想講歐聯決賽......
國米再次防棄控球權
以換取突擊空間
既然守得住巴塞
實在冇理由衰俾拜仁
由於拜仁既進攻起點源於兩翼
所以摩連奴今次就重點兩閘佈防
由於靠前線4交叉已經夠殺
馬干冇必要後上助攻
而狀態不足既捷禾就加埋回防既彭迪夫聯防洛賓
加埋其餘防守位置都繼續高度集中
兼甚少於危險位置輸罰球
而單天保至尊既洛賓又俾摩連奴睇通條路
結果冇左列貝利既拜仁絕大部份時間
只可以外圍搓波或者以浪射完成進攻
令國米早已立於不敗之地
進攻方面
國米明顯重質不重量
史尼達同埋其餘3叉靠靈活走位已經ko拜仁防線
當中拜仁一對防中睇唔緊史尼達
兩閘又俾伊度奧以及彭迪夫牽制而多次失位
最大鑊都係一對大笨象中堅先後俾迪亞高米列圖玩死
成條防線真正似樣既就只有孤立無援既畢特
路人甲都知摩連奴超級鍾意睇帶搵對手死穴
要羸佢好多時都要出奇不意
雲高爾4強搞掂佩爾好似好高手
但今次排陣熟口熟面之餘
人腳又有少少限米煮限飯
今次繼續以攻為守搵唔到食之餘
仲終於要為後防問題付出沉重代價
一對防中雖然擅長搶截
不過壓得點略前兼好似冇咩意識凍結對方既 playmaker
結果史尼達踢得唔見得好辛苦
而季前因為'必然正選'既爭拗而俾盧斯奧離隊無大問題
不過唔搵適當替補就幾捉虫
佢雖然未至係世界最好既中堅
但一定叻過兩隻大笨象
如果佢冇過檔對家
迪亞高米列圖肯定冇咁輕易入嗰兩球
不過雲高爾最令人失望怕且都係佢既臨場調動
明知外圍搓波搵唔到食
洛賓又因為以寡敵眾而無咩作為
佢換入兩個高佬後
居然九唔搭八繼續主打地面戰
可憐國米禁區就成為近兩代日耳曼轟炸機既停機坪
'暈'帥當年最錯一役
就係帶荷蘭踢生死戰用錯兩個箭頭入替兩隻翼
4-2-4 但嚴重塞車仲簡接令球隊輸波出唔到線去亞洲
咁既錯都可以再犯
難怪摩連奴將師傅都當係羊牯
p.s.:
場波唔止係皇馬荷蘭棄將既勝利
仲係阿根廷人既勝利
可惜老馬最重用既竟然係迪米捷利斯
其實老馬覺得摩連奴教波咁堅
點解唔跟風選齊迪亞高米列圖,森美爾,甘比亞素同埋辛尼迪
而前三者當年原來都俾皇馬當係垃圾
世事有時就係咁巧合
8 comments:
拜仁左路早該換人
左後衛巴斯杜柏根本唔敢做任何事
艾天托其實都算幾好
換佢出場後左路真係廢哂
咁不如調番小豬去打邊路
換泰摩斯卓克踢防中好過
前場其實一開始就應該擺個高中鋒
國米守地上最強的巴塞都守得住
拜仁打地面點會得？
絕對同意,
今屆世界盃馬勒當拿點兵上既準則都仍然令人非議,
雖然陣中好多我地認為既心水人選,
佢都有選入去陣中,
但惟獨冇左兩個可以踢防中既甘比亞素同埋辛尼迪,
這個都幾致命
今屆馬斯查蘭奴同麥斯洛迪古斯既表現都係一般,
以阿根廷既陣容,踢4-3-3應該唔錯,
但派牌同打反擊既人腳好似唔係好夠,
防中同後防有隱憂,
雖然我都想阿根廷可以創造奇跡...
To: wtssoccer & sammysir
1)
拜仁防線人腳根本就有好多隱疾
就左閘而言
拿姆根本係最好既選擇
不過陣中因為冇其他好右閘而要佢焗踢右路
左閘原本有巴斯菲特,柏拉積同埋艾拉巴可以選擇
不過雲高爾最終冇一個睇得上眼
寧願將畢斯杜巴由中堅轉型踢左閘
2)
小弟覺得咸美艾天托普只係踢得不過不失
可能同佢比較岩踢右路有關
換走佢之後既拜仁左路更廢
係因為負責晒成條左路既畢斯杜巴更加做唔到嘢
3)
雲高爾一早講明唔鍾意用泰摩斯卓克
因為佢既攔截能力雖然全隊最好
不過反守為攻既效率唔夠快
4)
小弟覺得與其換走咸美艾天托普
不如將佢同洛賓換位會仲好
因為洛賓扣大位遠射既招數已經俾人睇通
倒不如靠佢兩個專責傳中仲好
另一方案,就係用柏拉積換走畢斯杜巴
不過無論用咩人
都係要改用高空轟炸
或者正如 wtssoccer 所講
拜仁打地面戰既基本戰術錯晒
5)
馬勒當拿堅持要用全部可以踢到中堅既人組成防線
所以佢堅持用奧達文迪以及軒斯踢兩閘
簡接令辛尼迪落選
6)
小弟原本都覺得阿根廷有人腳砌返個類似既 4-2-1-3 陣式
不過老馬既名單原來冇足夠防中之餘
亦冇信得過既二閘
7)
老馬想用馬斯查蘭奴負責攔截
再俾華朗派牌
不過如意算盤似乎好難打得響
尋晚麥斯洛迪古斯好威喎,射o左兩球。
格蘭莊臣仲係英格蘭 Man of the match。
點解利記 D 人踢國家隊好似升o左呢咁, 踢自己隊波就...... 唉 ......
To: 死佬
1)
阿根廷既對手只係加拿大
麥斯洛迪古斯可以入兩球又有幾奇
阿根廷只係羸得5球好多人都隨時嫌少
2)
格蘭莊臣踢利記都算有表現
只係傷得比較多
佢已經係英格蘭No.1右閘
3)
踢太公波反而仲有表現既
小弟唸起既有史基泰爾同埋艾加
To: wtssoccer & sammysir
講起阿根廷咁頭重尾輕
又唸起相對於拜仁
國米條實淨防線其實就係羸歐聯既基石
仲忽然唸起一句說話......
'房子總不倒塌,因為根基立在磐石上'
(馬太福音7章25節下)
'And it fell not: for it was founded upon a rock'
(Matthew 7:25)
相對於巴塞
國米俾拜仁既壓力其實係比較細
只係拜仁本身同巴塞既距離更大
所以睇落更加一面倒
拜仁後防向來無穩既感覺
雲高爾真係應該諗諗佢
不過列貝利下季留隊
應該係幾大既喜訊
To: 舒利亞
列貝利終於落實續約5年
雲高爾應該會開始為中後場增兵
龍門,二閘,中堅同埋防中
都應該會有換血情況
Post a Comment