2010-1-11 (1)

幾場波想講......

1) 西布朗對森林

森林應該係全英冠中場壓迫最快既球隊
繼紐卡素後
另一升班熱門西布朗亦中招
佢地俾森林迫到平時慣常簡單分兩邊都做得唔好
加上後防繼續積弱
有睇直播都會覺得佢地抵死

而布歷史托適當時候適當地點做適當既嘢
馬澤維斯基突出既個人技術
同埋索尼勤力既助攻
就令佢地羸得更有說服力

2) 阿仙奴對愛華頓

兵工廠衰太想羸搞到攻守嚴重失衡
下半場中段起兵工廠連一對中堅都一齊出擊
兩個工兵迪亞比以及丹尼臣又係掛住進攻
又冇人補位既情況下就被愛華頓3次機會長驅直進
最終有運執返1分都應該偷笑

話說回頭
迪亞比而家係兵工廠陣中最可靠既工兵
好彩丹尼臣可能火速康復幫輕佢

3) 伯明翰同曼聯

各踢半場好波卻反而失守
曼聯上半場羸中場因為中場踢5個有人數上既優勢
下半場主隊搶羸中場就因為球員體能上略佔甜頭
加上兩個箭頭輪流墮後幫手

4) 祖雲達斯對AC米蘭

A米搵碧咸替補柏圖後
實際陣式已經比較似 4-4-2
仍然適應緊意甲既迪亞高就咁俾碧咸以及3個意大利工兵封殺
祖記既攻力亦即刻癱瘓
阿馬利要等供應
而沙歷咸美迪錫就抽水多過踢波
而以佢地咁既防線
講得唔好聽一開波已經係等死
而輸第一球美路肉酸到胯下大漏
雲加睇到應該慶幸暑假忍手冇入貨

5) 特內里費對巴塞隆拿

多得祖記超唔似樣而有大把時間八掛埋西甲
睇戰果以為特內里費好屎
其實佢地上半場前半段有好多機會置巴塞於死地
不過通通都把握唔到後一失守就散晒

今場見既美斯其實唔使出晒十成功夫
佢頭兩個入球只係要走位埋門
舖橋搭路既功夫大把人同佢代勞
反映巴塞中前場部份球員既技術好全面

p.s.:
最想睇但未睇既一定包括馬里絕地反擊連追4球
以及多哥可唔可以如願重返非國盃戰場

2010-1-10

1)
多哥全體球員最終決定繼續參賽
多哥方面亦澄清後備龍門以及安哥拉籍巴士司機仍然在生
而死者就係助教兼新聞官
以及一名隨隊記者

而安哥拉一個分離主義組織就承認責任
仲話會繼續發動襲擊
不過非洲國家盃賽會就話比賽一定會如期舉行
佢地既職員亦對傳媒透露多哥係唯一一隊無通知賽會既球隊
暗示令佢地難以提供保護

2)
利物浦被傳準備向狼隊收購史迪亞文
這名22歲本土後衛可以踢右閘或者中堅

另一方面,陣中19歲年青射手艾卡斯頓被傳成為曼聯既挖角對象

3)
紐卡素球迷會再次被傳希望籌旗5000萬鎊
另加部份財團既支持
以從新買入球會

4)
費sir尋晚失分後批評卡頓保執法過嚴
可能令佢俾足總抽後算帳

而有傳聞佢老人家將於季尾換血
貝碧托夫,維迪,蘭尼,安達臣以及杜鍚都可能被踢走

5)
史篤城主席透露嘗試羅致雲佬

6)
消息指米堡撥款800萬鎊俾史特根增兵
報導話佢準備從些路迪挖走5名舊部屬
卡達維,基倫,巴利笠臣同埋愛爾蘭中場科特加埋大約值250萬鎊
不過400萬鎊未必可以打動佢地放走史葛麥當奴

另一方面,由於基斯保迪仲未肯續約
報導指格流應該肯以150萬鎊賤賣佢

7)
孫繼海落實自由轉會陝西

8)
拉素應該仲有主力會離隊
先有國米向佢地出價1000萬歐元收購列迪斯馬

而消息指薩拉迪不滿巴拿甸尼態度惡劣
如果收唔到道歉就會提出轉會

9)
安沙迪即將落實由魯賓卡山轉投曼城

而樸茅將卡保爾定價1400萬鎊
曼城係最有可能既買家

10)
消息指AC米蘭俾唔起3600萬鎊收購迪施高
而改為向巴勒莫斟酌卡雲尼
車路士就被傳乘機出價截劫迪施高

11)
雲加表示由於基格納至少值2000萬鎊
以阿仙奴現時唔夠財力收購佢

12)
奧雲高尼同保頓簽約至2013年
而助手史超活以及J.亨利都跟佢離隊
而保頓被指亦會將艾文達掛牌500萬鎊

般尼就落實只收到100萬鎊賠償
而忽然有傳聞指佢地可能搵加利仔接手

13)
祖雲達斯成為最新一間同柏仙尼扯上關係既球會

p.s.:
南華竟然想簽薛琦鉉同埋丹尼卡辛
仲話前者提出希望下季先加盟

疑點一當然係人哋咁既級數都肯加盟?
後者連英冠都睇唔上眼
紐卡素,唐卡士打以及昆士伯流浪向佢招手都唔成事

疑點二係人工
前者月薪150萬港元
而後者叫價高於南華既出價5成
不過早前向佢招手既昆士伯流浪有更大既水喉
人哋既老闆仲疊水過艾巴摩域治
羅先生點同人爭?

更得人驚既係明報話羅先生既另一人選係巴塞既後備前鋒
最有可能既人選係而家扭計唔肯續約既謝法倫
唔會係佢掛?

2010-1-9

1)
多哥既隊巴俾槍手襲擊
司機傷重死亡之餘
亦有多人受傷
不過唔包括名氣最大既艾迪巴約
消息指佢地考慮退出非國盃

2)
碧福特即將以200萬鎊轉投紐卡素

3)
利物浦以及熱刺再次被指爭奪梳格斯

4)
由於拖連奴,巴勒莫以及布雷西亞近日都有球迷搞事
消息指球員工會可能發起意甲以及意乙罷踢

5)
阿仙奴方面表示有信心同雲加續約
而教授暗示一旦辛達路斯離隊
可能會同蘇甘保簽約6個月作為替補

6)
肥安澄清冇斟酌柏仙尼以及伊亞昆達

7)
韋拉最終同曼城簽約6個月
8)
比耶,卡保奧以及美迪都被指係新特蘭既新後衛人選
當中國米亦有興趣向漢堡羅致後者

9)
格芬可能為左出場機會而由史篤城轉投雷丁
而後者既澳洲龍門費達歷斯忽然被指成為利物浦既200萬鎊增兵人選

10)
侯城準備借用曼城既卡斯度
而佢地表明唔會放走史堤芬亨打

11)
米堡將迪加迪外借去尼斯

12)
利維犘亞被熱刺外借去彼德堡直至季尾
佢上半季就被借到打呲郡

13)
諾域治教練林拔被指好可能接手般尼

14)
拉素既葡萄牙中場艾利素落實轉投薩拉戈薩

15)
早前同普雷斯頓解約既 A.Irvine 落實接手鍚週三

2010-1-8

1)
韋拉已去左曼城進行體測
雙方即將簽約18個月
週薪高達13萬鎊

2)
愛斯賓奴就被傳想向佢地借用辛達告魯斯

3)
薩拉迪既經理人爆料阿仙奴希望引入這名阿根廷射手
傳聞轉會費更高達4000萬歐元
而雲加考慮從克魯日引入科特迪瓦19歲射手 L.查奧爾
身高6呎6吋既佢身價約值400萬歐元

4)
奧林比亞高斯未來成功羅致班拿約
隨即改打尼亞拿既主意
不過佢既經理人已經表明佢唔會於1月離隊
消息指佢地將再次斟酌犘頓柏達臣

5)
樸茅球員尋日終於收到12月波糧
而比夏積被傳成為布力般流浪既新左閘人選

6)
車路士羅致柏仙尼失敗後
被傳改向祖雲達斯開價800萬鎊收購伊亞昆達
亦有可能用唔滿意出場機會少既馬路達交換

7)
紐卡素收購碧福特既價錢又有另一版本
消息指佢地兩次出價只係100萬鎊同埋125萬鎊
(難怪唔能夠打動列斯放人)
而佢地亦第n次被傳打算借用L.確特

另一方面,畢特暗示季尾可能掛靴

8)
巴塞亦被指有興趣同皇馬爭奪維迪
而佢地再次被指準備季尾出價4000萬鎊收購法比加斯
而耶耶托尼亦可以成為交易既一部份以扣起1000萬鎊
不過皇馬亦同時被傳打算用希古恩另加2500萬鎊搶人

9)
歐洲足協被傳將於2013-14年球季起
禁止有嚴重虧蝕既球隊參加歐洲賽

10)
幾段曼聯既新聞......

加利卡希爾,蘇保迪,基亞連尼以及卡積亞
都被指成為費sir替補維迪既人選
不過巴勒莫表示未收過任何球會對後者既斟酌
而巧合既係曼城對佢4個都好有興趣

隨住佢同迪甘斯關係好轉
馬賽方面放走賓艾化既機會唔大
由於早前佢既經理人曾經聯絡曼聯
馬賽為左令費sir死左條心而表明要4000萬鎊先肯放人

另外,馬捷達將被外借
落腳地應該不出博洛尼亞,紐卡素或者薩拉戈薩

另一方面,消息指朗尼將於下季起出任新隊長

11)
韋根未能成功借用射手史葛麥當奴
事緣些路迪只準備賣走佢
而佢地亦想收購加利卡特維
不過100萬鎊既出價唔足以打動些路迪放人

12)
被指成為里昂1月增兵對象既皮利斯向傳媒透露
佢比較大機會於季尾同維拉利爾約滿後離隊

13)
韋斯咸再次被傳借用梅度
而佢地亦準備同布力般流浪爭奪古莊臣

14)
利禾奴中場簡達華被指成為國米既增兵對象
而文仙尼就好可能以借用形式加盟馬賽到季尾

另一方面,捷禾將要提早收咧

15)
史浩克04可能將拉菲爾賣去禾堡
而古蘭爾就否認離隊

16)
丹尼卡辛早前表示唔會考慮加盟英冠球會
幾日後就決定加盟財力優厚既昆士伯流浪

佢地既下一個借用對象就係保頓既薜圖
但這名尼日利亞中堅可能因為加利麥臣俾人炒左而願意留隊

17)
前諾士郡領隊漢斯碧克落實接手紐約紅牛

18)
薩雷斯被指希望向巴塞借用基利臣

19)
干地因為劣績而向阿特蘭大請辭
球隊將由青年軍教練保拿仙拿暫時接手

20)
希杭宣佈米高馬迪拿(前譯米希爾)離隊加盟伯明翰
佢地既西班牙U-21國腳簡利拿亦被指成為韋根既新左閘人選

21)
麥利殊拒絕評論堅韋尼鍾斯既轉會傳聞
不過佢就承認由於未能同捷克球會 Kosice 達成轉會費協議
而決定放棄年青射手盧華克

22)
諾頓被傳可能以借用形式重返鍚菲聯

23)
狼隊視史堤芬亨打為300萬鎊既增兵對象

24)
維拉被指提出以卡維另加500萬鎊收購羅比堅尼

25)
拿玻里,烏甸尼斯,河床以及大學隊都想羅致28歲烏拉圭射手 S.施華

26)
彼德堡中場 P.Cottus 被指成為般尼既增兵對象

p.s.:
拖連奴球迷由於唔滿意球隊降落乙組之後依然冇好表現
尋日竟然當眾襲擊球員
本地波總班狗官應該慶幸處身文明既香港

2010-1-7 (2)

繼續講新聞......

1)
利物浦忽然同查馬克扯上關係
佢地被指想等到季尾免費引入這名同波爾多約滿既射手
而菲臘迪根就可能獲准免費轉會去史特加

另一方面,伯明翰加碼至1000萬鎊收購巴布
佢既經理人透露已有5至6間球會有興趣接收佢

2)
曼聯再次被指將於1月引入賓施馬
而卡迪夫城既威爾斯後衛阿當馬菲士亦同佢地扯上關係

另一方面,傳聞加利仔決定季尾掛靴

3)
白蘭斯,迪甘斯,保賀斯恩以及泰簡拿都被傳將於世界盃後取代杜明尼治

4)
杜格拉斯哥斯達以650萬歐元轉投薩克達

5)
摩連奴證實尋晚正選上陣既韋拉將會離隊

6)
奧林比亞高斯羅致班拿約失敗後
改為向布力般流浪出價180萬鎊收購摩頓柏達臣

另一方面,Big Sam 決定將兩名射手麥卡菲以及羅拔士掛牌
當中愛華頓可能會接收前者

7)
AC米蘭落實引入16歲加納中場艾賀達

8)
格蘭表示將會重召紐根特返樸茅
而般尼被指改打碧福特既主意
當時人尋日已經向列斯聯要求轉會

9)
賓特拿將於聽日見隊醫檢查傷患
如果證實佢唔可以於短期內復出
雲加將會收購新箭頭
而迪施高以及巴洛迪利就再次同阿仙奴扯上關係

10)
古迪'傷癒'後再次跟大隊操練
有報導指佢最終唔會因為早前同柏歷堅尼不和而離隊

11)
維路素以及古莊臣忽然同熱刺扯上關係
而韋斯活特就被傳成為哈利列納既新龍門人選
另一方面,富咸打向佢地收購奧哈拉

12)
國米被指想用文仙尼交換巴迪斯達

13)
狼隊被指將會從侯城羅致基賓尼
而佢地再次被傳打算從財困既打呲郡收購甘文斯

14)
伯明翰既增兵過程唔算太順利

新特蘭忽然向史浩克04開價350萬鎊截劫古蘭爾
消息指交易將於短期內完成
以便布魯士有更多時間踢走堅韋尼鍾斯
而巧合既係伯明翰被指可能接貨

伯明翰亦被傳有興趣引入麥基迪
不過消息指些路迪索價至少1000萬鎊

15)
史杜亞借用合約期滿後重返富咸
消息指打呲郡打算改向保頓借用亨打

16)
曼城被指文仙尼有1億鎊資金買人
基於捷禾頭蓋骨受創而要養傷一段時間
佢地被指可能改為出價1800萬鎊收購卡積亞

17)
基斯保迪再次同米堡扯上關係

p.s.:
1)
AC米蘭尋晚大炒熱那亞5:2
碧咸滿場飛之餘
仲同串演右閘既艾比迪輪流出擊
不過現階段唔好過份睇好佢地
事關熱那亞由12月起戰績插水
而後防輸兩球都係輸自己亦有隱憂

2)
中國連敍利亞都羸唔到
最終出到線都唔值得太高興

而香港對巴林輸0:4就唔意外
不過見佢地用咁既人腳
教練又臨時話感冒唔隨隊
仲波都唔練一課就上機
難免令小弟失望兼費解

3)
C7同埋英雄輝竟然做埋警訊嘉賓主持?!
特別係前者成個爛仔咁

搵佢哋不如搵黃金寶
點解當年又冇人唸到搵400萬

2010-1-7 (1)

尋晚從知道耶耶托尼當選科特迪瓦足球先生
到睇住費文尼於垃圾時間出場
小弟第一時間聯想到既都係雲加
唔知佢老人家嗰心有冇為搵唔到好防中而隱隱痛

近年阿仙奴未能稱霸英超
其中一個比較少人提起既原因係防中
小弟有時覺得雲加收購防中既迫切性更甚於箭頭

自韋拉以及比堤之後
雲加其實從未間斷搵新防中

基拔圖施華曾有好表現
但唔算長時期穩定
而佢近年 keep 到既只係耐力而唔係速度
就算佢繼續踢英超或者歐聯都唔慌有高水準表現
雲加因為只係選擇同佢續約一年而令佢決定離隊
其實唔太可惜

真正令小弟可惜既其實係費文尼
佢等足幾年先於06-07球季有機會上位
法比加斯因為有佢先可以繼續專心進攻
兵工廠近幾年既中場線以當季最勁

條友偏偏為錢而轉投AC米蘭
要知道意甲球隊中場重戰術以及陣式更甚於效率
令佢空有高效率都冇好大既發揮空間
加上AC米蘭既中場根本有好多防中
論資歷講波底佢都爭唔羸幾個意大利佬
AC米蘭貪佢零機價而高薪挖角
咁既轉會根本係三輸

而迪亞拉只係踢得幾個月就離隊
教授因為唔想阻年青人發展而放走佢
帳面賺幾個錢都補唔返冇好防中既損失

另一方面,雲加亦幾次無緣羅致頂級防中
先有艾辛
不過車仔頂爛市出價2400萬鎊
咁既價錢就算而家教授都未必考慮
何況係05年

而柏拉斯奧斯試腳既表現好好
不過當時教授居然認為球隊冇位置俾佢
索性介紹件荀貨俾當時執教伯明翰既布魯士
之後既事就唔使再多講
都唔知應該話佢老人家大方定係笨賓

但最激心既都係 miss 左耶耶托尼
唔係話教授阻住人哋兄弟重逢唔岩
而係佢今次計數計得太盡唔肯俾300萬鎊新星價
結果眼白白睇住人地加盟摩納哥
之後既嘢又係唔使多講

近年半以來兵工廠亦先後同多名防中扯上關係
人選包括辛拿,沙比艾朗素以及美路等名牌
當中傳聞韋拉回歸仲令小弟超驚喜
不過全部都係冇米粥

球隊近年只好倚靠迪亞比以及桑治
兩位年青人勤力有餘
前者仲勤力到暑假請私人體能教練同自己加操
但講表現始終唔係好 sharp
唯有寄望佢地之後可以好似費文尼咁忽然爆發
以醫好教授近年多次未能羅致好防中既心病

2010-1-6

1)
幾段利物浦既增兵消息......

伯明翰想羅致巴布既報導原來係堅料
不過賓尼迪斯嫌900萬鎊既出價遠低於佢預期既1200萬鎊
所以已經即時拒絕

但同時間有報導指巴布以及尼亞拿
都有可能成為利記羅致麥斯洛迪古斯既籌碼
這名阿根廷右翼既經理人透露交易形式可能會係買斷

而賓帥早前放風想引入希斯基
不過以奧尼爾同賓帥既關係
維拉唔會放球員俾利記
加上傳聞車仔頂爛市出價500萬鎊搶人
令利記成功羅致大隻妙既希望更低

賓帥同時為後防增兵
報導指佢地準備出價800萬鎊收購厄遜

另一方面,杜辛拿以及禾路連落實轉投拿玻里以及莫斯科戴拿模
轉會費分別係400萬鎊以及200萬鎊
不過奧林比亞高斯對班拿約500萬鎊既出價就被拒絕

2)
貝加宣佈因傷掛靴

3)
韋斯咸既卡頓高爾以及迪亞文迪
被指成為阿仙奴同埋AC米蘭既羅致對象
消息指佢地打算除左借用紐奴高美斯之外
亦準備從維拉回購季尾約滿既希活

另外,一旦厄遜離隊
桔仔幫被傳可能搵侯夫作為替補

另一方面,馬來西亞富商 T.費蘭迪斯即將入主佢地
令佢地有望解財政困難

4)
雲加承認梅里達拒絕續新約
但就表示唔知佢同馬體會方面搞成點
而消息指雲加準備為加拿斯破例提供一份兩年或以上既合約

另外,愛葷頓再次被指想向佢地收購辛達路斯
另一方面,法比加斯將延遲至2月頭復出

5)
奧雲高尼將帶同副手史超活加盟保頓
不過般尼要求360萬鎊賠償同保頓既100萬鎊預算就仍然有好大差距
而保頓為左俾奧雲高尼有錢增兵
不惜肯將加利卡希爾以1500萬鎊出售
報導指曼聯同埋曼城都有興趣接貨

6)
施仙奴可能轉投聖保羅以尋求更多出場機會

7)
曼城破英國足球史紀錄一年蝕左9260萬鎊
不過佢地依然大把銀紙買人
只係增兵接連遇到阻礙......

先有韋拉表示亦考慮轉投里昂
(巴塞方面就否認接收佢)
而華朗亦拒絕曼城提供700萬鎊既1年合約
(同時間大學隊亦會收到700萬鎊轉會費)
捷禾亦透過經理人表明唔會於1月離隊

另一方面,佢地準備以5萬鎊週薪既新合約同祖赫特續約
之後下季仍會繼續將佢外借

8)
AC米蘭被指打算向摩納哥出價800萬鎊收購右閘蒙干古

9)
巴塞同國米以及祖雲達斯爭奪阿根廷12歲新星華達拿

10)
維迪否認同費sir不和
而足總決定唔就費sir日前再插球証一事抽後算帳

另一方面,近日同曼聯扯上關係既侯克
表示唔想季中轉環境影響佢入選決賽週名單而肯定唔會於1月離隊

11)
鬧後衛荒既西維爾從森多利亞借用立陶宛後衛史坦基域斯
而佢地將捷雲頓借去阿特蘭大

12)
拜仁為左利誘列貝利續約
全隊只有佢一個唔使減薪之餘
仲可以加人工

13)
保拉路斯被指可能轉投薩拉戈薩

14)
基達菲落實從華倫西亞羅致米古
佢地隨即將這名24歲委內瑞拉射手外借馬拉加半季

15)
樸茅仲未出到12份波糧俾球員
不過其他職員已經收到人工

而由於樸茅被禁止註冊新球員
同佢地借用合約於1月中到期既奧哈拉將被迫重返熱刺

16)
拿玻里被指想向法林明高收購21歲中堅蘇沙
以及阿祖安奴既優先購買權

17)
柏度文迪斯被指將回流葡超,加盟士砵亭

18)
馬體會落實借用迪亞高文迪斯到季尾
而佢地可能未能成功借用賓特尼
事緣維拉以及新特蘭都被指願意以1000萬鎊接貨

19)
韋根落實將趙元希外借去水原藍翼
而一旦費古羅亞離隊
佢地被指向紐卡素收購荷西安歷基作為替補

20)
侯頓被傳成為史篤城既新右閘人選

21)
艾度最終落實被外借到 Aris FC 年半
這間希臘球會更有權收購佢

22)
熱那亞被傳想各車路士借用阿歷士

23)
史特根被指想搵舊部屬雲尼古去米堡踢半季

24)
戴倫費格遜接手普雷斯頓

25)
紐卡素再次被指準備出價200萬鎊引入基隆加

26)
科特迪瓦教練公開投訴車路士用殘晒杜奧巴
而耶耶托尼當選科特迪瓦足球先生

27)
奧尼爾表態唔會俾戴夫以借用形式離隊

p.s.:
中國足協好騎呢咁改例偏幫參加亞冠既球隊
雖然話國內比賽外援出場人數冇變
不過佢地可以比其他球隊註冊更多外援已係唔公平
更荒謬既係如果聯賽同分
亞冠球隊可以有較高排名
怕且最終只會做成聯賽兩極化

2010-1-5

1)
舒利亞被指可能接手錫週三
報導仲話佢已經搵定史必做佢副手
不過舒利亞隨即否認有關報導

2)
雖然祖雲達斯方面一直死撐唔會炒費拉拿
不過佢既帥位應該唔保得幾耐
事緣佢竟然要靠傳媒先知道一名年青球員被外借到卡利亞里

另一方面,迪亞高同埋迪比亞路於操練嘈交

3)
賓特尼可能被外借去馬體會
佢地希望先借用半季再決定係唔係買斷佢
而熱刺希望佢地回禮外借麥斯洛迪古斯
不過這名阿根廷右翼不惜減人工轉投利物浦
消息指佢將於短期內落實加盟

4)
利物浦亦被傳可能出價300萬鎊收購卡維
而一旦里昂決定唔再借用比基安尼俾樸茅
利記可能以借用形式羅致佢

另一方面,杜辛拿可能於短期內轉投拿玻里或者祖雲達斯
而巴布就忽然被指成為伯明翰既增兵對象

5)
諾士郡3個月內第二度被申請破產

6)
車路士被指打算出價2200萬鎊收購柏仙尼
報導指車仔願意隨即將佢外借返森多利亞
等到下季先正式加盟

7)
由於最近冇太公波
卡比路決定星期四接受手術治療膝傷

8)
費sir決定下場對曼城既聯賽盃賽事更換7個球員
不過被指玩嘢聲稱熱身受傷既維迪就會繼續被雪藏
而報導指皇馬已準備於1月羅致佢

另外,費sir由於再次因為補時問題而投訴球証
足總好可能將早前兩場緩刑正式執行

另一方面,杜尼由於於羅馬苦無出場機會
所以未指可能索性轉投曼聯

9)
消息指般尼已同保頓傾好奧雲高尼轉投既補償
而價錢亦比之前400萬鎊既版本低
而由於佢地仲有細節未解決
所以仍未有具體公布

10)
蘇蘭奴可能轉戰英甲
由高魯大學轉投高車士打

11)
紐卡素發表聲明話而家有幾間球會想羅致謝列美
暗示係土耳其球會單方面宣佈佢加盟既消息

12)
曼城同韋拉,蘇保迪,卡積亞以及摩西斯扯上關係
當中韋拉被傳踢完下場意甲就會飛去曼城報到
曼城會先借用佢半季以決定係唔係季尾買斷佢

而蘇保迪既經理人就話從未收過曼城既 offer
不過巴勒莫就證實曼城對卡積亞有一定興趣

13)
艾利亞被指成為幾間英超球會既增兵對象
不過漢堡已表明唔會放人

14)
路斯基落實同阿仙奴續約
而兵工廠可能借用亨特拉爾失敗
事緣AC米蘭被指打算用佢另加2500萬歐元向禾堡收購迪施高

另一方面,西班牙傳媒指梅里達嫌出場機會少而決定季尾約滿離隊
報導指佢將同馬體會簽約5年

15)
皇馬成為最新一間同高洛哥夫扯上關係既球會

16)
葉士域治再次被指想向熱刺借用杜斯山度士

17)
摩連拿路最終決定改投史特加

18)
周海濱回流中超,加盟山東魯能

19)
雖然巴塞近日先後同維路素以及阿費利扯上關係
不過哥迪奧拿依然強調佢地唔會增兵
只會提升幾名青年軍

另一方面,哥迪奧拿既老豆向傳媒透露佢個仔將於季尾離隊
以爭取時間休息

20)
些路迪落實從史篤城借用戴夫傑臣

21)
消息指列斯已經拒絕紐卡素對碧福特120萬鎊既出價
已有報導指紐記早前曾提出借用侯頓
不過已被熱刺拒絕
這名蘇格蘭右閘近日一直同新特蘭以及愛華頓扯上關係

22)
國米再次被指有興趣羅致法比加斯

23)
費路卡利最終落實轉投拉素

24)
布魯士再次被指打算踢走堅韋尼鍾斯以及安頓費甸南
早前有報導指佢兩個曾被視為羅致賓特尼既籌碼

而新特蘭亦再次被傳有興趣從高雲地利引入韋斯活特

25)
米堡決定唔會於1月賣走阿當莊臣

26)
土耳其足總視曉士為新教練既最新人選
報導仲話決定搵杜基幫手遊說佢

27)
卡迪夫城被指想向維拉借用戴夫

28)
真高拿轉戰法丙,加盟康城

29)
韋斯咸以及保頓都被指希望借用紐奴高美斯

30)
列貝利因為腳甲倒生而要延遲復出

31)
錫耶納落實從拉素借用中堅巴施巴利到季尾

p.s.:
竟然有人提議奧雲靠風水轉運
以助佢重返英格蘭去南非踢決賽週......

2010-1-4 (2)

1)
賓尼迪斯暗示由於皇馬唔肯分擔部份雲佬高昂既人工而冇能力借用佢
不過消息指麥斯洛迪古斯將於短期內加盟
不過交易形式未明
而希斯基亦有一定機會過檔

2)
曼聯被指準備透過銀行發行6億鎊債券
而佢地被指有興趣向哈代柏林出價1000萬鎊收購塞爾維亞中場 G.Kacar

3)
魯賓卡山新晉阿根廷國腳安沙迪被指成為曼城600萬鎊新左閘人選
而梳格斯亦被指成為佢地既新中堅人選

另一方面,佢地已經拒絕伯明翰買斷祖赫特既要求

4)
里昂方面唔排除羅致韋拉以及皮利斯
而佢地亦同聖伊天右閘M.達保扯上關係

5)
英格蘭足總否認鶴臣係下任教練

6)
祖雲達斯發表聲明否認搵軒迪克接手
而俄羅斯足總亦表示這名荷蘭教練現時去左肯雅度假
仲話佢冇同祖記有任何接觸
同時亦有報導指佢同埋查伯東尼成為土耳其足總既新教練人選

7)
祖雲達斯再次同G.迪阿哥斯天尼扯上關係
而迪亞高文迪斯就將會加盟馬體會

8)
意大利傳媒指國米以及拉素準備亙換球員
前者用大衛辛頓既一半擁有權以及兩名年青球員
同後者交換哥拉洛夫既一半擁有權
不過大衛辛頓既經理人隨即否認有關報導

另一方面,費路卡利由於唔肯減人工
令佢以借用形式加盟拉素一事出現變數

9)
紐卡素俾謝列美以自由身轉投土耳其球會 Ankaragucu
雙方簽約年半

10)
基斯保迪可能轉戰法甲,加盟索察

11)
般尼表示如果奧雲高尼接手保頓
佢地會要求400萬鎊賠償

12)
早前有醜聞指一名英超領隊公然嫖妓
而家最新版本係佢因為俾人成功偷拍而面臨被勒索

13)
史浩克04從拜仁同埋水原三星羅致本土中場鮑祖漢以及巴西射手伊度

14)
鍚耶納有興趣從河床引入阿後衛P.費拉利

15)
費倫天拿落實從烏甸尼斯借用菲臘比達貝路
而士砵亭亦同意佢地對維路素既1100萬鎊出價

16)
莫耶斯否認俾禾漢外借到打呲郡

17)
巴塞以及西維爾都被指有興趣從羅馬引入右閘馬高莫達

18)
伯明翰被指可能出價800萬鎊向韋根收購洛達列加
李斯特城射手法耶特就被指成為後者300萬鎊既替補對象

19)
艾度透露侯城以及希臘球會 Aris Thessalonica 都有興趣於1月羅致佢
佢現時被賓菲加外借到比蘭倫斯

20)
辛尼特被指有興趣從加拉塔沙雷收購基維爾

21)
AC米蘭被指考慮引入雲布頓

22)
消息指波圖考慮以2000萬鎊出售侯克
曼聯,阿仙奴以及熱刺都先後同這名巴西射手扯上關係
費sir被指視佢為朗尼既替補

23)
托迪透露將於4月考慮仲有冇能力復出國家隊

24)
皇馬被指將於8月8 號於北京踢表演賽

25)
古莊臣可能回流英超
加盟布力般流浪

26)
盧卡利尼可能由利禾奴重返帕爾瑪

2010-1-4 (1)

想講 Big 4 踢足總盃......

冇得睇車仔
不過抽到上上籤主場對內憂嚴重既屈福特
羸5:0唔算誇張

而曼聯地頭俾表現如狼似虎既仇家列斯攞彩
大抵費 sir 唔好彩之餘亦有抵死既地方
唔好彩當然係維迪熱身受傷(玩嘢?!)
而替補既布朗又爆鑊

不過抵死既係中場線幾乎全部都係二線兵
最有級數既安達臣今季雪到硬晒
單靠吉遜做唔到幾多截擊
韋碧克墮後亦唔多幫到手
而前線繼續用 hea 碧而忽視奧雲又係莫名奇妙
前者根本因為膝傷而唔係 top fit
朗尼一個救全家又可以救到幾多次

而費sir就算換人都慢幾拍
而奧雲入場後唔入局既表現反映佢根本雪到硬晒
佢出場機會比當年既蘇斯克查少得多
又邊可能 keep 到埋門觸覺做後備殺手
費 sir 捉虫之餘亦隨時斷送人地4度踢決賽週既美夢

而阿仙奴可以反勝韋斯咸
全因雲加知錯能改
事關佢最初既排陣犯左兩個錯誤

一係唔明佢老人家據咩決定箭頭既位置
之前已經頻頻用賓特拿打右邊
今場就用卡路士韋拿打正箭頭
佢有速度但論埋門觸覺以及把握都唔及伊度亞度
反而巴西仔就要踢左邊支援佢

二係艾朗藍斯為左遷就梅里達而分擔左好多防守工作
更甚既係佢有時企位仲後過桑治
參與進攻既機會亦較少

下半場教授先要兩個箭頭換位
再於中段以迪亞比入替梅里達
解放艾朗艾朗藍斯既進攻能力
而兩個入波分別都同調動入關就係佢老人家撥亂反正既最佳回報

場波另外有兩個球員特別吸引小弟注意
一係比哈美
唔講唔知佢以前其實係專攻800米跑
今場佢移入中路代替養傷既柏加絕對稱職
梅里達冇貨交明顯係受制於佢同埋高華

二係每次出場都係全場最廢既豬達
尋晚迪亞文迪擺明當佢冇到
連左路既史坦尼拿斯都試過去搵佢著數
難為佢賽前同記者透露佢改變初衷想續約
仲話唔介意只係有得踢盃仔
兵工廠球迷真係要自求多福

最後想講既係利記
佢地最出力踢足總盃唔係賓帥最重視隻盃
只係佢地最唔夠人用
偏偏咁強人腳作客都只係好難睇咁逼和英冠護級份子雷丁
攻守繼續唔對板
後備落場既阿古蘭尼又忽然失準
以現時人腳繼續捱落去真係唔係辦法

唯有寄望麥斯洛迪古斯只係增兵成功既開始
之後就算冇雲佬都唔該多個希斯基
最完美當然係搵埋好後衛兼掃走幾件次貨

2010-1-3

近幾日既新聞......

1)
利記被指準備簽西甲班兵
佢地先被指準備以先借後買既形式引入麥斯洛迪古斯
亦再次同雲達華治以及雲佬扯上關係
不過皇馬唔肯分擔後者既部份人工就成為轉會障礙

另一方面,巴布拒絕費倫天拿既斟酌
因為佢表明只希望踢荷甲或者英超
而禾路連就好有機會以借用形式重返哈化柏林

2)
樸茅方面表示下星期會借到錢去補發球員12月既人工
不過佢就指球會老闆搵貸款既進展唔多順利

而樸茅可能將奇雲保定賣去布力般流浪套現400萬鎊
而消息指佢地亦向曼城推銷卡保爾

3)
俄羅斯傳媒指祖雲達斯開價1000萬歐元年薪利誘軒迪克接手

4)
馬達拉斯可能轉投彭拿典奈高斯以爭取出場機會

5)
拜仁落實將東尼外借到羅馬既同時
紐倫堡亦向佢地借用奧圖以及比連奴

6)
消息指阿古路玩嘢話要留隊
令車路士可能改為斟酌韋拿
報導指車路士準備出價4000萬鎊
兼為佢提供一份年薪超過1000萬鎊既合約

另一方面,馬路達暗示可能為左出場機會而離隊

7)
同時另有施積可能以800萬歐元加盟史浩克04
華倫西亞就可能接收柏夫奴真高作為替補

另一方面,早前講過米基爾好可能離隊
有消息指北京國安竟然向佢招手

8)
阿仙奴成功從富明尼斯羅致17歲巴西射手威靈頓
佢地亦同迪亞比續約

另一方面,有報導指由於雲加好有把握成功羅致查馬克
所以會等到佢季尾約滿先再向佢招手

9)
列貝利既經理人透露這名法國國腳一定唔會同拜仁續約
令佢既離隊只係時間上既問題
而有報導指拜仁仲拖欠皇馬引入洛賓既2500萬歐元轉會費
令皇馬而家有更大機會收購佢

皇馬亦被指打算於季尾出價6000萬鎊收購朗尼

10)
前阿仙奴以及富咸既德國右閘禾斯可能加盟史浩克04

11)
薩拉戈薩想向巴塞隆拿借用基利臣

12)
麥連落賓由史特加轉投蘇黎世

13)
辛尼特考慮引入柏夫奴真高或者洛基
而比基透過經理人否認轉投佢地

14)
紐卡素以及唐卡士打都被指有興趣借用古辛
不過佢透過經理人表示佢冇打算離開侯城去加盟英冠球會

15)
路亞路亞以借用形式由阿拉比重返奧林比亞高斯

16)
沙治奧辛捷士因為心臟問題而要暫時停操

17)
巴里既邦路斯亦被指係曼城既新後衛人選
而卡斯度就可能被外借去侯城

18)
杜維好可能接手雷丁

19)
卡普即將以借用形式離隊以爭取出場機會
佢既下一站可能係熱那亞,阿特蘭大或者布羅尼

20)
本田圭佑落實以900萬歐元轉投莫斯科中央陸軍

21)
維路素被指成為費倫天拿1000萬歐元增兵對象

22)
幾段熱刺既消息......

佢地同意以900萬鎊從國際體育會引入巴西中場辛祖
而家只係等緊勞工部批出工作證

而隨住哈利列納否認會引入占士以及厄遜
佢地就被傳出價1200萬鎊收購米卡李察士
不過樸茅就表明唔會出售比高域俾佢地

另一方面,侯頓就好可能以400萬鎊既價錢加盟新特蘭

23)
祖奧由於私自離隊返巴西度假而被愛華頓罰停賽
佢早前被指可能回流莫斯科中央陸軍

24)
雖然奧尼爾表示唔會理會希斯基離隊既傳聞
不過依然再有報導指維拉會接收比亞堤作為替補

25)
些路迪成為最新一間同麥卡菲扯上關係既球會

26)
彼德堡射手麥連被指成為伯明翰300萬鎊既增兵對象
而消息指佢地將於短期內從希杭以300萬歐元引入中場米希爾

27)
馬體會落實從祖雲達斯借用摩連拿路

p.s.:
對手唔係強都唔可以省港盃四連霸
錯一定唔係搏到尾既球員
成也阿古沙,敗也阿古沙亦只係部份原因

最錯一定係本地波腫
明知要應付3場太公波都可以安排本地波照踢
羅氏夫婦當然樂得有借口收起好多主力唔踢豬頭骨比賽
(咁亦自然會引起其他球會不滿)
而足腫夠膽死只安排5課操練亦兒嬉得可憐

2009-12-31 (2)

1)
幾段利物浦既消息......

利記方面證實格連莊臣右膝韌帶撕裂
但仲未知要抖幾耐
養傷期可能長達3個月
就算最少亦要6星期

而謝拉特被傳成為國米5000萬歐元既增兵對象

利記亦再次被傳將會借用雲佬半季
不過人工就成為轉會障礙

另一方面,利物浦市委會預期利記最快可於4月興建新球場

2)
保頓決定解僱加利麥臣
曉士,祖維爾,奧雲高尼以及戴倫費格遜都先後同佢地扯上關係
不過前3者已經表明唔會接手

3)
柏夫奴真高公開炮轟哈利列納
而佢既經理人透露有3間球會想於1月收購佢

4)
哥度巴已向國米提出離隊要求
曼城將以500萬歐元收購佢

5)
土耳其兩隊班霸比錫達斯以及加拉塔沙雷都有興趣引入古迪
不過當時人表明希望轉戰英超
但未知麥臣離任會唔會影響佢既加盟機會

6)
祖雲達斯即將以500萬歐元從拉素引入列迪斯馬
雙方簽約3年半

而祖記既新右閘人選拉菲爾未有如期於聖誕假期後向史浩克04報到
仲表明要1月離隊

另一方面,沙地球會伊蒂哈德有意羅致查斯古特

7)
加納足總艾辛既傷患而俾佢延期歸隊

8)
沙洛加入聖伊天
出任教練加迪爾既副手

9)
熱那亞準備以400萬鎊既價錢從波爾多收購文歷加素

10)
愛華頓打算以借用形式羅致雷耶斯
而佢地準備外借禾漢去打呲郡

11)
同皇馬季尾約滿既梅斯達決定留隊
而唔返德甲落班亦意味好可能冇份踢世界盃

12)
卡比路透露里奧費甸南可於1月中復出

13)
阿仙奴再次被傳有興趣引入比拿美

14)
繼續增兵既賓菲加從明尼路引入24歲巴西射手艾達路易斯

15)
麥卡菲以及古蘭爾都再次同伯明翰扯上關係
當中前者向傳媒透露離隊原因係覺得 Big Sam 以及球迷都針對佢
而佢地亦準備同狼隊爭奪維拉中場加特拿

另一方面,米堡就希望向佢地續借M.賓特

16)
鶴臣同富咸延長合約1年
而消息指佢將會得到1000萬鎊增兵資金

17)
弗賴堡從梅斯以130萬歐元引入塞內加爾射手柏比斯施斯

18)
米基爾打算於1月離開華倫西亞以尋求出場機會

19)
般尼被傳以100萬鎊從羅連安特引入阿爾及利亞中場曼蘇里

20)
稻本潤一由於於南特欠缺出場機會
所以準備回流 J-League

21)
馬賽被指當年非法斟酌列貝利
國際仲裁法庭邀請當時人1月作供

p.s.:
1)
車仔公佈09年財政報告
當中油王用自己錢為佢地還清3億4000萬鎊街數

相反樸茅就苦命得多
由於佢地欠稅以及冇供國民保險
英國當局向法庭申請清盤令

如果佢地唔能夠於2月頭聆訊展開前籌旗
可能會成為首間宣佈破產兼被接管既英超球會

而唔知係唔係因為球隊咁大鑊兼連續3個月拖糧
尋晚佢地既主場表現係格蘭接手以來最屎既一場
好難想像佢地之前連炒般尼以及利記
唔計輸壞第一球冤枉波
其餘3球有兩球都係輸盯人唔緊

不過小弟都唔會否認迪亞比既表現好搶鏡
而作為法比加斯替工既艾朗藍斯亦表現稱職

2)
鬼佬新年快樂!

2009-12-31 (1)

近日各地傳媒都選好多所謂既十年最佳陣容
不過小弟覺得 time gap 可能令部份好波之人冇得入選
近兩年踢到曉飛既美斯就係好例子
儘管小弟打死都唔信美斯下個十年冇得入選
所以小弟都係傾向每年或者每季唸一次類似既陣容

09年最佳陣容(4-3-3陣式):
卡斯拿斯,丹尼爾艾維斯,佩奧爾,維迪,艾殊利高爾,
沙維,艾辛,恩尼斯達,
美斯,杜奧巴,C7

p.s.:
講真維迪09年既整體表現比08年下半年退步
而就算今季上半季英超最佳兩個中堅都唔輪到佢
選佢只係考慮埋佢09年頭幾個月既表現
亦可見好中堅難求

今季英超上半季最佳陣容(4-2-2-2陣式):
基雲,格連莊臣,鄧尼,華美倫,艾殊利高爾
艾辛,柏拉斯奧斯,法比加斯,傑斯
杜奧巴,朗尼

p.s.:
泰利同埋維迪只係羸名氣
不過計表現唔及鄧尼以及華美倫咁搶
決心爭氣既前者踢出繼05-06年後既最高水準
而後者雖然近況回落
不過季初多次助攻得手加上出色既搶點已經足以入選

2009-12-30 (2)

1)
利物浦被傳又多兩名增兵人選
分別係艾達杜倫以及米列夫斯基
報導指利記打算向加拉塔沙雷出價1000萬鎊收購前者
而現時效力基輔戴拿模既後者就係烏克蘭最出色既新人
曼城亦對這名身價高達1200萬歐元既射手有一定興趣

另一方面,杜辛拿表態希望轉投羅馬
而佢被指成為辛尼特既增兵對象

2)
傳聞軒迪克已同祖雲達斯達成協議
將於短期內取代費拉利

3)
由於雲達沙既老婆腦出血
費sir准佢無限期請事假照顧老婆以及一對仔女
更有消息指佢考慮1月即刻從里昂引入洛里斯作為替補

另一方面,有報導指維迪唔滿意曼聯早前向般奴艾維斯招手
覺得球會唔信任佢而有離心
加上佢老婆唔鍾意英國既生活
一早就令佢離隊既傳聞傳得幾熱

而家再有報導指曼聯原來仲未同佢傾續約
原因係曼聯考慮接受皇馬既3000萬鎊天價
亦有分析指曼聯其實視般奴艾維斯戚維迪既替代品
而勢必季尾離開巴勒莫既卡積亞亦被指係費sir既考慮人選

4)
賓菲加成功從法林明高引入19歲巴西中場艾頓
不過佢地就面對列強挖角
既有曼聯加碼以1000萬鎊再加上蘭尼去收購迪馬利亞
亦有皇馬向佢地既後衛大衛雷斯招手

5)
莫斯科中央陸軍被傳打算向曼城以1100萬鎊回購祖奧

6)
士砵亭成為最新一間同柏夫奴真高扯上關係既球會
而佢地決定外借塞爾維亞龍門 V.史杜高域到韋根至季尾

7)
本田圭佑即將落實以900萬歐元轉投莫斯科中央陸軍

8)
羅馬可能將年青射手奧卡卡外借到富咸吸收經驗

9)
波爾多表明唔會於1月放走查馬克
報導指兵工廠可能改為羅致基格納
而法比加斯就再次被傳將於季尾離隊

10)
國米從拉素接收彭迪夫後
將蘇亞素外借到熱那亞
令佢地願意俾費路卡利以借用形式加盟拉素
算係還返個人情俾拉素

另一方面,阿拿奧杜域被指可能成為收購高拉洛夫既籌碼
不過佢既經理人已經作出否認

11)
波歷克可能延遲掛靴而同車路士續約兩年

另外,報導指車仔同阿古路傾唔掂人工而擱置收購
而柏仙尼就再次被指將以2500萬歐元上車

12)
史卡朗尼否認返祖家加盟紐維爾舊生隊既報導

13)
菲臘斯被指成為米堡既增兵對象

14)
韋斯咸方面否認接收梅度
而史篤城以及熱刺就繼利物浦後同柏加扯上關係

15)
拉科既菲臘路爾斯被指成為皇馬既另一新後衛人選

另一方面,早前有報導指曼城油王老闆想出價11億鎊收購
不過佩雷斯表明唔會出售球會

16)
哈化柏林再次面對防線被挖角既難題
禾堡被指準備出價1200萬鎊引入22歲塞爾維亞中後場球員哥高加卡

17)
樸迪路被奧沙辛拿放棄後
落實轉戰西乙,加盟靴高斯

18)
辛尼特忽然被指有興趣引入哥治

而雖然占士表態希望轉投熱刺
不過有報導指哈利列納既真正目標其實係占士既副手比高域

19)
內地傳媒報導成都謝菲聯既教練張偉哲因涉嫌打假波被捕
而球會既董事長以及副總經理之前亦分別被捕

20)
燕豪芬一如外界所料唔同周海濱續約

21)
普雷斯頓決定同領隊 A.Irvine 終止合約

22)
韋根以及樸茅都被指有興趣從些路迪引入史葛麥當奴

23)
消息指尼科西亞考慮搵前博洛尼亞教練阿拉干尼接手

24)
卡森李察士表示唔會離開費倫巴治

25)
西布朗成為最新一間同摩西斯扯上關係既球會

2009-12-30 (1)

想講近兩晚既英國波......

紐記倒水咁倒連續兩場失兩分俾護級球隊
偏偏利記連續兩場發揮一般就袋晒6分
真係估佢地唔到

先講紐記
再次失分既原因一定包括好冇運咁兩次中楣
不過曉頓亦要負上一定責任

針對對手冇晒正選左右閘
紐記比平時更重點側擊係正確既戰術思路
不過如果用頭槌較好既艾美奧比取代盧雲卡蘭斯踢正選會更上算
曉頓應該唔想將傷癒既老味用得太盡
不過小弟寧願速戰速決後先俾佢休息

而紐記上半場多次機會都把握唔到亦係唔抵爭
下風波死守好多時都係靠士氣
一旦失守就會即刻散晒
遲遲開唔到紀錄根本早就埋左失分伏線
而下半場尼祖哥洛夫針對性封死兩邊就令紐記更加難入波

不過亦再次睇到曉頓既臨場調動仲未夠班
既然咬唔入對手
點解唔索性收起一隻閘而踢多個古費里
而彭卡迪入替既應該係助攻仍然不足既森遜
而唔係可以轉踢右閘兼擅長斬波既賴恩泰萊

利記方面
尋晚只有古治代替奧拿里奧
幾乎原陣出擊意味賓帥準備等到足總盃先俾主力休息
不過部份球員明顯有疲態
當中最明顯係格連莊臣以及班拿約
後者下半場部份時間仲好似隱左形
謝拉特全場亦只得一腳靚波
太陽能電筒古治既表現當然亦暗淡無光
整體表現只係一般

維拉既表現就有好轉
冇左艾殊利楊格以及比利記抖少一日都仍然俾到利記一定麻煩
反映利記既防線持續不穩
利記最終唔使失波應該多謝全隊最好狀態既拉爾拿

利記接連冇表現都袋足6分
連同只係連嬴護級部隊既曼城
快車檔期賺到既或多或少包括埋比賽信心
維拉就由小弟寫 preview 既時候已經唔睇好佢地入前4,甚至前6
畢竟兵源不足以及跑狗踢法係佢地再進一步既障礙

想講既其實仲有車路士以及史篤城既比賽

車仔幾乎衰俾舊波士睇
不過摩連奴暗笑之餘
亦應該會煩惱點樣凍結杜奧巴
佢入球能力超強之餘亦異常強壯
彭素同佢幾度過招之後竟然搞到膝傷而可能提早收咧
聽到都得人驚

而史篤城對伯明翰既賽事
想睇客隊創下今季英超最強11場不敗紀錄既嘢
可以睇楊先生既喉舌報章

小弟反而比較留意主隊既隱憂
佢地上季靠主場超勁戰績先可以提早逃離降班
不過今季主場戰績稍為跌 watt
新加入既端基又遲遲未能融入球隊

更大鑊既係佩利斯早前因為加操事件而影響球隊士氣
要知道史篤城既爛仔踢法特別講士氣
結果球隊表現持續低 watt
再咁搞落去將有一定既降班壓力

p.s.:
1)
兵工廠兩年前 Boxing Day 作客俾樸茅悶和
今晚冇法比加斯隨時歷史重現
不過小弟仍然希望佢地唔好俾費sir睇死

2)
睇新聞見香港羸廣東好似冇咩說服力
與其話阿古沙勁就不如話李偉軍屎
好坦心佢地星期六輸返轉頭

2009-12-29

近兩日既新聞......

1)
禾路連可能以300萬鎊既價錢轉投彭拿典奈高斯
而馬體會就被指準備出賤價200萬鎊收購杜辛拿

而利記繼續同希斯基扯上關係
其他新箭頭人選包括辛達告魯斯,卡頓高爾,堅韋尼鐘斯以及摩西斯

另外,有報導指如果利物浦下季冇歐聯踢
托利斯將會要求離隊
而車路士以及曼城都有興趣接貨

2)
肥安闢謠表示冇唸過搵新龍門取代施治
保方,卡斯拿斯以及艾堅菲夫近日都先後同車路士扯上關係
而佢雖然講過入貨就會裸跑
但英國傳媒依然估計阿古路或者列貝利會上車
而佢地亦被指準備同利記爭奪希斯基

另一方面,迪辛度將繼續外借到布力般流浪

3)
同阿古路扯上關係既仲有皇馬
佢地亦被傳打算季尾收購朗尼以及韋拿

而唔夠中堅用既佢地繼續同維迪以及伊雲奴域扯上關係好正常
不過竟然傳到想接收高路仙尼就比較離譜

另一方面,保頓就被傳考慮接收古迪

4)
希活表態希望繼續以借用身份效力紐卡素至季尾

5)
阿仙奴被指考慮借用亨特拉爾半季

而雲加透露再次受傷既法比加斯可能要休息3星期
加上桑治以及伊保爾要踢非洲國家盃
令佢考慮為中場增兵

另一方面,基達菲就考慮向佢地收購辛達路斯
而韋舒亞透露考慮以借用形式加盟韋斯咸

6)
麥斯洛迪古斯可能由馬體會轉投小保加

7)
財困既樸茨茅夫連續3個月唔能夠準時出糧
消息指佢地將要繼續賣人還債
所以比基安尼希望樸茅向里昂買斷佢既希望都好難實現
而佢地亦應該冇本事同富咸爭奪麥卡菲

而占士已率先表態希望跳船到熱刺
以提升踢世界盃既機會

另一方面,般尼希望延續借用紐根特

8)
史高拉利透露由於滿意現狀而拒絕接手祖雲達斯
另一方面,老婦人就表明基亞雲尼係非賣品

9)
幾段曼城既消息......

雖然有報導指比拿美可能轉投熱刺或者阿仙奴
不過當時人已經否認離隊

而有消息指如果艾迪巴約以及羅賓奴麻煩友之後搞事
文仙尼唔排除踢走佢兩個

而仲未落班既蘇甘保就忽然被傳可能加盟曼城
不過現時最有可能加盟既係哥度巴

另一方面,西班牙傳媒指佢地既油王老闆
其實有意思出價11億鎊收購皇馬

10)
維拉被指打算以800萬鎊既價錢引入馬素舒希化
而森林就再次被指將於1月向佢地出價300萬鎊買斷索尼

11)
愛華頓忽然被指考慮引入賓納特以及麥基迪

12)
幾段曼聯既消息......

賓菲加拒絕佢地對迪馬利亞既1000萬鎊出價

而佢地亦被指有興趣引入法比安奴
不過消息指佢地既出價仍未足以打動西維爾

另外,薩拉戈薩以及卡迪夫城就分別想借用馬捷達同埋吉遜

另一方面,摩連奴傳聞2012年約滿國米後接手代替退休既費 sir

13)
彼德斯古被指最有可能加盟魯賓卡山

14)
黑池中場查理阿當被指成為保頓以及森林既150萬鎊增兵對象

15)
熱那亞射手費路卡利被指可能以1200萬歐元既價錢轉投費倫天拿

16)
華倫西亞方面表示解決財困問題後會籌備興建新球場
而佢地亦打算從基達菲引入射手蘇爾達度

17)
國米被指準備向拉素出價720萬鎊收購塞爾維亞後衛高拉洛夫
而有報導指國米早前從佢地接收彭迪夫後
為左還人情而外借年青球員畀拉素

另一方面,有消息指佢地可能會從羅馬接收巴迪斯達

18)
哈利列納暗示會賣走柏夫奴真高
這名俄羅斯射手先後同利物浦,阿仙奴,AC米蘭,辛尼特以及羅馬都扯上關係

而熱刺被指準備同史篤城爭奪賴恩巴布
後者同時亦考慮引入希斯基
(加埋之前提及既另外幾隊英超隊
大隻妙真係搶手......)

19)
芬洛即將引入從鯨魚引入吉田麻也
這名可踢中堅以及防中既球員被認為係芬洛鞏固日本市場既工具

20)
士砵亭方面宣佈將以 600萬歐元既價錢從馬體會接收龐高尼冼拿馬

21)
尼索比亞被指成為伯明翰800萬鎊既增兵對象

22)
費倫天拿宣佈菲臘比達貝路即將由烏甸尼斯來投
這名25歲巴西中堅身價高達900萬歐元

23)
史杜亞借用期滿由打呲郡重返富咸
前者因為財政問題而唔能夠買斷佢
這名瑞典右閘表示希望可以於1月離隊以尋求出場機會

而捷克U-19射手 J.Hora 近日於富咸跟操
鶴臣可能向 FK Banik Most 出價收購
比較大機會加盟既有斯洛文尼亞中場高倫
佢想離開西布朗以尋求更多既出場機會

24)
費格遜0個仔達倫費格遜早前同彼德堡解約
而家可能會接手雷丁

25)
毛劍卿可能成為最新一個外流球員
這名23歲翼鋒可能由上海申花轉投彭拿路

26)
阿根廷小國腳翼鋒保拿洛迪開快車炒車收場
右手斷左要養傷超過半年之餘
仲因為睇住3個fd當場死晒而要接受心理輔導

2009-12-28

想講下Big 4以及紐卡素既比賽......

1) 伯明翰對車路士

就算繼巴塞後令車仔34場以來首次冇波入
大陸網同埋楊先生既喉舌報都唔使咁誇話伯明翰比美巴塞
真正內容應該係祖赫特'煞'車先岩
佢應該係基雲之外近期英超最堅既龍門
如果 keep 到咁既狀態
卡比路應該冇咩理由世界盃唔用佢踢正選

另一方面,車仔冇波入唔止因為阿歷士冇運罰球中楣
中場推進冇咁暢順亦係原因
或多或少同球員既傷疲問題有關
而右路冇左保辛華令邊線陣擊失色唔少
對手亦可以更集中於中路塞死佢地

而車仔近5場已經第4次失分
當佢地冇趁曼聯後防傷兵潮而盡量放甩對手
之後因為非洲國家盃而陣容不陣
曼聯一定唔會同佢地客氣
萬一之後真係俾人地後上捧盃
這段時期既多次失分可能就係當中關鍵

2) 利物浦對狼隊

面對麥卡菲反口幾乎盡出主力既狼隊
利記有主場之利都只係略佔優勢
如果唔係奇雲杜里離門幾碼失機
利記隨時先失波而陷於苦戰

羸波關鍵一定係對手踢少個
狼隊連失兩球睇到都係中後場執位而漏招
由右閘,中堅以及防中都一齊犯錯

另一方面,阿古蘭尼今場首次踢正選既表現不過不失
初步印象傳送成功率好高
相反謝拉特雖然入波打破悶局
不過多次兜口兜面都俾失波
似乎仲要等佢一段時間去克服信心問題

3) 阿仙奴對維拉

之前幾乎殺盡 Big 4 既維拉下半場忽然跌 watt 連輸3球
可能原因應該有3個:
一係兵工廠中場多左法比加斯即刻踢高一皮波
二係維拉上半場搏得太盡
三係維拉比上季更快出現疲態
小弟但願今場波係維拉整季命運既縮影

講波佬講得冇錯
維拉既正選陣容係最少變化
或多或少同球隊冇咁疊馬有關
不過佢講漏左其實維拉係英超用得最多長波既球隊
跑狗踢法根本就唔可能用足成季
柏度夫領軍後為球隊帶來踢少左長波既變化
不過中場幾個年青拍檔既優勢都係來自速度而唔係技術
奧尼爾要徹底降決問題唯有繼續引入唔同類型既攻擊球員

4) 侯城對曼聯

曼聯開始見到後防傷兵潮完結既曙光
而朗尼亦繼續勇態
不過小弟真正想講既係侯城

上季老虎好快就變返做病貓
球員當眾俾菲爾布朗鬧到失晒信心
以及底牌俾人睇穿晒都係原因之一
不過更關鍵既其實係佢地永遠一往直前既踢法

佢地中前場係有幾個唔錯既球員
不過整體都唔算好有攻擊力
更攞命既係佢地冇穩健防守作為球隊既根基
冒死進攻往往為自己造成致命傷

5) 鍚週三對紐卡素

避免主場6連敗既錫週三明顯搏命過紐記
更大鑊既係曉頓居然搵畢特代替辣椒仔
又邊可能搶得羸對手
似乎搵古費里正式移入中路
再用多個正宗右翼會比較上算

紐記陣中最令小弟有好感既就係艾美老味
如果唔係對手既龍門眼明手快
紐記隨時有機會連雞都偷埋

講返今晚對打呲郡場波
有辣椒仔復出既紐記迎戰可能有多達5個主力缺陣既客隊
只要針對對手冇晒一對閘而做好側擊
應該有力打落水狗兼重回正軌

2009-12-27

近幾日既新聞......

1)
列高巴最終以自由身重返 Danubio FC

2)
熱刺再次同查馬克以及雲佬扯上關係
而哈利列納就暗示可能從曼城引入比拿美
不過曉士就透露已說服這名威爾斯射手唔好為一時之氣而離隊

3)
甘比亞素,史坦高域,柏仙尼以及卡積亞都被指係曼城最新既羅致對象

4)
利物浦被指準備引入新箭頭
傳聞人選包括辛達告魯斯,希斯基以及簡韋恩鍾斯
史篤城亦同後者扯上關係

5)
早前搵經理人物色新球隊下季加盟既美路
由於同費拉利反面而可能提前於1月離隊
消息指阿仙奴可能會接收這名巴西防中

6)
細哨既阿哥兼經理人證實保地花高準備於1月帶細哨返巴甲
而標準烈治方面透露M.米蘭奴域最有可能於季尾加盟AC米蘭

7)
馬體會被指為失去阿古路作好準備
消息指佢地向拉魯斯既小將 E.沙維奧招手

8)
國米落實接收彭迪夫
另一方面,巴洛迪利以及蘇亞素都被傳成為愛斯賓奴既增兵目標
皇馬亦再次被指有興趣引入馬干

9)
幾段曼聯既消息......

雖然有幾名後衛可以逐漸康復可以紮住上陣
不過貝碧托夫以及里奧費甸南既情況就幾唔樂觀
前者可能要抖3個月之餘
後者就可能要提早收咧兼唔可以踢世界盃

而消息指費sir為免入錯貨
可能打算先借用賓艾化半季

另一方面,小將杜錫於加盟後冇機會出場令佢心灰意冷
有報導指佢考慮於短期內離隊

10)
基爾繼續執教薩拉戈薩到季尾

11)
尼科西亞宣佈同比德斯古解約

12)
費倫巴治被指向國內新星 S.Yildirim 招手
這名19歲射手早前亦同曼聯扯上關係

13)
祖雲達斯以及拿玻里成為最新兩間同蘇亞雷斯扯上關係既球會
而前者被指準備向史浩克04出5折價錢600萬歐元
收購身價高達1200萬歐元既拉菲爾

14)
車路士忽然被指準備接收東尼
不過佢最有可能減人工加盟羅馬
而車仔就被傳可能收購賓施馬
不過這名1個月兩度炒車既法國射手表明唔準備離隊

而伊雲洛域即將同車仔續約
粉碎佢轉投皇馬既傳聞

另一方面,有吹水小報指肥安落 order 收購卡斯拿斯
不過當時人既贖身費其實高達1億5000萬鎊
但佢於另一場合表示球隊唔會於1月增兵
仲講笑話如果佢食言就去冰天雪地裸跑示眾

15)
達托羅希望離開拿玻里以爭取更多出場機會
西維爾以及維拉利爾被傳打算合資收購佢
而利禾奴亦有興趣借用這名阿根廷中場

16)
愛華頓被傳準備於1月從米堡引入艾利亞迪里

17)
卡利亞里可能於1月失去巴西射手捷達
消息指兩間意甲以及一間德甲球會都希望引入即將成為歐聯球員既佢

18)
消息指禾堡準備於1月從哈化柏林出價800萬歐元收購費特歷治

19)
史特加可能引入希特布蘭或者雲昇以取代列文

20)
狼隊被指準備向維拉收購中場加特拿

p.s.:
1)
聖誕普天同慶既時候
劉曉波就再次俾狠毒祖國加害而面臨又要坐多11年

發表私人見解促進民主進程就叫煽動顛覆國家政權?
講穿左只係蛇鼠狗官擔心失勢而再搵唔到錢
掛穩定國家既羊頭
賣打壓異見既狗肉

天下烏鴉一樣黑
放諸足球世界都應該有人對人唔對事
路人甲乙丙都知高科技有助公平執法
點解國際足協偏偏遲遲唔肯落實使用?

2)
賽後感等埋今晚兩場波先講

2009-12-24

1)
傳聞哥迪奧拿將來會加盟曼聯取代退休既費sir
佢亦再次被指可能會接手國米

2)
阿仙奴成為最新一間同彭迪夫扯上關係既球會

3)
利物浦再次同柏夫奴真高扯上關係

4)
繼巴洛迪利以及馬干後
意大利傳媒指文仙尼亦打算從國米搵多幾名舊部屬
當中包括捷禾,哥度巴以及森美爾
而佢當年教國米期間球會未能成功引入既森多利亞師弟卡斯辛奴
亦係佢既增兵對象
另外,卡保爾以及亨利都同曼城扯上關係

另一方面,有報導指如果曼城今季入唔到前4
會方有權即刻同文仙尼解約
所以文仙尼冇帶屋企人去英國之餘
仲連屋都冇搵只係長住酒店

5)
阿根廷再傳內訌
貝拉度公開勁插肥馬既副手

6)
紐卡素被指打算從格流羅致基斯保特
而希活就表態希望繼續留隊

另一方面,麥卡菲表示曾經打算引入卡路爾
不過被紐卡素拒絕後已經打消念頭

7)
薩拉戈薩被傳準備接收梅斯達

8)
中村俊輔否認1月離隊既報導

9
夏京接手紐倫堡

10)
利夫連決定離開登地聯以接手蘇格蘭
佢同蘇格蘭足總簽約兩年半

11)
尋日講過費爾成為曼聯既新龍門人選
傳聞費倫天拿就視艾堅菲夫為替補對象

12)
維拉被指有興趣向新特蘭收購簡韋恩鐘斯

13)
前曼聯名宿史根倫病
享年74歲

p.s.:
1)
前文提到文仙尼可能季尾就冇得撈
中東油王連曉士都忍到年幾
竟然只係忍到文仙尼半季?
莫非曼城一心季尾搵摩連奴過檔?

2)
近幾日真係好似發夢
舒密加復出既堅料之後
又有金判坤教國足既傳聞
雖然覺得唔會係真
不過都好興奮

3)
Merry X'mas!

2009-12-23 (2)

近幾日既新聞......

1)
文仙尼表示以前4為今季目標
下季就展望可以羸埋英超

而多名星級球員隨即同曼城扯上關係
當中包括:韋拿,費蘭度托利斯,列貝利,亨利,阿古路,巴洛迪利,迪馬利亞,
馬斯查蘭奴,拿姆,基亞連尼,耶耶托尼,馬干,加利卡希爾以及厄遜

有入有出......
祖赫特,米卡李察士,米高莊遜,馬華路禾尼,賓積洛夫,
尼史葛,布歷治,辛達告魯斯,基雲以及比拿美都被傳可能離隊
消息指後三人最唔滿意曼城高層既安排好唔尊重曉士
當中比拿美第一課操練就同文仙尼發生衝突

另外由於巴塞唔能夠同曼城於轉會費方面達成協議
而決定擱置收購羅賓奴
文仙尼隨即表示準備重用這名巴西球星

另一方面,文仙尼亦澄清曼城係12月頭先開始斟酌佢
曼城高層亦表示佢地係於球隊和左侯城之後考慮易帥

2)
曼聯新兵B.迪奧夫獲發工作証
費sir決定於1月為這名塞內加爾前鋒註冊

而曼聯亦被指將於1月以750萬鎊既價錢引入賓艾化
之後再將佢外借到伯明翰或者愛華頓

另一方面,紅魔亦被傳可能同曼城爭奪韋拿以及加利卡希爾
費sir亦被指可能考慮引入費爾作為新龍門

3)
車路士亦被傳打算羅致韋拿
英國同埋西班牙兩地傳媒都指佢可能改變主意轉戰英超

而伊雲奴域(仲有伊雲斯)被傳成為皇馬新中堅既最新人選

4)
雲加表示睇淡雲佩斯於季尾復出既機會
但就有把握佢可以趕及世界盃

而消息指雲加決定將韋舒亞外借到般尼
辛達路斯亦有機會外借到愛華頓

另外,雲加仲未成功遊說加拿斯續約
消息指費倫天拿以及AC米蘭都想羅致季尾自由身既佢

另一方面,大股東美國富豪高安基既持股量已經增至29.97%
只差0.03%就可以提出全面收購

5)
財困既屈福特勢必要賣走史葛路治
兵工廠以及熱刺被傳準備同熱刺爭奪這名前英格蘭U-21龍門

6)
摩連奴再次否認季尾離隊既傳聞

7)
侯城早前宣佈放棄部份球員以減輕財政壓力
消息指佢地之後打算引入畢特

8)
迪保斯基同西班牙足總續約到2012年

9)
費拉拿雖然暫時保得住飯碗至季尾
但亦有消息指如果未來兩場波再出事
祖記高層會改變主意

而家有傳聞指納比,軒迪克,尼維特或者史高拉利準備接棒
不過前兩者就已經作出否認
令尼維特成為接任既大熱

另一方面,祖記被指有興趣引入雲拜頓以及彭迪夫
而國米以及熱刺亦對這名岩岩同拉素解約既射手好有興趣

10)
利物浦忽然被傳向東尼以及麥基達招手
而賓帥可能俾禾路連以借用形式加盟哈化柏林
另一方面,利記成為最新一間同摩西斯扯上關係既球會

11)
同樣對東尼有興趣既仲有巴勒莫

12)
紐卡素以及保頓都被指向基加隆招手
鍚菲聯方面表明要收到合理出價先肯放人

13)
細哨被指早前連續3晚夜蒲
消息指李安納度會罰佢內部停賽

14)
格連莊臣涉嫌醉酒鬧事

15)
樸茅積極搵財團注資
當中包括香港財團
另一方面,比夏積被指可能轉投熱刺

16)
哈利列納被告逃稅
將於1月11號出席應訊
雖然熱刺發言人表示件事係佢既私事
唔會影響佢既職位
不過已有賭波公司將佢列為下個被炒領隊既第5熱門

另外,維拉被傳可能接收羅比堅尼
哈利列納已經表明冇得傾之餘
亦表示羅比仔唔會因為集體開P一事而冇得做隊長

17)
薩拉戈薩準備於1月踢走賓納特,艾華頓,艾耶拉以及華拿祖
而普耶否認離開白禮頓以接手母會

18)
烏甸尼斯決定搵迪巴亞斯取代馬連尼

19)
史篤城被傳打算收購卡路爾

20)
烏克蘭足總宣佈冇同米加列真高續約
佢地將會向薩克達挖角盧錫斯古

21)
羅馬有興趣引入施積
而佢地既財政能力就成為交易關鍵

22)
田中鬥莉王最終決定轉投名古屋鯨魚

23)
韋斯咸被指準備引入基士文以及比亞堤

24)
消息指愛華頓準備再次以借用形式引入文奴費蘭迪斯

25)
泰利接連鬧出醜聞
先係被指為左1萬鎊而賣黃牛飛
再被指私自利用英格蘭隊長既名義搵錢

26)
般尼被指有興趣以借用形式羅致巴里

27)
富咸被指準備借用安東費甸南以及出價300萬鎊收購碧福特

p.s.:
1)
美斯一如外界所料當選世界足球先生
而瑪達就破紀錄連續4年當選世界足球小姐
波比 sir 死左先攞公平大獎就係借機會向佢老人家政敬
而C7攞最佳入球獎就似係安慰獎
不過小弟覺得以色列球員既教材式倒掛以及墨西哥球員既虎尾腳入波仲精彩

最估唔到既都係中國足協攞發展大獎
話中國足協近年積極向新一代推廣足運
但諷刺既係早前睇過一段 article
提及近年各個年齡級別搵球員都難左
因為家長傾向唔多想俾小朋友繼續踢波
小弟既結論係:一日唔搞好自己
幾積極同人 hard sell 都只係白費心機

2)
前日先講山齊士等住上位
實幹派既佢教波唔使太多球星
就算艾美利亞因為近期6場聯賽都贏唔到而炒佢
小弟對佢既評價依然不變