想講英超護級求存......
黑池作客奧脫福都一如以往繼續有前無後
雖然最終都係反勝為敗
不過總算對得起自己同埋球迷
其實以佢地既人腳同埋資源
可以捱到最後一刻已算超額完成
查理阿當勢必離隊
其實禾漢,卡尼,比亞堤以及費查都應該有一定市場
至於伯明翰
港人老闆當日評論本地波既水準只係大家心裹有數
而家真係現眼報
上個月寫 preview 已經提過佢地作客超唔掂
(果然之後5場作客只得1分)
護級關鍵一定要靠3場主場賽事
不過結果只得4分
仲要輸埋俾大踢風流波既富咸
港伯其實未對熱刺已經半隻腳踩落英冠
另一方面,攻力薄弱應該係佢地降班既另一主因
當幾個名牌射手因傷打柴後仲簡直只係英冠水準
畢竟唔可能每個對手都好似兵工廠咁勁驚佢地既死球戰術
加特拿既類似世界波亦好睇彩數
當佢地輸緊一球俾熱刺
麥利殊都唔敢即刻換入達比舒亞
而又當佢地逼和熱刺後
老麥都寧願搏另一邊既狼隊再入唔到波
而派多個大衛梅菲一心死守
某程度反映老麥對球隊疲弱既攻力幾冇信心
另一方面,4月既時候小弟打死都唔信韋根同埋狼隊可以同時甩難
自問真係睇唔通佢地可以靠鬥志絕地反擊
5月既4場波分別搶到8分以及7分
絕對值得護級成功
雖然唸爆頭都唔明狼隊點解忽然跌watt
主場半場居然吞足布力般流浪3蛋
不過鼓其餘勇追返兩粒都算係咁
亦係對消極港伯既最大懲罰
不過以佢地咁既人腳連續兩季死裡逃生
如果下季再唔增兵
繼續齋靠鬥志未必再有咁好彩
韋根方面
尋晚既英雄無疑係洛達列加
不過前3場幫球隊搶足5分既尼索比亞其實先係最大功臣
但條友出名養唔熟
唔乘機搵工跳槽至奇
至於馬天尼斯可能因為護級成功而保住份工
不過如果再唔知死為豆腐防線增兵
小弟始終唔認為佢可以撈得好耐
4 comments:
黑池絕對已經令一班英超迷留下深刻印象
希望無左查理亞當既佢地
唔會一落番去就又要等多幾十年先上來
港伯就自己攞來
贏完聯賽盃就以為可以hea踢
其實幾令小弟失望既
仲有馬田斯
既然韋根唔洗降班
相信我地買尼索比亞既機會
隨住佢地坐地起價而減低
事實上小弟都唔多想見到呢條反骨仔
To: 舒利亞
1)
黑池既進攻足球真係好有娛樂性
至少平均入球偏多
2)
伯明翰捧走聯賽盃後
於聯賽已經冇咩失分空間
hea踢動機唔大
佢地降班有幾個原因:
老闆擺明落左order專攻聯賽盃
佢地個別聯賽有留力之嫌
累積失分唔少
而施積未能適應英超
加上球隊中場繼續過份打仔格
令佢地既入球能力仲衰過上季
結果好多比賽
主場應羸既失分收場
作客應和既變輸
加上佢地季尾既傷兵問題
係護級份子中最嚴重既一隊
另外,之前提過佢地主場唔掂
但季尾3場主場搶分戰
於對手唔勁既前題下
只係搶到4分就明顯唔合格
輸俾富咸仲係最致命既一場
3)
馬田斯受傷患困擾
表現一般唔奇
4)
尼索比亞唔似會選擇紐記
因為佢似會追求更好選擇
唔好忘記佢當日就係由紐記轉投韋根
條反骨仔早前話好想番紐記
不過宜家有更好選擇
佢反口又唔奇
反正小弟對佢無咩興趣
To: 舒利亞
而家最大鑊既係
傳聞利記一旦簽唔到艾殊利楊格
就會改打尼索比亞既主意
Post a Comment