雖然過氣
不過都想講下近日既幾場波……
1) 利物浦對曼聯
唔係馬後炮
愛隊羸波真係意料之內
畢竟史摩寧同埋布朗唔成氣候
前者只要累積多啲經驗同埋改善場外紀律
應該有日會成大器
後者就由始至終都只係A貨版既加利佬
古治雖然當選最佳球員
不過小弟覺得蘇亞雷斯仲sharp過佢
條友踢法幾似泰維斯
入球能力更可能好過佢
只要好好控制球場內既情緒
利迷真係可以從此忘記負心既托利斯
考慮到佢仲未完全適應英超節奏
下季應該先係佢大爆發既時機
另一方面,小弟覺得盧卡斯利華今場都踢得唔錯
甚至比負傷既謝拉特更好
條友今季幾場大戰都有超水準
可惜平均水準始終追唔到馬斯查蘭奴
而家意大利傳媒指拿玻里可能出600萬鎊接貨
杜帥乘機換血既機會都唔低
當然更大機會走既一定係保臣
以佢前晚對布拉加既劣作
佢怕且係利記近年最屎既國腳級次貨
2) 巴塞對阿仙奴
今場原來係歐聯有紀錄以來首場零埋門既比賽
怕且亦係兵工廠創會以來既第一次
搞到咁樣衰同埋輸波既關鍵
始終係雲佩斯兩黃一紅出場
佢既第二張黃牌係略為過嚴
不過球證俾佢既第一張黃牌亦已經放生左佢
事關要人唔要波既報復行為
足以直接見紅
如果有佢
打死都唔信兵工廠餘下三十幾分鐘都會繼續零射門
而如果有佢
最後階段有機會近距離攻門既就唔會係中堅賓
出局既隨時係表現比較好既巴塞
當然誠如哥迪奧拿事後既風涼話
輸波出局最應該自我檢討
法比加斯同埋雲佩斯兩個負傷上陣既大佬越幫越忙
真係希望越大,失望越大
而路斯基已經係雞肋中既雞肋
後備席上無論進攻,防守抑或駁腳方面都有比佢好既選擇
雲加都要再次搵佢踢正選
又係費解
不過教授更失敗既一著
怕且都係又買錯中堅
身價1000萬歐元既哥斯尼又衰一鑊
3) 熱刺對AC米蘭
哈利列納把口話會大踢進攻足球
落場後就緊係睬你都傻
紅黑兵團同上場相比
優勢明顯得多
不過最終都要出局
對手守得好固然係原因
不過關鍵怕且係本身冇左恩沙基
伊巴出左名歐聯隱形
柏圖又掛住瘟太子女而越來越廢
羅賓奴就從來都只係踢花巧足球既馬騮
結果有幾多攻勢都係徒然
p.s.:
兵工廠由叫四飛
搞到而家成為1.61賠既四大皆空熱門
傷痛難免
遇上苦難
只要夠韌
兵工廠同埋日本都會捱得過
God bless Japan!
2 comments:
曼聯今季作客咁雞
利記贏波唔出奇
蘇亞雷斯真係幾正
比疑似走下坡既托利斯當然好
唔明阿迷嘈咩
一來阿仙奴打得真係極差
二來球證真係嚴既話雲佩斯一早紅牌出場
第二張黃牌比亦係跟足球例
最令小弟不解既係
點解隊波入多粒就可以由輸變出線
阿記班球員仲可以未完場已經行行企企
唔怪得艾蒙尼亞插自己友
p.s.
係電視睇已經極驚
真係唔敢想像現場會點
雖然民族情懷令小弟一向唔like日本
不過天災下全世界人理應心連心
加上人民係無辜的
希望日本今次能夠渡過難關
To: 舒利亞
1)
托利斯只要冇傷
待佢適應左車仔既踢法後
佢應該仍然會係當今其中一個最top既箭頭
2)
3分鐘內連失兩球絕對打擊士氣同埋信心
加上俾巴塞係咁搓
體力肯定消耗得比平時更快
踢少個既兵工廠散晒都唔奇
p.s.:
日本建築物既防震設計算係世界頂級
否則死亡人數一定高好多
希望大陸貪官同埋奸商可以攞返個良心出來
否則如果將來大陸遇到咁勁既地震
死亡人數一定係天文數字
Post a Comment