2010-5-17

想講7人賽......

阿積士係主賽既焦點
計個人技術佢地真係一如所料咁高水準
艾沙迪同埋雲迪梅倫仲幾搶鏡
據聞侯斯查嫌史尼達既細佬太細個而冇帶佢來
否則球隊更有星味

不過贏個人技術唔代表識踢7人賽
維拉始終先係近年訪港踢7人賽最精既球隊
球員平均技術同埋速度算唔錯之餘
更關鍵係好識得用波
而迪方尼素於前線就算唔負責最後一擊
都可以牽制對手俾中場有更大空間發揮

加上奇勒同埋施基斯既高水準令球隊無後顧之憂
冠絕所有對手既防線令球隊想輸都難
當中後者仲係 U-17 世界盃既最佳龍門
上位只係時間問題

英超亦有韋斯咸,新特蘭同埋伯明翰參賽
槌仔幫陣中最出名係羅拔李爾個仔
不過質素似乎同佢老豆差好遠
反而保蘭奴有技術,速度同埋膽色
仲值得大家留意

黑貓方面
最出名既 R.Noble 入球率好高
不過唔知將來似戴倫賓特定係似查柏
奇雲波爾就同小弟講陣中最有希望既係龍門賓卡拿
即管睇下佢係唔係新哥頓

伯明翰方面
名氣最大既龍門畢特蘭因為要代表英格蘭踢太公波而甩底
陣中依然有好幾個薄有名氣既球員
例如森蒙斯同埋謝偉斯
但睇完又唔覺得佢地隊波特別勁

蘇超兩隊班霸近年踢7人賽都有進步
個別球員亦有一定質素
不過佢地用波能力同維拉仍然有距離
格流決賽雖然只係輸2:3
不過有睇就知佢地差左一皮
維拉初段急攻就輕鬆領先3:0
就算俾佢地追返兩球都依然控制大局
如果唔係之後兩次中楣又會再次大炒對手

元老賽方面
係近年最有星味既一次
不過期望越大,失望就越大

高爾明星隊同埋 IP Global 明星隊都名大於實
前者仲要衰輕敵
分組賽輸俾新加坡木球會之後
決賽又俾東京 KFC 偷雞反勝
高爾除左對港會成功突襲對手外
成個賽事最叻都只係幫人簽名同埋影相

上年亞軍 Gallic 明星隊人腳加碼
多左夏積,查邦尼亞,佩尼亞同埋諾高幾件名牌
不過8強竟然輸俾港會主席選手隊

迪恩賽後同個探班既非洲外援訴苦
話加時改踢4打4後
唔應該因為班明星遠道訪港而俾佢地繼續踢
事實上輸波又真係輸夏積同埋查邦尼亞
棄關助攻既後者仲竟然控波甩腳
難怪迪恩條氣唔順

賽事另一熱門就係全華班藝軒
佢地部份人腳上年幫金彩捧盃
今年仲搵埋和仔幫拖
如果唔係死火倫早前拉傷而甩底
仲可以再睇左倫右李

小弟其實比較鍾意睇佢地
唔係因為佢地打鬼佬激起愛國情懷
而係佢地有默契之餘又搓得好睇
淘汰賽對港會元老打少個兼輸12碼都可以反勝
就證明識用波有幾重要
如果唔係4強對東京 KFC 加時階段過份進取
最終捧埋盃都唔奇