兩場波想講……
1) 巴塞對皇馬
如果睇返皇馬既自殺式佈防
所謂既意外賽果其實都好正路
罰少個12碼更加唔係勝負關鍵
摩連奴根本冇用到證明成功既4大法寶:
死守再突擊+犯規戰術+凍結沙維+圍捕美斯
球隊防線由開波一刻已經冇明顯縮後
俾晒空間巴塞發揮
講得唔好聽只係等死
當然巴塞今場多左邊線發難
就更易搵到空位
而皇馬雖然都有好多犯規
不過大部份都係於垃圾時間發生
實情只係班友連品都輸埋
球隊根本冇好似上季國米咁
於中前場已經靠毛手毛腳阻礙巴塞將個波運去前場
至於沙維以及美斯
前者今場破開季紀錄有110次傳球
後者全場亦少有被圍攻
造就佢多次一個扭幾個
佢地有幾 free 真係可想而知
(偏偏C7同埋賓施馬就反而多次被圍攻
真係諷刺)
至於摩連奴點解要自殺
可能性有兩個:
一係佢知道高層同埋球迷唔接受球隊死守巴塞
所以無奈用球隊既弱去硬撼對手既強
但現階段唯有高質素既大巴士戰術足以尅制巴塞
二係旗下球員根本做唔到佢既死守要求
而唯有放手一搏
偏偏補位同埋截擊既效率都唔夠對手
皇馬今季既防守雖然有進步
不過陣中始終唔夠岩用既實用球員
當年摩連奴都要第二季先成功改造國米
皇馬真係好似佢形容既'重建中'球隊
雖然西甲歷史多次證明輸左對賽成績
(段估皇馬次循環羸唔返6球掛?)
就多數失落聯賽
不過聯賽而家只係落後兩分
當然未絕望
因為事實證明摩連奴旗下既皇馬面對巴塞以外既球隊
攞分比率都幾高
加上人腳其實亦略比巴塞充足
現階段既關鍵係摩連奴點樣調整球員既心理狀態
次循環點樣復仇已經係後話
2) 南華對天水圍飛馬
畢特一定係焦點
如果只睇新聞精華仲會覺得佢好勁
不過有入場既都應該知幾個月冇比賽既佢始終冇態
大抵知道自己冇體力捱足90分鐘
畢特由熱身到上半場都幾 hea
佢上半場既表現仲似足踢衛生波既元老球員
除左一腳冇咩可能入到既窄角度勁射中楣
同埋吊個高波俾泰利史高斯打倒掛
南華其餘時間真係好似踢少個人
佢下半場既表現係有大改善
至少多左參與組織
不過同隊友冇默契
加上其他人始終同佢有級數上既距離
效果唔算太搶亦係意料之內
睇慣英超既都知佢既死球水準只係有限公司
靚罰球怕且只係撞彩之餘
仲要多謝李瀚灝失位兼竟然唔搵人企遠柱
而未射12碼都知佢可能出事
因為小動作唔多唔少都已經出賣左佢
羅神英超價簽佢
就當佢碧咸咁用
真係笑話
南華羸波
頭號功臣其實係對巴拉圭出醜既神貓
其餘球員都唔見突出
泰利史高斯有球靚倒掛
不過亦有高章後踭射空門唔中枉
艾維斯同埋完場前建功既卡里祖其實繼續冇態
小弟覺得佢地至少有一個會俾羅神解約
飛馬方面
麥保美同埋伊達都唔錯
不過都唔夠李康廉咁搶
小弟越來越覺得佢仲勁過阿哥
即管睇下佢下季會唔會俾羅神收歸旗下
p.s.:
港版巴塞既老闆5件
豪言巴塞羸皇馬5粒
下星期六對銀羅艦隊都要重演
係真唔係呀?!
Subscribe to:
Post Comments (Atom)
2 comments:
我弟弟都有去大球場睇畢特,
佢同你既睇法一模一樣,
佢都話畢特又係好似效力紐記時一樣,
都係hea住咁去踢,
事實上,大部分曼聯fans都好鍾意畢特,
但就有好多紐記fans就對畢特冇乜好感,
我自己因為在十多廿年前曾是曼聯fans,
所以對畢特都唔會太討厭,
不過講真,用英超價咁貴請佢踢3個月
真係唔化算..
就算有商業贊助,用佢去做推廣宣傳,
同埋靠佢賣多幾百件波衫,
都未必回到本..
巴塞大炒皇馬,
其實會唔會係串王有些驕兵必敗呢
如果係,睇落就真係有些心涼,
哥帥這樣狠狠地教訓串王,
等佢唔好咁牙擦,
都係一件好事.
To: sammysir
1)
南華如果請畢特3個月
當然唔可能於帳面上回本
畢竟3場亞協分組賽
都唔似會有 full house 場面
而南華 focus 既應該係宣傳佢地嗰名
佢地向來都好想做到'國際知名'
佢地而家搵畢特來香港幾日
已經吸引到好多外國傳媒既報導
宣傳效益真係唔細
不過話說回頭
既然已經宣傳一次
羅神仲會唔會洗多咁多錢
搵佢再來3個月
小弟其實有少少懷疑
雖然羅神聲稱
應畢特要求
而帶佢去半山睇樓......
2)
皇馬當日既佈防
完全係自殺式
好難想像係摩連奴旗下既球隊
不過名帥都有燒鬚既時候
正如軒迪克帶俄羅斯
都居然輸俾斯洛文尼亞
Post a Comment