想講兩場波......
1) 拉素對國米
賓尼迪斯例牌賴傷兵多
不過佢教波水準進一步滑落似乎先係國米沉淪既主因
佢太想走出摩連奴既影子
咩都為改變而改變
除左因為解放伊度奧而令佢回勇
(但就玩死米列圖!)
對隊波其實冇其他'德政'
而變得越亂就越易得罪隊中嗰班大哥
佢今場失驚無神用牛奶仔拿達利奴踢正選
最終埋下輸第二球既伏線
2) 西布朗對紐卡素
穆林保停賽缺陣
對西布朗既截擊力原本好蝕底
不過格夫里同埋迪奧迪水準以下既表現
就令西布朗既5人中場仍有優勢
紐卡素近期進攻多左時間靠一對高大箭頭做二傳
中後場好多時只係簡單將個波大腳送去前場
格夫里同埋迪奧迪既助攻職責應該輕左
偏偏佢地專攻防務都交唔足貨
就好難講得過去
紐記作客主場強勢既西布朗
略為主守好正路
偏偏中後場只係人多
攔截真係好唔積極
印象中俾左西布朗差唔多10次機會於禁區頂前後3碼發炮
中場中兩個球員要負既責任特別大
俾迪祖爾第二時間入波就絕對係抵死結果
而格夫里蝦碌送既第二球就更加離譜
亦令場波提早進入垃圾時間
如果唔係陣中其他中場中路球員各有問題
佢兩個唔使半場已經可以 early shower
西布朗方面
奧丹維治傷癒後其實唔算 fit
不過於比賽前半段總算成功牽制紐記一對箭頭
令5人中場有幾多機會後上攻門
至於下半場可以梅開二度
雖然係多得格夫里同埋蘇甘保唔多掂
但畢竟會對佢既信心有幫助
而布隆特近日被指成為利物浦既300萬鎊增兵對象
令小弟今場更加留意佢
佢今季移入中路後雖然表現升晒呢
不過似乎仲未夠班踢大會正選
與其搵佢做謝拉特既替工
鶴臣更應該將資源收購中堅或者防中
Subscribe to:
Post Comments (Atom)
4 comments:
琴晚真係睇到我想喊
成班垃圾
迪奧迪尚算勤力
另外果位仁兄
我唯一一次見到佢既影子
就係送大禮加攪傷埋自己果野
蘇金寶上場已經覺得佢有少少危
特別係俾人逼果陣
今場更加係不知所謂
解親圍都係解唔到果隻
兩隻翼又係得個去字
出波更加係垃圾中既垃圾
曉頓都要罵
成日用死果十一個人
攪到其他人完全無態
盧雲克蘭斯原本對球隊好有幫助
偏偏連後備都n年先出一次
雪到硬哂
琴晚既紐記幾乎係無威脅
就算破蛋都係人地施捨
我知道怪艾美奧比係無用
條友神經刀到得人驚
卡路爾係落力
不過經驗明顯仲係無乜
右閘仍然係唔掂
森遜再係咁真係唔該曉頓唔好再講唔洗買人既廢話
我覺得成隊波
係得龍門既表現
叫做正常囉
To: 舒利亞
1)
同意告魯爾係紐記陣中
表現最正常既球員
2)
蘇甘保其實上場既表現尚算可以
因為卡奴同埋馬路達都少有用速度對付佢
不過今次佢明顯怯左奧丹維治
太緊身又驚俾佢高速甩左
至於解圍亦真係拖泥帶水
當中仲有唔至一次其實係有足夠時間
3)
好開心見到盧雲卡蘭斯有得出場
不過曉頓雪到佢硬晒
先搵佢做救兵
捉虫都係抵死
不過長遠而言
艾美奧比應該讓位俾其中一隻快馬
曉頓同巴朗一齊被炒,
看來紐記又會變回升降機,
下場對利記都唔知點算....
To: sammysir
1)
搞單咁既嘢
肯定士氣插水
2)
紐記最終咩下場
就好睇邊個接手
Post a Comment