2010-5-31 (1)

今日想講波衫......

今年世界盃既波衫講真唔多靚
巴西件作客只係有新鮮感
葡萄牙件作客唔講就直情唔知係葡萄牙
日本嗰件就簡直係踢世界盃以來最醜既一件
唔怪得火焰波衫復刻版出極都有

荷蘭,德國,阿根廷同埋法國都平平無奇
反而公雞頭轉贊助前最後一件三間牌可能先係賣點

意大利佬件衫雖然冇驚喜
不過穩穩陣陣都已經係一線球隊當中比較靚
時裝大國果然冇樣衰既衫

英格蘭方面
主場男裝只係 cutting 好
講款真係普通過普通
暫時出街都未見過有肥佬著
怕且佢地都有為市容著想

想買女裝既亦要三思
千祈唔好俾 Umbro 同埋 Keymansoho 老點
事關佢地識搵周秀娜同埋陸詩韻做 model
但'銅鑼灣禾確特'同埋'尖沙咀謝拉特'實情唔係人人做得到

值得一提既係小弟覺得彪馬今年既功課普遍最有心思
繼早前既 Africa Unity 同埋保持水準既意粉國波衫
其他款都夠晒修身
右邊膊頭亦各有特色

例如加納,科特迪瓦同埋喀麥隆分別有黑星,大象同埋雄獅既標記
(下季紐記黃色作客亦有獨角獸)
前者嗰粒黑星可能坐山頂位都望得到
大象國既紫色龍門衫仲係印象中今年最正既款

另一方面,總有球迷唔想同人撞衫而買冷門嘢
新西蘭,斯洛文尼亞,斯洛伐克,智利同埋洪都拉斯都各有捧場客
當中後兩款都係祖國生產
肯花時間搵窿路既就唔好益樓上舖或者外國網站

而小弟最想買既其實係北韓波衫
不過之前只係搵到 Copa 同佢地出既66年復刻版
上星期 send e-mail 問最近先同佢地合作既 Astore
點知這個西班牙品牌既回覆聲稱
北韓雖然係用緊佢地既產品
但由於雙方冇簽約賣衫
所以唔會有北韓波衫作公開發售
不過 Astore 有於祖國設廠
即管睇下之後有冇時間試下運氣

講開波衫自然要講埋號碼
小弟一定等人腳同埋號碼落實後
先會開始 take action

06年收到件阿根廷落場版做禮物都 hold 住唔印列基美嗰名
就係驚佢轉 number
點知佢真係由8號改著10號
原本既10號仔艾瑪就要改著16號

又例如08年既簡拿華路,今年既碧咸,波歷克同埋艾辛
一早買定波衫既真係喊得一句句

而今年最騎呢既號碼首推柏度洛迪古斯既2號
同94年右閘泰索迪著9號真係有得比
當時唔多睇波既同學仲誤會佢就係踢箭頭既馬沙路

另一方面,今年多左好多名宿既印字任君選擇
例如買件荷蘭波衫印告魯夫,尹巴士頓或者伯金
都絕對有得唸

不過最後要俾個溫馨提示大家
唔少本地樓上舖都賣假字
要印字最好都係去外國網站入貨
或者搵間信譽良好既波衫舖