2009-4-17

答應左紐迷Ricky再講英超護級形勢
小弟就由數字上仲有危機既球隊講起
來一個加長版既分析……

曼城同埋保頓分別有38分同埋37分
主場攞分又有把握
上岸指日可待
唯一分別只係兩位領隊既下場

史篤城而家36分
當中有29分靠主場
同曼城堪稱護級組主場王
佢地之後對布力般流浪,韋斯咸同埋韋根都係主場出戰
只要聽日鬥前者既6分波大戰唔好輸
最終成績隨時趕過曼城同埋保頓
你話曉士羞唔羞家?

而自從阿當斯俾人炒左之後
樸茅近7場聯賽只係試過主場輸俾車仔
表現明顯有改善
加上雖然比其他護級對手踢少1場
但都已經有34分在手
計失分其實亦同保頓相同
護級形勢幾樂觀

如果唔係上場占士表現失準
簡接令球隊主場對西布朗都只係和波
佢地唔會俾史篤城過頭

同樸茅同分既仲有侯城同埋布力般流浪
不過前者既形勢就惡劣得多
特別係前者自從由老虎變返病貓之後
對上15場波只係試過羸1場和4場
近4個月只得7分落袋
季初老本已經食得七七八八

佢地餘下賽程仲要對利記,維拉,保頓同埋曼聯
後3者都有可能放水
(假設曼聯提早封王?!……touch wood!)
不過以病貓既近況
佢地都未必有本事搶到好多分數

所以佢地之後惡鬥新特蘭同埋史篤城
有冇本事最少攞到4分就係護級關鍵
否則佢地將會成為96-97年球季既水晶宮後
另一支因季中開始表現嚴重下滑而最終解班既升班馬

布力般流浪方面自從搵左Big Sam接手
踢15場羸5場和6場執到21分
平均每場有1.4分落袋
如果季初已經由大傻揸旗
計比例佢地絕對夠分打入前10

佢地餘下6場波有一半都係6分波大戰
以大傻哥傲視護級組既功力
加上仲有主場對韋根既cushion波
暴力幫既護級形勢絕對唔差

新特蘭方面
施巴基亞12初接手既時候
曾經有過一段蜜月期
出訪奧脫福幾乎迫和曼聯已經嚮晒朵
之後3場波攞既7分仲簡直係提早派俾球迷既聖誕禮物

不過一過左Boxing Day之後
黑貓即刻打回原型
13場波羸兩場和4場只得10分
仲衰過堅尼時代(15場4勝3和得15分)

球隊最近4連敗輸到心都慌埋
對曼聯輸1:2已經算係代表作
問你死未?
而狀態亦明顯比堅尼時代差
永遠只得頂多70分鐘既體力
有心無力既表現更加好少發現於護級份子身上

有傳聞昆尼想搵古比士利救亡
佢亦被指就算球隊護級成功
下季都想由艾歷臣接手
雖然長人老闆已經作出否認
但兩宗傳聞都反映左施巴基亞命不久矣
亦會進一步打擊球隊士氣

佢地餘下既賽程話易唔易,話難唔難
當中既關鍵係接連兩場6分波大戰
施巴基亞有冇本事為球隊止血兼最少攞4分旁身
否則黑貓下季好可能重返英冠

紐卡素方面出埋最後一招搵舒利亞救亡
不過球隊反彈既速度同佢地既行軍節奏一樣唔夠快
攻守表現都唔見得有大躍進
球隊現時明顯有改善既只得士氣

考慮到佢地仲要作客熱刺,利記同埋維拉
護級關鍵應該係3場主場比賽有幾多分落袋
當中有兩場仲係對樸茅同埋米堡既6分波大戰
5萬2千人撐場既聲勢絕對有利搶分
而佢地亦確實有能力ko樸茅,米堡同埋富咸等中下游球隊
如果主場袋晒9分隨時可以咩都唔使再唸

護級好多時唔係鬥技術同埋戰術
而係決心同埋信心
紐記而家最需要1場羸波去建立信心
27/4主場鬥樸茅會係一個好時機
而聽晚出訪白鹿徑袋1分都可以接受

米堡方面
每月最佳領隊獎項好多時都好邪
而今次發生在修夫基身上既魔咒仲應該係歷來歷時最耐既一次
8月3場波攞6分
點知之後29場只得5勝9和既劣績
球隊繼續冇殺手
但後防就越來越冇防守

不過一隊咁既球隊靠上場打瓜隻病貓
護級希望已經可以再現曙光
全因今季中下游太多球隊唔爭氣
特別係遠親不如近鄰既新特蘭同埋紐記
佢地同米堡只係五十步笑百步既好例子

米堡上場羸波唔知係隻病貓實在太病
定係佢地等到水浸眼睸先識得回勇
如果原因係前者
咁佢地返硬英冠
吉遜亦可以由領隊到球員來一次徹底重組

如果原因係後者
佢地仍然有足夠場數後來居上
最好就順手令曼聯失分
小弟同千千萬萬既利迷都會撐佢地護級成功

2009-4-16

尋日唔得閒講英格蘭球員先生候選名單
由於截止投票日期係3月16號
當時曼聯既表現仲未開始突然走樣
而Big4隊手之前又先後陷入低潮
曼聯球員獨佔名單5席唔算太令人意外
不過就反映左截止投票既日期set得太早

維迪,雲達沙同埋里奧費甸南係不失球紀錄既主要功臣
佢地自然大熱入選
當中以前者得獎既呼聲最高

而傑斯既入選有少少敬老味道
不過佢表演機會唔太多
有得入3甲都已經可以當羸

而C7有份入選或多或少係靠名氣
不過佢季初養傷
加上到截票既時候都仲未完全回勇
所以3連霸既機會幾低

而謝拉特係唯一一個非曼聯球員既候選人
利記今季明顯於聯賽既表現有大躍進
當中神奇隊長長期有高水準
入選亦好合理
而曼聯有5名球員入選
票源可能被分薄
佢亦可能因而受惠
小弟認為得主將不出佢或者維迪

年青球員方面
由於維拉異軍突起
艾殊利楊格同埋艾邦拉賀既入選絕對正路
當中前者既表現仲好過好多前輩
絕對係獎項既頂頭大熱

而艾朗連儂,伊雲斯同埋拉菲爾
就有份入選已經可以當羸
而後兩者絕對唔係池中物
下季應該輪到佢地攞獎

而艾利蘭今季既整體表現比羅賓奴更搶眼
絕對係曼城既最佳球員
小弟覺得穩定表現令佢有少少機會威脅艾殊利楊格

p.s.:
曼聯尋晚創造歷史
成為首間英格蘭球會作客打瓜波圖
小弟focus既唔係C7既世界波
而係曼聯夫添後既防守表現
防守絕對係佢地爭餘下3冠既kep point

而阿仙奴尋晚輕取維拉利爾
對曼聯既關鍵絕對係防守
球隊傷兵實在太多
雲加似乎要再加強中場攔截

2009-4-15 (2)

1)
盧頓下季要降落地區聯賽
查爾頓亦極可能降到英乙

2)
紐卡素被指有興趣向曼聯出價600萬鎊收購賓科士打

3)
莫高拿同布力般仍未達成續約協議
錫菲聯同埋史篤城都被指有興趣引入這名自由身球員

4)
由於辛尼受傷要長抖
聖保羅被指想向彭拿路羅致S.蘇沙應急

5)
卡森李察士被指成為樸茅同埋侯城既羅致對象
不過這名土耳其箭頭已經作出否認
另一方面,侯城亦被傳想向曼聯以75萬鎊既價錢買斷文路祖
或者向紐卡素收購艾美奧比

6)
新特蘭被指想搵古比士利救亡
不過佢而家忙緊同韋斯咸打官司追討當年既遣散費

7)
祖爾否認下季接手曼城既傳聞

8)
博洛尼亞搵柏柏度佩路取代米赫洛域執教

9)
巴塞隆拿被指有興趣羅致艾加
而阿根廷左中場列圖亦成為祖雲達斯既收購對象
另一方面,利物浦就竟然同薩拉迪扯上關係
這名阿根廷射手現時以借用身份效力拉素

10)
舒亞拿被指成為維拉400萬鎊既增兵人選

11)
早前有傳聞指科里斯帥位不保
而家最新版本係賓菲加會俾佢帶到約滿為止(即係下季尾)

12)
韋達同埋漢基蘭都被指係阿仙奴既新中堅人選

13)
彼德堡英格蘭龍門李維士被指成為愛華頓300萬鎊既羅致目標
這名21歲球員身高6呎6吋
可能係近年英格蘭木土最高大既龍門

14)
傳聞曼聯有興趣羅致艾利蘭
曼城隨即加緊同佢續約

15)
尹高爾暗示有興趣下季接手拜仁

16)
熱刺被指有興趣從曼城引入馬田柏度夫

17)
馬田拿臣因為膝傷而宣佈提早收咧

18)
拉素被指想向烏甸尼斯羅致中場G.迪亞哥斯天尼

19)
加利亞雷拉表態冇意思離開烏甸尼斯

20)
保頓被指想向西布朗出價300萬鎊收購中場占士摩利臣

21)
費倫天拿成為最新一間同查維馬天尼斯扯上關係既球會

p.s.:
曼聯今晚可以夫添出擊
即管睇下佢地可唔可以成為首間作客羸波圖既英格蘭球會

2009-4-15 (1)

尋晚睇利記到訪史丹福橋球場
心情就好似玩緊跳樓機

利記出人意表派盧卡斯利華代替謝拉特落場搏殺
這名巴西年青中場跟住馬斯查蘭奴同埋沙比艾朗素
同艾辛,波歷克同埋林伯特搶中場之餘
亦盡量唔俾佢地後上攻門

進攻既重任主要交俾前線既拖利斯,古治同埋班拿約
而比尼亞拿更靈活既後者就得到正選機會
原因應該係針對艾雲奴域既轉身速度

利記上半場入既兩球都係靠對手犯錯
本身表現未算好突出
不過踢法簡單直接
亦有6成既控球時間
整體上已經遠比首回合好
有兩球優勢既車仔鬥心明顯唔夠利記
上半場佢地面對轉左form既利記
亦有啲不知所措
睇完上半場小弟直係覺得原來冇嘢係impossible

不過希望越大
失望自然越大
今場波既頭號罪人首推拉爾拿
佢條友一啖砂糖一啖屎
輸第一球衰封唔晒位同埋反應慢
輸第二球就衰企錯位
而隊友排人牆排得唔好當然都係原因

結果一下子冇晒優勢
仲撻返慶車仔既摩打
小弟認為佢既失誤絕對係今場波既turning point

利記被迫大舉出擊
後防亦暴露左好多空位俾車仔打反擊
利記之後輸既兩球都係輸反擊
而賓尼迪斯孤注一擲用尼亞拿入替馬斯查蘭奴
亦變相放生左林伯特

06-07年歐聯決賽
落後1球既利記用哥治入替馬斯查蘭奴
結果放生左卡卡助攻俾恩沙基入第二球

而上場馬斯查蘭奴坐波監
利記條中場即刻搶唔羸車仔
幾個例子都反映左這名阿根廷隊長對利記有幾重要
佢絕對係小弟心目中當今世上既no.1防中

輸緊2:3既時候
賓帥已經半放棄咁收起托利斯
但場上既球員依然超搏命
仲一度反超前4:3而重燃晉級希望
功敗垂成都係非戰之罪
咁既鬥志絕對對得住球迷
同埋20年前希斯堡慘劇既96個亡魂

2009-4-14

近兩日既新聞……

1)
費倫巴治被指希望接收阿祖安奴

2)
國米被指想收購大衛韋拿
條件包括2000萬歐元
同埋蘇亞素或者占美利斯既其中一人

3)
雲加將有4000萬鎊資金為阿仙奴增兵
另一方面,森遜希望於借用期滿後
可以由西布朗重返兵工廠

4)
艾加透露同利物浦仲未傾掂續約
另一方面,利記再次被指打算從畢爾包引入查維馬天尼斯

5)
恩尼斯達被指成為曼城3500萬鎊既增兵對象

6)
費爾同埋比拿利奧都被指成為拜仁新龍門人選
傳聞後者既轉會費高達1000萬歐元

7)
除左費爾外
費倫天拿季尾可能仲會有好多球員離隊
有消息指只要收到2000萬歐元既出價
紫百合就會放走梅度
而後備龍門史圖拿利,左閘沙利,兩名中場艾馬朗當拿迪,
左翼哥比,右翼施美奧尼同埋前鋒邦拿索利都被打算轉會

8)
費高極可能於季尾掛靴
佢可能轉任國米既行政工作
亦可能出任摩連奴既助教

9)
國米被指同熱那亞有一連串球員交易
前者睇中迪亞高米列圖,柏拿甸奴,基斯薜圖同埋莫達
後者就想斟酌貝迪素,奧賓拿同埋F.Bolzoni

10)
蘇拿即將同韋斯咸續約

11)
由於戰績越來越唔掂
米赫洛域被傳可能要提前離開博洛尼亞

12)
恩斯同埋韋斯都被指成為昆士伯流浪既新領隊人選

13)
曼聯準備同馬捷達續約5年
年薪由原來既6萬歐元加到50萬歐元

14)
莫耶斯表示愛華頓冇錢買斷祖奧

15)
保耶被指將正式加盟伯明翰

16)
雖然帶領球隊殺入歐聯分組賽
但由於國內成績未如理想
基斯巴亞最終向安羅科薩斯請辭

17)
烏化奴斯被指成為祖雲達斯既新中堅人選
不過這名捷克中堅已經作出否認

18)
高士路向哥連泰斯買入薜卡路士既20%擁有權
這名25歲射手將會效力前者直到年尾

19)
一旦辛達告魯斯離隊
古蘭爾同埋哥治都被指會成為布力般流浪既新前鋒人選
當中後者既身價高達1000萬鎊
而前者就同時成為祖雲達斯既羅致目標

20)
聖保羅龍門辛尼因為於操練受傷
腳踭骨裂令佢將要長抖

21)
烏甸尼斯被指睇中鍚耶納既23歲哥倫比亞右閘蘇歷加

22)
布拉加射手雲泰利亞被指成為熱刺既600萬鎊增兵對象

2009-4-13

未絕望,但唔想再失望......
講既係利記同埋紐記既前途

先講防守
幾日前利記踢歐聯送左兩球死球俾車仔
賽後英國傳媒搵埋爛鬼數據話利記既聯防有問題
星期六紐記對史篤城又輸死球
小弟都想趁機會講下防守死球既戰術

人盯人戰術唔使講都明
聯防就要求每個球員睇實自己特定既防守區域
重點係先睇波再睇人
要留意入涉自己防區既球員
而由於對方球員識得移形換影
同隊友補鑊亦係重要一環

不過小弟想講
任何戰術都有利有弊
冇一套會天下無敵
正如歐聯賽後拉爾拿同埋Big Sam所講
車仔有咁多高佬
當晚就有5件
而利記就只有一對中堅比較擅頂
利記輸死球有咩咁奇

重點反而係賓帥所講唔好俾空位對手
歐聯晚上謝拉特同埋沙比艾朗素發緊夢
又正如星期六晚艾美奧比跟到6碼先突然唔走甩菲爾
用咩戰術都實輸波啦

講完防守就想講下進攻
利記冇左謝拉特都可以極速反彈
側擊做得好係主因
而對手排怪陣(Big Sam居然用森巴踢箭頭?!)
兼可以於早段入波亦係原因之一
而對手既兩次死球輸波亦係防守死球既反面教材

紐記方面
近兩場波既鬥志明顯好左
不過踢法依舊高Q大棍
連側擊都少左
放長波明顯唔係畢特既專長
而路蘭亦冇機會發揮佢後上攻門既絕招

如果舒利亞一心想用長傳
靠個高大箭頭二傳俾奧雲
小弟寧願佢用安迪卡路爾踢正選
要簡單足球
踢兩翼側擊亦未嘗不可
紐記亦有足夠條件咁做

而輸俾車仔之後
舒利亞曾經講過球隊要提升速度
不過今場所見就分別唔大

另一方面
舒利亞今場突然改用3-5-2
小弟就唔多贊同
因為球員好難即刻適應
而杜夫雖然勤力
但絕對唔係翼衛既人才

小弟有個紐記既心水陣容:
夏柏
比耶 史堤芬泰萊 巴斯桑治 荷西安歷基
賴恩泰萊 畢特(謝列美) 路蘭 古迪利斯
奧雲 馬田斯(安迪卡路爾)

因應傷兵情況
杜夫,格夫里同埋大衛艾加亦係可考慮既變動人選

p.s.:
利記而家有謝拉特可以紮住搏車仔場波
雖然軒迪克真係堅過石堅
不過保頓都可以幾分鐘入佢地3球
就證明利記未必死硬

而聯賽方面曼聯確實好有運
不過平常心等奇蹟亦未嘗不可

紐記方面就仲有6場波
唔計作客晏菲路既九死一生
佢地仲變得切去搶分護級

2009-4-12

近幾日既新聞......

1)
消息指由於拜仁高層同埋球員已經對奇連士文冇晒信心
所以就算拜仁羸到今季聯賽
會方都唔會留用佢
而沙哲朗尼就被傳係新教練人選

2)
受鼠蹊傷患困擾既謝拉特
已經康復左8成
下場對車仔將可以復出

3)
安察洛堤再次被指將於下季上車
不過佢經已作出否認

而車仔被指準備收購韋拿同埋柏夫奴真高
當中前者既傳聞轉會費高達4000萬鎊
軒迪克亦已經作出否認

4)
伊拉克搵左米路天奴域接手
而前傑志教練保蘭奴就跟埋去做助教

5)
傳聞一旦佩雷斯再次當選會長
將會棄用荷蘭幫球員
只有新加盟既亭特拉爾可以幸免
而熱刺,紐卡素同埋曼城都被指有興趣接收雲佬

6)
保方被指成為曼聯同埋曼城既新龍門人選

而曼聯就再次被傳準備出價1200萬鎊收購阿歷士山齊士
這名烏甸尼斯既智利攻擊球員近兩年不斷同曼聯扯上關係
佢被視為C7既替代品

而曼城就被指打算斟酌摩連奴同埋伊雲洛域

7)
AC米蘭被指打算收購艾迪巴約,迪施高,田中鬥莉王同埋沙高
而兵工廠亦有興趣收購現時效力巴黎聖日耳門既後者

8)
巴布同史特加續約至2010年
這名前拜仁同埋利物浦德國國腳已經報左教練課程

9)
拜仁被指有興趣引入積及臣同埋簡拿華路兩名自由身球員
前者於愛華頓苦無出場機會
離隊幾成定局
而皇馬就仲未同後者傾新約
不過球迷方面就支持佢得到新約

10)
加拿斯提早收咧
而基治同埋艾蒙尼亞就分別要抖兩星期同埋三星期

11)
阿祖安奴否認自己有精神病
不過就要唸清楚去向
而佢亦自爆幾乎於1月上車
另一方面,國米被指可能准佢自由轉會法林明高

12)
禾高被布力般流浪放棄

13)
捷克足總決定將6名涉嫌嫖妓既球員無限期逐出國家隊
當中包括巴路士同埋烏化奴斯
而領軍戰績不濟既拉達就被開除

14)
富咸被指有興趣接收巴利費格遜

15)
里爾比利時中場E.Hazard,加利亞雷拉
同埋烏甸尼斯防中艾沙姆都被指成為國米既增兵對象
前者近日一直被傳將於暑假轉投車路士

16)
祖雲達斯同安達迪達成降約協議
而佢地就被指睇中阿爾克瑪爾既21歲比利時射手丹比里
同埋阿積士既21歲荷蘭右閘雲達韋爾

17)
馬體會被指將於季尾出價900萬鎊收購阿歷士

18)
施斯被指成為彭拿典奈高斯既新前鋒人選

19)
洛杉磯銀河否認俾機會韋利試腳

20)
雖然被指成為燕豪芬既羅致對象
不過雲尼古就表態希望同些路迪續約

21)
里爾25歲法國中場R.馬禾巴被指成為韋根既增兵對象

22)
昆士伯流浪決定開除保羅蘇沙

23)
西維爾被指有興趣收購哥古夫

24)
拉素同埋森多利亞都被指有興趣將薩卡度由禾夫斯堡帶返意甲

25)
布雷西亞20歲後衛A.Rispoli,阿特蘭大23歲中場T.Guarente
同埋巴里24歲翼鋒S.Guberti都被傳係費倫天拿暑假既收購人選

p.s.:
賽後感之後再講

2009-4-9

想講下尋晚利記點解仆直……

一係輸中場
一條勁既中場線至少有一個playmaker
而要playmaker有機會發揮
關鍵係中場其他配角能唔能夠幫佢製造空間
施丹,派路等人可以淡定兼瀟洒咁踢波
其實好應該請馬基里尼,韋拉,加度素等工兵晚飯宵夜

利記雖然開局唔錯
不過隨住艾辛同埋波歷克慢慢入局
加上利記冇左停賽既馬斯查蘭奴
盧卡斯利華同埋沙比艾朗素既組合明顯輸晒體力同埋效率
利記同埋車仔之間既均等形勢就開始傾斜
playmaker謝拉特根本冇咩發揮機會
小弟夠膽講就算謝拉特尋晚冇傷
利記都難以有好下場

二係防守失誤
原本就算輸晒形勢
只要守得穩都至少可以保住不敗
不過尋晚既防守連英冠水準都冇
就肯定大檸樂

兩次輸死球俾伊雲洛域根本係集中力不足既低級失誤
兩隻閘亦成日俾馬路達同埋卡奴搵到機會偷襲
而面對top fit既杜奧巴
史卡泰爾明顯力遜一籌
如果唔係拉爾拿同埋加歷查先後補到鑊
利記輸足5球都唔奇

三係輸體力
車仔羸波既主要功臣
一定包括杜奧巴,艾辛,伊雲洛域,馬路達同埋卡奴
佢地都有體力充足既共通點
前兩者抖仲多過踢
後三者就長坐冷板凳
所以到4月既樽頸位依然大把貨賣

四係輸領隊把口
唔知係英文叻左
定係今季利記既表現大躍進
賓尼迪斯最近多左好多嘢講
仲夠膽死撩費sir隔空開火

不過佢可能唔記得左
利記捧歐聯嗰年佢初來步到
沉默是金到摩連奴撩極佢都唔回應

賽前軒迪克講明唔玩心理戰
只求做好本份
而賓帥串車仔聯賽兩場都輸晒俾利記
咪只會刺激對手士氣
真係死蠢!

2009-4-8

1)
馬斯查蘭奴被指成為皇馬既增兵對象

2)
國米被指打算引入波歷克同埋彭迪夫

3)
曼城被指今個夏天要收購亨利,伊度奧,耶耶托尼同埋細哨
另一方面,早前捲入強姦案既羅賓奴獲英國警方證實無辜

4)
韋利答應去洛杉磯銀河試腳

5)
上年蝕左1600萬鎊既樸茅被指想借用杜斯山度士一季
而無出場機會既基卡斯被指將轉投辛尼特
另一方面,阿仙奴再次被指想向佢地收購卡蘭積卡

6)
祖雲達斯積極搵新中堅
人選包括艾加同埋國民隊18歲烏拉圭中堅S.Coates

7)
古迪同埋沙加度被指可能轉投中東球會

8)
羅馬同埋熱那亞都被指睇中川迪前鋒M.Arnautovic
這名即將20歲既奧地利射手早前拒絕飛燕諾既斟酌

9)
愛華頓,熱刺同埋布力般流浪
再次被指想羅致赫德斯菲爾德19歲龍門A.史密斯

10)
艾禾卡特表示冇興趣引入巴利費格遜

11)
比利時足總同教練R.Vandereycken 解約

12)
哥登堡中堅M.Bjarsmyr被指成為費倫天拿既新中堅人選
不過這名23歲瑞典球員既經理人已經代佢否認有關傳聞

13)
米堡既埃及中後場球員沙基透露
紐卡素斟酌佢同埋國家隊隊友21歲右翼A.莫罕默德

14)
拖連奴想向保頓買斷瑞士中場迪施馬利

15)
貝迪斯同教練查柏路頂上
B隊教練荷西諾吉斯會接任佢既位置

16)
堅尼亞既情況雖然有好轉
但輕左28磅既佢唔會於球季完結前歸隊

17)
雙氧偉(譚兆偉)被指懷疑因債務問題同老婆嘈交後
食左40粒安眠藥
佢阿媽發現後報警送左佢入醫院
而家已經醒返

18)
拉素被指想搵迪拿尼取代羅斯執教

p.s.:
練功夫同爭歐聯一樣
學打前先要學捱打
否則進攻幾叻,或者有幾多炮手都唔會有運行
尋晚曼聯對波圖絕對係好例子

後者攻強守弱點睇都係陪跑
前者條防線曾經睇落滴水不漏
不過維迪同埋伊雲斯一齊趺watt
里奧又傷埋
右閘位又冇個表現穩定既人選
再係咁搞隨時餘下3隻盃都得個吉

2009-4-7

1)
史堤芬泰萊同埋巴斯桑治都趕及復出鬥史篤城
另一方面,佢地被指有興趣以600萬鎊既價錢引入薩基

2)
利物浦成為最新一間同彭美拉斯新星傑利臣扯上關係既球會
佢地亦被指有興趣從列斯引入19歲中場戴夫

3)
舒夫真高表態想下季繼續於AC米蘭發展

4)
卡維同埋贊拿斯被傳可能互換球隊

5)
祖奧表態想愛華頓買斷佢

6)
賓希姆同埋華素爾都被指成為侯城既羅致對象
當中後者應該以自由身加盟

7)
M.Mayelikohan 被伊朗足總任命為新教練

8)
馬其頓俾荷蘭炒左4:0
卡坦歷決定引咎辭職

9)
辛頓同馬賽即將約滿
消息指佢可能轉戰西甲

10)
傳聞阿仙奴提出以400萬鎊利誘法比加斯續約

11)
加納中場P.Tagoe同沙地球會 Al-Ettifaq 即將約滿
傳聞華倫西亞同埋米堡都有興趣羅致佢

12)
里爾18歲比利時中場E.Hazard被指成為車路士既增兵人選

13)
富咸被指有興趣將基維爾從加拉塔沙雷帶返英超

14)
文尼斯被傳將回流法甲

2009-4-6

近幾日既新聞......

1)
消息指科威特財團同利物浦就收購一事再有進展

2)
謝拉特以12萬5000鎊既條件同利記延長合約
而古治亦同意續約兩年

而賓尼迪斯否認球隊打算從巴勒莫收購丹麥後衛卡積亞
另一方面,利記就被傳打算引入胡禮菲臘斯

3)
皇馬被指打算以8200萬歐元既天價收購C7
而傳聞一旦C7同埋泰維斯離隊
曼聯可能收購列貝利同埋迪施高作為替補
不過泰維斯就表示願意減人工至7萬鎊週薪
以促成曼聯買斷佢

4)
朗拿度終於開始上力
比錫達斯就被指有意引入這名巴西射手

5)
墨西哥足總決定搵艾古爾取代艾歷臣
樸茅就表態冇意思引入這名瑞典教頭
而消息指新特蘭如果成功護級
下季將靠佢取代施巴基亞

6)
拜仁被指打算收購施哥夫

7)
列交同史特加續約1年
佢仲表示希望復出國際賽

8)
法比加斯,尹佩斯,胡仙歷,保方同埋查斯古特
都被指成為巴塞隆拿既增兵對象

9)
國米被指有興趣從熱刺引入威爾斯左閘巴里

10)
韋斯已離開紐卡素
傳聞這係為左將堅尼亞升上神枱而舖路

11)
傳聞艾殊利下季只會撥款1000萬鎊增兵
不過當中既800萬鎊可能要用來賠俾基瑾

12)
曼城被指打算以12萬鎊週薪吸引伊度奧加盟
另一方面,史杜歷治拒絕同曼城續約
令佢轉投車路士既機會大增

13)
莫耶斯成為費sir眼中既最佳接班人

14)
除迪亞高同埋大衛施華外
咸錫,列貝利同埋拿玻里翼衛文連尼都被傳成為祖雲達斯既羅致對象
另一方面,沙格拿表態冇興趣轉投老婦人

15)
巴利費格遜同埋麥基哥因為展示不文手勢
而被格流方面扣兩星期人工
佢兩個亦要被雪藏
消息指佢兩個極可能於季尾被賣走

16)
波爾多方面承認準備於季尾買斷哥古夫

17)
傳聞米堡一旦降班後
阿當莊臣將跳船到車路士
美度被傳將被韋根買斷

18)
雖然薩基因為遲左歸隊而同布魯士既關係轉差
不過佢既經理人依然表示韋根將會買斷佢

19)
傳聞費倫天拿開價1800萬歐元收購麥斯洛迪古斯
不過已被馬體會拒絕
另一方面,紫百合被指想從里賈納羅致中場巴列圖

20)
佐迪高美斯被指成為格流既200萬鎊增兵人選
這名愛斯賓奴23歲西班牙中場現時以借用身份效力史雲斯

21)
曼聯準備將傑斯既11號波衫榮休

22)
阿拉祖再次被傳將轉投巴塞隆拿
傳聞轉會費約500萬歐元

p.s.:
又玩失蹤既阿祖安奴今次連電話都熄埋
一度令人以為佢俾人綁架

佢雖然最終都肯蒲頭
不過就堅持唔返國米報到
原因竟然係佢要處理屋企野
同埋入場睇法林明高對富明尼斯既打呲戰

消息指今次事件令國米忍無可忍
極可能於暑假同佢解約
兩個字:抵死!

2009-4-5

想講下尋晚紐卡素對車路士

新仔舒利亞踢緊修咸頓預備組既時候
軒迪克已經帶領燕豪芬成為第二代三冠王
新手挑戰老師傅
想唔輸不妨踢得保守少少
以免漏出破綻
就算繼續高Q大棍冇睇頭都冇咩所謂

未失波之前既紐記絕對係守得好有紀律
雖然巴斯桑治同埋史堤芬泰萊都趕唔切候命
但比耶同埋高路仙尼未爆鑊
全隊又肯一人走多步
解釋到點解車路士成個上半場只得一次比較有威脅既攻門

不過舒利亞始終只係紐記既傳奇人物
而唔係魔術師
當高路仙尼帶頭犯錯
紐記防線又打回原形
而落後兩球下
球證既誤判就幻滅埋紐記攞返1分既希望

尋晚除左排名越跌越低既新特蘭
同埋等死既米堡以及西布朗外
就只有紐記冇分落袋
餘下7場波
但俾史篤城甩開6分兼輸埋得失球
紐記既頭號追擊目標就一定係黑貓

而家傳聞黑貓下季就算留到班
都會改由艾歷臣執教
即係會方根本唔信施巴基亞
而家水深火熱仲整單咁既野
士氣好極有限

小弟估舒利亞會棄用呃飯食既高路仙尼
改用史堤芬泰萊伙拍巴斯桑治
只要隊波再加快比賽節奏
3場6分波又生生性性
紐記應該有力趕過賽程同樣艱辛既東北部鄰居

P.S.:
尋晚利記驚險成為今季第一支於小屋球場羸波既Big 4球隊
過程固然超冇運
只係上半場已經中左3楣1柱

而下半場補時先入波可以話佢地有運
不過其實鬥心超強先係真正原因
佢地今季於英超已經第8次於下半場補時入波

06-07年球季皇馬後上羸西甲
就係咁keep住成日搏到補時先入波羸1:0

今晚希斯基唔可以為舊主僱報恩
好彩都仲有費度
當然巴利俾個見面禮利記就仲好

2009-4-3

太公波既重點就一定係 'Don't cry for me, Argentina!'
原因之一一定係拉帕斯高原效應
巴西93年首次於世界盃外圍賽輸波都係因為咁
當年泰法路半場休息既時候仲要用氧氣罩幫助呼吸

小弟有個fd幾年前去左肯雅代表港隊跑馬拉松
佢同小弟講話南韓隊教練去到於海拔千幾米既酒店都辛苦到頂唔順
可想而知海拔2500米既拉帕斯幾惡頂

面對高原考驗
一般教練得兩個選擇
一係早幾日去準備
不過好多例子係搞到自己仲殘
另一個方法就好似球王咁比賽前兩個鐘先帶隊到場

不過阿根廷既23人大軍只有7個人有高原比賽經驗
正選11人仲全部未感受過高原效應
當中好多人仲踢左對委內瑞拉既比賽
體能方面更加蝕底
佢地又點可能有好下場?

馬勒當拿唔識好似前輩柏卡文咁派隊二線隊專攻高原
傳媒話佢唔用腦
小弟就覺得可能同佢未熟晒球員而選唔到兩隊人腳有關

高原效應勁
不過球員表現差先可以解釋阿根廷既大敗
重災區絕對係後防

卡列素於拉素俾人當廢物之後已經雪到硬晒
迪米捷利斯成日話要踢中堅
但小弟始終覺得佢岩踢防中
而唔用森美爾反而派軒斯負責中路
後者成日搞唔清楚幾時踢閘同埋中堅
佢兩個中堅走埋一齊既下場只有爆鑊
而上場踢3-4-3
今場改踢4-4-2
亦令佢地更易犯錯

一對閘辛尼迪同埋柏柏又係漏洞
35歲既前者因為於國米多數踢防中而冇晒踢閘既位置感
冇經驗既後者就要軒斯頻頻幫手
令軒斯受壓更大
佢兩個明知體能受高原影響仲頻頻出擊
助攻不成事小
趕唔切回防就大檸樂

中場又係死
馬斯查蘭奴同埋加高根本唔夠對手搶中場
整定阿根廷成場下風波
而有波只係分去兩邊
就令進攻過份簡單

前線既泰維斯幾乎隱形
美斯把握唔到單刀波就令球隊更加劣勢
佢兩個既小型球進攻一對強勢對手果然即刻收皮

老馬由天堂跌落地獄
佢冇可能唔上身
當中後防搞到咁
當務之急係去check下仲有冇新血available
否則阿根廷之後仲有無限失波以致失分既可能

至於搵唔搵列基美出山
從今場波好難下定論
因為阿根廷中場輸晒
就算佢在陣都唔慌有機會發揮

2009-4-2

1)
有7位數字護級bonus既舒利亞已經正式上任
不過佢表示只會帶隊8場
(小弟覺得佢想為自己留條後路……)

而關於紐記既傳聞依然甚多
既有消息指話一旦降班
就會有13名球員被放棄

堅尼亞就被指將被升上神枱
以長遠讓位俾舒利亞
亦可順便踢走韋斯

另一方面,羅拔李爾被指將會加入教練團

2)
沙格拿被指成為祖雲達斯既增兵對象
不過傳聞1300萬鎊既價錢未免高得誇張

3)
韋利同阿特蘭大提前達成解約協議

4)
傳聞一旦巴利離隊
維拉就會向蘇黎世收購瑞士中場 A.Abdi

5)
利物浦答應將禾路連以400萬歐元既價錢賣俾哈化柏林

6)
迪亞高盧比斯被指成為巴塞隆拿2000萬歐元既新龍門人選

7)
費蘭迪斯,卡斯度,華素爾同埋夏文被傳將被曼城放棄
前者明顯唔憂出路
摩納哥被指成為最新一間同佢扯上關係既球會

8)
熱刺同埋樸茅都被指睇中西布朗既斯洛伐克中場高倫

9)
簡奴迪同西維爾續約至2012年
粉碎佢轉投AC米蘭既傳聞

10)
費爾表示如果費倫天拿下季冇份踢歐聯
佢可能考慮離隊

11)
AC米蘭成為最新一間同傑利臣扯上關係既球會

p.s.:
1)
屯門普高射手張天德話因為國援隊友打假波而憤然退出球圈
引起好大迴響
今日有時間就想講n年前一件類似既真人真事

件事係從當時人既哥哥口中得知
當年有個前港腳年青時踢某支青春班
某場比賽於球隊羸緊1:0之後仍然好落力比賽
而佢自問自己都踢得唔錯
點知自己偏偏要被換出
正當佢好無奈又唔知點解既情況下
有個唔知教練,領隊定係老闆既人同佢講左一句:
(當時人既哥哥冇交待條友係咩post)
‘你咁搏,想累我輸錢呀?’

小弟之後再冇咩機會遇到當時人既哥哥
所以再冇機會聽到類似既野
當時人而家都仲踢緊甲組
不過唔係好問我有關當時人既資料
你地當聽左個故仔就算啦

2)
太公波賽後感聽日先講

2009-4-1 (2)

近兩日既新聞……

1)
英國傳媒廣泛報導舒利亞即將接手紐卡素
(段估BBC等名牌唔會趁愚人節玩嘢)
消息指佢將會帶隊於最後8場聯賽搶分
不過截稿前紐記官網仍未有任何消息

2)
韋斯再次被傳將於季尾離開紐卡素
而名宿費甸南就被指可能回巢接替佢既位置
(不過小弟覺得堅尼亞坐神枱既機會始終比較大……)

3)
利物浦被指準備出價1800萬鎊引入伊度奧
而佢地就同兩名年青球員史柏寧同埋達比續約
另一方面,現時被外借既阿根廷中場列圖
就被指成為巴黎聖日耳門既增兵對象

4)
來自意大利同埋西班牙既3份報章
搞左個由讀者投票既最佳領隊選舉
結果賓尼迪斯壓倒費sir同埋哥迪奧拿當選

5)
皇馬同埋巴塞隆拿都被指有興趣引入巴甲新星傑利臣
而這名射手更被指已口頭承諾會加盟後者

6)
雲達華治表示會等落實新會長同埋下季教練後
先決定去向

7)
費倫天拿既巴西中場菲臘比美路被指成為阿仙奴既增兵對象
而紫百合就被指睇中森多利亞中場柏倫保同埋巴勒莫丹麥後衛卡積亞

8)
戴倫賓特再次被傳於暑假加盟紐卡素

9)
國米被指打算以2000萬歐元既價錢引入迪亞高
而羅斯亦被指成為佢地既增兵對象
不過這名維拉利爾射手已經否認收過國米既斟酌

另一方面,馬干既經理人爆料話皇馬希望向國米羅致這名巴西右閘

10)
哥連泰斯被指打算羅致基斯普

11)
由於薜羅拔圖同埋奧度勢將離隊
里昂防中杜利蘭同埋聖伊天右翼衛M.達保都被指成為拜仁既增兵人選

12)
軒斯被指成為熱刺既新左閘人選

13)
卡昂既20歲馬里中場耶達巴透露
阿仙奴,紐卡素同埋愛華頓都有興趣於暑假羅致佢

14)
傳聞車仔向祖雲達斯開價800萬鎊收購查斯古特
不過老婦人已經作出否認
而迪亞高米列圖,多蒙特既塞爾維亞新星蘇保迪
同埋熱刺威爾斯左閘巴里就被指成為佢地既增兵對象

15)
波爾多被指打算以700萬鎊既價錢從樸茅收購烏達卡

2009-4-1 (1)

01-02年球季煞科戰
許勝不許和既巴塞靠李華度3球世界波羸華倫西亞3:2既大戰
應該仲有好多人記得
當日古華特同埋哥迪奧拿都先後被換出
前者即刻去沖涼換衫
後者就憂心忡忡睇比賽
路人甲乙丙都知邊個對間會有真感情

古華特早年試過揸車撞死人
又俾人告過輪姦
點睇都唔似好人
前日佢居然表態想重返巴塞教青年軍
他日仲希望可以做埋主帥
小弟好想知哥迪奧拿究竟有咩feedback

另一邊廂,域陀華迪斯既經理人為左佣金而獅子開大口
居然話條廢柴既人工要同卡斯拿斯睇齊

小弟最初睇到兩單花邊新聞
仲以為係為愚人節'獻禮'
做人最緊要人貴自知
否則只會淪為笑柄

p.s.:
晏少少再講新聞
當中包括舒利亞重返紐卡素救亡

2009-3-31

好好好好好多場太公波想講……

巴西仔作客向來著藍衫
不過如果唔係佢地個樣熟口熟面
齋睇表現隨時以為著黃衫既厄瓜多爾先係足球王國

佢地作客贏唔到波唔意外
因為佢地近年作客頂多得6成戰鬥力
冇卡卡靠細哨就仲死多幾錢重

而如果唔係雙方龍門質素有別
森巴兵隨時連1分都保唔住

賽前花邊新聞話阿祖安奴搵埋羅賓奴等蒲精開個P都12個鐘
就睇得出佢地有幾認真同埋集中
佢地歸隊後加埋踢波既時間都唔夠開個P咁多
球會領隊同埋老闆成日話太公波搞到班球員謝晒
去蒲去滾所消耗既精力唔多過一來一回既兩程飛機?
小弟就唔多信

同樣令人失望既有葡萄牙,法國同埋德國
葡萄牙方面
C7有幾名大於實
只要唔係死硬派撐曼聯既應該都會好清楚
大波通常冇料到
冇左曼聯群星拱照又係老馮冇料到
原地插花,浪射同埋插水已經佢既成名3寶
佢領軍既功能
可能連費高當年一半都冇

而班隊友唔係走緊下坡就係未接到棒
再加埋個庸帥昆洛斯
成隊葡萄牙幾個月內就咁淪落為世界二線球隊

法國方面
見到杜明尼治
就即刻令小弟聯想到AIG既高層
一樣咁廢兼面皮夠厚
賓施馬未上到位
亨利睇落又有少少厭戰
中前場講到尾只係靠晒列貝利
而中後場數得出有名氣既全部都今非昔比
法,葡兩國就算入到決賽週
最終都唔慌有運行

德國方面
主場只羸列支敦士登4:0就明顯交唔夠數
而陣中唔夠新仔用亦係大問題
不過路維起碼夠膽盡量俾機會新人

安基同埋馬里奧高美斯俾人狂插
小弟都撐路維繼續用佢地
因為蜀中無大將
而家唔趁對弱隊幫佢地打起信心
唔通到南非要搏命先要佢地頂硬上呀?

不過德國中路始終冇夠料既新人上到位
就始終係球隊一大隱憂

反而阿根廷同埋意大利俾到小弟驚喜
阿根廷於後列基美時代既第一擊清風送爽
新10號美斯,泰維斯同埋阿古路一齊出擊就好有小型球 feel

不過如果對手踢9-0-1
或者中場有兩個或以上勁既防中阻住晒
佢地仲可唔可以踢得咁爽
小弟就真係好懷疑
而球隊冇一個高大箭頭破密集亦係弱點

意大利既整體發揮就一般
不過初步搵到件好野柏仙尼就值得慶賀
至少唔使咩都靠晒東尼

不過後防冇新血代替到簡拿華路就隨時成為死穴
只得基亞連尼一個可以擋得幾多次
但話說回頭
就算有新仔
納比敢唔敢用又係另一個問題
而大簡會唔會因為冇班落而暑假索性掛靴亦係疑問

另外想講多幾隊波……
英格蘭方面
朗尼係好搶
不過得佢一個咁搶又反映左英格蘭其實冇咩殺手
希斯基係唔自私兼可以為隊友開路
不過唔識入波既前鋒講真好極有個譜
而奧雲仲有冇機重返國家隊依然係一個謎

球隊最終既前途可能繫於謝拉特身上
4-4-1-1陣式可能係佢地既最終出路

今場波佢地既表現
都唔夠件復古波衫令小弟印象更咁深刻
件白色polo簡直係近年傑作
修腰兼略為貼身既設計仲 fit 晒小弟

西班牙就近兩場多左長傳同埋側擊
雖然成效一般
但至少係正面嘗試

不過後防就始終俾唔到小弟信心
碧基同埋艾比奧爾始終唔穩陣
唔使失波只因對手係殘陣既土耳其
同埋卡斯拿斯繼續有料到

亞洲區方面
日本近幾年略走下坡
中村俊輔不復當年勇
陣中又冇可靠既射手
用幾多個前鋒都係冇用
球隊唯一保持到既只係體能,速度同埋效率
佢地同埋南韓暫時應該未係澳洲既對手

北韓仔出線在望
超勁體能,發揮正常同埋西亞球隊勁跌watt都係主因
但佢地近乎冇機會對亞洲以外既球隊
陣中亦冇咩外流球員
而技術亦只係一般
往後既路會越來越難行

西亞球隊又係令人失望
踢法唔夠整體兼體能不足係佢地既死穴
不過話雖如此都要為戴伊講返句好話

領先1球既伊朗最後11分鐘連失兩球
不過之前球證其實漏吹左球12碼
門框亦救左沙地一次
否則伊朗一早羸緊3:0
而表現講真亦算有交待

戴伊臨危上馬而家開始有起色偏偏俾人踢走
伊朗足總近年換教練既速度拍得住一眾富有鄰國
其實長遠對提升球隊水平毫無幫助

2009-3-30

近幾日既新聞……

1)
賓尼迪斯否認以2000萬鎊價錢引入大衛施華既傳聞
佢只表示已經同佢既教練班底搞掂續約

另一方面,’可能係世界上最好既啤酒’就想以1500萬鎊既條件
同'可能係世界上最好既球隊'續約4年

2)
雖然堅尼亞最遲可以於5月復出領軍
不過傳聞紐卡素可能將佢老人家調職為球會總監
即係升上神枱!

3)
紐卡素再次被傳想買侯度史東
佢地亦被傳想向些路迪以及侯城
分別開價400萬鎊同埋500萬鎊收購保路錫同埋端納
而紐記新龍門既可能人選哥頓就表示有意離開新特蘭

4)
由於走馬上任既列仙奴未能改善馬體會戰績之餘
仲同阿古路不和
蘇斯達因而被指可能接手馬體會

5)
軒迪克可能改以顧問身份效力車路士
負責處理球員買賣
而俄羅斯足總亦大開綠燈

而雲達華治表態有興趣轉投車仔
不過先決條件係軒迪克繼續執教
另一方面,艾殊利楊格亦被指成為車仔既考慮人選

6)
AC米蘭被指想引入簡奴迪
不過西維爾已經表明唔會出售這名馬里射手

7)
皇馬再被指打算出價1億鎊收購C7

8)
消息指曼聯上個暑假曾斟酌文仙尼出任費 sir 既副手
不過這名前國米教頭只有興趣搵間球會坐正

9)
傳聞列文復出國家隊
不過龍門教練哥普基已經否認有關傳聞

另一方面,列文既宿敵簡尼都唔見得比佢好
加盟史浩克04做經理0個單野最終爛尾收場

10)
保拉路斯希望離開史特加以爭取更多出場機會
漢諾威就被傳係佢最可能既落腳地

11)
班尼加成為拿玻里1000萬鎊既羅致對象
這名20歲中場亦承認佢既經理人已經做緊野

12)
富咸,伯明翰同埋史篤城都被指想向利物浦借用法國年青射手尼哥治
而前者亦想向曼聯收購吉遜
不過這名21歲北愛防中已經作出否認

13)
華倫西亞被指睇中利華古遜既22歲智利翼衛維迪
而祖亞昆就被指成為祖雲達斯既增兵對象

14)
簡拿華路被指成為AC米蘭,熱刺同埋曼城既增兵對象
不過這名意大利隊長已經否認同前者有接觸

15)
傳聞指法比加斯捧左歐國盃後開始於阿仙奴隊中扮大佬
仲有隊友睇死佢會於季尾轉投巴塞隆拿
而賓特拿亦再次被指成為國米既增兵人選

另一方面,繼耶保後
兵工廠被指睇中拖肥糖另一後衛尼史葛
傳聞轉會開價高達1000萬鎊

而漢基蘭亦係雲加既另一心水
不過就有財大氣粗既曼城阻頭阻勢

16)
莫斯科火車頭,多蒙特,漢堡同埋辛尼特都被指睇中加拉塔沙雷既巴西進攻中場連干

17)
奧尼爾被指將奇雲戴維斯同埋瑞士防中費蘭迪斯列入收購名單

18)
傳聞熱刺開價1000萬鎊收購迪亞高米列圖
不過熱那亞已經表明出價太低
另一方面,莫達就被傳成為國米,西維爾,貝迪斯同埋馬略卡既羅致人選

P.S.:
1)
落後地區經常搞唔好球場保安問題
近年頻頻爆鑊
科突迪瓦又因為咁而最少損失左19條人命
而132名傷者當中好多都係重傷

類似既慘劇似乎沒完沒了……
今次事件
好多冇飛既球迷唔肯自律固然係事件起因
國際足協之前先話這個球場通過左安全檢測亦好諷刺
而差佬太遲先識放催淚彈驅散人群都好抵插
3個原因加埋就解釋左今次同埋之前類似既慘劇

2)
聽日先講太公波賽後感

2009-3-27

1)
加利安尼表示安察洛堤將會留任
不過就警告細哨如果再唔改善表現
佢將於季尾被賣走

2)
由於同艾加續約唔多順利
消息指利物浦打算向華倫西亞出價1000萬歐元收購艾比奧爾
另外,沙比艾朗素就表示冇收過皇馬既斟酌

另一方面,利記肯賣斷禾路連俾哈化柏林
不過就企硬要收400萬鎊

3)
曼城再次被指準備嘗試羅致列貝利同埋亨利

4)
一般估計艾蒙尼亞下年1月就會獲發英國護照
令佢有機會入選英格蘭大軍參加南非世界盃

5)
幾段有關紐卡素既消息……

韋根被指有興趣向紐卡素出價200萬鎊收購巴頓
而奧雲被指向曼城自薦

有出有入......
佢地就被睇睇中根特前鋒盧斯
這名23歲哥斯達黎加射手先後同多支球隊扯上關係
當中包括:安德烈治,標準烈治,布魯日,海倫芬,奧林比亞高斯,拿玻里,格流同埋些路迪,

而卡達活被發現星期二晚去左睇史雲頓對諾咸頓既比賽
消息指佢既目標係0個晚為前者連中三元既確斯
隨即有傳聞指佢地將於暑假收購這名即將22歲既本土前鋒

另一方面,杜夫因為肌肉拉傷而要休息至少1個星期
佢已經離開愛爾蘭集訓營向紐卡素報到

另外,小路亞路亞就被外借到唐卡士打1個月

6)
士砵亭既16歲葡萄牙射手 A.Taira 被指成為幾間英超球會既羅致對象

7)
維拉被指打算以1200萬鎊既價錢引入比利時中場迪科爾

8)
繼球隊經理慕拿後
史浩克04亦決定同教練魯頓解約
而為左跟隨佢而由川迪加盟既安格拿就被傳可能轉投燕豪芬

9)
阿仙奴被指有興趣搵艾利亞迪里回巢
佢地亦被指想同車路士爭奪耶保
莫耶斯為左留住這名尼日利亞中堅
準備以200萬歐元既條件同佢續約3年

10)
辛尼特被指有興趣從格流引入巴利費格遜

11)
瑞士射手費爾被指成為拿玻里,熱刺同埋巴黎聖日耳門既增兵人選

12)
蘇亞素雖然被指將被國米放棄
不過唔愁出路既佢就被指成為馬體會既新前鋒人選

13)
拉素被指準備放棄阿根廷龍門卡路素

14)
卡利亞里22歲左閘比仙尼被傳成為韋斯咸既增兵對象

15)
愛斯賓奴既23歲中場佐迪高美斯被指成為些路迪既200萬鎊羅致人選

16)
卡斯歷被指準備重返德甲

17)
查爾頓被指可能改變主意同鄭智續約
(不過人地肯唔肯先得架?)

18)
車路士被指有興趣羅致3名失意軍人羅賓奴,雲達華治同埋柏夫奴真高

p.s.:
戴倫費格遜爆料話費 sir 決定下季收山
係真唔係呀?

2009-3-26

近兩日既新聞……

1)
吉列被指搵銀行幫佢出售利物浦既股份

2)
麥薩斯,卡利亞里26歲龍門馬捷迪,東尼,
同埋彭美拉斯21歲新星傑利臣都被指成為AC米蘭最新既增兵人選

另一方面,舒夫真高就被指可能重返基輔
而波里路就可能被賣到拿玻里
而尼斯達同埋艾瑪臣就被指可能決定退休

3)
堅韋尼鍾斯被指成為利物浦800萬鎊既羅致對象

4)
曉頓聲稱依然得到球員既支持同埋信任
另一方面,史堤芬泰萊同埋巴斯桑治既傷勢冇預期咁嚴重
應該可趕及落場鬥車路士

5)
原來16歲巴西射手Nascimento 跟埋球會隊友 L.Korijkov 一齊於紐卡素試腳
另一方面,早前因為護照問題而未能於1月加盟紐記既Caio Ferreira
就被指可能改為加盟一間希臘球會

6)
拉素被指有興趣引入自由身既告魯斯

7)
馬基里尼否認季尾掛靴既傳聞

8)
拜仁方面否認有興趣羅致麥基迪既傳聞
亦表示唔會於暑假引入新箭頭

9)
韋斯咸被指有興趣向曼聯收購奧沙

10)
科蘭否認加盟熱刺或者新特蘭既傳聞

11)
摩連奴表示想贏歐聯就要大幅清除瘀血
同埋提攜新星兼 upgrade 訓練設備
另一方面,佢被指想帶3名舊部屬杜奧巴,卡華路同埋艾辛到國米

12)
祖雲達斯被指用現金加埋阿米朗向森多利亞收購卡斯辛奴
而老婦人亦被指想從漢堡羅致杜查奧斯基

13)
艾利亞迪里被指成為幾間歐洲球會既羅致對象
當中包括羅馬,費倫天拿,川迪同埋維拉利爾

14)
由於博洛尼亞高層同米赫洛域不和
消息指佢地想於季尾搵前任教練阿拉干尼回巢