兩場波想講......
1) 曼城對曼聯
曼城計表現算係略勝曼聯
不過羸波或多或少因為甸恩兩個具爭議性判決
事實上佢多個判決亦略嫌偏幫曼城
可能同對手係死敵曼聯有關
曼城尋晚既水準同上場對愛華頓簡直係兩隊波
防線全場都好集中
就算頭尾兩段俾人圍抽都守得好穩
踢左大半場波既新仔保耶達亦冇騰騰震
而文仙尼崇尚既3防中陣式亦發揮作用
當中以尼祖迪莊最為搶鏡
曼聯方面
後防一對中堅繼續靠唔住
拉菲奧達施華面對比拿美亦於速度方面處於下風
5人中場受制於對手而佔唔到太大甜頭
負責支援前線既安達臣亦再次隱形
令朗尼長時間於前線孤軍作戰
費sir求其搵多個前鋒轉踢4-4-2都好過靠安達臣
不過睇晒成場波
小弟覺得文仙尼既臨場調動值得商榷
換走保耶達既唯一合理解釋係文仙尼驚佢頂唔住曼聯既狂攻
但隨時唔覺意打擊左小朋友難得建立既自信
而換走最勁既泰維斯就不如一早換走傷癒未 top fit 既胡禮菲臘斯
搞到曼聯更加無後顧之憂
而最後換入施雲奴後無理由搵佢踢中場四圍走
無速度既佢就算有波在腳都冇本事突圍
一味死守都要守得其法
只憑3防中踢法就唸住獨步天下
佢就算繼續有運捧得到盃仔
都唔使旨意羸英超同埋歐聯
賓尼迪斯當年帶華倫落後皇馬11分都可以後上羸聯賽
而家就算利記超低潮
後上守住前4一定唔係 mission impossible
2) 紐卡素對西布朗
由於紐記既壓迫冇森林咁快咁緊
西布朗係踢得比上場輕鬆
其實客隊主要踢簡單足球
分兩邊再傳中搵機會
貝特拿同埋後備既米拿都唔係超班既空中霸王
紐記要防守其實唔太難
偏偏佢地全場俾對手於禁區太多機會
客隊反客為主於禁區既8次攻門仲多過佢地全場既機會
如果米拿好運少少
佢地隨時連主場不敗既金漆招牌都保唔住
紐記近況回落連和3場
當中和錫週三以及西布朗都係衰後防唔夠集中
佢地而家聯賽領先全因之前防守做得好
如果能夠改善防守
直接升班既機會其實依然樂觀
另一方面,佢地今季始終幾韌就值得一讚
佢地今季踢聯賽試過8次落後
最終有5場都追得返,甚至反勝
值得備忘
p.s.:
1)
盧雲卡蘭斯擺脫亡父之痛入波
夠晒敬業
當年利記既卡馬拉於聯賽前收到老豆死訊
一樣超專業咁延期返祖家奔喪
仲一樣入波獻俾亡父
利迷事隔多年依然記得只係踢過一季既佢
佢最近就俾利記選為歷來最受歡迎球星既第91名
2)
紐記下季轉著 Puma
睇非國盃見過加納同埋科特迪瓦既新衫
印象中 cutting 唔錯
大象既紫色龍門衫仲幾 sharp
大家下季可以考慮入貨
6 comments:
不一樣的心情再看阿仙奴
先失兩球 幾乎以為時不予阿仙奴
再見路斯基的入球 驚喜
恭喜利物浦再奪3分
To: 路斯基
1)
利記重回勝軌
多謝妳既祝賀
2)
見到路斯基入球靚波
小弟都好為你高興
不過追平既一球超冇品
聽埋雲加既 comment 仲好失望
只要贏埋對雷丁既重賽
優勢仲係度
不過下半季真係唔好跌watt
始終條路仲有排行
盧雲克蘭斯勁敬業真係抵讚
有人講puma唔多好睇~_~
To: 舒利亞
1)
小弟都同意紐記仍有少少優勢
2)
唔擔心紐記既攻力
不過佢地條防線先係直接升班既關鍵
頭22場只失12球
不過近3場竟然有兩場各失兩球既結果
就係每場唔見兩分
小數始終怕長計
3)
小弟同意 Puma 既某些波衫唔好睇
例如沙地,塞內加爾等都只係好普通
不過就始終認為佢地近年既剪裁好正
4)
小弟只見過伯明翰既新衫
紐記新衫有冇得睇?
易地而處
我也會不開心
此刻 無奈:(
To: 路斯基
以兵工廠既實力同埋當日既埋門質素
當時仲有大把時間
反勝其實只係時間問題
使咩發窮惡發到咁
真係羸左波都唔開心
Post a Comment