已經好難得,
當然如果佢地不幸要降班,
都算雖敗猶榮....
如果以而家既情況去睇
黑池,狼隊同韋根
真係最大危機
當中我覺得以狼隊整季表現最有鬥心,
但如要降班就最為可惜
伯明翰同韋斯咸如果球員生生性性
以佢地既人腳
應該唔會好似前年紐記攪到咁一團糟...
估計又係有驚冇險
To: 舒利亞 & sammysir
1)
傳聞堅恩就係當日篤 Big Sam 背脊
間接搞到佢冇得撈既小人
2)
布力般流浪中後場夠硬朗
人腳又唔差
如果佢地用大巴士戰術
當日死氣沉沉既兵工廠搞佢地唔掂都正路
3)
狼隊ko利記以及車仔既時候
正係兩強全季最沉既時候
而曼聯同埋曼城衰俾佢地
就係衰埋門一腳
4)
狼隊同史篤城都係比較似英冠既英超球隊
兩者都係超好鬥志
不過前者人腳始終比較差
麥卡菲既護級履歷亦俾唔到人信心
5)
同意黑池係好有娛樂性既球隊
亦同意同伯明翰以及韋斯咸相比
佢地降班既機會略大
但小弟始終比較鍾意黑池以及槌仔幫
所以寧願港伯返英冠
6)
而家既韋斯咸一定好過前年既紐記
至少有隊型之餘
仲有個壓得住場既隊長柏加
至於伯明翰方面
麥利殊到而家都砌唔掂前線既最佳組合
同當年既紐記一樣咁令人失望
Post a Comment