2010-2-11

兩場波想講:

中國對南韓

南韓既踢法同上場炒香港冇咩分別
上場可以羸5蛋大抵係香港既低質防線再次發波瘟
查實南韓仔傾向高空轟炸同埋長傳
只要防守一方有一定質素兼夠集中
要力保不失唔難
加上中國早段已經先開紀錄
打亂晒南韓既部署

中國上場龜縮頂得住日本
南韓平均技術同埋創造力及唔上日本
要破密集就更難
結果壓晒上去仲俾中國大把空位打突擊

不過只係一次炒人3蛋就話國足已經克服恐韓症
未免太過樂觀

高洪波接手後試圖為國足增加技術成份
不過效果一直未如理想
而家就算連續兩場靠擦鞋仔波偷雞
都唔可以就此幻想大國掘起

更加要留意既係今次賽事雖然雙方幾乎冇晒外流球員
不過南韓既外流球員實力明顯比較高
亦即係話今場波唔可以反映雙方真正實力既分野

前國腳'雪山飛狐'高峰講得好
中國至少要做到多年食得住南韓
先可以話超越南韓

下場波中國只要羸到香港就有望捧盃
不過下場中國要主攻
冇幾多空位俾佢地發揮速度
假設香港冇放水
國足只有身體質素方面有明顯優勢
就算最終有得羸都未必羸得精彩
反而可能成為香港輸波但羸得最多掌聲既一場

2) 阿仙奴對利物浦

賓尼迪斯同埋謝拉特賽前已經講明會抄橋爆廠
不過都要有本錢抄先會有運行

麥斯洛迪古斯同埋古積特兩邊鬥沉
前者要踢唔熟識既左路
結果好多時入中路搵波踢
後者冇速度冇腳法
放生左兵工廠左路既一大缺口
加上謝拉特輪流受制於迪亞比以及桑治
發揮亦只係一般
結果質素平平既尼哥治於前線得個走字
就算有個好機會又係俾加拿斯補到鑊

而雲加同班球員蠢左兩次
冇之前俾咁多空位利記之餘
仲用多左犯規阻止對手
不過佢地今場幾個攻擊主力既發揮只係一般
結果下半場中段前既戰局都算沉悶

利記今場有史基泰爾復出
其實後防整體表現唔錯
最終輸波都只係衰後備入替既菲膿迪根
條友有意識移入中路但冇意識睇人
難怪賓尼迪斯之前寧願用加歷查打閘都唔用佢

不過話說回頭
迪亞比入波前其實係攻擊起點
中場冇人回防睇佢又係抵鬧

場波輸左或多或少因為冇運
因為就算唔計巴布勁射中楣
而4個爭議12碼利記佔3個但都係攞唔到著數

多得車仔同埋曼聯失分
雲加賽後意氣風發話爭標未絕望
不過睇佢地近期既表現始終似攔路虎多過爭標份子
聯賽始終似係兩頭馬車格局

p.s.:
祝香港好運

2010-2-10

1)
英國稅局決定俾多7日樸茅撲水收拾殘局

2)
傳聞沙地阿拉伯同埋美國都有買家想入股利物浦
不過用1億鎊收購40％股份既出價唔似會成事

另一方面,賓尼迪斯承認好難引入查馬克
佢被指最快後日以5萬鎊週薪既條件同阿仙奴簽約
不過佢就澄清仲未落實轉會

不過米蘭祖雲奴域落實下季以自由身加盟利記
雙方簽約3年
算係執唔到橙都執返個桔

3)
AC米蘭被傳打算用施多夫同埋亨特拉爾
再加現金去收購羅賓奴

4)
巴塞同埋西維爾都被指有興趣羅致保基拉
而有消息指前者已經同法比加斯達成加盟既口頭協議

5)
馬勒當拿表明唔會重召列基美返國家隊

6)
施仙奴落實以借用形式重返母會聖保羅到季尾

7)
拉素決定解僱教練巴拿甸尼
由前拿玻里教練列查接手

8)
尼日利亞亦被指想搵薩克達接手

9)
泰摩斯卓克早前被指因為冇出場機會而希望離隊
不過佢而家因為家庭理由而表態唔會走

10)
蘇拿炮轟老闆冇同佢地溝通就公佈全體減薪

p.s.:
1)
尋日只係講加斯居尼衰左醉酒駕駛
點知原來佢之後再因為醉酒搞事而連續兩日俾人拉上差館
病死同埋入冊唔知邊樣會發生0係佢身上先

2)
終於克服持續32年既恐韓症......

2010-2-9

近兩日既新聞......

1)
報導指兩名印度富商 M.Ambani 以及 Subrata Roy 都有興趣入主利物浦
當今全球第7大富豪既前者隨即發聲明否認
而後者就拒絕作出任何評論

2)
2012歐國外分組抽籤結果:
第1組:
德國,土耳其,奧地利,比利時,哈薩克以及阿塞拜疆
第2組:
俄羅斯,斯洛伐克,愛爾蘭,馬其頓,阿美尼亞以及安道爾
第3組
意大利,塞爾維亞,北愛爾蘭,愛沙尼亞,斯洛文尼亞同埋法羅群島
第4組
法國,羅馬尼亞,波斯尼亞,白俄羅斯,阿爾巴尼亞以及盧森堡
第5組
荷蘭,匈牙利,瑞典,芬蘭,摩爾多瓦同埋聖馬力諾
第6組
克羅地亞,希臘,以色列,拉脫維亞,格魯吉亞以及馬耳他
第7組
英格蘭,瑞士,保加利亞,威爾斯以及黑山
第8組
葡萄牙,丹麥,挪威,塞浦路斯同埋冰島
第9組
西班牙,捷克,蘇格蘭,立陶宛以及列支敦士登

唔計主辦國波蘭以及烏克蘭
9隊小組首名以及1隊最佳次名直接晉身決賽周
其餘8支次名球隊踢主客兩回合附加賽
勝方亦可趕上尾班車踢決賽周

3)
內地中央電視台臨時取消轉播東亞足球錦標賽
連相關新聞亦冇報導
更有傳聞指央視將會全面封鎖中國足球
包括放棄轉播中超以及亞冠盃

而有傳聞指亦可能同假波案有關
更話之後會有更多人被捕

另一方面,于洪臣接任足球管理中心副主任
主力管理中超

4)
鄧加再次唔選細哨入國家隊
仲暗示佢既腹稿唔包括佢

5)
卡比路被傳計劃同時徵召泰利以及布歷治參加對埃及既友賽

6)
皇馬被傳想用卡卡
向祖雲達斯交換基亞連尼同埋迪亞高
不過後者已經表明唔會離隊

7)
樸茅方面已經派左律師同稅局方面聯絡
要求更多時間搵新老闆去還750萬鎊欠稅
佢地希望可以先俾180萬鎊以令稅局押後做嘢

而有兩至三個財團有興趣接手成為球會今季第5個老闆
當中以一個愛爾蘭同埋美國合資既財團最大機會

8)
尼日利亞足總聲稱軒迪克有興趣接手

9)
英國傳媒指摩連奴準備於暑假以550萬鎊為自己贖身
以重返英超教波
報導指利物浦以及曼城都有興趣搵佢接手

而後者同時被指依然同軒迪克保持聯絡
亦可能於季尾搵佢接手

10)
加利卡希爾日前被驗出手臂腫脹出現血凝塊
要立即接受治理而好可能提早收咧
佢亦好可能因而緣盡世界盃決賽週

11)
加斯居尼因為醉酒駕駛被捕
經查問後獲准保釋

12)
而佢既後輩卡路爾就因為早前於夜總會打人
而被正式落案告佢襲擊罪

另一方面,史篤城既富拿亦因類似情況而被警方拘捕

13)
曼聯被指有興趣羅致魯迪維爾以及伊度比兩名年青球員

前者已經唔止一次同曼聯扯上關係
這名可踢防中以及中堅既18歲英格蘭球員同時係阿仙奴既增兵對象

而後者現時效力巴拉圭甲組球會波坦奴
16歲既佢可踢進攻中場同埋前鋒
皇馬,羅馬,拉素以及熱刺都對佢好有興趣

14)
一名30歲布力般流浪球迷於睇波期間
被發現頭部受傷昏迷
送院搶救後延至尋日凌晨不治
英國警方拘留一名25歲男子協助調查
由於事發地點唔係史篤城既球迷專區
一般相信同主隊無關

15)
查馬克表明心跡想加盟阿仙奴多過加盟利物浦
而雲佩斯鐵定4月復出

16)
里奧費甸南拒絕為加監上訴
以確保可以於聯賽盃決賽上陣

17)
消息指山東魯能向拖連奴既前意大利國腳艾莫戴安拿展開斟酌

18)
貝寧教練杜素耶成為第3個於非洲國家盃後下台既教練
佢既技術團隊亦同時被提早解約
不過特別既係貝寧足總決定解散埋成隊國家隊

19)
阿聯酋航空將贊助AC米蘭4季
合約總值5000萬歐元

20)
紐卡素將小路亞路亞外借到白禮頓1個月

21)
拿玻里再次同阿祖安奴扯上關係
而21歲中堅W.蘇沙亦可能同時加盟

22)
韋斯咸要求職球員於季尾開始集體減薪以慳返6000萬鎊
而再有傳聞指佢地可能會出售厄遜俾利物浦套現

23)
頭骨受創既捷禾奇跡咁只係用左34日就恢復訓練

p.s.:
接連主場對冇份踢決賽週既委內瑞拉同埋中國都冇波入
再有下台壓力既岡田武史已經改口風話會當香港係老虎咁打

上年10月日本主場炒香港6蛋
小弟聽過一個由林嘉瑋透露既版本
話說主隊因為上半場只羸兩球而疑似半場俾高層狂小
結果下半場一開波就發癲咁迫到香港球員連波都控唔掂

由此推斷可能有陳七連續兩場缺陣既香港後日會超難捱

2010-2-8 (2)

講返幾日前 sammysir 問既轉播費合約......

先講英超
上年已經落實由下季起連續3季既本土轉播權
價值接近18億鎊
而最近亦落實價值10億鎊既3年海外轉播權合約
成交價增幅高達5成半
兩張厚約就令一席英超至少值5000萬鎊

而英冠既本土轉播權合約由今季開始
3季只係共值2億6400萬鎊
可想而知英冠球會有幾窮
而海外轉播權應該另計
不過小弟就搵唔到詳細資料

西甲方面
每間球會獨立出售轉播權俾當地兩大財團
不過小弟就 check 唔到兩大財團最終將整個西甲轉播權加埋賣到幾錢

皇馬每年大約分到有1億5000萬歐元
巴塞亦有唔少於1億1600萬歐元
不過其餘18間西甲球會加埋都分唔到6000萬歐元
難怪當年西維爾曾經有段時間寧願唔賣轉播權

值得一提既係由於兩大豪門既人氣越來越勁
皇馬同埋6冠王巴塞之後再續約既叫價亦只會係天價

意甲同西甲既情況類似
現時每年轉播權估計總值5億鎊
不過兩間米蘭市球會同埋祖雲達斯都各佔超過1成半
加上費倫天拿以及羅馬都有一定叫座力
大約都估到其餘球隊分得幾少
基爾禾上季就只係收到400萬鎊
而06-07年球季泰列維素既轉播收入仲竟然同祖記相差6600萬歐元

不過意甲可能變天
事緣好多小球會聯合超立搞革命
最終意甲球會聯合起來打算效法英超成立意超
由賽會統一代理電視轉播權
從而提升議價能力
雖然大牌球會仍然會因為轉播場數比較多而收入較多
但中小型球會既收入至少可以得到保障
意甲亦可以唔使再接濟零電視轉播收入既意乙

法甲方面
雖然本地唔多球迷注意
不過原來法甲每季既轉播費都值6億6800萬歐元
早幾年仲有段時間貴過英超
真係估佢唔到

德甲方面
而家就係連埋德乙一齊賣轉播權
不過加埋只係賣到每年4億1200萬歐元
可想而知德國球會點解冇錢買人
而合約有一特點係網上直播收入係 variable

值得一提既係德國球會近年於財務管理方面有改善
所以就算收入唔高
不過財務狀況都比好多英超球會好
值得歐洲各地球會借鏡

2010-2-8 (1)

過去兩日既英超大戰同埋東亞足球錦標賽
正正係如有雷同,實屬巧合既好例子

有時要羸波
鬥志同埋體能比技術更加重要
利物浦面對回勇既愛華頓展長時間踢少個
都可以踢得好過對手
關鍵一定係鬥志搭夠而唔係羸整體質素

又睇下中國賽前俾當地傳媒,甚至崗田武史睇小
落場果然輸晒技術同埋戰術
想表現重返亞洲一線既時間表
應該同香港有普選一樣只有'聰明人'先睇得到
最終都可以靠身體質素以及鬥志證明唔係東亞病夫

另一方面,羸波建基於防守
一定唔止係羸NBA既關鍵

睇下香港輸晒默契,戰術,體能同埋速度
對住人蔘國仲要發埋波瘟
俾對手靠簡單高波以及長傳已經足以叫糊
聞屎忽同埋李雙中仲簡直係屎上最強

又睇下兵工廠上場輸得咁樣衰
今場對住魔獸都可以再次犯上初中生防守失誤

就知香港軒迪克所講既一勝二和目標
以及雲加既英超美夢
原來真係一場夢

2010-2-7

1)
消息指卡比路唔俾泰利做隊長有兩大原因
一係要保護佢唔好因為繼續做隊長而俾傳媒插得仲勁
二係對英格蘭代表隊既影響
而有分析指如果卡比路發現泰利入選對球隊有負面影響
仲會索性唔選佢入國家隊

另一方面,有分析指泰利將於未來幾年冇左2000萬鎊贊助
而勾義嫂醜聞女主角最終決定唔爆料
有報導指係因為泰利俾左40萬鎊掩口費

2)
傳聞馬甸尼已經同紐約紅牛達成合作協議
下季將會復出轉戰美職聯
而同時加盟既可能仲有亨利

3)
利物浦以及維拉都被指睇中紐維爾舊生隊既阿根廷射手保賀斯恩
消息指佢既身價約值500萬歐元

而AC米蘭,祖雲達斯以及華倫西亞再次被指同利記爭奪祖雲奴域

另一方面,川迪正式從利記買斷 N.米哈路域

4)
消息指油王準備於季尾撥款2億鎊去羅致阿古路以及列貝利
當中轉會費以及人工各佔5成
而奧歷暗示列貝利將會離隊

而車仔亦再次被傳同曼城爭奪蘇保迪
一般相信佢將於暑假以超過2000萬鎊既轉會費離隊

5)
睇唔到亨利二段手球既 M.漢臣
居然入選南非世界盃既30人球証名單

6)
艾沙維於對車仔既生死戰前公開批評雲加
既話唔應該派佢踢正箭頭
又話教授1月唔搵高質素及時雨幫補前線火力

7)
國米被指想出價1800萬歐元向巴勒莫收購阿根廷進攻中場柏斯杜爾

8)
尼日利亞足總決定同教練 S.Amodu 解約

9)
維迪既經理人澄清從未同AC米蘭有任何接觸

10)
文仙尼承認對巴洛迪利好有興趣

11)
沙夏落實同愛華頓續約兩年
粉碎佢離隊他投既傳聞

12)
祖雲達斯被指將於暑假引入多一名左閘
人選包括戴倫特,高拉洛夫,巴里以及費倫巴治既A.山度士

13)
現時以借用形式效力米堡既奧斯邦尼
之後可能會被維拉再外借到昆士伯流浪

而前阿仙奴以及富咸右閘禾斯正於昆士柏流浪跟操
消息指雙方即將落實簽約到季尾

14)
基士文近日同辛尼特提前終止借用合約後
返回巴黎聖日耳門報到後表示希望留隊
不過有傳聞指佢考慮同球會解約後以自由身轉戰英超或者意甲

2010-2-6

1)
最新亦應該係最後既版本係:
卡比路向泰利表明想換隊長
一般相信里奧費甸南將會接任
而謝拉特就會升為副隊長

而佢被指滾左現役隊友希拉里奧既老婆
以及同另一名模有路

另外,艾殊利高爾亦同勾義嫂醜聞女主角扯上關係

2)
繼續係泰利既衰嘢
佢再次被指以權謀私
佢以4000鎊賤價分租名下12個包廂睇波好位
仲加送親筆簽名波衫
包廂係佢做隊長既福利
但條例早已列明唔俾分租

3)
列貝利將於3月尾前交代去留

4)
曼城被傳將於暑假向奧林比亞高斯出價收購杜路斯迪斯
這名身價700萬歐元既希臘右閘亦可以客串防中
利身畈4,新特蘭同埋布力般流浪早前都佢扯上關係

另一方面,曼城仲未同馬田柏度夫達成續約協議
傳聞熱刺想乘機搶人

5)
拉爾拿再次表明唔會離開利物浦

6)
安德魯莊臣因膝傷提早收咧

p.s.:
尋晚紐記主場搞新兵巡禮
出晒5件新兵踢正選
羸波羸運既情況下大炒卡迪夫城五個一皮
真係恭喜賀喜
最可惜既係偏偏電視冇得播

2010-2-5

1)
泰利被傳滾左另一名英超球星既老婆

而佢將於今日同卡比路會面
不過分析指卡比路唔會於星期日前公佈決定
因為佢可能會等埋醜聞女主角仲有冇料爆
甚至等埋傳媒幫手挖多啲料

而有消息指佢仲想遊說布歷治同泰利一齊於國家隊合作

另一方面,醜聞女主角否認曾經同梅度有路
不過佢就同杜奧巴同埋迪西里扯上關係
但兩個當時人隨即發表聲明否認

有報導指車路士為左擺平朗斯
不惜為羅致古卡達而俾佢地260萬鎊賠償

2)
報導指希斯可能賣走旗下冰球隊套現

由於利物浦必須於7月前還債1億鎊
若果兩個美國老闆撲唔到水
將要被迫出售利記

3)
幾段曼聯既新聞......

有報導指一旦祖雲達斯攞唔到歐聯資格
保方將會要求離隊
而奧脫福正係佢既出路

而紅魔鬼被指同巴塞隆拿以及阿仙奴爭奪毛罕納德施丹

另外,安達臣已被費sir貶到預備組跟操以及出賽

另一方面,AC米蘭被指用亨特拉爾作為收購維迪既交易條件

4)
文仙尼表示加高係球隊暑假既增兵對象

5)
占士表態願意減人工同樸茅續約

6)
李偉峰透露為左報答車範根
而拒絕沙地一間球會4倍人工既斟酌

p.s.:
英超於當地最新海外轉播權合約價值高達10億鎊
每間英超將會獲分5000萬鎊
不過如果佢地繼續於球員買賣以及薪酬方面不惜工本
有幾多收入都有收皮既一日

只得伯明翰以及狼隊兩間球會冇欠債紀錄
反映英超可能會有泡沫下場

2010-2-4

(因為技術問題而遲左交功課,請見諒!)

近兩日既新聞......

1)
先講泰利
消息指卡比路會問佢肯唔肯主動交出隊長臂章
如果佢唔肯就要考慮佢既心理狀況先再作最終決定
不過有報導指佢決定唔做隊長

而泰利可能避戰足總盃賽事
以飛去杜拜搵老婆補鑊
不過佢老婆已經表明會原諒條賤精

另一方面,泰利近日俾傳媒將佢歷年來偷食既女主角全部起底
而勾義嫂醜聞女主角被起底
先後同其他3至4名現役或前度車仔球星有性關係

當中包括梅度同埋古莊臣
不過佢兩個都唔算勾義嫂
事關日期分別係03以及04年

而傳聞林伯特,杜夫以及柏加都可能係最後一名襟兄弟

2)
幾段樸茅既新聞......

香港既印度裔商人 B.Chainrai 於季初以旗下公司 Portpin 既名義
借左1700萬鎊俾樸茅
佢而家決定接受法拉積以球隊9成股份抵債
以保障公司有嘢揸手
佢亦因而表明會將樸茅繼續交俾史杜利打理
兼繼續為球隊搵今季第5名班主

另外,朗斯因為仲未收到迪丹尼既轉會費
而可能將佢強制回收兼賣去其他英超球會
伯明翰,狼隊以及布力般流浪都被傳有興趣接貨

而前熱刺中堅列卡度洛查以自由身簽約到季尾

另一方面,由於有法院拒絕泰利申請禁制令既案例
傳聞亦可以開名報導上個月既英超領隊嫖妓醜聞
而消息指當時人正係格蘭

3)
蘇格蘭皇家銀行要求利物浦於7月前先還1億鎊
先肯俾佢地延長總數2億3700萬鎊貸款既還款期

而利記被指同米蘭祖雲奴域簽左協議書下季以自由身加盟
不過佢既經理人已經否認有關報導
而佢地亦被指之後會向查馬克埋手

4)
就非法斟酌卡古達一案
車路士獲瑞士體育仲裁法庭判決上訴得值

另一方面,迪高透露將於世界盃後退出葡萄牙國家隊

5)
白蘭斯否認於世界盃後取代杜明尼治既報導

6)
幾段阿仙奴既新聞......

佢地將同黑山U-21中堅沙域簽協議書
佢將於5月正式加盟

雲加亦決定將英格蘭U-19前鋒山齊士華特外借到修安聯

另一方面,法比加斯再次被指成為巴塞既增兵對象
而佢地亦想搵伊保爾於下季以自由身加盟

7)
中國足協新任副主席韋迪表示唔會搵二三流外藉教練
佢透露軒迪克係理想人選

8)
鮑世賢因為銀牌決賽吹漏左張春暉侵犯盧均宜
而面臨紀律處分

9)
簡拿利斯否認已經同皇馬簽左協議書下季加盟
曼聯就被指仲未放棄羅致佢
而有傳皇馬將於季尾收購韋拿以及阿古路

10)
再來幾段曼聯既新聞......

里奧費甸南再次上訴尋求減刑
不過有分析指佢可能再次因減得加

而夏格維斯就再次因傷提早收咧

另外,挪威球會史達比克準備搵蘇斯克查接手

另一方面,佢地既債券已經跌破帳面價

11)
艾耶拉以自由身加盟競賽

12)
活基治唔排除因為鼠蹊傷患而提早掛靴

而同樣抖多過踢既前隊友戴亞
雖然俾新老闆開到聲叫佢提早退休
不過依然未唸過提早掛靴

13)
英超賽會確認馬華路禾尼以借用形式加盟新特蘭

14)
貝尼斯干尼公然批評AC米蘭引入文仙尼
而細哨被踢爆於米蘭打呲前依然連續蒲左3晚而被處分

15)
祖雲達斯被傳暑假有5000萬歐元資金買人
而後防將係增兵重點

16)
智利射手賓利拿被傳成為熱拿亞,巴勒莫以及烏甸尼斯既增兵目標
意乙哥錫圖已經將佢既身價定為400萬歐元

17)
西布朗落實同班尼斯簽約

p.s.:
由同行投票既最佳教練獎
艾歷基居然可以羸摩連奴一個 double 既得票率
大抵反映串王有幾令同行討厭

2010-2-3

轉會市場關閉後少左新聞
想趁機會講下等左個幾星期都未得閒講既八掛嘢

十幾日前本地傳媒都報導快活谷欠薪
事後港甲貝老推莊話贊助商未科水所以冇錢出糧
大家應該都仲有印象

人多自然有是非
傳媒收到風再作報導都唔係咩嘢奇事
不過如果有心人乘機揭人家醜搵著數
就好令人討厭

上星期三科化明曾經於專欄補飛
話因為放風球員細個唔識世界
亂講嘢都唔會怪佢
不過就好隱悔咁話對推波作浪既'球圈前輩'好失望
但冇特別交代詳情

其實有消息人士個幾星期前已經同小弟講
'球圈前輩'隊波睇中快活谷某些年青球員
不過偏偏唔想俾轉會費
就pk到借人地既欠薪事件玩嘢
打算之後可以做晒好人咁去接收垂青左好耐既年青球員

小弟先後問左至少10個fd都冇人估到邊個係'球圈前輩'
科化明算係身受其害都冇開名
小弟又邊好意思咁做
姑且俾幾個貼士
不過大家估到都唔使講返俾小弟知

貼士1:
佢活躍球壇超過廿年
(如果冇記錯!......)
佢應該於91年俾一個二打六外援打過一鑊
不過原因未明

貼士2:
佢多年都係搞青訓

貼士3:
天光隊既人同佢有牙齒印

2010-2-2

轉會市場關閉只可以形容為冇咩驚喜
先講英超同埋英冠既主要轉會:

1)
曼城最終落實引入阿當莊臣
雙方簽約4年半
消息指轉會費高達700萬鎊

不過工作証問題就令馬列加既轉會爛尾
佢亦最終決定加盟國米

另一方面,佢地將維度外借到打呲郡

而一般相信文仙尼同意將馬華路禾尼外借去新特蘭
不過落筆既時候仲未有進一步消息

2)
些路迪先後成功借用羅比堅尼,巴夫希得以及卡馬拉
另外又羅致前蘇格蘭U-17中場 P.Slane

3)
韋斯咸以220萬鎊羅致麥卡菲
而佢地亦以借用形式引入美度同埋巴西射手伊蘭
當中前者為左證明本身能力
不惜同槌仔幫以1000鎊既超低薪簽約

4)
又拖糧既樸茅就以325萬鎊賣走貝高域去史篤城之餘
亦將紐根特繼續外借到般尼
成個1月只係續借奧哈拉以及搵到奧拜胡

5)
而般尼亦成功向車路士借用中後場球員曲克到季尾
以及早前從史篤城引入 L.確特
總算幫補到後防少少

不過J.洛迪古斯就被外借去班士利

6)
韋根以250萬鎊引入摩西斯
亦從薩克達借用22歲玻利維亞射手摩連奴

不過迪基爾拒絕佢地同埋曼聯既斟酌

7)
將卡馬拉外借既富咸就從羅馬引入年青射手卡卡奧作為替補
佢地亦向維拉借用索尼到季尾
另一方面,佢地從利物浦羅致前德國U-17左閘碧治文

8)
新特蘭借用侯頓到季尾
而布魯士聲稱只係等緊賽會確認馬華路禾尼既借用

另一方面,有報導指布魯士曾向樸茅探盤羅致占士
而佢地亦最終未能引入馬高莫達以及埃及左閘 A.毛罕默德

另一方面,佢地將D.梅菲諾以及斯禾菲分別外借到葉士域治同埋錫菲聯

9)
由於接連羅致摩西斯以及禾漢都失手
紐卡素改為向高雲地利羅致貝斯
雙方簽約3年半

而兜兜轉轉後謝列美亦最終改投土耳其球會安卡拉高古

10)
昆士借流浪從伯明翰以及葉士域治
借用賓特同埋 T.Priskin 兩名箭頭

11)
熱刺羅致朗治失敗
意味哈利列納唔能夠為高美斯搵多個副手

12)
侯城再次拒絕狼隊對史堤夫亨打既出價
而卡辛就最終被外借到希甲拿利沙

13)
賣走阿當莊臣既米堡就成功從熱刺借用諾頓
亦先後引入兩名射手史葛麥當奴以及李爾米拿

14)
西布朗同自由身既荷蘭右翼 A.Slory 簽將到季尾
佢地亦將 S.Martis 外借去唐卡士打

15)
打呲郡向史篤城借用當治

而歐洲其餘各地既交投就更淡靜......

16)
迪賀奴落實以借用形式加盟華拉度列

17)
艾美臣由彭美拉斯重返西甲
同薩拉戈薩簽約到季尾

18)
成功引入馬列加既國米將文仙尼借用俾死敵AC米蘭
而占美利斯就落實加盟帕爾馬

19)
費倫天拿借用卡斯辛奴爛尾
改向巴塞借用現時於賓菲加無甚表現既基利臣
之後仲有權以1200萬鎊買斷佢

20)
拉素落實以80萬鎊從史特加羅致希斯佩加

21)
巴勒莫就將貨不對辦既羅馬尼亞翼衛 C.Melinte
而球隊就先後引入3人
當中只有意大利 U-20 後衛卡達路尼有少少名氣

22)
烏甸尼斯就從桑坦德引入射手 A.Geijo

23)
雲達不來梅從杜伊斯堡引入杜土射手辛度華拿

24)
西維爾將科特迪瓦射手干尼外借到漢諾威

25)
拜仁始終冇買新龍門
不過傳聞佢地將於暑假向烏甸尼斯出價700萬歐元收購漢丹洛域

26)
韋托特以自由身同梅斯簽約半年

27)
丹尼臣加盟希甲卡華拉
雙方簽約年半

2010-2-1

1) 南華對傑志

唔計羅神講既體力分配
以及鮑世賢又衰一鑊
小弟覺得南華反勝仲有兩個主因

一係佢地有始至終都從兩邊進攻
少左中路踢波既可免得自暴其短
而傑志冇閘之餘
應付傳中既能力亦有不足
例如羅沙度轉身慢以及個別球員跟得唔夠貼
結果俾到南華唔少機會偷襲

另外,經驗亦好關鍵
事實上盧均宜等邊緣港腳已經係陣中比較有經驗既球員
而幾個西班牙兵亦只係踢過當地低組別
加埋陣中又冇個壓得住場既大佬

結果傑志俾人追返一球就亂晒陣腳
連向來表現穩陣既奧利都出迎失準即刻再輸多粒
之後後防亦多次解圍唔湯唔水
中前場搓波甩腳都多左
明顯輸到失失慌

2) 阿仙奴對曼聯

蘭尼繼兩季前足總盃後再次爆廠
曼聯上半場靠佢一個已經足以ko阿仙奴
當然兵工廠咁多防守球員夾手夾腳出錯又幫佢唔少
就算佢下半場表現轉沉
都有基治再次開埋條路俾星仔長驅直進
踢波踢到好似兵工廠咁好客真係少見

兵工廠少有咁屎
唔算突出既法比加斯已經係全隊最好
丹尼遜,基治同埋賓特拿簡直係屎上最強
小弟向來睇佢3條友唔順眼
感覺同睇大婆台見到鄧健泓冇咩分別

而艾沙維又係令人超失望
佢本身靠質素對住布朗簡直係屈機
最終都入唔到波
就只好怨自己埋門一腳奇差兼幾次犯左腦筋上錯誤
見到雲加冇殺手可用
就算雲佩斯可以提早復出都嫌佢遲

尋日怕且係曼迷今季最開心既一日
既有曼聯CEO基爾透露球會其實只係負債3.6億鎊
而唔係傳媒指既7億鎊
更有消息指曼聯支持者信託
會搵投資銀行 Seymour Pierce 既主席K.夏里士幫手

3) 非洲國家盃

埃及靠整體足球歷史性3連霸既同時
更令人為佢地近年多次缺席世界盃而可惜

講個人質素
科特迪瓦,喀麥隆以及尼日利亞都唔輸蝕俾佢地
亦首先唔好唸丁偉傑早兩日所提出心理上留力既理據係唔係成立
3隊唔擅長整體戰以及防守漏洞多多既負面影響
唔止係今次賽事功敗垂成
仲遠及佢地決賽週可以行到幾遠
幾個教練一定有排頭痕

而阿爾及利亞質素再差一班要靠穩守突擊搵食
偏偏防守比3隊名牌更差
丘仔睇佢地一場好波就捧到佢地咁高未免跟紅頂白

加納反而俾到小弟驚喜
半力都捱到個亞軍
靠既就應該係由第二場波開始改善既效率
至少唔再龜縮於後場30碼範圍俾人慢慢搓

2010-1-31

近兩日既新聞......

1)
賓尼迪斯再次否認下季接手祖雲達斯
而利記再次拒絕伯明翰對巴布既出價

另一方面,韋斯咸後防新星湯堅斯被傳成為600萬鎊增兵對象

2)
非洲足協以政治干預為理由
判罰多哥唔可以參加之後兩屆非洲國家盃
兼罰5萬美元
多哥足總已經提出上訴

3)
曼城仲未成功羅致加高
有報導指佢地可能改打帕爾馬肯亞中場馬列加既主意

另一方面,巴塞令人莫名其妙被傳想用保贊再加700萬鎊
向佢地收購胡禮菲臘斯

4)
祖雲達斯可能以基斯薜圖既一半擁有權加上500萬歐元
從熱那亞買回柏拿甸奴既一半擁有權

5)
愛斯賓奴證實米堡曾向佢地查詢中村俊輔既情況
不過就話從未收過任何 offer
而佢地亦表示唔相信佢會離隊

6)
AC米蘭落實從阿特蘭大引入16歲本土中場卡雲奴
佢地亦被指可能用贊古奴夫斯基同國米交換文仙尼
以及有興趣以2000萬鎊羅致維迪

另一方面,佢地早前落實將年青射手迪真拿路外借去利禾奴

7)
早幾日頭部中槍既卡賓拿斯已經恢復知覺兼可以同屋企人講嘢

8)
比高域決定轉投史篤城
令占士幾可肯定唔會離隊

而佢地亦準備同幾隊英冠球隊爭奪摩西斯

9)
愛華頓被指想以300萬鎊買斷當奴雲

10)
拉科可能收購佩尼亞替補長抖既菲臘比路易斯

11)
熱那亞,帕爾馬以及阿特蘭大達成三角交易
基斯普同埋艾基費斯卡分別以借用形式加盟帕爾馬同埋熱那亞
而N.阿武羅素(迪比亞路既大舅)就以賤價加盟阿特蘭大

12)
熱刺被指將會再次嘗試引入賓科士打

而由於治基治因傷再次提早收咧
哈利列納搵卡保爾作為替補
佢最初亦曾考慮過卡積亞
不過這名丹麥中堅索價10萬鎊週薪令交易胎死腹中

另一方面,新特蘭被指出價1000萬鎊收購羅比堅尼
而米堡,西布朗以及錫菲聯都想借用諾頓

13)
禾夫斯堡好可能因為價錢問題而放棄收購拉菲爾
而球隊早前從甘美奧引入利華漢拔圖
不過就有列卡度哥斯達離隊加盟里爾

14)
韋斯咸繼續斟酌比夏積
而巴勒莫就成為最新一間同比哈美扯上關係既球會

15)
阿仙奴被指打算從皇馬引入17歲西班牙翼鋒沙拉比
而沙格拿被傳成為國米既增兵對象

16)
新特蘭被傳準備截劫馬高莫達
而鍚菲聯就想向佢地借用諾斯禾菲

17)
波圖以500萬歐元從高士路羅致巴西射手基利巴

18)
朴主永落實同摩納哥續約3年

19)
些路迪即將從富咸接收卡馬拉

20)
士砵亭證實收購柏度文迪斯

21)
侯城唔打算賣走基賓尼

22)
漢堡被傳有興趣從拜仁接收泰摩斯卓克

23)
費倫天拿被傳想以借用形式增兵
對象包括卡斯辛奴以及賓菲加21歲巴西射手加利臣

24)
普雷斯頓,保頓同埋昆士伯流浪都打算向米堡借用安德魯泰萊
而後者就繼續斟酌卡辛

p.s.:
1)
華美倫最終冇事踢正選
相反曼聯有里奧停賽之餘
維迪連後備都冇
祝兵工廠球迷好運

2)
近日最屬目既花邊新聞一定係泰利勾義嫂
條友向來好色,篤背脊,衰格,貪小便宜收回佣咩衰嘢都齊
今次衰不忠仲要衰到連朋友妻都唔走雞
(同日多個舊情人亦乘機抽水爆料)

卡比路已經搵副手巴甸尼聯絡佢睇下點收科
隊長臂章同埋商業贊助冇晒都係事小
更大鑊既係有報導指佢老婆忍足10年終於心死
溝左條女,輸左頭家
抵死!

2010-1-29

1)
先講窮到官網都摺埋既樸茅
有傳格蘭同埋CEO史杜利都曾經考慮辭職
原因係球會唔問佢地就準備賣走卡保爾以及比高域
不過最後版本係佢地雙雙決定留隊

另一方面,樸茅成功從莫斯科斯巴達借用奧胡素
這名加納前鋒曾經效力阿仙奴
而佢地亦同美度以及奧尼爾扯上關係

2)
華美倫經檢驗後證實冇骨折
不過多數缺陣星期日對曼聯

另一方面,保頓成功借用韋舒亞到季尾

3)
消息指巴塞已準備暑假引入一名世界級球員
報導指哥迪奧拿屬意列貝利
但碧格列斯坦就主張羅致大衛施華

4)
紐卡素再借用兩名球員
來自昆士借流浪既中堅賀爾將會效力到季尾
而來自車路士既荷蘭年青左閘 Van Aanholt 就只係短暫效力1個月

另一方面,消息指紐記仍然準備為前線增兵
人選包括摩西斯以及挪威射手 E.Huseklepp

前者最熱門既落腳地應該不出紐記,西布朗以及森林
後者早前已經吸引利物浦,韋根,布力般流浪以及新特蘭既注意
而家就以史篤城最想同紐記爭人

不過兩者既身價都唔平
以紐記現時財力未必負擔得起

5)
保贊透過經理人否認將會轉戰英超

6)
梅度被驗出早前曾服用禁藥 Sibutramine
面臨停賽4年

7)
熱刺拒絕伯明翰對柏夫奴真高既800萬鎊出價
消息指佢地希望要收到至少1400萬鎊

而佢地亦拒絕外借賓特尼俾韋斯咸
因為佢地仲等緊願意收購佢既買家

另一方面,佢地落實外借杜斯山度士俾加拉塔沙雷

8)
消息指曼聯準備同安達臣同里昂交換洛里斯
不過現時形式只會係借用

而佢地亦落實經完成收購史摩寧
雙方簽約4年

9)
曼城落實外借週薪羅賓奴去山度士
先要多得當時人肯減薪4萬5000鎊
再多得曼城同埋山度士既贊助商肯以2:1既比例分擔餘數

而佢地已經同意新特蘭對馬華路禾尼既出價

另外,曼城有可能以1800萬鎊接收加高
以及以900萬鎊羅致阿當莊臣

另一方面,卡斯辛奴由於同迪蘭尼不和而可能離隊
曼城自然又同佢扯上關係

10)
國際米蘭即將以先借後買既形式羅致文路爾費南迪斯

11)
亨特拉爾表示唔會轉投英超球會
令佢既去向成疑

12)
韋斯咸羅致麥卡菲一事因為工作証而要延期
而占美尼斯就多數回流意甲,加盟帕爾馬

13)
拉素以先借後買形式由維拉利爾簽得烏拉圭中場艾古倫
而佢地被指想用洛基同烏甸尼斯交換G.迪亞哥斯天尼

14)
米堡從些路迪借用馬麥拿斯
不過佢地向黑池羅致查理阿當就失敗而回
另一方面,(米堡迷ck來料)佢地可能借用中村俊輔

15)
羅馬宣佈同艾斯普薛圖解約
佢以自由身轉投意乙格羅辛度
而卡卡奧亦再次有機以借用形式加盟富咸

16)
馬里足總決定唔同教練 S.Keshi 續約

17)
李天秀被沙地球會納斯放棄

18)
賓尼迪斯準備俾荷蘭年青中場 V.Weijl 返荷甲吸收經驗

19)
馬體會將巴西中場基巴辛坦拿賣到聖保羅

20)
C7上訴失敗而要停賽兩場
而佢既舊隊友里奧費甸南就上訴失敗之餘
仲被足總罰多場而要停賽4場

21)
森林落實外借後衛摩路尼到斯肯索普到季尾
而消息指佢地向史雲斯出價150萬鎊收購中場柏迪利

22)
古迪既經理人表示佢將會留隊

23)
費古羅亞落實同韋根續約到2012年
粉碎佢既離隊傳聞

24)
屈福特從伯明翰羅致馬田泰萊

25)
般尼落實從些路迪羅致左閘丹尼霍斯

26)
格流已經同意士砵亭對柏度文迪斯既出價

p.s.:
1)
香港隊選人又再次搞到好似羅氏夫婦邀請隊......

2)
祖記對國米羸左球符碌波就唸住下半場死守到尾
仿如縮埋牆角既'老婦人'
輸波而回後費拉利亦終於收皮
沙哲朗尼暫定做半季替工

意大利傳媒就再次指佢地想搵賓尼迪斯下季接手
仲講到似層層話會長白蘭斯已經去埋英國展開斟酌
係真唔係真呀?

2010-1-28

近兩日既新聞......

1)
祖國公安部尋日證實原足協副主席南勇同埋楊一民已經被刑事拘留
同樣命運既仲有裁判委員會主任張健強

另一方面,前足協高層範廣鳴被證實06年受賄操縱中甲賽事賽果

2)
史摩寧落實加盟曼聯
而曼聯之後將佢借用返富咸至季尾

而曼聯亦希望同韋根爭奪馬體會19歲年青龍門迪基亞
後者早前提出借用被拒絕

另一方面,佢地落實將杜錫外借去科隆
而安達臣就被傳擅自離隊返巴西
當地傳媒指佢可能加盟華斯高

3)
華美倫尋晚勇戰受創
消息指佢可能斷左腓骨
令蘇甘保星期日要臨危受命同加拿斯合作對付大勇既朗尼

4)
曼聯尋晚雖然反勝曼城入到聯賽盃決賽
不過球迷掟銀仔以及玻璃樽襲擊比拿美
最終佢俾球迷既銀仔掟中
肯定會俾足總追究

5)
紐卡素繼羅致魯迪治後
再從樸茅接收中堅威廉臣
而禾漢就被指係佢地既下一個增兵對象

6)
祖雲達斯最終可能由沙哲朗尼接手

7)
雖然莫斯科戴拿模聲稱已經同班拿約達成合作協議
只等賓尼迪斯落實放人
不過利記已經否認有關傳聞

另一方面,古治令人莫名奇妙咁同祖雲達斯扯上關係

8)
羅賓奴即將以借用形式加盟山度士
而曼城將獲對方兩名新星尼馬以及保羅漢歷基查加斯既優先收購權

另一方面,曼城好可能成功從羅馬借用馬高莫達

9)
皇馬被指將於下星期以400萬歐元收購簡拿利斯
而佢地亦再次同柏洛迪扯上關係

另一方面,魯爾既經理人透露佢可能於下季尾離隊

10)
C7最終被罰停賽兩場
佢同皇馬都表明會上訴

而佢既前隊友里奧費甸南因為早前開踭打法根
而俾英格蘭足總抽後算帳
面臨停賽3場處分
不過佢已經否認有關指控

11)
國米羅致16歲斯洛伐克射手積亞圖斯

另一方面,史尼達因為拍掌串球証而被罰停賽兩場
摩連奴以及總監柏利路因為賽後串球証而面臨相同命運

12)
AC米蘭決定同費華尼續約1年
佢將會兼任助教

13)
布力般流浪落實借用爾迪雷到季尾
而佢地可能順手從樸茅執埋迪丹尼

14)
古莊臣去左韋斯咸成功通過體測後
忽然改變主意加盟熱刺

而熱刺亦再次同卡積亞扯上關係

15)
哈利艾天托普為左爭取出場機會
而決定以借用形式法蘭克福

16)
樸茅可能將梅連斯賣去般尼套現
而奧哈拉就可能有機會重返樸茅

17)
新特蘭再次被傳出價1000萬鎊收購卡保奧

18)
狼隊再次被傳出價斟酌史堤夫亨打

19)
森比斯奧落實下季以自由身轉投羅馬

20)
水晶宮因為破產而即將被扣10分

21)
維拉利爾烏拉圭中場艾古倫即將以借用形式加盟拉素
而後者亦被指有興趣收購G.迪亞哥斯天尼

22)
查理阿當被傳成為愛華頓500萬鎊既羅致對象

23)
保頓同美國中場荷頓簽約到季尾

24)
基賓尼可能以40萬鎊轉投些路迪

p.s.:
尋晚曼聯羸曼城
曼城輸在中後場失色
只有基雲同埋甘賓尼表現比較好
文仙尼既調動亦唔係講波佬講得咁好

泰維斯一腳虎尾腳入波始終證明身價
更覺為討好費sir而貶低舊隊友既加利仔死討厭
不過更討厭既係本地政壇商界有無數類似'死蠢擦鞋仔'

2010-1-26 (2)

近兩日既新聞......

1)
國家體育總局局長劉鵬表示
在群眾體育,體育產業以及體育文化建設方面
中國同體育強國仲有差距
而當局會進一步整頓足球圈既假波問題

2)
消息指祖雲達斯同軒迪克就人工方面未能達成協議
而佢地被指改打賓尼迪斯既主意
不過賓帥已經否認有關報導

另一方面,尹巴士頓,白蘭斯,艾歷臣以及干地亦同老婦人扯上關係

3)
賓尼迪斯承認利記同新特蘭就堅韋尼鍾斯既轉會展開會談
已會談早於上個月展開

而利記亦被傳想羅致米蘭祖雲奴域
不過最終失敗而回

另一方面,有報導指阿仙奴可能接收巴布

4)
希斯賣走旗下棒球隊套現5億鎊
不過一般估計佢只會將資金同自己還債

5)
有報導指富咸已經同時接受曼聯以及阿仙奴對史摩寧既出價
不過最新版本係當時人決定加盟前者

6)
朗尼表態唔會離開曼聯
不過安達臣尋日缺席操練
因而再有佢既離隊傳聞

另一方面,費sir為左幫親生仔
落實將韋碧克借去普雷斯頓

7)
紐卡素爭羸米堡
成功從昆士伯流浪羅致魯迪治

8)
比安基拒絕由球會經理轉任教練後決定離後小保加
而球隊落實由看守教練艾維斯坐正

9)
山度士方面承認可能以借用形式引入羅賓奴
報導指當時人為左保住國家隊席位而願意減一半人工

而曼城仲未同皇馬就加高既轉會費達成協議

另一方面,佢地被傳同拜仁爭奪保方

10)
狂人基達菲嗰仔被傳有興入主樸茅
不過已被有幾個可能買家既樸茅拒絕

另一方面,樸茅既禁買令已經獲得撤銷

11)
科拿被傳將同昆士蘭風暴解約
而佢承認老婆唔適應當地生活

12)
告魯夫透露哥迪奧拿只係口頭承諾會同巴塞續約

13)
布力般流浪打算借用爾迪雷
而紐記被指想向佢地羅致安祖斯
不過報導話用到辣椒仔作為交易條件就反映可信性唔大

14)
韋斯咸正式出價50萬鎊收購麥卡菲
而佢地繼續同古莊臣,比亞堤,以及馬華路禾尼扯上關係既同時
佢地又忽然被指想用卡頓高爾同熱刺交換羅比堅尼

另一方面,佢地被指就艾殊頓代表英格蘭期間受傷而要提早掛靴
向英格蘭足總索償1500萬鎊

15)
加拉塔沙雷即將從熱刺成功借用杜斯山度士

16)
哥斯美向利禾奴請辭

17)
車路士拒絕安歷卡12萬鎊週薪既續約條件
因而有傳佢可能於暑假被賣走

18)
阿歷士施華落實以借用形式由漢堡轉投聖保羅

19)
辛達路斯落實以借用形式轉投愛華頓
而拖肥糖承認亦有興趣引入亨特拉爾

20)
般尼考慮從些路迪羅致丹尼霍斯

21)
些路迪從邦比借用24歲丹麥射手拉斯武臣

22)
禾堡決定解僱教練華亞

23)
卡賓拿斯遇襲,頭部中槍重傷

24)
艾沙姆可能為左爭取出場機會而轉投漢諾威

2010-1-26 (1)

幾場波想講......

1) 史篤城對阿仙奴

一對七十後既替工後衛頻頻出醜
加上法比安斯基已經雪到硬晒
令雲加少左個好機會結束冠軍荒

小弟都同意雲加選擇搏英超以及歐聯既決定
畢竟兩個大盃先係佢既終極目標
不過如果雲加唔為後防增兵
似乎最終要再失望多一季

小弟向來都話兵工廠買後衛緊要過買箭頭
因為要一對正選中堅到季尾都保持身體健康兼有貨交
絕對係苛求

2) 國米對AC米蘭

國米贏6分波羸在整體守得穩
用馬干以及辛尼迪夾擊細哨已經廢左對手一半武功
而齋靠速度打返擊已經玩謝對手
不過彭迪夫既兩腳靚波亦係球隊既及時雨

AC米蘭方面
艾比迪同埋費華利絕對係後防毒瘤
不過後者年老力衰兼俾人雪到硬晒
要怪就怪高層頭重尾輕既增兵政策
成隊波只有派路以及後備入替既施多夫比較似樣
佢地帶俾國米既麻煩
遠遠及唔上執法過嚴既球証

3) 皇馬對馬拉加

早前大學老師何良接受伯明翰喉舌報訪問
曾經講過覺得C7性格上似占士甸
小弟都幾有同感

事實上條友真係天使同魔鬼既混合體
今季第二次做完羸波英雄之後發老脾打人
不過佢今次更令人反感
賴拉衫在先既對手太矮先會俾佢打爆個鼻
真係等天收!

小弟唔信佢會被罰11場停賽咁誇
不過3場既最低消費應該走唔甩

佢係皇馬陣中最搶鏡既新兵
冇左佢仲有希古恩養傷
佢地同巴塞既差距隨時於短期內去到雙位數

p.s.:
想講下非洲國家盃
冠軍首選大象同埋心頭好獅子相繼出局
都可以話係衰防守

之前已經講過科特迪瓦中路防守唔掂
結果俾忽然回勇既阿爾及利亞偷雞

而喀麥隆90分鐘內唔使輸
只係有運兼對手埋門把握差

冇左尼高拔桑治出場
又輪到謝列美爆鑊
以佢地咁既防守加上全隊只有卡文尼以及伊文拿比較似樣
就算唔計哈辛既誤判入球
佢地都冇本事平返敗局

防守已經成為兩隊非洲強隊6月創造歷史既最大隱憂

2010-1-24

近幾日既新聞......

1)
國足既反假波行動已經捉到高層
國家體育局宣布委任水上運動管理中心主任韋迪
接替南勇出任足球管理中心主任兼黨委書記
而另一個副主任楊一民亦被撤職

消息指南勇接受調查
可能係選擇中超聯贊助商做手腳
搞到足協收唔返有5400萬人仔既贊助費
佢亦被指濫權向天津泰達推薦哈恩擔任主教練

另一方面,前遼寧球員呂東因為開賭場而被判監三年
另要罰款150萬元人仔

2)
利物浦同亨克達成合作協議
雙方簽約到2014年

雙方可共用球員資料庫
而利記可能將部份非歐盟球員先送去亨克吸取經驗
亨克亦有優先權向利記借兵

3)
泰維斯以及加利仔最終一齊俾英格蘭足總警告

4)
雲佬最終決定轉投漢堡
雙方簽約年半

5)
巴塞忽然被傳有興趣借用費文尼
佢地亦被指考慮從波爾多借用阿布度查奧爾半季
到季尾再正式買斷佢

6)
曼城最終可能將羅賓奴借返去山度士
而韋爾斯已率先被外借去保頓

另一方面,卡斯辛奴同埋比哈美再次同曼城扯上關係

7)
布魯士狂插利物浦向堅韋尼鍾斯招手
亦令巴布交換佢既交易未能成事

而新特蘭落實以200萬鎊引入基加隆
比耶亦可能以180萬鎊轉投

8)
艾辛因為膝傷而要缺陣1個月
而車路士被指考量從摩納哥引入謝高歷高作為替補

9)
賓菲加既大衛路易斯被傳成為皇馬既新中堅人選

10)
辛達路斯落實外借到愛華頓
而碧福特最終決定留隊到季尾
令佢同拖肥糖已經簽左協議書下季加盟既傳聞更可信

11)
蒿俊閔以自由身加盟史浩克04

12)
巴斯利因為小保加戰績差而請辭

13)
熱刺被指有興趣從皇馬接收迪亞拉

而國米再次被指有興趣羅致贊拿斯
報導指佢地想出價1000萬鎊或者以蒙達利交換

14)
利禾奴可能以借用形式引入龍格堡

15)
消息指韋斯咸以10萬鎊週薪吸引一名星級球員加盟
一般相信應該係已經落實加盟漢堡既雲佬

而麥卡菲亦被傳係另一個新箭頭人選
布力般流浪亦對這名南非射手有一定興趣

另一方面,佢地既副主席提議球會改名韋斯咸奧林匹克

16)
曼聯再次同基亞連尼以及杜尼扯上關係
而費sir被傳睇中兩名15歲瑞典球員
分別係布洛馬波卡納前鋒迪柏寧
以及華斯達拉斯隊中場史祖貝治

另一方面,杜錫同埋韋碧克可能被外借去科隆以及普雷斯頓
當中費sir嗰仔最近接手後者

17)
紐卡素被傳有興趣從樸茅以100萬鎊接收米克威廉斯

而蘇蘭奴最終決定加盟李斯特城
佢同領隊皮雅臣當年曾於紐記合作

18)
麥利殊再次被傳考慮同舊部屬基斯保迪合作
而加特拿即將以300萬鎊加盟

19)
薩拉戈薩決定同艾耶拉解約
佢會去河床跟操試腳
如果未能成事可能索性掛靴

20)
富咸再次同比亞堤扯上關係

21)
祖奧落實被外借去加拉塔沙雷

22)
巴勒莫既格魯吉亞射手麥希里迪斯被傳成為拿玻里既增兵對象

23)
科拿忽然唔肯為北昆士蘭風暴上陣
隨即有傳聞指佢可能離隊

24)
洪都拉斯射手 L.費古羅亞落實由熱那亞重返母會羅沙里奧

25)
維拉利爾既阿根廷中場馬高魯賓即將轉投韋根
而馬略卡射手阿杜利斯亦再次同韋根扯上關係

26)
施馬克落實由史特加轉投緬恩斯

27)
侯城控告前主席保羅杜芬穿櫃桶底

28)
國米被傳打算將哥利斯馬外借去士砵亭

29)
般尼落實從摩納哥借用法國前鋒利文尼
而佢地亦被指同史篤城爭奪鍚週三龍門李爾格蘭

p.s.:
1)
狄恩可能搵到格穆巴特幫手護級
佢當年有份幫喀麥隆羸悉尼奧運金牌
小弟這個喀麥隆球迷聽到都好興奮

2)
從來唔係愉園既球迷都唔想見到佢地衰
而家護級形勢水深火熱
仲要有消息指球員近日冇糧出
就算貝先生保證愉園唔會變普高既翻版
情況始終令小弟擔心

2010-1-21

1)
歐洲足協公布09年最佳陣容:
卡斯拿斯,丹尼爾,佩奧爾,泰利,艾夫蘭,
C7,卡卡,沙維,恩尼斯達,美斯同埋伊巴
(6個來自巴塞+3個來自皇馬)

而最佳教練就係落實同巴塞續約1年既哥迪奧拿

2)
軒迪克既經理人透露這名荷蘭教頭既下一站有9個選擇
當中包括利物浦,祖雲達斯以及土耳其國家隊

不過利記老闆吉列就公開支持賓尼迪斯
謝拉特亦否認同賓帥既不和傳聞

3)
由於董事局部分成員分擔部分開支
令本地波腫今年既財赤得以減半
而之後香港於東亞足球錦標賽至少收到15萬美元獎金
將會進一步減輕佢地既財政壓力

4)
雖然漢堡同亨特拉爾扯上關係
不過佢既經理人透露幾間英超球會都準備引入佢
一般估計佢既落腳地不出阿仙奴,利物浦以及熱刺

5)
曼聯既最新財政報告透露負責高達7億鎊
另一方面,奧沙因為罕有既血塊問題而好可能提早收咧

6)
桑坦德表明如果有球員肯收購簡拿利斯後
將佢外借俾佢地多半季
佢地會考慮於1月落實賣走佢
傳聞皇馬係最有可能既買家

另一方面,皇馬被傳有興趣引入畢斯杜巴以及迪羅斯

7)
有報導指巴布改變主意考慮轉投伯明翰
不過麥斯盧比斯就可能俾卡坦尼亞截劫
而伯明翰亦被傳打算收購史葛布朗

另一方面,馬田泰萊就可能轉投李斯特城

8)
聯賽盃4強既曼城打呲仲有手尾
加利仔可能因為向泰維斯做粗口手勢而被罰停賽
而曼城亦應要為球迷向艾夫蘭掟打火機而付出代價

9)
馬里正式向非洲足協投訴安哥拉以及阿爾及利亞既默契波令佢地出局
而簡奴迪宣佈退出國家隊

10)
文仙尼暗示準備羅致費文尼以及加高
另一方面,祖奧因為紀律問題而可能俾愛華頓退貨
佢可能被曼城回收再外借到加拉塔沙雷

11)
愛華頓被傳想搵碧福特季尾以自由身加盟

12)
基拔斯因為蹠骨傷患可提早收咧

13)
丹尼臣被傳可能轉戰澳職,加盟珀斯光輝

14)
侯城以及富咸被指爭奪美度

15)
祖亞昆被傳成為馬賽既羅致對象

16)
韋斯咸被傳打算出價200萬鎊收購雲佬

17)
樸茅上訴稅款太多一案被裁定失敗

而蘇甘保同埋烏甸尼斯就好似驚佢地唔死
兩者分別追討167萬鎊獎金以及肖像權費用
以及蒙達利當年轉會既350萬鎊尾數

另一方面,由於史篤城同佢地以及占士未能就人工達成協議
令佢未能如願以借用形式加盟

18)
史隆卡落實接手漢諾威

19)
除左紐根特外
般尼亦準備從摩納哥引入法國U-21射手 F.Nimani

20)
拿玻里被指有興趣將G.羅斯帶回意甲

21)
布力般流浪可能從維拉利爾借用烏拉圭中場艾古倫

22)
普斯邦由於紀律問題而俾布拉加送回曼聯
有報導指費 sir 考慮將佢外借去紐卡素

23)
利禾奴既借將簡達華落實轉投祖雲達斯
佢先以借用形式加盟
季尾老婦人會以700萬歐元正式收購

而利禾奴落實從熱那亞借用安德列艾斯普薜圖
以及從森多利亞免費羅致老將射手貝路斯以補充實力

24)
狼隊成功引入比利時新晉國腳 G.Mujangi
20歲既佢可以踢左右兩翼

25)
羅馬成為最新一間同森比斯奧扯上關係既球會

26)
中國足協副主席南勇以及楊一民因為假波案而俾公安部拘留

27)
史篤城被傳準備引入奧尼爾

p.s.:
雲加尋晚賽後厚顏話球員趁人地受傷繼續比賽唔應該被投訴
佢當年因為笨小孩事件而主動破天荒提出足總盃重賽
而家似乎已經唔記得咩係公平競技
羸波輸品先係尋晚兵工廠最真實既賽果

2010-1-20 (2)

兩場波想講......

1) 曼城對曼聯

曼城計表現算係略勝曼聯
不過羸波或多或少因為甸恩兩個具爭議性判決
事實上佢多個判決亦略嫌偏幫曼城

可能同對手係死敵曼聯有關
曼城尋晚既水準同上場對愛華頓簡直係兩隊波
防線全場都好集中
就算頭尾兩段俾人圍抽都守得好穩
踢左大半場波既新仔保耶達亦冇騰騰震
而文仙尼崇尚既3防中陣式亦發揮作用
當中以尼祖迪莊最為搶鏡

曼聯方面
後防一對中堅繼續靠唔住
拉菲奧達施華面對比拿美亦於速度方面處於下風
5人中場受制於對手而佔唔到太大甜頭
負責支援前線既安達臣亦再次隱形
令朗尼長時間於前線孤軍作戰
費sir求其搵多個前鋒轉踢4-4-2都好過靠安達臣

不過睇晒成場波
小弟覺得文仙尼既臨場調動值得商榷
換走保耶達既唯一合理解釋係文仙尼驚佢頂唔住曼聯既狂攻
但隨時唔覺意打擊左小朋友難得建立既自信
而換走最勁既泰維斯就不如一早換走傷癒未 top fit 既胡禮菲臘斯
搞到曼聯更加無後顧之憂
而最後換入施雲奴後無理由搵佢踢中場四圍走
無速度既佢就算有波在腳都冇本事突圍

一味死守都要守得其法
只憑3防中踢法就唸住獨步天下
佢就算繼續有運捧得到盃仔
都唔使旨意羸英超同埋歐聯
賓尼迪斯當年帶華倫落後皇馬11分都可以後上羸聯賽
而家就算利記超低潮
後上守住前4一定唔係 mission impossible

2) 紐卡素對西布朗

由於紐記既壓迫冇森林咁快咁緊
西布朗係踢得比上場輕鬆
其實客隊主要踢簡單足球
分兩邊再傳中搵機會
貝特拿同埋後備既米拿都唔係超班既空中霸王
紐記要防守其實唔太難
偏偏佢地全場俾對手於禁區太多機會
客隊反客為主於禁區既8次攻門仲多過佢地全場既機會
如果米拿好運少少
佢地隨時連主場不敗既金漆招牌都保唔住

紐記近況回落連和3場
當中和錫週三以及西布朗都係衰後防唔夠集中
佢地而家聯賽領先全因之前防守做得好
如果能夠改善防守
直接升班既機會其實依然樂觀

另一方面,佢地今季始終幾韌就值得一讚
佢地今季踢聯賽試過8次落後
最終有5場都追得返,甚至反勝
值得備忘

p.s.:
1)
盧雲卡蘭斯擺脫亡父之痛入波
夠晒敬業

當年利記既卡馬拉於聯賽前收到老豆死訊
一樣超專業咁延期返祖家奔喪
仲一樣入波獻俾亡父

利迷事隔多年依然記得只係踢過一季既佢
佢最近就俾利記選為歷來最受歡迎球星既第91名

2)
紐記下季轉著 Puma
睇非國盃見過加納同埋科特迪瓦既新衫
印象中 cutting 唔錯
大象既紫色龍門衫仲幾 sharp
大家下季可以考慮入貨