2010-12-16

雖然 out 晒
但有3場波始終想講……

1) 南華對傑志

銀羅艦隊擱淺
衰在繼續中路唔同埋歐沖再次化身足球黑洞

上場睇飛馬
小弟已經同舊同事講一旦畢特落實加盟
白鶴一定 suffer
因為佢最有可能要移後串演中堅
偏偏佢既最佳位置只係防中

球隊本身中堅各有問題
牛奶咀艾維斯肯搶肯拚
但經驗同埋路數唔夠
香港鬥莉王又未夠班
聞屎忽就更加唔使唸

白鶴同埋艾維斯各自可能有好表現
不過就一定要有人帶住去踢
而家兩個半桶水既走埋一齊
上場對飛馬冇今場既傑志踢咁多兩翼傳中

而進攻方面
神之子又一次因為過份上腳而玩死自己同埋隊友

如果本地波有 one on one 項目
佢一定羸硬
不過返到現實
佢一日未轉型同隊友更多合作
佢一日都做唔到好既 playmaker

進攻唔掂
另一個又係明顯唔掂既係卡尼祖
條友又係上腳太多之餘
仲冇左一個箭頭應有既積極性
上一個hea下hea下都搵到食既箭頭已經係’河馬里奧’
佢有冇運行可想而知

最後好想講下 Kim Sir 單嘢
羅神就算係足球白痴
都應該知南韓人精在練體能
而拙於戰術部署
如果唔係羅神都唔使搵陳浩然返來幫手

半場輸3球就已經通知傳媒有嘢宣佈
似係已經決定炒教頭出氣

唔係好明本地波老細點解咁鍾意搵藉口炒人
睇下近期英超既肥佬同埋印度佬
會唔會唸晒藉口,
扮晒好老細先去做嘢

佢隊波居然3年內會有兩個教頭忽然因為健康問題
死對頭早兩年既智利教頭又咁巧合
要返祖家照顧親人而忽然走頭
炒人都驚俾人講閒話
可想而知佢兩個平時放風既嘢有幾多成係堅料

2) 紐卡素對利物浦

利記輸波唔意外
畢竟隊波好一場後又衰返幾場
心態上已經對季尾成績表冇咩期望
但求佢地每場正正常常已經收貨

不過今場點講都係失望
上半場仲算正常
起碼有少少組織能力同埋攻門睇到
下半場既表現
講得唔好聽就只係等死

紐記基本上踢卡路爾1個已經夠殺
史基泰爾對住佢
力量上原本唔輸蝕
偏偏自己踢到失失荒
連簡單解圍都唔湯唔水
表現其實唔好得過南華既艾維斯幾多
咁既水準都一直可以同曼聯,國米以及祖記扯上關係
真係難明
更難明既係點解當年賓帥肯用高價入貨

紐記今場既踢法都係曉頓套
暫時未知柏度有咩新構思
不過以紐記現時冇左賓艾化既人腳
佢多數繼續靠卡路爾做重心

小弟最關心既反而係紐記既防守
條友當年教槌仔幫一樣大踢進攻足球
不過因為防務做得唔好
07-08年球季都係靠泰維斯季尾回勇先護級成功
以紐記現時後防既人腳
唔見得比當年槌仔幫好
加上佢增兵都幾頭重尾輕
一眾紐迷都咪話唔驚

3) 曼聯對阿仙奴

雲加輸波居然賴地硬
失望!

兩隊都踢4-3-3
勝負分野就在於防守
只要逐個位置對比就清楚易明

中堅方面
兵工廠一對法國中堅對住朗尼應該有身高優勢
偏偏多數爭唔羸高波
亦俾到態沉既朗尼幾多空位

另一邊既維迪睇到查馬克好緊
就算一千零一個機會射空門
都俾里奧護到空門

左閘方面
雖然輸12碼唔怪得晒基治
不過佢再次出醜人前就係事實
蘭尼對住佢幾乎話過就過
打死都唔信咁既廢閘會係串王既選擇

相反艾夫蘭全場只有一次走甩陣中最fit既拿斯尼
後者無機會表演
法比加斯只能紮住後備上陣既兵工廠自然死晒火

右閘方面
沙格拿跟唔實移入中路既朴智星固然要負責
而助攻都冇咩表現
某程度同拿斯尼阻住佢條路有關

拉菲爾方面
佢本身表現其實都唔係搶鏡
只係艾沙維持續沉令佢唔算辛苦

中場方面
考慮到雲加多數只派一個防中
費sir明顯有針對部署
費查主打搶截之餘
卡域克同埋安達臣都出力唔算
當中後者活動範圍好大
係佢加盟以來既其中一場代表作
亦係小弟心目中今場既最佳球員
難怪費sir肯同佢續約到2015年