再來英冠分析
小弟打算將24隊球隊分為4級
由於3隊英超降班馬星散問題都唔係太嚴重
所以同埋前6常客鍚菲聯
就成為小弟心目中有本錢爭取直接升班既第一梯隊
紐卡素方面
隨住幾次冇米粥
而家最重要既已經唔係有冇新老闆
而係盡快落實係唔係賣盤
艾殊利如果覺得唔岩價唔賣
又肯再注資4000萬鎊俾隊波出糧
不妨信多佢一季
因為紐記重返英超一定會幫佢賣個好價
相比難兄難弟西布朗同埋米堡
紐記既人腳有過之而無不及
只要有 heart 同埋踢返個隊型
唔理曉頓繼續教抑或之後有人接手
就算最終走左幾件主力都足以同其他英冠對手死過
米堡方面
只要一日留得住端基
就算中前場冇左幾件貴價蛋散都冇咩所謂
不過前線3隻快馬全部識跑唔識入波
一日搵唔到個識入波兼二傳既前鋒
都會浪費端基好多心機
另一方面,米堡其實同紐記陣中都有幾多年青球員等緊上位
修夫基如果肯繼續搞青訓
米堡可能繼阿當莊臣後再有意外收穫
而即將有格寧離開既西布朗雖然留唔到領隊莫比利
不過基本上保留到主力陣容
亦搵左迪馬迪奧接手
這名前意大利工兵雖然經驗唔多
不過佢應該有能力改善西布朗近年一般既防守能力
而球隊踢法可望粗中帶幼
布隆特同埋摩利臣兩邊俾波西蒙確斯既簡單直接踢法
亦絕對有能力協助球隊重返英超
錫菲聯方面
每次踢英冠都幾乎係前6穩膽
邊可能唔當佢地係第一梯隊
第一梯隊現時冇一隊明顯標青
當然亦冇咁快會有球隊成功跑出
紐記同埋米堡人腳雖然比較好
不過英冠太講速度同埋體力
亦解釋點解強隊好多時作客隨時輸俾弱隊
踏入季中佢兩隊隨時因為體能問題而略為蝕章
第二梯隊方面係指冇本事直接升班
不過有能力爭取附加賽資格既球隊
這類球隊既數目其實英冠梯隊當中最多既一層
小弟心目中就有10隊
原因係英冠實力接近
排第6同排第3一樣又只係得附加賽資格
同中游球隊分數上亦差唔遠
令好多黑馬球隊都有本錢去搏一搏
第一隊要講既係雷丁
個幾星期前從米堡迷ck得知 Sky TV 睇好這間倫敦球會羸英冠
小弟當時已經好唔同意
佢地雖然從屈福特搵到有料之人羅渣士接替退休既葛甫
不過因為慳錢兼改組而放棄幾件有英超經驗既球員
隊波即刻廢左唔止一班
而近日仲冇埋史堤夫亨打同埋比基
而家入到前6都算超額完成
而葉士域治雖然人腳幾一般
但有堅尼教波就絕對唔可以忽視
雖然而家出閘脫晒腳排尾4
不過唔好唔記得佢當年接手出閘直情仆直既新特蘭
最終黑貓到尾二個 round 已經肯定直接升班既歷史
教英超要燒銀紙兼好考眼光去勁買人
比賽既技術成份又比較高
堅尼既最佳戰場可能係體力,鬥志比星級陣容更重要既英冠
因為班波只要感染到佢7成鬥志已經唔係人咁品
而卡迪夫城近年大致 keep 到一定戰鬥力
麥哥馬克同埋列尼等主力留隊
又從新特蘭搵到查柏回巢
整體戰鬥力絕對夠入前6
佢地人腳算唔錯但財力又比較一般
繼續阻止英超球會挖角應該係佢地今季既關鍵
而近兩年挑戰升班既布里斯托城
今季冇好似上季咁出閘脫腳
考慮到佢地既人腳唔算充裕
擅於激勵士氣既加利莊臣唔似可以
繼兩季前一度帶隊長佔頭兩名
入前6應該係佢地既基本目標
打呲郡方面
因為對哥洛夫父子既情意結
小弟對佢地特別有好感
如果財力一般既佢地有本事挽留中前場幾件主力
班尼斯,甘文斯同埋侯斯等球員隨時有能力為球迷帶來驚喜
昆士伯流浪方面
人腳唔差但而家只排17唔係大問題
老闆唔好耐性似乎先係麥基頓遇到既既最大困難
普雷斯頓識攻唔識守
肯定唔係直接升班既材料
不過爭入前6既機會始終存在
諾定咸森林方面
比利戴維斯上季尾成功領軍護級成功
今季再買斷根達,保羅安達臣等5個球員之餘
又引入艾迪保拉同埋麥肯拿幾個實用球員
雖然唔夠默契開壞個頭
不過以佢地而家既人腳
只要比利戴維斯及早撥亂反正
爭前6依然唔係妄想
水昌宮雖然人腳平平無奇
不過領隊禾諾克功力搭夠已經唔可以睇小
高雲地利方面
整體人腳又係好一般
不過冰島小將A.根拿臣有活力又肯用腦踢波
有佢成隊波即刻可以踢高一皮波
最驚佢一個未救到全家之前已經俾人挖走
特別係高雲地利既財政壓力絕對唔輕
第3梯隊指4隊比上不足,比下有餘既球隊
近年唔少球隊坐直昇機咁連續升班
原本李斯特城同埋彼德堡都有可能成為最新例子
不過今季英冠係近年實力最接近既一年
佢兩隊就好難偷雞
前者由功力一般既皮雅臣領軍
球隊實力唔似會突飛猛進
球隊射手 M.Fryatt 於英冠既履歷仲令人唔多放心
後者就由費sir個仔戴倫費格遜執教
小弟唔敢講佢將來有冇費sir咁高成就
不過佢一下子將12個球員掛牌就未免換血過急
而家球隊排尾5就唯有當買個教訓
屈福特方面
麥基回歸球隊新手教波
成隊波亦俾人好有活力既印象
如果現有人腳可以維持到下季
小弟絕對會將佢地既評級提升1級
不過以佢地財力
要佢地成功保留以湯美史密夫為首既幾個主力
可能同要求佢地今季即入前6一樣強人所難
錫週三方面
雖然財政壓力大減到而家有閒錢買人
不過要佢地一下子挑戰前6始終唔多實際
第4梯隊就係指掙扎求存既6隊
史雲斯先後俾韋根搶走領隊馬天尼斯
以及兩個主力佐迪高美斯以及史葛蘭特
隨時成隊波散晒重返英甲
普利茅夫方面
隨住超班既保羅加拉查回歸布力般流浪
佢地連前線唯一亮點都冇埋
今季入球能力肯定插水
單靠隊長兼龍門既 R.Larrieu 可以捱得幾多
而班士利,斯肯索普,黑池同埋當卡士打
亦只係海軍鬥水兵既料
p.s.:
多口順便講幾句英甲
列斯同埋查爾頓出閘順利
似乎有力重返英冠
不過諾域治同埋修咸頓就好大檸樂
前者開咧唔耐已經炒領隊
更慘情既後者未開咧已經被扣10分
兼有質素既球員已經被人挖晒
前景未許樂觀
11 comments:
好彩仲趕得及出門口前開電腦睇a_a
攪左咁耐都攪唔掂
某程度上係幾失望
開季三埸兩勝一和
主埸威力仍然係度
再加上老味發威
暫時排到第三
不過前線始終都令人擔心
卡路爾經驗唔夠
加上把握力仲有好大進步空間
Ranger更加唔洗講
仲新過卡路爾
令到就算要開快車
都要連續三埸用同一個前鋒組合
宜家希望盧雲卡蘭斯真係回歸
米堡同西布朗其實唔比我地差
作客西布朗果埸甚至睇到人地打得比我地好
當然作客唔洗輸又係有優勢
其他英冠隊真係唔多熟
真係睇就算了~_~
p.s.
出門口了~~
幾日後見~~
紐記又贏.唔知可唔可以試下連勝呢?
Blacky今日應該幾開心.我想冇人估到曼聯爆大冷輸俾般尼...
希望紐記能快快賣盤和買到人啦!!!
很佩服小黑可以用咁有限既時間去寫出英超及英冠前曕,
而且內容仲咁詳盡,
特別係有關英冠球隊有什麼主力球員都咁熟悉,
真係太厲害了.
我暫時只睇過兩場紐記既英冠賽事,
對英冠賽事既初步感覺就係
無論比賽節奏及球隊既進攻組織瓣數去比較
英冠同英超仲有一段距離,
球賽的搶拚及體力化程度,
都係以英超較強
不過英冠賽事較多,
對球員的體力需求真的是一個很大既考驗.
而家仍是季初,
各隊仍有很多的變數,
例如領隊及球員既更替等,
真係好難去估那隊是龍是蟲,
特別係經過上年紐記既大災難的一季後,
所以我覺得都係要過左聖誕快車賽程及1月底轉會窗關閉,
才能較容易對各隊既實力及最終排名作出評估,
To: 舒利亞,紐迷Ricky & sammysir
1)
紐記賣盤既嘢順其自然啦
因為就算艾殊利攬多紐記一季都冇蝕底
因為佢又肯注資4000萬鎊俾紐記出糧
而紐記重返英超亦有助佢季尾賣個好價
吸取左咁多教訓
佢冇動機再搞衰紐記
2)
小弟覺得某些球員同埋領隊特別岩英冠
球員既例子有:
艾美奧比,西蒙確斯,查柏同埋湯美史勿夫
而A.根拿臣這種級數就似借英冠作跳板
領隊方面既例子就有堅尼同埋禾減克
3)
紐記頭3場有7分算唔錯
當中仲已經踢左兩場硬仗
至於連勝方面
似乎唔好咁快唸得太遠
4)
針永遠都無兩頭利
紐記前線多新仔
把握力可能唔夠老練
不過活力搭夠
隨時仲可以趁今季打起一兩個後生仔
5)
小弟覺得戰術,技術同埋速度
都係一定英超佔優
不過英冠就較多身體接觸同埋比較硬朗
6)
小弟都同意sammysir所講
英冠比賽好多變數
另外,一定要考慮體力因素
英冠前列球隊既落敗率普遍唔低
原因同體力好有關係
佢地經常於作客比賽突然勁跌watt
7)
如果有機會
可以過左1月轉會 deadline 再拆局
8)
見到利記終於開齋當然開心
考慮到佢地未上力
小弟最初只係估一球起,兩球止
黠知羸夠4料
或多或少同4分鐘就開紀錄有關
9)
般尼第一場作客史篤城咁屎
點唸到佢地略有改善既同時
曼聯會踢出可能係更幾年最差既一場聯賽
p.s.:
sammysir太過獎小弟
寫preview最花時間一定唔係打字
而係自己先詳細分析
想隨時都交到貨
就一定要靠平時多做功課
上次睇完波比sir篇稿後唔識留言
可唔可以俾少少指示
要去xanga註冊先,
然後才可登入我個blog去留言,
xanga係比較麻煩少少
我係森林既fans, 今季真係開壞個頭，只係識駛錢買攻擊球員又唔買後防，希望盛傳會由韋斯咸外借的中堅廸雲樸真係可以成事啦~
To: sammysir
小弟下次應該識留 comment
To: Cracker
1)
好驚喜有個諾定咸森林既球迷睇小弟個 blog
(仲要係香港球迷會會長!......cool!)
亦係因為哥洛夫(同埋皮雅斯)既原因
所以都有留意下森林既消息
小弟都好想佢地可以盡快重返英超
因為佢地係前度歐洲盟主當中
唯一一間唔能夠於最高組別作賽既球會
2)
唔係撥你冷水
就算森林可以成功借用迪雲樸
森林既防守能力依然唔多可靠
佢地有前冇後既情度雖然冇普雷斯頓咁誇
不過比利戴維斯領軍向來頭重尾輕
佢睇中迪雲樸好可能係睇中人地既助攻能力
而這名前U-21中堅雖然有能力立足英冠
但質素亦只係一般
p.s.:
你介唔介意話俾我知
邊個介紹小弟個 blog 俾你?
hi blacky, 我都係search下有冇d blog有講英冠波, 或者係提下森林, 因為老實講中文繁體專門講足球既blog唔係咁多, 肯講或者識football league既人就更少喇, 所以真係好高興認識你~
放心, 我一有時間, 就會上黎吹下水架喇!!!
To: cracker
明晒
有機會吹水講下以前既森林
哥洛夫領軍揚威歐洲既年代
小弟仲未開始睇波(甚至仲未出世)
之後睇片同埋資料
見佢唔係有特別多資源可用都覺得佢超勁
之後由89年見證希斯堡球場慘劇
同埋睇住佢地挑戰本土3冠王失敗
到96-97年球季睇住皮雅斯臨危受命
邊踢邊教都攞過月份最佳領隊獎項
0個兩年既事而家都依然好記得
p.s.:
有人 search 到小弟個 blog 而又肯睇
對小弟而言真係鼓勵
侯夫、端基同艾維斯離開幾成定局
丹尼韋伯、保保巴迪或其他球員能否頂替
不過此舉可省回十幾萬鎊周薪
及一筆轉會費
但球隊成績短期來說應會有影響......
加上普加迪斯因重創要施手術成季唔駛踢......
頭四場只是密月期......
九月後先至見真正的米堡
後防同前線實力減約弱下
米堡要直接升班有困難.......
To: ck
1)
米堡咁遲先冇左幾件主力
佢地又應該冇紐記咁醒四圍借兵
修夫基都幾頭痕
2)
以佢地而家既實力
真係唔似可以排頭兩名
希望班新仔有料到
否則連前6都隨時冇份
3)
今季有好幾隊開局都唔錯
米堡(紐記亦然)根本唔會有好大優勢
Post a Comment