想講下英超......
曼城而家俾曼聯反超前8分
作客走樣一定係原因之一
某程度雖然同運氣有關
不過近5個月只係羸過昆士伯流浪,韋根同埋維拉3隊護級份子
就點都講唔通
而當中關鍵一定係文仙尼
既然球隊主場個勢咁勁
某啲時間其實可以俾個別主力抖下
偏偏文仙尼就用得佢地幾盡
結果主力用到賤既同時
後備亦雪到硬晒
埋下慢慢耗盡領先優勢既伏線
如果條友係NBA教練
勒邦占士又或者Kobe可能每場都要打足48分鐘
而更諷刺既係佢於作客賽事所選用既人腳
其實係略差於主場
而當曾經都承認睇左5分鐘就已經想換走巴洛迪利
條友偏偏繼續盡用佢契仔
俾你係曼城班友又或者係迪施高又會點唸
特別係條友近月已經唔止一次得罪自己既馬仔
當本身已經因為要頂住曼聯後上既壓力而幾乎抖唔到氣
再搞埋咁多內訌
等同搵個膠袋笠住自己個頭去跑步
冇小相公就以為自己識打牌
應碰唔碰又有得上都上錯
有成手好牌都係咁話
雖然講左咁多
主觀願望又堅想摩連奴下季去曼城
不過又唔好以為佢一定冇得撈
事關職場總有好多因為識氹老闆而保得住份工
甚至飛黃騰達既二打六
何況佢雖然唔識教波
但總算有轉移視線既秘技
幾個月前歐聯輸波後識得炮轟泰維斯唔肯出場
季尾為左保住份工
放棄埋契仔絕對唔奇
當然俾你係下任曼城領隊
如果唔係為左向難度挑戰既都應該會踢走巴神
所以契仔走人既機會其實仲大過契爺
另一方面,而家3至6名既變數仲大
兵工廠失分最少
近年又實在有太多於季尾爭第3或者第4既經驗
歐聯席位同埋季軍席位都應該最穩陣
而熱刺方面
佢地後勁不繼既情況更甚於曼城
原因可能係板凳唔夠深度
不過要注意既係上季要兼顧歐聯
同期表現都冇趺watt得咁誇
這方面既影響未必咁大
亦曾經有人認為係作客兵工廠嗰場慘敗既後遺症
不過一場慘敗既負面影響持續個幾月亦唔多 make sense
更可能既或者係哈利連納跳槽傳聞既負面影響
熱刺於卡比路劈炮後3日大炒紐記5:0
表面睇球隊唔受影響
不過其實計埋這場波在內
熱刺近10場聯賽既得勝率急降至3成
同頭23場14勝5和相差甚遠
唔知車仔今晚對富咸會唔會又和波
不過紐記已經率先追左上來
熱刺此刻既壓力肯定比前更大
之後仲要連對4隊護級球隊
就算得失球差仲有少少優勢
歐聯席位都係未許樂觀
紐卡素既賽程亦唔易捱
對車仔既6分波大戰仲要作客
不過紐記近日5連勝後氣勢十足
柏比ABC又好似個on fire既3分神射手咁入到唔識停
同埋佢地並無其他盃賽負擔
例如車仔就要比佢地踢多3至5場硬戰
所以就算班底最弱都有一定機會
不過話說回頭
以紐記既班底要兼顧歐聯或者歐霸都係 overload
偏偏艾殊利唔似會俾好多錢去擴軍
歐洲賽對紐記既正面影響可能只會係財政方面
車仔方面
迪馬堤奧接手後於所以賽事雖然10場羸8場
托利斯同埋魯爾梅利斯既表現雖然 sharp 左好多
不過整體表現其實只屬中上
反彈既最大動力亦似乎源於個別老嘢要 show quali 俾油王睇
但既然一直有風聲老闆又想換血
個別主力為左保住份工而繼續交貨都屬正路預測
不過講賽程原來車仔最大鑊
唔止多仲要超難踢
先後要作客兵工廠同埋利記
如果兩場波加埋失多過4分都幾大鑊
所以對紐記嗰場隨時重要過盃仔決賽
3 comments:
文先生已經開始推佢契仔去送死
唔係話契仔無錯
但係最錯就係佢自己
場場用巴神既係佢自己
攪到隊波士氣低落係佢自己
甚至成日由贏變和，由和變輸既都係佢自己
俾阿記禁住打，都可以唔作任何調動
既然冠軍已經幾乎無懸念
油王老細係時間諗下下季可以點做
開心紐記追到同熱刺同分
仲要壓住車仔兩分(又要多謝網主金口)
但係問心，小弟依然覺得歐聯機會唔大
呢幾場贏波
唔少都係輸形勢
況且以宜家班底
班主又唔似會攞錢增兵
兩線作戰真係攪唔掂
當然個心始終想隊波重返歐洲賽
或者先打歐霸會係合理要求
很久沒留言,今次會寫得較多,
可能會好悶的....
(1)小黑用打牌來形容文仙尼,都幾貼切,正^^
(2)紐記能否踢歐霸,
還望利記在足總盃要KO拖肥糖,
以助一臂之力,
(3)紐記雖然5連勝,
但近幾場既戰情都很沈悶,
只是柏比斯施斯腳風順,
好多好難射入既波都入到,
感覺是帶有幸運成份,
之前又排疑似3-5-2,4-5-1陣
仲試過用3防守,
又將古迪亞利斯改打左閘同防中,
又試過將丹巴巴亞踢邊,
進攻只靠卡比耶駁腳交俾賓艾化打反撃給柏比斯施斯去射波,
但感覺上一心只是想打反擊,
進攻組織都唔太順,
中後場只是人多,同埋算是專注,
可以任對手進攻,
今場對保頓終於有危機,
只係靠賓艾化打窒左對手,
之後要對曼城同車仔,
應該都會輸波,
(4)利記有少少似上年港伯,
奪取聯賽盃後
感覺上有些戰意鬆懈,
之前覺得佢地揀波踢,
而家就覺得佢地患得患失,
始終覺得牙擦蘇不應該做太多野,
界外球,角球,禁區造波,出波,射波,
甚至派牌都好似由佢一個包哂,
費拿根同舒爾非應該唔好再用咁多,
洛迪古斯是不是有傷?
點解唔用,
而家利記踢法真的要更加粗枝大葉,
之前咁貴買來的球員,
好多都似工兵型多一點,
好難配合原有利記的多樣化進攻組織,
睇而家杜格利殊教波,
感覺上有些似佢當年97-98年執教紐記時的19個月,
買人用人同打法都有些似,
當年用艾斯派拿同基斯巴亞等人一個人去進攻,
而家靠哂牙擦蘇,甚至比拿美,
我估佢都會留任至下季的,
如果利記取得雙料冠軍,
其實都算對球迷好有交代了,
起碼唔似紐記咁,
要踢次一級聯賽才可捧盃.
(5)估唔到今年熱刺,車仔,曼城,利記,兵工廠都唔穩定,
之前仲睇好熱刺同曼城,
而家雙雙陷入低潮,
(6)原來車仔既賽程咁難應付,
不過以佢既實力,
最低
限度點都有歐霸踢卦?
(7)今期keymansoho寫女仔在本地足球既貢獻同而家在球會擔任既角色,好睇,
小黑既讀者來信都已經是一個最最最詳盡既專頁,可自成一國,
其實你有冇犒費架?
To: 舒利亞 & sammysir
1)
只要熱刺做足本份
踢歐聯既機會始終高過紐記同埋爛車
2)
為人為己
利記一定食硬拖肥糖
不過而家要靠鍾斯守龍門
難免有啲唔放心
3)
其實今季既紐記踢法上有啲改變
有得控球在腳固然最好
不過亦唔介意縮後
引對手谷前再等機會打反擊
中後場個別球員雖然質素一般
不過守得尚算集中
加埋又有個好龍門
只係自史堤芬泰萊重傷後
中路好多時俾人睇死而成為被狂轟既重點
4)
利記聯賽唔掂唔係因為戰意鬆散
主因係杜sir既選擇冇化學作用
而利記近年條防線其實越來越差
好多時都係靠拉爾拿頂住
偏偏近3任領隊都執唔掂
今季既利記唔知點解成日
當然利記今季冇運
同埋班友擺明想搏盃仔
都係聯賽唔掂既部份原因
5)
同意蘇亞雷斯唔應該做太多嘢
而以本身當打人腳好多
個別位置其實唔使用太多新人
個別球員明顯唔係杜sir杯茶
明顯例子就有古治同埋麥斯洛迪古斯
唔係俾後者尋晚嗰兩球呃左
佢雖然都有一定出場機會
不過好多時都打唔足
6)
搵個有料既新領隊已經難
旨意老闆再放水俾新領隊換血就更難
倒不如俾多季時間杜sir再執下隊波
或者個別新血經過適應期後會交到貨
如果到時都仲交唔到貨
杜sir都無顏面又或者頂唔順壓力而下台
7)
費sir以前有句名言
大約意思係球隊有低潮好正常
羸聯賽既關鍵就係將低潮既過程縮短
曼聯唔止一次俾對手大炒
96至97年球季試過俾對手連炒3場
之後亦試過俾兵工廠又或者車仔數過蛋
不過嗰幾季最終羸聯賽冠軍既都係佢地
可見費sir唔係只係得把口
p.s.:
讀者來信係為所以讀者而設
並唔係小弟既專欄
而唔同之前寫追星又或者花邊新聞
寫comment係冇錢收架
sammysir咁好文筆
不妨寫封信俾Keyman同埋編輯西蒙
Post a Comment