想講尋晚兩組最後一輪分組賽......
G組方面
巴西同埋葡萄牙和波唔意外
畢竟各取所需
場波首要任務其實係避免不必要受傷同埋攞牌
但大家上半場都收唔到火加埋攞左7張黃牌就真係意料之外
場波唔算好睇
因為大家都真係冇肯搏命
葡萄牙冇箭頭既陣式
都唔知昆羅斯想點
單靠C7既單打獨鬥明顯唔係上算
事實佢例牌上腳加上浪射既踢法越來越趕客
伊度亞度比佢更有資格當選今場最佳球員
另一方面,巴西一對中堅都先後再次犯錯
入淘汰賽隨時一次意外就玩完
而踩足3場既基拔圖施華亦有體力不繼既隱憂
H組方面
西班牙羸波但表現持續一般
咁多時間踢多個都只可係羸得一球之餘
下半場做樣搏多段之後
仲索性搓到夠鐘
睇得出佢地想留力同埋有少少驚死
瑞士就繼前兩個大賽後再衰入唔到波
尼古科同埋費爾都有明顯老態
有待浸淫既戴迪約克只係蜀中無大將既選擇
佢地最終有代表作都要出局就幾可惜
畢竟以佢地559分鐘唔失波
近兩屆世界盃7場只失1球既防守力
加埋軒斯菲特專打老虎既往績
鄧加或者昆洛斯應該慶幸佢地出局
而家16強已經落實
上線巴西同埋荷蘭多數8強相遇
勝方應該有力入到決賽
而烏拉圭,南韓,美國同埋加納
當中有一隊亦會入到4強
就多得法國同埋英格蘭兩隊名牌失準
4隊而言只有南韓仔牌面比較輸蝕
烏拉圭雖然中場實力一般
不過有前有後唔可以睇小
而美國以及加納都好韌
前者打逆境波既表現係今屆32隊最好
普遍被外界睇高半線
不過唔好唔記得後者近一年就已經靠死守
守出個世青盃冠軍同埋非國盃亞軍
下線方面
阿根廷,德國同埋英格蘭3隊名牌爭一個4強席位
前者未打過逆境波
再遇墨西哥隨時俾對手迫到抖唔到氣
不過依然有力入8強
而德國再遇死敵英格蘭
蝕底既唔止係傷兵較多
仲有經驗同埋教練級數
而日耳曼最忌以為12碼羸面大就重蹈上屆俾意大利ko既覆轍
靠效率搵食既5人中場可能係比較好既出路
另外,西班牙對葡萄牙應該有優勢
畢竟質素羸半班
但對手3個有入波能力既工兵所帶來既威脅應該遠比C7大
而好衰唔衰沙比艾朗素多數因傷缺陣仲俾佢地更多機會偷襲
係西班牙晉級既最大隱憂
而巴拉圭對日本既勝負關鍵可能係邊隊比較有耐性
而後者明顯靠本田圭佑食糊
前者易於防範就比較著數
p.s.:
近日除左忙睇波
仲有睇新聞
結果最終超失望
真正民主同埋終極普選似係反而遠左......
4 comments:
兩隊出左幾多正選
都係意外
而場波又真係幾悶
小弟係街睇睇下都係走去睇葉問前傳好過
瑞士認真唔抵
對住洪都拉斯都贏唔到
打贏西班牙都無用
如果巴西對荷蘭
小弟會睇高荷蘭少少
因為睇落巴西好似穩陣左好多
不過後防依然只係ok
前面又唔見得幾咁火力強大
p.s.
小弟雖然都有多少留意
只係本身對政治實在興趣不大
印象深刻既只係
長毛罵司徒華
俾人圍攻
老實講
就算大家意見有幾不合
最好都係俾番少少尊重
何況對方又係同道中人
仲要係多年朋友
有必要咁樣罵人咩?
To: 舒利亞
1)
巴西同埋葡萄牙出幾多正選都唔算太意外
畢竟數字上仲未安全
不過場波真係幾悶
大家既爭勝意欲都唔大
當中葡萄牙近甚
2)
瑞士唔識入波既老問題
軒斯菲特都似乎唔多搞得掂
或者要等一個有料既箭頭冒起
不過一旦搞掂埋前線
佢地同埋土耳其會係2012歐國盃既黑馬
3)
巴西同埋荷蘭既中路防守都係信唔過
不過自從雲佩斯早前搞事之後
荷蘭近來都再無鬼打鬼既傳聞
對佢地而言一定係利好消息
4)
長毛單嘢
反映佢人品有問題之餘
實情都冇咩政治智慧
p.s.:
講少少題外話
爭取民主
同意有時過激真係唔好
所以社民連真係唔多受歡迎
但話說回頭
香港本身政制先天缺憾
想爭取民主其實遇到太多困難
好多官員選擇性唔接收反對聲音
平時抽水言行又非常可恥
部份人既過激行為其實係人渣政府逼出來
講真有邊個唔想舒舒服服咁訴求
巴西對葡萄牙場波真係異常沉悶,
可說是今屆最悶既其中一場,
我睇左15分鐘都睡著了
雖然這場不能作準
但如果巴西再次踢波踢得咁計算既話,
我就真係唔想佢地攞冠軍了...
暫時來講
我覺得以阿根廷,荷蘭,德國,西班牙,巴西同烏拉圭最對辦,較有爭逐冠軍既能力..
p.s;
想不到大家對政改都好關心
我自己以往都係投泛民主派既票
不過可能年紀漸大,
比較傾向用溫和方式談判,
我自己都有教育界功能組別既選票
所以對我來講
功能組別雖是過渡既性質,
但又唔係完全冇用處,
起碼對我既份工來講,
功能組別代表都算能夠反映到我既一些訴求,
有時比起地區直選代表做得更好,
我覺得如果功能組別既界別能有高度既認受性,
其實係可以反映到廣大民意,
只可惜自動當選既人同公司票太多,
認受性變左好低,
如果功能組別唔係太多建制派既人,
應該唔會有咁差既形象..
我個人認為民主黨其實算是用心良苦,
佢既改良方案其實係可以接受的,
始終阿爺唔俾你廢左功能組別,
惟有用其他方法去溝淡佢地保皇既影響力,
其實如果泛民夠膽色,
應該培養多些人去爭功能組別議席,
好似民建聯一樣,
兩邊都有多些人
人地做得到,
我地冇理由做唔到...
即係毓民如果夠膽色,
佢有間牛肉麵店,
咁佢就去參選飲食界組別搶灘..
玩贏左個選舉制度先,咁就更有牙力同阿爺爭..
以上是小弟既愚見...
To: sammysir
1)
鄧加領軍既巴西
都肯定係踢實際足球
這亦係94年同埋02年捧盃既關鍵
唔同既係當時都總算有嘢睇
94年既夢幻組合同埋02年既3R
都為球迷帶來好多美好回憶
亦比而家好睇得多
卡卡同埋法比安奴其實更似歐洲球員
而羅賓奴又多數做佢既足球黑洞
鄧加要獎盃唔要掌聲既心能唔難理解
最驚中堅同埋防中爆鑊
搞垮佢既美夢
2)
政制有先天缺憾
官員又選擇性接收訴求
有時係佢地逼到其他人激進
不過小弟都同意唔好過激同埋人身攻擊
小弟亦明白部份人想慢慢來
但咁既共產黨政府唔覺佢有咩信用
一句釋法就咩都推翻晒
而佢地成日賴皮
令特區政府唔肯交代幾時先完全廢除功能組別
同意部份功能組別既議員憑良心做嘢
不過功能組別整體太多人
只為個人,政府同埋商家利益出聲
另一方面,小弟唔覺民主黨有幾用心良苦
佢地既所謂改良方案
依然冇解決爭取民主既最大障礙
而選舉門檻同埋經費都未傾好
就俾個方案通過
如果政府之後玩嘢
我咃都吹佢唔脹
倒頭來隨時搞到政府有更多人保皇
另外,小弟都同意泛民要同保皇黨搶選民
而公民黨已經係小弟既最大希望
Post a Comment