東北部打呲
緊張而有球味
客隊紐卡素應該為佢地執返1分
而返屋企還神
因為主隊新特蘭於光明球場
踢出佢地本季最好既一場比賽
但未竟全功
先講排陣
雙方都以 4-4-2 陣式應戰
主隊有麥沙尼同埋艾華士復出
客隊既 Big Sam 就有少少令小弟失望
因為佢竟然唔出謝烈美
簡接令佢地更加難搶中場
其實安利或者阿倫史勿夫應被收起
事實上前者唔夠狀態
小弟最有印象只係佢於頭13分鐘
兩次幾粗野,但都竟然冇黃牌既攔截
而後者全場最叻只係護左一次空門
主隊形勢明顯佔優
佢地唔擅長組織攻勢
但以鬥志搭夠
一人走多步以簡單踢法去控制比賽
主隊最終羸唔到波
只好怪佢地埋打把握力差
同埋'好波唔夠好運好'
客隊既占士米拿無心插柳既傳中竟然彈遠柱入
但佢地既麥沙尼就頭槌中楣
今場波小弟最欣賞既就係夏迪
佢老人家全場踢過左閘,左翼衛同埋右閘3個位
都有一定水準
踢到尾仲咁好氣好力
而佢既隊友鐘斯,麥沙尼,哥頓同埋希堅保咸都唔錯
客隊既菲爾雖然成日被講波佬讚
但小弟覺得佢全場頭槌解圍係多
但失誤亦有唔少
上半場前半段已經兩次包越位
而新特蘭先開紀錄亦同佢既回傳失誤有間接關係
佢既失誤肯定係同羅辛奴唔夠默契有關
而夏柏兩次出迎角球既失位
最終只失一球都算有運
輸波0個球羅辛奴都有份失位
而占士米拿亦跟唔緊希堅保咸
近期新特蘭對阿仙奴同埋韋斯咸
輸波都有一定口碑
只有上場對曼城較差
希望堅尼把握國際賽期執靚隊波
佢地既前境仍然係唔錯既
Subscribe to:
Post Comments (Atom)
4 comments:
預左嬴唔到，和波真係執番身彩。我唔明既係點解要到83分鐘先換馬田斯入來?左閘點解又搵尼索比亞打?攪到佢攻又唔係,守又唔掂。唔出謝列美可以理解，開季至今佢確實係一直都無咩表現，但係阿倫史密夫更差。祖爾巴頓無貢獻,仲有踢人細佬，一定俾人秋後算帳。成隊波真係唔覺邊個踢得好，占士米拿果球真係有運，希望佢地係呢十四日內攪番掂佢，唔係下埸就算主埸出戰,都係等俾利記炒。好彩國際賽，基雲到時應該可以復出。
To: 舒利亞
就算你覺得謝烈美開季至今都冇場好波
但一支正常既球隊總要有一個防中
特別預左今場既對手實搏晒命去搶中場
所以 Big Sam 應該派佢(或者畢特)踢正選
小弟從來都唔覺得阿倫史勿夫係防中既好人選
至於今場冇咩助攻既尼索比亞
佢今場唔算好差
但當然唔係好啦
用佢踢左閘係因為佢既速度可以頂得住艾華士
而因為 Big Sam 堅持要踢 4-3-3
而擅長側擊既占士米拿同埋維度卡
係幾岩這個陣式
令馬田斯同奧雲只能兩個活一個
前者早前否認會加盟祖雲達斯
仲聲言有 Big Sam 就有佢
但如果出場時間依然持續咁少
就算佢1月唔走
到季尾都會走
不過唸返轉頭
而家奧雲仲算值錢
佢既忠心又一直咁令人懷疑
倒不如賣左佢套現增兵
出馬田斯仲好啦
我都係咁諗，趁奧雲仲值錢，又有球會要，送走佢好過啦。
畢特因為停賽所以無出，不過就算無停賽都唔想見到佢。佢既表現仲差過謝列美。謝列美唔係話好差果隻，只不過無咩表現，又唔係幫倒忙果隻。畢特就成日交失波。
講開維度卡，暫時好似無上年咁猛，可能係隊波既問題，希望快d見到紐記回勇
To: 舒利亞
1)
謝列美,畢特同埋阿倫史勿夫
點都要出一個防中
係結構上既問題
除非 Big Sam 之後將菲爾改踢防中......
2)
維度卡今季成日傷
岩岩先好返
佢有質素
又岩踢 4-3-3
等佢上力之後就會交到貨
小弟覺得靠佢同馬田斯
好過靠一個對紐記近乎冇忠心過既奧雲
Post a Comment