幾場英國波想講......
1) 米堡對西布朗
唔計開賽初段既虛火
前者既表現屎到唔似英冠球隊
除左第一球冇運之外
其餘全部都係輸自己
解釋佢地點解同上季輸俾車仔咁一樣吞足5隻蛋
希望修夫基肯俾機會賀迪
以及可以成功從葉士域治挖走麥歐尼
而冇左奧尼爾既中前場又係令人扯火
艾卡大住個肚都要走上走落
柔弱既阿當莊臣又要有波到腳先有得發圍
前線幾隻快馬又只係識拉邊兼唔識入波
唯有寄望新兵卡雷布科蘭可以幫到吓手
2) 阿仙奴對韋根
後者今季既踢法其實幾好睇
不過遇上更高級數既兵工廠就即刻收皮
而佢地既防線隨住布魯士離隊後嚴重走樣
隨時有護級壓力
3) 利物浦對韋斯咸
利記羸波依然令小弟好唔開心
因為防線繼續輸死球(其實係高波先岩!)
而加歷查既表現持續下滑
已經係球隊防線既頭號隱憂
另一方面,沙雲軒斯絕對係今場波既最佳球員
靈活又有膽色既佢先後玩殘馬斯查蘭奴同埋一對中堅
佢由箭頭轉踢翼鋒都掂
隨時成為另一個禾確特或者艾朗連儂
4) 曼聯對曼城
客隊一眾防守球員排住隊出錯
而主隊亦超級好客
賓科士打同埋里奧費甸南輸得仲肉酸
傑斯,費查,艾夫蘭,泰維斯同埋比拿美相比之下就 sharp 得多
當中以前者最堅
第一球趁米卡李察士掛住鬧人快手掟界外球就係羸經驗
而之後曼城兩次走空佢同埋一次死球就俾機會佢3度助攻
不過曼城連個老嘢都睇唔實又係自己抵死
場波另一關鍵係球證艾堅遜
小弟印象曼聯95分20秒入波(有錯請指正!)
艾堅遜聲稱補上補係因為曼城於89分幾鐘入波後既慶祝用左時間
曉士聲稱當時球隊用左45秒慶祝
計埋卡域克入替要補多30秒
艾堅遜到入波時間都唔吹雞可能只係巧合
曉士要怨就怨米卡李察士同埋胡禮菲臘斯走漏左奧雲
而家賽後焦點唔止艾堅遜
仲有半場時候無辜成為當災白狗既加拉度
同埋涉嫌打人既比拿美
一場充斥防守失誤同埋以暴力事件告終既打呲
即使峰迴路轉既4:3賽果都唔令小弟覺得係經典
5) 車路士對熱刺
冇左摩迪歷既熱刺
輸波原因同上場輸俾曼聯相若
不過小弟都同意佢地唔值捧蛋
印象中今場係車路士踢得最好既一場聯賽
當中關鍵係出色既側擊
兩閘攻得徹底之餘
杜奧巴亦好勤力於兩邊推進
p.s.:
曼聯同埋曼城只係比車仔失多3分
利記,熱刺同埋兵工廠亦只係失多6分
今季聯賽既關鍵應該係現時前7加上愛華頓之間既對壘
車仔同埋曼聯已經羸左熱刺
後者仲ko埋兵工廠同埋曼城
兩者其實已有一定優勢
相反利記同埋兵工廠已先後兩次輸俾前列對手
爭標路途既劣勢絕對唔只係眼前既6分
2 comments:
小弟只係睇左曼聯對曼城場波
話特別精彩又唔係
只係雙方球員犯錯特別多
而值得一提既係
曼城一對貴價中堅(其實應該計埋左右閘)
俾小弟既感覺其實同紐記咁多年既防線無咩分別
所以點解小弟會奇怪基雲要去曼城
p.s.
車仔暫時睇落好似無敵
不過據聞杜奧巴好似受傷
To: 舒利亞
1)
曼城幾場波都有後防不穩既問題
全靠基雲補左唔少鑊
小弟認為原因同後防冇默契有關
佢地中堅加埋防中4個球員
居然有3個係新加盟
加上中場回防不力
亦令後防壓力更大
不過亦要講既係佢地防線今場既表現
係5場當中最差既一場
2)
Big 4,甚至愛華頓同埋維拉都唔憂搵龍門
基雲既選擇其實唔多
而曼城既前景點又比紐記好得多
加上應該會係佢最後一次機會掘金
佢肯加盟都唔難理解
3)
小弟覺得而家既車路士四平八穩
不過佢地仲未打過硬仗
冇必要將佢地既評級定得太高
4)
肥安聲稱豬油包既傷勢應該冇大礙
Post a Comment