想講尋晚香港U-21對俄羅斯U-19場波
雖然賽後爆出有假波傳聞
不過小弟堅信尋晚有落場既都唔似收左錢
顏樂楓,劉卓軒,陳肇均,羅港威同埋曾文輝等都交到貨
最終輸波只因對手始終技高一籌
俄羅斯入局後頻頻於兩閘進襲
佢地個別球員都速度技術兼備
港隊下風波都好正路
而半場已被換出既陳湛羲頻頻失位就更加益晒加蘭洛夫
港隊半場只輸一球其實已經賺左
下半場港隊由羅港威串演左閘
俄羅斯少左機會於右路進襲
令帕于哥夫以及後備落場既沙尼甸多左機會於中路以及左路發圍
港隊最終只輸一球
判斷果斷既曾文輝絕對應記一功
成隊俄羅斯牛奶咀既平均年齡只得17歲
冇咩邊個係U-19主將之餘
身材方面亦冇咩優勢
而佢地防守死球以及處理死球(特別係角球)亦有好大既改善空間
但個別球員始終波底唔差
他日睇電視都仲可能見到佢地
講返ICAC單嘢
原本未知姚X俾人拉左
頻頻犯錯既陳湛羲俾討論區既人狂插到百佳
不過有留意本地波既都應該知佢成日失位
因為犯錯就俾人話佢打隻波未免過於武斷
而梁冠聰因為拉衫而輸12碼
亦俾人當係可疑人物
對佢又係好唔公平
因為嗰下動作真係輕微到未必要判極刑
與其懷疑佢就不如賴廖國文啦
不過佢既執法風格又係向來估佢唔到......
知道假波單嘢
腦海唸起3樣嘢:
一係尋晚於球場見到個十幾年冇聯絡
而家做緊ICAC兼唔睇本地波既舊同學
而家更加信自己尋晚冇認錯人
二係報導指姚X搵多個隊友打假波
不過佢有個隊友咁有錢
人地睬佢當傻
另外正面啲睇
唔好講屋企有冇錢
本地波其實有好多識唸既人
三係捉到蝦毛有鬼用咩
最緊要都係捉到幕後黑手
不過如果姚X真係涉案
你估佢又夠羌爆大鑊咩
4 comments:
香港波應該唔使打假都贏唔到俄羅斯吧
所以呢個姚X正死蠢
俾人拉咗都係低既
我學校有免費門票,
所以當晚我都有入場睇,
坐係香港啦啦隊附近,
人聲鼎沸
好有賀歲波氣氛,
始終旺角場既氣氛係最一流,,,
場波係6-4波,
港隊防守唔錯,
d飛剷都好勁
可能不停換人關係,體力都跟得上
戰術介乎踢4-4-2同4-5-1
中場25號既控技同分波都好搶眼
不知他姓甚名誰
門將也有很好表現
俄羅斯兩翼都強,
好似踢4-2-3-1
下半場換入一個高大中鋒
攻勢明顯更入肉,
如果港隊前鋒埋門入鍥再好一點,
包括補時階段所射既最後兩次起腳都把握到
是有機會追平的,
不過真係技之所限,
進攻組織始終技不如人,
在現場睇真係唔似有人打假波...
想問這支香港u21是不是由深水埗同港菁球員做主力,
佢地又真係踢得好有水準啊..
打假波真係世界各地都有
宜家就好似睇緊電視咁
捉到既只係隻馬仔
但係大佬仍然未捉到
一日捉唔到個大佬
呢d野都會發生
對香港足球發展真係有幾大既影響
To: wtssoccer, sammysir & 舒利亞
1)
如果盤口係香港受讓過多
而幕後黑手又買左俄羅斯
佢為左穩執
真係有必要搵本地球員打假波
2)
當晚坐晒兩邊龍門後面
全場睇住俄羅斯攻香港
3)
香港係踢4-5-1
入波既25號球員係陳肇均
4)
當日港隊正選有6個係SSP
其餘3個係港菁
仲有兩個就係傑志同埋飛馬
5)
同意舒利亞所講
一日捉唔到幕後黑手
類似既醜聞只會繼續發生
Post a Comment