先講紐卡素對利物浦
從雙方排陣到比賽發展,以至結果都幾令小弟意外
先講排陣
主隊紐卡素可能因為怕輸
先排出一個穩守意慾既明顯既陣容
但小弟對於 Big Sam 放棄慣用既 4-3-3 陣式
而取 4-4-2 就有少少驚喜
因為小弟一直認為 4-4-2 係比較岩紐記用
但 Big Sam 既用人就有值得商榷既地方
主要問題在於中場:
a)
佢地冇一個明顯既右中場
畢特,阿倫史勿夫加埋安利3個都於中路搵食
右路倚靠既就只有今場改踢右閘既謝列美
b)
而今季多數踢左閘既尼索比亞
改踢左中場亦顯得進退失據
小弟覺得占士米拿其實可以解決這兩個問題
占士米拿+畢特+阿倫史勿夫+安利
似乎係一條比較完整既中場線
利記既排陣都有少少令人意外
盧卡斯同埋基維爾一齊踢正選
而佢地既中場線亦冇明顯既右中場
謝拉特多數於中路(有時甚至偏左)搵食
基維爾就反而有時於右路出現
不過就冇咩貢獻
就比賽發展
初段既紐記其實守得唔錯
後防4人起碼做到本份
令利記羸既只有控球時間
不過謝拉特一腳世界波打破悶局
就令到紐記開始進退失據
半場完結前如果唔係托利斯冇運
利記已羸夠兩球
下半場開波
正路期望係紐記經過調動後
會嘗試力圖反撲
不過利記初段一次角球攻勢羸到2:0
就幾打擊佢地既士氣
之後 Big Sam 再令人失望地以巴頓入替安利
廢埋紐記原本已經冇咩既創造力
場波既餘下時間基本上已經係垃圾時間
小弟之後見到既紐卡素
似斷開3份
後防依舊有4人
但踢來慌失失
中場線既組織同用波都好差
前面只有馬田斯不惜氣力去追波
維度卡根本冇態
如非後備席冇人用
佢唔可能可以踢足90分鐘
而利記方面
謝拉特基本上亦都唔使點樣幫手進攻
前線只需要有空位
托利斯,古積特同埋後備入替既巴布就會有發揮空間
如果佢地既射手(特別係托利斯)把握能力比較好
利記羸半打都唔出奇
但最後小弟想幫 Big Sam 講幾句好說話
而家既紐記係真係好令人失望
但如果隊中冇咁多傷兵
佢又肯考慮多用 4-4-2 陣式
同埋多用馬田斯
紐記依然係有希望既
而搵人替 Big Sam 真係唔易
唔通搵舒利亞咩
而紐記同佢簽左幾年貴價合約
反映佢地最初真係有心長用 Big Sam
如果而家炒佢
對紐記反而會弊多於利
Subscribe to:
Post Comments (Atom)
4 comments:
好同意你既講法，就算big sam上任以後未有咩說服力既表現，但係其實好明顯佢係有做到野。後防其實比起以前任何一年都穩左。(如果唔係失第一球世界波，我覺得今埸未必會大敗。)雖然成隊波暫時都無咩隊形，不過始終只係第一季，原本就唔期望有咩突破，big sam本人亦都講到明叫大家唔好咁期待第一年。宜家正正就係轉換期，只要比多一段時間，我相信紐記唔會令大家失望。
講番球員表現，今埸其實打得唔係話特別差(差就一定架啦，不過又唔係話最差既)如果唔係失第一球打擊哂士氣，應該未必輸得咁難睇。不過綜合番成埸波，打得好既，我諗只有基雲(唔係佢，我諗呢埸波開客其他都有份)，同埋中上既阿倫史密夫(出奇地，今埸佢打得唔錯@_@雖然佢移左入中間攪到右面無哂攻勢=.=)
杜夫就復出，我諗左面攻勢都有番保證。右面一向都應該用占士米拿，唔知點解今埸又放係後備=.=
好明顯基雲係紐記陣中最有表現既球員
佢好無奈咁要展現佢既身手
輸左兩球之後
佢既隊友保護唔到佢
中場既冇回防
後防4個企晒係度
但就慌失失
但小弟就唔覺阿倫史勿夫踢得唔錯
雖然上半場射過一腳靚波
但整體表現好一般
最後小弟覺得馬田斯係應該被讚既一個
佢由始至終都冇放棄過任何一個機會
每段都去盡力追
佢既鬥心連對方既球員都感覺到
例如盧卡斯同埋希比亞都拍下佢膊頭鼓勵佢
小弟覺得好多時得到對手既認同
比羸波既滿足感更大......
小弟覺得佢比奧雲更加應該有正選踢
講少左馬田斯，佢一路都係最有heart果個。最少我唔會見到佢係埸上行行企企。就算話佢把握力差，最少個會爭取機會。奧雲好少自己搵食，無隊友傳比佢，佢就死得~
所以見馬田斯咁多時間坐冷板
都覺得幾唔抵
因為佢只有名氣及唔上而家既奧雲
Post a Comment