想講英超最新形勢......
先講雙紅會
利記全場只係踢左5分鐘好波
最扯火仲係佢地輸返轉頭之後谷唔起既表現
簡直似一個放棄求生既絕症病人
小弟邊睇邊唸原因
7日內踢3場一定有關
不過賓尼迪斯奇差既排陣同埋調動先係關鍵
見到正選再有盧卡斯利華已經唔開心
條友亦一如所料踢到隱形
佢加埋馬斯查蘭奴夾手夾腳包辦兩個失波既責任
加埋球証韋比老早已經有偏幫曼聯既前科
成場波都似係10個鬥12個
而賓帥落後下既調動亦令人莫名奇妙
謝拉特轉去右路搵食
要知道佢既盤扭能力只係一般
任佢四圍走先可以發揮佢最大威力
結果佢多次面對艾夫蘭都唔多搵到食
而佢換入阿古蘭尼同埋巴布都冇問題
不過應該最早換班拿約落場
佢熱身完之後竟然忽然被收起
要等到82分鐘先有機會入替巴西廢柴
如果一早搵佢落場踢右邊
效果應該好好多
結果益晒曼聯乘住車仔意外失分而上頂
車仔週中輸俾國米後
油王已經狂鬧班友兩個鐘
今場佢地上半場睇落都踢得似樣
不過下半場就應該因為體力問題而走晒樣
加上後防繼續發瘟
埋下輸波伏線
肥安過檔帶埋體能訓練專定迪米捷利斯
不過眼見車仔既疲態
小弟忽然覺得AC米蘭成間老人院都掂
最大原因應該係意甲既節奏太慢
但英超快好多既節奏
車仔又始終多老嘢
空手道高手既金漆招牌都好可能保唔住
車仔而家雖然失多1分
不過佢地唔使兼顧歐聯
只要出訪奧脫福唔輸
都依然有力反先
阿仙奴就終於俾小弟既烏鴉口講中
隨住華美倫坐波監
(希望只係罰1場)
加上加拿斯養傷
佢地最終要靠耆英組合踢英超
蘇甘保拍豬達真係連英冠都未必頂得住
用柒治客串又驚佢唔慣
中路防守勢必成為兵工廠偷雞英超既最大隱憂
而隨住熱刺同埋曼城羸波
分別比佢地失多7至8分既利記要趕過佢地真係越來越難
就第7既維拉亦其實失少利記4分
小弟點都要有少少心理準備利記前4不保
最後要講榜尾
英超賽會威脅樸茅唔可以留力
擺明又係見佢地係小球會先蝦佢地
好彩佢地殘陣都羸波先唔使俾賽會抽後算帳
而佢地死都要攬住般尼同埋侯城
就令護級形勢開始明朗
大抵般尼之前3場主場搶分大戰只得1分
已經半隻腳返左英冠
而侯城高層遲左3個月先炒菲臘布朗兼搵履歷奇差既杜維接手
後防又繼續積弱
大抵又係死都唔抵可憐
最大得益者怕且都係麥卡菲既狼隊
佢地繼續冇章法兼冇實際
唔使收皮只係因為人地包底
下季段估再冇咁好彩
5 comments:
利記又輸番個勢
第四真係一日比一日不保
唯有希望佢地盃賽發圍啦....
車仔雖然有唔洗打歐聯既優勢
不過佢地其實又有隱憂
太依賴杜奧巴加上泰利不穩
影響可以好大
佢地同曼聯之爭
小弟認為佢地唔會有太大優勢
三隊入面小弟當然希望阿仙奴可以爭番口氣
不過曼車再次霸住冠軍似乎係必然之勢
初初太有驚喜
雖然一定係想利物浦嬴
但明顯沒有威脅
歎一句
奈何
To: 舒利亞 & 路斯基
1)
拉爾拿守得算穩
令利記今場已經輸得少
全隊利記只有兩個西班牙人比較似樣
2)
車仔而家最緊要唔好亂
由於杜奧巴真係好 fit
加上仲有馬路達同埋林伯特
攻力始終有保證
佢地最大問題係後防
泰利真係不穩
好多時都踢到患得患失
加上佢既拍檔無論係卡華路定係阿歷士
亦各有缺點
而正選左右二閘都傷晒又係惡搞
助攻弱左之餘
亦守得冇咁穩
好彩施治就快好返晒
3)
車仔唔使踢歐聯始終有優勢
4)
阿仙奴雖然有尹佩斯今個星期復操
不過後防唔夠腳就始終令人唔放心
阿仙奴幫華美倫上訴緊
或者可以網開一面
其實而家形勢仲係阿仙奴最好
捱得過下週作客伯明翰
冠軍仲係好有機會
曼聯3月底要連踢對拜仁的客主場
以及中間夾住對車路士
隨時兩頭唔到岸
至於車仔仲有作客對熱刺和利記
一樣唔易踢
To: wtssoccer
1)
阿仙奴雖然餘下賽程比較易踢
不過佢地後防成日都冇勁既替補
兼且亦有歐聯兼顧
始終令小弟唔敢太睇好佢地
2)
小弟同樣打死都唔信
曼聯連踢3場硬仗都順風順水
3)
最關鍵係車仔自己唔好亂
同埋施治盡快復出
佢地今季鬥強隊既表現好好
有力趁曼聯同埋兵工廠分心歐聯而後上
Post a Comment