2011-4-12

近兩日既部份新聞......

1)
由於拜仁已跌至德甲第4
雲高爾最終提前5場落鑊
球隊暫由助教卡祖接手

2)
菲臘湯臣爆料指利物浦已搞掂荷西安歷基既收購
報導仲話佢既身價高達850萬鎊
而高捷斯基就好可能以150萬鎊俾富咸回購

另一方面,費倫天拿季尾好可能大換血
利記就被指有興趣出價1150萬鎊接收華加斯

3)
泰維斯因為尋晚對利物浦拉傷腿筋而要養傷兩星期
佢將會缺席對曼聯既足總盃4強大戰

4)
托利斯加盟以來仲未開齋
油王被傳考慮季尾賣走佢止蝕

5)
阿拉干尼斯被傳下季重返馬體會接手

6)
幾段阿仙奴既消息……

高安基用3億鎊買多32%阿仙奴股份
佢而家既持股量已經增至62.89%
報導指佢之後會向烏斯曼洛夫收購佢既27%股份

另外,幾名棄將各有新聞
基治表態希望同阿仙奴續約
而賓特拿就再次被指將以800萬鎊轉投漢堡
至於路斯基既經理人透露這名捷克中場仲未收到其他球會既 offer

而韋舒亞以及基拔斯雖然唔在棄將之列
不過亦有轉會傳聞
報導指佢地吸引到曼城既興趣
前者既身價仲直迫4000萬鎊

另一方面,丹尼臣游說韋利安考慮轉投兵工廠
而馬維拿就被傳成為雲加既新防中人選

7)
盧卡古既經理人透露巴塞希望引入這名新星射手
不過600萬歐元既出價同安德烈治既2000萬歐元叫價有好大距離

8)
報導指一旦唔獲曼聯續約
奧雲就會考慮轉投愛華頓

9)
保加拉再次被傳成為紐卡素既新中堅人選
而黑池就被指希望下季向紐記借用出場機會唔多既蘭加

10)
皇馬被指準備出價3000萬歐元
另加無機會出場既加高
同羅馬交換迪羅斯

11)
雖然辛達告魯斯持續死火
不過布力般流浪依然希望季尾買斷佢

12)
馬斯查蘭奴既經理人否認這名阿根廷防中準備轉戰意甲既報導

13)
昆士伯流浪被指想搵保耶以自由身過檔

14)
雖然有報導指曼城想搵施多夫過檔
不過佢就表態希望同AC米蘭續約

另一方面,伊巴謙莫域因為再次見紅而要停賽3場

p.s.:
1)
還返3蛋俾曼城
爽!爽!爽!

2)
上個星期買左幾隻老翻VCD
其中一隻叫 Shearer the Legend
今日睇完先發覺有齊佢為紐記入既206球
10蚊真係抵到爛

最衰柏金告別賽同埋比利專集都冇現貨

2011-4-10

1)
科拿落實同珀斯光輝簽約1年

2)
羅馬忽然被指考慮回購阿古蘭尼

3)
拜仁被指已有3名新右閘人選
當中包括雲達韋爾,安達斯碧克以及拉菲爾

另外,佢地亦再次同卡積亞扯上關係

4)
卡頓高爾涉嫌捲入一宗強姦女學生既案件
不過消息指嫌疑犯就唔係佢
而係佢既一個朋友

5)
阿費利被指為左有穩定既出場機會
以保住國家隊既席位
好可能於季尾離開巴塞
消息指利物浦以及阿仙奴都準備接貨

6)
日本可能如期參加美洲國家盃
但入選球員就會全數係出國搵食嗰批

7)
曼城被指準備出價1200萬鎊收購艾利亞

8)
盧卡古被指成為紐卡素既新箭頭人選

9)
熱刺再次同科蘭扯上關係
而比錫達斯亦對佢有好興趣

10)
傳聞雲加已有換血名單
基治,艾沙維以及賓特拿都會被賣走
而艾蒙尼亞,伊保爾,迪亞比,丹尼臣以及路斯基亦好可能冇得留低

另一方面,艾文達以及安哥拉防中 B.Matuidi 都被指成為兵工廠既增兵對象
而愛華頓亦被指考慮向聖伊天出價收購後者

11)
卡蘭歷以及艾維斯都被指成為維拉既增兵對象

12)
雖然格羅素被傳季尾離開祖雲達斯
但消息指佢最終決定留隊到下季

13)
保贊好可能因為膝傷而提早收咧

14)
曼聯準備同夏格維斯續約1年
而貝碧托夫就被傳成為收購紐亞既籌碼
另一方面,馬高馬連忽然被指成為佢地既1500萬歐元增兵對象

15)
域咸落實同葉士域治續約到2014年
粉碎佢既轉會傳聞

16)
泰禾被傳成為皇馬既新左閘人選

17)
英國傳媒指多達6間外國球會考慮引入李奧曲加
當中包括華倫西亞,西維爾,加拉塔沙雷,羅馬,祖雲達斯以及拿玻里

18)
AC米蘭被指考慮羅致拿維斯

19)
消息指古利季尾約滿巴黎聖日耳門後
會以自由身轉投卡塔爾球會艾薩德
雙方簽約1年

20)
費倫天拿決定為蒙杜利禾提供新約
而如果成事就會令G.迪亞哥斯天尼回流烏甸尼斯

21)
比耶列甸洛夫可能回流俄超,加盟辛尼特

p.s.:
雖然幾多前已經搵人攞左個笠臣簽名
不過一直以來都好想見佢真人
今次又因為私務忙碌而又miss多次
可惜!!!

2011-4-9

近兩日既部份新聞……

1)
謝拉特落實提早收咧

另外,利物浦將於7月再次訪問亞洲
目的地包括廣州,吉隆坡以及首爾
中國傳媒指利記將會約戰廣東日之泉

另一方面,勒邦占士旗下既經理人公司入股利記
佢仲會出任利記既代言人

2)
球員先生有官方候選名單
當中包括泰維斯,柏加,查理阿當,維迪,雲達華治,格夫里巴利以及拿斯尼
而後兩者同時競逐年青球員獎項
其他候選人就包括韋舒亞,祖赫特,查維亞靴蘭迪斯,蘭尼以及高文

3)
車路士再次同卡卡,尼馬以及阿古路扯上關係
而油王亦再次被傳想搵格蘭出任技術總監
不過佢地已經向韋斯咸澄清冇咁既事

另一方面,羅馬再次被指想搵肥安返母會接手
而佢就透露唔係因為收到老細order而死撐托利斯

4)
甘賓尼被指成為拜仁既新中堅人選
不過曼城方面已經表明唔會放人
而奧奴夏以及胡禮菲臘斯就再次被指可能過檔利物浦

5)
朗尼上訴失敗
將要由今晚起停賽兩場

另外,英國傳媒就指足總成功檢控朗尼
係靠要求球證後補佢既爆粗report
事緣球證最初寫賽後報告冇唸住寫死佢

6)
曼聯被指同熱刺爭奪侯克
而這名巴西箭頭已經表態想轉戰英超
而紅魔亦被指有興趣引入施丹嗰仔

而佢地將會為加利佬搞告別賽
對手就係祖雲達斯

7)
雲高爾以及馬沙利都再次被指接手祖雲達斯
而祖記就被指考慮引入艾迪巴約以及艾沙維

8)
哥拉爾迪落實出任博洛尼亞既新主席
佢已經係球會10個月以來既第5人

9)
早前聖保利球迷搞事
令對史浩克04既聯賽被迫腰斬
德甲賽會決定罰佢地對雲達不來梅既聯賽閉門作賽
而當日落後0:2既賽果就被定為最後賽果

10)
格夫里巴利早前雖然已同熱刺續約
不過英國傳媒指一旦熱刺下季無緣歐聯
佢依然會考慮提出離隊

11)
國米被指準備出價2500萬鎊收購泰維斯
報導指佢會因應國米新教練人選先作最後決定

12)
阿迪達被傳回流西甲,加盟華倫西亞

13)
基恩以及馬路達都被指成為拜仁既增兵人選

14)
侯利亞透露準備同李奧曲加傾續約

15)
紐卡素再次同卡蘭積卡扯上關係之餘
亦被指準備接收布朗

16)
巴勒莫透露同小保加6月季尾約滿後掛靴

17)
韋斯咸想搵謝拉以自由身過檔

2011-4-8

應承左紐迷Ricky會講護級形勢……

以而家榜尾既韋根都有31分
護級份子又至少仲有7場未踢
怕且最終至少要有40分先可以成功護級

由第13位既西布朗講起
鶴臣似乎只係岩教中下游球隊
接手後6場英超都唔知嗰輸字點寫
只要keep住個勢
就算距離保險線只有4分優勢
加上餘下賽程唔算易踢
前景都依然樂觀
畢竟已經36分在手

布力般流浪方面
考慮到佢地要於主場兩鬥曼徹斯特雙雄
又要作客韋斯咸以及狼隊
主場對伯明翰以及保頓會係護級關鍵

如果而家領軍既係 Big Sam
護級成功既機會應該大好多
又或者根本唔會淪落到排14
就算堅恩最終協助球隊護級
嗰個唔知米價既印度老闆都應該會送佢一程

其實佢地最好既球員都係來自後防以及箭頭
穩守再靠前線個別球員偷雞
應該先係比較岩佢地既踢法
一日冇好 keyman
硬改主攻踢法只會帶來結構性問題

伯明翰方面
羸聯賽盃後輸晒兩場6分波大戰
令佢地既護級前途持續唔明朗

後防有史葛丹恩提早收咧固然大鑊
賓科士打以及羅渣莊臣既表現更加重要

而前線既施積始終唔適應英超而已經退居後備
佢下季離開英超既傳聞絕對正路
可惜兩個借將馬田斯以及賓特尼都唔見好幫到手
前線繼續死火都好正路

佢地比其他護級對手踢少1場係佢地既最大優勢
考慮到佢地今季作客戰鬥力嚴重下滑
餘下3次主場出擊應該好關鍵

雖然主場羸波率只得31.25%
不過未來對手只係新特蘭,富咸以及狼隊
前兩者護級壓力唔大
後者又只係排尾二既護級份子
如果咁都唔爭氣
降班都唔抵可憐

維拉方面
侯利亞於1月針對防中以及前鋒弱點而增兵
不過球隊整體戰績依然冇大改善

論人腳佢地肯定好過所有護級對手
加上賽程唔算難啃
降班應該輪唔到佢地
唯一憂慮就係將帥不和
這亦可能係佢地今季仆直既最大原因

另一方面,侯利亞早於執教法國以及利物浦既時候
已有引咎請辭既前科
暑假帶隊踢英超挑戰盃既領隊應該另有其人

黑池方面
查實爆冷ko利記後既11場英超
佢地只係1勝2和而攞得5分
同期戰績嚴重跑輸大市
正好解釋點解跌到尾4

佢地向來識攻唔識守
入46球既攻力只係差過前4 以及紐卡素
不過平均每場至少失兩球既防守能力何止全英超最差
簡直連踢英冠都大檸樂
而當對手越來越肯定佢地只係查理阿當既1人球隊後
有針對性部署就自然唔難ko佢地

另一方面,佢地係全英超唯一一隊主場仲差過作客既球隊
就算餘下7場波可以5度於主場出擊
對佢地都未必係好事

荷路維早前預期羸多兩場波攞到39分就可以上岸
怕且佢應該以韋根,紐卡素,史篤城以及保頓為搶分對象

韋斯咸方面
雖然羅比堅尼火速打柴
不過球隊既表現以及戰績都有改善
關鍵就在於而家唔再係柏加既1人球隊
希斯佩加以及丹巴巴亞都相繼成為格蘭既穩膽
加埋麥克盧保表現回勇
對球隊中前場發揮有正面作用

而格蘭亦終於似返個領隊
識得因應對手而靈活運用加利奧尼爾,卡頓高爾以及比基安尼
代表作包括變陣4:3:3
以3:0技術性擊倒唔識貨既史篤城

佢地而家只得32分
至少要羸到3場波先至比較穩陣
佢地餘下既賽程可以話係先苦後甜
尾嗰3場相對比較易踢
所以就算佢地5月頭依然落後
護級應該仲未絕望

狼隊方面
英國賭波公司普遍幾睇好佢地護級
因為佢地主場特勁
羸波率接近一半
而這亦係佢地護級既最大本錢

不過,史堤夫亨打提早收咧之餘
奇雲杜里季內復出既機會又唔大
整體戰鬥力於護級份子當中更見不足

韋根方面
近兩場雖然搶到4分吊命
不過形勢依然水深火熱
歸根究底都係攻不銳,守不穩既老問題

馬天尼斯雖然已經keep住調節球隊攻守
不過始終講求控球在腳
但球隊最終冇一個可靠既射手負責最後一腳
從首席射手洛達歷加都只係入得7球已略知一二
而域陀摩西斯亦始終有待磨練
這亦解釋到點解韋根既攻力係英超最差

另一方面,佢地中後場球員質素一般
控球在腳既踢法於失波後往往輸反擊
情況同黑池相若

考慮到佢地餘下賽程幾難啃
本身又無甚本錢求生
重返英冠應該只係時間問題

p.s.:
由季初到而家
狼隊以及韋根依然係小弟既降班心水

另一隊相信走唔出伯明翰,黑池同埋韋斯咸
對後兩者有情意結
希望佢地可以逃出生天

2011-4-7

1)
杜查奧斯基落實以自由身轉投西維爾
雙方簽約4年

2)
若果日本退出美洲國家盃
消息指西班牙將會補上

3)
AC米蘭被指有興趣羅致C7
不過摩連奴已經表明唔會放人

另一方面,尼斯達決定至少踢多一季
不過紅黑兵團就忽然被指想搵加利卡希爾或者維頓漢做佢接班人

4)
阿仙奴將於季尾以100萬鎊從查爾頓收購本土左閘卡爾京遜

而佢地亦再次同保方扯上關係
比拿里奧就係雲加另一個新龍門人選

另一方面,伊保爾被指成為熱刺既增兵對象

5)
貝斯因為腳踭傷患而提早收咧
而賓艾化就已經可以慢跑以及獨自訓練

6)
堅尼可能接手墨爾本勝利

7)
消息指黑池準備將查理阿當既身價定為3500萬鎊

8)
布力般流浪被指打算接收奧雲

9)
施多夫可能轉戰巴甲,加盟哥連泰斯

10)
雖然近期被傳成為曼聯以及巴塞既增兵人選
不過馬里奧葛斯就表態短期內唔準備離開多蒙特

11)
艾加因為膝傷而提早收咧
而利物浦就再次被指考慮收購基治以及軒達臣

12)
富咸想搵李奧曲加以自由身過檔
而漢基蘭就被指成為拜仁既新中堅人選

13)
意大利傳媒指李安納度將於季尾落台
不過莫拉堤就否認有關報導

14)
保路錫被指成為熱刺既新龍門人選

p.s.:
費sir尋晚破盡數據ko肥安
固然要多謝球證數鬆唔罰艾夫蘭
而另一關鍵就又係在於防守

朗尼超多時間墮後中場
表面係 4-4-2 既陣式實情係 4-5-1
而卡域克落實續約後狀態回升唔少
係球隊既無名英雄

而復出既里奧以及雲達沙亦都有水準表現
當中後者撲出托利斯頭槌既動作
絕對係近期見到既最佳撲救

車仔方面
最大問題其實係進攻
托利斯表現其實有改善
兩次門前漏油以及頭槌俾雲達沙救到
算係有少少冇運

要提升車仔火力
關鍵係肥安點樣改造杜奧巴
因為杜奧巴而家不但要墮後
有時亦要於右路同艾夫蘭過招
但兩瓣都唔係佢既必殺技
徹底浪費左佢開山劈石以及埋門既攻能
既然係咁
倒不如要兩大箭頭一齊等供應
對對手中路既牽制應該仲大

另一方面,施哥夫已經雪到硬晒
下半場被換走前仲簡直隱形
雙方季尾怕且應該考慮轉會既可能

佢地既後防反而問題唔大
畢竟傑斯助攻前既一控一推都係世界級水準
失波都係非戰之罪

2011-4-6

近兩日既部份新聞......

1)
英格蘭球員先生已有候選名單
當中包括泰維斯,維迪,格夫里巴利,柏加,查理阿當以及拿斯尼

2)
消息指紐約紅牛有興趣接收杜奧巴

3)
朗尼以及格蘭都因為行為不檢而俾足總罰停賽兩場
前者就表態會提出上訴

4)
雖然祖雲達斯方面否認保方離隊既傳聞
不過佢地被指依然準備同史杜拉利續約3年
似係做定兩手準備

5)
艾迪巴約以及域陀摩西斯被傳成為紐卡素最新兩個新箭頭人選

6)
由於加度素既經理人被揭發私自同安卡接觸
非常不滿既AC米蘭被指打算索性賣走佢套現

7)
昆士伯流浪重返英超在即
報導指柏加正係佢地首個收購對象

8)
曼聯以及曼城都被指準備出價2500萬鎊收購桑馬達
而前者亦同馬治斯奧扯上關係

9)
利物浦再次同胡禮菲臘斯扯上關係

而杜格利殊就被指派球探觀察馬瑟韋爾翼鋒 C.Humphrey
由於佢阿媽係牙買加人
佢可以選擇代表出生地蘇格蘭或者牙買加上陣

10)
富咸被指準備出價300萬鎊收購耶保

11)
華倫西因斯既喀麥隆國腳邦治被指成為新特蘭既新左閘人選
而布魯士亦被傳睇中史雲斯既祖名倫

12)
西布朗打算搵李奧曲加以自由身過檔

p.s.:
1)
國米4日內兩度俾對手大炒3球
雖然兩次都有捷禾見紅
不過路人甲都知真正關鍵係防守做得唔好

李安納度一日唔識打好嗰底
佢都只係一個有星味既二流教頭

2)
法比加斯炒車大難不死
小弟第一個反應係當年冇佢咁好彩既倫天尼
這名當時係全球最貴既天才翼鋒足足養傷9個月
亦從此返唔到高水準

同倫天尼相同命運既仲有而家南華教練團成員既安尼頓
佢當年以正選身份協助聖保羅擊敗AC米蘭羸得洲際盃
之後又係因為炒車而養傷1年
最終輾轉淪落港甲

3)
祖國狗官近日又做埋咁多陰質嘢
憤怒!!!

2011-4-4

近兩日既新聞......

1)
巴特鐘斯將於季尾被利物浦放棄
祖高爾就被傳成為富咸既增兵對象

另一方面,羅渣莊臣以及查維斯就再次同利記扯上關係

2)
隨住大敗俾卡坦尼亞0:4
巴勒莫決定解僱接手只有1個月既哥斯美
而透過米高利做中間人
上個月被解約既基里奧羅斯再次接掌球隊

3)
艾迪巴約表示希望重返英超

4)
李斯特城被指希望接收奧雲

5)
夏格維斯,史葛丹恩,赫頓以及沙夏都因傷而要提早收咧
而相同下場既仲可能包括謝拉特

6)
迪甘斯再次否認離隊傳聞

7)
哥迪奧拿暗示於2012年離隊

8)
維拉決定放棄李奧曲加
不過費度就獲得留用

另一方面,佢地被傳準備同曼聯以及車路士
爭奪亨克既19歲新星 K.De Bruyne
而文迪斯就係侯利亞既另一收購對象

9)
阿仙奴以及車路士都被指有興趣收購菲爾鍾斯
而前者就再次同泰禾扯上關係

10)
哈利列納否認引入高路斯既報導
而杜斯山度士就表態唔想重返熱刺

11)
馬連奴最終因為成績欠佳而要離開帕爾馬

12)
拿斯尼被指成為AC米蘭既增兵對象

13)
保拿特希望可以正式轉投葉士域治

14)
日本足總決定退出美洲國家盃
而佢地為左節省電力
J-League重開後既比賽一律要於下晝2點前開波

15)
基羅斯落實執教伊朗
雙方簽約3年

16)
國米再次同阿歷士山齊士扯上關係
傳聞收購價大約1500萬歐元

17)
紐卡素被指準備出價2000萬歐元收購馬里奧高美斯
而比拿美就被指係佢地既另一個考慮人選

另一方面,柏度就否認引入韋斯活特既報導

18)
羅馬方面被指有興趣收購保方以及柏斯托尼
而祖雲達斯已經否認前者離隊既傳聞

19)
芝加哥火焰落實引入意裔美國箭頭費拉利

20)
M.施素高表態於季尾離開圖盧茲

p.s.:
鶴臣既離隊補償原來高達730萬鎊
連埋補俾賓尼迪斯既300萬鎊
利記就咁使左過千萬鎊冤枉錢......

2011-4-3 (2)

雖然南華同埋傑志都唔係小弟杯茶
不過都想多口講下今日既榜首大戰

大抵排陣同埋用人已經分出勝負

傑志方面
甘巴爾用人明顯有心思
佐迪同埋豬事基互換位置既效果唔錯
後者既表現仲肯定係近年最搶既一次
絕對勇冠全場
而梁子誠專攻文彼德又係針對性部署
因為前者無論速度同埋腳法都食硬後者
最終助攻盧比度入波

南華方面
畢特,基士文同埋陳韋拿3大明星
全部都無甚貢獻可言
白鶴,基奧雲尼同埋鄭25
反而因為要讓位俾佢地而長坐冷板
明顯係領導層沉迷名氣

兩個星級箭頭本身都欠缺獨自上腳搵食既本錢
可能由於中場供應不足而唯有四圍游走
不過現身於對手危險位置既時間亦未免太少

當中'唔識輸'連短界外球都要經手
咁禁區仲可以有邊個埋門
係過份錫身唔肯同羅沙度埋身肉搏
抑或真係好想引開後衛俾中場後上
一直有留意佢踢波既球迷自有答案

畢基組合起唔到化學作用
可能連冇睇過佢地踢波既球迷都知
小道消息係傑志老闆伍健星期五上晝
聽到記者話畢特會正選上陣
已經笑到收唔到聲
可想而知畢特幾有作為

如果英超防中都可以化身港甲keyman
咁加利佬他日上山
就必定可以馬干上身踢晒成條右路

南華陣中其實最缺乏識分波既中場
強哥年事已高兼有傷在身
白鶴同埋帥哥其實最有本錢兼職派牌
總好過倚靠年紀仲大過強哥既畢特

半場勢色唔對都唔肯收敢有變動
怕且只係信錯名牌既更有力證明
終於畢特職業生涯第7次見紅將佢地追平既希望徹底粉碎

不過小弟又覺得錯不在飛碟陳
因為佢怕且只係老世足球旗下
一個被塑造專業而又偏偏放棄專業既可憐虫

羅神俾到8位數字一季去玩真人版 Football Manager
梗係要攞話事權

話說回頭
你估羅神唔知畢基組合唔掂咩
不過轉章咪即係承認自己俾人搵笨
可憐部份南華球迷就因為咁而俾佢激到嘔十九幾兩血

媽差廖國文既人多不勝數
但親耳聽到怒插羅神既聲音都絕對唔少

p.s.:
如果冇左羅神就唔撐南華既
只係神既信徙
如果唔理係唔係羅神揸旗都撐南華既
先係南華既真正球迷

2011-4-3 (1)

阿摩以巴塞技術總監身份訪港
小弟當然唔錯過機會搵佢攞簽名
唸唔到佢真人 nice 到爆燈
有3個球迷每人問佢攞左超過廿個簽名
佢都竟然冇托手肘就反映佢份人有幾易話為

由於book場方面擺左老烏
11點既練波時節原來係屬於一班業餘波友
阿摩從西班牙兵口中得知冇場練波既真相後
嗰表情都幾驚訝
而佢之後仲俾個著巴塞波衫既波友仲請佢食波餅

錯有錯著亦令阿摩多左時間接受傳媒訪問
透過南美聰既翻譯
有問必答既佢答左超過10條問題
當中部份內容如下:

1)
以往國家打呲前
巴塞唔會有特別準備
不過就會比平時更集中
而傑志球員面對南華前,唯一可以做既亦都係集中

2)
巴塞近年既布斯基斯以及耶耶托尼都係比較強壯既球員
加上佢地既跑動範圍確係最多
令人誤會踢4號位一定要身體特別強壯
不過其實巴塞失波後
中前場其他球員其實都會好積極施壓
防守工作唔係4號位一力承擔

而佢以及沙維都唔係特別強壯
以前踢4號位都有好表現
反映身體質素並唔係關鍵
相反同隊友之間既合作先係最重要

3)
巴塞既青訓其實都好注重教育
例如美斯,沙維等人於球場外其實好低調
就係當年球會教佢地要謹記於球場外只係普通人

4)
畢特以及基士文都係世界級球員
不過現今足球好難單靠一至兩名球員去決定勝負
整體合作先係最緊要

5)
基士文以前效力馬體會既時候
一度被傳係巴塞既增兵對象

6)
佢雖然身型冇咩走樣兼繼續食腦踢波
不過佢就話身體狀況始終好難同以前相比
所以而家只會簡中為巴塞元老隊出賽
當中沙治以及安歷基都係佢既隊友

7)
雖然近年部份青訓產品俾其他歐洲球會搶走
不過佢表示情況唔算嚴重
因為希望加入巴塞既人遠比有離心既人多
加上佢亦認為冇必要挽留想走既人

8)
巴塞近年成績超勁
令人覺得而家既一代超勁
不過就算而家既一代將來退役或者轉會
巴塞仍有大把新血表班
而事實上球會既運作近30年來都係主要靠青訓產品接棒
當然巴塞近年食住皇馬
另一關鍵就係注重整體發揮

2011-4-2

近幾日既部份新聞......

1)
奧運外圍賽
港隊下輪對烏茲別克
而世界盃外圍賽
港隊就要越級挑戰沙地

2)
竟然同盧卡斯利華續約既利物浦被傳為左扣展亞洲市場
而有興趣羅致本田圭佑同埋朴主永
當中保頓亦對後者虎視眈眈

另一方面,一旦拉爾拿離隊
洛里斯就被指成為利記既新龍門人選
而紅軍亦被指同曼聯爭奪身價1500萬歐元既路蘭度

3)
摩連奴透露07年時幾乎接手英格蘭
不過因為唔想隔太耐先有一場比賽而拒絕接手

而華丹奴就同佩雷斯攤牌
表明下季有摩連奴就會冇佢

同時間相關既傳聞於西班牙甚多
既有指佩雷斯考慮為左討寸王歡心而引入杜奧巴
亦有報導話佢視賓尼迪斯為寸王既替補

4)
雲達不來梅放風韋爾斯以及梅迪薩卡都好可能會被掛牌出售
報導指雲加幾有興趣接貨

5)
維度被指考慮跟隨希歷基斯過檔拜仁
而畢特就宣佈季尾掛靴

6)
馬德里法院裁定今個星期既西甲以及西乙聯賽如期舉行

7)
阿祖安奴落實同哥連泰斯簽約15個月
由於佢近年既出場紀錄太差
佢既月薪只有30萬歐元
不過每月另有最高25萬歐元既出場獎金
而佢亦可以就波衫銷售同球會分帳

8)
白賴仁笠臣既治癌進展理想
報導指佢將於幾個月內完全康復

9)
加斯居尼欠稅3萬2000鎊
稅局決定俾佢延期還款
不過如果佢之後繼續拖字決
就面臨被當局申請破產

10)
謝拉透露同富咸約滿後
準備繼續於英超落班
近日準備同路蘭提前續約既紐卡素隨即再次同佢地扯上關係

而紐記亦被指準備同利物浦以及車路士爭奪韋拿杜姆
另外,莫斯科中央陸軍亦被指對卡蘭積卡好有興趣
而耶保,朗治以及列斯聯既蘇格蘭中場 R.Snodgrass 就同紐記扯上關係

另一方面,森遜被傳成為韋斯咸既新右閘人選

11)
祖雲達斯被指已有多名新教頭
當中包括納比,文仙尼,馬沙利,史巴利堤以及干地
前者早已表明唔考慮任教意甲球會
而後者近日亦表示唔會接手

另外,祖記被指準備同賓菲加以及熱刺爭奪高路斯
另一方面,保方就再次被傳離隊

12)
皮利斯被傳下季去卡塔爾掘金
而侯利亞就被指準備從波爾多引入卡拉素

13)
巴塞即將同荷西賓度續約到下季尾

14)
西維爾成為最新一間同謝雲奴扯上關係既球會

15)
高拉洛夫被傳回流意甲,加盟AC米蘭
而紅黑兵團亦被指有興趣搵麥薩斯以自由身過檔

16)
伊比斯域被指成為維拉以及西布朗既新箭頭人選
報導指這名波斯尼亞射手約值700萬歐元

17)
辛尼特再次斟酌加度素

18)
消息指費sir準備引入兩至三名球員
另有報導指曼聯已經同馬體會傾好以2000萬歐元收購迪基亞

佢地又忽然被傳有興趣引入米基爾同埋大衛辛頓
而佢地被指準備同車路士以及拜仁爭奪比利時中場韋素爾

另一方面,艾殊利楊格就被指會係季尾首個加盟紅魔既球員

19)
美國商家 T.DiBenedetto 旗下既財團落實入主羅馬

20)
活基治再次受傷
季尾約滿既佢可能已經踢完於熱刺既最後一場比賽

21)
由於波斯尼亞足總堅持要執行3會長制度
違反國際以及歐洲足協既規定
而即時被佢地禁止參加國際賽

22)
阿積士8名董事由於同告魯夫意見不合
而宣佈集體請辭

23)
新特蘭將於季尾買斷文沙以及蒙達利

24)
魯特禾馬被指成為飛燕諾既新防中人選

25)
英國傳媒再次指馬勒當拿下季接手布力般流浪
仲傳佢會搵埋阿古路過檔
另外,佢地亦被指考慮引入科蘭以及雲佬

p.s.:
稍後再講阿摩訪港......

2011-3-28

1)
利物浦被指準備同熱刺以及愛華頓爭奪加高
報導指佢既身價約值1000萬鎊

另一方面,傳聞指盧卡斯利華會被賣去維拉利爾

2)
費sir準備於季尾回收多名外借小將同埋收購查理阿當既同時
亦打算放棄多人
當中包括古斯錫,布朗,吉遜,奧雲以及比比
當中新特蘭以及愛華頓都有興趣接收布朗

3)
阿費利於巴塞苦無出場機會
英國傳媒指雲加考慮於暑假乘機搶人

4)
西布朗忽然被指睇中川島永嗣

5)
國米,AC米蘭,巴塞以及維拉利爾
都被指睇中博洛尼亞20歲烏拉圭中場拉美利斯

6)
祖雲達斯被指睇中迪沙迪素基以及基治
意大利傳媒仲話將於幾日內派人同後者會面
不過後者既兵工廠隊友阿曼特查奧爾就會俾祖記退貨

另一方面,史浩克04以及富咸都被傳打算接收曼寧加
但迪亞高文堤斯既去向仲有排搞
因為馬體會方面唔準備買斷佢

7)
奇雲杜里為國捐軀
報導指膝傷將令佢要休息至少兩個月

8)
哥連泰斯被指已同阿祖安奴達成合作協議
不過就惹來球迷反對

9)
紐卡素被指打算從阿爾克馬爾收購冰島箭頭史基賀臣
而佢地亦再次同韋碧克扯上關係

另一方面,阿倫史勿夫就被傳可能被賣去格流

10)
由於G.盧比斯擊敗B.迪卡華路而成為士砵亭既新會長
意味只同後者簽約既尹巴士頓唔會出山執教
而前者亦隨即表示已經搵左柏斯倫斯亞接手下季由布拉加過檔

11)
加拉塔沙雷以及馬賽都再次被指準備羅致杜奧巴
前者就打算將艾達杜蘭作為交易籌碼
不過無論佢轉投邊一隊
佢都要先大幅調低週薪

12)
雲尼斯特萊表態希望重返英超或者西甲
報導指熱刺以及布力般流浪都對佢有好興趣

13)
里爾方面表示只要收到好價錢
就唔介意夏薩特離隊

14)
尼馬包辦兩個入球
協助巴西羸蘇格蘭2:0
不過比賽期間有部份主隊球迷對佢掟蕉

15)
盧斯奧落後同國米續約至2013年
粉碎佢重返利華古遜既傳聞

另一方面,國米透露曼聯打史奈達主意之餘
亦再次被指斟酌甘素

p.s.:
1)
英國傳媒聲稱文仙尼要求1億鎊增兵
路人甲都知佢季尾未必有得留隊
有關炒作新聞未免已經過多

另一方面,摩連奴被指要求1份2000萬鎊年薪既合約
仲要準備1億5000萬鎊俾佢增兵
有關傳聞某程度反映英國傳媒其實唔多睇好文仙尼既下場

2)
羅渣里奧入到職業生涯第100球
勁!
如果佢唔係生於巴西
國家隊既發展應該會好得多

2011-3-27

近3日既部份新聞......

1)
利物浦被指睇中拉美拿,查維斯,荷西安歷基,麥薩斯以及加利卡希爾
前者係河床既20歲阿根廷新星
巴塞,馬體會,國米,AC米蘭,祖雲達斯以及熱刺都對佢好有興趣
報導指佢既身價已經直達2000萬歐元

另一方面,巴利鍾斯就被外借到打呲郡
而阿仙奴名宿爆料指雲加上季尾曾經出價收購拉爾拿

2)
維拉被指打算於季尾搵賓尼迪斯取代侯利亞

3)
紐卡素被指成為一個印度財團既收購目標
不過林比亞斯已經否認有關報導

另一方面,佢地被指準備向漢堡出價500萬鎊收購柏歷

4)
軒歷基斯落實下季接掌拜仁
而迪米捷利斯以及雲邦美知道雲高爾離隊後
已先後表態有意重返拜仁

5)
雲加透露法比加斯,禾確特,桑治以及迪亞比可於下場英超復出
而有消息指華美倫可能趕及季尾復出

6)
紐亞透露未來幾年都唔打算出國發展
而查維亞靴蘭迪斯就向費sir推薦奧祖亞
富咸早前曾經搵佢試腳
亦有可能於季尾正式收購佢

另一方面,夏格維斯因為於操練整傷膊頭而要休息4星期

7)
祖雲達斯被指考慮接收文尼斯

8)
加拿斯考慮同熱刺續約兩年
而哈利列納為左防止曼聯,國米以及祖雲達斯羅致莫達歷
不惜將佢既身價定為1億鎊

9)
賓菲加即將從哥連泰斯引入巴西進攻中場般奴施薩

10)
奇雲杜里被傳成為昆士伯流浪既800萬鎊新箭頭人選

11)
車路士方面透露已經落實比亞桑既交易

12)
卡塔爾方面被指打算重金生產人造雲以解決氣候太高既問題

p.s.:
1)
30年前俾威爾斯大炒4:1既歷史冇再重現
畢竟質素有別
對手仲要因為冇埋格夫里巴利而等同讓埋車馬
三帥兵團行行企企已經夠數
韋舒亞一如外界預料咁搶
柏加亦至少有機會證明實力
不過最驚喜都係艾殊利楊格
成個中前場最冇料到既首推朗尼
佢既黃牌仲似係想搏下場對瑞士停賽而爭取休息

2)
溫馨提示:
大婆台會直播羅氏夫婦內戰

2011-3-24

近兩日既新聞……

1)
利物浦宣佈高莫尼升任足球總監
而I.Ayre就升任營運總監

另一方面,利記被指同阿仙奴都想引入保贊
迪亞高就表態有興趣過檔紅軍
而早兩日同利記扯上關係既皮亞圖
原來亦同時吸引曼城,紐卡素,愛華頓以及新特蘭既注意

2)
英超聯會以安全理由否決球迷聯會重設企位既建議

3)
阿祖安奴即將落實加盟哥連泰斯

4)
柏天尼再次提議定立薪酬上限

5)
格夫里巴利因為腿筋受傷而無法於星期六候命

6)
納比透露有興趣復出執教
不過就唔準備考慮意甲球會

7)
賓尼迪斯表示希望將來有機會再執教利物浦
而佢亦暗示有興趣加盟其他英超球會
不過就唔包括利記既兩人死敵—曼聯以及愛華頓

8)
迪佐域接手靴高斯

9)
貝拿迪亞透露舊隊友拿斯尼搵佢由烏甸尼斯轉投阿仙奴
不過這名可以踢中堅或者防中既摩洛哥國腳就表明而家唔考慮離隊

另外,賓特拿返國家隊操練期間腳肘
可能要收咧

另一方面,阿仙奴方面證實佐羅唔使開刀
不過就要連續接受物理治療1個月

10)
丹尼爾艾維斯落實同巴塞續約到2015年

11)
阿馬利表態希望祖雲達斯回收佢

12)
辛尼特以及加拉塔沙雷都被指有興趣接收古斯錫
兩間球會近日另有新聞
前者球迷對卡路士扔蕉皮而俾外界批評佢地種族歧視
而後者就宣佈同重新就任只係5個月既赫傑解約
亦被指同AC米蘭以及皇馬爭奪杜奧巴

13)
軒迪克暗示如果土耳其入唔到歐國盃決賽週
佢會主動要求同土耳其足總解約

14)
摩連奴表示他日離開皇馬
必定會再戰英超
不過佢亦透露唔會加盟車仔既傳統死敵
令曼城更被認定為佢既下一站

15)
香川真司已經可以練跑
佢預期3星期內復出

16)
深圳紅鑽羅致卷誠一郎
而北京國安以借用形式引入巴西射手戴維

17)
迪甘斯否認下季轉投里昂既傳聞

18)
安歷卡被傳轉戰美職盟,加盟紐約紅牛

19)
免費轉播分歧
4月首輪西甲或延期

20)
祖雲達斯被指有興趣引入阿古路以及希古恩

21)
希歷基斯承認拜仁已對佢展開斟酌
而舒韋恩史迪加已經表態歡迎

22)
沙夏因為膝傷而隨時提早收咧

23)
荷西安歷基被指成為拜仁慕尼黑既新左閘人選

24)
意大利傳媒指迪羅斯離婚後打算出國搵食
曼聯隨即被指有興趣出價1800萬鎊搶人

25)
里奧費甸南被指可能於4月中復出

p.s.:
1)
施治透露20歲既時候
雲加曾經派人觀察佢既表現
不過佢因為最終收唔到兵工廠既offer而過檔雷恩

計埋艾辛同埋杜奧巴
車仔近年最重要既3個法甲收購
原來都同兵工廠擦身而過

2)
之前某啤酒品牌宣傳話有歐聯巨星帶埋隻盃訪港
點知原來只係奧高查
失望難免

3)
文仙尼被指再次要求球會季尾收購伊巴謙莫域
佢到時在位先算啦

2011-3-22

1)
皇家蘇斯達既27歲右中場皮亞圖被指成為利物浦既增兵對象
佢雖然仲未係西班牙大國腳
不過身價依然高達1000萬鎊

另外,艾殊利楊格,查理阿當以及荷西安歷基亦再次同佢地扯上關係

另一方面,有入就自然有出
阿古蘭尼以及祖高爾都勢必離隊

前者既經理人放風這名意大利中場好想正式加盟祖雲達斯之餘
仲透露利記肯以7折(1400萬鎊)出貨之餘
亦同意祖記可以分3至4期供款

而後者就可能同哈利列納再次合作
報導指熱刺準備以500萬鎊接貨

2)
國際足協主席改選
白禮達遇上哈曼既挑戰

3)
柏天尼連任歐洲足協主席4年
而佢提議卡塔爾世界盃改於11月舉行

4)
BBC指里奧費甸南理解自己經常養傷而唔適合出任英格蘭隊長
所以唔會因為冇隊長做而退出國際賽
而消息人士仲透露佢已經致電恭喜泰利再次出任隊長

5)
國際米蘭被傳有興趣接收馬路達
不過未知車路士會唔會用佢作為羅致史尼達既籌碼
而靴高斯亦被指準備出價700萬鎊收購佢

6)
皇馬方面透露有信心最終能夠同比比達成續約協議
西班牙更有傳媒指雙方已同意續約3年

另一方面,沙治奧拉莫斯再次同車路士扯上關係

7)
法蘭克福宣佈開除史基比
而接手既達姆就同佢地簽約到季尾

8)
貝碧托夫仲未同曼聯達成續約協議
德國傳媒指拜仁可能趁機出手搶人

另外,費sir被指已對奧雲失去耐性同埋信心
報導指維拉想搵佢下季以自由身加盟

9)
華倫西亞,西維爾以及祖雲達斯都對法芬好有興趣

10)
愛華頓亦被指有興趣引入J.Puncheon

11)
西班牙傳媒指巴塞將於今個星期內同丹尼爾艾維斯續約
而保贊就再次被傳過檔拿玻里

12)
雲尼斯特萊再次入選荷蘭國家隊

13)
艾利蘭以及貝斯已就養傷期間夜蒲而公開道歉

另一方面,森遜被傳成為伯明翰既新右閘人選

14)
祖赫特被傳成為阿仙奴既新龍門人選

15)
柏圖將會同朗拿度名下既經理人公司簽約

16)
報導指保頓準備出價1000萬鎊買斷史杜歷治

17)
巴勒莫將柏斯托尼既轉會費定為5000萬歐元

18)
布力般流浪被指打算於季尾收購哥治

p.s.:
今季歐聯決賽票價大幅加價
賣到150至300鎊
真係貴到有點兒那過

2011-3-21

1)
尹巴士頓出山執教士砵亭

2)
摩連奴再次被指下季過檔曼城
傳聞年薪高達1000萬鎊

3)
奧沙辛拿既26歲左閘蒙利爾被指成為利物浦新左閘人選既最新選擇

4)
貝碧托夫要求新約週薪加到12萬鎊
曼聯近日同文尼斯,阿歷士張伯倫以及阿歷士山齊士扯上關係
所以費sir都唔急同佢續約
由於已經效力3季既佢到下季尾就約滿
佢有權於季尾買斷自己既最後1年合約

5)
紐卡素被指有興趣搵謝拉以自由身過檔
而杜奧巴就傳將被車路士賣走
迪奧迪就表態想佢過檔紐記

另一方面,艾利蘭同埋貝斯早前因傷免戰
不過就被發現趁機帶埋一個預備組既0靚仔夜蒲
柏度已經表明會展開調查

6)
泰禾暗示希望轉投AC米蘭

7)
已跌至榜尾既靴高斯決定開除教練域高
球隊預期會由蒙路斯接手

8)
弗賴堡教練保特落實下季轉投利華古遜

9)
韋根被傳考慮季尾收購禾洛克

10)
被伊雲斯踢傷既賀頓預期要養傷半年
而隨住前者要停賽3場
大鬧中堅荒既曼聯好可能要靠卡域克繼續客串中堅
而費sir被指考慮從AC米蘭引入泰亞高施華

11)
鄧尼被傳將於季尾被維拉放棄
些路迪就被指準備以200萬鎊接貨

12)
李安納度要求國米高層俾佢帶隊去日本踢籌款賽

13)
施巴斯坦拿臣可能轉戰西甲
拉科魯尼亞以及馬體會都被指對佢好有興趣

14)
馬菲查維斯首度入選英格蘭

p.s.:
利記尋晚有運羸波
問題12碼肯定係旁證老點既結果
'7+9'組合由於冇咩默契
威力只係平平
不過總算值得期待

2011-3-20

1)
史浩克04,多蒙特以及波琴3隊同區既德國球隊
將於27/3為日本地震災民踢籌款賽

2)
巴塞方面透露艾比度可於8月復出

3)
格夫里巴利落實以7萬鎊週薪既條件同熱刺續約到2015年
粉碎佢轉投豪門既傳聞

4)
卡比路宣佈再次搵泰利出任英格蘭既長期隊長
不過里奧費甸南事前完全未被知會
佢因而被傳考慮退出國際賽

5)
拜仁方面否認洛賓既離隊傳聞

6)
巴尼斯被指成為利物浦既1000萬鎊新左閘人選
而熱刺就被指打算出價1200萬鎊收購格連莊臣

7)
英國傳媒指油王打算於暑假撥款1億鎊俾球隊換血
以降低球隊既平均年齡
阿古路,史尼達以及魯迪維爾都係傳聞人選
而多名老將就可能會被放棄

8)
意大利傳媒指梅度改變主意
希望可以同費倫天拿續約

9)
愛華頓被傳打算搵戴亞以自由身加盟

10)
列根奴被傳成為羅馬既新中堅人選

11)
杜格拉斯哥斯達尋日現身奧脫福睇波
曼聯隨即被傳將以1800萬鎊收購佢

12)
卡積亞被指成為皇馬1500萬歐元既新中堅人選

13)
布力般流浪被指準備出價900萬鎊引入尼索比亞

p.s.:
雲加死撐球隊有鬥志又有士氣
連追兩球和波算係賺左一分
不過實際就又因為和波而俾曼聯甩開兩分
條防線又再出醜人前
尋日英國傳媒再指雲加會出手收購加利卡希爾或者曉姆斯
可信性怕且唔低

2011-3-19

近兩日既部份新聞......

1)
歐聯8強抽籤如下:
車路士對曼聯
國米對史浩克04
皇馬對熱刺
巴塞對薩克達

2)
歐霸盃8強抽籤如下:
波圖對莫斯科斯巴達
賓菲加對燕豪芬
布拉加對基輔戴拿模
維拉利爾對川迪

3)
英國傳媒指卡比路準備宣佈以後俾泰利做返隊長

4)
雖然利物浦於歐霸提早出局
不過董事會仍然希望同杜格利殊續約兩年
報導仲話如果戰績理想
球隊有權要求再續多年

另一方面,史基泰爾早前被指成為利記羅致艾利亞既籌碼
不過佢已經表明唔想轉投漢堡

而杜格利殊就繼續為球隊搵新血
當中阿休,達寧以及利華古遜捷克左閘M.卡特歷都係可能人選

5)
里奧費甸南可能因為小腿傷患而退早收咧
而由於陣中受傷既中後場球員甚多
有消息指夏格維斯會復出客串右閘

另外,費sir因為於對車路士賽後批評球證
而俾足總罰停賽5場兼罰款3萬鎊
佢就要求提前由今晚起停賽
以趕及於作客阿仙奴既關鍵一戰領軍

另一方面,華布拿再次同紅魔扯上關係
不過格拉沙家族近日被傳打算將球員既新合約改為只有基本底薪
靠出場,羸波以及捧盃既各種加碼獎金來代替加薪
變相縮皮既新合約制度可能令新球員拒絕加盟
舊將亦隨時為左咁而拒絕續約

6)
巴塞方面透露艾比度可於下星期出院
不過暫時未知佢幾時可以復出

7)
尼斯達暗示季尾掛靴

8)
由於新西蘭拒絕派隊去日本踢友賽
日本足總決定將對手改為J-League選手隊
報導指後者既成員將由包括中村俊輔以及三蒲知良既前國腳組成
而賽事收入將用作籌款用途

9)
羅斯暗示有興趣轉投巴塞

10)
史浩克04落實由蘭歷克接手
而早前被解約既馬加夫就回歸禾堡救亡

11)
雲加以及拿斯尼因為於對巴塞賽後批評球證而被罰停賽1場

另一方面,雲加透露應該唔會去日本季前集訓
但就考慮安排籌款賽

12)
哈化柏林既捷克既26歲國腳R.Hubnik被傳成為紐卡素既新中堅人選

13)
祖雲達斯方面透露迪比亞路以及保方將會續約
後者既續約仲可以粉碎佢既離隊傳聞

另一方面,祖記亦透露伊亞昆達提早收咧
而佢地就被指打算同熱那亞爭奪貝碧托夫之餘
亦考慮搵多個新右閘
當中保辛華以及安達斯碧克都係佢地既考慮人選

14)
阿柏天尼透露考慮安排意大利U-21參加意乙
以增加佢地既出場機會
柏蘭迪尼亦已經同意有關提議
不過具體詳情仲有待商討

15)
車路士被指考慮季尾收購干查奧
不過消息指佢地既2300萬鎊出價
同賓菲加既叫價仲有300萬鎊差距
曼聯以及拜仁亦一直同佢扯上關係

16)
李斯特城方面否認羅致高路斯既傳聞
不過佢地就承認有興趣從富咸引入卡馬拉

17)
保頓被傳同紐卡素爭奪荷西卡利祖

18)
阿歷士山齊士表示暫停唔考慮轉戰西甲

19)
新特蘭成為最新一間同加美路扯上關係既球會
早前阿仙奴,紐卡素以及祖雲達斯都被指打佢主意

p.s.:
本地足總成立U-21長期集訓隊
以應付13年東亞運以及14年亞運
成效冇人未卜先知
不過唸得長遠少少
總算係成功既第一步

2011-3-17

1)
消息指笠臣患上喉癌
佢已於今個月3號接受手術
醫生指佢會完全康復
佢尋晚亦有入場睇亞協盃兼為畢特打氣

2)
巴塞方面透露艾比度既肝臟有腫瘤
佢將於星期四接受手術

3)
卡卡好可能要再次接受膝部手術

4)
拜仁被指考慮搵曉士或者森瑪下季接手

5)
利物浦成為最新一間同簡拿利斯扯上關係既球會

6)
史浩克04最終踢走馬加夫
而當時人就要求會方賠足1200萬歐元俾佢同埋佢既教練團

另一方面,史浩克04希望同魯爾續約到2014年
不過未知馬加夫離隊會唔會影響佢既決定

7)
列文落實同阿仙奴簽約至季尾
不過華美倫就肯定要提早收咧
好彩佐羅可以於月底提前復出

8)
安歷基落實季尾離開巴塞
這名B隊教頭被傳下季接手基達菲或者希杭

9)
阿根廷同埋烏拉圭合作申辦2030年世界盃

10)
車路士落實從聖保羅引入巴西17歲進攻中場比亞桑
報導指轉會費高達530萬鎊

11)
紐卡素被指準備出價900萬鎊搵尼索比亞回巢
另外,柏度亦被指考慮引入菲臘仔

12)
多蒙特希望同紐尼沙軒提前續約
不過戴迪就決定季尾約滿離隊
以尋求更多出場機會

2011-3-16

1)
蘭尼被傳因為同費sir不和而希望離隊
報導指佢搵經理人同佢搵適合既意甲球隊
但亦有分析指佢係因為要求加薪不遂而玩嘢

2)
由於利物浦企硬要1600萬歐元先肯放走阿古蘭尼
祖雲達斯再次被指可能改打派路既主意

另一方面,李青龍再次同利記扯上關係
傳聞佢既身價已經升至1000萬鎊

3)
路維落實同德國足總續約到2014年
粉碎佢於歐國盃後轉投拜仁既傳聞
而拜仁就被指想搵軒斯菲特回巢

4)
下季英超將有3個球場試行鷹眼技術

5)
列文答應出山
出任艾蒙尼亞既副手

另一方面,基迪拉被指成為兵工廠1500萬鎊既新防中人選

6)
布魯日既前克羅地亞U-21進攻中場柏利錫
被指成為熱刺600萬鎊既增兵對象

7)
蘇斯達因為戰績遠遜預期而要落台

8)
阿倫史勿夫同紐卡素既合約將於下季尾到期
有報導指紐記為左避免人財兩失
可能於季尾將佢賣返去列斯聯

另一方面,柏圖打算從修咸頓引入舊部屬 J.Puncheon
這名24歲進攻中場現時以借用形式效力黑池
而紐記亦再次被指於季尾向飛燕諾收購蘭斯

9)
賓特拿被指成為布力般流浪1500萬鎊既新箭頭人選

10)
消息指泰禾已經吩咐經理人同佢拒絕晒所有非英超球會既斟酌

11)
車路士再次同柏圖扯上關係
而肥安離隊既賠率再次升溫
而家軒迪克以及摩連奴並列下任車長既頂頭大熱

12)
法國傳媒指米高巴斯圖斯希望轉投祖雲達斯
不過1800萬歐元既轉會費就成為交易障礙

另一方面,祖記被指考慮借用於巴塞出場機會唔多既馬斯查蘭奴

p.s.:
德國佬向來鍾意打心理戰
賽前就有怪風話彭迪夫下季會過檔
點知尋晚就俾佢一腳收皮
真係諷刺

2011-3-15

近兩日既部份新聞......

1)
報導指杜格利殊同利物浦高層都同意兩年既合約年期
不過續約關鍵就係杜帥季尾會唔會有5000萬鎊增兵資金

2)
馬維奧斯否認已同利物浦達成協議
而紅軍亦被指希望引入佢既隊友麥維拿
不過這名防中同時同維拉,皇馬等球會扯上關係

而些路迪既以色列防中卡耶亞亦被指係杜帥既新防中人選
曼聯上月亦同佢扯上關係
不過當時人表明現階段唔考慮離隊

另一方面,利記早前被指考慮以900萬歐元引入艾達杜蘭
不過西班牙傳媒指馬體會先係最終贏家

3)
J-League以及日乙都會於3月暫停

4)
由於曼聯既龍門教練被傳報讀西班牙文
因而再有報導指費sir將於暑假引入迪基亞

5)
羅馬方面被傳考慮俾蒙迪拿坐正

6)
皇馬被指將於季尾羅致奧達文迪
不過當時人已經否認有關報導

7)
彭拿典奈高斯被指準備出價600萬鎊同紐卡素爭奪艾利蘭
另一方面,柏度再度表態希望保留巴頓

8)
拜仁以及摩納哥都被傳有興趣羅致羅賓奴

9)
拉馬奴劈炮唔教富明尼斯
巴西傳媒指原因係球會冇履行承諾改善主場館

10)
由於多名大佬輩球員缺陣
卡比路被指考慮俾泰利再次出任隊長

11)
祖雲達斯被指考慮羅致基迪拉或者馬斯查蘭奴

p.s.:
尋日收到件利記球員版波衫作為禮物
狂喜!