想講近兩日既6場波......
阿爾及利亞對斯洛文尼亞以及塞爾維亞對加納
同係悶戰之餘
亦係兩黃一紅踢少個就跟住輸波既劇情
分別只係頭場水準較低
而德國同埋澳洲都係硬橋硬馬
前者自然靠質素羸波
普度斯基早段既入波亦撲熄澳洲既虛火
卡希爾下半場既紅牌就係雪上加霜
對路維而言
羸波另一得著係4個箭頭都開左齋
另一方面,佢地捧盃行情忽然高漲
可能只係因為更早出場既幾隊名牌都貨不對板
事實上佢地既評級唔值得一下子過份調高
荷蘭方面
打真軍自然冇踢熱身賽咁如取如攜
如果唔係艾加累死西蒙保臣
丹麥應該有排都未散
喀麥隆就係近兩日最令小弟激心既球隊
表現似隻訓左覺既獅子
睇多兩場波既都會知日本驚對手兩邊斬中
拿古恩竟然堅持控球在腳既戰術
學晒摩連奴套嘢既崗田武史當然唔會介意
而更抵死仲係矮一截既0架仔居然靠高波攞晒3分
拿古恩當年於里昂成名後轉投格流
硬要球隊跟佢控球在腳既踢法
結果唔夠一季就收左皮
喀麥隆似乎會成為佢另一個失敗既實驗品
似乎佢唔明白
其實踢波同做好多嘢一樣可以好簡單
捨易取難就更加唔會有運行
意大利方面
咬唔入巴拉圭冇咩所謂
大不了之後兩場同佢地鬥入波
反而簡拿華路又爆鑊兼似陸續有來先係大檸樂
p.s.:
1)
辦公室波神彼德認為北韓可以靠女色同埋政治壓力
令森巴兵今晚出事
係真唔係呀?
2)
溫馨提示:
灣仔 Dymock 清貨
小弟用左$85.7就買到魯殊同埋加斯居尼既自傳
而有本聲稱大爆奇雲基瑾97年劈炮內幕既書都只係賣$50
6 comments:
真係好悶好悶
阿爾及利亞同斯洛文尼亞就話預左
塞爾維亞同加納
竟然又係無野睇
諗住荷蘭對丹麥會唔錯
上半場又真係有攻有守幾精彩
點知下半場又係悶到七彩
如果藍鑵曲奇上半場唔係把握力差左少少
荷蘭真係收得皮
日本對喀麥隆更加悶到想嘔
小弟睇睇下一腳射門都無
又無進攻
竟然覺得林峯仲吸引
p.s.
北韓唔似會被巴西大炒
一兩球啦...
今屆世界盃賽事大部分戰情都很沉悶,
唔知係咪與評述有關,
以為睇緊意甲及英冠聯賽
(好似世界盃仲更加悶)
感覺上暫時只得阿根廷,德國,南韓幾隊踢得較好睇,
這幾晚睇完12點場波,
感覺都可以安睡..
巴西對北韓都應該係最好睇了.....
北韓真係唔錯
出埋線都唔奇
To: 舒利亞 & sammysir
1)
荷蘭早段攻唔入丹麥
某程度因為雲達華治阻住史尼達發揮
2)
有冇數過喀麥隆對日本既上半場
雙方幾時先有第一腳攻門?
答案係38分鐘喀麥隆先有零的突破
而1分鐘後就到日本還以顏色
仲連波都入埋
成個上半場加埋就係得嗰兩次埋門
3)
波係向來講得悶
不過今屆好多場波都幾悶
悶到令小弟唸起90嗰屆
4)
而家踢左17場
巴西對北韓肯定係最好睇既一場
5)
北韓入16強
小弟又唔係咁樂觀
就算C7真係一如所料冇料到
杜奧巴都唔可以當係二打六
而段估北韓仔都冇秘密武器
過灣仔都唔搵我同千嬅食飯!
To: 死佬
朝早大約10點經過
點搵呀?
Post a Comment