話咁快就踢左5場分組賽…..
1) 南非對墨西哥
預左墨西哥前線有功勢冇實際
早前對英格蘭同埋荷蘭已經俾人睇通晒
杜斯山度士已經係唯一亮點
主隊最終捉到鹿唔識脫角
兩個好餐士都拉唔開兩球優勢
雖然佢地進攻板斧唔多
不過靠主場氣勢依然有力爭入16強
對南非本土搵食既球員認識唔多
不過對古尼舒巴拉拿就有一定印象
事關凱撒酋長係小弟最有印象同埋好感既南非球隊
佢地06同埋07年兩度派青年軍訪港踢7人賽
簽晒名既紀念錦旗同埋官方 Vuvuzela 都係小弟睇波既紀念品
2) 烏拉圭對法國
甩毛公雞近年大賽既表現一次衰過一次
杜明尼治既用人再次吹到世人啤一聲
搵馬路達同埋列貝利一左一右本來正路
佢偏要用廢柴高禾踢右邊
列貝利仲要因而轉邊搵食
而安歷卡同埋哥古夫既表現又係令人失望
前者因為後者冇後上支援而被迫更加獨食
兩個都唔應該踢多過半場
正箭頭基格納就俾條傻佬當跑狗咁用
後備入替後毫無作為都唔怪得佢
迪亞比同埋杜拿蘭已經係比較有表現既少眾
前者助攻助守仲有少少韋拉既影子
只係嫌佢俾直線既火候仲未夠
另外,亨利如果繼續佢放狗散步既步伐
就不如索性退出國家隊
烏拉圭方面
冇咩供應既科蘭單挑加拿斯已經好有威脅
不過就繼續反映冇可靠 playmaker 既老問題
3) 南韓對希臘
希臘似乎比08歐國盃更加唔掂
當中條防線差到唔認得係佢地
難怪軒迪克叫佢地開始執行李
4) 阿根廷對尼日利亞
兩隊都冇組織
個人質素超班既阿根廷自然佔優
現時既阿根廷比外圍賽略有進步
至少死球戰術好有部署
泰維斯專攻左路亦令美斯更 free
不過兩閘同埋防中仍有隱憂
而列強既死守能力亦遠高於尼日利亞
今賽羸波唔足以令小弟對阿根廷既評級大幅提昇
另一方面,安耶馬算係一戰成名
不過反應超快既佢其實超級神經刀
出迎解圍仲係佢既弱點
5) 英格蘭對美國
一早講過美國佬遇強越強同埋格連信唔過
弱雞龍門既犯錯向來好似交稅咁走都走唔甩
4 comments:
五場睇左三場
不過似乎無一場滿意
水準唔似踢緊世界盃
勁悶
反而開幕戰南非對墨西哥係比較均勢
叫做有少少睇頭
當中墨西哥門將更加令小弟笑足全場
無記錯好似有奧祖亞
點解唔出-.-
至於希臘
小弟認錯-.-
估佢地唔到
成班元老隊出來踢波咁....
阿根廷睇落無咩霸氣
雖然球員質素夠
但係攻得入
只係因為對住防守幾廢既尼日利亞
尼日利亞一早用馬田斯
可能有波入
小弟更想知占士米拿上半場已經被換走既原因
而格連應該可以講聲拜拜
用Hart吧
另外睇見隊長既表現
完全認為佢剛剛果季係利記
應該係有留力= =
To: 舒利亞
1)
奧祖亞係有入選
不過艾古爾可能唔敢換龍門
之前02年同埋06年兩次帶隊都係用佩雷斯
2)
馬田斯如果踢正選對住軒斯
應該可以靠速度屈機
不過有冇波入又係另一回事
3)
負傷既占士米拿其實仲未 top fit
卡比路應該見佢有黃牌在身
索性用胡禮菲臘斯入替佢
不過小弟覺得祖高爾先係適合既人選
4)
向來都覺得格連超唔掂
用占士或者祖赫特都好過佢
5)
謝拉特唔似係留力
不過好多於球季傷多過踢既球員
返到國家隊踢太公波都特別生猛
例如02年既大哨就係好例子
所以今次尹佩斯隨時大爆發
p.s.:
又有無聊人亂留廣告......
已 delete
交稅係可以分期嘅......
京治收工, 用加歷查似乎好危險, 話晒佢無踢國家隊咁耐, 不過佢同格蘭莊臣可以有計傾嘅!
點解唔試o下用希斯基打左, 加埋高佬屈機呢? 不過似乎如果巴利可以踢, 就直頭收起希斯基, 推謝老四上前啦!
To: 死佬
1)
京治同泰利已經係陣中僅有可靠既中堅
前者出名玻璃腳
一早預佢唔會踢得晒所有賽事
不過一場就玩完又未免太少
2)
加歷查既最大問題係速度超唔掂
3)
希斯基同埋哥治唔似會同場上陣
4)
如果有巴利
小弟都贊成將謝拉特移前
佢已經谷左成季
到咁既 moment 真係要爆
p.s.:
分左期最終咪又係要交
仲要俾5%同埋10%附加費
Post a Comment