幾場波想講......
本地波方面
傑志雖然羸波都冇咩霸氣
組織力依夠平平
當中原因除左草地質素同埋狀態平平外
冇左林嘉瑋先係主因
黃洋唔係唔好波
不過既同隊波未夾熟
狀態平平既佢亦好多時比林嘉瑋鍾意上腳
睇一個球員對球隊係唔係重要
最有力既指標就係睇球隊有冇佢既分別
所以香港沙維肯定對港甲巴塞異常重要
佢未復出前
加強兩翼側擊似乎就係甘巴爾最簡單直接既 plan B
至於天水圍飛馬
佢地可以靠快速反擊尅死傑志
偏偏又俾大埔用同一招收拾
一條持續發瘟既防線肯定揹晒鑊
而中前場只有一個征戰過密既李康廉支撐大局
球隊比平時更易失去控球權
一條速度平平,但又壓得太上既防線結果頻頻中伏
而晨曦大炒深水埗5蛋就勝在實而不華
旺角場岩晒兩翼側擊支援高大箭頭屈機既踢法
深水埗場場都好想破蛋
不過中後場因為捱打而無咩餘力助攻
前線幾個球員幾乎次次都要人少打人多
加上年青球員埋門一腳未夠火候
要等到佢地入波都仲要俾啲耐性
雖然佢地場場俾人數
不過千祈唔好睇小佢地既年青球員
小弟肯定佢地至少有半打球員將來會入到港隊
相對幾個質素平平無奇既巴西外援
李志堅好多時寧願俾機會本地球員都唔難理解
英超方面
最屬目嗰場就梗係雙紅會
利記下半場羸盡點數
冇得袋晒3分除左怨自己埋門一腳唔掂之外
都真係要寫個服字俾連滑翔衝力射球都救到既迪基亞
不過更好睇其實係紐卡素逼和熱刺
唔係馬後炮
睇住紐記落後都信佢地唔使輸
一來主場對熱刺既往績唔錯
二來紐記今季真係韌到得人驚
不過越來越覺柏度其實無咩板斧變招
奧巴坦唔見得比踢曼聯時進步
如果賓艾化再谷唔起狀態
類似艾美奧比既神來之筆又可以救到紐記幾多次
而家紐記雖然仲未知個輸字
不過以佢地(特別係後防)唔夠深度既板凳
莫講話要打入前4踢歐聯
就算要入到前6其實都好有難度
另一方面,哈利列納已經唔止一次先派艾迪巴約衝散對方防線
等到對方中堅有疲態後
再派本身有速度優勢既迪科爾後備落場搵著數
絕對值得卡比路應該參考
2 comments:
講過好多次根本唔夠人用
一對中堅有事根本無人代到
連威廉臣都一早傷左
迪奧堤一月去非洲國家盃
又有邊個頂佢?
艾美奧比十場得一場好波
貝斯又間中先有好波
奧巴坦既問題
其實要解決真係唔難
唔好話賓艾化
就連馬維奧斯都比佢好得多
不過柏祖係唔鐘意變
從來唔認為今季有機會入前四
未知個輸字
只係因為仲未遇到真正難關
當遇上曼市雙雄、利記、車仔
就知紐記真正實力
反而其實搏下盃仔
分分鐘有機會偷雞
不過咩都假
增左兵先啦唔該
p.s.
利記對曼聯
贏唔到其實都幾無運
不過兩邊門將對比都幾大
迪基亞救左曼聯好多次
相反連拿又有蝦look野.....
To: 舒利亞
1)
紐記肯定要買人
不過啲風吹得最勁既多數都係箭頭
2)
奧巴頓真係唔掂
最大優點其實只有勤力
3)
賓艾化同埋馬維奧斯兩個玻璃腳球員
傷仲多過踢
柏度現階段似乎唔敢用佢地做正選
4)
如果紐記keep到成季都有好表現
7至10名都可能有機
5)
同意紐記上半季攞多啲分
之後專心搏盃仔仲實際
6)
迪基亞而家越踢越有信心
不過應付高波以及中距離射門既弱點
唔似可以於短期內百分百克服
仍然有待觀察
不過費sir利用連迪加特同佢良性競爭
亦有利佢 keep 住好表現
Post a Comment