有幾場波想講:
1)
第一場通常都係利物浦
聯賽不敗之身終於被打破
可能有歐聯既後顧之憂
踢得有點患得患失
而對手雷丁於主場又真係特別醒
今場仲好似特別勤力
但有睇場波既都知佢地輸得幾唔抵
和波似乎比較合理
因為有兩腳靚波都省中門框
而輸頭兩球波都幾唔抵
輸第一球既12碼
其實事發地點係禁區外
但電光火石之間又好難怪球證
要怪既反而係加歷查太魯莽
輸第二球拉爾拿既視線略為受阻
輸左都唔可以怪佢
場波既轉捩點係謝拉特既遠射中楣唔入
未能追和後兩分鐘就輸到1:3
足球比賽有時一來一回真係爭好遠
之後連賓尼迪斯都半放棄場波
托利斯,謝拉特同埋加歷查3大主力先後被換走
其中用巴布入替謝拉特前
其實賓尼迪斯想換走既係賀比斯
不過與其改踢 3-4-3 或者 3-5-2 狂攻搏個和局
倒不如留力下場作客馬賽
講返球員既表現
好多都在水準以下
但最好既一定永遠唔欺場既謝拉特
佢追成1:1球波好有功架
一控一推一射做得都好流暢
哥治同埋基維爾都 ok
其中小弟認為後者比巴布更適合對馬賽踢正選
最後想講下賀比斯
佢第一次踢正選
表現唔好唔怪得佢
佢可能真係加歷查第二
無論踢法,領導能力同埋身形都似
不過最衰既係連轉身同埋速度都似
如果賓師1月仲未被人炒
而美國老闆又肯科水
佢老人家真係要買個好中堅以備不時之需
2)
紐記都幾好野
一場波可以令人有希望之後就勁失望
想讚 Big Sam 幾句跟住又想狂插佢老人家兩刀
先講陣容
今場 Big Sam 既排陣其實可以比較進取
不過用回幾日前對阿仙奴有唔錯效果既原陣亦可理解
輸波之後用維度卡入替畢特
Big Sam 夠果斷,抵讚
佢地上半場由中段起既20分鐘
踢得幾好
但要憑球證既誤判先追和1:1就令人感覺上有瑕疵
馬田斯被侵犯時已經冇晒進攻機會
如果小弟做球證就真係唔會吹罰
追平後占士米拿既遠射中楣真係可惜
小弟認為佢既傳中落點可以好0的
其實夠晒班入國家隊
結果有幸有不幸之下佢地同對手半場只係平手
正當所有人期待紐記下半場踢得仲好之際
佢地反而被伯明翰壓住踢左起碼15分鐘
半場休息時
領隊通常趁機會調節隊波
今次就唔多明 Big Sam 搞咩
但另一方面就睇到麥利殊既功力
半場調節做得唔好
臨場再變都補到鑊
但佢老人家今場目標要羸波
亦知道對手實力唔及阿仙奴
面對對手既5人中場
點解唔早0的用安利
雖然安利落場後都唔係踢得好
但作為領隊佢老人家最少要做好本份掛
如果唔係比爾補時入波
肯定又再有佢老人家被少既傳聞
最後想講幾句紐記既防線
有時唔怪得成日被人傳佢地會於1月買後衛
面對對手單調既跑狗戰術
佢地既防線都竟然會手忙腳亂
特別係羅辛奴
輸第一球佢真係孭晒鑊
P.S.:
To: 舒利亞
小弟暑假講過羅辛奴唔係一線後衛
你而家知冇點你啦
哥安真係好貨色
不過紐記多數爭唔羸曼聯同埋曼城
Subscribe to:
Post Comments (Atom)
4 comments:
好少見賓仔咁樣放棄場波, 令我覺得佢真係就快走人!
賀比斯真係未夠班! 如果可以買件米卡李察士就好啦!
兩樣野想講:
1)
唔怪得佢老人家
輸一場聯賽唔會被人炒
下場歐聯羸唔到就已經可以執定一半包袱
2)
小弟都想米卡李察士過利記
不過冇咩可能
如果曼城肯割愛
用哥治再加錢都冇問題
無睇埸波，不過睇番精華，輸第一球羅辛奴係要負好大責任。
追和果球有少少好運，靠十二碼，不過都要讚一句馬田斯。佢真係搏先搏到人地犯規。雖然果時已經甩左個波，不過如果佢唔係試圖去追，我諗對面都唔會心急犯規。
完埸前果球，安利角球落點真係唔錯，比爾頂入亦都抵讚。
今埸我覺得馬田斯打得最好，除左射入十二碼，佢成埸都好生，如果上半埸佢接應傳中近門一射唔係比對面龍門反應快救出，一早就已經追成平手。走位咁醒活，真係幾難mark~
占士米拿今埸都打得幾好，特別係遠射好有威脅。除左中楣果球，下半埸佢係左路禁區外近k角位一射亦都好近況。希望佢試多d遠射。
讚完後，彈番少少。
羅辛奴講左，跟住彈畢特。
畢特上半埸已經俾人換走左，佢踢既時間唔多，但係竟然都搵到地方彈。都係果句，畢特傳波真係好差，呢點已經係死罪。對強隊果時，出畢特可以加強防守，始終佢係有經驗，防守亦都仲係好強。但係傳波真係......
跟住到謝列美。其實謝列美表現唔係話差，但係一來佢無咩隊長風範。(呢點好難明，佢本身係國家隊隊長，但係係球會竟然要人提埸)
二來好似無咩作為，右路攻勢真係少。
最後要彈big sam，講左好多次，中間安利拍祖爾巴頓先係最佳組合(唔係空口講白話，巴頓拍畢特，破壞力一流，創造力= 0)無睇錯阿倫史密夫係畢特換出後好似打番中埸。講真，呢幾埸睇到，阿倫史密夫打前鋒好過中埸多多聲。
p.s.因為暑假果陣未聽過羅辛奴呢個人=_=唔知佢咩料=.=
所以真係希望買到哥安。機會唔大但係最少都試試先。big sam做野啦~
幾樣野想講:
1)
越睇馬田斯
就越想奧雲走
2)
Big Sam 好似唔識用謝列美
上場用佢踢右中場
去盯住路斯基係唔錯既安排
今場 Big Sam 要求右中場多參與進攻
就似乎唔應該用謝列美
其實可用占士米拿踢右邊
左邊就用安利或者
索性將尼索比亞移前
3)
其實以紐記一條唔多穩健既防線
用謝列美踢右閘可能比較岩
Post a Comment