想講幾場波……
1) 諾域治對阿仙奴
尹佩斯繼續場場著火
不過球隊始終冇合適替補
雲加真係不妨趁美職盟休季而翻兜亨利
俾尹佩斯趁機會抖多啲之餘
仲可以搵亨利過禾確特幾招
講真禾仔無論斜cut入中路既 timing 同埋埋門一腳
都真係未到英超水準
2) 曼城對紐卡素
卡比耶雖然好跑得
不過佢始終似個指揮官型球員多於一個藍領球員
格夫里雖然已經踢得好落力
不過佢始終做唔到迪奧迪嗰種硬朗攔截
結果連帶卡比耶既表現都只可以話係吃力不討好
不過曼城半場雖然有超過7成既控球時間
但表現只係平平無奇
原因應該包括國際賽後遺症
不過更關鍵既係拿斯尼取代唔到top fit既大衛施華
如果唔係賴恩泰萊於幾分鐘內接連犯錯
小弟倒肯定紐記可以守和半場
多得兩球優勢
有歐聯後顧之憂既曼城下半場初段明顯冇咁積極
文仙尼亦因為要計住孤寒數而拖到69分鐘先換入大衛施華
紐記下半場既前半段算係同主隊拉成均勢
不過小弟就覺得佢地捉到鹿都唔識脫角
咁講唔係因為賓艾化省中柱
而係柏度唔識換人
條友第一錯係冇半場用大衛辛頓換走好似失左信心既賴恩泰萊
後者下半場至少3次於K球位斷纜
最終亦因為佢失位而簡接導致賓艾化越幫越忙
第二錯係既然森美艾美奧比對住基治都唔多搵到食
倒不如換佢大佬入場為丹巴巴亞開路
紐記今季踢法係比前注重控球在腳
不過既然對手有耶耶托尼同埋尼祖迪莊等頂級防中
少左迪奧迪既紐記與其夾硬搶中場
真接放長波既效率可能仲高
因為甘賓尼做左隊長後既表現反而跌watt
尼史葛亦係計時炸彈
衝多幾衝肯定會散
而這亦係曼城正選11人既最大漏洞
3) 車路士對利物浦
利記客勝算係爆個半冷
佢地既表現其實唔算好突出
好大程度係車仔自己攞0黎衰
佢地禁區內11次埋門只係入得1球
咁既數據對英冠球隊都肯定大鑊
更大鑊既係後面繼續冇防守
米基爾已經唔係第一次於危險地帶玩失波
以佢既quali
其實就算艾辛養傷都唔配做車仔正選
羅美奧計波底絕對在佢之上
如果保亞斯真係咁唔介意防中玩波
好應該俾多啲機會佢
佢地失第二球波又係捉虫
艾殊利高爾好少cut入中路就老馮以為所以側擊球員都同佢一樣
3個星期前俾禾確特偷完雞
今次又衰俾格連莊臣
一個路數明顯有問題既左閘仲算係世界頂級?
No way!
4) 天水圍飛馬對南華
高田壽典肯定係最佳球員
飛撲徐德帥既遠射非常精彩
最差球員就肯定係陳7
不過佢又似乎係最佳演員
南華於組織方面既表現
相對於上場對深水埗其實無咩改善
就算俾多半粒鐘佢地
輸1:3既機會肯定大過追平2:2
p.s.:
咸哥雖然唔係衰家
不過又食尾糊
但真正搶鏡既好似係當路雲
5 comments:
場波打得已經算好
一早已經話賴恩泰萊係計時炸彈
知道佢今季貢獻好多
不過都係果句
唔岩打就係唔岩打
唔怪佢十二碼果球
不過第二球明顯係無左腳累事
真係想用佢既
點解唔擺係右閘，用辛頓打左閘
反正森遜都只係普通料
開心既係賓艾化好似慢慢上力
一傳一射都差少少造成入球
To: 舒利亞
一早已經認定
如果紐記簽唔到其他好射手
排4-4-1-1陣式
用賓艾化去支援丹巴巴亞
係最好既選擇
不過紐記始終未為右邊搵到好人選
盧雲卡蘭斯高峰期已過
馬維拿斯波底唔差
不過睇落又真係幾玻璃腳
奧巴坦就肯定係失敗收購
至於艾美奧比細佬
佢同佢阿哥一樣咁勤力
不過資質似乎平平
其實比起大佬
細佬明顯波底好d
唔只琴晚果場
今季睇左幾場
佢都跑得加算有技術
甚至係好過奧巴坦
右中場唔知用賴恩泰萊得唔得
雖然佢真係太慢
To: 舒利亞
賴恩泰萊都有唸過
不過柏度似乎只將佢放於放線
因為紐記中場兵源多過後防
佢雖然冇速度
但當佢碧咸咁用
只係旨意佢於K角位斬腳靚波
真係有得唸
To: 舒利亞
唔記得講艾美奧比細佬
如果同大佬相比
佢既波底真係好啲
不過真係唔突出
但如果同潛質已經見底既奧巴坦相比
小弟都寧願柏度俾機會佢
Post a Comment