幾場波想講......
1) 巴拉圭對阿根廷
究竟有冇人俾意見老馬選兵同埋排陣
抑或根本冇人夠膽出聲
又或者佢既幫手全部都回晒塘或者白支人工
今場老馬既排陣又係令人摸不著頭腦
今次又有零經驗球員正選登場
仲要係龍門既羅美路
後防大執位
軒斯都唔知有幾耐冇踢過中堅
而杜明基斯冇左奧達文迪做拍檔
連於沙士菲培養既默契都冇埋
巴拉圭一對箭頭不斷走位已經玩死佢地
而中場老馬識用加高加強搶截
不過人地簡單於兩翼進攻
已可以避免於中場同阿根廷慢慢玩
而辛尼迪同埋柏柏明顯未能應付對方頻密既側擊
特別係36歲既前者
而老馬既其餘中場人選包括華朗以及達托羅
不過前者因為冇波到腳而未能發揮威力
而兩邊攻勢亦因而失去平衡
更加重一對閘位球員既壓力
前線由阿古路代替泰維斯
前者冇後者咁肯跑動
令巴拉圭可以重點對付美斯
結果阿根廷既表現比幾日前對巴西更差
半場(全場亦然)只輸1球完係係輸少當羸
老馬半場原本仲有機會撥亂反正
不過佢用拿維斯入替達托羅
而唔肯收起有黃牌在身,兼未能發揮作用既華朗
不單幫唔到球隊
更埋下華朗兩黃一紅既伏線
當連華朗都俾人趕埋出場
老馬先換入巴勒莫改踢簡單足球
尾後更派36歲新丁中堅 R.Schiavi 串演中堅
不過冇左華朗(同埋列基美)既阿根廷又冇人特別擅長死球
於是者阿根廷全場連一次具威脅既攻門都冇
老馬賽後批評傳媒令球員嚴重受壓而失準
不過其實最受壓既應該係佢本人
上場輸俾巴西後於更衣室當住球員痛哭
既係性情中人既表現
亦係EQ低既例子
而家易帥對球隊唔係好事
亦唔慌有人肯執爛攤子
小弟只係希望老馬會履行承諾
同佢班軍師檢討得失
但聽完老馬賽後又話唔介意踢附加賽
個心隨即冷左一截
瞄準太陽都仲可能射得中隻雀
只係瞄住隻雀就隨時射中地下既石頭
難怪87%既受訪者希望佢下台
2) 英格蘭對克羅地亞
計表現絕對係近年代表作
不過對手讓齊車馬炮
加上對手早段已經被判死刑而冇咩鬥心
球隊同埋傳媒都唔應該將勝利既意義無限放大
而球隊仍有隱憂
龍門冇好人選
卡比路又唔肯破格徵召艾蒙尼亞
右路既格連莊臣助攻力係好強
不過亦帶來俾人偷襲既漏洞
而艾朗連儂同埋禾確特係唔係真係出到大場面仍成疑問
碧咸既狀態亦令人唔放心
再加上各自起孖都唔足以令人相信
謝拉特同埋林伯特從此合作無間
而小弟亦對朗尼既穩定性存有疑問
好記得'我們的足球場'鹿野領隊既名言:
當覺得與'勝出無異'之時,亦等同已經失敗!
3) 沙地阿拉伯對巴林
巴林成功上位或多或少因為西亞球隊表現仆直
但當地政府同埋有心人既支持亦好重要
由80年代初期初次搵英國教練教佢地既業餘球員
到近年既職業化兼且相繼搵東歐以及德國既教練
令佢地水準提升之餘亦學到相當機動既踢法
佢地靈活運用 3-4-3 同埋 5-4-1 陣式
加上有幾件非洲歸化兵
進攻又有好波之人沙爾文同埋A.胡比爾
防守紀律性令佢地對住亞洲一線球隊都有本事保住唔輸
繼90年代既日本
巴林用左大約10年時間
就由連約旦同埋敍利亞都打唔羸既弱隊
發展到叫糊打入世界盃決賽週既亞洲一線球隊
證明肯做就有機
p.s.:
11/9事件不經不覺過左8年......
4 comments:
巴林都仲未打入世界盃喎
唔好捧到佢地咁高住
或者輸俾紐西蘭都未定呢
To: wtssoccer
你岩!
巴林只係叫緊糊
不過如果有睇佢地近期既表現
你就會發覺佢地踢得幾好
對紐西蘭無疑體力同埋高度方面好蝕底
不過技術同埋踢法真係可以補返數
只係希望佢地唔好繼幾年前輸俾千里達後
再次於附加賽出局
小弟真係驚阿根廷連附加賽都無份
對住包尾既秘魯
小弟都唔覺得佢地贏到
堂堂南美洲(最少都二哥啦)
竟然廢到咁?
的確英格蘭未係其他人講到咁無敵
但係比起近年既英格蘭
最少呢隊會係比到最大希望俾小弟
小弟甚少留意亞洲國家
對巴林更加係無咩認識
不過既然巴林可以做到(當然仲有一關)
點解偉大既祖國
可以一沉不起
To: 舒利亞
1)
阿根廷搞到咁
其實其他足總高層都要負責
之前好多人都旨意貝拉度幫手睇住老馬
點知佢兩個原來已經意見不合反左面
報導話貝拉度對外仍然會力撐老馬
對內就冇得出聲
連貝拉度都食佢唔住
更何況其他二打六
而家同佢不和既足總會長格朗當拿
終於忍唔住要出手削去老馬選兵既權力
至少等列基美同埋希古恩可以重返國家隊
2)
現時這隊英格蘭係繼90年同埋96年兩代後
最俾到小弟信心既一隊
不過小弟都係比較鍾意0個兩隊
3)
唔止中國,仲有香港!
不過足總高層唔爭氣
政府班高官又唔上心......
Post a Comment